TITUS
Avestan Corpus
Part No. 97
Previous part

Chapter: 3 
Paragraph: 1 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. paoirīm. aiŋ́hā̊.1 zəmō. ṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. nā. aṣ̌auua. fraiiat̰.
Verse: e          spitama. zaraϑuštra.
Verse: f       aēsmō.zastō. barəsmō.zastō.
Verse: g       gao.zastō.2 hāuuanō.zastō.
Verse: h       āxštaēδa.3 daēnaiia. vaca. framrū.4
Verse: i       miϑrəmca. vouru.gaoiiaoitīm. jaiδiią.5
Verse: j          rāmaca. xvāstrəm.

Paragraph: 2 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. bitīm. aiŋ́hā̊. zəmō. ṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. nā. aṣ̌auua. nmānəm. uzdasta.1
Verse: e       āϑrauuat̰. gaomauuat̰.
Verse: f       nāiriuuat̰.2 puϑrauuat̰.
Verse: g       huuąϑβauuat̰.3

Paragraph: 3 
Verse: a    āat̰. pascaēta: ahe. nmānahe.
Verse: b       frapiϑβō. gāuš.
Verse: c       frapiϑβō. aṣ̌əm.
Verse: d       frapiϑβō. vāstrəm.1
Verse: e       frapiϑβō. spā.
Verse: f       frapiϑβō. nāirika.
Verse: g       frapiϑβō. apərənāiiūkō.
Verse: h       frapiϑβō. ātarš.
Verse: i       frapiϑβō. vīspąm. hujiiāitiš.2

Paragraph: 4 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. ϑritīm. aiŋ́hā̊. zəmō. ṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. kāraiieiti.1
Verse: e          spitama. zaraϑuštra.
Verse: f       yauuanąmca. vāstranąmca.
Verse: g       uruuaranąmca. xvarəϑō.bairiianąm.2
Verse: h    yat̰. vā. anāpəm. āi. āpəm. kərənaoiti.
Verse: i    3yat̰. vā. āpəm. āi. anāpəm. kərənaoiti.3

Paragraph: 5 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. tūirīm. aiŋ́hā̊. zəmō. ṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. us.zīzəṇti.1
Verse: e       pasuuasca.2 staorāca.

Paragraph: 6 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. puxδəm. aiŋ́hā̊. zəmō. ṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. maēzəṇti.1
Verse: e       pasuuasca. staorāca.2

Paragraph: 7 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. paoirīm. aiŋ́hā̊. zəmō. aṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. arəzūrahe. grīuuaiia.1
Verse: e          spitama. zaraϑuštra.
Verse: f    yat̰. ahmiia. daēuua.2 haṇduuarəṇti.3 drujō. haca. gərəδāδa.4

Paragraph: 8 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. bitīm. aiŋ́hā̊. zəmō. aṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. sairi.1 nikaṇte.2
Verse: e       spānasca.3 irista.4
Verse: f       naraēca.5 irista.4

Paragraph: 9 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. ϑritīm. aiŋ́hā̊. zəmō. aṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. daxma.1 uzdaēza. kiriieiṇte.2
Verse: e       yahmiia. narō. irista. niδaiieiṇte.3

Paragraph: 10 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. tūirīm. aiŋ́hā̊. zəmō. aṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. bauuaiṇti. aŋrō.mainiiauuanąm. gərəδąm.

Paragraph: 11 
Verse: a    dātarə. gaēϑanąm. astuuaitinąm. aṣ̌āum:
Verse: b    kuua. puxδəm. aiŋ́hā̊. zəmō. aṣ̌āištəm:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. narš. aṣ̌aonō.
Verse: e          spitama. zaraϑuštra.
Verse: f       nāirikaca.1 apərənāiiūkasca. varaiϑīm.2 paṇtąm. azōit̰.
Verse: g       pąsnuuā̊ŋhəm.3 hikuuā̊ŋhəm. jarəzīm.4 baraiti. vācim.

Paragraph: 12 
Verse: a    dātarə. gaēϑanąm. astuuaitinąm. aṣ̌āum:
Verse: b    kō.1 paoirīm. imąm. ząm. mazišta. xṣ̌naoma. xṣ̌nāuuaiieiti:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. uskəṇti.2
Verse: e       yahmiia. sairi.3 nikaṇte.4
Verse: f          spānasca.5 irista.
Verse: g          naraēca.6 irista.

Paragraph: 13 
Verse: a    dātarə. gaēϑanąm. astuuaitinąm. aṣ̌āum.
Verse: b    kō. bitīm. imąm. ząm. mazišta.1 xṣ̌naoma. xṣ̌nāuuaiieiti:2
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. daxma.3 uzdaēza. vīkaṇti.4
Verse: e       yahmiia. narō. irista. niδaiieiṇte.5

Paragraph: 14 
Verse: a    mā. ciš. barō. aēuuō. yat̰. iristəm:
Verse: b    āat̰. yezi. ṣ̌ē. barāt̰.1 aēuuō. yat̰. iristəm.
Verse: c       upa. vā. nasuš. raēϑβāt̰.
Verse: d          nā̊ŋhanat̰. haca.
Verse: e          caṣ̌manat̰. haca.
Verse: f          hizumat̰.2 haca.
Verse: g          paitiš.xvarənāδa.3 frauuāxṣ̌at̰.4 haca.
Verse: h          fraṣ̌umakat̰.5 haca.
Verse: i    tē:6 aēṣ̌ąm. paiti. sruiie.7 aēṣ̌a.8 druxš. yā. nasuš. upa.duuąsaiti:9
Verse: j       aiiaoždiia.10 pascaēta. bauuaiṇti.
Verse: k          yauuaēca. yauuaētātaēca.

Paragraph: 15 
Verse: a    dātarə. gaēϑanąm. astuuaitinąm. aṣ̌āum.
Verse: b    kuua. aētahe. narš. gātuš. aŋhat̰. yat̰. iristō.kaṣ̌ahe:
Verse: c    āat̰. mraot̰. ahurō. mazdā̊:
Verse: d    yat̰. aŋhat̰. aiŋ́hā̊.1 zəmō.
Verse: e          vī.āpō.təməmca.2
Verse: f          vī.uruuarō.təməmca.
Verse: g          yaoždātō.zəmōtəməmca.
Verse: h          huškō.zəmōtəməmca.3
Verse: i       kambištəmca.4 aēte. paϑā̊. fraiiąn.
Verse: j          pasuuasca. staorāca.5
Verse: k          ātrəmca.6 ahurahe. mazdā̊.7
Verse: l          barəsmaca. aṣ̌aiia. frastarətəm.8
Verse: m          narəmca. yim. aṣ̌auuanəm.

Paragraph: 16 
Verse: a    dātarə. gaēϑanąm. astuuaitinąm. aṣ̌āum.
Verse: b    cuuat̰. drājō. haca. āϑrat̰.
Verse: c    cuuat̰. drājō. haca. apat̰.
Verse: d    cuuat̰. drājō.1 haca. barəsmən.2 frastairiiāt̰.
Verse: e    cuuat̰. drājō. haca.1 nərəbiiō.3 aṣ̌auuabiiō.

Paragraph: 17 
Verse: a    āat̰. mraot̰. ahurō. mazdā̊:
Verse: b       ϑrisata.gāim. haca. āϑrat̰.
Verse: c       ϑrisata.gāim. haca. apat̰.
Verse: d       ϑrisata.gāim. haca. barəsmən. frastairiiāt̰.
Verse: e       ϑrigāim. haca. nərəbiiō. aṣ̌auuabiiō.

Paragraph: 18 
Verse: a    aētaδa.1 hē. aēte. mazdaiiasna. aiŋ́hā̊.2 zəmō. pairi.daēząn.3 pairi.daēzaiiąn:4
Verse: b    xvarəϑaēibiiō. pascaēta. āstaiiaṇta. aēte. yōi.5 mazdaiiasna.
Verse: c    vastraēibiiō.6 pascaēta. āstaiiaṇta. aēte. yōi.5 mazdaiiasna.

Paragraph: 19 
Verse: a    draējištōtəmaēṣ̌uuaca.1 niuruzdōtəmaēṣ̌uuaca.2 aētā̊. xvarəϑā̊. xvaratu.3
Verse: b       aētā̊. vastrā̊.4 vaŋhatu.
Verse: c    vīspəm. ā. ahmāt̰.
Verse: d       yat̰. hanō.5 vā. zaururō.6 vā. pairištā.xṣ̌udrō. vā.7 bauuāt̰.8

Paragraph: 20 
Verse: a    āat̰. yat̰. hanō.1 vā. zaururo.2 vā. pairištā.xṣ̌udrō.3 vā. bauuāt̰.4
Verse: b    aojištəmca. dim. pascaēta.5 mazdaiiasna.
Verse: c       taṇcištəmca.6 vaēδiiōtəməmca.7
Verse: d       upa.maitīm.8 barəzaŋhąm.9 pąstō.fraϑaŋhəm.10 hē. kamərəδəm. vīnāϑaiiən.
Verse: e    aš.xvarətəmaēibiiō.11 spəṇtō.mainiiauuanąm. dāmanąm. kərəfš.xvārąm.12
Verse: f       kərəfš. paiti. nisrinuiiāt̰.13
Verse: g          vaiiąm. kahrkāsąm.14
Verse: h             uitiiaojanō:15
Verse: i    auuā̊. hīm.16 paiti. miϑnāiti.17
Verse: j       vīspəm. dušmatəmca. dužūxtəmca. dužuuarštəmca.

Paragraph: 21 
Verse: a    yezica. hē. aniia. aγa. š́iiaoϑna. frauuaršta.
Verse: b       paitita.1 hē. ciϑa.
Verse: c    āat̰. yezi. ṣ̌ē. aniia. aγa. š́iiaoϑna. nōit̰. frauuaršta.
Verse: d       paititəm.2 ahe. narš.
Verse: e          yauuaēca. yauuaētātaēca.

Paragraph: 22 
Verse: a    dātarə. gaēϑanąm. astuuaitinąm. aṣ̌āum.
Verse: b    kō. ϑritīm. imąm. ząm. mazišta. xṣ̌naoma. xṣ̌nāuuaiieiti:1
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. vīkəṇte.2 aŋrō.mainiiauuanąm. gərəδąm.

Paragraph: 23 
Verse: a    dātarə. gaēϑanąm. astuuaitinąm. aṣ̌āum.
Verse: b    kō.1 tūirīm. imąm. ząm. mazišta. xṣ̌naoma. xṣ̌nāuuaiieiti:
Verse: c    āat̰. mraot̰. ahurō. mazdā̊:
Verse: d    yat̰. bā. paiti. fraēštəm. kāraiieiti.2
Verse: e          spitama. zaraϑuštra.
Verse: f       yauuanąmca. vāstranąmca.
Verse: g       uruuaranąmca. xvarəϑōbairiianąm.3
Verse: h    yat̰. vā. anāpəm. āi. āpəm. kərənaoiti.
Verse: i    yat̰. vā. āpəm. āi. anāpəm. kərənaoiti.

Paragraph: 24 
Verse: a    nōit̰. zī. īm. zā̊. ṣ̌ā̊.
Verse: b       yā.1 darəγa. akaršta.2 saēta.3
Verse: c       yā. karṣ̌iia. karṣ̌iuuata.
Verse: d          aibiš.4 tat̰. vaŋhə̄uš. aiβi.ṣ̌ōiϑna.5
Verse: e    iδa.6 carāiti.7 huraoδa.8
Verse: f       yā. darəγa. apuϑra. aēti.9
Verse: g          aibiš.10 tat̰. vaŋhə̄uš.11 arṣ̌ānō.

Paragraph: 25 
Verse: a    yō. imąm. ząm.1 aiβi.vərəziieiti.2
Verse: b          spitama. zaraϑuštra.
Verse: c       hāuuōiia. bāzuuō.3 daṣ̌inaca.
Verse: d       daṣ̌ina. bāzuuō. haoiiaca.4
Verse: e    upa. hē. gaonəm. baraiti.5
Verse: f       mąnaiiən. ahe.
Verse: g          yaϑa. nā. friiō. friiāi. vaṇtaoe.6
Verse: h                starəta.7 gātuš. saiiamanō.8
Verse: i             puϑrəm. vā. gaonəm. vā. auui. auua.baraiti.

Paragraph: 26 
Verse: a    yō. imąm. ząm. aiβi.vərəziieiti.1
Verse: b          2spitama. zaraϑuštra.2
Verse: c       hāuuōiia. bāzuuō. daṣ̌inaca.
Verse: d       daṣ̌ina. bāzuuō. haoiiaca.
Verse: e    āat̰. aoxta. īm. zā̊:
Verse: f       nara.
Verse: g    yō. mąm.3 aiβi.vərəziieihi.4
Verse: h       hāuuōiia. bāzuuō. daṣ̌inaca.
Verse: i       daṣ̌ina. bāzuuō. haoiiaca.

Paragraph: 27 
Verse: a    1bāδa. iδa. āfrasāne.2 daŋhubiiō.1
Verse: b    bāδa. iδa.3 aēni.4 bərəϑi.5
Verse: c    vīspā̊. xvarəṇtīš.6 para.barąn.7
Verse: d       hąmbərəϑβąm.8 parō. yauuahe.

Paragraph: 28 
Verse: a    yō. imąm. ząm. nōit̰. aiβi.vərəziieiti.
Verse: b          spitama. zaraϑuštra.
Verse: c       hāuuōiia. bāzuuō. daṣ̌inaca.
Verse: d       daṣ̌ina. bāzuuō. haoiiaca.
Verse: e    āat̰. aoxta. īm.1 zā̊:
Verse: f       nara.2
Verse: g    yō.3 mąm.4 nōit̰.5 aiβi.vərəziieihi.6
Verse: h       hāuuōiia. bāzuuō. daṣ̌inaca.
Verse: i       daṣ̌ina. bāzuuō. haoiiaca.7

Paragraph: 29 
Verse: a    bāδa. iδa.1 hištahe.2
Verse: b       aniiehe. duuarə. sraiianō.3
Verse: c       xvarəṇtīš.4 pərəsəmnaēṣ̌uca:5
Verse: d    bāδa. ϑβąm. tarasca. ā̊ŋhānō. srasciṇtīš.6 xvarəϑā̊. bairiieiṇte.7
Verse: e    tē. ābiia.8 bairiieiṇte.9
Verse: f       yaēṣ̌ąm. dim. frāiiō. vohunąm.

Paragraph: 30 
Verse: a    dātarə. gaēϑanąm. astuuaitinąm. aṣ̌āum.
Verse: b    kat̰. asti. daēnaiiā̊. māzdaiiasnōiš. uruϑβarə:
Verse: c    āat̰. mraot̰. ahurō. mazdā̊.
Verse: d    yat̰. uγrəm. paiti. yaokaršti.1
Verse: e          spitama. zaraϑuštra.

Paragraph: 31 
Verse: a       yō. yaom. kāraiieiti.1
Verse: b    hō. aṣ̌əm. kāraiieiti:
Verse: c    hō. daēnąm. māzdaiiasnīm. frauuāza.2 vazaite:3
Verse: d    hō. imąm. daēnąm. māzdaiiasnīm. frapinaoiti.
Verse: e       satəm. paitištanąm.4
Verse: f       hazaŋrəm. paiti.daranąm.5
Verse: g       baēuuarə. paiti. yasnō.kərəitinąm.6

Paragraph: 32 
Verse: a       yat̰. yauuō. daiiāt̰.
Verse: b    āat̰. daēuua. xvīsən.1
Verse: c       yat̰. suδuš.2 daiiāt̰.
Verse: d    āat̰. daēuua. tusən.3
Verse: e       yat̰. pištrō. daiiāt̰.
Verse: f    āat̰. daēuua. uruϑən.4
Verse: g       yat̰. guṇdō.5 daiiāt̰.
Verse: h    āat̰. daēuua. pərəδən:6
Verse: i    iδa.7 miϑnāt̰.8 daēuua. aipi. jaiṇti.9
Verse: j       nmāne. aiŋ́hāi.10 guṇdaiiāi.11
Verse: k          zafarə.12 tafsąn. aiia. masō.
Verse: l          hąm.uruuīsuuā̊ŋhō.13 sadaiieiti.14
Verse: m       15yat̰. yauuō. pouruš. bauuāt̰.15

Paragraph: 33 
Verse: a    aδa.1 mąϑrəm. taδa.2 mairiiāt̰:
Verse: b    naēciš. axvarəṇtąm. tuua.3
Verse: c       nōit̰. uγrąm. aṣ̌aiiąm.4
Verse: d       nōit̰. uγrąm. vāstriiąm.5
Verse: e       6nōit̰. uγrąm. puϑrōištīm:6
Verse: f    xvāṣ̌aiia. zī. vīspō. aŋhuš. astuuā̊. juuaiṇti.7
Verse: g       axvāṣ̌e.8 framiriieiti.9

Paragraph: 34 
Verse: a    dātarə. gaēϑanąm. astuuaitinąm. aṣ̌āum.
Verse: b    kō. puxδəm. imąm. ząm. mazišta.1 xṣ̌naoma. xṣ̌nāuuaiieiti:1
Verse: c    āat̰. mraot̰. ahurō. mazdā̊:
Verse: d    2yat̰. bā. paiti.
Verse: e          spitama. zaraϑuštra.
Verse: f       3aiŋ́hā̊. zəmō.3 naire. aṣ̌aone. vərəziiāt̰.4 aṣ̌aiia.5 daδāiti.6

Paragraph: 35 
Verse: a    yat̰. bā.1 paiti.
Verse: b          spitama. zaraϑuštra.
Verse: c       aiŋ́hā̊. zəmō. 2naire. aṣ̌aone.2 vərəziiāt̰.3 aṣ̌aiia. vaŋhuiia.4 nōit̰. daδāiti.5
Verse: d    auui.6 təm. spaiiāt̰. spəṇtaiiā̊. ārmatōiš. təmō.7
Verse: e       āca. vaēṣ̌ō.
Verse: f       āca. acištəm. āca. ahūm. ā.8
Verse: g       vīspaca. auui. tiγra. nimata.9

Paragraph: 36 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰. aiŋ́hā̊. zəmō. nikaṇte.1
Verse: c       spānasca.2 irista.3
Verse: d       naraēca.4 irista.3
Verse: e          naēməm. yārə.drājō. anuskaṇte.5
Verse: f    kā.hē. asti. ciϑa:
Verse: g    āat̰. mraot̰. ahurō. mazdā̊:
Verse: h    paṇca. sata. upāzananąm. upāzōit̰. aspahe. aštraiia.
Verse: i       paṇca. sata. sraoṣ̌ō.caranaiia.

Paragraph: 37 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰.1 aiŋ́hā̊. zəmō. nikaṇte.
Verse: c       spānasca. irista.
Verse: d       naraēca. irista.
Verse: e          yārə.drājō. anuskaṇte.
Verse: f    kā. hē. asti. ciϑa:
Verse: g    āat̰. mraot̰. ahurō. mazdā̊:
Verse: h    hazaŋrəm. upāzananąm. upāzōit̰. aspahe. aštraiia.
Verse: i       hazaŋrəm. sraoṣ̌ō.caranaiia.

Paragraph: 38 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰. aiŋ́hā̊. zəmō. nikaṇte.1
Verse: c       spānasca. irista.
Verse: d       naraēca. irista.
Verse: e          biiārə.drājō. anuskaṇte.
Verse: f    kā. hē. asti. ciϑa.
Verse: g    kā. hē. asti. āpərətiš.
Verse: h    2kat̰. hē. asti. yaoždāϑrəm.2

Paragraph: 39 
Verse: a    1āat̰. mraot̰. ahurō. mazdā̊:
Verse: b    nauua. hē. asti. ciϑa.
Verse: c    nauua. hē. asti. āpərətiš.
Verse: d    nōit̰. hē. asti. yaoždāϑrəm.
Verse: e       anāpərəϑa. haca. š́iiaoϑna.
Verse: f          yauuaēca. yauuaētātaēca.

Paragraph: 40 
Verse: a    kuua. aēuua:1
Verse: b       yezi. aŋhat̰. āstūtō.2 vā. aiβisrauuanō. vā. daēnąm. māzdaiiasnīm.
Verse: c    āat̰. yezi. aŋhat̰. anāstūtō.3 vā. anaiβi.srauuanō. vā. daēnąm. māzdaiiasnīm:
Verse: d       aētācit̰.4 aēibiiō. spā̊ŋhaite.5
Verse: e          āstauuanaēibiiō.6 daēnąm. māzdaiiasnīm.
Verse: f          əuuərəzənbiiō.7 pascaēta. araϑβiia. š́iiaoϑna.

Paragraph: 41 
Verse: a    spaiieite.1 zī.
Verse: b          spitama. zaraϑuštra.
Verse: c       daēna. māzdaiiasniš.2 narš. āstauuanahe.3 baṇdəm.
Verse: d       spaiieite. draoṣ̌əm.4
Verse: e       spaiieite. aṣ̌auuaγnīm.
Verse: f       spaiieite. nasuspaēm.
Verse: g       spaiieite. anāpərəϑəm. š́iiaoϑnəm.
Verse: h       spaiieite. dərəzānō.pərətəm.5 pārəm.
Verse: i       spaiieite. vīspa. tā. š́iiaoϑna.
Verse: j          yā. cica. vərəziieiti.6

Paragraph: 42 
Verse: a    mąnaiiən. ahe.    
Verse: b          spitama. zaraϑuštra.
Verse: c       daēna. māzdaiiasniš. narš. aṣ̌aonō. framərəzaiti.1
Verse: d          vīspəm. dušmatəmca. dužūxtəmca. dužuuarštəmca.
Verse: e    yaϑa. vātō. dərəzi.takaϑrō.2 ϑβāṣ̌əm. daṣ̌ināt̰. pairi. framərəzōit̰:3

Verse: f    [vohu.4 iδa. zaraϑuštra.5
Verse: g       huuarštəm. š́iiaoϑnəm. vərəzimnəm.6
Verse: h    vaŋuhi.7 daēna. māzdaiiasniš.
Verse: i       pərənāiiuš.8 ciϑąm. ϑβərəsaiti.9]

Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.::



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.