TITUS
White Yajur-Veda: Vajasaneyi-Samhita (Madhyandina)
Part No. 26
Previous part

Paragraph: 26 

Verse: 1 
Sentence: a    agníś ca pr̥tʰivī́ ca sáṃnate té me sáṃ namatām adáḥ \
Sentence: b    vāyúś cāntárikṣaṃ ca sáṃnate té me sáṃ namatām adáḥ \
Sentence: c    ādityáś ca dyáuś ca sáṃnate té me sáṃ namatām adáḥ \
Sentence: d    ā́paś ca váruṇaś ca sáṃnate té me sáṃ namatām adáḥ \
Sentence: e    saptá sam̐sádo aṣṭamī́ bʰūtasā́dʰanī \
Sentence: f    sákāmām̐ ádʰvanas kuru saṃjñā́nam astu me múnā \\

Verse: 2 
Sentence: a    yátʰemā́ṃ vā́caṃ kalyāṇī́m āvádāni jánebʰyaḥ \
Sentence: b    brahmarājanyā̀bʰyām̐ śūdrā́ya cā́ryāya ca svā́ya cā́raṇāya \
Sentence: c    priyó devā́nāṃ dákṣiṇāyai dātúr ihá bʰūyāsam ayáṃ me kā́maḥ sám r̥dʰyatām úpa mādó namatu \\

Verse: 3 
Sentence: a    bŕ̥haspate áti yád aryó árhād dyumád vibʰā́ti krátumaj jáneṣu \
Sentence: b    yád dīdáyac cʰávasa r̥taprajāta tád asmā́su dráviṇaṃ dʰehi citrám \
Sentence: c    upayāmágr̥hīto si bŕ̥haspátaye tvā \
Sentence: d    eṣá te yónir bŕ̥haspátaye tvā \\

Verse: 4 
Sentence: a    índra gómann ihā́ yāhi píbā sómam̐ śatakrato \
Sentence: b    vidyádbʰir grā́vabʰiḥ sutám \
Sentence: c    upayāmágr̥hīto sī́ndrāya tvā gómate \
Sentence: d    eṣá te yónir índrāya tvā gómate \\

Verse: 5 
Sentence: a    índrā́ yāhi vr̥trahan píbā sómam̐ śatakrato \
Sentence: b    gómadbʰir grā́vabʰiḥ sutám \
Sentence: c    upayāmágr̥hīto sī́ndrāya tvā gómate \
Sentence: d    eṣá te yónir índrāya tvā gómate \\

Verse: 6 
Sentence: a    r̥tā́vānaṃ vaiśvānarám r̥tásya jyótiṣas pátim \
Sentence: b    ájasraṃ gʰarmám īmahe \
Sentence: c    upayāmágr̥hīto si vaiśvānarāya tvā \
Sentence: d    eṣá te yónir vaiśvānarāya tvā \\

Verse: 7 
Sentence: a    vaiśvānarásya sumatáu syāma rā́jā hí kaṃ bʰúvanānām abʰiśrī́ḥ \
Sentence: b    itó jātó víśvam idáṃ ví caṣṭe vaiśvānaró yatate sū́ryeṇa \
Sentence: c    upayāmágr̥hīto si vaiśvānarāya tvā \
Sentence: d    eṣá te yónir vaiśvānarāya tvā \\

Verse: 8 
Sentence: a    vaiśvānaró ná ūtáya ā́ prá yātu parāvátaḥ \
Sentence: b    agnír uktʰéna vā́hasā \
Sentence: c    upayāmágr̥hīto si vaiśvānarāya tvā \
Sentence: d    eṣá te yónir vaiśvānarāya tvā \\

Verse: 9 
Sentence: a    agnír ŕ̥ṣiḥ pávamānaḥ pā́ñcajanyaḥ puróhitaḥ \
Sentence: b    tám īmahe mahāgayám \
Sentence: c    upayāmágr̥hīto sy agnáye tvā várcase \
Sentence: d    eṣá te yónir agnáye tvā várcase \\

Verse: 10 
Sentence: a    mahā́m̐ índro vájrahastaḥ ṣoḍaśī́ śárma yaccʰatu \
Sentence: b    hántu pāpmā́naṃ yò smā́n dvéṣṭi \
Sentence: c    upayāmágr̥hīto si mahendrā́ya tvā \
Sentence: d    eṣá te yónir mahendrā́ya tvā \\

Verse: 11 
Sentence: a    táṃ vo dasmám r̥tīṣáhaṃ vásor mandānám ándʰasaḥ \
Sentence: b    abʰí vatsáṃ ná svásareṣu dʰenáva índraṃ gīrbʰír navāmahe \\

Verse: 12 
Sentence: a    yád vā́hiṣṭʰaṃ tád agnáye br̥hád arca vibʰāvaso \
Sentence: b    máhiṣīva tvád rayís tvád vā́jā úd īrate \\

Verse: 13 
Sentence: a    éhy ū ṣú brávāṇi té gna ittʰétarā gíraḥ \
Sentence: b    ebʰír vardʰāsa índubʰiḥ \\

Verse: 14 
Sentence: a    r̥távas te yajñáṃ ví tanvantu mā́sā rákṣantu te háviḥ \
Sentence: b    saṃvatsarás te yajñáṃ dadʰātu naḥ prajā́ṃ ca pári pātu naḥ \\

Verse: 15 
Sentence: a    upahvaré girīṇā́m̐ saṃgamé ca nadīnā́m \
Sentence: b    dʰiyā́ vípro ajāyata \\

Verse: 16 
Sentence: a    uccā́ te jātám ándʰaso diví sád bʰū́my ā́ dade \
Sentence: b    ugrám̐ śárma máhi śrávaḥ \\

Verse: 17 
Sentence: a    sá na índrāya yájyave váruṇāya marúdbʰyaḥ \
Sentence: b    varivovít pári srava \\

Verse: 18 
Sentence: a    enā́ víśvāny aryá ā́ dyumnā́ni mā́nuṣāṇām \
Sentence: b    síṣāsanto vanāmahe \\

Verse: 19 
Sentence: a    ánu vīráir ánu puṣyāsma góbʰir ánv áśvair ánu sárveṇa puṣṭáiḥ \
Sentence: b    ánu dvípadā́nu cátuṣpadā vayáṃ devā́ no yajñám r̥tutʰā́ nayantu \\

Verse: 20 
Sentence: a    ágne pátnīr ihā́ vaha devā́nām uśatī́r úpa \
Sentence: b    tváṣṭāram̐ sómapītaye \\

Verse: 21 
Sentence: a    abʰí yajñáṃ gr̥ṇīhi no gnā́vo néṣṭaḥ píba r̥túnā \
Sentence: b    tvám̐ hí ratnadʰā́ ási \\

Verse: 22 
Sentence: a    draviṇodā́ḥ pipīṣati juhóta prá ca tiṣṭʰata \
Sentence: b    neṣṭrā́d r̥túbʰir iṣyata \\

Verse: 23 
Sentence: a    távāyám̐ sómas tvám éhy arvā́ṅ cʰaśvattamám̐ sumánā asyá pāhi \
Sentence: b    asmín yajñé barhíṣy ā́ niṣádyā dadʰiṣvémáṃ jaṭʰára índum indra \\

Verse: 24 
Sentence: a    améva naḥ suhavā ā́ hí gántana ní barhíṣi sadatanā ráṇiṣṭana \
Sentence: b    átʰā mandasva jujuṣāṇó ándʰasas tváṣṭar devébʰir jánibʰiḥ sumádgaṇaḥ \\

Verse: 25 
Sentence: a    svā́diṣṭʰayā mádiṣṭʰayā pávasva soma dʰā́rayā \
Sentence: b    índrāya pā́tave sutáḥ \\

Verse: 26 
Sentence: a    rakṣohā́ viśvácarṣaṇir abʰí yónim áyohatam \
Sentence: b    drúṇā sadʰástʰam ā́sadat \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.