TITUS
White Yajur-Veda: Vajasaneyi-Samhita (Madhyandina)
Part No. 21
Previous part

Paragraph: 21 
Verse: 1 
Sentence: a    imáṃ me varuṇa śrudʰī́ hávam adyā́ ca mr̥ḍaya \
Sentence: b    tvā́m asvasyúr ā́ cake \\

Verse: 2 
Sentence: a    tát tvā yāmi bráhmaṇā vándamānas tád ā́ śāste yájamāno havírbʰiḥ \
Sentence: b    áheḍamāno varuṇehá bodʰy úruśam̐sa mā́ na ā́yuḥ prá moṣīḥ \\

Verse: 3 
Sentence: a    tváṃ no agne váruṇasya vidvā́n devásya héḍó va yāsisīṣṭʰāḥ \
Sentence: b    yájiṣṭʰo váhnitamaḥ śóśucāno víśvā dvéṣām̐si prá mumugdʰy asmát \\

Verse: 4 
Sentence: a    sá tváṃ no agne vamó bʰavotī́ nédiṣṭʰo asyā́ uṣáso vyùṣṭau \
Sentence: b    áva yakṣva no váruṇam̐ rárāṇo vīhí mr̥ḍīkám̐ suhávo na edʰi \\

Verse: 5 
Sentence: a    mahī́m ū ṣú mātáram̐ suvratā́nām r̥tásya pátnīm ávase huvema \
Sentence: b    tuvikṣatrā́m ajárantīm urūcī́m̐ suśármāṇam áditim̐ supráṇītim \\

Verse: 6 
Sentence: a    sutrā́māṇaṃ pr̥tʰivī́ṃ dyā́m anehásam̐ suśármāṇam áditim̐ supráṇītim \
Sentence: b    devī́ṃ nā́vam̐ svaritrā́m ánāgasam ásravantīm ā́ ruhemā svastáye \\

Verse: 7 
Sentence: a    sunā́vam ā́ ruheyam ásravantīm ánāgasam \
Sentence: b    śatā́ritrām̐ svastáye \\

Verse: 8 
Sentence: a    ā́ no mitrāvaruṇā gʰr̥táir gávyūtim ukṣatam \
Sentence: b    mádʰvā rájām̐si sukratū \\

Verse: 9 
Sentence: a    prá bāhávā sisr̥taṃ jīváse na ā́ no gávyūtim ukṣataṃ gʰr̥téna \
Sentence: b    ā́ no jáne śravayataṃ yuvānā śrutáṃ me mitrāvaruṇā hávemā́ \\

Verse: 10 
Sentence: a    śáṃ no bʰavantu vājíno háveṣu devátātā mitádravaḥ svarkā́ḥ \
Sentence: b    jambʰáyantó hiṃ vŕ̥kam̐ rákṣām̐si sánemy asmád yuyavann ámīvāḥ \\

Verse: 11 
Sentence: a    vā́je-vāje vata vājino no dʰáneṣu viprā amr̥tā r̥tajñāḥ \
Sentence: b    asyá mádʰvaḥ pibata mādáyadʰvaṃ tr̥ptā́ yāta patʰíbʰir devayā́naiḥ \\

Verse: 12 
Sentence: a    sámiddʰo agníḥ samídʰā súsamiddʰo váreṇyaḥ \
Sentence: b    gāyatrī́ cʰánda indriyáṃ tryávir gáur váyo dadʰuḥ \\

Verse: 13 
Sentence: a    tánūnápāc cʰúcivratas tanūpā́ś ca sárasvatī \
Sentence: b    uṣṇíhā cʰánda indriyáṃ dityavā́ḍ gáur váyo dadʰuḥ \\

Verse: 14 
Sentence: a    íḍābʰir agnír ī́ḍyaḥ sómo devó ámartyaḥ \
Sentence: b    anuṣṭúp cʰánda indriyáṃ páñcāvir gáur váyo dadʰuḥ \\

Verse: 15 
Sentence: a    subarhír agníḥ pūṣaṇvā́nt stīrṇábarhir ámartyaḥ \
Sentence: b    br̥hatī́ cʰánda indriyáṃ trivatsó gáur váyo dadʰuḥ \\

Verse: 16 
Sentence: a    dúro devī́r díśo mahī́r brahmā́ devó bŕ̥haspátiḥ \
Sentence: b    paṅktíś cʰánda ihéndriyáṃ turyavā́ḍ gáur váyo dadʰuḥ \\

Verse: 17 
Sentence: a    uṣé yahvī́ supéśasā víśve devā́ ámartyāḥ \
Sentence: b    triṣṭúp cʰánda ihéndriyáṃ paṣṭʰavā́ḍ gáur váyo dadʰuḥ \\

Verse: 18 
Sentence: a    dáivyā hótārā bʰiṣájéndreṇa sayújā yujā́ \
Sentence: b    jágatī cʰánda indriyám anaḍvā́n gáur váyo dadʰuḥ \\

Verse: 19 
Sentence: a    tisrá íḍā sárasvatī bʰā́ratī marúto víśaḥ \
Sentence: b    virā́ṭ cʰánda ihéndriyáṃ dʰenúr gáur ná váyo dadʰuḥ \\

Verse: 20 
Sentence: a    tváṣṭā turī́po ádbʰuta indrāgnī́ puṣṭivárdʰanā \
Sentence: b    dvípadā cʰánda indriyám ukṣā́ gáur ná váyo dadʰuḥ \\

Verse: 21 
Sentence: a    śamitā́ no vánaspátiḥ savitā́ prasuván bʰágam \
Sentence: b    kakúp cʰánda indriyáṃ vaśā́ vehád váyo dadʰuḥ \\

Verse: 22 
Sentence: a    svā́hā yajñáṃ váruṇaḥ sukṣatró bʰeṣajáṃ karat \
Sentence: b    áticcʰandā indriyáṃ br̥hád r̥ṣabʰó gáur váyo dadʰuḥ \\

Verse: 23 
Sentence: a    vasanténa r̥túnā devā́ vásvavas trivŕ̥tā stutā́ḥ \
Sentence: b    ratʰantaréṇa téjasā havír índre váyo dadʰuḥ \\

Verse: 24 
Sentence: a    grīṣméṇa r̥túnā devā́ rudrā́ḥ pañcadaśé stutā́ḥ \
Sentence: b    br̥hatā́ yáśasā bálam̐ havír índre váyo dadʰuḥ \\

Verse: 25 
Sentence: a    varṣā́bʰir r̥túnādityā́ stóme saptadaśé stutā́ḥ \
Sentence: b    vairūpéṇa viśáujasā havír índre váyo dadʰuḥ \\

Verse: 26 
Sentence: a    śāradéna r̥túnā devā́ ekavim̐śá r̥bʰáva stutā́ḥ \
Sentence: b    vairājéna śriyā́ śríyam̐ havír índre váyo dadʰuḥ \\

Verse: 27 
Sentence: a    hemanténa r̥túnā devā́s triṇavé marúta stutā́ḥ \
Sentence: b    bálena śakvarī́ḥ sáho havír índre váyo dadʰuḥ \\

Verse: 28 
Sentence: a    śaiśiréṇa r̥túnā devā́s trayastrim̐śè mŕ̥tā stutā́ḥ \
Sentence: b    satyéna revátīḥ kṣatrám̐ havír índre váyo dadʰuḥ \\

Verse: 29 
Sentence: a    hótā yakṣat samídʰāgním iḍás padé śvínéndram̐ sárasvatīm ajó dʰūmró ná godʰū́maiḥ kúvalair bʰeṣajáṃ mádʰu śáṣpair ná téja indriyáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 30 
Sentence: a    hótā yakṣat tánūnápāt sárasvatī ávir meṣó ná bʰeṣajáṃ patʰā́ mádʰumatā bʰárann aśvínéndrāya vīryàṃ bádarair upavā́kābʰir bʰeṣajáṃ tókmabʰiḥ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 31 
Sentence: a    hótā yakṣan nárāśám̐saṃ ná nagnáhuṃ pátim̐ súrayā bʰeṣajáṃ meṣáḥ sárasvatī bʰiṣág rátʰo ná candry àśvínor vapā́ índrasya vīryàṃ bádarair upavākā́bʰir bʰeṣajáṃ tókmabʰiḥ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 32 
Sentence: a    hótā yakṣad iḍeḍitá ājúhvānaḥ sárasvatīm índraṃ bálena vardʰáyann r̥ṣabʰéṇa gávendriyám aśvínéndrāya bʰeṣajáṃ yávair karkándʰubʰir mádʰu lājáir ná mā́saraṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 33 
Sentence: a    hótā yakṣad barhír ū́rṇamradā bʰiṣáṅ nā́satyā bʰiṣájāśvínā́śvā śíśumatī bʰiṣág dʰenúḥ sárasvatī bʰiṣág duhá índrāya bʰeṣajáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 34 
Sentence: a    hótā yakṣad dúro díśaḥ kavaṣyò ná vyácasvatīr aśvíbʰyāṃ ná dúro díśa índro ná ródasī dúgʰe duhé dʰenúḥ sárasvaty aśvínéndrāya bʰeṣajám̐ śukráṃ ná jyótir indriyáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 35 
Sentence: a    hótā yakṣat supéśasoṣé náktaṃ dívāśvínā sámañjati sárasvatyā tvíṣim índre ná bʰeṣajám̐ śyenó ná rájasā hr̥dā́ śriyā́ ná mā́saraṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 36 
Sentence: a    hótā yakṣad dáivyā hótārā bʰiṣájāśvínéndraṃ ná jā́gr̥vi dívā náktaṃ ná bʰeṣajáiḥ śū́ṣam̐ sárasvatī bʰiṣák sī́sena duha indriyáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 37 
Sentence: a    hótā yakṣat tisró devī́r ná bʰeṣajáṃ tráyastridʰā́tavo páso rūpám índre hiraṇyáyam aśvínéḍā ná bʰā́ratī vācā́ sárasvatī máha índrāya duha indriyáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 38 
Sentence: a    hótā yakṣat surérasam r̥ṣabʰáṃ náryāpasaṃ tváṣṭāram índram aśvínā bʰeṣajáṃ ná sárasvatīm ójo ná hūtír indriyáṃ vŕ̥ko ná rabʰasó bʰiṣág yáśaḥ súrayā bʰeṣajám̐ śriyā́ ná mā́saraṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 39 
Sentence: a    hótā yakṣad vánaspátim̐ śamitā́ram̐ śatákratuṃ bʰīmáṃ ná manyúm̐ rā́jānaṃ vyāgʰráṃ námasāśvínā bʰā́mam̐ sárasvatī bʰiṣág índrāya duha indriyáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 40 
Sentence: a    hótā yakṣad agním̐ svā́hā́jyasya stokā́nām̐ svā́hā médasāṃ pŕ̥tʰak svā́hā cʰā́gam aśvíbʰyām̐ svā́hā meṣám̐ sárasvatyai svā́ha r̥ṣabʰám índrāya sim̐hā́ya sáhasa indriyám̐ svā́hāgníṃ ná bʰeṣajám̐ svā́hā sómam indriyám̐ svā́héndram̐ sutrā́māṇam̐ savitā́raṃ váruṇaṃ bʰiṣájāṃ pátim̐ svā́hā vánaspátiṃ priyáṃ pā́tʰo ná bʰeṣajám̐ svā́hā devā́ ājyapā́ juṣāṇó agnír bʰeṣajáṃ páyaḥ sómaḥ parisrútā gʰr̥táṃ mádʰu vyántv ā́jyasya hótar yaja \\

Verse: 41 
Sentence: a    hótā yakṣad aśvínau cʰā́gasya vapā́yā médaso juṣétām̐ havír hótar yaja \
Sentence: b    hótā yakṣat sárasvatīṃ meṣásya vapā́yā médaso juṣátām̐ havír hótar yaja \
Sentence: c    hótā yakṣad índram r̥ṣabʰasya vapā́yā médaso juṣátām̐ havír hótar yaja \\

Verse: 42 
Sentence: a    hótā yakṣad aśvínau sárasvatīm índram̐ sutrā́māṇam imé sómāḥ surā́māṇaś cʰā́gair ná meṣáir r̥ṣabʰáiḥ sutā́ḥ śáṣpair ná tókmabʰir lājáir máhasvanto mádā mā́sareṇa páriṣkr̥tāḥ śukrā́ḥ páyasvanto mŕ̥tāḥ prástʰitā vo madʰuścútas tā́n aśvínā sárasvatī́ndraḥ sutrā́mā vr̥trahā́ juṣántām̐ somyáṃ mádʰu píbantu vyántu hótar yaja \\

Verse: 43 
Sentence: a    hótā yakṣad aśvínau cʰā́gasya havíṣa ā́ttām adyá madʰyató méda údbʰr̥taṃ purā́ dvéṣobʰyaḥ purā́ páuruṣeyyā gr̥bʰó gʰástāṃ nūnáṃ gʰāséajrāṇāṃ yávasapratʰamānām̐ sumátkṣarāṇām̐ śatarudríyāṇām agniṣvāttā́nāṃ pī́vopavasānāṃ pārśvatáḥ śroṇitáḥ śitāmatá utsādató ṅgād-aṅgād ávattānāṃ kárata evā́śvínā juṣétām̐ havír hótar yaja \\

Verse: 44 
Sentence: a    hótā yakṣat sárasvatīṃ meṣásya havíṣa ā́vayad adyá madʰyató méda údbʰr̥taṃ purā́ dvéṣobʰyaḥ purā́ páuruṣeyyā gr̥bʰó gʰásan nūnáṃ gʰāséajrāṇāṃ yávasapratʰamānām̐ sumátkṣarāṇām̐ śatarudríyāṇām agniṣvāttā́nāṃ pī́vopavasānāṃ pārśvatáḥ śroṇitáḥ śitāmatá utsādató ṅgād-aṅgād ávattānāṃ kárad evám̐ sárasvatī juṣátām̐ havír hótar yaja \\

Verse: 45 
Sentence: a    hótā yakṣad índram r̥ṣabʰásya havíṣa ā́vayad adyá madʰyató méda údbʰr̥taṃ purā́ dvéṣobʰyaḥ purā́ páuruṣeyyā gr̥bʰó gʰásan nūnáṃ gʰāséajrāṇāṃ yávasapratʰamānām̐ sumátkṣarāṇām̐ śatarudríyāṇām agniṣvāttā́nāṃ pī́vopavasānāṃ pārśvatáḥ śroṇitáḥ śitāmatá utsādató ṅgād-aṅgād ávattānāṃ kárad evám índro juṣátām̐ havír hótar yaja \\

Verse: 46 
Sentence: a    hótā yakṣad vánaspátim abʰí hí piṣṭátamayā rábʰiṣṭayā raśanáyā́dʰita \
Sentence: b    yátrāśvínoś cʰā́gasya havíṣaḥ priyā́ dʰā́māni yátra sárasvatyā meṣásya havíṣaḥ priyā́ dʰā́māni yátréndrasya r̥ṣabʰásya havíṣaḥ priyā́ dʰā́māni yátrāgnéḥ priyā́ dʰā́māni yátra sómasya priyā́ dʰā́māni yátréndrasya sutrā́mṇaḥ priyā́ dʰā́māni yátra savitúḥ priyā́ dʰā́māni yátra váruṇasya priyā́ dʰā́māni yátra vánaspáteḥ priyā́ pā́tʰām̐si yátra devā́nām ājyapā́nāṃ priyā́ dʰā́māni yátrāgnér hótuḥ priyā́ dʰā́māni tátraitā́n prastútyevopastútyevopā́va srakṣad rábʰīyasa iva kr̥tvī́ kárad eváṃ devó vánaspátir juṣátām̐ havír hótar yaja \\

Verse: 47 
Sentence: a    hótā yakṣad agním̐ sviṣṭakŕ̥tam áyāḍ agnír aśvínoś cʰā́gasya havíṣaḥ priyā́ dʰā́māny áyāṭ sárasvatyā meṣásya havíṣaḥ priyā́ dʰā́māny áyāḍ índrasya r̥ṣabʰásya havíṣaḥ priyā́ dʰā́māny áyāḍ agnéḥ priyā́ dʰā́māny áyāṭ sómasya priyā́ dʰā́māny áyāḍ índrasya sutrā́mṇaḥ priyā́ dʰā́māny áyāṭ savitúḥ priyā́ dʰā́māny áyāḍ váruṇasya priyā́ dʰā́māny áyāḍ vánaspáteḥ priyā́ pā́tʰām̐sy áyāḍ devā́nām ājyapā́nāṃ priyā́ dʰā́māni yákṣad agnér hótuḥ priyā́ dʰā́māni yákṣat sváṃ mahimā́nam ā́ yajatām éjyā íṣaḥ kr̥ṇótu só adʰvarā́ jātávedā juṣátām̐ havír hótar yaja \\

Verse: 48 
Sentence: a    deváṃ barhíḥ sárasvatī sudevám índre aśvínā \
Sentence: b    téjo ná cákṣur akṣyòr barhíṣā dadʰur indriyáṃ vasuváne vasudʰéyasya vyantu yája \\

Verse: 49 
Sentence: a    devī́r dvā́ro aśvínā bʰiṣájéndre sárasvatī \
Sentence: b    prāṇáṃ ná vīryàṃ nasí dvā́ro dadʰur indriyáṃ vasuváne vasudʰéyasya vyantu yája \\

Verse: 50 
Sentence: a    devī́ uṣā́sāv aśvínā sutrā́méndre sárasvatī \
Sentence: b    bálaṃ ná vā́cam āsyà uṣā́bʰyāṃ dadʰur indriyáṃ vasuváne vasudʰéyasya vyantu yája \\

Verse: 51 
Sentence: a    devī́ jóṣṭrī sárasvaty aśvínéndram avardʰayan \
Sentence: b    śrótraṃ ná kárṇayor yáśo jóṣṭrībʰāṃ dadʰur indriyáṃ vasuváne vasudʰéyasya vyantu yája \\

Verse: 52 
Sentence: a    devī́ ūrjā́hutī dúgʰe sudúgʰéndre sárasvaty aśvínā bʰiṣájāvataḥ \
Sentence: b    śukráṃ ná jyóti stánayor ā́hutī dʰatta indriyáṃ vasuváne vasudʰéyasya vyantu yája \\

Verse: 53 
Sentence: a    devā́ devā́nāṃ bʰiṣájā hótārāv índram aśvínā \
Sentence: b    vaṣaṭkāráiḥ sárasvatī tvíṣiṃ ná hŕ̥daye matím̐ hótr̥bʰyāṃ dadʰur indriyáṃ vasuváne vasudʰéyasya vyantu yája \\

Verse: 54 
Sentence: a    devī́s tisrás tisró devī́r aśvínéḍā sárasvatī \
Sentence: b    śū́ṣaṃ ná mádʰye nā́bʰyām índrāya dadʰur indriyáṃ vasuváne vasudʰéyasya vyantu yája \\

Verse: 55 
Sentence: a    devá índro nárāśám̐sas trivarūtʰáḥ sárasvatyāśvíbʰyām īyate rátʰaḥ \
Sentence: b    réto ná rūpám amŕ̥taṃ janítram índrāya tváṣṭā dádʰad indriyā́ṇi vasuváne vasudʰéyasya vyantu yája \\

Verse: 56 
Sentence: a    devó deváir vánaspátir híraṇyaparṇo aśvíbʰyām̐ sárasvatyā supippalá índrāya pacyate mádʰu \
Sentence: b    ójo ná jūtír r̥ṣabʰó ná bʰā́maṃ vánaspátir no dádʰad indriyā́ṇi vasuváne vasudʰéyasya vyantu yája \\

Verse: 57 
Sentence: a    deváṃ barhír vā́ritīnām adʰvaré stīrṇám aśvíbʰyām ū́rṇamradāḥ sárasvatyā syonám indra te sádaḥ \
Sentence: b    īśā́yai manyúm̐ rā́jānaṃ barhíṣā dadʰur indriyáṃ vasuváne vasudʰéyasya vyantu yája \\

Verse: 58 
Sentence: a    devó agníḥ sviṣṭakŕ̥d devā́n yakṣad yatʰāyatʰám̐ hótārāv índram aśvínā vācā́ vā́cam̐ sárasvatīm agním̐ sómam̐ sviṣṭakŕ̥t svìṣṭa índraḥ sutrā́mā savitā́ váruṇo bʰiṣág iṣṭó devóvánaspátiḥ svìṣṭā devā́ ājyapā́ḥ svìṣṭo agnír agnínā hótā hotré sviṣṭakŕ̥d yáśo ná dádʰad indriyám ū́rjam ápacitim̐ svadʰā́ṃ vasuváne vasudʰéyasya vyantu yája \\

Verse: 59 
Sentence: a    agním adyá hótāram avr̥ṇītāyáṃ yájamānaḥ pácan páktīḥ pácan puroḍā́śān badʰnánn aśvíbʰyāṃ cʰā́gam̐ sárasvatyai meṣám índrāya r̥ṣabʰám̐ sunvánn aśvíbʰyām̐ sárasvatyā índrāya sutrā́mṇe surāsomā́n \\

Verse: 60 
Sentence: a    sūpastʰā́ adyá devó vánaspátir abʰavad aśvíbʰyāṃ cʰā́gena sárasvatyai meṣéṇéndrāya r̥ṣabʰéṇā́kṣam̐s tā́n medastáḥ práti pacatā́gr̥bʰīṣatā́vīvr̥dʰanta puroḍā́śair ápur aśvínā sárasvatī́ndraḥ sutrā́mā surāsomā́n \\

Verse: 61 
Sentence: a    tvā́m adyá r̥ṣa ārṣeya r̥ṣīṇāṃ napād avr̥ṇītāyṃ yájamāno bahúbʰya ā́ sáṃgatebʰya eṣá me devéṣu vásu vā́ryāyakṣyata íti tā́ yā́ devā́ deva dā́nāny ádus tā́ny asmā ā́ ca śā́ssvā́ ca gurasveṣitáś ca hotar ási bʰadravā́cyāya préṣito mā́nuṣaḥ sūktavākā́ya sūktā́ brūhi \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.