TITUS
White Yajur-Veda: Vajasaneyi-Samhita (Madhyandina)
Part No. 33
Previous part

Paragraph: 33 
Verse: 1 
Sentence: a    asyā́járāso damā́m arítrā arcáddʰūmāso agnáyaḥ pāvakā́ḥ \
Sentence: b    śvitīcáyaḥ śvātrā́so bʰuraṇyávo vanarṣádo vāyávo ná sómāḥ \\

Verse: 2 
Sentence: a    hárayo dʰumáketavo vā́tajūtā úpa dyávi \
Sentence: b    yátante vŕ̥tʰag agnáyaḥ \\

Verse: 3 
Sentence: a    yájā no mitrā́váruṇā yájā devā́m̐ r̥táṃ br̥hát \
Sentence: b    ágne yákṣi sváṃ dámam \\

Verse: 4 
Sentence: a    yukṣvā́ hí devahū́tamām̐ áśvām̐ agne ratʰī́r iva \
Sentence: b    ní hótā pūrvyáḥ sadaḥ \\

Verse: 5 
Sentence: a    dvé vírūpe carataḥ svártʰe anyā́nyā vatsám úpa dʰāpayete \
Sentence: b    hárir anyásyāṃ bʰávati svadʰā́vāñ cʰukró anyásyāṃ dadr̥śe suvárcāḥ \\

Verse: 6 
Sentence: a    ayám ihá pratʰamó dʰāyi dʰātŕ̥bʰir hótā yájiṣṭʰo adʰvaréṣv ī́ḍyaḥ \
Sentence: b    yám ápnavāno bʰŕ̥gavo virurucúr váneṣu citráṃ vibʰvàṃ viśé-viśe \\

Verse: 7 
Sentence: a    trī́ṇi śatā́ trī́ sahásrāṇy agníṃ trim̐śác ca devā́ náva cāsaparyan \
Sentence: b    áukṣan gʰr̥táir ástr̥ṇan barhír asmā ā́d íd dʰótāraṃ ny àsādayanta \\

Verse: 8 
Sentence: a    mūrdʰā́naṃ divó aratíṃ pr̥tʰivyā́ vaiśvānarám r̥tá ā́ jātám agním \
Sentence: b    kavím̐ samrā́jam átitʰiṃ jánānām āsánn ā́ pā́traṃ janayanta devā́ḥ \\

Verse: 9 
Sentence: a    agnír vr̥trā́ṇi jaṅgʰanad draviṇasyúr vipanyáyā \
Sentence: b    sámiddʰaḥ śukrá ā́hutaḥ \\

Verse: 10 
Sentence: a    víśvebʰiḥ somyáṃ mádʰv ágna índreṇa vāyúnā \
Sentence: b    píbā mitrásya dʰā́mabʰiḥ \\

Verse: 11 
Sentence: a    ā́ yád iṣé nr̥pátiṃ téja ā́naṭ śúci réto níṣiktaṃ dyáur abʰī́ke \
Sentence: b    agníḥ śárdʰam anavadyáṃ yúvānam̐ svādʰyàṃ janayat sūdáyac ca \\

Verse: 12 
Sentence: a    ágne śárdʰa mahaté sáubʰagāya táva dyumnā́ny uttamā́ni santu \
Sentence: b    sáṃ jāspatyám̐ suyámam ā́ kr̥ṇuṣva śatrūyatā́m abʰí tiṣṭʰā máhām̐si \\

Verse: 13 
Sentence: a    tvā́m̐ hí mandrátamam arkaśokáir vavr̥máhe máhi naḥ śróṣy agne \
Sentence: b    índraṃ ná tvā śávasā devátā vāyúṃ pr̥ṇanti rā́dʰasā nŕ̥tamāḥ \\

Verse: 14 
Sentence: a    tvé agne svāhuta priyā́saḥ santu sūráyaḥ \
Sentence: b    yantā́ro yé magʰávāno jánānām ūrvā́n dáyanta gónām \\

Verse: 15 
Sentence: a    śrudʰí śrutkarṇa váhnibʰir deváir agne sayā́vabʰiḥ \
Sentence: b    ā́ sīdantu barhíṣi mitró aryamā́ prātaryā́vāṇo adʰvarám \\

Verse: 16 
Sentence: a    víśveṣām áditir yajñíyānāṃ víśveṣām átitʰir mā́nuṣāṇām \
Sentence: b    agnír devā́nām áva āvr̥ṇānáḥ sumr̥ḍīkó bʰavatu jātávedāḥ \\

Verse: 17 
Sentence: a    mahó agnéḥ samidʰānásya śármaṇy ánāgā mitré váruṇe svastáye \
Sentence: b    śréṣṭʰe syāma savitúḥ sávīmani tád devā́nām ávo adyā́ vr̥ṇīmahe \\

Verse: 18 
Sentence: a    ā́paś cit pipyu staryò ná gā́vo nákṣann r̥táṃ jaritā́ras ta indra \
Sentence: b    yāhí vāyúr ná niyúto no áccʰā tvám̐ hí dʰībʰír dáyase ví vā́jān \\

Verse: 19 
Sentence: a    gā́va úpāvatāvatáṃ mahī́ yajñásya rapsúdā \
Sentence: b    ubʰā́ kárṇā hiraṇyáyā \\

Verse: 20 
Sentence: a    yád adyá sū́ra údité nāgā mitró aryamā́ \
Sentence: b    suvā́ti savitā́ bʰágaḥ \\

Verse: 21 
Sentence: a    ā́ suté siñcata śríyam̐ ródasyor abʰiśríyam \
Sentence: b    rasā́ dadʰīta vr̥ṣabʰám \\

Verse: 22 
Sentence: a    ātíṣṭʰantaṃ pári víśve abʰūṣañ cʰríyo vásānaś carati svárociḥ \
Sentence: b    mahát tád vŕ̥ṣṇo ásurasya nā́mā́ viśvárūpo amŕ̥tāni tastʰau \\

Verse: 23 
Sentence: a    prá vo mahé mándamānāyā́ndʰasó rcā viśvā́narāya viśvābʰúve \
Sentence: b    índrasya yásya súmakʰam̐ sáho máhi śrávo nr̥mṇáṃ ca ródasī saparyátaḥ \\

Verse: 24 
Sentence: a    br̥hánn íd idʰmá eṣāṃ bʰū́ri śastáṃ pr̥tʰúḥ sváruḥ \
Sentence: b    yéṣām índro yúvā sákʰā \\

Verse: 25 
Sentence: a    índréhi mátsy ándʰaso víśvebʰiḥ somapárvabʰiḥ \
Sentence: b    mahā́m̐ abʰiṣṭír ójasā \\

Verse: 26 
Sentence: a    índro vr̥trám avr̥ṇoc cʰárdʰanītiḥ prá māyínām aminād várpaṇītiḥ \
Sentence: b    áhan vyàm̐sam uśádʰag váneṣv āvír dʰénā akr̥ṇod rāmyā́ṇām \\

Verse: 27 
Sentence: a    kútas tvám indra mā́hinaḥ sánn éko yāsi satpate kíṃ ta ittʰā́ \
Sentence: b    sáṃ pr̥ccʰase samarāṇáḥ śubʰānáir vocés tán no harivo yát te asmé \
Sentence: c    mahā́m̐ índro yá ójasā \
Sentence: d    kadā́ caná starī́r asi \
Sentence: e    kadā́ caná prá yuccʰasi \\

Verse: 28 
Sentence: a    ā́ tát ta indrāyávaḥ panantābʰí yá ūrváṃ gómantaṃ títr̥tsān \
Sentence: b    sakr̥tsvàṃ yé puruputrā́ṃ mahī́m̐ sahásradʰārāṃ br̥hatī́ṃ dúdukṣan \\

Verse: 29 
Sentence: a    imā́ṃ te dʰíyaṃ prá bʰare mahó mahī́m asyá stotré dʰiṣáṇā yát ta ānajé \
Sentence: b    tám utsavé ca prasavé ca sāsahím índraṃ devā́saḥ śávasāmadann ánu \\

Verse: 30 
Sentence: a    vibʰrā́ḍ br̥hát pibatu somyáṃ mádʰv ā́yur dádʰad yajñápatāv ávihrutam \
Sentence: b    vā́tajūto yó abʰirákṣati tmánā prajā́ḥ pupoṣa purudʰā́ ví rājati \\

Verse: 31 
Sentence: a    úd u tyáṃ jātávedasaṃ deváṃ vahanti ketávaḥ \
Sentence: b    dr̥śé víśvāya sū́ryam̐ svā́hā \\

Verse: 32 
Sentence: a    yénā pāvaka cákṣasā bʰuraṇyántaṃ jánām̐ ánu \
Sentence: b    tváṃ varuṇa páśyasi \\

Verse: 33 
Sentence: a    dáivyāv adʰvaryū ā́ gatam̐ rátʰena sū́ryatvacā \
Sentence: b    mádʰvā yajñám̐ sám añjātʰe \
Sentence: c    táṃ pratnátʰā \
Sentence: d    ayáṃ venáḥ \
Sentence: e    citrám devā́nām \\

Verse: 34 
Sentence: a    ā́ na íḍābʰir vidátʰe suśastí viśvā́naraḥ savitā́ devá etu \
Sentence: b    ápi yátʰā yuvāno mátsatʰā no víśvaṃ jágad abʰipitvé manīṣā́ \\

Verse: 35 
Sentence: a    yád adyá kác ca vr̥trahann udágā abʰí sūrya \
Sentence: b    sárvaṃ tád indra te váśe \\

Verse: 36 
Sentence: a    taráṇir viśvádarśato jyotiṣkŕ̥d asi sūrya \
Sentence: b    víśvam ā́ bʰāsi rocanám \\

Verse: 37 
Sentence: a    tát sū́ryasya devatváṃ tán mahitváṃ madʰyā́ kártor vítatam̐ sáṃ jabʰāra \
Sentence: b    yadéd áyukta harítaḥ sadʰástʰād ā́d rā́trī vā́sas tanute simásmai \\

Verse: 38 
Sentence: a    tán mitrásya váruṇasyābʰicákṣe sū́ryo rūpáṃ kr̥ṇute dyór upástʰe \
Sentence: b    anantám anyád rúśad asya pā́jaḥ kr̥ṣṇám anyád dʰarítaḥ sáṃ bʰaranti \\

Verse: 39 
Sentence: a    báṇ mahā́m̐ asi sūrya báḍ āditya mahā́m̐ asi \
Sentence: b    mahás te sató mahimā́ panasyate ddʰā́ deva mahā́m̐ asi \\

Verse: 40 
Sentence: a    báṭ sūrya śrávasā mahā́m̐ asi satrā́ deva mahā́m̐ asi \
Sentence: b    mahnā́ devā́nām asuryàḥ puróhito vibʰú jyótir ádābʰyam \\

Verse: 41 
Sentence: a    śrā́yanta iva sū́ryaṃ víśvéd índrasya bʰakṣata \
Sentence: b    vásūni jāté jánamāna ójasā práti bʰāgáṃ ná dīdʰima \\

Verse: 42 
Sentence: a    adyā́ devā úditā sū́ryasya nír ám̐hasaḥ pipr̥tā́ nír avadyā́t \
Sentence: b    tán no mitró váruṇo māmahantām áditiḥ síndʰuḥ pr̥tʰivī́ utá dyáuḥ \\

Verse: 43 
Sentence: a    ā́ kr̥ṣṇéna rájasā vártamāno niveśáyann amŕ̥taṃ mártyaṃ ca \
Sentence: b    hiraṇyáyena savitā́ rátʰenā́ devó yāti bʰúvanāni páśyan \\

Verse: 44 
Sentence: a    prá vāvr̥je suprayā́ barhír eṣām ā́ viśpátīva bī́riṭa iyāte \
Sentence: b    viśā́m aktór uṣásaḥ pūrváhūtau vāyúḥ pūṣā́ svastáye niyútvān \\

Verse: 45 
Sentence: a    indravāyū́ bŕ̥haspátiṃ mitrā́gníṃ pūṣáṇaṃ bʰágam \
Sentence: b    ādityā́n mā́rutaṃ gaṇám \\

Verse: 46 
Sentence: a    váruṇaḥ prāvitā́ bʰuvan mitró víśvābʰir ūtíbʰiḥ \
Sentence: b    káratāṃ naḥ surā́dʰasaḥ \\

Verse: 47 
Sentence: a    ádʰi na indreṣāṃ víṣṇo sajātyā̀nām \
Sentence: b    itā́ máruto áśvinā \
Sentence: c    táṃ pratnátʰā \
Sentence: d    ayáṃ venáḥ \
Sentence: e    yé devā́saḥ \
Sentence: f    ā́ na íḍābʰiḥ \
Sentence: g    víśvebʰiḥ somyáṃ mádʰu \
Sentence: h    ómāsaś carṣaṇīdʰr̥taḥ \\

Verse: 48 
Sentence: a    ágna índra váruṇa mítra dévāḥ śárdʰaḥ prá yanta mā́rutotá viṣṇo \
Sentence: b    ubʰā́ nā́satyā rudró ádʰa gnā́ḥ pūṣā́ bʰágaḥ sárasvatī juṣanta \\

Verse: 49 
Sentence: a    indrāgnī́ mitrā́váruṇā́ditim̐ svàḥ pr̥tʰivī́ṃ dyā́ṃ marútaḥ párvatām̐ apáḥ \
Sentence: b    huvé víṣṇuṃ pūṣáṇaṃ bráhmaṇaspátiṃ bʰágaṃ nú śám̐sam̐ savitā́ram ūtáye \\

Verse: 50 
Sentence: a    asmé rudrā́ mehánā párvatāso vr̥trahátye bʰárahūtau sajóṣāḥ \
Sentence: b    yáḥ śám̐sate stuvaté dʰā́yi pajrá índrajyeṣṭʰā asmā́m̐ avantu devā́ḥ \\

Verse: 51 
Sentence: a    arvā́ñco adyā́ bʰavatā yajatrā ā́ vo hā́rdi bʰáyamāno vyayeyam \
Sentence: b    trā́dʰvaṃ no devā nijúro vŕ̥kasya trā́dʰvaṃ kartā́d avapádo yajatrāḥ \\

Verse: 52 
Sentence: a    víśve adyá marúto víśva ūtī́ víśve bʰavantv agnáyaḥ sámiddʰāḥ \
Sentence: b    víśve no devā́ ávasā́ gamantu víśvam astu dráviṇaṃ vā́jo asmé \\

Verse: 53 
Sentence: a    víśve devāḥ śr̥ṇutémám̐ hávaṃ me yé antárikṣe yá úpa dyávi ṣṭʰá \
Sentence: b    yé agnijihvā́ utá vā yájatrā āsádyāsmín barhíṣi mādayadʰvam \\

Verse: 54 
Sentence: a    devébʰyo hí pratʰamáṃ yajñíyebʰyo mr̥tatvám̐ suvási bʰāgám uttaṃám \
Sentence: b    ā́d íd dāmā́nam̐ savitar vy ū̀rṇuṣe nūcīnā́ jīvitā́ mā́nuṣebʰyaḥ \\

Verse: 55 
Sentence: a    prá vāyúm áccʰā br̥hatī́ manīṣā́ br̥hádrayiṃ viśvávāram̐ ratʰaprā́m \
Sentence: b    dyutádyāmā niyútaḥ pátyamānaḥ kavíḥ kavím iyakṣasi prayajyo \\

Verse: 56 
Sentence: a    índravāyū imé sutā́ úpa práyobʰir ā́gatam \
Sentence: b    +índavo vām uśánti hí \\

Verse: 57 
Sentence: a    mitrám̐ huve pūtádakṣaṃ váruṇaṃ ca riśā́dasam \
Sentence: b    dʰíyaṃ gʰr̥tā́cīm̐ sā́dʰantā \\

Verse: 58 
Sentence: a    dásrā yuvā́kavaḥ sutā́ nā́satyā vr̥ktábarhiṣaḥ \
Sentence: b    ā́ yātam̐ rudravartanī \
Sentence: c    táṃ pratnátʰā \
Sentence: d    ayáṃ venáḥ \\

Verse: 59 
Sentence: a    vidád yádī sarámā rugṇám ádrer máhi pā́tʰaḥ pūrvyám̐ sadʰryàk kaḥ \
Sentence: b    ágraṃ nayat supády ákṣarāṇām áccʰā rávaṃ pratʰamā́ jānatī́ gāt \\

Verse: 60 
Sentence: a    nahí spáśam ávidann anyám asmā́d vaiśvānarā́t puraetā́ram agnéḥ \
Sentence: b    ém enam avr̥dʰann amŕ̥tā ámartyaṃ vaiśvānaráṃ kṣáitrajityāya devā́ḥ \\

Verse: 61 
Sentence: a    ugrā́ vigʰanínā mŕ̥dʰa indrāgnī́ havāmahe \
Sentence: b    tā́ no mr̥ḍāta īdŕ̥śe \\

Verse: 62 
Sentence: a    úpāsmai gāyatā naraḥ pávamānāyéndave \
Sentence: b    abʰí devā́m̐ íyakṣate \\

Verse: 63 
Sentence: a    yé tvāhihátye magʰavann ávardʰan yé śāmbaré harivo yé gáviṣṭau \
Sentence: b    yé tvā nūnám anumádanti víprāḥ píbendra sómam̐ ságaṇo marúdbʰiḥ \\

Verse: 64 
Sentence: a    jániṣṭʰā ugráḥ sáhase turā́ya mandrá ójiṣṭʰo bahulā́bʰimānaḥ \
Sentence: b    ávardʰann índraṃ marútaś cid átra mātā́ yád vīráṃ dadʰánad dʰániṣṭʰā \\

Verse: 65 
Sentence: a    ā́ tū́ na indra vr̥trahann asmā́kam ardʰám ā́ gahi \
Sentence: b    mahā́n mahī́bʰir ūtíbʰiḥ \\

Verse: 66 
Sentence: a    tvám indra prátūrtiṣv abʰí víśvā asi spŕ̥dʰaḥ \
Sentence: b    aśastihā́ janitā́ viśvatū́r asi tváṃ tūrya taruṣyatáḥ \\

Verse: 67 
Sentence: a    ánu te śúṣmaṃ turáyantam īyatuḥ kṣoṇī́ śíśuṃ ná mātárā \
Sentence: b    víśvās te spŕ̥dʰaḥ śnatʰayanta manyáve vr̥tráṃ yád indra tū́rvasi \\

Verse: 68 
Sentence: a    yajñó devā́nāṃ práty eti sumnám ā́dityāso bʰávatā mr̥ḍayántaḥ \
Sentence: b    ā́ vo rvā́cī sumatír vavr̥tyād ám̐hoś cid yā́ varivovíttarā́sat \\

Verse: 69 
Sentence: a    ádabdʰebʰiḥ savitaḥ pāyúbʰiṣ ṭvám̐ śivébʰir adyá pári pāhi no gáyam \
Sentence: b    híraṇyajihvaḥ suvitā́ya návyase rákṣā mā́kir no agʰáśam̐sa īśata \\

Verse: 70 
Sentence: a    prá vīrayā́ śúcayo dadrire vām adʰvaryúbʰir mádʰumantaḥ sutā́saḥ \
Sentence: b    váha vāyo niyúto yāhy áccʰā píbā sutásyā́ndʰaso mádāya \\

Verse: 71 
Sentence: a    gā́va úpāvatāvatáṃ mahī́ yajñásya rapsúdā \
Sentence: b    ubʰā́ kárṇā hiraṇyáyā \\

Verse: 72 
Sentence: a    kā́vyayor ājā́neṣu krátvā dákṣasya duroṇé \
Sentence: b    riśā́dasā sadʰástʰa ā́ \\

Verse: 73 
Sentence: a    dáivyāv adʰvaryū ā́ gatam̐ rátʰena sū́ryatvacā \
Sentence: b    mádʰvā yajñám̐ sám añjātʰe \
Sentence: c    táṃ pratnátʰā \
Sentence: d    ayáṃ venáḥ \\

Verse: 74 
Sentence: a    tiraścī́no vítato raśmír eṣām adʰáḥ svid āsī́3d upári svid āsī3t \
Sentence: b    retodʰā́ āsan mahimā́na āsant svadʰā́ avástāt práyatiḥ parástāt \\

Verse: 75 
Sentence: a    ā́ ródasī apr̥ṇad ā́ svàr maháj jātáṃ yád enam apáso ádʰārayan \
Sentence: b    só adʰvarā́ya pári ṇīyate kavír átyo ná vā́jasātaye cánohitaḥ \\

Verse: 76 
Sentence: a    uktʰébʰir vr̥trahántamā yā́ mandānā́ cid ā́ girā́ \
Sentence: b    āṅgūṣáir āvívāsataḥ \\

Verse: 77 
Sentence: a    úpa naḥ sūnávo gíraḥ śr̥ṇvántv amŕ̥tasya yé \
Sentence: b    sumr̥ḍīkā́ bʰavantu naḥ \\

Verse: 78 
Sentence: a    bráhmāṇi me matáyaḥ śám̐ sutā́saḥ śúṣma iyarti prábʰr̥to me ádriḥ \
Sentence: b    ā́ śāsate práti haryanty uktʰémā́ hárī vahatas tā́ no áccʰa \\

Verse: 79 
Sentence: a    ánuttam ā́ te magʰavan nákir nú ná tvā́vām̐ asti devátā vídānaḥ \
Sentence: b    ná jā́yamāno náśate ná jātó yā́ni kariṣyā́ kr̥ṇuhí pravr̥ddʰa \\

Verse: 80 
Sentence: a    tád íd āsa bʰúvaneṣu jyéṣṭʰaṃ yáto jajñá ugrás tveṣánr̥mṇaḥ \
Sentence: b    sadyó jajñānó ní riṇāti śátrūn ánu yáṃ víśve mádanty ū́māḥ \\

Verse: 81 
Sentence: a    imā́ u tvā purūvaso gíro vardʰantu yā́ máma \
Sentence: b    pāvakávarṇāḥ śúcayo vipaścíto bʰí stómair anūṣata \\

Verse: 82 
Sentence: a    yásyāyáṃ víśva ā́ryo dā́saḥ śevadʰipā́ aríḥ \
Sentence: b    tiráś cid aryé ruśáme párīravi túbʰyét só ajyate rayíḥ \\

Verse: 83 
Sentence: a    ayám̐ sahásram ŕ̥ṣibʰiḥ sáhaskr̥taḥ samudrá iva papratʰe \
Sentence: b    satyáḥ só asya mahimā́ gr̥ṇe śávo yajñéṣu viprarā́jye \\

Verse: 84 
Sentence: a    ádabdʰebʰiḥ savitaḥ pāyúbʰiṣ ṭvám̐ śivébʰir adyá pári pāhi no gáyam \
Sentence: b    híraṇyajihvaḥ suvitā́ya návyase rákṣā mā́kir no agʰáśam̐sa īśata \\

Verse: 85 
Sentence: a    ā́ no yajñáṃ divispŕ̥śaṃ vā́yo yāhí sumánmabʰiḥ \
Sentence: b    antáḥ pavítra upári śrīṇānò yám̐ śukró ayāmi te \\

Verse: 86 
Sentence: a    indravāyū́ susaṃdŕ̥śā suhávehá havāmahe \
Sentence: b    yátʰā naḥ sárva íj jáno namīváḥ saṃgáme sumánā ásat \\

Verse: 87 
Sentence: a    ŕ̥dʰag ittʰā́ sá mártyaḥ śaśamé devátātaye \
Sentence: b    yó nūnáṃ mitrā́váruṇāv abʰíṣṭaya ācakré havyádātaye \\

Verse: 88 
Sentence: a    ā́ yātam úpa bʰūṣataṃ mádʰvaḥ pibatam aśvinā \
Sentence: b    dugdʰáṃ páyo vr̥ṣaṇā jenyāvasū mā́ no mardʰiṣṭam ā́ gatam \\

Verse: 89 
Sentence: a    práitu bráhmaṇas pátiḥ prá devy ètu sūnŕ̥tā \
Sentence: b    áccʰā vīráṃ náryaṃ paṅktírādʰasaṃ devā́ yajñáṃ nayantu naḥ \\

Verse: 90 
Sentence: a    candrámā apsv àntár ā́ suparṇó dʰāvate diví \
Sentence: b    rayíṃ piśáṃgaṃ bahuláṃ puruspŕ̥ham̐ hárir eti kánikradat \\

Verse: 91 
Sentence: a    deváṃ-devaṃ vó vase deváṃ-devam abʰíṣṭaye \
Sentence: b    deváṃ-devam̐ huvema vā́jasātaye gr̥ṇánto devyā́ dʰiyā́ \\

Verse: 92 
Sentence: a    diví pr̥ṣṭó arocatāgnír vaiśvānaró br̥hán \
Sentence: b    kṣmáyā vr̥dʰāná ójasā cánohito jyótiṣā bādʰate támaḥ \\

Verse: 93 
Sentence: a    índrāgnī apā́d iyáṃ pū́rvā́gāt padvátībʰyaḥ \
Sentence: b    hitvī́ śíro jihváyā vā́vadac cárat trim̐śát padā́ ny àkramīt \\

Verse: 94 
Sentence: a    devā́so hí ṣmā mánave sámanyavo víśve sākám̐ sárātayaḥ \
Sentence: b    té no adyá té aparáṃ tucé tú no bʰávantu varivovídaḥ \\

Verse: 95 
Sentence: a    ápādʰamad abʰíśastīr aśastihā́tʰéndro dyumny ā́bʰavat \
Sentence: b    devā́s ta indra sakʰyā́ya yemire bŕ̥hadbʰāno márudgaṇa \\

Verse: 96 
Sentence: a    prá va índrāya br̥haté máruto bráhmārcata \
Sentence: b    vr̥trám̐ hanati vr̥trahā́ śatákratur vájreṇa śatáparvaṇā \\

Verse: 97 
Sentence: a    asyéd índro vāvr̥dʰe vŕ̥ṣṇyam̐ śávo máde sutásya víṣṇavi \
Sentence: b    adyā́ tám asya mahimā́nam āyávó nu ṣṭuvanti pūrvátʰā \
Sentence: c    imā́ u tvā \
Sentence: d    yásyāyám \
Sentence: e    ayám̐ sahásram \
Sentence: f    ūrdʰvá ū ṣú ṇaḥ \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.