TITUS
White Yajur-Veda: Vajasaneyi-Samhita (Madhyandina)
Part No. 27
Previous part

Paragraph: 27 
Verse: 1 
Sentence: a    sās tvāgna r̥távo vardʰayantu saṃvatsarā́ ŕ̥ṣayo yā́ni satyā́ \
Sentence: b    sáṃ divyéna dīdihi rocanéna víśvā ā́ bʰāhi pradíśaś cátasraḥ \\

Verse: 2 
Sentence: a    sáṃ cedʰyásvāgne prá ca bodʰayainam úc ca tiṣṭʰa mahaté sáubʰagāya \
Sentence: b    mā́ ca riṣad upasattā́ te agne brahmā́ṇas te yaśásaḥ santu mā́nyé \\

Verse: 3 
Sentence: a    tvā́m agne vr̥ṇate brāhmaṇā́ imé śivó agne saṃváraṇe bʰavā naḥ \
Sentence: b    sapatnahā́ no abʰimātijíc ca své gáye gāgr̥hy áprayuccʰan \\

Verse: 4 
Sentence: a    iháivā́gne ádʰi dʰārayā rayíṃ mā́ tvā ní kran pūrvacíto nikāríṇaḥ \
Sentence: b    kṣatrám agne suyámam astu túbʰyam upasattā́ vardʰatāṃ te ániṣṭr̥taḥ \\

Verse: 5 
Sentence: a    kṣatréṇāgne svā́yuḥ sám̐ rabʰasva mitréṇāgne mitradʰéye yatasva \
Sentence: b    sajātā́nāṃ madʰyamastʰā́ edʰi rā́jñām agne vihavyò dīdihīhá \\

Verse: 6 
Sentence: a    áti ního áti srídʰó ty ácittim áty árātim agne \
Sentence: b    víśvā hy àgne duritā́ sahasvā́tʰāsmábʰyam̐ sahávīrām̐ rayíṃ dāḥ \\

Verse: 7 
Sentence: a    anādʰr̥ṣyó jātávedā ánādʰr̥ṣṭo virā́ḍ ágne kṣatrabʰŕ̥d dīdihīhá \
Sentence: b    víśvā ā́śāḥ pramuñcán mā́nuṣīr bʰayáḥ śivébʰir adyá pári pāhi no vr̥dʰé \\

Verse: 8 
Sentence: a    bŕ̥haspate savitar bodʰáyainam̐ sám̐śitaṃ cit saṃtarā́m̐ sám̐ śiśādʰi \
Sentence: b    vardʰáyainaṃ mahaté sáubʰagāya víśva enam ánu madantu devā́ḥ \\

Verse: 9 
Sentence: a    amutrabʰū́yādádʰa yád yamásya bŕ̥haspate abʰísaster ámuñcaḥ \
Sentence: b    práty auhatām aśvínā mr̥tyúm asmād devā́nām agne bʰiṣájā śácībʰiḥ \\

Verse: 10 
Sentence: a    úd vayáṃ támasas pári svàḥ páśyanta úttaram \
Sentence: b    deváṃ devatrā́ sū́ryam áganma jyótir uttamám \\

Verse: 11 
Sentence: a    ūrdʰvā́ asya samídʰo bʰavanty ūrdʰvā́ śukrā́ śocī́m̐ṣy agnéḥ \
Sentence: b    dyumáttamā suprátīkasya sūnóḥ \\

Verse: 12 
Sentence: a    tánūnápād ásuro viśvávedā devó devéṣu deváḥ \
Sentence: b    patʰó anaktu mádʰvā gʰr̥téna \\

Verse: 13 
Sentence: a    mádʰvā yajñáṃ nakṣase prīṇānó nárāśám̐so agne \
Sentence: b    sukŕ̥d deváḥ savitā́ viśvávāraḥ \\

Verse: 14 
Sentence: a    áccʰāyám eti śávasā gʰr̥téneḍānó váhnir námasā \
Sentence: b    agním̐ srúco adʰvaréṣu prayátsu \\

Verse: 15 
Sentence: a    sá yakṣad asya mahimā́nam agnéḥ sá īṃ mandrā́ suprayásaḥ \
Sentence: b    vásuś vétiṣṭʰo vasudʰā́tamaś ca \\

Verse: 16 
Sentence: a    dvā́ro devī́r ánv asya víśve vratā́ dadante agnéḥ \
Sentence: b    uruvyácaso dʰā́mnā pátyamānāḥ \\

Verse: 17 
Sentence: a    té asya yóṣaṇe divyé ná yónā uṣā́sānáktā \
Sentence: b    imáṃ yajñám ávatām adʰvaráṃ naḥ \\

Verse: 18 
Sentence: a    dáivyā hótārā ūrdʰvám adʰvaráṃ no gnér juhvā́m abʰí gr̥ṇītam \
Sentence: b    kr̥ṇutám naḥ svìṣṭam \\

Verse: 19 
Sentence: a    tisró devī́r barhír idám̐ sadantv íḍā sárasvatī bʰā́ratī \
Sentence: b    mahī́ gr̥ṇānā́ \\

Verse: 20 
Sentence: a    tán nas turī́pam ádbʰutaṃ purukṣú tváṣṭā suvī́ryam \
Sentence: b    rāyáspóṣaṃ ví ṣyatu nā́bʰim asmé \\

Verse: 21 
Sentence: a    vánaspaté va sr̥jā rárāṇas tmánā devéṣu \
Sentence: b    agnír havyám̐ śamitā́ sūdayāti \\

Verse: 22 
Sentence: a    ágne svā́hā kr̥ṇuhi jātavedo índrāya havyám \
Sentence: b    víśve devā́ havír idáṃ juṣantām \\

Verse: 23 
Sentence: a    pī́voannā rayiṃvŕ̥dʰaḥ sumedʰā́ḥ śvetáḥ siṣakti niyútām abʰiśrī́ḥ \
Sentence: b    té vāyáve sámanaso ví tastʰur víśvén náraḥ svapatyā́ni cakruḥ \\

Verse: 24 
Sentence: a    rāyé nú yáṃ jajñátū ródasīmé rāyé devī́ dʰiṣáṇā dʰāti devám \
Sentence: b    ádʰa vāyúṃ niyútaḥ saścata svā́ utá śvetáṃ vásudʰitiṃ nireké \\

Verse: 25 
Sentence: a    ā́po ha yád br̥hatī́r víśvam ā́yan gárbʰaṃ dádʰānā janáyantīr agním \
Sentence: b    táto devā́nām̐ sám avartatā́sur ékaḥ kásmai devā́ya havíṣā vidʰema \\

Verse: 26 
Sentence: a    yáś cid ā́po mahinā́ paryápaśyad dákṣaṃ dádʰānā janáyantīr yajñám \
Sentence: b    yó devéṣv ádʰi devá éka ā́sīt kásmai devā́ya havíṣā vidʰema \\

Verse: 27 
Sentence: a    prá yā́bʰir yā́si dāśvā́m̐sam áccʰā niyúdbʰir vāyav iṣṭáye duroṇé \
Sentence: b    ní no rayím̐ subʰójasaṃ yuvasva ní vīráṃ gávyam áśvyaṃ ca rā́dʰaḥ \\

Verse: 28 
Sentence: a    ā́ no niyúdbʰiḥ śatínībʰir adʰvarám̐ sahasríṇībʰir úpa yāhi yajñám \
Sentence: b    vā́yo asmín sávane mādayasva yūyáṃ pāta svastíbʰiḥ sádā naḥ \\

Verse: 29 
Sentence: a    niyútvān vāyav ā́ gahy ayám̐ śukró ayāmi te \
Sentence: b    gántāsi sunvató gr̥hám \\

Verse: 30 
Sentence: a    vā́yo śukró ayāmi te mádʰvo ágraṃ díviṣṭiṣu \
Sentence: b    ā́ yāhi sómapītaye spārhó deva niyútvatā \\

Verse: 31 
Sentence: a    vāyúr agregā́ yajñaprī́ḥ sākáṃ gan mánasā yajñám \
Sentence: b    śivó niyúdbʰiḥ śivā́bʰiḥ \\

Verse: 32 
Sentence: a    vā́yo yé te sahasríṇo rátʰāsas tébʰir ā́ gahi \
Sentence: b    niyútvānt sómapītaye \\

Verse: 33 
Sentence: a    ékayā ca daśábʰiś ca svabʰūte dvā́bʰyām iṣṭáye vim̐śatī́ ca \
Sentence: b    tisŕ̥bʰiś ca váhase trim̐śátā ca niyúdbʰir vāyav ihá tā́ ví muñca \\

Verse: 34 
Sentence: a    táva vāyav r̥taspate tváṣṭur jāmātar adbʰuta \
Sentence: b    ávām̐sy ā́ vr̥ṇīmahe \\

Verse: 35 
Sentence: a    abʰí tvā śūra nonumó dugdʰā iva dʰenávaḥ \
Sentence: b    ī́śānam asyá jágataḥ svardŕ̥śam ī́śānam indra tastʰúṣaḥ \\

Verse: 36 
Sentence: a    ná tvā́vām̐ anyó divyó ná pā́rtʰivo ná jātó ná janiṣyate \
Sentence: b    aśvāyánto magʰavann indra vājíno gavyántas tvā havāmahe \\

Verse: 37 
Sentence: a    tvā́m íd dʰí hávāmahe sātā́ vā́jasya kārávaḥ \
Sentence: b    tvā́ṃ vr̥tréṣv indra sátpatiṃ náras tvā́ṃ kā́ṣṭʰāsv árvataḥ \\

Verse: 38 
Sentence: a    sá tváṃ naś citra vajrahasta dʰr̥ṣṇuyā́ mahá stavānó adrivaḥ \
Sentence: b    gā́m áśvam̐ ratʰyàm indra sáṃ kira satrā́ vā́jaṃ ná jigyúṣe \\

Verse: 39 
Sentence: a    káyā naś citrá ā́ bʰuvad ūtī́ sadā́vr̥dʰaḥ sákʰā \
Sentence: b    káyā śáciṣṭʰayā vr̥tā́ \\

Verse: 40 
Sentence: a    kás tvā satyó mádānāṃ mám̐hiṣṭʰo matsad ándʰasaḥ \
Sentence: b    dr̥ḍʰā́ cid ārúje vásu \\

Verse: 41 
Sentence: a    abʰī́ ṣú ṇaḥ sákʰīnām avitā́ jaritr̥̄ṇā́m \
Sentence: b    śatáṃ bʰavāsy ūtáye \\

Verse: 42 
Sentence: a    yajñā́-yajñā vo agnáye girā́-girā ca dákṣase \
Sentence: b    prá-pra vayám amŕ̥taṃ jātávedasaṃ priyáṃ mitráṃ ná śam̐siṣam \\

Verse: 43 
Sentence: a    pāhí no agna ékayā pāhy ùtá dvitī́yayā \
Sentence: b    pāhí gīrbʰís tisŕ̥bʰir ūrjāṃ pate pāhí catasŕ̥bʰir vaso \\

Verse: 44 
Sentence: a    ūrjó nápātam̐ sá hinā́yám asmayúr dā́śema havyádātaye \
Sentence: b    bʰúvad vā́jeṣv avitā́ bʰúvad vr̥dʰá utá trātā́ tanū́nām \\

Verse: 45 
Sentence: a    saṃvatsarò si parivatsarò sīdāvatsarò sīdvatsarò si vatsarò si \
Sentence: b    uṣásas te kalpantām ahorātrā́s te kalpantām ardʰamāsā́s te kalpantāṃ māsā́s te kalpantām r̥távas te kalpantām̐ saṃvatsarás te kalpatām \
Sentence: c    prétyā étyai sáṃ cā́ñca prá ca sāraya \
Sentence: d    suparṇacíd asi táyā devátayāṅgirasvád dʰruváḥ sīda \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.