TITUS
White Yajur-Veda: Vajasaneyi-Samhita (Madhyandina)
Part No. 17
Previous part

Paragraph: 17 

Verse: 1 
Sentence: a    áśmann ū́rjaṃ párvate śiśriyāṇā́m adbʰyá óṣadʰībʰyo vánaspátibʰyó dʰi sámbʰr̥taṃ páyaḥ \
Sentence: b    tā́ṃ na íṣam ū́rjaṃ dʰatta marutaḥ sam̐rarāṇā́ḥ \
Sentence: c    áśmam̐s te kṣút \
Sentence: d    máyi ta ū́rk \
Sentence: e    yáṃ dviṣmás táṃ te śúg r̥ccʰatu \\

Verse: 2 
Sentence: a    imā́ me agna íṣṭakā dʰenávaḥ santv ékā ca dáśa ca dáśa ca śatáṃ ca śatáṃ ca sahásraṃ ca sahásraṃ cāyútaṃ cāyútaṃ ca niyútaṃ ca niyútaṃ ca prayútaṃ cā́rbudaṃ ca nyàrbudam̐ samudráś ca mádʰyaṃ cā́ntaś ca parārdʰáś caitā́ me agna íṣṭakā dʰenávaḥ santv amútrāmúṣmiṃl loké \\

Verse: 3 
Sentence: a    r̥táva stʰa r̥tāvŕ̥dʰa r̥tuṣṭʰā́ stʰa r̥tāvŕ̥dʰaḥ \
Sentence: b    gʰr̥taścyúto madʰuścyúto virā́jo nā́ma kāmadúgʰā ákṣīyamāṇāḥ \\

Verse: 4 
Sentence: a    samudrásya tvā́vakayā́gne pári vyayāmasi \
Sentence: b    pāvakó asmábʰyam̐ śivó bʰava \\

Verse: 5 
Sentence: a    himásya tvā jarā́yuṇā́gne pári vyayāmasi \
Sentence: b    pāvakó asmábʰyam̐ śivó bʰava \\

Verse: 6 
Sentence: a    úpa jmánn úpa vetasé va tara nadī́ṣv ā́ \
Sentence: b    ágne pittám apā́m asi \
Sentence: c    máṇḍūki tā́bʰir ā́ gahi sémáṃ no yajñáṃ pāvakávarṇam̐ śivaṃ kr̥dʰi \\

Verse: 7 
Sentence: a    apā́m idáṃ nyáyanam̐ samudrásya nivéśanam \
Sentence: b    anyā́m̐s te asmát tapantu hetáyaḥ pāvakó asmábʰyam̐ śivó bʰava \\

Verse: 8 
Sentence: a    ágne pāvaka rocíṣā mandráyā deva jihváyā \
Sentence: b    ā́ devā́n vakṣi yákṣi ca \\

Verse: 9 
Sentence: a    sá naḥ pāvaka dīdivó gne devā́m̐ ihā́ vaha \
Sentence: b    úpa yajñám̐ havíś ca naḥ \\

Verse: 10 
Sentence: a    pāvakáyā yáś citáyantyā kr̥pā́ kṣā́man rurucá uṣáso ná bʰānúnā \
Sentence: b    tū́rvan ná yā́mann étaśasya nū́ ráṇa ā́ yó gʰr̥ṇé ná tatr̥ṣāṇó ajáraḥ \\

Verse: 11 
Sentence: a    námas te hárase śocíṣe námas te astv arcíṣe \
Sentence: b    anyā́m̐s te asmát tapantu hetáyaḥ pāvakó asmábʰyam̐ śivó bʰava \\

Verse: 12 
Sentence: a    nr̥ṣáde véṭ \
Sentence: b    apsuṣáde véṭ \
Sentence: c    barhiṣáde véṭ \
Sentence: d    vanasáde véṭ \
Sentence: e    svarvíde véṭ \\

Verse: 13 
Sentence: a    yé devā́ devā́nāṃ yajñíyā yajñíyānām̐ saṃvatsarī́ṇam úpa bʰāgám ā́sate \
Sentence: b    ahutā́do havíṣo yajñé asmínt svayáṃ pibantu mádʰuno gʰr̥tásya \\

Verse: 14 
Sentence: a    yé devā́ devéṣv ádʰi devatvám ā́yan yé bráhmaṇaḥ puraetā́ro asya \
Sentence: b    yébʰyo na r̥té pávate dʰā́ma kíṃ caná ná té divó ná pr̥tʰivyā́ ádʰi snúṣu \\

Verse: 15 
Sentence: a    prāṇadā́ apānadā́ vyānadā́ varcodā́ varivodā́ḥ \
Sentence: b    anyā́m̐s te asmát tapantu hetáyaḥ pāvakó asmábʰyam̐ śivó bʰava \\

Verse: 16 
Sentence: a    agnís tigména śocíṣā yā́sad víśvaṃ ny àtríṇam \
Sentence: b    agnír no vanate rayím \\

Verse: 17 
Sentence: a    yá imā́ víśvā bʰúvanāni júhvad ŕ̥ṣir hótā ny ásīdat pitā́ naḥ \
Sentence: b    sá āśíṣā dráviṇam iccʰámānaḥ pratʰamaccʰád ávarām̐ ā́ viveśa \\

Verse: 18 
Sentence: a    kím̐ svid āsīd adʰiṣṭʰā́nam ārámbʰaṇaṃ katamát svit katʰā́sīt \
Sentence: b    yáto bʰū́miṃ janáyan viśvákarmā ví dyā́m áurṇon mahinā́ viśvácakṣāḥ \\

Verse: 19 
Sentence: a    viśvátaścakṣur utá viśvátomukʰo viśvátobāhur utá viśvátaspāt \
Sentence: b    sáṃ bāhúbʰyāṃ dʰámati sáṃ pátatrair dyā́vābʰū́mī janáyan devá ékaḥ \\

Verse: 20 
Sentence: a    kím̐ svid vánaṃ ká u sá vr̥kṣá āsa yáto dyā́vāpr̥tʰivī́ niṣṭatakṣúḥ \
Sentence: b    mánīṣiṇo mánasā pr̥ccʰátéd u tád yád adʰyátiṣṭʰad bʰúvanāni dʰāráyan \\

Verse: 21 
Sentence: a    yā́ te dʰā́māni paramā́ṇi yā́vamā́ yā́ madʰyamā́ viśvakarmann utémā́ \
Sentence: b    śíkṣā sákʰibʰyo havíṣi svadʰāvaḥ svayáṃ yajasva tanvàṃ vr̥dʰānáḥ \\

Verse: 22 
Sentence: a    víśvakarman havíṣā vāvr̥dʰānáḥ svayáṃ yajasva pr̥tʰivī́m utá dyā́m \
Sentence: b    múhyantv anyé abʰíto sapátnā ihā́smā́kaṃ magʰávā sūrír astu \\

Verse: 23 
Sentence: a    vācás pátiṃ viśvákarmāṇam ūtáye manojúvaṃ vā́je adyā́ huvema \
Sentence: b    sá no víśvāni hávanāni joṣad viśváśambʰūr ávase sādʰúkarmā \\

Verse: 24 
Sentence: a    víśvakarman havíṣā várdʰanena trātā́ram índram akr̥ṇor avadʰyám \
Sentence: b    tásmai víśaḥ sámanamanta pūrvī́r ayám ugró vihávyo yátʰā́sat \\

Verse: 25 
Sentence: a    cákṣuṣaḥ pitā́ mánasā hí dʰī́ro gʰr̥tám ene ajanan námnamāne \
Sentence: b    yadéd ántā ádadr̥hanta pū́rva ā́d íd dyā́vāpr̥tʰivī́ apratʰetām \\

Verse: 26 
Sentence: a    viśvákarmā vímanā ā́d víhāyā dʰātā́ vidʰātā́ paramótá saṃdŕ̥k \
Sentence: b    téṣām iṣṭā́ni sám iṣā́ madanti yátrā saptar̥ṣī́n pará ékam āhúḥ \\

Verse: 27 
Sentence: a    yó naḥ pitā́ janitā́ yó vidʰātā́ dʰā́māni véda bʰúvanāni víśvā \
Sentence: b    yó devā́nāṃ nāmadʰā́ éka evá tám̐ saṃpraśnáṃ bʰúvanā yanty anyā́ \\

Verse: 28 
Sentence: a    tá ā́yajanta dráviṇam̐ sám asmā ŕ̥ṣayaḥ pū́rve jaritā́ro ná bʰūnā́ \
Sentence: b    asū́rte sū́rte rájasi niṣatté yé bʰūtā́ni samákr̥ṇvann imā́ni \\

Verse: 29 
Sentence: a    paró divā́ pará enā́ pr̥tʰivyā́ paró devébʰir ásurair yád ásti \
Sentence: b    kám̐ svid gárbʰaṃ pratʰamáṃ dadʰra ā́po yátra devā́ḥ samápaśyanta pū́rve \\

Verse: 30 
Sentence: a    tám íd gárbʰaṃ pratʰamáṃ dadʰra ā́po yátra devā́ḥ samágaccʰanta víśve \
Sentence: b    ajásya nā́bʰāv ádʰy ékam árpitaṃ yásmin víśvāni bʰúvanāni tastʰúḥ \\

Verse: 31 
Sentence: a    ná táṃ vidātʰa yá imā́ jajā́nānyád yuṣmā́kam ántaraṃ babʰūva \
Sentence: b    nīhāréṇa prā́vr̥tā jálpyā cāsutŕ̥pa uktʰaśā́saś caranti \\

Verse: 32 
Sentence: a    viśvákarmā hy ájaniṣṭa devá ā́d íd gandʰarvó abʰavad dvitī́yaḥ \
Sentence: b    tr̥tī́yaḥ pitā́ janitáuṣadʰīnām apā́ṃ gárbʰaṃ vy àdadʰāt purutrā́ \\

Verse: 33 
Sentence: a    āśúḥ śíśāno vr̥ṣabʰó ná bʰīmó gʰanāgʰanáḥ kṣóbʰaṇaś carṣaṇīnā́m \
Sentence: b    saṃkrándano nimiṣá ekavīráḥ śatám̐ sénā ajayat sākám índraḥ \\

Verse: 34 
Sentence: a    saṃkrándanenānimiṣéṇa jiṣṇúnā yutkāréṇa duścyavanéna dʰr̥ṣṇúnā \
Sentence: b    tád índreṇa jayata tát sahadʰvaṃ yúdʰo nara íṣuhastena vŕ̥ṣṇā \\

Verse: 35 
Sentence: a    sá íṣuhastaiḥ sá niṣaṅgíbʰir vaśī́ sám̐sraṣṭā sá yúdʰa índro gaṇéna \
Sentence: b    sam̐sr̥ṣṭajít somapā́ bāhuśardʰy ùgrádʰanvā prátihitābʰir ástā \\

Verse: 36 
Sentence: a    bŕ̥haspate pári dīyā rátʰena rakṣohā́mítrān apabā́dʰamānaḥ \
Sentence: b    prabʰañjánt sénāḥ pramr̥ṇó yudʰā́ jáyann asmā́kam edʰy avitā́ rátʰānām \\

Verse: 37 
Sentence: a    balavijñāyá stʰáviraḥ právīraḥ sáhasvān vājī́ sáhamāna ugráḥ \
Sentence: b    abʰívīro abʰísatvā sahojā́ jáitram indra rátʰam ā́ tiṣṭʰa govít \\

Verse: 38 
Sentence: a    gotrabʰídaṃ govídaṃ vájrabāhuṃ jáyantam ájma pramr̥ṇántam ójasā \
Sentence: b    imám̐ sajātā ánu vīrayadʰvam índram̐ sakʰāyo ánu sám̐ rabʰadʰvam \\

Verse: 39 
Sentence: a    abʰí gotrā́ṇi sáhasā gā́hamāno dayó vīráḥ śatámanyur índraḥ \
Sentence: b    duścyavanáḥ pr̥tanāṣā́ḍ ayudʰyò smā́kam̐ sénā avatu prá yutsú \\

Verse: 40 
Sentence: a    índra āsāṃ netā́ bŕ̥haspátir dákṣiṇā yajñáḥ purá etu sómaḥ \
Sentence: b    devasenā́nām abʰibʰañjatīnā́ṃ jáyantīnāṃ marúto yantv ágram \\

Verse: 41 
Sentence: a    índrasya vŕ̥ṣṇo váruṇasya rā́jña ādityā́nāṃ marútām̐ śárdʰa ugrám \
Sentence: b    mahā́manasāṃ bʰuvanacyavā́nāṃ gʰóṣo devā́nāṃ jáyatām úd astʰāt \\

Verse: 42 
Sentence: a    úd dʰarṣaya magʰavann ā́yudʰāny út sátvanāṃ māmakā́nāṃ mánām̐si \
Sentence: b    úd vr̥trahan vājínāṃ vā́jināny úd rátʰānāṃ jáyatāṃ yantu gʰóṣāḥ \\

Verse: 43 
Sentence: a    asmā́kam índraḥ sámr̥teṣu dʰvajéṣv asmā́kaṃ yā́ íṣavas tā́ jayantu \
Sentence: b    asmā́kaṃ vīrā́ úttare bʰavantv asmā́m̐ u devā avatā háveṣu \\

Verse: 44 
Sentence: a    amī́ṣāṃ cittáṃ pratilobʰáyantī gr̥hāṇā́ṅgāny apve párehi \
Sentence: b    abʰí préhi nír daha hr̥tsú śókair andʰénāmítrās támasā sacantām \\

Verse: 45 
Sentence: a    ávasr̥ṣṭā párā pata śáravye bráhmasam̐śite \
Sentence: b    gáccʰāmítrān prá padyasva mā́mī́ṣāṃ káṃ canóc cʰiṣaḥ \\

Verse: 46 
Sentence: a    prétā jáyatā nara índro vaḥ śárma yaccʰatu \
Sentence: b    ugrā́ vaḥ santu bāhávo nādʰr̥ṣyā́ yátʰā́satʰa \\

Verse: 47 
Sentence: a    asáu yā́ sénā marutaḥ páreṣām abʰyáiti na ójasā spárdʰamānā \
Sentence: b    tā́ṃ gūhata támasā́pavratena yátʰāmī́ anyó anyáṃ ná jānán \\

Verse: 48 
Sentence: a    yátra vāṇāḥ sampátanti kumārā́ viśikʰā́ iva \
Sentence: b    tátra índro bŕ̥haspátir áditiḥ śárma yaccʰatu viśvā́hā śárma yaccʰatu \\

Verse: 49 
Sentence: a    mármāṇi te vármaṇā cʰādayāmi sómas tvā rā́jāmŕ̥tenā́nu vastām \
Sentence: b    urór várīyo váruṇas te kr̥ṇotu jáyantaṃ tvā́nu devā́ madantu \\

Verse: 50 
Sentence: a    úd enam uttarā́ṃ nayā́gne gʰr̥tenāhuta \
Sentence: b    rāyáspóṣeṇa rám̐ sr̥ja prajáyā ca bahúṃ kr̥dʰi \\

Verse: 51 
Sentence: a    índremáṃ pratarā́ṃ naya sajātā́nām asadvaśī́ \
Sentence: b    sám enaṃ várcasā sr̥ja devā́nāṃ bʰāgadā́ asat \\

Verse: 52 
Sentence: a    yásaya kurmó gr̥hé havís tám agne vardʰayā tvám \
Sentence: b    tásmai devā́ ádʰi bravann ayáṃ ca bráhmaṇaspátiḥ \\

Verse: 53 
Sentence: a    úd u tvā víśve devā́ ágne bʰarantu cíttibʰiḥ \
Sentence: b    sá no bahva śivás tvám̐ suprátīko vibʰā́vasuḥ \\

Verse: 54 
Sentence: a    páñca díśo dáivīr yajñám avantu devī́r ápā́matiṃ dúrmatiṃ bā́dʰamānāḥ \
Sentence: b    rāyáspóṣe yajñápatim ābʰájantī rāyáspóṣe ádʰi yajñó astʰāt \\

Verse: 55 
Sentence: a    sámiddʰe agnā́v ádʰi māmahāná uktʰápatra ī́ḍyo gr̥bʰītáḥ \
Sentence: b    taptáṃ gʰarmáṃ parigŕ̥hyāyajantorjā́ yád yajñám áyajanta devā́ḥ \\

Verse: 56 
Sentence: a    dáivyāya dʰartré jóṣṭre devaśrī́ḥ śrī́manāḥ śatápayāḥ \
Sentence: b    parigŕ̥hya devā́ yajñám āyan devā́ devébʰyo adʰvaryánto astʰuḥ \\

Verse: 57 
Sentence: a    vītám̐ havíḥ śamitám̐ śamitā́ yajádʰyai turī́yo yajñó yátra havyám éti \
Sentence: b    táto vākā́ āśíṣo no juṣantām \\

Verse: 58 
Sentence: a    sū́ryaraśmir hárikeśaḥ purástāt savitā́ jyótir úd ayām̐ ájasram \
Sentence: b    tásya pūṣā́ prasavé yāti vidvā́nt sampáśyan víśvā bʰúvanāni gopā́ḥ \\

Verse: 59 
Sentence: a    vimā́na eṣá divó mádʰya āsta āpaprivā́n ródasī antárikṣam \
Sentence: b    sá viśvā́cīr abʰí caṣṭe gʰr̥tā́cīr antarā́ pū́rvam áparaṃ ca ketúm \\

Verse: 60 
Sentence: a    ukṣā́ samudró aruṇáḥ suparṇáḥ pū́rvasya yóniṃ pitúr ā́ viveśa \
Sentence: b    mádʰye divó níhitaḥ pŕ̥śnir áśmā ví cakrame rájasas pāty ántau \\

Verse: 61 
Sentence: a    índraṃ víśvā avīvr̥dʰant samudrávyacasaṃ gíraḥ \
Sentence: b    ratʰī́tamam̐ ratʰī́nāṃ vā́jānām̐ sátpatiṃ pátim \\

Verse: 62 
Sentence: a    devahū́r yajñá ā́ ca vakṣat sumnahū́r yajñá ā́ ca vakṣat \
Sentence: b    yákṣad agnír devó devā́m̐ ā́ ca vakṣat \\

Verse: 63 
Sentence: a    vájasya mā prasavé udgrābʰéṇód agrabʰīt \
Sentence: b    ádʰa sapátnān índro me nigrābʰéṇā́dʰarām̐ akaḥ \\

Verse: 64 
Sentence: a    udgrābʰáṃ ca nigrābʰáṃ ca bráhma devā́ avīvr̥dʰan \
Sentence: b    ádʰā sapátnān indrāgnī́ me viṣūcī́nān vy àsyatām \\

Verse: 65 
Sentence: a    krámadʰvam agnínā nā́kam úkʰyam̐ hásteṣu bíbʰrataḥ \
Sentence: b    divás pr̥ṣṭʰám̐ svàr gatvā́ miśrā́ devébʰir ādʰvam \\

Verse: 66 
Sentence: a    prā́cīm ánu pradíśaṃ préhi vidvā́n agnér agne puróagnir bʰavehá \
Sentence: b    víśvā ā́śā dī́dyāno ví bʰāhy ū́rjaṃ no dʰehi dvipáde cátuṣpade \\

Verse: 67 
Sentence: a    pr̥tʰivyā́ ahám úd antárikṣam ā́ruham antárikṣād dívam ā́ruham \
Sentence: b    divó nā́kasya pr̥ṣṭʰā́t svàr jyótir agām ahám \\

Verse: 68 
Sentence: a    svàr yánto nā́pekṣanta ā́ dyā́m̐ rohanti ródasī \
Sentence: b    yajñáṃ yé viśvátodʰāram̐ súvidvām̐so viteniré \\

Verse: 69 
Sentence: a    ágne préhi pratʰamó devayatā́ṃ cákṣur devā́nām utá mártyānām \
Sentence: b    íyakṣamāṇā bʰŕ̥gubʰiḥ sajóṣāḥ svàr yantu yájamānāḥ svastí \\

Verse: 70 
Sentence: a    náktoṣā́sā sámanasā vírūpe dʰāpáyete śíśum ékam̐ samīcī́ \
Sentence: b    dyā́vākṣā́mā rukmó antár ví bʰāti devā́ agníṃ dʰārayan draviṇodā́ḥ \\

Verse: 71 
Sentence: a    ágne sahasrākṣa śatamūrdʰañ cʰatáṃ te prāṇā́ḥ sahásraṃ vyānā́ḥ \
Sentence: b    tvám̐ sāhasrásya rāyá īśiṣe tásmai te vidʰema vā́jāya svā́hā \\

Verse: 72 
Sentence: a    suparṇò si garúnmān pr̥ṣṭʰé pr̥tʰivyā́ḥ sīda \
Sentence: b    bʰāsā́ntárikṣam ā́ pr̥ṇa jyótiṣā dívam út tabʰāna téjasā díśa úd dr̥m̐ha \\

Verse: 73 
Sentence: a    ājúhvānaḥ suprátīkaḥ purástād ágne yónim ā́ sīda sādʰuyā́ \
Sentence: b    asmínt sashástʰe ádʰy úttarasmin víśve devā yájamānaś ca sīdata \\

Verse: 74 
Sentence: a    tám̐ savitúr váreṇyasya citrā́m ā́háṃ vr̥ṇe sumatíṃ viśvájanyām \
Sentence: b    yā́m asya káṇvo áduhat prápīnām̐ sahásradʰārāṃ páyasā mahī́ṃ gā́m \\

Verse: 75 
Sentence: a    vidʰéma te paramé jánmann agne vidʰéma stómair ávare sadʰástʰe \
Sentence: b    yásmād yóner udā́ritʰā yáje táṃ prá tvé havī́m̐ṣi juhure sámiddʰe \\

Verse: 76 
Sentence: a    préddʰo agne dīdihi puró nó jasrayā sūrmyā̀ yaviṣṭʰa \
Sentence: b    tvā́m̐ śáśvanta úpa yanti vā́jāḥ \\

Verse: 77 
Sentence: a    ágne tám adyā́śvaṃ ná stómaiḥ krátuṃ ná bʰadrám̐ hr̥dispŕ̥śam \
Sentence: b    r̥dʰyā́mā ta óhaiḥ \\

Verse: 78 
Sentence: a    cíttiṃ juhomi mánasā gʰr̥téna yátʰā devā́ ihā́gáman vītíhotrā r̥tāvŕ̥dʰaḥ \
Sentence: b    pátye víśvasya bʰū́mano juhómi viśvákarmaṇe viśvā́hā́dābʰyam̐ haví \\

Verse: 79 
Sentence: a    saptá te agne samídʰaḥ saptá jihvā́ḥ saptá ŕ̥ṣayaḥ saptá dʰā́ma priyā́ṇi \
Sentence: b    saptá hótrāḥ saptadʰā́ tvā yajanti saptá yónīr ā́ pr̥ṇasva gʰr̥téna svā́hā \\

Verse: 80 
Sentence: a    śukrájyotiś ca citrájyotiś ca satyájyotiś ca jyótiṣmām̐ś ca \
Sentence: b    śukráś ca r̥tapā́ś cā́tyam̐hāḥ \\

Verse: 81 
Sentence: a    īdŕ̥ṅ cānyadŕ̥ṅ ca sadŕ̥ṅ ca prátisadr̥ṅ ca \
Sentence: b    mitáś ca sáṃmitaś ca sábʰarāḥ \\

Verse: 82 
Sentence: a    r̥táś ca satyáś ca dʰruváś ca dʰarúṇaś ca \
Sentence: b    dʰartā́ ca vidʰartā́ ca vidʰārayáḥ \\

Verse: 83 
Sentence: a    r̥tajíc ca satyajíc ca senajíc ca suṣéṇaś ca \
Sentence: b    ántimitraś ca dūréamitraś ca gaṇáḥ \\

Verse: 84 
Sentence: a    īdŕ̥kṣāsa etādŕ̥kṣāsa ū ṣú ṇaḥ sadŕ̥kṣāsaḥ prátisadr̥kṣāsa étana \
Sentence: b    mitā́saś ca sáṃmitāso no adyá sábʰaraso maruto yajñé asmín \\

Verse: 85 
Sentence: a    svátavām̐ś ca pragʰāsī́ ca sāṃtapanáś ca gr̥hamedʰī́ ca \
Sentence: b    krīḍī́ ca śākī́ cojjeṣī́ \\

Verse: 86 
Sentence: a    ugráś ca bʰīmáś ca dʰvā̀ntaś ca dʰúniś ca \
Sentence: b    sāsahvā́m̐ś cābʰiyugvā́ ca vikṣípaḥ svā́hā \
Sentence: c    índraṃ dáivīr víśo marútó nuvartmāno bʰavan yátʰéndraṃ dáivīr víśo marútó nuvartmānó bʰavan \
Sentence: d    evám imáṃ yájamānaṃ dáivīś ca víśo mānuṣī́ś cā́nuvartmāno bʰavantu \\

Verse: 87 
Sentence: a    imám̐ stánam ū́rjasvantaṃ dʰayāpā́ṃ prápīnam agne sarirásya mádʰye \
Sentence: b    útsaṃ juṣasva mádʰumantam arvant samudríyam̐ sádanam ā́ viśasva \\

Verse: 88 
Sentence: a    gʰr̥táṃ mimikṣe gʰr̥tám asya yónir gʰr̥té śritó gʰr̥tám v asya dʰā́ma \
Sentence: b    anuṣvadʰám ā́ vaha mādáyasva svā́hākr̥taṃ vr̥ṣabʰa vakṣi havyám \\

Verse: 89 
Sentence: a    samudrā́d ūrmír mádʰumām̐ úd ārad úpām̐śúnā sám amr̥tatvám ānaṭ \
Sentence: b    gʰr̥tásya nā́ma gúhyaṃ yád ásti jihvā́ devā́nām amŕ̥tasya nā́bʰiḥ \\

Verse: 90 
Sentence: a    vayáṃ nā́ma prá bravāmā gʰr̥tásyāsmín yajñé dʰārayāmā námobʰiḥ \
Sentence: b    úpa brahmā́ śr̥ṇavac cʰasyámānaṃ cátuḥśr̥ṅgo vamīd gaurá etát \\

Verse: 91 
Sentence: a    catvā́ri śŕ̥ṅgā tráyo asya pā́dā dvé śīrṣé saptá hástāso asya \
Sentence: b    trídʰā baddʰó vr̥ṣabʰó roravīti mahó devó mártyām̐ ā́ viveśa \\

Verse: 92 
Sentence: a    trídʰā hitáṃ paṇíbʰir guhyámānaṃ gávi devā́so gʰr̥tám ánv avindan \
Sentence: b    índra ékam̐ sū́rya ékaṃ jajāna venā́d ékam̐ svadʰáyā níṣ ṭatakṣuḥ \\

Verse: 93 
Sentence: a    etā́ arṣanti hŕ̥dyāt samudrā́c cʰatávrajā ripúṇā nā́vacákṣe \
Sentence: b    gʰr̥tásya dʰā́rā abʰí cākaśīmi hiraṇyáyo vetasó mádʰya āsām \\

Verse: 94 
Sentence: a    samyák sravanti saríto ná dʰénā antár hr̥dā́ mánasā pūyámānāḥ \
Sentence: b    eté arṣanty ūrmáyo gʰr̥tásya mr̥gā́ iva kṣipaṇór ī́ṣamāṇāḥ \\

Verse: 95 
Sentence: a    síndʰor iva prādʰvané śūgʰanā́so vā́tapramiyaḥ patayanti yahvā́ḥ \
Sentence: b    gʰr̥tásya dʰā́rā aruṣó ná vājī́ kā́ṣṭʰā bʰindánn ūrmíbʰiḥ pínvamānaḥ \\

Verse: 96 
Sentence: a    abʰí pravanta sámaneva yóṣāḥ kalyāṇyàḥ smáyamānāso agním \
Sentence: b    gʰr̥tásya dʰā́rāḥ samídʰo nasanta tā́ juṣāṇó haryati jātávedāḥ \\

Verse: 97 
Sentence: a    kanyā̀ iva vahatúm étavā́ u añjy àñjānā́ abʰí cākaśīmi \
Sentence: b    yátra sómaḥ sūyáte yátra yajñó gʰr̥tásya dʰā́rā abʰí tát pavante \\

Verse: 98 
Sentence: a    abʰy àrṣata suṣṭutíṃ gávyam ājím asmā́su bʰadrā́ dráviṇāni dʰatta \
Sentence: b    imáṃ yajñáṃ nayata devátā no gʰr̥tásya dʰā́rā mádʰumat pavante \\

Verse: 99 
Sentence: a    dʰā́man te víśvaṃ bʰúvanam ádʰi śritám antáḥ samudré hr̥dy àntár ā́yuṣi \
Sentence: b    apā́m ánīke samitʰé yá ā́bʰr̥tas tám aśyāma mádʰumantaṃ ta ūrmím \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.