TITUS
White Yajur-Veda: Vajasaneyi-Samhita (Madhyandina)
Part No. 18
Previous part

Paragraph: 18 

Verse: 1 
Sentence: a    vájaś ca me prasaváś ca me práyatiś ca me prásitiś ca me dʰītíś ca me krátuś ca me sváraś ca me ślókaś ca me śraváś ca me śrútiś ca me jyótiś ca me svàś ca me yajñéna kalpantām \\

Verse: 2 
Sentence: a    prāṇáś ca me pānáś ca me vyānáś ca mé suś ca me cittáṃ ca ma ā́dʰītaṃ ca me vā́k ca me mánaś ca me cákṣuś ca me śrótraṃ ca me dákṣaś ca me bálaṃ ca me yajñéna kalpantām \\

Verse: 3 
Sentence: a    ójas ca me sáhaś ca ma ātmā́ ca me tanū́ś ca me śárma ca me várma ca mé ṅgāni ca mé stʰāni ca me párūm̐ṣi ca me śárīrāṇi ca ma ā́yuś ca me jarā́ ca me yajñéna kalpantām \\

Verse: 4 
Sentence: a    jyáiṣṭʰyaṃ ca me ā́dʰipatyaṃ ca me manyúś ca me bʰā́maś ca mé maś ca mé mbʰaś ca me mahimā́ ca me varimā́ ca me pratʰimā́ ca me varṣimā́ ca me drāgʰimā́ ca me vr̥ddʰáṃ ca me vŕ̥ddʰiś ca me yajñéna kalpantām \\

Verse: 5 
Sentence: a    satyáṃ ca me śraddʰā́ ca me jágac ca me dʰánaṃ ca me víśvaṃ ca me máhaś ca me krīḍā́ ca me módaś ca me jātáṃ ca me janiṣyámāṇaṃ ca me sūktáṃ ca me sukr̥táṃ ca me yajñéna kalpantām \\

Verse: 6 
Sentence: a    r̥táṃ ca mé mŕ̥taṃ ca mé yakṣmáṃ ca mé nāmayac ca me jīvā́tuś ca me dīrgʰāyutváṃ ca me namitráṃ ca mé bʰayaṃ ca me sukʰáṃ ca me śáyanaṃ ca me suṣā́ś ca me sudínaṃ ca me yajñéna kalpantām \\

Verse: 7 
Sentence: a    yantā́ ca me dʰartā́ ca me kṣémaś ca me dʰŕ̥tiś ca me víśvaṃ ca me máhaś ca me saṃvíc ca me jñā́traṃ ca me sū́ś ca me prasū́ś ca me sī́raṃ ca me láyaś ca me yajñéna kalpantām \\

Verse: 8 
Sentence: a    śáṃ ca me máyaś ca me priyáṃ ca me nukāmáś ca me kā́maś ca me saumanasáś ca me bʰágaś ca me dráviṇaṃ ca me bʰadráṃ ca me śréyaś ca me vásīyaś ca me yáśaś ca me yajñéna kalpantām \\

Verse: 9 
Sentence: a    ū́rk ca me sūnŕ̥tā ca me páyaś ca me rásaś ca me gʰr̥táṃ ca me mádʰu ca me ságdʰiś ca me sápītiś ca me kr̥ṣíś ca me vŕ̥ṣṭiś ca me jáitraṃ ca ma áudbʰidyaṃ ca me yajñéna kalpantām \\

Verse: 10 
Sentence: a    rayíś ca me rā́yaś ca me puṣṭáṃ ca me púṣṭiś ca me vibʰú ca me prabʰú ca me pūrṇáṃ ca me pūrṇátaraṃ ca me kúyavaṃ ca mé kṣitaṃ ca mé nnaṃ ca mé kṣuc ca me yajñéna kalpantām \\

Verse: 11 
Sentence: a    vittáṃ ca me védyaṃ ca me bʰūtáṃ ca me bʰaviṣyác ca me sugáṃ ca me supatʰyàṃ ca ma r̥ddʰáṃ ca ma ŕ̥ddʰiś ca me kḷptáṃ ca me k=E6ptiś ca me matíś ca me sumatíś ca me yajñéna kalpantām \\

Verse: 12 
Sentence: a    vrīháyaś ca me yávāś ca me mā́ṣāś ca me tílāś ca me mudrā́ś ca me kʰálvāś ca me priyáṅgavaś ca mé ṇavaś ca me śyāmā́kāś ca me nīvā́rāś ca me godʰū́māś ca me masū́rāś ca me yajñéna kalpantām \\

Verse: 13 
Sentence: a    áśmā ca me mŕ̥ttikā ca me giráyaś ca me párvatāś ca me síkatāś ca me vánaspátayaś ca me híraṇyaṃ ca mé yaś ca me śyāmáṃ ca me loháṃ ca me sī́saṃ ca me trápu ca me yajñéna kalpantām \\

Verse: 14 
Sentence: a    agníś ca ma ā́paś ca me vīrúdʰaś ca ma óṣadʰayaś ca me kr̥ṣṭapacyā́ś ca me kr̥ṣṭapacyā́ś ca me grāmyā́ś ca me paśáva āraṇyā́ś ca me vittáṃ ca me víttiś ca me bʰūtáṃ ca me bʰū́tiś ca me yajñéna kalpantām \\

Verse: 15 
Sentence: a    vásu ca me vasatíś ca me kárma ca me śáktiś ca mé rtʰaś ca ma émaś ca ma ityā́ ca me gátiś ca me yajñéna kalpantām \\

Verse: 16 
Sentence: a    agníś ca ma índraś ca me sómaś ca ma índraś ca me savitā́ ca ma índraś ca me sárasvatī ca ma índraś ca me pūṣā́ ca ma índraś ca me bŕ̥haspátiś ca ma índraś ca me yajñéna kalpantām \\

Verse: 17 
Sentence: a    mitráś ca ma índraś ca me váruṇaś ca ma índraś ca me dʰātā́ ca ma índraś ca me tváṣṭā ca ma índraś ca me marútaś ca ma índraś ca me víśve ca me devā́ índraś ca me yajñéna kalpantām \\

Verse: 18 
Sentence: a    pr̥tʰivī́ ca ma índraś ca mé ntárikṣaṃ ca ma índraś ca me dyáuś ca ma índraś ca me sámāś ca ma índraś ca me nákṣatrāṇi ca ma índraś ca me díśaś ca ma índraś ca me yajñéna kalpantām \\

Verse: 19 
Sentence: a    am̐śúś ca me raśmíś ca mé dābʰyaś ca mé dʰipatiś ca ma upām̐śúś ca me ntaryāmáś ca ma aindravāyaváś ca me maitrāvaruṇáś ca ma āśvináś ca me pratiprastʰā́naś ca me śukráś ca me mantʰī́ ca me yajñéna kalpantām \\

Verse: 20 
Sentence: a    āgrayāṇáś ca me vaiśvadeváś ca me dʰruváś ca me vaiśvānaráś ca ma aindrāgnáś ca me mahā́vaiśvadevaś ca me marutvatī́yāś ca me níṣkevalyaś ca me sāvitráś ca me sārasvatáś ca me patnīvatáś ca me hāriyaojanáś ca me yajñéna kalpantām \\

Verse: 21 
Sentence: a    srúcaś ca me camasā́ś ca me vāyavyā̀ni ca me droṇakalaśáś ca me grā́vāṇaś ca me dʰiṣávaṇe ca me pūtabʰŕ̥c ca ma ādʰavanī́yaś ca me védiś ca me barhíś ca me vabʰr̥táś ca me svagākāráś ca me yajñéna kalpantām \\

Verse: 22 
Sentence: a    agníś ca me gʰarmáś ca me rkáś ca me sū́ryaś ca me prāṇáś ca me svamedʰáś ca me pr̥tʰivī́ ca mé ditiś ca me dítiś ca me dyáuś ca me ṅgúlayaḥ śákvarayo díśaś ca me yajñéna kalpantām \\

Verse: 23 
Sentence: a    vratáṃ ca ma r̥távaś ca me tápaś ca me saṃvatsaráś ca me horātré ūrvaṣṭʰīvé br̥hadratʰantaré ca me yajñéna kalpantām \\

Verse: 24 
Sentence: a    ékā ca me tisráś ca me tisráś ca me páñca ca me páñca ca me saptá ca me saptá ca me náva ca me náva ca ma ékādaśa ca ma ékādaśa ca me tráyodaśa ca me tráyodaśa ca me páñcadaśa ca me páñcadaśa ca me saptádaśa ca me śaptádaśa ca me návadaśa ca me návadaśa ca ma ékavim̐śatiś ca ma ékavim̐śatiś ca me tráyovim̐śatiś ca me tráyovim̐śatiś ca me páñcavim̐śatiś ca me páñcavim̐śatiś ca me saptávim̐śatiś ca me saptávim̐śatiś ca me návavim̐śatiś ca me návavim̐śatiś ca ma ékatrim̐śac ca ma ékatrim̐śac ca me tráyastrim̐śac ca me tráyastrim̐śac ca me yajñéna kalpantām \\

Verse: 25 
Sentence: a    cátasraś ca me ṣṭáu ca me ṣṭáu ca me dvā́daśa ca me dvā́daśa ca me ṣóḍaśa ca me ṣóḍaśa ca me vim̐śatíś ca me vim̐śatiś ca me cáturvim̐śatiś ca me cáturvim̐śatíś ca me ṣṭā́vim̐śatiś ca me ṣṭā́vim̐śatiś ca me dvā́trim̐śac ca me dvā́trim̐śac ca me ṣáṭtrim̐śac ca me ṣáṭtrim̐śac ca me catvārim̐śác ca me catvārim̐śác ca me cátuścatvārim̐śac ca me cátuścatvārim̐śac ca me ṣṭā́catvārim̐śac ca me ṣṭā́catvārim̐śac ca me yajñéna kalpantām \\

Verse: 26 
Sentence: a    tryáviś ca me tryavī́ ca me dityavā́ṭ ca me dityauhī́ ca me pañcāvíś ca me pañcāvī́ ca me trivatsáś ca me trivatsā́ ca me turyavā́ṭ ca me turyauhī́ ca me yajñéna kalpantām \\

Verse: 27 
Sentence: a    paṣṭʰavā́ṭ ca me paṣṭʰauhī́ ca ma ukṣā́ ca me vaśā́ ca ma r̥ṣabʰáś ca me vehác ca me naḍvā́m̐ś ca me dʰenúś ca me yajñéna kalpantām \\

Verse: 28 
Sentence: a    vā́jāya svā́hā prasavā́ya svā́hāpijā́ya svā́hā krátave svā́hā vásave svā́hāharpátaye svā́hā́hne svā́hā mugdʰā́ya svā́hā mugdʰā́ya vainam̐śinā́ya svā́hāvinam̐śína āntyāyanā́ya svā́hā́ntyāya bʰauvanā́ya svā́hā bʰúvanasya pátaye svā́hā́dʰipataye svā́hā prajā́pataye svā́hā \
Sentence: b    iyáṃ te rā́ṇ mitrā́ya yantā́si yámana ūrjé tvā vŕ̥ṣṭyai tvā prajā́nāṃ tvā́dʰipatyāya \\

Verse: 29 
Sentence: a    ā́yur yajñéna kalpatāṃ prāṇó yajñéna kalpatāṃ cákṣur yajñéna kalpatām̐ śrótraṃ yajñéna kalpatāṃ vā́g yajñéna kalpatāṃ máno yajñéna kalpatām ātmā́ yajñéna kalpatāṃ brahmā́ yajñéna kalpatāṃ jyótir yajñéna kalpatām̐ svàr yajñéna kalpatāṃ pr̥ṣṭʰáṃ yajñéna kalpatāṃ yajñó yajñéna kalpatām \
Sentence: b    stómaś ca yś ca ŕ̥k ca sā́ma ca br̥hác ca ratʰantaráṃ ca \
Sentence: c    svàr devā aganmāmŕ̥tā abʰūma prajā́pateḥ prajā́ abʰūma véṭ svā́hā \\

Verse: 30 
Sentence: a    vā́jasya nú prasavé mātáraṃ mahī́m áditiṃ nā́ma vácasā karāmahe \
Sentence: b    yásyām idáṃ víśvaṃ bʰúvanam āvivéśa tásyāṃ no deváḥ savitā́ dʰárma sāviṣat \\

Verse: 31 
Sentence: a    víśve adyá marúto víśva ūtī́ víśve bʰavantv agnáyaḥ sámiddʰāḥ \
Sentence: b    víśve no devā́ ávasā́ gamantu víśvam astu dráviṇaṃ vā́jo asmé \\

Verse: 32 
Sentence: a    vā́jo naḥ saptá pradíśaś cátasro vā parāvátaḥ \
Sentence: b    vā́jo no víśvair deváir dʰánasātāv ihā́vatu \\

Verse: 33 
Sentence: a    vā́jo no adyá prá suvāti dā́naṃ vā́jo devā́m̐ r̥túbʰiḥ kalpayāti \
Sentence: b    vā́jo hí mā sárvavīraṃ jajā́na víśvā ā́śā vā́japatir jayeyam \\

Verse: 34 
Sentence: a    vájaḥ purástād utá madʰyató no vā́jo devā́n havíṣā vardʰayāti \
Sentence: b    vā́jo hí mā sárvavīraṃ cakā́ra sárvā ā́śā vā́japatir bʰaveyam \\

Verse: 35 
Sentence: a    sáṃ mā sr̥jāmi páyasā pr̥tʰivyā́ḥ sáṃ mā sr̥jāmy adbʰír óṣadʰībʰiḥ \
Sentence: b    sò háṃ vā́jam̐ saneyam agne \\

Verse: 36 
Sentence: a    páyaḥ pr̥tʰivyā́ṃ páya óṣadʰīṣu páyo divy àntárikṣe páyo dʰāḥ \
Sentence: b    páyasvatīḥ pradíśaḥ santu máhyam \\

Verse: 37 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    sárasvatyai vācó yantúr yantréṇāgnéḥ sā́mrājyenābʰí ṣiñcāmi \\

Verse: 38 
Sentence: a    r̥tāṣā́ḍ r̥tádʰāmāgnír gandʰarvás tásyáuṣadʰayo psaráso múdo nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 39 
Sentence: a    sam̐hitó viśvásāmā sū́ryo gandʰarvás tásya márīcayo psarása āyúvo nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 40 
Sentence: a    suṣumṇáḥ sū́ryaraśmiś candrámā gandʰarvás tásya nákṣatrāṇy apsaráso bʰekúrayo nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 41 
Sentence: a    iṣiró viśvávyacā vā́to gandʰarvás tásyápo apsarása ū́rjo nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 42 
Sentence: a    bʰujyúḥ suparṇó yajñó gandʰarvás tásya dákṣiṇā apsarása stāvā́ nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 43 
Sentence: a    prajā́patir viśvákarmā máno gandʰarvás tásya r̥ksāmā́ny apsarása éṣṭayo nā́ma \
Sentence: b    sá na idáṃ bráhma kṣatráṃ pātu tásmai svā́hā vā́ṭ tā́bʰyaḥ svā́hā \\

Verse: 44 
Sentence: a    sá no bʰuvanasya pate prajāpate yásya ta upári gr̥hā́ yásya vehá \
Sentence: b    asmái bráhmaṇe smái kṣatrā́ya máhi śárma yaccʰa svā́hā \\

Verse: 45 
Sentence: a    samudrò si nábʰasvān ārdrádānuḥ śambʰū́r mayobʰū́r abʰí mā vāhi svā́hā \
Sentence: b    mārutò si marútāṃ gaṇáḥ śambʰū́r mayobʰū́r abʰí mā vāhi svā́hā \
Sentence: c    avasyū́r asi dúvasvāñ cʰambʰū́r mayobʰū́r abʰí mā vāhi svā́hā \\

Verse: 46 
Sentence: a    yā́s te agne sū́rye rúco dívam ātanvánti raśmíbʰiḥ \
Sentence: b    tā́bʰir no adyá sárvābʰī rucé jánāya nas kr̥dʰi \\

Verse: 47 
Sentence: a    yā́ vo devā́ḥ sū́rye rúco góṣv áśveṣu yā́ rúcaḥ \
Sentence: b    índrāgnī tā́bʰiḥ sárvābʰī rúcaṃ no dʰatta br̥haspate \\

Verse: 48 
Sentence: a    rúcaṃ no dʰehi brāhmaṇéṣu rúcam̐ rā́jasu nas kr̥dʰi \
Sentence: b    rúcaṃ víśyeṣu śūdréṣu máyi dʰehi rucā́ rúcam \\

Verse: 49 
Sentence: a    tát tvā yāmi bráhmaṇā vándamānas tád ā́ śāste yájamāno havírbʰiḥ \
Sentence: b    áheḍamāno varuṇehá bodʰy úruśam̐sa mā́ na ā́yuḥ prá moṣīḥ \\

Verse: 50 
Sentence: a    svàr ṇá gʰarmáḥ svā́hā \
Sentence: b    svàr ṇā́rkáḥ svā́hā \
Sentence: c    svàr ṇá śukráḥ svā́hā \
Sentence: d    svàr ṇá jyótiḥ svā́hā \
Sentence: e    svàr ṇá sū́ryaḥ svā́hā \\

Verse: 51 
Sentence: a    agníṃ yunajmi śávasā gʰr̥téna divyám̐ suparṇáṃ váyasā br̥hántam \
Sentence: b    téna vayáṃ gamema bradʰnásya viṣṭápam̐ svò rúhāṇā ádʰi nā́kam uttamám \\

Verse: 52 
Sentence: a    imáu te pakṣā́v ajárau patatríṇau yā́bʰyām̐ rákṣām̐sy apahám̐sy agne \
Sentence: b    tā́bʰyāṃ patema sukŕ̥tām u lokáṃ yátra ŕ̥ṣayo jagmúḥ pratʰamajā́ḥ purāṇā́ḥ \\

Verse: 53 
Sentence: a    índur dákṣaḥ śyená r̥tā́vā híraṇyapakṣaḥ śakunó bʰuraṇyúḥ \
Sentence: b    mahā́nt sadʰástʰe dʰruvá ā́ níṣatto námas te astu mā́ mā him̐sīḥ \\

Verse: 54 
Sentence: a    divó mūrdʰā́si pr̥tʰivyā́ nā́bʰir ū́rg apā́m óṣadʰīnām \
Sentence: b    viśvā́yuḥ śárma saprátʰā námas patʰé \\

Verse: 55 
Sentence: a    víśvasya mūrdʰánn ádʰi tiṣṭʰasi śritáḥ samudré te hŕ̥dayam apsv ā́yur apó dattodadʰíṃ bʰintta \
Sentence: b    divás parjányād antárikṣāt pr̥tʰivyā́s táto no vŕ̥ṣṭyāva \\

Verse: 56 
Sentence: a    iṣṭó yajñó bʰŕ̥gubʰir āśīrdā́ vásubʰiḥ \
Sentence: b    tásya na iṣṭásya prītásya dráviṇehā́ gameḥ \\

Verse: 57 
Sentence: a    iṣṭó agnír ā́hutaḥ pipartu na iṣṭám̐ havíḥ \
Sentence: b    svagédáṃ devébʰyo námaḥ \\

Verse: 58 
Sentence: a    yád ā́kūtāt samásusrod dʰr̥dó vā mánaso vā sámbʰr̥taṃ cákṣuṣo vā \
Sentence: b    tád ánu préta sukŕ̥tām u olkáṃ yátra ŕ̥ṣayo jagmúḥ pratʰamajā́ḥ purāṇā́ḥ \\

Verse: 59 
Sentence: a    etám̐ sadʰastʰa pári te dadāmi yám āváhāc cʰevadʰíṃ jātávedāḥ \
Sentence: b    anvāgantā́ yajñápatir vo átra tám̐ sma jānīta paramé vyòman \\

Verse: 60 
Sentence: a    etáṃ jānātʰa paramé vyòman dévāḥ sadʰastʰā vida rūpám asya \
Sentence: b    yád āgáccʰāt patʰíbʰir devayā́nair iṣṭāpūrté kr̥ṇavātʰāvír asmai \\

Verse: 61 
Sentence: a    úd budʰyasvāgne práti jāgr̥hi tvám iṣṭāpūrté sám̐ sr̥jetʰām ayáṃ ca \
Sentence: b    asmínt sadʰástʰe ádʰy úttarasmin vísve devā yájamānāś ca sīdata \\

Verse: 62 
Sentence: a    yéna váhasi sahásraṃ yénāgne sarvavedasám \
Sentence: b    ténemáṃ yajñáṃ no naya svàr devéṣu gántave \\

Verse: 63 
Sentence: a    prastaréṇa paridʰínā srucā́ védyā ca barhíṣā \
Sentence: b    r̥cémáṃ yajñáṃ no naya svàr devéṣu gántave \\

Verse: 64 
Sentence: a    yád dattáṃ yát parādā́naṃ yát pūrtáṃ yā́ś ca dákṣiṇāḥ \
Sentence: b    tád agnír vaiśvakarmaṇáḥ svàr devéṣu no dadʰat \\

Verse: 65 
Sentence: a    yátra dʰā́rā ánapetā mádʰor gʰr̥tásya ca yā́ḥ \
Sentence: b    tád agnír vaiśvakarmaṇáḥ svàr devéṣu no dadʰat \\

Verse: 66 
Sentence: a    agnír asmi jánmanā jātávedā gʰr̥táṃ me cákṣur amŕ̥taṃ ma āsán \
Sentence: b    arkás tridʰā́tū rájaso vimā́nó jasro gʰarmó havír asmi nā́ma \\

Verse: 67 
Sentence: a    ŕ̥co nā́māsmi yájūm̐ṣi nā́māsmi sā́māni nā́māsmi \
Sentence: b    yé agnáyaḥ prā́ñcajanyā asyā́ṃ pr̥tʰivyā́m ádʰi \
Sentence: c    téṣām asi tvám uttamáḥ prá no jīvátave suva \\

Verse: 68 
Sentence: a    vārtrahatyā́ya śávase pr̥tanāṣā́hyāya ca \
Sentence: b    índra tvā́ vartayāmasi \\

Verse: 69 
Sentence: a    sahádānuṃ puruhūta kṣiyántam ahastám indra sáṃ piṇak kúṇārum \
Sentence: b    abʰí vr̥tráṃ várdʰamānaṃ píyārum apā́dam indra tavásā jagʰantʰa \\

Verse: 70 
Sentence: a    ví na indra mŕ̥dʰo jahi nīcā́ yaccʰa pr̥tanyatáḥ \
Sentence: b    yó asmā́m̐ abʰidā́saty ádʰaraṃ gamayā támaḥ \\

Verse: 71 
Sentence: a    mr̥gó ná bʰīmáḥ kucaró giriṣṭʰā́ḥ parāváta ā́ jagantʰā párasyāḥ \
Sentence: b    sr̥kám̐ sam̐śā́ya pavím indra tigmáṃ ví śátrūn tāḍʰi ví mŕ̥dʰo nudasva \\

Verse: 72 
Sentence: a    vaiśvānaró na ūtáya ā́ prá yātu parāvátaḥ \
Sentence: b    agnír naḥ suṣṭutī́r úpa \\

Verse: 73 
Sentence: a    pr̥ṣṭó diví pr̥ṣṭó agníḥ pr̥tʰivyā́ṃ pr̥ṣṭó víśvā óṣadʰīr ā́ viveśa \
Sentence: b    vaiśvānaráḥ sáhasā pr̥ṣṭó agníḥ sá no dívā sá riṣás pātu náktam \\

Verse: 74 
Sentence: a    aśyā́ma té kā́mam agne távotī́ aśyā́ma rayím̐ rayivaḥ suvī́ram \
Sentence: b    aśyā́ma vā́jam abʰí vājáyanto śyā́ma dyumnám ajarājáraṃ te \\

Verse: 75 
Sentence: a    vayáṃ te adyá rarimā́ hí kā́mam uttānáhastā námasopasádya \
Sentence: b    yájiṣṭʰena mánasā yakṣi devā́n ásredʰatā mánmanā vípro agne \\

Verse: 76 
Sentence: a    dʰāmaccʰád agnír índro brahmā́ devó bŕ̥haspátiḥ \
Sentence: b    sácetaso víśve devā́yajñáṃ prā́vantu naḥ śubʰé \\

Verse: 77 
Sentence: a    tváṃ yaviṣṭʰa dāśúṣo nŕ̥̄m̐ḥ pāhi śr̥ṇudʰī́ gíraḥ \
Sentence: b    rákṣā tokám utá tmánā \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.