TITUS
Avestan Corpus
Part No. 107
Previous part

Chapter: 13 
Paragraph: 1 
Verse: a    kat̰. tat̰. dąma.1 spəṇtō.mainiiauua.
Verse: b       aētaŋhąm. dāmanąm.
Verse: c          yōi. həṇti. spəṇtahe. mainiiə̄uš.2 dąma. dātəm.
Verse: d    vīspəm. paiti. uṣ̌ā̊ŋhəm. ā. hū.3 vaxṣ̌at̰.4
Verse: e       hazaŋraja.5 aŋrō. mainiiuš.6 paiti.jasaiti.

Paragraph: 2 
Verse: a    āat̰. mraot̰. ahurō. mazdā̊.
Verse: b       spānəm. sīždrəm.1 uruuīsarəm.2
Verse: c          yim. vaŋhāparəm.
Verse: d          yim. maš́iiāka. auui. dužuuacaŋhō. dužakəm. nąma. aojaite:3
Verse: e    aētat̰. tat̰. dąma. spəṇtō. mainiiauua.
Verse: f       aētaŋhąm.4 dāmanąm.
Verse: g          yōi. həṇti. spəṇtahe. mainiiə̄uš.5 dąma. dātəm.
Verse: h    vīspəm. paiti. uṣ̌ā̊ŋhəm. ā. hū.5 vaxṣ̌at̰.6
Verse: i       hazaŋraja.7 aŋrō.mainiiuš.8 paiti.jasaiti.

Paragraph: 3 
Verse: a    yasca.1 dim. janat̰.2
Verse: b          spitama. zaraϑuštra.
Verse: c       spānəm. sīždrəm.3 uruuīsarəm.4
Verse: d       yim. vaŋhāparəm.
Verse: e       yim. maš́iiāka. auui. dužuuacaŋhō. dužakəm. nąma. aojaite.5
Verse: f    nauua.naptiiaēcit̰.6 hē. uruuānəm. para.mərəṇcaite.7
Verse: g       yaēṣ̌ąm. aŋhat̰. dužāpīm.8 cinuuat̰.pərətūm.
Verse: h       yō.9 nōit̰. juuō. sraoṣ̌iiąm. uzuuərəziieiti.

Paragraph: 4 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. janat̰. spānəm. sīždrəm. uruuīsarəm.
Verse: c       yim. vaŋhāparəm.
Verse: d       yim. maš́iiāka. auui. dužuuacaŋhō. dužakəm.1 nąma. aojaite.2
Verse: e    kā. hē. asti. ciϑa:
Verse: f    āat̰. mraot̰. ahurō. mazdā̊:
Verse: g       hazaŋrəm. upāzananąm. upāzōit̰. aspahe. aštraiia.
Verse: h       hazaŋrəm. sraoṣ̌ō.caranaiia.

Paragraph: 5 
Verse: a    kat̰. tat̰. dąma. aŋrō.mainiiauua.1
Verse: b       aētaŋhąm. dāmanąm.
Verse: c          yōi. həṇti. aŋrahe. mainiiə̄uš. dąma. dātəm.
Verse: d    vīspəm. paiti. uṣ̌ā̊ŋhəm. ā. hū. vaxṣ̌at̰.
Verse: e       hazaŋraja.2 spəṇtō.mainiiūm.3 paiti.jasaiti.

Paragraph: 6 
Verse: a    āat̰. mraot̰. ahurō. mazdā̊:
Verse: b       daēum. yim. zairimiiaŋurəm.1 nąma.
Verse: c             spitama. zaraϑuštra.
Verse: d          yim. maš́iiāka. auui. dužuuacaŋhō. zairimiiākəm. nąma. aojaite:2
Verse: e    aētat̰. tat̰. dąma. aŋrō.mainiiauua.3
Verse: f       aētaŋhąm. dāmanąm.
Verse: g          yōi. həṇti. aŋrahe. mainiiə̄uš. dąmadātəm.
Verse: h    vīspəm. paiti. uṣ̌ā̊ŋhəm. ā. hū. vaxṣ̌at̰.
Verse: i       hazaŋraja. spəṇtō.mainiiūm.4 paiti.jasaiti.

Paragraph: 7 
Verse: a    yasca. dim. janat̰.
Verse: b          spitama. zaraϑuštra.
Verse: c       daēum. yim. zairimiiaŋurəm.1
Verse: d          yim. maš́iiāka. auui. dužuuacaŋhō. zairimiiākəm. nąma. aojaite.2
Verse: e    patitəm.3 hē. manō. aŋhat̰.
Verse: f       patitəm.3 vacō.
Verse: g       patitəm.3 š́iiaoϑnəm.
Verse: h    uzuuarštəm. hē. manō. aŋhat̰.
Verse: i       uzuuarštəm. vacō.
Verse: j       uzuuarštəm. š́iiaoϑnəm.

Paragraph: 8 
Verse: a    yō.1 aētaēṣ̌ąm. sūnąm. jaiṇti.2
Verse: b       yim. pasuš.hauruuąmca. višhauruuąmca.
Verse: c       3vohunazgąmca. draxtō.hunaranąmca.3
Verse: d    xraosiiō.taraca.4 nō.ahmāt̰. voiiō.taraca.5
Verse: e       huuō.6 uruua. parāiti.7
Verse: f          parō.asnāi. aŋuhe.8
Verse: g             yaϑa. vəhrkō. vaiiōi.9 tūite.10
Verse: h                dramne. barəzište.11 razūire.12

Paragraph: 9 
Verse: a    nōit̰. hē. aniiō. uruua. haom. uruuānəm. paiti. irista.1 bązaiti.
Verse: b       xraosiiāca.2 voiiaca.3 aŋuhe.4
Verse: c    naēδa. spāna. pəṣ̌u.pāna.5 paiti. irista.6 bązaiti.
Verse: d       xraosiiāca.7 voiiaca.3 aŋuhe.4

Paragraph: 10 
Verse: a    yō. sūne.1 pištrəm. jaiṇti.
Verse: b          yim. pasuš.hauruue.
Verse: c       us. vā. hē. gaoṣ̌əm.2 ϑβərəsaiti.
Verse: d       apa. vā. hē. paiδiiąm. kərəṇtaiti.3
Verse: e    yasə. tat̰.4 paiti. auuā̊. gaēϑā̊.
Verse: f       tāiiuš.5 vā. vəhrkō. vā.
Verse: g          apaiti.busti.6 haca. gaēϑābiiō. para.baraiti.
Verse: h    dasa.7 aδāt̰. paiti. afṣ̌ə̄.8 cikaiiat̰:
Verse: i    cikaiiat̰. sūnahe.9 raēṣ̌ō.10
Verse: j       baoδō.varštahe. ciϑaiia.11

Paragraph: 11 
Verse: a    yō.1 sūne.2 pištrəm. jaiṇti.
Verse: b          yim. viš.hauruue.3
Verse: c       us. vā. hē.4 gaoṣ̌əm.5 ϑβərəsaiti.
Verse: d       apa. vā. hē. paiδiiąm. kərəṇtaiti.
Verse: e    yasə. tat̰. paiti. auuā̊. vīsō.6
Verse: f       tāiiuš.7 vā. vəhrkō. vā.
Verse: g          apaiti.busti. haca. vīžibiiō. para.baraiti.
Verse: h    dasa. aδāt̰. paiti. afṣ̌ə̄.8 cikaiiat̰:
Verse: i    cikaiiat̰. sūnahe. raēṣ̌ō.9
Verse: j       baoδō.varštahe. ciϑaiia.

Paragraph: 12 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. jaiṇti.
Verse: c       yim. pasuš.haurum.
Verse: d          frazābaoδaŋhəm. snaϑəm. vīkərət̰.uštānəm.
Verse: e    kā. hē. asti. ciϑa:
Verse: f    āat̰. mraot̰. ahurō. mazdā̊:
Verse: g       ašta. sata. upāzananąm. upāzōit̰. aspahe. aštraiia.
Verse: h       ašta. sata. sraoṣ̌ō.caranaiia.

Paragraph: 13 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. jaiṇti.
Verse: c       yim. viš.haurum.
Verse: d          frazābaoδaŋhəm. snaϑəm. vīkərət̰.uštānəm.
Verse: e    kā. hē. asti. ciϑa:
Verse: f    āat̰. mraot̰. ahurō. mazdā̊:
Verse: g       hapta. sata. upāzananąm. upāzōit̰. aspahe. aštraiia.
Verse: h       hapta. sata. sraoṣ̌ō.caranaiia.

Paragraph: 14 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. jaiṇti.
Verse: c       yim. vohunazgəm.1
Verse: d          frazābaoδaŋhəm. snaϑəm. vīkərət̰.uštānəm.
Verse: e    kā. hē. asti. ciϑa:
Verse: f    āat̰. mraot̰. ahurō. mazdā̊:
Verse: g       xṣ̌uuaš. sata. upāzananąm. upāzōit̰. aspahe. aštraiia.
Verse: h       xṣ̌uuaš. sata. sraoṣ̌ō.caranaiia.

Paragraph: 15 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. jaiṇti.
Verse: c       yim. taurunəm.
Verse: d          frazābaoδaŋhəm. snaϑəm. vīkərət̰.uštānəm.
Verse: e    kā. hē. asti. ciϑa:
Verse: f    āat̰. mraot̰. ahurō. mazdā̊:
Verse: g       paṇca. sata. upāzananąm. upāzōit̰. aspahe. aštraiia.
Verse: h       paṇca. sata. sraoṣ̌ō.caranaiia.

Paragraph: 16 
Verse: a    hāu. jažāuš.1 hāu. vīzāuš.2 hāu.3 sukurənahe.4
Verse: b       hāu. urupiš. tiži.dātahe.5
Verse: c       hāu. raopiš.6 yaonō.xvatahe.7
Verse: d       hāu. vīspanąm. spəṇtō.mainiiauuanąm. spaciϑranąm.8
Verse: e          aniia. udra. upāpa.

Paragraph: 17 
Verse: a    dātarə. gaēϑanąm. astuuaitinąm. aṣ̌āum.
Verse: b    kuua. asti. spā. pasuš.hauruuō. dāitiiō.gātuš:1
Verse: c    āat̰. mraot̰. ahurō. mazdā̊:
Verse: d    yō.2 yūjiiastīm.3
Verse: e       haca. gaēϑābiiō. parāiti.4
Verse: f          sraēṣ̌əmnō.5 tāiiūš.6 vəhrkəmca.7

Paragraph: 18 
Verse: a    dātarə.1 gaēϑanąm. astuuaitinąm. aṣ̌āum.
Verse: b    kuua. asti. spā. viš.hauruuō. dāitiiō.gātuš:
Verse: c    āat̰. mraot̰. ahurō. mazdā̊:
Verse: d    yō. hāϑrō.masaŋhəm.
Verse: e       aδβanəm. haca. vīžibiiō.2 parāiti.
Verse: f          sraēṣ̌əmnō.3 tāiiūš.4 vəhrkəmca.

Paragraph: 19 
Verse: a    dātarə. gaēϑanąm. astuuaitinąm. aṣ̌āum.
Verse: b    kuua. asti. spā. vohunazgō.1 dāitiiō.gātuš:
Verse: c    āat̰. mraot̰. ahurō. mazdā̊:
Verse: d    yō. naēcim.2 isaiti.3 hunaranąm.
Verse: e       tanuiie. isaite.3 ϑrāϑrəm.

Paragraph: 20 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. pasuš.haurum.2
Verse: d    cuuat̰. aētaēṣ̌ąm. š́iiaoϑnanąm. āstāraiti:3
Verse: e    āat̰. mraot̰. ahurō. mazdā̊:
Verse: f    yaϑa. aētahmi.4 aŋhuuō. yat̰. astuuaiṇti.5
Verse: g       fratəmō.nmānahe. nmānō.paitīš.6 paiti. tarō.piϑβəm. daiϑiiāt̰.
Verse: h    aϑa. āstriieiti.7

Paragraph: 21 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. višhaurum.2
Verse: d    cuuat̰. aētaēṣ̌ąm. š́iiaoϑnanąm. āstāraiti:3
Verse: e    āat̰. mraot̰. ahurō. mazdā̊:
Verse: f    yaϑa. aētahmi. aŋhuuō. yat̰. astuuaiṇti.
Verse: g       maδəmō.nmānahe. nmānō.paitīm. paiti. tarō.piϑβəm. daiϑiiāt̰.
Verse: h    aϑa. āstriieiti.4

Paragraph: 22 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. vohunazgəm.
Verse: d    cuuat̰. aētaēṣ̌ąm. š́iiaoϑnanąm. āstāraiti:2
Verse: e    āat̰. mraot̰. ahurō. mazdā̊:
Verse: f    narəm. bōit̰.3 iδa. aṣ̌auuanəm. jasəṇti.4
Verse: g       ahmiia. nmāne. mat̰. auuabiiō. daxštābiiō.
Verse: h          yaϑa. āϑrauua. paiti. tarō.piϑβəm. daiϑiiāt̰.
Verse: i    aϑa. āstriieiti.5

Paragraph: 23 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. taurunəm.
Verse: d    cuuat̰. aētaēṣ̌ąm. š́iiaoϑnanąm. āstāraiti:2
Verse: e    āat̰. mraot̰. ahurō. mazdā̊:
Verse: f    yaϑa. aētahmi. aŋhuuō. yat̰. astuuaiṇti.
Verse: g       apərənāiiūkəm. dahmō.kərətəm.
Verse: h             š́iiaoϑnāuuarəzəm.3 vərəziiāt̰. š́iiaoϑnəm.
Verse: i          paiti. tarō.piϑβəm. daiϑiiāt̰.
Verse: j    aϑa. āstriieiti.4

Paragraph: 24 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. pasuš.haurum.2
Verse: d    kā. hē. asti. ciϑa:
Verse: e    āat̰. mraot̰. ahurō. mazdā̊:
Verse: f    aētahe. paiti. pəṣ̌ō.tanuiie.3
Verse: g       duiie. saite.4 upāzananąm. upāzōit̰. aspahe. aštraiia.
Verse: h       duiie. saite.4 sraoṣ̌ō.caranaiia.

Paragraph: 25 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. višhaurum.2
Verse: d    kā. hē. asti. ciϑa:
Verse: e    āat̰. mraot̰. ahurō. mazdā̊:
Verse: f       nauuaitīm. upāzananąm. upāzōit̰. aspahe. aštraiia.
Verse: g       nauuaitīm. sraoṣ̌ō.caranaiia.

Paragraph: 26 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.1
Verse: c       yim. vohunazgəm.
Verse: d    kā. hē. asti. ciϑa:
Verse: e    āat̰. mraot̰. ahurō. mazdā̊:
Verse: f       haptāitīm.2 upāzananąm. upāzananąm. upāzōit̰. aspahe. aštraiia.
Verse: g       haptāitīm. sraoṣ̌ō.caranaiia.

Paragraph: 27 
Verse: a    dātarə. gaēϑanąm. astuuaitinąm. aṣ̌āum.
Verse: b    yō. spānəm. tarō.piϑβəm. daste.3
Verse: c       yim. taurunəm.
Verse: d    kā. hē. asti. ciϑa:
Verse: e    āat̰. mraot̰. ahurō. mazdā̊:
Verse: f       paṇcāsatəm. upāzananąm. upāzananąm. upāzōit̰. aspahe. aštraiia.
Verse: g       paṇcāsatəm. sraoṣ̌ō.caranaiia.

Paragraph: 28 
Verse: a    aētəm. zī. aētahmi.1 aŋhuuō. yat̰. astuuaiṇti.
Verse: b          spitama. zaraϑuštra.
Verse: c       spəṇtahe. mainiiə̄uš.2 dāmanąm.
Verse: d          āsištəm. zauruuānəm.3 upāiti.4
Verse: e    yat̰. spānō. yōi. hištəṇte.5
Verse: f       axvarō. upa. xvarəṇtəm.6
Verse: g       parō.7 spasānō.8 əuuiṇdānō.9
Verse: h    parō. xṣ̌uuisca.10 āzūitišca. gə̄uš. mat̰. baratu.11 xvarəϑanąm.
Verse: i       sūnahe.12 aēuuahe.13 dāitiiō.piϑβəm.14

Paragraph: 29 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰. ahmi. nmāne. yat̰. māzdaiiasnōiš.
Verse: c       spā. auuacā̊. vā. bauuat̰.1 aδāitiiō.xratuš.2
Verse: d    kuϑa. tē. vərəziiąn.
Verse: e       aēte. yōi. mazdaiiasna.

Paragraph: 30 
Verse: a    āat. mraot̰. ahurō. mazdā̊:
Verse: b    auua. hē. baraiiən. tāštəm. dāuru.1
Verse: c       upa. tąm.2 manaoϑrīm.3
Verse: d    stamanəm.4 hē. aδāt̰. niiāzaiiən.
Verse: e       išti.masō.5 xraožduuahe.
Verse: f       biš. aētauuatō. varəduuahe.

Paragraph: 31 
Verse: a    aētahmāt̰cit̰.1 nidarəzaiiən.
Verse: b    frā. hīmcit̰.2 nidarəzaiiən.
Verse: c       yezi. nōit̰. spā. auuacā̊. vā.3 aδāitiiō.xratuš.
Verse: d          pasūm. vā. narəm. vā. raēṣ̌iiāt̰.4
Verse: e    para. hē. iriṣ̌iṇtō.5 raēṣ̌əm. cikaiiat̰.6
Verse: f       baoδō.varštahe. ciϑaiia.

Paragraph: 32 
Verse: a    paoirīm.1 pasūm. auuaγnāt̰.
Verse: b    paoirīm. narəm. raēṣ̌iiāt̰.
Verse: c       daṣ̌inəm. hē. gaoṣ̌əm. upa.ϑβərəsaiiən.2
Verse: d    bitīm. pasūm. auuaγnāt̰.
Verse: e    bitīm. narəm. raēṣ̌iiāt̰.
Verse: f       hōiium.3 hē. gaoṣ̌əm. upa.ϑβərəsaiiən.

Paragraph: 33 
Verse: a    ϑritīm. pasūm. auuaγnāt̰.
Verse: b    ϑritīm. narəm. raēṣ̌iiāt̰.
Verse: c       daṣ̌inəm.1 hē. paiδiiąm.2 upa.kərəṇtaiiən.3
Verse: d    tūirīm. pasūm. auuaγnāt̰.
Verse: e    tūirīm. narəm. raēṣ̌iiāt̰.
Verse: f       haoiiąm.4 hē. paiδiiąm. upa.kərəṇtaiiən.

Paragraph: 34 
Verse: a    puxδəm. pasūm. auuaγnāt̰.
Verse: b    puxδəm. narəm. raēṣ̌iiāt̰.
Verse: c       1duməmcit̰. hē. upa.ϑβərəsaiiən:1
Verse: d    aētahmāt̰cit̰.2 nidarəzaiiən.3
Verse: e    frā. hīmcit̰. nidarəzaiiən.
Verse: f       yezi. nōit̰. spā. auuacā̊. vā. aδāitiiō.xratuš.
Verse: g          pasūm. vā. narəm. vā. raēṣ̌iiāt̰.
Verse: h    para. hē. iriṣ̌iṇtō. raēṣ̌əm. cikaiiat̰.
Verse: i       baoδō.varštahe. ciϑaiia.

Paragraph: 35 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰. ahmi. nmāne. yat̰. māzdaiiasnōiš.
Verse: c       spā. ahąm.baoδəmnō.1 vā. bauuat̰.2 aδāitiiō.xratuš.
Verse: d    kuϑa. tē. vərəziiąn.
Verse: e       aēte. yōi.3 mazdaiiasna:
Verse: f    āat̰. mraot̰. ahurō. mazdā̊:
Verse: g    auuaϑa. hē. baēṣ̌azəm. upōisaiiən.
Verse: h       yaϑa. dahmāicit̰.4 aṣ̌aone.

Paragraph: 36 
Verse: a    dātarə. gaēϑanąm. astuuaitinąm. aṣ̌āum.
Verse: b    yezi. isəmnō.1 nōit̰. viṇdāite.2
Verse: c    kuϑa. tē. vərəziiąn.
Verse: d       aēte. yōi. mazdaiiasna.

Paragraph: 37 
Verse: a    āat̰. mraot̰. ahurō. mazdā̊:
Verse: b    auua.1 hē. baraiiən.2 tāštəm. dāuru.
Verse: c       upa. tąm. manaoϑrīm.
Verse: d    stamanəm. hē. aδāt̰. niiāzaiiən.
Verse: e       išti.masō. xraožduuahe.
Verse: f       biš. aētauuatō. varəduuahe.
Verse: g    aētahmāt̰cit̰. nidarəzaiiən.
Verse: h    frā.hīmcit̰.3 nidarəzaiiən.
Verse: i       yezi. nōit̰. spā. ahąm.baoδəmnō.4
Verse: j          maēγe.5 vā. cāiti. vā.
Verse: k          6vaēmi. vā. urūiδi.7 vā.
Verse: l          apō. vā.6 nāuuaiiā̊. paiδiiāite.8
Verse: m    ahmat̰.9 haca. iriš́iiāt̰:10

Paragraph: 38 
Verse: a    yezi. tat̰. paiti. iriš́iieiti.1
Verse: b       aiŋ́hat̰.2 haca. š́iiaoϑnāuuarəza.3
Verse: c    aϑa. bauuaiṇti. pəṣ̌ō.tanuuō.4

Paragraph: 39 
Verse: a    spānəm. daϑəm. zaraϑuštra.
Verse: b       azəm. yō. ahurō. mazdā̊.
Verse: c          huuāuuastrəm.1 xvā.aoϑrəm.
Verse: d          zaēni.buδrəm.2 tiži.dąsurəm.3
Verse: e          vīrō.draonaŋhəm. gaēϑanąm. harəϑrāi:4
Verse: f    aδa.5 azəm. yō. ahurō. mazdā̊.
Verse: g       spānəm. nidaϑəm.
Verse: h          yat̰. dim. mazaoš.6 kəhrpō. tūrahe.
Verse: i             yezi. asta.7 aṣ̌a.8 xraϑβa.
Verse: j             yezi. asta.7 gaēϑābiiō.

Paragraph: 40 
Verse: a    yasca. hē. spitama. zaraϑuštra.
Verse: b       vācim. paiti. zaēniš. aŋhat̰.
Verse: c    nōit̰. hē. tā̊.1 vīsō.
Verse: d       tāiiuš. vā. vəhrkō. vā.
Verse: e          apaiti.busti.2 haca. vīžibiiō.3 para.baraiti:
Verse: f    jąϑβa. vəhrka. scąϑβa. vəhrka.
Verse: g       pōiϑβa.4 vəhrka. snaēžana.4

Paragraph: 41 
Verse: a    dātarə. gaēϑanąm. astuuaitinąm. aṣ̌āum.
Verse: b    katārō. zī. aiiā̊. vəhrkaiiā̊. jąϑβō.tarō. aŋhən.
Verse: c          aṣ̌āum.1 ahura. mazda.
Verse: d       yaϑa. spā.2 vəhrkahe. kərənaoiti.
Verse: e          yaϑa. yat̰. vəhrkō. spā:
Verse: f    āat̰. mraot̰. ahurō. mazdā̊:
Verse: g    aēṣ̌ō.3 zī. aētaiiā̊. vəhrkaiiā̊. jąϑβō.tarō. aŋhən.4
Verse: h          aṣ̌āum.1 zaraϑuštra.
Verse: i       yaϑa. spā. vəhrkahe. kərənaoiti.
Verse: j          yaϑa. yat̰. vəhrkō. spā.

Paragraph: 42 
Verse: a    ustācit̰.1 spāna. patəṇti.
Verse: b       pasuš.hauruuąmca. viš.hauruuąmca.
Verse: c       vohunazgąmca. draxtō.hunaranąmca.
Verse: d          yaϑa.γniiō. gaēϑābiiō.
Verse: e    taēcit̰. yā̊. bauuaiṇti.2
Verse: f       aoṣ̌ō.tarasca.3 dužitō.tarasca. gaēϑō.jatarasca.
Verse: g          yaϑa. aniia. spā.

Paragraph: 43 
Verse: a    ustācit̰.1 vəhrka. patəṇti.
Verse: b          γniiō. gaēϑābiiō.
Verse: c    taēcit̰. yā̊. bauuaiṇti.2
Verse: d       aoṣ̌ō.tarasca.3 dužitō.tarasca. gaēϑō.jatarasca.
Verse: e          yaϑa. aniia. vəhrka.

Paragraph: 44 
Verse: a    sūnahe.1 aēuuahe. aštā. bifrəm:
Verse: b    asti. ṣ̌ē.2 haēm.3
Verse: c       yaϑa. aϑaurune.
Verse: d    asti. ṣ̌ē. haēm.
Verse: e       yaϑa. raϑaēštārahe.
Verse: f    asti. ṣ̌ē. haēm.
Verse: g       yaϑa. vāstriiehe. fṣ̌uiiaṇtō.
Verse: h    asti. ṣ̌ē. haēm.
Verse: i       yaϑa. vaēsāuš.4
Verse: j    asti. ṣ̌ē. haēm.5
Verse: k       yaϑa. tāiiaoš.6
Verse: l    asti. ṣ̌ē. haēm.
Verse: m       yaϑa. disaoš.7
Verse: n    asti. ṣ̌ē. haēm.
Verse: o       yaϑa. jahikaiiā̊.
Verse: p    asti. ṣ̌ē. haēm.
Verse: q       yaϑa. apərənāiiūkahe.

Paragraph: 45 
Verse: a    paiti. xvarəϑa. xvaraiti.1 yaϑa. āϑrauua.
Verse: b       huxṣ̌naoϑrō. yaϑa. āϑrauua.
Verse: c       2huuāzārō. yaϑa. āϑrauua.2
Verse: d       3aēṣ̌ō. kasu.draonō. yaϑa. āϑrauua.3
Verse: e       aiti. ṣ̌ē.4 haēm. yaϑa. aϑaurune:5
Verse: f    raptō.6 pauruuaēibiia.7 yaϑa. raϑaēštā̊.
Verse: g       aipi.jatō. gąm. huδā̊ŋhəm. yaϑa. raϑaēštā̊.
Verse: h       parō.8 pasca. nmānahe. yaϑa. raϑaēštā̊.
Verse: i       aiti. ṣ̌ē.9 haēm. yaϑa. raϑaēštārahe.

Paragraph: 46 
Verse: a    zaēnaŋha.1 əuuīspō.xvafna.2 yaϑa. vāstriiō. fṣ̌uiiąs.
Verse: b       parō. pasca. nmānahe. yaϑa. vāstriiō. fṣ̌uiiąs.
Verse: c       pasca. parō. nmānahe. yaϑa. vāstriiō. fṣ̌uiiąs.
Verse: d       aiti. ṣ̌ē.3 haēm. yaϑa. vāstriiehe.4 fṣ̌uiiaṇtō.5
Verse: e    xvaṇdrakarō.6 yaϑa. vaēsō.
Verse: f       asnaēraēṣ̌ō.7 yaϑa. vaēsō.
Verse: g       zairimiiafsma.8 ϑriiafsma. yaϑa. vaēsō.
Verse: h       aiti. ṣ̌ē.9 haēm. yaϑa. vaēsāuš.10

Paragraph: 47 
Verse: a    tąϑrō.cinō.1 yaϑa. tāiiuš.
Verse: b       2xṣ̌apāiiaonō. yaϑa. tāiiuš.2
Verse: c       3apiṣ̌ma.xvarō. yaϑa. tāiiuš.3
Verse: d       aϑaca. dužniδātō.4 yaϑa. tāiiuš.
Verse: e       aiti. ṣ̌ē. haēm. yaϑa. tāiiaoš:5
Verse: f    tąϑrō.cinō.6 yaϑa. disuš.7
Verse: g       xṣ̌apāiiaonō. yaϑa. disuš.8
Verse: h       apiṣ̌ma.xvarō. yaϑa. disuš.7
Verse: i       aϑaca. dužniδātō.9 yaϑa. disuš.7
Verse: j       aiti. ṣ̌ē. haēm. yaϑa. disāuš.10

Paragraph: 48 
Verse: a    xvaṇdrakarō.1 yaϑa. jahika.
Verse: b       asnaēraēṣ̌ō.2 yaϑa. jahika.
Verse: c       airitō.3 paṇtānəm. yaϑa. jahika.
Verse: d       zairimiiafsma.4 ϑriiafsma. yaϑa. jahika.
Verse: e       aiti. ṣ̌ē. haēm. yaϑa. jahikaiiā̊:
Verse: f    xvafnō. yaϑa. apərənāiiuš.
Verse: g       snaēžanō. yaϑa. apərənāiiuš.
Verse: h       hizu.drājō. yaϑa. apərənāiiuš.
Verse: i       pairi.taxtō.5 pauruuaēibiia.6 yaϑa. apərənāiiuš.
Verse: j       7aiti. ṣ̌ē. haēm. yaϑa. apərənāiiūkahe.7

Paragraph: 49 
Verse: a    yat̰. mē. aēṣ̌ąmcit̰.1 nmānanąmca.2 caratō.3 duua.
Verse: b       mā. apa.raoδaiiaēta.4
Verse: c          yasca. spā. pasuš.hauruuō.
Verse: d          yasca.5 spā. viš.hauruuō:
Verse: e    nōit̰. mē. nmānəm. vīδātō.6 hištəṇti.7
Verse: f       ząm. paiti. ahuraδātąm.
Verse: g          yezi. mē. nōit̰.8 ā̊ŋhāt̰. spā.
Verse: h             pasuš.hauruuō. vā.
Verse: i             viš.hauruuō. vā.

Paragraph: 50 
Verse: a    dātarə. gaēϑanąm. astuuaitinąm. aṣ̌āum.
Verse: b    yat̰. sūnīš.1 para.iriϑiieiti.
Verse: c       ništā.zəmanasca.2 pairištā.xṣ̌udrasca.
Verse: d    kuϑa. aēṣ̌ąm. baoδō. jasaiti.3

Paragraph: 51 
Verse: a    āat̰. mraot̰. ahurō. mazdā̊:
Verse: b    xā̊. paiti. apąm. parāiti.
Verse: c          spitama. zaraϑuštra.
Verse: d    aϑra. ā̊ŋhąm. hąm.bauuaiṇti.1
Verse: e       duua. udra. upāpa.
Verse: f          hazaŋrāiš. sūnīš.2 strī.nāmanō.3
Verse: g          hazaŋrāiš. sūnīš.2 nairiiō.nāmanō.
Verse: h             miϑβana. strica.4 nairiiasca:
Verse: i    udrahe.5 auuaγnānō. haēcō. kərənaoiti.
Verse: j       yat̰. auuāstrəm.

Paragraph: 52 
Verse: a    1para. nū.2 ahmāt̰. haca. asaŋhat̰ca. ṣ̌ōiϑrāat̰ca.3 axštat̰.4
Verse: b          spitama. zaraϑuštra.
Verse: c       ižāca.5 āzūitišca.
Verse: d       para. dasuuarəca. baēṣ̌azəmca.
Verse: e       para. fradaϑəmca. varədaϑəmca. vaxṣ̌aϑəmca.
Verse: f       para. yauuanąmca. vāstranąmca. uruϑəm.6

Paragraph: 53 
Verse: a    dātarə. gaēϑanąm. astuuaitinąm. aṣ̌āum.
Verse: b    kaδa. nō.1 ahmāi. asaŋhaēca. ṣ̌ōiϑraēca. paiti.jasātō.
Verse: c       ižāca. āzūitišca.
Verse: d       kaδa. dasuuarəca. baēṣ̌azəmca.
Verse: e       kaδa. fradaϑəmca. varədaϑəmca. vaxṣ̌aϑəmca.
Verse: f       kaδa. yauuanąmca. vāstranąmca. uruϑəm.2

Paragraph: 54 
Verse: a    āat̰. mraot̰. ahurō. mazdā̊:
Verse: b    nōit̰. nū.1 para. ahmāt̰.
Verse: c          spitama. zaraϑuštra.
Verse: d       asaŋhaēca. ṣ̌ōiϑrāica.2 paiti.jasātō.
Verse: e          ižāca. āzūitišca.
Verse: f          nōit̰. dasuuarəca. baēṣ̌azəmca.
Verse: g          nōit̰. fradaϑəmca. varədaϑəmca. vaxṣ̌aϑəmca.
Verse: h          nōit̰. yauuanąmca. vāstranąmca. uruϑəm.3

Paragraph: 55 
Verse: a    1para. ahmāt̰.
Verse: b       yat̰. iδa. udra.janō. haϑra. jatō.2 nijanāite.3
Verse: c       yat̰. vā.4 aētahe. udrahe. upa. dahməm.5 uruuānəm. frāiiazā̊ṇte.6
Verse: d          ϑri.aiiarəm. ϑri.xṣ̌aparəm.
Verse: e             saociṇtat̰.7 paiti. āϑrat̰.
Verse: f             frastərətāt̰.8 paiti. barəsmən.9
Verse: g             uzdātāt̰. paiti. haomāt̰.

Paragraph: 56 
Verse: a    pascaēta. ahmāi. asaŋhaēca. ṣ̌ōiϑraēca. paiti.jasātō.
Verse: b       ižāca. āzūitišca.
Verse: c       pascaēta. dasuuarəca. baēṣ̌azəmca.
Verse: d       pascaēta. fradaϑəmca. varədaϑəmca. vaxṣ̌aϑəmca.
Verse: e       pascaēta. yauuanąmca. vāstranąmca. uruϑəm.1

Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.::


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.