TITUS
White Yajur-Veda: Vajasaneyi-Samhita (Madhyandina)
Part No. 30
Previous part

Paragraph: 30 

Verse: 1 
Sentence: a    déva savitaḥ prá suva yajñáṃ prá suva yajñápatiṃ bʰágāya \
Sentence: b    divyó gandʰarváḥ ketupū́ḥ kétaṃ naḥ punātu vācáspátir vā́jaṃ naḥ svadatu \\

Verse: 2 
Sentence: a    tát savitúr váreṇyaṃ bʰárgo devásya dʰīmahi \
Sentence: b    dʰíyo yó naḥ pracodáyat \\

Verse: 3 
Sentence: a    víśvāni deva savitar duritā́ni párā suva \
Sentence: b    yád bʰadráṃ tán na ā́ suva \\

Verse: 4 
Sentence: a    vibʰaktā́ram̐ havāmahe vásoś citrásya rā́dʰasaḥ \
Sentence: b    savitā́raṃ nr̥cákṣasam \\

Verse: 5 
Sentence: a    bráhmaṇe brāhmaṇáṃ kṣatrā́ya rājanyàṃ marúdbʰyo váiśyaṃ tápase śūdráṃ támase táskaraṃ nārakā́ya vīraháṇaṃ pāpmáne klībám ākrayā́yā ayogū́ṃ kā́māya pum̐ścalū́m átikruṣṭāya māgadʰám \\

Verse: 6 
Sentence: a    nr̥ttā́ya sūtáṃ gītā́ya śailūṣáṃ dʰármāya sabʰācaráṃ naríṣṭʰāyai bʰīmaláṃ narmā́ya rebʰám̐ hásāya kā́rim ānandā́ya strīṣukʰáṃ pramáde kumārīputráṃ medʰā́yai ratʰakāráṃ dʰáiryāya tákṣāṇam \\

Verse: 7 
Sentence: a    tápase kaulāláṃ māyā́yai karmā́ram̐ rūpā́ya maṇikārám̐ śubʰé vapám̐ śaravyā̀yā iṣukārám̐ hetyái dʰanuṣkāráṃ kármaṇe jyākāráṃ diṣṭā́ya rajjusarjáṃ mr̥tyáve mr̥gayúm ántakāya śvanínam \\

Verse: 8 
Sentence: a    nadī́bʰyaḥ pauñjiṣṭʰám r̥kṣī́kābʰyo náiṣādaṃ puruṣavyāgʰrā́ya durmádaṃ gandʰarvāpsaróbʰyo vrā́tyaṃ prayúgbʰya únmattam̐ sarpadevajanébʰyó pratipadamáyebʰyaḥ kitavám īryátāyā ákitavaṃ piśācébʰyo bidalakārī́ṃ yātudʰā́nebʰyaḥ kaṇṭakīkārī́m \\

Verse: 9 
Sentence: a    saṃdʰáye jāráṃ gehā́yopapatím ā́rtyai párivittaṃ nírr̥tyai parivividānám árāddʰyā edidʰiṣuḥpatíṃ níṣkr̥tyai peśaskārī́m̐ saṃjñā́nāya smarakārī́ṃ prakāmódyāyopasádaṃ várṇāyānurúdʰaṃ bálāyopadā́m \\

Verse: 10 
Sentence: a    utsādébʰyaḥ kubjáṃ pramúde vāmanáṃ dvārbʰyáḥ srāmám̐ svápnāyāndʰám árdʰamāya badʰiráṃ pavítrāya bʰiṣájaṃ prajñā́nāya nakṣatradarśám āśikṣā́yai praśnínam upaśikṣā́yā abʰipraśnínaṃ maryā́dāyai praśnavivākám \\

Verse: 11 
Sentence: a    ámrbʰyo hastipáṃ javā́yāśvapáṃ púṣṭyai gopāláṃ vīryā̀yāvipāláṃ téjase japālám írāyai kīnā́śaṃ kīlā́lāya surākāráṃ bʰadrā́ya gr̥hapám̐ śréyase vittadʰám ā́dʰyakṣyāyānukṣattā́ram \\

Verse: 12 
Sentence: a    bʰā́yai dārvāhā́raṃ prabʰā́yā agnyedʰáṃ bradʰnásya viṣṭápāyābʰiṣektā́raṃ várṣiṣṭʰāya nā́kāya pariveṣṭā́raṃ devalokā́ya peśitā́raṃ manuṣyalokā́ya prakaritā́ram̐ sárvebʰyo lokébʰyo upasektā́ram ávar̥tyai badʰā́yopamantʰitā́raṃ médʰāya vāsaḥpalpūlī́ṃ prakāmā́ya rajayitrī́m \\

Verse: 13 
Sentence: a    r̥táye stenáhr̥dayaṃ váirahatyāya píśunaṃ víviktyai kṣattā́ram áupadraṣṭryāyānukṣattā́raṃ bā́lāyānucaráṃ bʰūmné pariṣkandáṃ priyā́ya priyavādínam áriṣṭyā aśvasādám̐ svárgāya lokā́ya bʰāgadugʰáṃ várṣiṣṭʰāya nā́kāya pariveṣṭā́ram \\

Verse: 14 
Sentence: a    manyáve yastāpáṃ kródʰāya nisaráṃ yógāya yoktā́ram̐ śókāyābʰisartā́raṃ kṣémāya vimoktā́ram utkūlébʰyas triṣṭʰínaṃ vápuṣe mānaskr̥tám̐ śī́lāyāñjanīkārī́ṃ nírr̥tyai kośakārī́ṃ yamā́yāsū́m \\

Verse: 15 
Sentence: a    yamā́ya yamasū́m átʰarvabʰyó vatokām̐ saṃvatsarā́ya paryāyíṇīṃ parivatsarā́yā́vijātām idāvatsarā́yātī́tvarīm idvatsarā́yātiṣkádvarīṃ vatsarā́ya víjarjarām̐ saṃvatsarā́ya páliknīm r̥bʰúbʰyo jinasaṃdʰám̐ sādʰyébʰyaś carmamnám \\

Verse: 16 
Sentence: a    sárebʰyo dʰaivarám upastʰā́varābʰyo dā́śaṃ vaiśantā́bʰyo baindáṃ naḍvalā́bʰyaḥ śáuṣkalaṃ pārā́ya mārgārám avarā́ya kevártaṃ tīrtʰébʰya āndáṃ víṣamebʰyo mainālám̐ svánebʰyaḥ párṇakaṃ gúhābʰyaḥ kírātam̐ sā́nubʰyo jámbʰakaṃ párvatebʰyaḥ kimpūruṣám \\

Verse: 17 
Sentence: a    bībʰatsā́yai paulkasáṃ várṇāya hiraṇyakāráṃ tulā́yai vāṇijáṃ paścādoṣā́ya glāvínaṃ víśvebʰyo bʰūtébʰyaḥ sidʰmaláṃ bʰū́tyai jāgaraṇám ábʰūtyai svapanám ā́rtyai janavādínaṃ vyr̥̀rddʰyā apagalbʰám̐ sám̐śarāya praccʰídam \\

Verse: 18 
Sentence: a    akṣarājā́ya kitaváṃ kr̥tā́yādinavadarśáṃ trétāyai kalpínaṃ dvāpárāyādʰikalpínam āskandā́ya sabʰāstʰāṇúṃ mr̥tyáve govyaccʰám ántakāya gogʰātáṃ kṣudʰé yó gā́ṃ vikr̥ntántaṃ bʰíkṣamāṇa upatíṣṭʰati duṣkr̥tā́ya cárakācāryaṃ pāpmáne sailagám \\

Verse: 19 
Sentence: a    pratiśrútkāyā artanáṃ gʰóṣāya bʰaṣám ántāya bahuvādínam anantā́ya mū́kam̐ śábdāyāḍambarāgʰātáṃ máhase vīṇāvādáṃ króśāya tūṇavadʰmám avarasparā́ya śaṅkʰadʰmáṃ vánāya vatapám anyátoraṇyāya dāvapám \\

Verse: 20 
Sentence: a    narmā́ya pum̐ścalū́m̐ hásāya kā́riṃ yā́dase śābalyā́ṃ grāmaṇyàṃ gáṇakam abʰikróśakaṃ tā́n máhase vīṇāvādáṃ pāṇigʰnáṃ tūṇavadʰmáṃ tā́n nr̥tā́yānandā́ya talavám \\

Verse: 21 
Sentence: a    agnáye pī́vānaṃ pr̥tʰivyái pīṭʰasarpíṇaṃ vāyáve cāṇḍālám antárikṣāya vam̐śanartínaṃ divé kʰalatím̐ sū́ryāya haryakṣáṃ nákṣatrebʰyaḥ kirmiráṃ candrámase kilā́sam áhne śukláṃ piṅgākṣám̐ rā́tryai kr̥ṣṇáṃ piṅgākṣám \\

Verse: 22 
Sentence: a    átaitā́n aṣṭáu vírūpān ā́ labʰaté tidīrgʰaṃ cā́tihrasvaṃ cā́tistʰūlaṃ cā́tikr̥śaṃ cā́tiśuklaṃ cā́tikr̥ṣṇaṃ cā́tikulvaṃ cā́tilomaśaṃ ca \
Sentence: b    áśūdrā ábrāhmaṇās té prājāpatyā́ḥ \
Sentence: c    māgadʰáḥ pum̐ścalī́ kitaváḥ klībó śūdrā ábrāhmaṇās té prājāpatyā́ḥ \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.