TITUS
White Yajur-Veda: Vajasaneyi-Samhita (Madhyandina)
Part No. 29
Previous part

Paragraph: 29 

Verse: 1 
Sentence: a    sámiddʰo añján kŕ̥daraṃmatīnā́ṃ gʰr̥tám agne mádʰumat pínvamānaḥ \
Sentence: b    vājī́ váhan vājínaṃ jātavedo devā́nāṃ vakṣi priyám ā́ sadʰástʰam \\

Verse: 2 
Sentence: a    gʰr̥ténāñjánt sáṃ patʰó devayā́nān prajānán vājy ápy etu devā́n \
Sentence: b    ánu tvā sapte pradíśaḥ sacantām̐ svadʰā́m asmái yájamānāya dʰehi \\

Verse: 3 
Sentence: a    ī́ḍyaś cā́si vándyaś ca vājinn āśúś cā́si médʰyaś ca sapte \
Sentence: b    agníṣ ṭvā deváir vásubʰiḥ sajóṣāḥ prītáṃ váhniṃ vahatu jātávedāḥ \\

Verse: 4 
Sentence: a    stīrṇáṃ barhíḥ suṣṭárīmā juṣāṃórú pr̥tʰú prátʰamānaṃ pr̥tʰivyā́m \
Sentence: b    devébʰir yuktám áditiḥ sajóṣāḥ syonáṃ kr̥ṇvāná suvité dadʰātu \\

Verse: 5 
Sentence: a    etā́ u vaḥ subʰágā viśvárūpā ví pákṣobʰiḥ śráyamāṇā úd ā́taiḥ \
Sentence: b    r̥ṣvā́ḥ satī́ḥ kaváṣaḥ śúmbʰamānā dvā́ro devī́ḥ suprāyaṇā́ bʰavantu \\

Verse: 6 
Sentence: a    antarā́ mitrā́váruṇā cárantī múkʰaṃ yajñā́nām abʰí saṃvidāné \
Sentence: b    uṣā́sā vām̐ suhiraṇyé suśilpé r̥tásya yónāv ihá sādayāmi \\

Verse: 7 
Sentence: a    pratʰamā́ vām̐ saratʰínā suvárṇā deváu páśyantau bʰúvanāni víśvā \
Sentence: b    ápiprayaṃ códanā vāṃ mímānā hótārā jyótiḥ pradíśā diśántā \\

Verse: 8 
Sentence: a    ādityáir no bʰā́ratī vaṣṭu yajñám̐ sárasvatī sahá rudráir na āvīt \
Sentence: b    íḍópahūtā vásubʰiḥ sajóṣā yajñáṃ no devīr amŕ̥teṣu dʰatta \\

Verse: 9 
Sentence: a    tváṣṭā vīráṃ devákāmaṃ jajāna tváṣṭur árvā jāyata āśúr áśvaḥ \
Sentence: b    tváṣṭedáṃ víśvaṃ bʰúvanaṃ jajāna bahóḥ kartā́ram ihá yakṣi hotaḥ \\

Verse: 10 
Sentence: a    áśvo gʰr̥téna tmányā sámakta úpa devā́m̐ r̥tuśáḥ pā́tʰa etu \
Sentence: b    vánaspátir devalokáṃ prajānánn agnínā havyā́ svaditā́ni vakṣat \\

Verse: 11 
Sentence: a    prajā́pates tápasā vāvr̥dʰānáḥ sadyó jātó dadʰiṣe yajñám agne \
Sentence: b    svā́hākr̥tena havíṣā purogā yāhí sādʰyā́ havír adantu devā́ḥ \\

Verse: 12 
Sentence: a    yád ákrandaḥ pratʰamáṃ jā́yamāna udyánt samudrā́d utá vā púrīṣāt \
Sentence: b    śyenásya pakṣā́ hariṇásya bāhū́ upastútyaṃ máhi jātáṃ te arvan \\

Verse: 13 
Sentence: a    yaména dattáṃ tritá enam āyunag índra eṇaṃ pratʰamó ádʰy atiṣṭʰat \
Sentence: b    gandʰarvó asya raśanā́m agr̥bʰṇāt sū́rād áśvaṃ vasavo nír ataṣṭa \\

Verse: 14 
Sentence: a    ási yamó ásy ādityó arvann ási tritó gúhyena vraténa \
Sentence: b    ási sómena samáyā vípr̥kta āhús te trī́ṇi diví bándʰanāni \\

Verse: 15 
Sentence: a    trī́ṇi ta āhur diví bándʰanāni trī́ṇy apsú trī́ṇy antáḥ samudré \
Sentence: b    utéva me váruṇaś cʰantsy arvan yátrā ta āhúḥ paramáṃ janítram \\

Verse: 16 
Sentence: a    imā́ te vājinn avamā́rjanānīmā́ śapʰā́nām̐ sanitúr nidʰā́nā \
Sentence: b    átrā te bʰadrā́ raśanā́ apaśyam r̥tásya yā́ abʰirákṣanti gopā́ḥ \\

Verse: 17 
Sentence: a    ātmā́naṃ te mánasārā́d ajānām avó divā́ patáyantaṃ pataṃgám \
Sentence: b    śíro apaśyaṃ patʰíbʰiḥ sugébʰir areṇúbʰir jéhamānaṃ patatrí \\

Verse: 18 
Sentence: a    átrā te rūpám uttamám apaśyaṃ jígīṣamāṇam iṣá ā́ padé góḥ \
Sentence: b    yadā́ te márto ánu bʰógam ā́naḍ ā́d íd grásiṣṭʰa óṣadʰīr ajīgaḥ \\

Verse: 19 
Sentence: a    ánu tvā rátʰo ánu máryo arvann ánu gā́vó nu bʰágaḥ kanī́nām \
Sentence: b    ánu vrā́tāsas táva sakʰyám īyur ánu devā́ mamire vīryàṃ te \\

Verse: 20 
Sentence: a    híraṇyaśr̥ṅgó yo asya pā́dā mánojavā ávara índra āsīt \
Sentence: b    devā́ íd asya havirádyam āyan yó árvantaṃ pratʰamó adʰyátiṣṭʰat \\

Verse: 21 
Sentence: a    īrmā́ntāsaḥ sílikamadʰyamāsaḥ sám̐ śū́raṇāso divyā́so átyāḥ \
Sentence: b    ham̐sā́ iva śreṇiśó yatante yád ā́kṣiṣur divyám ájmam áśvāḥ \\

Verse: 22 
Sentence: a    táva śárīraṃ patayiṣṇv àrvan táva cittáṃ vā́ta iva dʰrájīmān \
Sentence: b    táva śŕ̥ṅgāṇi víṣṭʰitā purutrā́raṇyeṣu járbʰurāṇā caranti \\

Verse: 23 
Sentence: a    úpa prā́gāc cʰásanaṃ vājy árvā devadrī́cā mánasā dī́dʰyānaḥ \
Sentence: b    ajáḥ puró nīyate nā́bʰir asyā́nu paścā́t kaváyo yanti rebʰā́ḥ \\

Verse: 24 
Sentence: a    úpa prā́gāt paramáṃ yát sadʰástʰam árvām̐ áccʰā pitáraṃ mātáraṃ ca \
Sentence: b    adyā́ devā́n júṣṭatamo hí gamyā́ átʰā́ śāste dāśúṣe vā́ryāṇi \\

Verse: 25 
Sentence: a    sámiddʰo adyá mánuṣo duroṇé devó devā́n yajasi jātavedaḥ \
Sentence: b    ā́ ca váha mitramahaś cikitvā́n tváṃ dūtáḥ kavír asi prácetāḥ \\

Verse: 26 
Sentence: a    tánūnapāt patʰá r̥tásya yā́nān mádʰvā samañjánt svadayā sujihva \
Sentence: b    mánmāni dʰībʰír utá yajñám r̥ndʰán devatrā́ ca kr̥ṇuhy adʰvaráṃ naḥ \\

Verse: 27 
Sentence: a    nárāśám̐sasya mahimā́nam eṣām úpa stoṣāma yajatásya yajñáiḥ \
Sentence: b    yé sukrátavaḥ śúcayo dʰiyaṃdʰā́ḥ svádanti devā́ ubʰáyāni havyā́ \\

Verse: 28 
Sentence: a    ājúhvāna ī́ḍyo vándyaś cā́ yāhy agne vásubʰiḥ sajóṣāḥ \
Sentence: b    tváṃ devā́nām asi yahva hótā sá enān yakṣīṣitó yájīyān \\

Verse: 29 
Sentence: a    prācī́naṃ barhíḥ pradíśā pr̥tʰivyā́ vástor asyā́ vr̥jyate ágre áhnām \
Sentence: b    vy ù pratʰate vitaráṃ várīyo devébʰyo áditaye syonám \\

Verse: 30 
Sentence: a    vyácasvatīr urviyā́ ví śrayantāṃ pátibʰyo ná jánayaḥ śúmbʰamānāḥ \
Sentence: b    dévīr dvāro br̥hatīr viśvaminvā devébʰyo bʰavata suprāyaṇā́ḥ \\

Verse: 31 
Sentence: a    ā́ suṣváyantī yajaté úpāke uṣā́sānáktā sadatāṃ ní yónau \
Sentence: b    divyé yóṣaṇe br̥hatī́ surukmé ádʰi śríyam̐ śukrapíśaṃ dádʰāne \\

Verse: 32 
Sentence: a    dáivyā hótārā pratʰamā́ suvā́cā mímānā yajñáṃ mánuṣo yájadʰyai \
Sentence: b    pracodáyantā vidátʰeṣu kārū́ prācī́naṃ jyótiḥ pradíśā diśántā \\

Verse: 33 
Sentence: a    ā́ no yajñáṃ bʰā́ratī tū́yam etv íḍā manuṣvád ihá cetáyantī \
Sentence: b    tisró devī́r barhír édám̐ syonám̐ sárasvatī svápasaḥ sadantu \\

Verse: 34 
Sentence: a    yá imé dyā́vāpr̥tʰivī́ jánitrī rūpáir ápim̐śad bʰúvanāni víśvā \
Sentence: b    tám adyá hotar iṣitó yájīyān deváṃ tváṣṭāram ihá yakṣi vidvā́n \\

Verse: 35 
Sentence: a    upā́va sr̥ja tmányā samañján devā́nāṃ pā́tʰa r̥tutʰā́ havī́m̐ṣi \
Sentence: b    vánaspátiḥ śamitā́ devó agníḥ svádantu havyáṃ mádʰunā gʰr̥téna \\

Verse: 36 
Sentence: a    sadyó jātó vy àmimīta yajñám agnír devā́nām abʰavat purogā́ḥ \
Sentence: b    asyá hótuḥ pradíśy r̥tásya vācí svā́hākr̥tam̐ havír adantu devā́ḥ \\

Verse: 37 
Sentence: a    ketúṃ kr̥ṇvánn aketáve péśo maryā apeśáse \
Sentence: b    sám uṣádbʰir ajāyatʰāḥ \\

Verse: 38 
Sentence: a    jīmū́tasyeva bʰavati prátīkaṃ yád varmī́ yā́ti samádām upástʰe \
Sentence: b    ánāviddʰayā tanvā̀ jaya tvám̐ sá tvā vármaṇo mahimā́ pipartu \\

Verse: 39 
Sentence: a    dʰánvanā gā́ dʰánvanājíṃ jayema dʰánvanā tīvrā́ḥ samádo jayema \
Sentence: b    dʰánuḥ śátror apakāmáṃ kr̥ṇoti dʰánvanā sárvāḥ pradíśo jayema \\

Verse: 40 
Sentence: a    vakṣyántīvéd ā́ ganīganti kárṇaṃ priyám̐ sákʰāyaṃ pariṣasvajānā́ \
Sentence: b    yóṣeva śiṅkte vítatā́dʰi dʰánvan jyā́ iyám̐ sámane pāráyantī \\

Verse: 41 
Sentence: a    té ācárantī sámaneva yóṣā mātéva putráṃ bibʰr̥tām upástʰe \
Sentence: b    ápa śátrūn vidʰyatām̐ saṃvidāné ā́rtnī imé viṣpʰurántī amítrān \\

Verse: 42 
Sentence: a    bahvīnā́ṃ pitā́ bahúr asya putráś ciścā́ kr̥ṇoti sámanāvagátya \
Sentence: b    iṣudʰíḥ sáṅkāḥ pŕ̥tanāś ca sárvāḥ pr̥ṣṭʰé nínaddʰo jayati prásūtaḥ \\

Verse: 43 
Sentence: a    rátʰe tíṣṭʰan nayati vājínaḥ puró yátra-yatra kāmáyate suṣāratʰíḥ \
Sentence: b    abʰī́śūnāṃ mahimā́naṃ panāyata mánaḥ paścā́d ánu yaccʰanti raśmáyaḥ \\

Verse: 44 
Sentence: a    tīvrā́n gʰóṣān kr̥ṇvate vŕ̥ṣapāṇayó śvā rátʰebʰiḥ sahá vājáyantaḥ \
Sentence: b    avakrā́mantaḥ prápadair amítrān kṣiṇánti śátrūm̐r ánapavyayantaḥ \\

Verse: 45 
Sentence: a    ratʰavā́hanam̐ havír asya nā́ma yátrā́yudʰaṃ níhitam asya várma \
Sentence: b    tátrā rátʰam úpa śagmám̐ sadema viśvā́hā vayám̐ sumanasyámānāḥ \\

Verse: 46 
Sentence: a    svāduṣam̐sádaḥ pitáro vayodʰā́ḥ kr̥ccʰreśrítaḥ śáktīvanto gabʰīrā́ḥ \
Sentence: b    citrásenā íṣubalā ámr̥dʰrāḥ satóvīrā urávo vrātasāhā́ḥ \\

Verse: 47 
Sentence: a    brā́hmaṇāsaḥ pítaraḥ sómyāsaḥ śivé no dyā́vāpr̥tʰivī́ anehásā \
Sentence: b    pūṣā́ naḥ pātu duritā́d r̥tāvr̥dʰo rákṣā mā́kir no agʰáśam̐sa īśata \\

Verse: 48 
Sentence: a    suparṇáṃ vaste mr̥gó asyā dánto góbʰiḥ sáṃnaddʰā patati prásūtā \
Sentence: b    yátrā náraḥ sáṃ ca ví ca drávanti tátrāsmábʰyam íṣavaḥ śárma yam̐san \\

Verse: 49 
Sentence: a    ŕ̥jīte pári vr̥ṅdʰi nó śmā bʰavatu nas tanū́ḥ \
Sentence: b    sómo ádʰi bravītu nó ditiḥ śárma yaccʰatu \\

Verse: 50 
Sentence: a    ā́ jaṅgʰanti sā́nv eṣāṃ jagʰánām̐ úpa jigʰnate \
Sentence: b    áśvājani prácetasó śvānt samátsu codaya \\

Verse: 51 
Sentence: a    áhir iva bʰogáiḥ páry eti bāhúṃ jyā́yā hetíṃ paribā́dʰamānaḥ \
Sentence: b    hastagʰnó víśvā vayúnāni vidvā́n púmān púmām̐saṃ pári pātu viśvátaḥ \\

Verse: 52 
Sentence: a    vánaspate vīḍvàṅgo hí bʰūyā́ asmátsakʰā pratáraṇaḥ suvī́raḥ \
Sentence: b    góbʰiḥ sáṃnaddʰo asi vīḍáyasvāstʰātā́ te jayatu jétvāni \\

Verse: 53 
Sentence: a    diváḥ pr̥tʰivyā́ḥ páry ója údbʰr̥taṃ vánaspátibʰyaḥ páry ā́bʰr̥tam̐ sáhaḥ \
Sentence: b    apā́m ojmā́naṃ pári góbʰir ā́vr̥tam índrasya vájram̐ havíṣā rátʰaṃ yaja \\

Verse: 54 
Sentence: a    índrasya vájro marútām ánīkaṃ mitrásya gárbʰo váruṇasya nā́bʰiḥ \
Sentence: b    sémā́ṃ no havyádātiṃ juṣāṇó déva ratʰa práti havyā́ gr̥bʰāya \\

Verse: 55 
Sentence: a    úpa śvāsaya pr̥tʰivī́m utá dyā́ṃ purutrā́ te manutāṃ víṣṭʰitaṃ jágat \
Sentence: b    sá dundubʰe sajū́r índreṇa deváir dūrā́d dávīyo ápa sedʰa śátrūn \\

Verse: 56 
Sentence: a    ā́ krandaya bálam ójo na ā́ dʰā ní ṣṭanihi duritā́ bā́dʰamānaḥ \
Sentence: b    ápa protʰa dundubʰe duccʰúnā itá índrasya muṣṭír asi vīḍáyasva \\

Verse: 57 
Sentence: a    ā́mū́r aja pratyā́ vartayemā́ḥ ketumád dundubʰír vāvadīti \
Sentence: b    sám áśvaparṇāś cáranti no náro smā́kam indra ratʰíno jayantu \\

Verse: 58 
Sentence: a    āgneyáḥ kr̥ṣṇágrīvaḥ sārasvatī́ meṣī́ babʰrúḥ saumyáḥ pauṣṇáḥ śyāmáḥ śitipr̥ṣṭʰó bārhaspatyáḥ śilpó vaiśvadevá aindrò ruṇó mārutáḥ kalmā́ṣa aindrāgnáḥ sam̐hitò dʰórāmaḥ sāvitró vāruṇáḥ kr̥ṣṇá ékaśitipāt pétvaḥ \\

Verse: 59 
Sentence: a    agnáyé nīkavate róhitāñjir anaḍvā́n adʰórāmau sāvitráu pauṣṇáu rajatánābʰī vaiśvadeváu piśáṃgau tūparáu mārutáḥ kalmā́ṣa āgneyáḥ kr̥ṣṇò jáḥ sārasvatī́ meṣī́ vāruṇáḥ pétvaḥ \\

Verse: 60 
Sentence: a    agnáye gāyatrā́ya trivŕ̥te rā́tʰantarāyāṣṭā́kapāla índrāya tráiṣṭubʰāya pañcadaśā́ya bárhatāyáikādaśakapālo víśvebʰyo devébʰyo jā́gatebʰyaḥ saptadaśébʰyo vairūpébʰyo dvā́daśakapālo mitrā́váruṇābʰyām ā́nuṣṭubʰābʰyām ekavim̐śā́bʰyāṃ vairājā́bʰyāṃ payasyā̀ bŕ̥haspátaye pā́ṅktāya triṇavā́ya śā́kvarāya carúḥ savitrá áuṣṇihāya trayastrim̐śā́ya raivatā́ya dvā́daśakapālaḥ prājāpatyáś carúr ádityai víṣṇupatnyai carúr agnáye vaiśvānarā́ya dvā́daśakapāló numatyā aṣṭā́kapālaḥ \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.