TITUS
White Yajur-Veda: Vajasaneyi-Samhita (Madhyandina)
Part No. 28
Previous part

Paragraph: 28 

Verse: 1 
Sentence: a    hótā yakṣad samídʰéndram iḍás padé nā́bʰā pr̥tʰivyā́ ádʰi \
Sentence: b    divó várṣmant sám idʰyata ójiṣṭʰaś carṣaṇīsáhāṃ vétv ā́jyasya hótar yája \\

Verse: 2 
Sentence: a    hótā yakṣat tánūnápātam ūtíbʰir jétāram áparājitam \
Sentence: b    índraṃ devám̐ svarvídaṃ patʰíbʰir mádʰumattamair nárāśám̐sena téjasā vétv ā́jyasya hótar yája \\

Verse: 3 
Sentence: a    hótā yakṣad íḍābʰir índram īḍitám ājúhvānam ámartyam \
Sentence: b    devó deváiḥ sávīryo vájrahastaḥ puraṃdaró vétv ā́jyasya hótar yája \\

Verse: 4 
Sentence: a    hótā yákṣad baríṣī́ndraṃ niṣadvaráṃ vr̥ṣabʰáṃ náryāpasam \
Sentence: b    vásubʰī rudráir ādityáiḥ suyúgbʰir barhír ā́sadad vétv ā́jyasya hótar yája \\

Verse: 5 
Sentence: a    hótā yakṣad ójo ná vīryàm̐ sáho dvā́ra índram avardʰayan \
Sentence: b    suprāyaṇā́ asmín yajñé ví śrayantām r̥tāvŕ̥dʰo svā́ra índrāya mīḍʰúṣe vyántv ā́jyasya hótar yája \\

Verse: 6 
Sentence: a    hótā yakṣad uṣé índrasya dʰenū́ sudúgʰe mātárā mahī́ \
Sentence: b    savātárau ná téjasā vatsám índram avardʰatāṃ vītā́m ā́jyasya hótar yája \\

Verse: 7 
Sentence: a    hótā yakṣad dáivyā hótārā bʰiṣájā sákʰāyā havíṣéndraṃ bʰiṣajyataḥ \
Sentence: b    kavī́ deváu prácetasāv índrāya dʰatta indriyáṃ vītā́m ā́jyasya hótar yája \\

Verse: 8 
Sentence: a    hótā yakṣat tisró devī́r ná bʰeṣajáṃ tráyas tridʰā́tavo pása íḍā sárasvat bʰā́ratī mahī́ḥ \
Sentence: b    índrapatnīr havíṣmatīr vyántv ā́jyasya hótar yája \\

Verse: 9 
Sentence: a    hótā yakṣat tváṣṭāram índraṃ deváṃ bʰiṣájam̐ suyájaṃ gʰr̥taśríyam \
Sentence: b    pururū́pam̐ surétasaṃ magʰónam índrāya tváṣṭā dádʰad indriyā́ṇi vétv ā́jyasya hótar yája \\

Verse: 10 
Sentence: a    hótā yakṣad vánaspátim̐ śamitā́ram̐ śatákratuṃ dʰiyó joṣṭā́ram indriyám \
Sentence: b    mádʰvā samañján patʰíbʰiḥ sugébʰiḥ svádāti yajñáṃ mádʰunā gʰr̥téna vétv ā́jyasya hótar yája \\

Verse: 11 
Sentence: a    hótā yakṣad índram̐ svā́hā́jyasya svā́hā médasaḥ svā́hā stokā́nām̐ svā́hā svā́hākr̥tīnām̐ svā́hā havyásūktīnām \
Sentence: b    svā́hā devā́ ājyapā́ juṣāṇā́ índra ā́jyasya vyántu hótar yaja \\

Verse: 12 
Sentence: a    deváṃ barhír índram̐ sudeváṃ deváir vīrávat stīrṇáṃ védyām avardʰayat \
Sentence: b    vástor vr̥táṃ prā́któr bʰr̥tám̐ rāyā́ barhíṣmató ty agād vasuváne vasudʰéyasya vetu yája \\

Verse: 13 
Sentence: a    devī́r dvā́ra índram̐ saṃgʰāté vīḍvī́r yā́mann avardʰayan \
Sentence: b    ā́ vatséna táruṇena kumāréṇa ca mīvatā́pā́rvāṇam̐ reṇúkakāṭaṃ nudantāṃ vasuváne vasudʰéyasya vyantu yája \\

Verse: 14 
Sentence: a    devī́ uṣā́sānákténdraṃ yajñé prayaty àhvetām \
Sentence: b    dáivīr víśaḥ prā́yāsiṣṭām̐ súprīte súdʰite vasuváne vasudʰéyasya vītāṃ yája \\

Verse: 15 
Sentence: a    devī́ jóṣṭrī vásudʰitī devám índram avardʰatām \
Sentence: b    áyāvy anyā́gʰā́ dvéṣām̐sy ā́nyā́ vakṣad vásu vā́ryāṇi yájamānāya śikṣité vasuváne vasudʰéyasya vītāṃ yája \\

Verse: 16 
Sentence: a    devī́ ūrjā́hutī dúgʰe páyaséndram avardʰatām \
Sentence: b    íṣam ū́rjam anyā́ vakṣat ságdʰim̐ sápītim anyā́ návena pū́rvaṃ dáyamāne purāṇéna návam ádʰātām ū́rjam ūrjā́hutī ūrjáyamāne vásu vŕ̥yāṇi yájamānāya śikṣité vasuváne vasudʰéyasya vītāṃ yája \\

Verse: 17 
Sentence: a    devā́ devyā hótārā devám índram avardʰatām \
Sentence: b    hatā́gʰaśam̐sāv ā́bʰārṣṭāṃ vásu vā́ryāṇi yájamānāya śikṣitáu vasuváne vasudʰéyasya vītāṃ yája \\

Verse: 18 
Sentence: a    devī́s tisrás tisró devī́ḥ pátim índram avardʰayan \
Sentence: b    áspr̥kṣad bʰā́ratī dívam̐ rudráir yajñám̐ sárasvatī́ḍā vasumatī gr̥hā́n vasuváne vasudʰéyasya vyantu yája \\

Verse: 19 
Sentence: a    devá índro nárāśám̐sas trivarūtʰás tribandʰuró devám índram avardʰayat \
Sentence: b    śaténa śitipr̥ṣṭʰā́nām ā́hitaḥ sahásreṇa prá vartate mitrā́váruṇéd asya hotrám árhato bŕ̥haspáti stotrám aśvínā́dʰvaryavaṃ vasuváne vasudʰéyasya vetu yája \\

Verse: 20 
Sentence: a    devó deváir vánaspátir híraṇyaparṇo mádʰuśākʰaḥ supippaló devám índram avardʰayat \
Sentence: b    dívam ágreṇāspr̥kṣad ā́ntáriksaṃ pr̥tʰivī́m adr̥mhīd vasuváne vasudʰéyasya vetu yája \\

Verse: 21 
Sentence: a    deváṃ barhír vā́ritīnāṃ devám índram avardʰayat \
Sentence: b    svāsastʰám índreṇā́sannam anyā́ barhī́m̐ṣy abʰy àbʰūd vasuváne vasudʰéyasya vetu yája \\

Verse: 22 
Sentence: a    devó agníḥ sviṣṭakŕ̥d devám índram avardʰayat \
Sentence: b    svìṣṭaṃ kurvánt sviṣṭakŕ̥t svìṣṭam adyá karotu no vasuváne vasudʰéyasya vetu yája \\

Verse: 23 
Sentence: a    agním adyá hótāram avr̥ṇītāyáṃ yájamānaḥ pácan páktīḥ pácan puroḍā́śaṃ badʰnánn índrāya cʰā́gam \
Sentence: b    sūpastʰā́ adyá devó vánaspátir abʰavad índrāya cʰā́gena \
Sentence: c    ágʰat táṃ medastáḥ práti pacatā́grabʰīd ávīvr̥dʰat puroḍā́śena \
Sentence: d    tvā́m adyá r̥ṣa ārṣeya r̥ṣīṇāṃ napād avr̥ṇītāyṃ yájamāno bahúbʰya ā́ sáṃgatebʰya eṣá me devéṣu vásu vā́ryāyakṣyata íti tā́ yā́ devā́ deva dā́nāny ádus tā́ny asmā ā́ ca śā́ssvā́ ca gurasveṣitáś ca hotar ási bʰadravā́cyāya préṣito mā́nuṣaḥ sūktavākā́ya sūktā́ brūhi \\

Verse: 24 
Sentence: a    hótā yakṣat samidʰānáṃ mahád yáśaḥ súsamiddʰaṃ váreṇyam agním índraṃ vayodʰásam \
Sentence: b    gāyatrī́ṃ cʰánda indriyáṃ tryáviṃ gā́ṃ váyo dádʰad vétv ā́jyasya hótar yája \\

Verse: 25 
Sentence: a    hótā yakṣat tánūnápātam udbʰídaṃ yáṃ gárbʰam áditir dadʰé śúcim índraṃ vayodʰásam \
Sentence: b    uṣṇíhaṃ cʰánda indriyáṃ dityavā́haṃ gā́ṃ váyo dádʰad vétv ā́jyasya hótar yája \\

Verse: 26 
Sentence: a    hótā yakṣad īḍényam īḍitáṃ vr̥trahántamam íḍābʰir ī́ḍyam̐ sáhaḥ sómam índram̐ vayodʰásam \
Sentence: b    anuṣṭúbʰaṃ cʰánda indriyáṃ páñcāviṃ gā́ṃ váyo dádʰad vétv ā́jyasya hótar yája \\

Verse: 27 
Sentence: a    hótā yakṣat subarhíṣaṃ pūṣaṇvántam ámartyam̐ sī́dantaṃ barhíṣi priyè mŕ̥téndraṃ vayodʰásam \
Sentence: b    br̥hatī́ṃ cʰánda indriyáṃ trivatsáṃ gā́ṃ váyo dádʰad vétv ā́jyasya hótar yája \\

Verse: 28 
Sentence: a    hótā yakṣad vyácasvatīḥ suprāyaṇā́ r̥tāvŕ̥dʰo dvā́ro devī́r hiraṇyáyīr brahmā́ṇam índraṃ vayodʰásam \
Sentence: b    paṅktíṃ cʰánda ihéndriyáṃ turyavā́haṃ gā́ṃ váyo dádʰad vyántv ā́jyasya hótar yája \\

Verse: 29 
Sentence: a    hótā yakṣat supéśasā suśilpé br̥hatī́ ubʰé náktoṣā́sā ná darśaté víśvam índraṃ vayodʰásam \
Sentence: b    triṣṭúbʰaṃ cʰánda ihéndriyáṃ paṣṭʰaváhaṃ gā́ṃ váyo dádʰad vītā́m ā́jyasya hótar yája \\

Verse: 30 
Sentence: a    hótā yakṣat prácetasā devā́nām uttamáṃ yáśo hótārā dáivyā kavī́ sayújéndraṃ vayodʰásam \
Sentence: b    jágatīṃ cʰánda indriyám anaḍvā́haṃ gā́ṃ váyo dádʰad vītā́m ā́jyasya hótar yája \\

Verse: 31 
Sentence: a    hótā yakṣat péśasvatīs tisró devī́r hiraṇyáyīr bʰā́ratīr br̥hatī́r mahī́ḥ pátim índraṃ vayodʰásam \
Sentence: b    virā́jaṃ cʰánda ihéndriyáṃ dʰenúṃ gā́ṃ ná váyo dádʰad vyántv ā́jyasya hótar yája \\

Verse: 32 
Sentence: a    hótā yakṣat surétasaṃ tváṣṭāraṃ puṣṭivárdʰanam̐ rūpā́ṇi bíbʰrataṃ pŕ̥tʰak púṣṭim índraṃ vayodʰásam \
Sentence: b    dvipádaṃ cʰánda indriyám ukṣā́ṇaṃ gā́ṃ ná váyo dádʰad vétv ā́jyasya hótar yája \\

Verse: 33 
Sentence: a    hótā yakṣad vánaspátim̐ śamitā́ram̐ śatákratum̐ híraṇyaparṇam uktʰínam̐ raśanā́ṃ bíbʰrataṃ vaśíṃ bʰágam índraṃ vayodʰásam \
Sentence: b    kakúbʰaṃ cʰánda ihéndriyáṃ vaśā́ṃ vehátaṃ gā́ṃ váyo dádʰad vétv ā́jyasya hótar yája \\

Verse: 34 
Sentence: a    hótā yakṣat svā́hākr̥tīr agníṃ gr̥hápatiṃ pŕ̥tʰag váruṇaṃ bʰeṣajáṃ kavíṃ kṣatrám índraṃ vayodʰásam \
Sentence: b    áticcʰandasaṃ cʰánda indriyáṃ br̥hád r̥ṣabʰáṃ gā́ṃ váyo dádʰad vyántv ā́jyasya hótar yája \\

Verse: 35 
Sentence: a    deváṃ barhír vayodʰásaṃ devám índram avardʰayat \
Sentence: b    gāyatryā́ cʰándasendriyáṃ cákṣur índre váyo dádʰad vasuváne vasudʰéyasya vetu yája \\

Verse: 36 
Sentence: a    devī́r dvā́ro vayodʰásam̐ śúcim índram avardʰayan \
Sentence: b    uṣṇíhā cʰándasendriyáṃ prāṇám índre váyo dádʰad vasuváne vasudʰéyasya vyantu yája \\

Verse: 37 
Sentence: a    devī́ uṣā́sānáktā devám índraṃ vayodʰásaṃ devī́ devám avardʰatām \
Sentence: b    anuṣṭúbʰā cʰándasendriyáṃ bálam índre váyo dádʰad vasuváne vasudʰéyasya vītāṃ yája \\

Verse: 38 
Sentence: a    devī́ jóṣṭrī vásudʰitī devám índraṃ vayodʰásaṃ devī́ devám avardʰatām \
Sentence: b    br̥hatyā́ cʰándasendriyám̐ śrótram índre váyo dádʰad vasuváne vasudʰéyasya vītāṃ yája \\

Verse: 39 
Sentence: a    devī́ ūrjā́hutī dúgʰe sudúgʰe páyaséndraṃ vayodʰásaṃ devī́ devám avardʰatām \
Sentence: b    paṅktyā́ cʰándasendriyám̐ śukrám índre váyo dádʰad vasuváne vasudʰéyasya vītāṃ yája \\

Verse: 40 
Sentence: a    devā́ dáivyā hótārā devám índraṃ vayodʰásaṃ deváu devám avardʰatām \
Sentence: b    triṣṭúbʰā cʰándasendriyáṃ tvíṣim índre váyo dádʰad vasuváne vasudʰéyasya vītāṃ yája \\

Verse: 41 
Sentence: a    devī́s tisrás tisró devī́r vayodʰásaṃ pátim índram avardʰayan \
Sentence: b    jágatyā cʰándasendriyám̐ śū́ṣam índre váyo dádʰad vasuváne vasudʰéyasya vyantu yája \\

Verse: 42 
Sentence: a    devó nárāśám̐so devám índraṃ vayodʰásaṃ devó devám avardʰayat \
Sentence: b    virā́jā cʰándasendriyám̐ rupám índre váyo dádʰad vasuváne vasudʰéyasya vetu yája \\

Verse: 43 
Sentence: a    devó vánaspátir devám índraṃ vayodʰásaṃ devó devám avardʰayat \
Sentence: b    dvípadā cʰándasendriyáṃ bʰágam índre váyo dádʰad vasuváne vasudʰéyasya vetu yája \\

Verse: 44 
Sentence: a    deváṃ barhír vā́ritīnāṃ devám índraṃ vayodʰásaṃ deváṃ devám avardʰayat \
Sentence: b    kakúbʰā cʰándasendriyáṃ yáśa índre váyo dádʰad vasuváne vasudʰéyasya vetu yája \\

Verse: 45 
Sentence: a    devó agníḥ sviṣṭakŕ̥d devám índraṃ vayodʰásaṃ devó devám avardʰayat \
Sentence: b    áticcʰandasā cʰándasendriyáṃ kṣatrám índre váyo dádʰad vasuváne vasudʰéyasya vetu yája \\

Verse: 46 
Sentence: a    agním adyá hótāram avr̥ṇītāyáṃ yájamānaḥ pácan páktīḥ pácan puroḍā́śaṃ badʰnánn índrāya vayodʰáse cʰā́gam \
Sentence: b    sūpastʰā́ adyá devó vánaspátir abʰavad índrāya vayodʰáse cʰā́gena \
Sentence: c    ágʰat táṃ medastáḥ práti pacatā́grabʰīd ávīvr̥dʰat puroḍā́śena \
Sentence: d    tvā́m adyá r̥ṣa ārṣeya r̥ṣīṇāṃ napād avr̥ṇītāyṃ yájamāno bahúbʰya ā́ sáṃgatebʰya eṣá me devéṣu vásu vā́ryāyakṣyata íti tā́ yā́ devā́ deva dā́nāny ádus tā́ny asmā ā́ ca śā́ssvā́ ca gurasveṣitáś ca hotar ási bʰadravā́cyāya préṣito mā́nuṣaḥ sūktavākā́ya sūktā́ brūhi \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.