TITUS
White Yajur-Veda: Vajasaneyi-Samhita (Madhyandina)
Part No. 31
Previous part

Paragraph: 31 
Verse: 1 
Sentence: a    sahásraśīrṣā púruṣaḥ sahasrākṣáḥ sahásrapāt \
Sentence: b    sá bʰū́mim̐ sarváta spr̥tvā́ty atiṣṭʰad daśāṅgulám \\

Verse: 2 
Sentence: a    púruṣa evédám̐ sárvaṃ yád bʰūtáṃ yác ca bʰāvyàm \
Sentence: b    utā́mr̥tatvásyéśāno yád ánnenātiróhati \\

Verse: 3 
Sentence: a    etā́vān asya mahimā́to jyā́yām̐ś ca pū́ruṣaḥ \
Sentence: b    pā́do sya víśvā bʰūtā́ni tripā́d asyāmŕ̥taṃ diví \\

Verse: 4 
Sentence: a    tripā́d ūrdʰvá úd ait púruṣaḥ pā́do syehā́bʰavat púnaḥ \
Sentence: b    táto víṣvaṅ vy àkrāmat sāśanānaśané abʰí \\

Verse: 5 
Sentence: a    tásmād virā́ḍ ajāyata virā́jo ádʰi pū́ruṣaḥ \
Sentence: b    sá jātó áty aricyata paścā́d bʰū́mim átʰo puráḥ \\

Verse: 6 
Sentence: a    tásmād yajñā́t sarvahútaḥ sámbʰr̥taṃ pr̥ṣadājyám \
Sentence: b    paśū́m̐s tā́m̐ś cakre vāyavyā̀n āraṇyā́ grāmyā́ś ca yé \\

Verse: 7 
Sentence: a    tásmād yajñā́t sarvahúta ŕ̥caḥ sā́māni jajñire \
Sentence: b    cʰándām̐si jajñire tásmād yájus tásmād ajāyata \\

Verse: 8 
Sentence: a    tásmād áśvā ajāyanta yé ké cobʰayā́dataḥ \
Sentence: b    gā́vo ha jajñire tásmāt tásmāj jātā́ ajāváyaḥ \\

Verse: 9 
Sentence: a    táṃ yajñáṃ barhíṣi práukṣan púruṣaṃ jātám agratáḥ \
Sentence: b    téna devā́ ayajanta sādʰyā́ ŕ̥ṣayaś ca yé \\

Verse: 10 
Sentence: a    yát púruṣaṃ vy ádadʰuḥ katidʰā́ vy àkalpayan \
Sentence: b    múkʰaṃ kím asya káu bāhū́ kā́ ūrū́ pā́dā ucyete \\

Verse: 11 
Sentence: a    brāhmaṇò sya múkʰam āsīd bāhū́ rājanyàḥ kr̥táḥ \
Sentence: b    ūrū́ tád asya yád váiśyaḥ padbʰyā́m̐ śūdró ajāyata \\

Verse: 12 
Sentence: a    candrámā mánaso jātáś cákṣoḥ sū́ryo ajāyata \
Sentence: b    śrótrād vāyúś ca prāṇáś ca múkʰād agnír ajāyata \\

Verse: 13 
Sentence: a    nā́bʰyā āsīd antárikṣam̐ śīrṣṇó dyáuḥ sám avartata \
Sentence: b    padbʰyā́ṃ bʰū́mir díśaḥ śrótrāt tátʰā lokā́m̐ akalpayan \\

Verse: 14 
Sentence: a    yát púruṣeṇa havíṣā devā́ yajñám átanvata \
Sentence: b    vasantò syāsīd ā́jyaṃ grīṣmá idʰmáḥ śarád dʰavíḥ \\

Verse: 15 
Sentence: a    saptā́syāsan paridʰáyas tríḥ saptá samídʰaḥ kr̥tā́ḥ \
Sentence: b    devā́ yád yajñáṃ tanvānā́ ábadʰnan púruṣaṃ paśúm \\

Verse: 16 
Sentence: a    yajñéna yajñám ayajanta devā́s tā́ni dʰármāṇi pratʰamā́ny āsan \
Sentence: b    té ha nā́kaṃ mahimā́naḥ sacanta yátra pū́rve sādʰyā́ḥ sánti devā́ḥ \\

Verse: 17 
Sentence: a    adbʰyáḥ sámbʰr̥taḥ pr̥tʰivyái rásāc ca viśvákarmaṇaḥ sám avartatā́gre \
Sentence: b    tásya tváṣṭā vidádʰad rūpám eti tán mártyasya devatvám ājā́nam ágre \\

Verse: 18 
Sentence: a    védāhám etáṃ púruṣaṃ mahā́ntam ādityávarṇaṃ támasaḥ parástāt \
Sentence: b    tám evá viditvā́ti mr̥tyúm eti nā́nyáḥ pántʰā vidyaté yanāya \\

Verse: 19 
Sentence: a    prajā́patiś carati gárbʰe antár ájāyamāno bahudʰā́ ví jāyate \
Sentence: b    tásya yóniṃ pári paśyanti dʰī́rās tásmin ha tastʰur bʰúvanāni víśvā \\

Verse: 20 
Sentence: a    yó devébʰya ātápati yó devā́nāṃ puróhitaḥ \
Sentence: b    pū́rvo yó devébʰyo jātó námo rucā́ya brā́hmaye \\

Verse: 21 
Sentence: a    rucáṃ brāhmyáṃ janáyanto devā́ ágre tád abruvan \
Sentence: b    yás tvaiváṃ brāhmaṇó vidyā́t tásya devā́ asan váśe \\

Verse: 22 
Sentence: a    śrī́ś ca te lakṣmī́ś ca pátnyāv ahorātré pārśvé nákṣatrāṇi rūpám aśvínau vyā́ttām \
Sentence: b    iṣṇánn iṣāṇāmúṃ ma iṣāṇa sarvalokáṃ ma iṣāṇa \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.