TITUS
White Yajur-Veda: Vajasaneyi-Samhita (Madhyandina)
Part No. 23
Previous part

Paragraph: 23 

Verse: 1 
Sentence: a    hiraṇyagarbʰáḥ sám avartatā́gre bʰūtásya jātáḥ pátir éka āsīt \
Sentence: b    sá dādʰāra pr̥tʰivī́ṃ dyā́m utémā́ṃ kásmai devā́ya havíṣā vidʰema \\

Verse: 2 
Sentence: a    upayāmágr̥hīto si prajā́pataye tvā júṣṭaṃ gr̥hṇāmi \
Sentence: b    eṣá te yóniḥ sū́ryas te mahimā́ \
Sentence: c    yás té hant saṃvatsaré mahimā́ saṃbabʰū́va yás te vāyā́v antárikṣe mahimā́ saṃbabʰū́va yás te diví sū́rye mahimā́ saṃbabʰū́va tásmai te mahimné prajā́pataye svā́hā devébʰyaḥ \\

Verse: 3 
Sentence: a    yáḥ prāṇató nimiṣató mahitváika íd rā́jā jágato babʰū́va \
Sentence: b    yá ī́śe asyá dvipádaś cátuṣpadaḥ kásmai devā́ya havíṣā vidʰema \\

Verse: 4 
Sentence: a    upayāmágr̥hīto si prajā́pataye tvā júṣṭaṃ gr̥hṇāmi \
Sentence: b    eṣá te yóniś candrás te mahimā́ \
Sentence: c    yás te rā́trau saṃvatsaré mahimā́ saṃbabʰū́va yás te pr̥tʰivyā́m agnáu mahimā́ saṃbabʰū́va yás te nákṣatreṣu candrámasi mahimā́ saṃbabʰū́va tásmai te mahimné prajā́pataye devébʰyaḥ svā́hā \\

Verse: 5 
Sentence: a    yuñjánti bradʰnám aruṣáṃ cárantaṃ pári tastʰúṣaḥ \
Sentence: b    rócante rocanā́ diví \\

Verse: 6 
Sentence: a    yuñjánty asya kā́myā hárī vípakṣasā rátʰe \
Sentence: b    śóṇā dʰr̥ṣṇū́ nr̥sā́hasā \\

Verse: 7 
Sentence: a    yád vā́to apó aganīgan priyā́m índrasya tanvàm \
Sentence: b    etám̐ stotar anéna patʰā́ púnar áśvam ā́ vartayāsi naḥ \\

Verse: 8 
Sentence: a    vásavas tvāñjantu gāyatréṇa cʰándasā \
Sentence: b    rudrā́s tvāñjantu tráiṣṭubʰena cʰándasā \
Sentence: c    ādityā́s tvāñjantu jā́gatena cʰándasā \
Sentence: d    bʰū́r bʰúvaḥ svàr lājī́3ñ cʰācī́3n yávye gávya etád ánnam atta devā etád ánnam addʰi prajāpate \\

Verse: 9 
Sentence: a    káḥ svid ekākī́ carati ká u svij jāyate púnaḥ \
Sentence: b    kím̐ svid dʰimásya bʰeṣajáṃ kím v āvápanaṃ mahát \\

Verse: 10 
Sentence: a    sū́rya ekākī́ carati candrámā jāyate púnaḥ \
Sentence: b    agnír dʰimásya bʰeṣajáṃ bʰū́mir āvápanaṃ mahát \\

Verse: 11 
Sentence: a    kā́ svid āsīt pūrvácittiḥ kím̐ svid āsīd br̥hád váyaḥ \
Sentence: b    kā́ svid āsīt pilippilā́ kā́ svid āsīt piśaṅgilā́ \\

Verse: 12 
Sentence: a    dyáur āsīt pūrvácittiḥ áśva āsīd br̥hád váyaḥ \
Sentence: b    ávir āsīt pilippilā́ rā́trir āsīt piśaṅgilā́ \\

Verse: 13 
Sentence: a    vāyúṣ ṭvā pacatáir avatu \
Sentence: b    ásitagrīvaś cʰā́gaiḥ \
Sentence: c    nyagródʰaś camasáiḥ \
Sentence: d    śalmalír vŕ̥ddʰyā \
Sentence: e    eṣá syá rātʰyó vŕ̥ṣā \
Sentence: f    paḍbʰíś catúrbʰir éd agan \
Sentence: g    brahmā́kr̥ṣṇaś ca no vatu \
Sentence: h    námo gnáye \\

Verse: 14 
Sentence: a    sám̐śito raśmínā rátʰaḥ sám̐śito raśmínā háyaḥ \
Sentence: b    sám̐śito apsv àpsujā́ brahmā́ sómapurogavaḥ \\

Verse: 15 
Sentence: a    svayáṃ vājim̐s tanvàṃ kalpayasva svayáṃ yajasva svayáṃ juṣasva \
Sentence: b    mahimā́ te nyéna ná saṃnáśe \\

Verse: 16 
Sentence: a    ná vā́ u etán mriyase ná riṣyasi devā́m̐ íd eṣi patʰíbʰiḥ sugébʰiḥ \
Sentence: b    yátrā́sate sukŕ̥to yátra té yayús tátra tvā deváḥ savitā́ dadʰātu \\

Verse: 17 
Sentence: a    agníḥ paśúr āsīt ténāyajanta sá etáṃ lokám ajayad yásminn agníḥ sá te lokó bʰaviṣyati táṃ jeṣyasi píbaitā́ apáḥ \
Sentence: b    vāyúḥ paśúr āsīt ténāyajanta sá etáṃ lokám ajayad yásmin vāyúḥ sá te lokó bʰaviṣyati táṃ jeṣyasi píbaitā́ apáḥ \
Sentence: c    sū́ryaḥ paśúr āsīt ténāyajanta sá etáṃ lokám ajayad yásmint sū́ryaḥ sá te lokó bʰaviṣyati táṃ jeṣyasi píbaitā́ apáḥ \\

Verse: 18 
Sentence: a    prāṇā́ya svā́hā \
Sentence: b    apānā́ya svā́hā \
Sentence: c    vyānā́ya svā́hā ámbe ámbiké mbālike ná mā nayati káś caná \
Sentence: d    sásasty aśvakáḥ súbʰadrikāṃ kāmpīlavāsínīm \\

Verse: 19 
Sentence: a    gaṇā́nāṃ tvā gaṇápatim̐ havāmahe priyā́ṇāṃ tvā priyápatim̐ havāmahe nidʰī́nāṃ tvā nidʰipátim̐ havāmahe vaso mama \
Sentence: b    ā́hám ajāni garbʰadʰám ā́ tvám ajāsi garbʰadʰám \\

Verse: 20 
Sentence: a    tā́ ubʰáu catúraḥ padáḥ samprá sārayāva svargé loké prórṇuvātʰāṃ vŕ̥ṣā vājī́ retodʰā́ réto dadʰātu \\

Verse: 21 
Sentence: a    útsaktʰyā áva gudáṃ dʰehi sám añjíṃ cārayā vr̥ṣan \
Sentence: b    yá strīṇā́ṃ jīvabʰójanaḥ \\

Verse: 22 
Sentence: a    yakā́sakáu śakuntikā́hálag íti váñcati \
Sentence: b    ā́ hanti gabʰé páso nígalgalīti dʰā́rakā \\

Verse: 23 
Sentence: a    yakó sakáu śakuntaká āhálag íti váñcati \
Sentence: b    vívakṣata iva te múkʰam ádʰvaryo mā́ nas tvám abʰí bʰāṣatʰāḥ \\

Verse: 24 
Sentence: a    mātā́ ca te pitā́ ca té graṃ vr̥kṣásya rohataḥ \
Sentence: b    prátilāmī́ti te pitā́ gabʰé muṣṭím atam̐sayat \\

Verse: 25 
Sentence: a    mātā́ ca te pitā́ ca té gre vr̥kṣásya krīḍataḥ \
Sentence: b    vívakṣata iva te múkʰaṃ bráhman mā́ nas tváṃ vado bahú \\

Verse: 26 
Sentence: a    ūrdʰvám enām úc cʰrāpaya giráu bʰārám̐ hárann iva \
Sentence: b    átʰāsyai mádʰyam edʰatām̐ śīté vā́te punánn iva \\

Verse: 27 
Sentence: a    ūrdʰvám enam úc cʰrāpaya giráu bʰārám̐ hárann iva \
Sentence: b    átʰāsya mádʰyam ejatu śīté vā́te punánn iva \\

Verse: 28 
Sentence: a    yád asyā am̐húbʰédyāḥ kr̥dʰú stʰūlám upā́tasat \
Sentence: b    muṣkā́v asyā ejato gośapʰé śakulā́v iva \\

Verse: 29 
Sentence: a    yád devā́so lalā́maguṃ prá viṣṭīmínam ā́viṣuḥ \
Sentence: b    saktʰnā́ dediśyate nā́rī satyásyākṣibʰúvo yátʰā \\

Verse: 30 
Sentence: a    yád dʰariṇó yávam átti ná puṣṭáṃ paśú mányate \
Sentence: b    śūdrā́ yád áryajārā ná póṣāya dʰanāyati \\

Verse: 31 
Sentence: a    yád dʰariṇó yávam átti ná puṣṭáṃ bahú mányate \
Sentence: b    śūdró yád áryāyai jāró ná póṣam ánu manyate \\

Verse: 32 
Sentence: a    dadʰikrā́vṇo akāriṣaṃ jiṣṇór áśvasya vājínaḥ \
Sentence: b    surabʰí no múkʰā karat prá ṇa ā́yūm̐ṣi tāriṣat \\

Verse: 33 
Sentence: a    gāyatrī́ triṣṭúb jágaty anuṣṭúp paṅktyā́ sahá \
Sentence: b    br̥haty ùṣṇíhā kakúp sūcī́bʰiḥ śamyantu tvā \\

Verse: 34 
Sentence: a    dvípadā yā́ś cátuṣpadās trípadā yā́ś ca ṣáṭpadāḥ \
Sentence: b    víccʰandā yā́ś ca sáccʰandāḥ sūcī́bʰiḥ śamyantu tvā \\

Verse: 35 
Sentence: a    mahā́nāmnyo revátyo víśvā ā́śāḥ prabʰū́varīḥ \
Sentence: b    máigʰīr vidyúto vā́caḥ sūcī́bʰiḥ śamyantu tvā \\

Verse: 36 
Sentence: a    nā́ryas te pátnyo lóma ví cinvantu manīṣáyā \
Sentence: b    devā́nāṃ pátnyo díśaḥ sūcī́bʰiḥ śamyantu tvā \\

Verse: 37 
Sentence: a    rajatā́ háriṇīḥ sī́sā yújo yujyante kármabʰiḥ \
Sentence: b    áśvasya vājínas tvací símāḥ śamyantu śámyantīḥ \\

Verse: 38 
Sentence: a    kuvíd aṅgá yávamanto vayáṃ cid yátʰā dā́nty anupūrváṃ viyū́ya \
Sentence: b    ihéhaiṣāṃ kr̥ṇuhi bʰójanāni yé barhíṣo námaüktiṃ yájanti \\

Verse: 39 
Sentence: a    kás tvā́ cʰyati kás tvā ví śāsti kás te gā́trāṇi śamyati \
Sentence: b    ká u te śamitā́ kavíḥ \\

Verse: 40 
Sentence: a    r̥távas tvā r̥tutʰā́ párva śamitā́ro ví śāsatu \
Sentence: b    saṃvatsarásya téjasā śamī́bʰiḥ śamyantu tvā \\

Verse: 41 
Sentence: a    ardʰamāsā́ḥ párūm̐ṣi te mā́sā ā́ cʰyantu śamyantaḥ \
Sentence: b    ahorātrā́ṇi marúto víliṣṭam̐ sūdayantu te \\

Verse: 42 
Sentence: a    dáivyā adʰvaryávas tvā́ cʰyantu ví ca āsatu \
Sentence: b    gā́trāṇi parvaśás te símāḥ kr̥ṇvantu śámyantīḥ \\

Verse: 43 
Sentence: a    dyáus te pr̥tʰivy àntárikṣaṃ vāyúś cʰidráṃ pr̥ṇātu te \
Sentence: b    sū́yas te nákṣatraiḥ sahá lokáṃ kr̥ṇotu sādʰuyā́ \\

Verse: 44 
Sentence: a    śáṃ te párebʰyo gā́trebʰyaḥ śám astv ávarebʰyaḥ \
Sentence: b    śám astʰábʰyo majjábʰyaḥ śám v astu tanvài táva \\

Verse: 45 
Sentence: a    káḥ svid ekākī́ carati ká u svij jāyate púnaḥ \
Sentence: b    kím̐ svid dʰimásya bʰeṣajáṃ kím v āvápanaṃ mahát \\

Verse: 46 
Sentence: a    sū́rya ekākī́ carati candrámā jāyate púnaḥ \
Sentence: b    agnír dʰimásya bʰeṣajáṃ bʰū́mir āvápanaṃ mahát \\

Verse: 47 
Sentence: a    kím̐ svit sū́ryasamaṃ jyótiḥ kím̐ samudrásamam̐ sáraḥ \
Sentence: b    kím̐ svit pr̥tʰivyái várṣīyaḥ kásya mā́trā ná vidyate \\

Verse: 48 
Sentence: a    bráhma sū́ryasamaṃ jyótir dyáuḥ samudrásamam̐ sáraḥ \
Sentence: b    índraḥ pr̥tʰivyái várṣīyān gós tu mā́trā ná vidyate \\

Verse: 49 
Sentence: a    pr̥ccʰā́mi tvā citáye devasakʰa yádi tvám átra mánasā jagántʰa \
Sentence: b    yéṣu víṣṇus triṣú padéṣv éṣṭas téṣu víśvaṃ bʰúvanam ā́ viveśā3m̐ \\

Verse: 50 
Sentence: a    ápi téṣu triṣú padéṣv asmi yéṣu víśvaṃ bʰúvanam āvivéśa \
Sentence: b    sadyáḥ páry emi pr̥tʰivī́m utá dyā́m ékenā́ṅgena divó asyá pr̥ṣṭʰám \\

Verse: 51 
Sentence: a    kéṣv antáḥ púruṣa ā́ viveśa kā́ny antáḥ púruṣe árpitāni \
Sentence: b    etád bráhmann úpavalhāmasi tvā kím̐ svin naḥ práti vocāsy átra \\

Verse: 52 
Sentence: a    pañcásv antáḥ púruṣa ā́ viveśa tā́ny antáḥ púruṣe árpitāni \
Sentence: b    etát tvā́tra pratimanvānó asmi ná māyáyā bʰavasy úttaro mát \\

Verse: 53 
Sentence: a    kā́ svid āsīt pūrvácittiḥ kím̐ svid āsīd br̥hád váyaḥ \
Sentence: b    kā́ svid āsīt pilippilā́ kā́ svid āsīt piśaṅgilā́ \\

Verse: 54 
Sentence: a    dyáur āsīt pūrvácittiḥ áśva āsīd br̥hád váyaḥ \
Sentence: b    ávir āsīt pilippilā́ rā́trir āsīt piśaṅgilā́ \\

Verse: 55 
Sentence: a    ká īm are piśaṃgilā́ ká īṃ kurupiśaṃgilā́ \
Sentence: b    ká īm āskándam arṣati ká īṃ pántʰāṃ ví sarpati \\

Verse: 56 
Sentence: a    ajā́re piśaṃgilā́ śvāvít kurupiśaṃgilā́ \
Sentence: b    śaśá āskándam arṣaty áhiḥ pántʰāṃ ví sarpati \\

Verse: 57 
Sentence: a    káty asya viṣṭʰā́ḥ káty akṣárāṇi káti hómāsaḥ katidʰā́ sámiddʰaḥ \
Sentence: b    yajñásya tvā vidátʰā pr̥ccʰam átra káti hótāra r̥tuśó yajanti \\

Verse: 58 
Sentence: a    ṣáḍ asya viṣṭʰā́ḥ śatám akṣárāṇy aśītír hómāḥ samídʰo ha tisráḥ \
Sentence: b    yajñásya te vidátʰā prá bravīmi saptá hótāra r̥tuśó yajanti \\

Verse: 59 
Sentence: a    kó asyá veda bʰúvanasya nā́bʰiṃ kó dyā́vāpr̥tʰivī́ antárikṣam \
Sentence: b    káḥ sū́ryasya veda br̥ható janítraṃ kó veda candrámasaṃ yatojā́ḥ \\

Verse: 60 
Sentence: a    védāhám asyá bʰúvanasya nā́bʰiṃ véda dyā́vāpr̥tʰivī́ antárikṣam \
Sentence: b    véda sū́ryasya br̥ható janítraṃ átʰo veda candrámasaṃ yatojā́ḥ \\

Verse: 61 
Sentence: a    pr̥ccʰā́mi tvā páram ántaṃ pr̥tʰivyā́ḥ pr̥ccʰā́mi yátra bʰúvanasya nā́bʰiḥ \
Sentence: b    pr̥ccʰā́mi tvā vŕ̥ṣṇo áśvasya rétaḥ pr̥ccʰā́mi vācáḥ paramáṃ vyòma \\

Verse: 62 
Sentence: a    iyáṃ védiḥ páro ántaḥ pr̥tʰivyā́ ayáṃ yajñó yátra bʰúvanasya nā́bʰiḥ \
Sentence: b    ayám̐ sómo vŕ̥ṣṇo áśvasya rétaḥ brahmā́yáṃ vācáḥ paramáṃ vyòma \\

Verse: 63 
Sentence: a    subʰū́ḥ svayambʰū́ḥ pratʰamò ntár mahaty àrṇavé \
Sentence: b    dadʰé ha gárbʰam r̥tvíyaṃ yáto jātáḥ prajā́patiḥ \\

Verse: 64 
Sentence: a    hótā yakṣat prajā́patim̐ sómasya mahimnáḥ \
Sentence: b    juṣátāṃ píbatu sómam̐ hótar yája \\

Verse: 65 
Sentence: a    prájāpate ná tvád etā́ny anyó víśvā rūpā́ṇi pári tā́ babʰūva \
Sentence: b    yátkāmās te juhumás tán no astu \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.