TITUS
White Yajur-Veda: Vajasaneyi-Samhita (Madhyandina)
Part No. 20
Previous part

Paragraph: 20 
Verse: 1 
Sentence: a    kṣatrásya yónir asi kṣatrásya nā́bʰir asi \
Sentence: b    mā́ tvā him̐sīn mā́ mā him̐sīḥ \\

Verse: 2 
Sentence: a    ní ṣasāda gʰr̥távrato váruṇaḥ pastyā̀sv ā́ \
Sentence: b    sā́mrājyāya sukrátuḥ \
Sentence: c    mr̥tyóḥ pāhi \
Sentence: d    vidyót pāhi \\

Verse: 3 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    aśvínor bʰáiṣajyena téjase brahmavarcasā́yābʰí ṣiñcāmi \
Sentence: c    sárasvatyai bʰáiṣajyena vīryā̀yānnā́dyāyābʰí ṣiñcāmi \
Sentence: d    índrasyendriyéṇa bálāya śriyái yáśase bʰí ṣiñcāmi \\

Verse: 4 
Sentence: a    kò si katamò si kásmai tvā kā́ya tvā \
Sentence: b    súśloka súmaṅgala sátyarājan \\

Verse: 5 
Sentence: a    śíro me śrī́r yáśo múkʰaṃ tvíṣiḥ kéśāś ca śmáśrūṇi \
Sentence: b    rā́jā me prāṇó amŕ̥tam̐ samrā́ṭ cákṣur virā́ṭ śrótram \\

Verse: 6 
Sentence: a    jihvā́ me bʰadráṃ vā́ṅ máho máno manyúḥ svarā́ḍ bʰā́maḥ \
Sentence: b    módāḥ pramodā́ aṅgúlīr áṅgāni mitráṃ me sáhaḥ \\

Verse: 7 
Sentence: a    bāhū́ me bálam indriyám̐ hástau me kárma vīryàm \
Sentence: b    ātmā́ kṣatrám úro máma \\

Verse: 8 
Sentence: a    pr̥ṣṭī́r me rāṣṭrám udáram ám̐sau grīvā́ś ca śróṇī \
Sentence: b    ūrū́ aratnī́ jā́nunī víśo mé ṅgāni sarvátaḥ \\

Verse: 9 
Sentence: a    nā́bʰir me cittáṃ vijñā́naṃ pāyúr me pacitir bʰasát \
Sentence: b    ānandanandā́v āṇḍáu me bʰágaḥ sáubʰāgyaṃ pásaḥ \
Sentence: c    jáṅgʰābʰyāṃ pādbʰyā́ṃ dʰármo smi viśí rā́jā prátiṣṭʰitaḥ \\

Verse: 10 
Sentence: a    práti kṣatré práti tiṣṭʰāmi rāṣṭré práty áśveṣu práti tiṣṭʰāmi góṣu \
Sentence: b    práty áṅgeṣu práti tiṣṭʰāmy ātmán práti prāṇéṣu kṣatré práti tiṣṭʰāmi puṣṭé práti dyā́vāpr̥tʰivyóḥ práti tiṣṭʰāmi \\

Verse: 11 
Sentence: a    trayā́ devā́ ékādaśa trayastrim̐śā́ḥ surā́dʰasaḥ \
Sentence: b    bŕ̥haspátipurohitā devásya savitúḥ savé \
Sentence: c    devā́ deváir avantu mā \\

Verse: 12 
Sentence: a    pratʰamā́ dvitī́yair dvitī́yās tr̥tī́yais tr̥tī́yāḥ satyéna satyáṃ yajñéna yajñó yájurbʰir yájūm̐ṣi sā́mabʰiḥ sā́māny r̥gbʰír ŕ̥caḥ puronuvākyā̀bʰiḥ puronuvākyā̀ yājyā̀bʰir yājyā̀ vaṣaṭkāráir vaṣaṭkārā́ ā́hutibʰir áhutayo me kā́mānt sám ardʰayantu bʰū́ḥ svā́hā \\

Verse: 13 
Sentence: a    lómāni práyatir máma tváṅ ma ā́natir ā́gatiḥ \
Sentence: b    mām̐sáṃ ma úpanatir vásv ástʰi majjā́ ma ā́natiḥ \\

Verse: 14 
Sentence: a    yád devā devahéḍanaṃ dévāsaś cakr̥mā́ vayám \
Sentence: b    agnír mā tásmād énaso víśvān muñcatv ám̐hasaḥ \\

Verse: 15 
Sentence: a    yádi dívā yádi náktam énām̐si cakr̥mā́ vayám \
Sentence: b    vāyúr mā tásmād énaso víśvān muñcatv ám̐hasaḥ \\

Verse: 16 
Sentence: a    yádi jā́grad yádi svápna énām̐si cakr̥mā́ vayám \
Sentence: b    sū́ryo mā tásmād énaso víśvān muñcatv ám̐hasaḥ \\

Verse: 17 
Sentence: a    yád grā́me yád áraṇye yát sabʰā́yāṃ yád indriyé \
Sentence: b    yác cʰūdré yád árye yád énaś cakr̥mā́ vayáṃ yád ékasyā́dʰi dʰármaṇi tásyāvayájanam asi \\

Verse: 18 
Sentence: a    yád ā́po agʰnyā́ íti váruṇéti śápāmahe táto varuṇa no muñca \
Sentence: b    ávabʰr̥tʰa nicumpuṇa nicerúr asi nicumpuṇáḥ \
Sentence: c    áva deváir devákr̥tam éno yakṣy áva mártyair mártyakr̥tam \
Sentence: d    pururā́vṇo deva riṣás pāhi \\

Verse: 19 
Sentence: a    samudré te hŕ̥dayam apsv àntáḥ sáṃ tvā viśantv óṣadʰīr utā́paḥ \
Sentence: b    sumitriyā́ na ā́pa óṣadʰayaḥ santu durmitriyā́s tásmai santu yò smā́n dvéṣṭi yáṃ ca vayáṃ dviṣmáḥ \\

Verse: 20 
Sentence: a    drupadā́d iva mumucānáḥ svinnáḥ snātó málād iva \
Sentence: b    pūtáṃ pavítreṇevā́jyam ā́paḥ śundʰantu máinasaḥ \\

Verse: 21 
Sentence: a    úd vayáṃ támasas pári svàḥ páśyanta úttaram \
Sentence: b    deváṃ devatrā́ sū́ryam áganma jyótir uttamám \\

Verse: 22 
Sentence: a    apó adyā́nv acāriṣam̐ rásena sám asr̥kṣmahi \
Sentence: b    páyasvān agna ā́gamaṃ táṃ mā sám̐ sr̥ja várcasā prajáyā ca dʰánena ca \\

Verse: 23 
Sentence: a    édʰo sy edʰiṣīmáhi \
Sentence: b    samíd asi téjo si téjo máyi dʰehi \
Sentence: c    samā́ vavarti pr̥tʰivī́ sam uṣā́ḥ sám u sū́ryaḥ \
Sentence: d    sám u víśvam idáṃ jágat \
Sentence: e    vaiśvānarájyotir bʰūyāsaṃ vibʰū́n kā́mān vy àśnavai bʰū́ḥ svā́hā \\

Verse: 24 
Sentence: a    abʰyā́ dadʰāmi samídʰam ágne vratapate tváyi \
Sentence: b    vratáṃ ca śraddʰā́ṃ cópaimīndʰé tvā dīkṣitó ahám \\

Verse: 25 
Sentence: a    yátra bráhma ca kṣatráṃ ca samyáñco cárataḥ sahá \
Sentence: b    táṃ lokáṃ púṇyaṃ prá jñeṣaṃ yátra devā́ḥ sahā́gnínā \\

Verse: 26 
Sentence: a    yátréndraś ca vāyúś ca samyáñco cárataḥ sahá \
Sentence: b    táṃ lokáṃ púṇyaṃ prá jñeṣaṃ yátra sedír ná vidyáte \\

Verse: 27 
Sentence: a    am̐śúnā te am̐śúḥ pr̥cyatāṃ páruṣā páruḥ \
Sentence: b    gandʰás te sómam avatu mádāya ráso ácyutaḥ \\

Verse: 28 
Sentence: a    siñcánti pári ṣiñcanty út siñcanti punánti ca \
Sentence: b    súrāyai babʰrvái máde kiṃtvó vadati kiṃtváḥ \\

Verse: 29 
Sentence: a    dʰānā́vantaṃ karambʰíṇam apūpávantam uktʰínam \
Sentence: b    índra prātár juṣasva naḥ \\

Verse: 30 
Sentence: a    br̥hád índrāya gāyata máruto vr̥trahántamam \
Sentence: b    yéna jyótir ájanayann r̥tāvŕ̥dʰo deváṃ devā́ya jā́gr̥vi \\

Verse: 31 
Sentence: a    ádʰvaryo ádribʰiḥ sutám̐ sómaṃ pavítra ā́ naya \
Sentence: b    punīhī́ndrāya pā́tave \\

Verse: 32 
Sentence: a    yó bʰūtā́nām ádʰipatir yásmiṃ lokā́ ádʰi śritā́ḥ \
Sentence: b    yá ī́śe maható mahā́m̐s téna gr̥hṇāmi tvā́m aháṃ máyi gr̥hṇāmi tvā́m ahám \\

Verse: 33 
Sentence: a    upayāmágr̥hīto sy aśvíbʰyāṃ tvā sárasvatyai tvéndrāya tvā sutrā́mṇe \
Sentence: b    eṣá te yónir aśvíbʰyāṃ tvā sárasvatyai tvéndrāya tvā sutrā́mṇe \\

Verse: 34 
Sentence: a    prāṇapā́ me apānapā́ś cakṣuṣpā́ḥ śrotrapā́ś ca me \
Sentence: b    vā́co me viśvábʰeṣajo mánaso si vilā́yakaḥ \\

Verse: 35 
Sentence: a    aśvínakr̥tasya te sárasvatikr̥tasyéndreṇa sumtrā́mṇā kr̥tásya \
Sentence: b    úpahūta úpahūtasya bʰakṣayāmi \\

Verse: 36 
Sentence: a    sámiddʰa índra uṣásām ánīke purorúcā pūrvakŕ̥d vāvr̥dʰānáḥ \
Sentence: b    tribʰír deváis trim̐śátā vájrabāhur jagʰā́na vr̥tráṃ ví dúro vavāra \\

Verse: 37 
Sentence: a    nárāśám̐saḥ práti śū́ro mímānas tánūnápāt práti yajñásya dʰā́ma \
Sentence: b    góbʰir vapā́vān mádʰunā samañján híraṇyaiś candrī́ yajati prácetāḥ \\

Verse: 38 
Sentence: a    īḍitó deváir hárivām̐ abʰiṣṭír ājúhvāno havíṣā śárdʰamānaḥ \
Sentence: b    puraṃdaró gotabʰíd vájrabāhur ā́ yātu yajñám úpa no juṣāṇáḥ \\

Verse: 39 
Sentence: a    juṣāṇó barhír hárivān na índraḥ prācī́nam̐ sīdat pradíśā pr̥tʰivyā́ḥ \
Sentence: b    uruprátʰāḥ prátʰamānam̐ syonám ādityáir aktáṃ vásubʰiḥ sajóṣāḥ \\

Verse: 40 
Sentence: a    índraṃ dúraḥ kavaṣyò dʰā́vamānā vŕ̥ṣāṇaṃ yantu jánayaḥ supátnīḥ \
Sentence: b    dvā́ro devī́r abʰíto ví śrayantām̐ suvī́rā vīráṃ prátʰamānā máhobʰiḥ \\

Verse: 41 
Sentence: a    uṣā́sānáktā br̥hatī́ br̥hántaṃ páyasvatī sudúgʰe śū́ram índram \
Sentence: b    tántuṃ tatáṃ péśasā saṃváyantī devā́nāṃ deváṃ yajataḥ surukmé \\

Verse: 42 
Sentence: a    dáivyā mímānā mánuṣaḥ purutrā́ hótārāv índraṃ pratʰamā́ suvā́cā \
Sentence: b    mūrhdán yajñásya mádʰunā dádʰānā prācī́naṃ jyótir havíṣā vr̥dʰātaḥ \\

Verse: 43 
Sentence: a    tisró devī́r havíṣā várdʰamānā índraṃ juṣāṇā́ jánayo ná pátnīḥ \
Sentence: b    áccʰinnaṃ tántuṃ páyasā sárasvatī́ḍā devī́ bʰā́ratī viśvátūrtiḥ \\

Verse: 44 
Sentence: a    tváṣṭā dádʰac cʰúṣmam índrāya vŕ̥ṣṇé pāko ciṣṭur yaśáse purū́ṇi \
Sentence: b    vŕ̥ṣā yájan vŕ̥ṣaṇaṃ bʰū́riretā mūrdʰán yajñásya sám anaktu devā́n \\

Verse: 45 
Sentence: a    vánaspátir ávasr̥ṣṭo ná pā́śais tmányā samañjáñ cʰamitā́ ná deváḥ \
Sentence: b    índrasya havyáir jaṭʰáraṃ pr̥ṇānáḥ svádāti yajñáṃ mádʰunā gʰr̥téna \\

Verse: 46 
Sentence: a    stokā́nā, índuṃ práti śū́ra índro vr̥ṣāyámāṇo vr̥ṣabʰás turāṣā́ṭ \
Sentence: b    gʰr̥taprúṣā mánasā módamānāḥ svā́hā devā́ amŕ̥tā mādayantām \\

Verse: 47 
Sentence: a    ā́ yātv índró vasa úpa na ihá stutáḥ sadʰamā́d astu śū́raḥ \
Sentence: b    vāvr̥dʰānás táviṣīr yásya pūrvī́r dyáur ná kṣatrám abʰíbʰūti púṣyāt \\

Verse: 48 
Sentence: a    ā́ na índro dūrā́d ā́ na āsā́d abʰiṣṭikŕ̥d ávase yāsad ugráḥ \
Sentence: b    ójiṣṭʰebʰir nr̥pátir vájrabāhuḥ saṃgé samátsu turváṇiḥ pr̥tanyū́n \\

Verse: 49 
Sentence: a    ā́ na índro háribʰir yātv áccʰārvācīnó vase rā́dʰase ca \
Sentence: b    tíṣṭʰāti vajrī́ magʰávā virapśī́máṃ yajñám ánu no vā́jasātau \\

Verse: 50 
Sentence: a    trātā́ram índram avitā́ram índram̐ háve-have suhávam̐ śū́ram índram \
Sentence: b    hváyāmi śakráṃ puruhūtám índram̐ svastí no magʰávā dʰātv índraḥ \\

Verse: 51 
Sentence: a    índraḥ sutrā́mā svávām̐ ávobʰiḥ sumr̥ḍīkó bʰavatu viśvávedāḥ \
Sentence: b    bā́dʰatāṃ dvéṣo ábʰayaṃ kr̥ṇotu suvī́ryasya pátayaḥ syāma \\

Verse: 52 
Sentence: a    tásya vayám̐ sumatáu yajñíyasyā́pi bʰadré saumanasé syāma \
Sentence: b    sá sutrā́mā svávām̐ índro asmé ārā́c cid dvéṣaḥ sanutár yuyotu \\

Verse: 53 
Sentence: a    ā́ mandráir indra háribʰir yāhí mayū́raromabʰiḥ \
Sentence: b    mā́ tvā ké cin ní yaman víṃ nā́ pāśínó ti dʰánveva tā́m̐ ihi \\

Verse: 54 
Sentence: a    evéd índraṃ vŕ̥ṣaṇaṃ vájrabāhuṃ vásiṣṭʰāso abʰy àrcanty arkáiḥ \
Sentence: b    sá na stutó vīrávad dʰātu gómad yūyáṃ pāta svastíbʰiḥ sádā naḥ \\

Verse: 55 
Sentence: a    sámiddʰo agnír aśvinā taptó gʰarmó virā́ṭ sutáḥ \
Sentence: b    duhé dʰenúḥ sárasvatī sómam̐ śukrám ihéndriyám \\

Verse: 56 
Sentence: a    tanūpā́ bʰiṣájā sutè svínobʰā́ sárasvatī \
Sentence: b    ádʰvā rájām̐sīndriyám índrāya patʰíbʰir vahān \\

Verse: 57 
Sentence: a    índrāyéndum̐ sárasvatī nárāśám̐sena nagnáhum \
Sentence: b    ádʰātām aśvínā mádʰu bʰeṣajáṃ bʰiṣájā suté \\

Verse: 58 
Sentence: a    ājúhvānā sárasvatī́ndrāyendriyā́ṇi vīryàm \
Sentence: b    íḍābʰir aśvínāv íṣam̐ sám ū́rjam̐ sám̐ rayíṃ dadʰuḥ \\

Verse: 59 
Sentence: a    aśvínā námuceḥ sutám̐ sómam̐ śukráṃ parisrútā \
Sentence: b    sárasvatī tā́m ā́bʰarad barhíṣéndrāya pā́tave \\

Verse: 60 
Sentence: a    kavaṣyò na vyácasvatīr aśvíbʰyāṃ ná dúro díśaḥ \
Sentence: b    índro ná ródasī ubʰé duhé kāmā́nt sárasvatī \\

Verse: 61 
Sentence: a    uṣā́sānáktāśvinā dívéndram̐ sāyám indriyáiḥ \
Sentence: b    saṃjānāné supéśasā sám añjāte sárasvatyā \\

Verse: 62 
Sentence: a    pātáṃ no aśvinā dívā pāhí náktam̐ sarasvati \
Sentence: b    dáivyā hotā́rā bʰiṣájā pātā́m índram̐ sácā suté \\

Verse: 63 
Sentence: a    tisrás tredʰā́ sárasvaty aśvínā bʰā́ratī́ḍā \
Sentence: b    tīvráṃ parisrútā sómam índrāya suṣuvur mádam \\

Verse: 64 
Sentence: a    aśvínā bʰeṣajáṃ mádʰu bʰeṣajáṃ naḥ sárasvatī \
Sentence: b    índre tváṣṭā yáśaḥ śríyam̐ rūpám̐-rūpam adʰuḥ suté \\

Verse: 65 
Sentence: a    r̥tutʰéndro vánaspátiḥ śaśamānáḥ parisrútā \
Sentence: b    kīlā́lam aśvíbʰyāṃ mádʰu duhé dʰenúḥ sárasvatī \\

Verse: 66 
Sentence: a    góbʰir ná sómam aśvinā mā́sareṇa parisrútā \
Sentence: b    sám adʰātam̐ sárasvatyā svā́héndre sutáṃ mádʰu \\

Verse: 67 
Sentence: a    aśvínā havír indriyáṃ námucer dʰiyā́ sárasvatī \
Sentence: b    ā́ śukrám āsurā́d vásu magʰám índrāya jabʰrire \\

Verse: 68 
Sentence: a    yám aśvínā sárasvatī havíṣéndram ávardʰayan \
Sentence: b    sá bidʰeda valáṃ magʰáṃ námucāv āsuré sácā \\

Verse: 69 
Sentence: a    tám índram̐ sácāśvínobʰā́ sárasvatī \
Sentence: b    dádʰānā abʰy ànūṣata havíṣā yajñá indriyáiḥ \\

Verse: 70 
Sentence: a    yá índra indriyáṃ dadʰúḥ savitā́ váruṇo bʰágaḥ \
Sentence: b    sá sutrā́mā havíṣpatir yájamānāya saścata \\

Verse: 71 
Sentence: a    savitā́ váruṇo dadʰad yájamānāya dāśúṣe \
Sentence: b    ā́datta námucer vásu sutrā́mā bálam indriyám \\

Verse: 72 
Sentence: a    váruṇaḥ kṣatrám indriyáṃ bʰágena savitā́ śríyam \
Sentence: b    sutrā́mā yáśasā bálaṃ dádʰānā yajñám āśata \\

Verse: 73 
Sentence: a    aśvínā góbʰir indriyám áśvebʰir vīryàṃ bálam \
Sentence: b    havíṣéndram̐ sárasvatī yájamānam avardayan \\

Verse: 74 
Sentence: a    tā́ nā́satyā supéśasā híraṇyavartanī nárā \
Sentence: b    sárasvatī havíṣmatī́ndra kármasu no vata \\

Verse: 75 
Sentence: a    tā́ bʰiṣájā sukármaṇā sā́ sudúgʰā sárasvatī \
Sentence: b    sá vr̥trahā́ śatákratur índrāya dadʰur indriyám \\

Verse: 76 
Sentence: a    yuvám̐ surā́mam aśvinā námucāv āsuré sácā \
Sentence: b    vipipānā́ḥ sárasvatī́ndraṃ kármasv āvata \\

Verse: 77 
Sentence: a    putrám iva pitárāv aśvínobʰéndrāvátʰuḥ kā́vyair dam̐sánābʰiḥ \
Sentence: b    yát surā́maṃ vyápibaḥ śácībʰiḥ sárasvatī tvā magʰavann abʰiṣṇak \\

Verse: 78 
Sentence: a    yásminn áśvāsa r̥ṣabʰā́sa ukṣáṇo vaśā́ meṣā́ avasr̥ṣṭā́sa ā́hutāḥ \
Sentence: b    kīlālapé sómapr̥ṣṭʰāya vedʰáse hr̥dā́ matíṃ janaye cā́rum agnáye \\

Verse: 79 
Sentence: a    áhāvy agne havír āsyè te srucī̀va gʰr̥táṃ camvī̀va sómaḥ \
Sentence: b    vājasánim̐ rayím asmé suvī́raṃ praśastáṃ dʰehi yaśásaṃ br̥hántam \\

Verse: 80 
Sentence: a    aśvínā téjasā cákṣuḥ prāṇéna sárasvatī vīryàm \
Sentence: b    vācéndro bálenéndrāya dadʰur indriyám \\

Verse: 81 
Sentence: a    gómad ū ṣú ṇāsatyā áśvāvad yātam aśvinā \
Sentence: b    vartī́ rudrā nr̥pā́yyam \\

Verse: 82 
Sentence: a    ná yát páro nā́ntara ādadʰárṣad vr̥ṣaṇvasū \
Sentence: b    duḥśám̐so mártyo ripúḥ \\

Verse: 83 
Sentence: a    tā́ na ā́ voḍʰam aśvinā rayíṃ piśáṅgasaṃdr̥śam \
Sentence: b    dʰíṣṇyā varivovídam \\

Verse: 84 
Sentence: a    pāvakā́ naḥ sárasvatī vā́jebʰir vājínīvatī \
Sentence: b    yajñáṃ vaṣṭu dʰiyā́vasuḥ \\

Verse: 85 
Sentence: a    codayitrī́ sūnŕ̥tānāṃ cétantī sumatīnā́m \
Sentence: b    yajñáṃ dadʰe sárasvatī \\

Verse: 86 
Sentence: a    mahó árṇaḥ sárasvatī prá cetayati ketúnā \
Sentence: b    dʰíyo víśvā ví rājati \\

Verse: 87 
Sentence: a    índrā́ yāhi citrabʰāno sutā́ imé tvāyávaḥ \
Sentence: b    áṇvībʰis tánā pūtā́saḥ \\

Verse: 88 
Sentence: a    índrā́ yāhi dʰiyéṣitó víprajūtaḥ sutā́vataḥ \
Sentence: b    úpa bráhmāṇi vāgʰátaḥ \\

Verse: 89 
Sentence: a    índrā́ yāhi tū́tujāna úpa bráhmāṇi harivaḥ \
Sentence: b    suté dadʰiṣva naś cánaḥ \\

Verse: 90 
Sentence: a    aśvínā pibatāṃ mádʰu sárasvatyā sajóṣasā \
Sentence: b    índraḥ sutrā́mā vr̥trahā́ juṣántām̐ somyáṃ mádʰu \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.