TITUS
White Yajur-Veda: Vajasaneyi-Samhita (Madhyandina)
Part No. 19
Previous part

Paragraph: 19 
Verse: 1 
Sentence: a    svādvī́ṃ tvā svādúnā tīvrā́ṃ tīvréṇāmŕ̥tām amŕ̥tena \
Sentence: b    mádʰumatīṃ mádʰumatā sr̥jāmi sám̐ sómena \
Sentence: c    sómo si \
Sentence: d    aśvíbʰyāṃ pacyasva \
Sentence: e    sárasvatyai pacyasva \
Sentence: f    índrāya sutrā́mṇe pacyasva \\

Verse: 2 
Sentence: a    párītó ṣiñcatā́ sutám̐ sómo yá uttamám̐ havíḥ \
Sentence: b    dadʰanvā́ yó náryo apsv àntár ā́ suṣā́va sómam ádribʰiḥ \\

Verse: 3 
Sentence: a    vāyóḥ pūtáḥ pavítreṇa pratyáṅk sómo átidrutaḥ \
Sentence: b    índrasya yújyaḥ sákʰā \
Sentence: c    vāyóḥ pūtáḥ pavítreṇa pratyáṅk sómo átidrutaḥ \
Sentence: d    índrasya yújyaḥ sákʰā \\

Verse: 4 
Sentence: a    punā́ti te parisrútam̐ sómam̐ sū́ryasya duhitā́ \
Sentence: b    vā́reṇa śáśvatā tánā \\

Verse: 5 
Sentence: a    bráhma kṣatráṃ pavate téja indriyám̐ súrayā sómaḥ sutá ā́suto mádāya \
Sentence: b    śukréṇa deva devátāḥ pipr̥gdʰi rásenā́nnaṃ yájamānāya dʰehi \\

Verse: 6 
Sentence: a    kuvíd aṅgá yávamanto vayáṃ cid yátʰā dā́nty anupūrváṃ viyū́ya \
Sentence: b    ihéhaiṣāṃ kr̥ṇuhi bʰójanāni yé barhíṣo námaüktiṃ yájanti \
Sentence: c    upayāmágr̥hīto sy aśvíbʰyāṃ tvā sárasvatyai tvéndrāya tvā sutrā́mṇe \
Sentence: d    eṣá te yónis téjase tvā vīryā̀ya tvā bálāya tvā \\

Verse: 7 
Sentence: a    nā́nā hí vāṃ deváhitam̐ sádas kr̥táṃ mā́ sám̐ sr̥kṣātʰāṃ paramé vyòman \
Sentence: b    súrā tvám asi śuṣmíṇī sóma eṣá mā́ mā him̐sīḥ svā́ṃ yónim āviśántī \\

Verse: 8 
Sentence: a    upayāmágr̥hīto sy ā́śvinaṃ téjaḥ sārasvatáṃ vīryàm aindráṃ bálam \
Sentence: b    eṣá te yónir módāya tvānandā́ya tvā máhase tvā \\

Verse: 9 
Sentence: a    téjo si téjo máyi dʰehi \
Sentence: b    vīryàm asi vīryàṃ máyi dʰehi \
Sentence: c    bálam asi bálaṃ máyi dʰehi \
Sentence: d    ójo sy ójo máyi dʰehi \
Sentence: e    manyúr asi manyúṃ máyi dʰehi \
Sentence: f    sáho si sáho máyi dʰehi \\

Verse: 10 
Sentence: a    yā́ vyāgʰráṃ víṣūcikobʰáu vŕ̥kaṃ ca rákṣati \
Sentence: b    śyenáṃ patatríṇam̐ sim̐hám̐ sémáṃ pātv ám̐hasaḥ \\

Verse: 11 
Sentence: a    yád āpipéṣa mātáraṃ putráḥ prámudito dʰáyan \
Sentence: b    etát tád agne anr̥ṇó bʰavāmy áhatau pitárau máyā \
Sentence: c    sampŕ̥ca stʰa sáṃ mā bʰadréṇa pr̥ṅkta \
Sentence: d    vipŕ̥ca stʰa ví mā pāpmánā pr̥ṅkta \\

Verse: 12 
Sentence: a    devā́ yajñám atanvata bʰeṣajáṃ bʰiṣájāśvínā \
Sentence: b    vācā́ sárasvatī bʰiṣág índrāyendriyā́ṇi dádʰataḥ \\

Verse: 13 
Sentence: a    dīkṣā́yai rūpám̐ śáṣpāṇi prāyaṇī́yasya tókmāni \
Sentence: b    krayásya rūpám̐ sómasya lājā́ḥ somām̐śávo mádʰu \\

Verse: 14 
Sentence: a    ātitʰyarūpáṃ mā́saraṃ mahāvīrásya nagnáhuḥ \
Sentence: b    rūpám upasádām etát tisró rā́trīḥ súrā́sutā \\

Verse: 15 
Sentence: a    sómasya rūpá krītásya parisrút pári ṣicyate \
Sentence: b    aśvíbʰyāṃ dudgdʰáṃ bʰeṣajám índrāyaindrám̐ sárasvatyā \\

Verse: 16 
Sentence: a    āsandī́ rūpám̐ rājāsandyái védyai kumbʰī́ surādʰā́nī \
Sentence: b    ántara uttaravedyā́ rūpáṃ kārotaró bʰiṣák \\

Verse: 17 
Sentence: a    védyā védiḥ sám āpyate barhíṣā barhír indriyám \
Sentence: b    yū́pena yū́pa āpyate práṇīto agnír agnínā \\

Verse: 18 
Sentence: a    havirdʰā́naṃ yád aśvínā́gnīdʰraṃ yát sárasvatī \
Sentence: b    índrāyaindrám̐ sádas kr̥táṃ patnīśā́laṃ gā́rhapatyaḥ \\

Verse: 19 
Sentence: a    praiṣébʰiḥ praiṣā́n āpnoty āprī́bʰir āprī́r yajñásya \
Sentence: b    prayājébʰir anuyājā́n vaṣaṭkārebʰir ā́hutīḥ \\

Verse: 20 
Sentence: a    paśúbʰiḥ paśū́n āpnoti puroḍā́śair havī́m̐ṣy ā́ \
Sentence: b    cʰándobʰiḥ sāmidʰenī́r yājyā̀bʰir vaṣaṭkārā́n \\

Verse: 21 
Sentence: a    dʰānā́ḥ karambʰáḥ sáktavaḥ parīvāpáḥ páyo dádʰi \
Sentence: b    sómasya rūpám̐ havíṣa āmíkṣā vā́jinaṃ mádʰu \\

Verse: 22 
Sentence: a    dʰānā́nām̐ rūpáṃ kúvalaṃ parīvāpásya godʰū́māḥ \
Sentence: b    sáktūnām̐ rūpáṃ bádaram upavā́kāḥ karambʰásya \\

Verse: 23 
Sentence: a    páyaso rūpáṃ yád yávā dadʰnó rūpáṃ karkándʰūni \
Sentence: b    sáomasya rūpáṃ vā́jinam̐ saumyásya rūpám āmíkṣā \\

Verse: 24 
Sentence: a    ā́ śrāvayéti stotríyāḥ pratyāśrāvó ánurūpaḥ \
Sentence: b    yájéti dʰayyārūpáṃ pragātʰā́ yeyajāmahā́ḥ \\

Verse: 25 
Sentence: a    ardʰar̥cáir uktʰā́nām̐ rūpáṃ padáir āpnoti nivídaḥ \
Sentence: b    praṇávaiḥ śastrā́ṇām̐ rūpáṃ páyasā sóma āpyate \\

Verse: 26 
Sentence: a    aśvíbʰyāṃ prātaḥsavanám índreṇaindráṃ mā́dʰyandinam \
Sentence: b    vaiśvadevám̐ sárasvatyā tr̥tī́yam āptám̐ sávanam \\

Verse: 27 
Sentence: a    vāyavyàir vāyavyā̀n āpnoti sátena droṇakalaśám \
Sentence: b    kumbʰī́bʰyām ambʰr̥ṇáu suté stʰālī́bʰi stʰālī́r āpnoti \\

Verse: 28 
Sentence: a    yájurvhir āpyante gráhā gráhai stómāś ca víṣṭutīḥ \
Sentence: b    cʰándobʰir uktʰāśastrā́ṇi sā́mnāvabʰr̥tʰá āpyate \\

Verse: 29 
Sentence: a    íḍābʰir bʰakṣā́n āpnoti sūktavākénāśíṣaḥ \
Sentence: b    śamyúnā patnīsaṃyājā́nt samiṣṭayajúṣā sam̐stʰā́m \\

Verse: 30 
Sentence: a    vraténa dīkṣā́m āpnoti dīkṣáyāpnoti dákṣiṇām \
Sentence: b    dákṣiṇā śraddʰā́m āpnoti śraddʰáyā satyám āpyate \\

Verse: 31 
Sentence: a    etā́vad rūpáṃ yajñásya yád deváir bráhmaṇā kr̥tám \
Sentence: b    tád etát sárvam āpnoti yajñé sautrāmaṇī́ suté \\

Verse: 32 
Sentence: a    súrāvantaṃ barhiṣádam̐ suvī́raṃ yajñám̐ hinvanti mahiṣā́ námobʰiḥ \
Sentence: b    dádʰānāḥ sómaṃ diví devátāsu mádeméndraṃ yájamānāḥ svarkā́ḥ \\

Verse: 33 
Sentence: a    yás te rásaḥ sámbʰr̥ta óṣadʰīṣu sómasya śúṣmaḥ súrayā sutásya \
Sentence: b    téna jinva yájamānaṃ mádena sárasvatīm aśvínāv índram agním \\

Verse: 34 
Sentence: a    yám aśvínā námucer āsurā́d ádʰi sárasvaty ásunod indriyā́ya \
Sentence: b    imáṃ tám̐ śukráṃ mádʰumantam índum̐ sómam̐ rā́jānam ihá bʰakṣayāmi \\

   {K21,1,34}

Verse: 35 
Sentence: a    yád átra riptám̐ rasínaḥ sutásya yád índro ápibac cʰácībʰiḥ \
Sentence: b    aháṃ tád asya mánasā śivéna sómam̐ rā́jānam ihá bʰakṣayāmi \\

Verse: 36 
Sentence: a    pitŕ̥bʰyaḥ svadʰāyíbʰyaḥ svadʰā́ námaḥ \
Sentence: b    pitāmahébʰyaḥ svadʰāyíbʰyaḥ svadʰā́ námaḥ \
Sentence: c    prápitāmahebʰyaḥ svadʰāyíbʰyaḥ svadʰā́ námaḥ \
Sentence: d    ákṣan pitáraḥ \
Sentence: e    ámīmadanta pitáraḥ \
Sentence: f    átītr̥panta pitáraḥ \
Sentence: g    pítaraḥ śundʰadʰvam \\

Verse: 37 
Sentence: a    punántu mā pitáraḥ somyā́saḥ punántu mā pitāmahā́ḥ \
Sentence: b    punántu prápitāmahāḥ pavítreṇa śatā́yuṣā \
Sentence: c    punántu mā pitāmahā́ḥ somyā́saḥ punántu prápitāmahāḥ \
Sentence: d    pavítreṇa śatā́yuṣā víśvam ā́yur vy àśnavai \\

Verse: 38 
Sentence: a    ágna ā́yūm̐ṣi pavasva ā́ suvórjam íṣaṃ ca naḥ \
Sentence: b    āré bādʰasva duccʰúnām \\

Verse: 39 
Sentence: a    punántu mā devajánāḥ punántu mánasā dʰíyaḥ \
Sentence: b    punántu víśvā bʰūtā́ni jā́tavedaḥ punīhí mā \\

Verse: 40 
Sentence: a    pavítreṇa punīhi mā śukréṇa deva dī́dyat \
Sentence: b    ágne krátvā krátūm̐r ánu \\

Verse: 41 
Sentence: a    yát te pavítram arcíṣy ágne vítatam antarā́ \
Sentence: b    bráhma téna punātu mā \\

Verse: 42 
Sentence: a    pávamānaḥ só adyá naḥ pavítreṇa vícarṣaṇiḥ \
Sentence: b    yáḥ pótā sá punātu mā \\

Verse: 43 
Sentence: a    ubʰā́bʰyāṃ deva savitaḥ pavítreṇa savéna ca \
Sentence: b    mā́ṃ punīhi viśvátaḥ \\

Verse: 44 
Sentence: a    vaiśvadevī́ punatī́ devy ā́gād yásyām imā́ bahvyàs tanvò vītápr̥ṣṭʰāḥ \
Sentence: b    táyā mádantaḥ sadʰamā́deṣu vayám̐ syāma pátayo rayīṇā́m \\

Verse: 45 
Sentence: a    yé samānā́ḥ sámanasaḥ pitáro yamarā́jye \
Sentence: b    téṣāṃ lokáḥ svadʰā́ námo yajñó devéṣu kalpatām \\

Verse: 46 
Sentence: a    yé samānā́ḥ sámanaso jīvā́ jīvéṣu māmakā́ḥ \
Sentence: b    téṣām̐ śrī́r máyi kalpatām asmíṃ loké sátám̐ sámāḥ \\

Verse: 47 
Sentence: a    dvé sr̥tī́ aśr̥navaṃ pitr̥̄ṇā́m aháṃ devā́nām utá mártyānām \
Sentence: b    tā́bʰyām idáṃ víśvam éjat sám eti yád antarā́ pitáraṃ mātáraṃ ca \\

Verse: 48 
Sentence: a    idám̐ havíḥ prajánanaṃ me astu dáśavīram̐ sárvagaṇam̐ svastáye \
Sentence: b    ātmasáni prajāsáni paśusáni lokasány abʰayasáni \
Sentence: c    agníḥ prajā́ṃ bahulā́ṃ me karotv ánnaṃ páyo réto asmā́su dʰatta \\

Verse: 49 
Sentence: a    úd īratām ávara út párāsa ún madʰyamā́ḥ pitáraḥ somyā́saḥ \
Sentence: b    ásuṃ yá īyúr avr̥kā́ r̥tajñā́s té no vantu pitáro háveṣu \\

Verse: 50 
Sentence: a    áṅgiraso naḥ pitáro návagvā átʰarvāṇo bʰŕ̥gavaḥ somyā́saḥ \
Sentence: b    téṣāṃ vayám̐ sumatáu yajñíyānām ápi bʰadré saumanasé syāma \\

Verse: 51 
Sentence: a    yé naḥ pū́rve pitáraḥ somyā́so nūhiré somapītʰáṃ vásiṣṭʰāḥ \
Sentence: b    tébʰir yamáḥ sam̐rarāṇó havī́m̐ṣy uśánn uśádbʰiḥ pratikāmám attu \\

Verse: 52 
Sentence: a    tvám̐ soma prá cikito manīṣā́ tvám̐ rájiṣṭʰam ánu neṣi pántʰām \
Sentence: b    táva práṇītī pitáro na indo devéṣu rátnam abʰajanta dʰī́rāḥ \\

Verse: 53 
Sentence: a    tváyā hí naḥ pitáraḥ soma pū́rve kármāṇi cakrúḥ pavamāna dʰī́rāḥ \
Sentence: b    vanvánn ávātaḥ paridʰī́m̐r áporṇu vīrébʰir áśvair magʰávā bʰavā naḥ \\

Verse: 54 
Sentence: a    tvám̐ soma pitŕ̥bʰiḥ saṃvidānó nu dyā́vāpr̥tʰivī́ ā́ tatantʰa \
Sentence: b    tásmai ta indo havíṣā vidʰema vayám̐ syāma pátayo rayīṇā́m \\

Verse: 55 
Sentence: a    bárhiṣadaḥ pitara ūty àrvā́g imā́ vo havyā́ cakr̥mā juṣádʰvam \
Sentence: b    tá ā́ gatā́vasā śáṃtamenā́tʰā naḥ śáṃ yór arapó dadʰāta \\

Verse: 56 
Sentence: a    ā́háṃ pitŕ̥̄n suvidátrām̐ avitsi nápātaṃ ca vikrámaṇaṃ ca víṣṇoḥ \
Sentence: b    barhiṣádo yé svadʰáyā sutásya bʰájanta pitvás tá ihā́gamiṣṭʰāḥ \\

Verse: 57 
Sentence: a    úpahūtāḥ pitáraḥ somyā́so barhiṣyèṣu nidʰíṣu priyéṣu \
Sentence: b    tá ā́ gamantu tá ihá śruvantv ádʰi bruvantu tè vantv asmā́n \\

Verse: 58 
Sentence: a    ā́ yantu naḥ pitáraḥ somyā́so gniṣvāttā́ḥ patʰíbʰir devayā́naiḥ \
Sentence: b    asmín yajñé svadʰáyā mádantó dʰi bruvantu tè vantv asmā́n \\

Verse: 59 
Sentence: a    ágniṣvāttāḥ pitara éhá gaccʰata sádaḥ-sadaḥ sadata supraṇītayaḥ \
Sentence: b    attā́ havī́m̐ṣi práyatāni barhíṣy átʰā rayím̐ sárvavīraṃ dadʰātana \\

Verse: 60 
Sentence: a    yé agniṣvāttā́ yé ánagniṣvāttā mádʰye diváḥ svadʰáyā mādáyante \
Sentence: b    tébʰyaḥ svarā́ḍ ásunītim etā́ṃ yatʰāvaśáṃ tanvàṃ kalpayāti \\

Verse: 61 
Sentence: a    agniṣvāttā́m̐ r̥tumáto havāmahe nārāśam̐sé somapītʰáṃ yá āśúḥ \
Sentence: b    té no víprāsaḥ suhávā bʰavantu vayám̐ syāma pátayo rayīṇā́m \\

Verse: 62 
Sentence: a    ā́cyā jā́nu dakṣiṇató niṣádyemáṃ yajñám abʰí gr̥ṇīta víśve \
Sentence: b    mā́ him̐siṣṭa pitaraḥ kéna cin no yád va ā́gaḥ puruṣátā kárāma \\

Verse: 63 
Sentence: a    ā́sīnāso aruṇī́nām upástʰe rayíṃ dʰatta dāśúṣe mártyāya \
Sentence: b    putrébʰyaḥ pitaras tásya vásvaḥ prá yaccʰata tá ihórjaṃ dadʰāta \\

Verse: 64 
Sentence: a    yám agne kavyavāhana tváṃ cin mányase rayím \
Sentence: b    táṃ no gīrbʰíḥ śravā́yyaṃ devatrā́ panayā yújam \\

   {K21,1,64}

Verse: 65 
Sentence: a    yó agníḥ kavyavā́hanaḥ pitŕ̥̄n yákṣad r̥tāvŕ̥dʰaḥ \
Sentence: b    préd u havyā́ni vocati devébʰyaś ca pitŕ̥bʰya ā́ \\

Verse: 66 
Sentence: a    tvám agna īḍitáḥ kavyavāhanā́vāḍ ḍʰavyā́ni surabʰī́ṇi kr̥tvī́ \
Sentence: b    prā́dāḥ pitŕ̥bʰyaḥ svadʰáyā té akṣann addʰí tváṃ deva práyatā havī́m̐ṣi \\

Verse: 67 
Sentence: a    yé cehá pitáro yé ca néhá yā́m̐ś ca vidmá yā́m̐ u ca ná pravidmá \
Sentence: b    tváṃ vettʰa yáti té jātavedaḥ svadʰā́bʰir yajñám̐ súkr̥taṃ juṣasva \\

Verse: 68 
Sentence: a    idáṃ pitŕ̥bʰyo námo astv adyá yé pū́rvāso yá úparāsa īyúḥ \
Sentence: b    yé pā́rtʰive rájasy ā́ níṣattā yé vā nūnám̐ suvr̥jánāsu vikṣú \\

Verse: 69 
Sentence: a    ádʰā yátʰā naḥ pitáraḥ párāsaḥ pratnā́so agna r̥tám āśuṣāṇā́ḥ \
Sentence: b    śúcī́d ayan dī́dʰitim uktʰaśā́saḥ kṣā́mā bʰindánto aruṇī́r ápa vran \\

Verse: 70 
Sentence: a    uśántas tvā ní dʰīmahy uśántaḥ sám idʰīmahi \
Sentence: b    uśánn uśatá ā́ vaha pitŕ̥̄n havíṣe áttave \\

Verse: 71 
Sentence: a    apā́ṃ pʰénena námuceḥ śíra indród avartayaḥ \
Sentence: b    víśvā yád ájaya spŕ̥dʰaḥ \\

Verse: 72 
Sentence: a    sómo rā́jāmŕ̥tam̐ sutá r̥jīṣéṇājahān mr̥tyúm \
Sentence: b    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 73 
Sentence: a    adbʰyáḥ kṣīráṃ vy àpibat krúṅṅ āṅgirasó dʰiyā́ \
Sentence: b    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 74 
Sentence: a    sómam adbʰyó vy àpibac cʰándasā ham̐sáḥ śuciṣát \
Sentence: b    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 75 
Sentence: a    ánnāt parisrúto rásaṃ bráhmaṇā vy àpibat kṣatráṃ páyaḥ sómaṃ prajā́patiḥ \
Sentence: b    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 76 
Sentence: a    réto mū́traṃ ví jahāti yóniṃ praviśád rayím \
Sentence: b    gárbʰo jarā́yuṇā́vr̥ta úlvaṃ jahāti jánmanā \
Sentence: c    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 77 
Sentence: a    dr̥ṣṭvā́ rūpé vyā́karot satyānr̥té prajā́patiḥ \
Sentence: b    áśraddʰām ánr̥té dadʰāc cʰraddʰā́m̐ satyé prajā́patiḥ \
Sentence: c    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 78 
Sentence: a    védena rūpé vy àpibat sutāsutáu prajā́patiḥ \
Sentence: b    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 79 
Sentence: a    dr̥ṣṭvā́ parisrúto rásam̐ śukréṇa śukráṃ vy àpibat \
Sentence: b    páyaḥ sómaṃ prajā́patiḥ \
Sentence: c    r̥téna satyám indriyáṃ vipā́nam̐ śukrám ándʰasa índrasyendriyám idáṃ páyo mŕ̥taṃ mádʰu \\

Verse: 80 
Sentence: a    sī́sena tántraṃ mánasā manīṣíṇā ūrṇāsūtréṇa kaváyo vayanti \
Sentence: b    aśvínā yajñám̐ savitā́ sárasvatī́ndrasya rūpáṃ váruṇo bʰiṣajyán \\

Verse: 81 
Sentence: a    tád asya rūpám amŕ̥tam̐ śácībʰis tasró dadʰur devátāḥ sam̐rarāṇā́ḥ \
Sentence: b    lómāni śáṣpair bahudʰā́ ná tókmabʰis tvág asya mām̐sám abʰavan ná lājā́ḥ \\

Verse: 82 
Sentence: a    tád aśvínā bʰiṣájā rudrávartanī sárasvatī vayati péśo ántaram \
Sentence: b    ástʰi majjā́naṃ mā́saraiḥ kārotaréṇa dádʰato gávāṃ tvací \\

Verse: 83 
Sentence: a    sárasvatī mánasā peśaláṃ vásu nā́satyābʰyāṃ vayati darśatáṃ vápuḥ \
Sentence: b    rásaṃ parisrútā ná róhitaṃ nagnáhur dʰī́ras tásaraṃ ná véma \\

Verse: 84 
Sentence: a    páyasā śukrám amŕ̥taṃ janítram̐ súrayā mū́trāj janayanta rétaḥ \
Sentence: b    ápā́matiṃ durmatíṃ bā́dʰamānā ū́vadʰyaṃ vā́tam̐ sabvàṃ tád ārā́t \\

Verse: 85 
Sentence: a    índraḥ sutrā́mā hŕ̥dayeṇa satyáṃ puroḍā́śena savitā́ jajāna \
Sentence: b    yákr̥t klomā́naṃ váruṇo bʰiṣajyán mátasne vāyavyàir ná mināti pittám \\

Verse: 86 
Sentence: a    āntrā́ṇi stʰālī́r mádʰu pínvamānā gúdāḥ pā́trāṇi sudúgʰā ná dʰenúḥ \
Sentence: b    śyenásya pátraṃ ná plīhā́ śacībʰir āsandī́ nā́bʰir udáraṃ ná mātā́ \\

Verse: 87 
Sentence: a    kumbʰó vaniṣṭʰúr janitā́ śácībʰir yásminn ágre yónyāṃ gárbʰo antáḥ \
Sentence: b    plāśír vyàktaḥ śatádʰāra útso duhé ná kumbʰī́ svadʰā́ṃ pitŕ̥bʰyaḥ \\

Verse: 88 
Sentence: a    múkʰam̐ sád asya śíra ít sátena jihvā́ pavítram aśvínāsánt sárasvatī \
Sentence: b    cápyaṃ ná pāyúr bʰiṣág asya vā́lo vastír ná śépo hárasā tarasvī́ \\

Verse: 89 
Sentence: a    aśvíbʰyāṃ cákṣur amŕ̥taṃ gráhābʰyāṃ cʰā́gena téjo havíṣā śr̥téna \
Sentence: b    pákṣmāṇi godʰū́maiḥ kúvalair utā́ni péśo ná śukrám ásitaṃ vasāte \\

Verse: 90 
Sentence: a    ávir ná meṣó nasí vīryā̀ya prāṇásya pántʰ amŕ̥to gráhābʰyām \
Sentence: b    sárasvaty upavā́kair vyānáṃ násyāni barhír bádarair jajāna \\

Verse: 91 
Sentence: a    índrasya rūpáṃ vr̥ṣabʰó bálāya kárṇābʰyām̐ śrótram amŕ̥taṃ gráhābʰyāṃ \
Sentence: b    yávā ná barír bʰruví késarāṇi karkándʰu jajñe mádʰu sāragʰáṃ múkʰāt \\

Verse: 92 
Sentence: a    ātmánn upástʰe ná vŕ̥kasya lóma múkʰe śmáśrūṇi ná vyāgʰralomá \
Sentence: b    kéśā ná śīrṣán yáśase śriyái śíkʰā sim̐hásya lóma tvíṣir indriyā́ṇi \\

Verse: 93 
Sentence: a    áṅgāny ātmán bʰiṣájā tád aśvínātmā́nam áṅgaiḥ sám adʰāt sárasvatī \
Sentence: b    índrasya rūpám̐ śatámānam ā́yuś candréṇa jyótir amŕ̥taṃ dádʰānāḥ \\

Verse: 94 
Sentence: a    sárasvatī yónyāṃ gárbʰam antár asár asbʰyāṃ pátnī súkr̥taṃ bibʰarti \
Sentence: b    apā́m̐ rásena váruṇo ná sā́mnéndram̐ śriyái janáyann apsú rā́jā \\

Verse: 95 
Sentence: a    téjaḥ paśūnā́m̐ havír indriyā́vat parisrútā páyasā sāragʰáṃ mádʰu \
Sentence: b    aśvíbʰyāṃ dugdʰáṃ bʰiṣájā sárasvatyā sutāsutā́bʰyām amŕ̥taḥ sóma índuḥ \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.