TITUS
White Yajur-Veda: Vajasaneyi-Samhita (Madhyandina)
Part No. 22
Previous part

Paragraph: 22 
Verse: 1 
Sentence: a    téjo si śukrám amŕ̥tam āyuṣpā́ ā́yur me pāhi \
Sentence: b    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: c    ā́ dade \\

Verse: 2 
Sentence: a    imā́m agr̥bʰṇan raśanā́m r̥tásya pū́rva ā́yuṣi vidátʰeṣu kavyā́ \
Sentence: b    sā́ no asmínt sutá ā́ babʰūva r̥tásya sā́mant sarámārápantī \\

Verse: 3 
Sentence: a    abʰidʰā́ asi bʰúvanam asi yantā́si dʰartā́ \
Sentence: b    sá tvám agníṃ vaiśvānarám̐ sápratʰasaṃ gaccʰa svā́hākr̥taḥ \\

Verse: 4 
Sentence: a    svagā́ tvā devébʰyaḥ prajā́pataye bráhmann áśvaṃ bʰantsyā́mi devébʰyaḥ prajā́pataye téna rādʰyāsam \
Sentence: b    táṃ badʰāna devébʰyaḥ prajā́pataye téna rādʰnuhi \\

Verse: 5 
Sentence: a    prajā́pataye tvā júṣṭaṃ prókṣāmi \
Sentence: b    índrāgníbʰyāṃ tvā júṣṭaṃ prókṣāmi \
Sentence: c    vāyáve tvā júṣṭaṃ prókṣāmi \
Sentence: d    víśvebʰyas tvā devébʰyo júṣṭaṃ prókṣāmi \
Sentence: e    sárvebʰyas tvā devébʰyo júṣṭaṃ prókṣāmi \
Sentence: f    yó árvantaṃ jígʰām̐sati tám abʰy àmīti váruṇaḥ paró mártaḥ paráḥ śvā́ \\

Verse: 6 
Sentence: a    agnáye svā́hā \
Sentence: b    sómāya svā́hā \
Sentence: c    apā́ṃ módāya svā́hā \
Sentence: d    savitré svā́hā \
Sentence: e    vāyáve svā́hā \
Sentence: f    víṣṇave svā́hā \
Sentence: g    índrāya svā́hā \
Sentence: h    bŕ̥haspátaye svā́hā \
Sentence: i    mitrā́ya svā́hā \
Sentence: j    váruṇāya svā́hā \\

Verse: 7 
Sentence: a    hiṅkārā́ya svā́hā híṅkr̥tāya svā́hā krándate svā́hāvakrandā́ya svā́hā prótʰate svā́hā praprotʰā́ya svā́hā gandʰā́ya svā́hā gʰrātā́ya svā́hā níviṣṭāya svā́hópaviṣṭāya svā́hā sáṃditāya svā́hā válgate svā́hā́sīnāya svā́hā śayānāya svā́hā svápate svā́hā jā́grate svā́hā kū́jate svā́hā prábuddʰāya svā́hā vijŕ̥mbʰamāṇāya svā́hā vícr̥tāya svā́hā sám̐hānāya svā́hópastʰitāya svā́hā́yanāya svā́hā prā́yaṇāya svā́hā \\

Verse: 8 
Sentence: a    yaté svā́hā dʰā́vate svā́hoddrāvā́ya svā́hóddrutāya svā́hā śūkārā́ya svā́hā śū́kr̥tāya svā́hā níṣaṇāya svā́hóttʰitāya svā́hā javā́ya svā́hā bálāya svā́hā vivártamānāya svā́hā vívr̥ttāya svā́hā vidʰūnvānā́ya svā́hā vídʰūtāya svā́hā śúśrūṣamāṇāya svā́hā śr̥ṇvaté svā́hékṣamāṇāya svā́hekṣitā́ya svā́hā vī̀kṣitāya svā́hā nimeṣā́ya svā́hā yád átti tásmai svā́hā yát píbati tásmai svā́hā yán mū́traṃ karóti tásmai svā́hā kurvaté svā́hā kr̥tā́ya svā́hā \\

Verse: 9 
Sentence: a    tát savitúr váreṇyaṃ bʰárgo devásya dʰīmahi \
Sentence: b    dʰíyo yó naḥ pracodáyat \\

Verse: 10 
Sentence: a    híraṇyapāṇim ūtáye savitā́ram úpa hvaye \
Sentence: b    sá céttā devátā padám \\

Verse: 11 
Sentence: a    devásya cétato mahī́ṃ prá savitúr havāmahe \
Sentence: b    sumatím̐ satyárādʰasam \\

Verse: 12 
Sentence: a    suṣṭutím̐ sumatīvŕ̥dʰo rātím̐ savitúr īmahe \
Sentence: b    prá devā́ya matīvíde \\

Verse: 13 
Sentence: a    rātím̐ sátpatiṃ mahé savitā́ram úpa hvaye \
Sentence: b    āsaváṃ devávītaye \\

Verse: 14 
Sentence: a    devásya savitúr matím āsaváṃ viśvádevyam \
Sentence: b    dʰiyā́ bʰágaṃ manāmahe \\

Verse: 15 
Sentence: a    agním̐ stómena bodʰaya samidʰānó ámartyam \
Sentence: b    havyā́ devéṣu no dadʰat \\

Verse: 16 
Sentence: a    sá havyavā́ḍ ámartya uśíg dūtáś cánohitaḥ \
Sentence: b    agnír dʰiyā́ sám r̥ṇvati \\

Verse: 17 
Sentence: a    agníṃ dūtáṃ puró dadʰe havyavā́ham úpa bruve \
Sentence: b    devā́m̐ ā́ sādayād ihá \\

Verse: 18 
Sentence: a    ájījano hí pavamāna sū́ryaṃ vidʰā́re śákmanā páyaḥ \
Sentence: b    gójīrayā rám̐hamāṇaḥ púrandʰyā \\

Verse: 19 
Sentence: a    vibʰū́r mātrā́ prabʰū́ḥ pitrā́śvo si háyo sy átyo si máyo sy árvāsi sáptir asi vājy àsi vŕ̥ṣāsi nr̥máṇā asi \
Sentence: b    yáyur nā́māsi śíśur nā́māsy ādityā́nāṃ pátvā́nv ihi \
Sentence: c    dévā āśāpālā etáṃ devébʰyó śvaṃ médʰāya prókṣitam̐ rakṣat \
Sentence: d    ihá rántiḥ \
Sentence: e    ihá ramatām \
Sentence: f    ihá dʰŕ̥tiḥ \
Sentence: g    ihá svádʰr̥tiḥ svā́hā \\

Verse: 20 
Sentence: a    kā́ya svā́hā kásmai svā́hā katamásmai svā́hā svā́hādʰím ā́dʰītāya svā́hā mánaḥ prajā́pataye svā́hācittáṃ víjñātāyā́dityai svā́hā́dityai mahyái svā́hā́dityai sumr̥ḍīkā́yai svā́hā sárasvatyai svā́hā sárasvatyai pāvakā́yai svā́hā sárasvatyai br̥hatyái svā́hā pūṣṇé svā́hā pūṣṇé prapatʰyā̀ya svā́hā pūṣṇé naráṃdʰiṣāya svā́hā tváṣṭre svā́hā tváṣṭre turī́pāya svā́hā tváṣṭre pururū́pāya svā́hā víṣṇave svā́hā víṣṇave nibʰūyapā́ya svā́hā víṣṇave śipiviṣṭā́ya svā́hā \\

Verse: 21 
Sentence: a    víśvo devásya netúr márto vurīta sakʰyám \
Sentence: b    víśvo rāyá iṣudʰyati dyumnáṃ vr̥ṇīta puṣyáse svā́hā \\

Verse: 22 
Sentence: a    ā́ bráhman brāhmaṇó brahmavarcasī́ jāyatām ā́ rāṣṭré rājanyàḥ śū́ra iṣavyò tivyādʰī́ mahāratʰó jāyatāṃ dógdʰrī dʰenúr vóḍʰānaḍvā́n āśúḥ sáptiḥ púraṃdʰir yóṣā jiṣṇū́ ratʰeṣṭʰā́ḥ sabʰéyo yúvā́syá yájamānasya vīró jāyatāṃ níkāme-nikāme naḥ parjányo varṣatu pʰálavatyo na óṣadʰayaḥ pacyantāṃ yogakṣemó naḥ kalpatām \\

Verse: 23 
Sentence: a    prāṇā́ya svā́hāpānā́ya svā́hā vyānā́ya svā́hā cákṣuṣe svā́hā śrótrāya svā́hā vācé svā́hā mánase svā́hā \\

Verse: 24 
Sentence: a    prā́cyai diśé svā́hārvā́cyai diśé svā́hā dákṣiṇāyai diśé svā́hārvā́cyai diśé svā́hā pratī́cyai diśé svā́hārvā́cyai diśé svā́hódīcyai diśé svā́hārvā́cyai diśé svā́hordʰvā́yai diśé svā́hārvā́cyai diśé svā́hā́vācyai diśé svā́hārvā́cyai diśé svā́hā \\

Verse: 25 
Sentence: a    adbʰyáḥ svā́hā vārbʰyáḥ svā́hodakā́ya svā́hā tíṣṭʰantībʰyaḥ svā́hā srávantībʰyaḥ svā́hā syándamānābʰyaḥ svā́hā kū́pyābʰyaḥ svā́hā sū́dyābʰyaḥ svā́hā dʰā́ryābʰyaḥ svā́hārṇavā́ya svā́hā samudrā́ya svā́hā sarirā́ya svā́hā \\

Verse: 26 
Sentence: a    vā́tāya svā́hā dʰūmā́ya svā́hābʰrā́ya svā́hā megʰā́ya svā́hā vidyótamānāya svā́hā stanáyate svā́hāvaspʰū́rjate svā́hā várṣate svā́hāvavárṣate svā́hodráṃ várṣate svā́hā śīgʰráṃ várṣate svā́hodgr̥hṇaté svā́hódgr̥hītāya svā́hā pruṣṇaté svā́hā śīkāyaté svā́hā prúṣvābʰyaḥ svā́hā hrādúnībʰyaḥ svā́hā nīhārā́ya svā́hā \\

Verse: 27 
Sentence: a    agnáye svā́hā sómāya svā́héndrāya svā́hā pr̥tʰivyái svā́hāntárikṣāya svā́hā divé svā́hā digbʰyáḥ svā́hā́śābʰyaḥ svā́horvyái diśé svā́hārvā́cyai diśé svā́hā \\

Verse: 28 
Sentence: a    nákṣatrebʰyaḥ svā́hā nakṣatríyebʰyaḥ svā́hāhorātrébʰyaḥ svā́hārdʰamāsébʰyaḥ svā́hā mā́sebnhyaḥ svā́hā r̥túbʰyaḥ svā́hārtavébʰyaḥ svā́hā saṃvatsarā́ya svā́hā dyā́vāpr̥tʰivī́bʰyām̐ svā́hā candrā́ya svā́hā sū́ryāya svā́hā raśmíbʰyaḥ svā́hā vásubʰyaḥ svā́hā rudrébʰyaḥ svā́hādityébʰyaḥ svā́hā marúdbʰyaḥ svā́hā víśvebʰyo devébʰyaḥ svā́hā mū́lebʰyaḥ svā́hā śā́kʰābʰyaḥ svā́hā vánaspátibʰyaḥ svā́hā púṣpebʰyaḥ svā́hā pʰálebʰyaḥ svā́háuṣadʰībʰyaḥ svā́hā \\

Verse: 29 
Sentence: a    pr̥tʰivyái svā́hāntárikṣāya svā́hā divé svā́hā sū́ryāya svā́hā candrā́ya svā́hā nákṣatrebʰyaḥ svā́hādbʰyáḥ svā́háuṣadʰībʰyaḥ svā́hā vánaspátibʰyaḥ svā́hā pariplavébʰyaḥ svā́hā carācarébʰyaḥ svā́hā sarīsr̥pébʰyaḥ svā́hā \\

Verse: 30 
Sentence: a    ásave svā́hā vásave svā́hā vibʰúve svā́hā vívasvate svā́hā gaṇaśríye svā́hā gaṇápataye svā́hābʰibʰúve svā́hā́dʰipataye svā́hā śūṣā́ya svā́hā sam̐sarpā́ya svā́hā candrā́ya svā́hā jyótiṣe svā́hā malimlucā́ya svā́hā dívā patáyate svā́hā \\

Verse: 31 
Sentence: a    mádʰave svā́hā mā́dʰavāya svā́hā śukrā́ya svā́hā śúcaye svā́hā nábʰase svā́hā nabʰasyā̀ya svā́hāheṣā́ya svā́horjā́ya svā́hā sáhase svā́hā sahasyā̀ya svā́hā tápase svā́hā tapasyā̀ya svā́hām̐hasaspatáye svā́hā \\

Verse: 32 
Sentence: a    vā́jāya svā́hā prasavā́ya svā́hāpijā́ya svā́hā krátave svā́hā svàḥ svā́hā mūrdʰné svā́hā vyaśnuvíne svā́hā́ntyāya svā́hā́ntyāya bʰauvanā́ya svā́hā bʰúvanasya pátaye svā́hā́dʰipataye svā́hā prajā́pataye svā́hā \\

Verse: 33 
Sentence: a    ā́yur yajñéna kalpatām̐ svā́hā prāṇó yajñéna kalpatām̐ svā́hāpānó yajñéna kalpatām̐ svā́hā vyānó yajñéna kalpatām̐ svā́hodānó yajñéna kalpatām̐ svā́hā samānó yajñéna kalpatām̐ svā́hā cákṣur yajñéna kalpatām̐ svā́hā śrótraṃ yajñéna kalpatām̐ svā́hā vā́g yajñéna kalpatām̐ svā́hā máno yajñéna kalpatām̐ svā́hātmā́ yajñéna kalpatām̐ svā́hā brahmā́ yajñéna kalpatām̐ svā́hā jyótir yajñéna kalpatām̐ svā́hā svàr yajñéna kalpatām̐ svā́hā pr̥ṣṭʰáṃ yajñéna kalpatām̐ svā́hā yajñó yajñéna kalpatām̐ svā́hā \\

Verse: 34 
Sentence: a    ékasmai svā́hā dvā́bʰyām̐ svā́hā śatā́ya svā́háikaśatāya svā́hā vyùṣṭyai svā́hā svargā́ya svā́hā \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.