TITUS
White Yajur-Veda: Vajasaneyi-Samhita (Madhyandina)
Part No. 32
Previous part

Paragraph: 32 
Verse: 1 
Sentence: a    tád evā́gnís tád ādityás tád vāyús tád u candrámāḥ \
Sentence: b    tád evá śukráṃ tád bráhma tā́ ā́paḥ sá prajā́patiḥ \\

Verse: 2 
Sentence: a    sárve nimeṣā́ jajñire vidyútaḥ púruṣād ádʰi \
Sentence: b    náinam ūrdʰváṃ ná tiryáñcaṃ ná mádʰye pári jagrabʰat \\

Verse: 3 
Sentence: a    ná tásya pratimā́ asti yásya nā́ma mahád yáśaḥ \
Sentence: b    hiraṇyagarbʰá íty eṣáḥ \
Sentence: c    mā́ mā him̐sīd íty eṣā́ \
Sentence: d    yásmān ná jātá íty eṣá \\

Verse: 4 
Sentence: a    eṣó ha deváḥ pradíśó nu sárvāḥ pū́rvo ha jātáḥ sá u gárbʰe antáḥ \
Sentence: b    sá evá jātáḥ sá janiṣyámāṇaḥ pratyáṅ jánās tiṣtʰati sarvátomukʰaḥ \\

Verse: 5 
Sentence: a    yásmāj jātáṃ ná purā́ kíṃ canáivá yá ābabʰū́va bʰúvanāni víśvā \
Sentence: b    prajā́patiḥ prajáyā sam̐rarāṇás trī́ṇi jyótīm̐ṣi sacate sá aiḍaśī́ \\

Verse: 6 
Sentence: a    yéna dyáur ugrā́ pr̥tʰivī́ ca dr̥ḍʰā́ yéna svà stabʰitáṃ yéna nā́kaḥ \
Sentence: b    yó antárikṣe rájaso vimā́naḥ kásmai devā́ya havíṣā vidʰema \\

Verse: 7 
Sentence: a    yáṃ krándasī ávasā tastabʰāné abʰy áikṣetāṃ mánasā réjamāne \
Sentence: b    yátrā́dʰi sū́ra údito vibʰā́ti kásmai devā́ya havíṣā vidʰema \
Sentence: c    ā́po ha yád br̥hatī́ḥ \
Sentence: d    yáś cid ā́paḥ \\

Verse: 8 
Sentence: a    venás tát paśyan níhitaṃ gúhā sád yátra víśvaṃ bʰávaty ékanīḍam \
Sentence: b    tásminn idám̐ sáṃ ca ví caiti sárvam̐ sá ótaḥ prótaś ca vibʰū́ḥ prajā́su \\

Verse: 9 
Sentence: a    prá tád voced amŕ̥taṃ nú vidvā́n gandʰarvó dʰā́ma víbʰr̥taṃ gúhā sát \
Sentence: b    trī́ṇi padā́ni níhitā gúhāsya yás tā́ni véda sá pitúḥ pitā́sat \\

Verse: 10 
Sentence: a    sá no bándʰur janitā́ sá vidʰātā́ dʰā́māni veda bʰúvanāni víśvā \
Sentence: b    yátra devā́ amŕ̥tam ānaśānā́s tr̥tī́ye dʰā́mann ádʰy airayanta \\

Verse: 11 
Sentence: a    parī́tya bʰūtā́ni parī́tya lokā́n parī́tya sárvāḥ pradíśo díśaś ca \
Sentence: b    upastʰā́ya pratʰamajā́m r̥tásyātmánātmā́nam abʰí sáṃ viveśa \\

Verse: 12 
Sentence: a    pári dyā́vāpr̥tʰivī́ sadyá itvā́ pári lokā́n pári díśaḥ pári svàḥ \
Sentence: b    r̥tásya tántuṃ vítataṃ vicŕ̥tya tád apaśyat tád abʰavat tád āsīt \\

Verse: 13 
Sentence: a    sádasas pátim ádbʰutaṃ priyám índrasya kā́myam \
Sentence: b    saníṃ medʰā́m ayāsiṣam̐m svā́hā \\

Verse: 14 
Sentence: a    yā́ṃ medʰā́ṃ devagaṇā́ḥ pitáraś copā́sate \
Sentence: b    táyā mā́m adyá medʰáyā́gne medʰā́vinaṃ kuru svā́hā \\

Verse: 15 
Sentence: a    medʰā́ṃ me váruṇo dadātu medʰā́m agníḥ prajā́patiḥ \
Sentence: b    medʰā́m índrás ca vāyúś ca medʰā́ṃ dʰātā́ dadātu me svā́hā \\

Verse: 16 
Sentence: a    idáṃ me bráhma ca kṣatráṃ cobʰé śríyam aśnutām \
Sentence: b    máyi devā́ dadʰatu śríyam úttamāṃ tásyai te svā́hā \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.