TITUS
White Yajur-Veda: Vajasaneyi-Samhita (Madhyandina)
Part No. 34
Previous part

Paragraph: 34 

Verse: 1 
Sentence: a    yáj jā́grato dūrám udáiti dáivaṃ tád u suptásya tátʰaiváiti \
Sentence: b    dūraṃgamáṃ jyótiṣāṃ jyótir ékaṃ tán me mánaḥ śivásaṃkalpam astu \\

Verse: 2 
Sentence: a    yéna kármāṇy apáso manīṣíṇo yajñé kr̥ṇvánti vidátʰeṣu dʰī́rāḥ \
Sentence: b    yád apūrváṃ yakṣám antáḥ prajā́nāṃ tán me mánaḥ śivásaṃkalpam astu \\

Verse: 3 
Sentence: a    yát prajñā́nam utá céto dʰŕ̥tiś ca yáj jyótir antár amŕ̥taṃ prajā́su \
Sentence: b    yásmān ná r̥té kíṃ caná kárma kriyáte tán me mánaḥ śivásaṃkalpam astu \\

Verse: 4 
Sentence: a    yénedáṃ bʰūtáṃ bʰúvanaṃ bʰaviṣyát párigr̥hītam amŕ̥tena sárvam \
Sentence: b    yéna yajñás tāyáte saptáhotā tán me mánaḥ śivásaṃkalpam astu \\

Verse: 5 
Sentence: a    yásminn ŕ̥caḥ sā́ma yájūm̐ṣi yásmin prátiṣṭʰitā ratʰanābʰā́v ivārā́ḥ \
Sentence: b    yásmim̐ś cittám̐ sárvam ótaṃ prajā́naṃ tán me mánaḥ śivásaṃkalpam astu \\

Verse: 6 
Sentence: a    suṣāratʰír áśvān iva yán manuṣyā̀n nenīyáte bʰī́śubʰir vājína iva \
Sentence: b    hr̥tprátiṣṭʰaṃ yád ajiráṃ jáviṣṭʰaṃ tán me mánaḥ śivásaṃkalpam astu \\

Verse: 7 
Sentence: a    pitúṃ nú stoṣaṃ mahó dʰarmā́ṇaṃ táviṣīm \
Sentence: b    yásya tritó vy ójasā vr̥tráṃ víparvam ardáyat \\

Verse: 8 
Sentence: a    ánv íd anumate tváṃ mányāsai śáṃ ca nas kr̥dʰi \
Sentence: b    krátve dákṣāya no hinu prá ṇa ā́yūm̐ṣi tāriṣaḥ \\

Verse: 9 
Sentence: a    ánu no dyā́numatir yajñáṃ devéṣu manyatām \
Sentence: b    agníś ca havyavā́hano bʰávataṃ dāśúṣe máyaḥ \\

Verse: 10 
Sentence: a    sínīvāli pŕ̥tʰuṣṭuke yā́ devā́nām ási svásā \
Sentence: b    juṣásva havyám ā́hutaṃ prajā́ṃ devi didiḍḍʰi naḥ \\

Verse: 11 
Sentence: a    páñca nadyàḥ sárasvatīm ápi yanti sásrotasaḥ \
Sentence: b    sárasvatī tú pañcadʰā́ só deśé bʰavat sarít \\

Verse: 12 
Sentence: a    tvám agne pratʰamó áṅgirā ŕ̥ṣir devó devā́nām abʰavaḥ śiváḥ sákʰā \
Sentence: b    táva vraté kaváyo vidmanā́pasó jāyanta marúto bʰrā́jadr̥ṣṭayaḥ \\

Verse: 13 
Sentence: a    tváṃ no agne táve deva pāyúbʰir magʰóno rakṣa tanvàś ca vandya \
Sentence: b    trātā́ tokásya tánaye gávām asy ánimeṣam̐ rákṣaṇas táva vraté \\

Verse: 14 
Sentence: a    uttānā́yām áva bʰarā cikitvā́nt sadyáḥ právītā vŕ̥ṣaṇaṃ jajāna \
Sentence: b    aruṣástūpo rúśad asya pā́ja íḍāyās putró vayúne janiṣṭa \\

Verse: 15 
Sentence: a    íḍāyās tvā padé vayáṃ nā́bʰā pr̥tʰivyā́ ádʰi \
Sentence: b    jā́tavedo ní dʰīmahy ágne havyā́ya vóḍʰave \\

Verse: 16 
Sentence: a    prá manmahe śavasānā́ya śūṣám āṅgūṣáṃ gírvaṇase aṅgirasvát \
Sentence: b    suvr̥ktíbʰi stuvatá r̥gmiyā́yā́rcāmārkáṃ náre víśrutāya \\

Verse: 17 
Sentence: a    prá vo mahé máhi námo bʰaradʰvam āṅgūṣyàm̐ śavasānā́ya sā́ma \
Sentence: b    yénā naḥ pū́rve pitáraḥ padajñā́ árcanto áṅgiraso gā́ ávindan \\

Verse: 18 
Sentence: a    iccʰánti tvā somyā́saḥ sákʰāyaḥ sunvánti sómaṃ dádʰati práyām̐si \
Sentence: b    títikṣante abʰíśastiṃ jánānām índra tvád ā́ káś caná hí praketáḥ \\

Verse: 19 
Sentence: a    ná te dūré paramā́ cid rájām̐sy asyā́ tú prá yāhi harivo háribʰyām \
Sentence: b    stʰirā́ya vŕ̥ṣṇe sávanā kr̥témā́ yuktā́ grā́vāṇaḥ samidʰāné agnáu \\

Verse: 20 
Sentence: a    áṣāḍʰaṃ yutsú pŕ̥tanāsu páprim̐ svarṣā́m apsā́ṃ vr̥jánasya gopā́m \
Sentence: b    bʰareṣujā́m̐ sukṣitím̐ suśrávasaṃ jáyantaṃ tvā́m ánu madema soma \\

Verse: 21 
Sentence: a    sómo dʰenúm̐ sómo árvantam āśúm̐ sómo vīráṃ karmaṇyàṃ dadāti \
Sentence: b    sādanyàṃ vidatʰyàm̐ sabʰéyaṃ pitr̥śrávaṇaṃ yó dádāśad asmai \\

Verse: 22 
Sentence: a    tvám imā́ óṣadʰīḥ soma víśvās tvám apó ajanayas tváṃ gā́ḥ \
Sentence: b    tvám ā́ tatantʰorv àntárikṣaṃ tváṃ jyótiṣā ví támo vavartʰa \\

Verse: 23 
Sentence: a    devéna no mánasā deva soma rāyó bʰāgám̐ sahasāvann abʰí yudʰya \
Sentence: b    mā́ tvā́ tanad ī́śiṣe vīryàsyobʰáyebʰyaḥ prá cikitsā gáviṣṭau \\

Verse: 24 
Sentence: a    aṣṭáu vy àkʰyat kakúbʰaḥ pr̥tʰivyā́s trī́ dʰánva yójanā saptá síndʰūn \
Sentence: b    hiraṇyākṣáḥ savitā́ devá ā́gād dádʰad rátnā dāśúṣe vā́ryāṇi \\

Verse: 25 
Sentence: a    híraṇyapāṇiḥ savitā́ vícarṣaṇir ubʰé dyā́vāpr̥tʰivī́ antár īyate \
Sentence: b    ápā́mīvāṃ bā́dʰate véti sū́ryam abʰí kr̥ṣṇéna rájasā dyā́m r̥ṇoti \\

Verse: 26 
Sentence: a    híraṇyahasto ásuraḥ sunītʰáḥ sumr̥ḍīkáḥ svávā yātv arvā́ṅ \
Sentence: b    apasédʰan rakṣáso yātudʰā́nān ástʰād deváḥ pratidoṣáṃ gr̥ṇānáḥ \\

Verse: 27 
Sentence: a    yé te pántʰāḥ savitaḥ pūrvyā́so reṇávaḥ súkr̥tā antárikṣe \
Sentence: b    tébʰir no adyá patʰíbʰiḥ sugébʰī rákṣā ca no ádʰi ca brūhi deva \\

Verse: 28 
Sentence: a    ubʰā́ pibatam aśvinobʰā́ naḥ śárma yaccʰatam \
Sentence: b    avidriyā́bʰir ūtíbʰiḥ \\

Verse: 29 
Sentence: a    ápnasvatīm aśvinā vā́cam asmé kr̥táṃ no dasrā vŕ̥ṣaṇā manīṣā́m \
Sentence: b    adyūtyé vase ní hvaye vāṃ vr̥dʰé ca no bʰavataṃ vā́jasātau \\

Verse: 30 
Sentence: a    dyúbʰir aktúbʰiḥ pári pātam asmā́n áriṣṭebʰir aśvinā sáubʰagebʰiḥ \
Sentence: b    tán no mitró váruṇo māmahantām áditiḥ síndʰuḥ pr̥tʰivī́ utá dyáuḥ \\

Verse: 31 
Sentence: a    ā́ kr̥ṣṇéna rájasā vártamāno niveśáyann amŕ̥taṃ mártyaṃ ca \
Sentence: b    hiraṇyáyena savitā́ rátʰenā́ devó yāti bʰúvanāni páśyan \\

Verse: 32 
Sentence: a    ā́ rātri pártʰivam̐ rájaḥ pitúr aprāyi dʰámabʰiḥ \
Sentence: b    diváḥ sádām̐si br̥hatī́ ví tiṣṭʰasa ā́ tveṣáṃ vartate támaḥ \\

Verse: 33 
Sentence: a    úṣas tác citrám ā́ bʰarāsmábʰyaṃ vājinīvati \
Sentence: b    yéna tokáṃ ca tánayaṃ ca dʰā́mahe \\

Verse: 34 
Sentence: a    prātár agníṃ prātár índram̐ havāmahe prātár mitrā́váruṇā prātár aśvínā \
Sentence: b    prātár bʰágaṃ pūṣáṇaṃ bráhmaṇaspátiṃ prātáḥ sómam utá rudrám̐ huvema \\

Verse: 35 
Sentence: a    prātarjítaṃ bʰágam ugrám̐ huvema vayáṃ putrám áditer yó vidʰartā́ \
Sentence: b    ādʰráś cid yáṃ mányamānas turáś cid rā́jā cid yáṃ bʰágaṃ bʰakṣī́ty ā́ha \\

Verse: 36 
Sentence: a    bʰága práṇetar bʰága sátyarādʰo bʰágemā́ṃ dʰíyam úd avā dádan naḥ \
Sentence: b    bʰága prá ṇo janaya góbʰir áśvair bʰága prá nŕ̥bʰir nr̥vántaḥ syāma \\

Verse: 37 
Sentence: a    utédā́nīṃ bʰágavantaḥ syāmotá prapitvá utá mádʰye áhnām \
Sentence: b    utóditā magʰavan sū́ryasya vayáṃ devā́nām̐ sumatáu syāma \\

Verse: 38 
Sentence: a    bʰága evá bʰágavām̐ astu devās téna vayáṃ bʰágavantaḥ syāma \
Sentence: b    táṃ tvā bʰaga sárva íj johavīti sá no bʰaga puraetā́ bʰavehá \\

Verse: 39 
Sentence: a    sám adʰvarā́yoṣáso namanta dadʰikrā́veva śúcaye padā́ya \
Sentence: b    arvācīnáṃ vasuvídaṃ bʰágaṃ no rátʰam ivā́śvā vājína ā́ vahantu \\

Verse: 40 
Sentence: a    áśvāvatīr gómatīr na uṣā́so vīrávatīḥ sádam uccʰantu bʰadrā́ḥ \
Sentence: b    gʰr̥táṃ dúhānā viśvátaḥ prápītā yūyáṃ pāta svastíbʰiḥ sádā naḥ \\

Verse: 41 
Sentence: a    pū́ṣan táva vraté vayáṃ ná riṣyema kádā caná \
Sentence: b    stotā́ras ta ihá smasi \\

Verse: 42 
Sentence: a    patʰás-patʰaḥ páripatiṃ vacasyā́ kā́mena kr̥tó abʰy ā̀naḍ arkám \
Sentence: b    sá no rāsac cʰurúdʰaś candrā́grā dʰíyaṃ-dʰiyam̐ sīṣadʰāti prá pūṣā́ \\

Verse: 43 
Sentence: a    trī́ṇi padā́ ví cakrame víṣṇur gopā́ ádābʰyaḥ \
Sentence: b    áto dʰármāṇi dʰāráyan \\

Verse: 44 
Sentence: a    tád víprāso vipanyávo jāgr̥vā́m̐saḥ sám indʰate \
Sentence: b    víṣṇor yát paramáṃ padám \\

Verse: 45 
Sentence: a    gʰr̥távatī bʰúvanānām abʰiśríyorvī́ pr̥tʰvī́ madʰudúgʰe supéśasā \
Sentence: b    dyā́vāpr̥tʰivī́ váruṇasya dʰármaṇā víṣkabʰite ajáre bʰū́riretasā \\

Verse: 46 
Sentence: a    yé naḥ sapátnā ápa té bʰavantv indrāgníbʰyām áva bādʰāmahe tā́n \
Sentence: b    vásavo rudrā́ ādityā́ uparispŕ̥śaṃ mográṃ céttāram adʰirājám akran \\

Verse: 47 
Sentence: a    ā́ nāsatyā tribʰír ekādaśáir ihá devébʰir yātaṃ madʰupéyam aśvinā \
Sentence: b    prā́yus tā́riṣṭaṃ nī́ rápām̐si mr̥kṣatam̐ sédʰataṃ dvéṣo bʰávatam̐ sacābʰúvā \\

Verse: 48 
Sentence: a    eṣá va stómo maruta iyáṃ gī́r māndāryásya mānyásya kāróḥ \
Sentence: b    éṣā́ yāsīṣṭa tanvè vayā́ṃ vidyā́meṣáṃ vr̥jánaṃ jīrádānum \\

Verse: 49 
Sentence: a    sahástomāḥ saháccʰandasa āvŕ̥taḥ sahápramā ŕ̥ṣayaḥ saptá dáivyāḥ \
Sentence: b    pū́rveṣāṃ pántʰām anudŕ̥śya dʰī́rā anvā́lebʰire ratʰyò ná raśmī́n \\

Verse: 50 
Sentence: a    āyuṣyàṃ varcasyàm̐ rāyáspóṣam áudbʰidam \
Sentence: b    idám̐ híraṇyaṃ várcasvaj jáitrāyā́ viśatād u mā́m \\

Verse: 51 
Sentence: a    ná tád rákṣām̐si ná piśācā́s taranti devā́nām ójaḥ pratʰamajám̐ hy ètát \
Sentence: b    yó bibʰárti dākṣāyaṇám̐ híraṇyam̐ sá devéṣu kr̥ṇute dīrgʰám ā́yuḥ sá manuṣyèṣu kr̥ṇute dīrgʰám ā́yuḥ \\

Verse: 52 
Sentence: a    yád ā́badʰnan dākṣāyaṇā́ híraṇyam̐ śatā́nīkāya sumanasyámānāḥ \
Sentence: b    tán ma ā́ badʰnāmi śatáśāradāyā́yuṣmān jarádaṣṭir yátʰā́sam \\

Verse: 53 
Sentence: a    utá nó hir budʰnyàḥ śr̥ṇotv ajá ékapāt pr̥tʰivī́ samudráḥ \
Sentence: b    víśve devā́ r̥tāvŕ̥dʰo huvānā́ stutā́ mántrāḥ kaviśastā́ avantu \\

Verse: 54 
Sentence: a    imā́ gíra ādityébʰyo gʰr̥tásnūḥ sanā́d rā́jabʰyo juhvā̀ juhomi \
Sentence: b    śr̥ṇótu mitró aryamā́ bʰágo nas tuvijātó váruṇo dákṣo ám̐śaḥ \\

Verse: 55 
Sentence: a    saptá ŕ̥ṣayaḥ prátihitāḥ śárīre saptá rakṣanti sádam ápramādam \
Sentence: b    saptā́paḥ svápato lokám īyus tátra jāgr̥to ásvapnajau satrasádau ca deváu \\

Verse: 56 
Sentence: a    út tiṣṭʰa brahmaṇaspate devayántas tvemahe \
Sentence: b    úpa prá yantu marútaḥ sudā́nava índra prāśū́r bʰavā sácā \\

Verse: 57 
Sentence: a    prá nūnáṃ bráhmaṇaspátir mántraṃ vadaty uktʰyàm \
Sentence: b    yásminn índro váruṇo mitró aryamā́ devā́ ókām̐si cakriré \\

Verse: 58 
Sentence: a    bráhmaṇaspate tvám asyá yantā́ sūktásya bodʰi tánayaṃ ca jinva \
Sentence: b    víśvaṃ tád bʰadráṃ yád ávanti devā́ br̥hád vadema vidátʰe suvī́rāḥ \
Sentence: c    yá imā́ víśvā \
Sentence: d    viśvákarmā \
Sentence: e    yó naḥ pitā́ \
Sentence: f    ánnapaté nnasya no dehi \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.