TITUS
White Yajur-Veda: Vajasaneyi-Samhita (Madhyandina)
Part No. 36
Previous part

Paragraph: 36 

Verse: 1 
Sentence: a    ŕ̥caṃ vā́caṃ prá padye máno yájuḥ prá padye sā́ma prāṇáṃ prá padye cákṣuḥ śrótraṃ prá padye \
Sentence: b    vā́g ójaḥ saháujo máyi prāṇāpānáu \\

Verse: 2 
Sentence: a    yán me cʰidráṃ cákṣuṣo hŕ̥dayasya mánaso vā́titr̥ṇṇaṃ bŕ̥haspátir me tád dadʰātu \
Sentence: b    śáṃ no bʰavatu bʰúvanasya yás pátiḥ \\

Verse: 3 
Sentence: a    bʰū́r bʰúvaḥ svàḥ \
Sentence: b    tát savitúr váreṇyaṃ bʰárgo devásya dʰīmahi \
Sentence: c    dʰíyo yó naḥ pracodáyat \\

Verse: 4 
Sentence: a    káyā naś citrá ā́ bʰuvad ūtī́ sadā́vr̥dʰaḥ sákʰā \
Sentence: b    káyā śáciṣṭʰayā vr̥tā́ \\

Verse: 5 
Sentence: a    kás tvā satyó mádānāṃ mám̐hiṣṭʰo matsad ándʰasaḥ \
Sentence: b    dr̥ḍʰā́ cid ārúje vásu \\

Verse: 6 
Sentence: a    abʰī́ ṣú ṇaḥ sákʰīnām avitā́ jaritr̥̄ṇā́m \
Sentence: b    śatáṃ bʰavāsy ūtíbʰiḥ \\

Verse: 7 
Sentence: a    káyā tvám na ūtyā́bʰí prá mandase vr̥ṣan \
Sentence: b    kayā́ stotŕ̥bʰya ā́ bʰara \\

Verse: 8 
Sentence: a    índro víśvasya rājati \
Sentence: b    śáṃ no astu dvipáde śáṃ cátuṣpade \\

Verse: 9 
Sentence: a    śáṃ no mitráḥ śáṃ váruṇaḥ śáṃ no bʰavatv aryamā́ \
Sentence: b    śáṃ na índro bŕ̥haspátiḥ śáṃ no víṣṇur urukramáḥ \\

Verse: 10 
Sentence: a    śáṃ no vā́taḥ pavatām̐ śáṃ nas tapatu sū́ryaḥ \
Sentence: b    śáṃ naḥ kánikradad deváḥ parjányo abʰí varṣatu \\

Verse: 11 
Sentence: a    áhāni śáṃ bʰávantu naḥ śám̐ rā́trīḥ práti dʰīyatām \
Sentence: b    śáṃ na indrāgnī́ bʰavatām ávobʰiḥ śáṃ na índrāváruṇā rātáhavyā \
Sentence: c    śáṃ na indrāpūṣáṇā vā́jasātau śám índrāsómā suvitā́ya śáṃ yóḥ \\

Verse: 12 
Sentence: a    śáṃ no devī́r abʰíṣṭaya ā́po bʰavantu pītáye \
Sentence: b    śáṃ yór abʰí sravantu naḥ \\

Verse: 13 
Sentence: a    syonā́ pr̥tʰivi no bʰavānr̥kṣarā́ nivéśanī \
Sentence: b    yáccʰā naḥ śárma saprátʰāḥ \\

Verse: 14 
Sentence: a    ā́po hí ṣṭʰā́ mayobʰúvas tā́ na ūrjé dadʰātana \
Sentence: b    mahé ráṇāya cákṣase \\

Verse: 15 
Sentence: a    yó vaḥ śivátamo rásas tásya bʰājayatehá naḥ \
Sentence: b    uśatī́r iva mātáraḥ \\

Verse: 16 
Sentence: a    tásmā áraṃ gamāma vo yásya kṣáyāya jínvatʰa \
Sentence: b    ā́po janáyatʰā ca naḥ \\

Verse: 17 
Sentence: a    dyáuḥ śā́ntir antárikṣam̐ śā́ntiḥ pr̥tʰivī́ śā́ntir ā́paḥ śā́ntir óṣadʰayaḥ śā́ntiḥ \
Sentence: b    vánaspátayaḥ śā́ntir víśve devā́ḥ śā́ntir bráhma śā́ntiḥ sárvam̐ śā́ntiḥ śā́ntir evá śā́ntiḥ sā́ mā śā́ntir edʰi \\

Verse: 18 
Sentence: a    dŕ̥te dŕ̥m̐ha mā mitrásya mā cákṣuṣā sárvāṇi bʰūtā́ni sám īkṣantām \
Sentence: b    mitrásyāháṃ cákṣuṣā sárvāṇi bʰūtā́ni sámīkṣe \
Sentence: c    mitrásya cákṣuṣā sám īkṣāmahe \\

Verse: 19 
Sentence: a    dŕ̥te dŕ̥m̐ha mā \
Sentence: b    jyók te saṃdŕ̥śi jīvyāsaṃ jyók te saṃdŕ̥śi jīvyāsam \\

Verse: 20 
Sentence: a    námas te hárase śocíṣe námas te astv arcíṣe \
Sentence: b    anyā́m̐s te asmát tapantu hetáyaḥ pāvakó asmábʰyam̐ śivó bʰava \\

Verse: 21 
Sentence: a    námas te astu vidyúte námas te stanayitnáve \
Sentence: b    námas te bʰagavann astu yátaḥ svàḥ samī́hase \\

Verse: 22 
Sentence: a    yáto-yataḥ samī́hase táto no ábʰayaṃ kuru \
Sentence: b    śáṃ naḥ kuru prajā́bʰyó bʰayaṃ naḥ paśúbʰyaḥ \\

Verse: 23 
Sentence: a    sumitriyā́ na ā́pa óṣadʰayaḥ santu +durmitriyā́s tásmai santu yò smā́n dvéṣṭi yáṃ ca vayáṃ dviṣmáḥ \\

Verse: 24 
Sentence: a    tác cákṣur deváhitaṃ purástāc cʰukrám úc carat \
Sentence: b    páśyema śarádaḥ śatáṃ jī́vema śarádaḥ śatám̐ śŕ̥ṇuyāma śarádaḥ śatáṃ prá bravāma śarádaḥ śatám ádīnāḥ syāma śarádaḥ śatáṃ bʰū́yaś ca śarádaḥ śatā́t \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.