TITUS
White Yajur-Veda: Vajasaneyi-Samhita (Madhyandina)
Part No. 38
Previous part

Paragraph: 38 

Verse: 1 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    ā́ dadé dityai rā́snāsi \\

Verse: 2 
Sentence: a    íḍa éhi \
Sentence: b    ádita éhi \
Sentence: c    sárasvatty éhi \
Sentence: d    ásāv éhi \
Sentence: e    ásāv éhi \
Sentence: f    ásāv éhi \\

Verse: 3 
Sentence: a    ádityai rā́snāsīndrāṇyā́ uṣṇī́ṣaḥ \
Sentence: b    pūṣā́si \
Sentence: c    gʰarmā́ya dīṣva \\

Verse: 4 
Sentence: a    aśvíbʰyāṃ pinvasva \
Sentence: b    sárasvatyai pinvasva \
Sentence: c    índrāya pinvasva \
Sentence: d    svā́héndravat \
Sentence: e    svā́héndravat \
Sentence: f    svā́héndravat \\

Verse: 5 
Sentence: a    yás te stánaḥ śaśayó yó mayobʰū́r yó ratnadʰā́ vasuvíd yáḥ sudátraḥ \
Sentence: b    yéna víśvā púṣyasi vā́ryāṇi sárasvati tám ihá dʰā́tave kaḥ \
Sentence: c    urv àntárikṣam ánv emi \\

Verse: 6 
Sentence: a    gāyatráṃ cʰándo si \
Sentence: b    tráiṣṭubʰaṃ cʰándo si \
Sentence: c    dyā́vāpr̥tʰivī́bʰyāṃ tvā pári gr̥hṇāmi \
Sentence: d    antárikṣeṇópa yaccʰāmi \
Sentence: e    índrāśvinā \
Sentence: f    mádʰunaḥ sāragʰásya gʰarmáṃ pāta vásavo yájata vā́ṭ \
Sentence: g    svā́hā sū́ryasya raśmáye vr̥ṣṭivánaye \\

Verse: 7 
Sentence: a    samudrā́ya tvā vā́tāya svā́hā \
Sentence: b    sarirā́ya tvā vā́tāya svā́hā \
Sentence: c    anādʰr̥ṣyā́ya tvā vā́tāya svā́hā \
Sentence: d    apratidʰr̥ṣyā́ya tvā vā́tāya svā́hā \
Sentence: e    avasyáve tvā vā́tāya svā́hā \
Sentence: f    aśimidā́ya tvā vā́tāya svā́hā \\

Verse: 8 
Sentence: a    índrāya tvā vásumate rudrávate svā́hā \
Sentence: b    índrāya tvādityávate svā́hā \
Sentence: c    índrāya tvābʰimātigʰné svā́hā \
Sentence: d    savitré tva r̥bʰumáte vibʰumáte vā́javate svā́hā \
Sentence: e    bŕ̥haspátaye tvā viśvádevyāvate svā́hā \\

Verse: 9 
Sentence: a    yamā́ya tvā́ṅgirasvate pitr̥máte svā́hā \
Sentence: b    svā́hā gʰarmā́ya \
Sentence: c    svā́hā gʰarmáḥ pitré \\

Verse: 10 
Sentence: a    víśvā ā́śā dakṣiṇasád víśvān devā́n áyāḍ ihá \
Sentence: b    svā́hākr̥tasya gʰarmásya mádʰoḥ pibatam aśvinā \\

Verse: 11 
Sentence: a    diví dʰā imáṃ yajñám imám yajñáṃ diví dʰāḥ \
Sentence: b    svā́hāgnáye yajñíyāya śáṃ yájurbʰyaḥ \\

Verse: 12 
Sentence: a    áśvinā gʰarmáṃ pātam̐ hā́rdvānam áhar divā́bʰir ūtíbʰiḥ \
Sentence: b    tantrāyíṇo námo dyā́vāpr̥tʰivī́bʰyām \\

Verse: 13 
Sentence: a    ápātām aśvínā gʰarmám ánu dyā́vāpr̥tʰivī́ amam̐sātām \
Sentence: b    iháivá rātáyaḥ santu \\

Verse: 14 
Sentence: a    iṣé pinvasva \
Sentence: b    ūrjé pinvasva \
Sentence: c    bráhmaṇe pinvasva \
Sentence: d    kṣatrā́ya pinvasva \
Sentence: e    dyā́vāpr̥tʰivī́bʰyāṃ pinvasva \
Sentence: f    dʰármāsi sudʰárma \
Sentence: g    ámeny asmé nr̥mṇā́ni dʰāraya bráhma dʰāraya kṣatrám dʰāraya víṣaṃ dʰāraya \\

Verse: 15 
Sentence: a    svā́hā pūṣṇé śárase \
Sentence: b    svā́hā grā́vabʰyaḥ \
Sentence: c    svā́hā pratiravébʰyaḥ \
Sentence: d    svā́hā pitŕ̥bʰya ūrdʰvábarhirbʰyo gʰarmapā́vabʰyaḥ \
Sentence: e    svā́hā dyā́vāpr̥tʰivī́bʰyām \
Sentence: f    svā́hā víśvebʰyaḥ devébʰyaḥ \\

Verse: 16 
Sentence: a    svā́hā rudrā́ya rudráhūtaye \
Sentence: b    svā́hā sáṃ jyótiṣā jyótiḥ \
Sentence: c    áhaḥ ketúnā juṣatām̐ sujyótir jyótiṣā svā́hā \
Sentence: d    rā́triḥ ketúnā juṣatām̐ sujyótir jyótiṣā svā́hā \
Sentence: e    mádʰu hutám índratame agnā́v aśyā́ma te deva gʰárma námas te astu mā́ mā him̐sīḥ \\

Verse: 17 
Sentence: a    abʰī̀máṃ mahimā́ dívaṃ vípro babʰūva saprátʰāḥ \
Sentence: b    utá śrávasā pr̥tʰivī́m̐ sám̐ sīdasva mahā́m̐ asi rócasva devavī́tamaḥ \\
Sentence: c    [ví dʰūmám agne aruṣáṃ miyedʰya sr̥já praśasta darśatám] \\

Verse: 18 
Sentence: a    yā́ te gʰarma divyā́ śúg yā́ gāyatryā́m̐ havirdʰā́ne \
Sentence: b    sā́ ta ā́ pyāyatāṃ níṣṭyāyatāṃ tásyai te svā́hā \
Sentence: c    yā́ te gʰarmāntárikṣe śúg yā́ triṣṭúbʰy ā́gnīdʰre \
Sentence: d    sā́ ta ā́ pyāyatāṃ níṣṭyāyatāṃ tásyai te svā́hā \
Sentence: e    yā́ te gʰarma pr̥tʰivyā́m̐ śúg yā́ jágatyām̐ sadasyā̀ \
Sentence: f    sā́ ta ā́ pyāyatāṃ níṣṭyāyatāṃ tásyai te svā́hā \\

Verse: 19 
Sentence: a    kṣatrásya tvā paráspāya bráhmaṇas tanvàṃ pāhi \
Sentence: b    víśas tvā dʰármaṇā vayám ánu krāmāma suvitā́ya návyase \\

Verse: 20 
Sentence: a    cátuḥsraktir nā́bʰir r̥tásya saprátʰāḥ sá no viśvā́yuḥ saprátʰāḥ sá naḥ sarvā́yuḥ saprátʰāḥ \
Sentence: b    ápa dvéṣo ápa hváro nyávratasya saścima \\

Verse: 21 
Sentence: a    gʰármaitát te púrīṣaṃ téna várdʰasva cā́ ca pyāyasva \
Sentence: b    vardʰiṣīmáhi ca vayám ā́ ca pyāsiṣīmahi \\

Verse: 22 
Sentence: a    ácikradad vŕ̥ṣā hárir mahā́n mitró na darśatáḥ \
Sentence: b    sám̐ sū́ryeṇa didyutad udadʰír nidʰíḥ \\

Verse: 23 
Sentence: a    sumitriyā́ na ā́pa óṣadʰayaḥ santu +durmitriyā́s tásmai santu yò smā́n dvéṣṭi yáṃ ca vayáṃ dviṣmáḥ \\

Verse: 24 
Sentence: a    úd vayáṃ támasas pári svàḥ páśyanta úttaram \
Sentence: b    deváṃ devatrā́ sū́ryam áganma jyótir uttamám \\

Verse: 25 
Sentence: a    édʰo sy edʰiṣīmáhi \
Sentence: b    samíd asi téjo si téjo máyi dʰehi \\

Verse: 26 
Sentence: a    yā́vatī dyā́vāpr̥tʰivī́ yā́vac ca saptá síndʰavo vitastʰiré \
Sentence: b    távantam indra te gráham ūrjā́ gr̥hṇāmy ákṣitaṃ máyi gr̥hṇāmy ákṣitam \\

Verse: 27 
Sentence: a    máyi tyád indriyáṃ br̥hán máyi dákṣo máyi krátuḥ \
Sentence: b    gʰarmás triśúg ví rājati virā́jā jyótiṣā sahá bráhmaṇā téjasā sahá \\

Verse: 28 
Sentence: a    páyaso réta ā́bʰr̥taṃ tásya dóham aśīmahy úttarām-uttarām̐ sámām \
Sentence: b    tvíṣaḥ saṃvŕ̥k krátve dákṣasya te suṣumṇásya te suṣumṇāgnihutáḥ \
Sentence: c    índrapītasya prajā́patibʰakṣitasya mádʰumata úpahūta úpahūtasya bʰakṣayāmi \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.