TITUS
Avestan Corpus
Part No. 115
Previous part

Chapter: 21 
Paragraph: 1 
Verse: a    nəmasə. tē. gaospəṇta.
Verse: b    nəmasə. tē. gaoš.1 hudā̊.2
Verse: c    nəmasə. tē. frāδəṇte.3
Verse: d    nəmasə. tē. varəδəṇte.4
Verse: e    nəmasə. tē. dāϑrō. baxtəm.
Verse: f       vahištāi. aṣ̌aone.
Verse: g       anaząϑāi. aṣ̌aone.
Verse: h          yā. jahi.5 mərəṇcaite.6
Verse: i             aṣ̌əmaoγō. anaṣ̌auua.
Verse: j             maš́iiasca. druuā̊. sāsta.

Paragraph: 2 
Verse: a    yaiiata. dunma.
Verse: b       yaiiata. frā.āpəm. niiāpəm. upa.āpəm.
Verse: c          hazaŋrō.vāraiiō.1 baēuuarə.vārascit̰.
Verse: d    mruiiā̊. aṣ̌āum. zaraϑuštra:
Verse: e       yaskahe. apanaštahe.2
Verse: f       mahrkahe. apanaštahe.
Verse: g       jaini.yaskahe.3 apanaštahe.
Verse: h       jaini.mahrkahe. apanaštahe.
Verse: i       gaδahe. apa.gaδahe. apanaštahe.

Paragraph: 3 
Verse: a    yezi. uzīrō.huua.1 mərəṇcaite.2
Verse: b       arəzahuua.3 biṣ̌aziiāt̰.4
Verse: c    yezi. arəzahuua.3 mərəṇcaite.
Verse: d       xṣ̌apō.huua. biṣ̌aziiāt̰.
Verse: e    yezi. xṣ̌apō.huua. mərəṇcaite.
Verse: f       uṣ̌ahuua. biṣ̌aziiāt̰.
Verse: g    vī.vārəṇti.5 vī.vārāhu.6
Verse: h       nauua. āfš. nauua. zā̊.
Verse: i       nauua. uruuarā̊. nauua. baēṣ̌azā̊.
Verse: j       nauuata.7 baēṣ̌aza.kəša.8

Paragraph: 4 
Verse: a    yaϑa. zraiiō. vouru.kaṣ̌əm.
Verse: b       apō. asti. haṇjaγmanəm.1
Verse: c       usihišta.2 hąm.yaētā̊ŋhō.3
Verse: d          yaonəmca.4 auui. ząmca.
Verse: e          ząmca. auui. yaonəmca.4
Verse: f       usihišta.5
Verse: g    pāiri.haēzaŋuha.6
Verse: h       yehe.7 ząϑaēca. vaxṣ̌aēca.
Verse: i          yaonəm. daδāt̰.8 ahurō. mazdā̊.

Paragraph: 5 
Verse: a    uzaiiara.1 uzīra.2
Verse: b       huuarəxṣ̌aēta.3 auruuat̰.aspa.
Verse: c          tarasca. harąm. bərəzaitīm.4
Verse: d    raoxṣ̌nəm.5 kərənauuāhi.6 dāmahuua.7
Verse: e    təmcit̰. uzīra.2
Verse: f       yezi. ahi.8 garō. dərətəm.9
Verse: g          mazdaδātəm. paiti. paṇtąm.
Verse: h          baγō.baxtəm. paiti. yaonəm.
Verse: i          fraϑβarštəm.10 paiti. āfəṇtəm.

Paragraph: 6 
Verse: a    [āat̰. ana. parō. duš.kərəta.1]
Verse: b    āat̰. ana. parō. mąϑrō. spəṇtō:
Verse: c    frā. tē. ząϑəmca.2 vaxṣ̌aϑəmca.
Verse: d       azəm. iδa. frasnaiieni.3
Verse: e    frā. tē. kəhrpəmca. təuuīṣ̌īmca.4 yaoždaϑāni.5
Verse: f    kərənaomi. ϑβąm.
Verse: g       6hacat̰.puϑrąm.6 hacat̰.paēmaniiąm.7

Paragraph: 7 
Verse: a    kārauuaiti. paēmauuaiti.
Verse: b       xṣ̌uuiptauuaiti.1 raoγnauuaiti.
Verse: c       mazgauuaiti. frazaiṇtiuuaiti.
Verse: d    frā. tē. hazaŋrəm. xąm.2
Verse: e       azəm. iδa. frasnaiieni.3
Verse: f          gaoδanəm. auui. haṇtacinā̊.
Verse: g             yat̰. asti. puϑrahe. ϑrimō.4

Paragraph: 8 
Verse: a    yaϑa. zraiiō.1 vouru.kaṣ̌əm.
Verse: b       apō. asti. haṇjaγmanəm.
Verse: c       usihišta. hąm.yaētā̊ŋhō.
Verse: d          yaonəmca. auui. ząmca.
Verse: e          ząmca. auui. yaonəmca.
Verse: f       usihišta.
Verse: g    pāiri.haēzaŋuha.
Verse: h       yehe.2 ząϑaēca. vaxṣ̌aēca.
Verse: i          ząm. daδāt̰. ahurō. mazdā̊.

Paragraph: 9 
Verse: a    uzaiiara.1 uzīra.2
Verse: b       mā̊ŋha. gaociϑra.
Verse: c          tarasca. harąm. bərəzaitīm.
Verse: d    raoxṣ̌nəm.3 kərənauuāhi.4 dāmahuua.5
Verse: e    təmcit̰. uzīra.2
Verse: f       yezi. ahi.6 garō. dərətəm.
Verse: g          mazdaδātəm. paiti. paṇtąm.
Verse: h          baγō.baxtəm. paiti. yaonəm.
Verse: i          fraϑβarštəm.7 paiti. āfəṇtəm.

Paragraph: 10 
Verse: a    [āat̰. ana. parō. duš.kərəta.]1
Verse: b    āat̰. ana. parō. mąϑrō. spəṇtō:
Verse: c    frā. tē. ząϑəmca. vaxṣ̌aϑəmca.
Verse: d       azəm. iδa. frasnaiieni.2
Verse: e    frā. tē. kəhrpəmca. təuuīṣ̌īmca. yaoždaϑāni.3
Verse: f    kərənaomi. ϑβąm.
Verse: g       hacat̰.puϑrąm. hacat̰.paēmaniiąm.4

Paragraph: 11 
Verse: a    kārauuaiti. paēmauuaiti.
Verse: b       xṣ̌uuiptauuaiti.1 raoγnauuaiti.
Verse: c       mazgauuaiti. frazaiṇtiuuaiti.
Verse: d    frā. tē. hazaŋrəm. xąm.2
Verse: e       azəm. iδa. frasnaiieni.3
Verse: f          gaoδanəm. auui. haṇtacinā̊.
Verse: g             yat̰. asti. puϑrahe. ϑrimō.4

Paragraph: 12 
Verse: a    yaϑa. zraiiō. vourukaṣ̌əm.
Verse: b       apō. asti. haṇjaγmanəm.
Verse: c    usihišta.1 hąm.yaētā̊ŋhō.
Verse: d       yaonəmca.2 auui. ząmca.
Verse: e       ząmca. auui. yaonəmca.2
Verse: f    usihišta.3
Verse: g    pāiri.haēzaŋuha.4
Verse: h       yehe.5 ząϑaēca. vaxṣ̌aēca.
Verse: i          vaxṣ̌əm. daδāt̰.6 ahurō. mazdā̊.

Paragraph: 13 
Verse: a    uzaiiara. uzīra.1
Verse: b       stāra. gufra.2 afšciϑrā̊ŋhō.3
Verse: c          tarasca. harąm. bərəzaitīm.
Verse: d    raoxṣ̌nəm.4 kərənauuāhi.5 dāmahuua.
Verse: e    təmcit̰. uzīra.
Verse: f       yezi. ahi.6 garō. dərətəm.7
Verse: g          mazdaδātəm. paiti. paṇtąm.
Verse: h          baγō.baxtəm. paiti. yaonəm.
Verse: i          fraϑβarštəm. paiti. āfəṇtəm.

Paragraph: 14 
Verse: a    [1āat̰. ana. parō. duš.kərəta.1]
Verse: b    āat̰. ana. parō. mąϑrō. spəṇtō:
Verse: c    frā. tē. ząϑəmca. vaxṣ̌aϑəmca.
Verse: d       azəm. iδa. frasnaiieni.2
Verse: e    frā. tē. kəhrpəmca. təuuīṣ̌īmca. yaoždaϑāni.3
Verse: f    kərənaomi. ϑβąm.
Verse: g       hacat̰.puϑrąm. hacat̰.paēmaniiąm.4

Paragraph: 15 
Verse: a    kārauuaiti. paēmauuaiti.
Verse: b       xṣ̌uuiptauuaiti.1 raoγnauuaiti.
Verse: c       mazgauuaiti. frazaiṇtiuuaiti.
Verse: d    frā. tē. hazaŋrəm. xąm.2
Verse: e       azəm. iδa. frasnaiieni.
Verse: f          gaoδanəm. auui. haṇtacinā̊.
Verse: g             yat̰. asti. puϑrahe. ϑrimō.

Paragraph: 16 
Verse: a    yaϑa. zraiiō. vourukaṣ̌əm.
Verse: b       apō. asti. haṇjaγmanəm.
Verse: c    usihišta.1 hąm.yaētā̊ŋhō.
Verse: d       yaonəmca.2 auui. ząmca.
Verse: e       ząmca. auui. yaonəmca.2
Verse: f    usihišta.1
Verse: g    pāiri.haēzaŋuha.3
Verse: h       yehe. ząϑaēca. vaxṣ̌aēca.
Verse: i          uzaiiarəm.4 daδāt̰. ahurō. mazdā̊.

Paragraph: 17 
Verse: a    uzaiiara.1 uzīra.
Verse: b       paxrušta.2 hī.3 kaxuži.4
Verse: c       paxrušta.2 hī.5 aiiehiie.6
Verse: d       paxrušta.2 hī.7 yātumaiti. jahi.8

Paragraph: 18  {= Vd. 20,9}
Verse: a    paiti.pərəne. aṣ̌ire.
Verse: b    paiti.pərəne. aγūire.
Verse: c    paiti.pərəne. aγrąm.
Verse: d    paiti.pərəne. uγrąm.
Verse: e    paiti.pərəne. yaskahe.
Verse: f    paiti.pərəne. mahrkahe.
Verse: g    paiti.pərəne. dāžu.
Verse: h    paiti.pərəne. tafnu.
Verse: i    paiti.pərəne. sāranahe.
Verse: j    paiti.pərəne. sārastiiehe.
Verse: k    paiti.pərəne. ažanahe.
Verse: l    paiti.pərəne. ažahuuahe.
Verse: m    paiti.pərəne. kuruγahe.
Verse: n    paiti.pərəne. ažiuuākahe.
Verse: o    paiti.pərəne. drukahe.
Verse: p    paiti.pərəne. astairiiehe.
Verse: q    paiti.pərəne. aγaṣ̌iiā̊. pūitiiā̊. āhitiiā̊.
Verse: r       yā. aŋrō. mainiiuš. frākərəṇtat̰.
Verse: s          auui. imąm. tanūm. yąm. maš́iiānąm.

Paragraph: 19  {= Vd. 20,10}
Verse: a    paiti.pərəne. vīspəm. yaskəmca. mahrkəmca.
Verse: b       vīspe. yātauuō. pairikā̊sca.
Verse: c       vīspā̊. janiiō. yā̊. druuaitīš.

Paragraph: 20  {= Vd. 20,11 / Y. 54,1}
Verse: Q1a    ā. airiiə̄mā. iš́iiō. rafəδrāi. jaṇtū.
Verse: Q1b       nərəbiiascā. nāiribiiascā.
Verse: Q1c          zaraϑuštrahe.
Verse: Q1c          vaŋhə̄uš. rafəδrāi. manaŋhō.
Verse: Q1c    yā. daēnā. vairīm. hanāt̰. mīždəm.
Verse: Q1d       aṣ̌ahiiā. yāsā. aṣ̌īm.
Verse: Q1e          yąm. iṣ̌iiąm. ahurō. masatā. mazdā̊.

Paragraph: 21  {= Vd. 20,12}
Verse: a    jaṇtu. ā.airiiə̄mā.iš́iiō.
Verse: b       vīspəm. yaskəmca. mahrkəmca.
Verse: c       vīspe. yātauuō. pairikā̊sca.
Verse: d       vīspā̊. janiiō. yā̊. druuaitīš.


Paragraph: 22  {= Y. 27,14}
Verse: Q1a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q2a    kə̄m.nā. mazdā.   mauuaitē. pāiiūm. dadāt̰.
Verse: Q2b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q2c    aniiə̄m. ϑβahmāt̰.   āϑrascā. manaŋhascā.
Verse: Q2d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q2e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q3b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q3c    ciϑrā. mōi. dąm.   ahīmbiš. ratūm. cīždī.
Verse: Q3d    at̰. hōi. vohū.   səraoṣ̌ō. jaṇtū. manaŋhā.
Verse: Q3e    mazdā. ahmāi.   yahmāi. vaṣ̌ī. kahmāicīt̰.


Paragraph: 23  {= Vd. 8,21}
Verse: Q1a    pāta. nō. t̰biṣ̌iiaṇtat̰. pairi.
Verse: Q1d       mazdā̊sca. ārmaitišca. spəṇtasca:
Verse: Q1b    nase. daēuuī. druxš.
Verse: Q1c    nase. daēuuō.ciϑre.
Verse: Q1c    nase. daēuuō.frakaršte.
Verse: Q1d    nase. daēuuō.fradāiti.
Verse: Q1e    apa. druxš. nase.
Verse: Q1d    apa. druxš. duuāra.
Verse: Q1d    apa. druxš. vīnase.
Verse: Q1f    apāxəδre. apa.nasiiehe.
Verse: Q1g       māmərəṇcainīš. gaēϑā̊. astuuaitīš. aṣ̌ahe.

Verse: Q2a    aṣ̌əm. vohū. vahištəm. astī::
Verse: Q2b    uštā. astī. uštā. ahmāi.
Verse: Q2c    hiiat̰. aṣ̌āi. vahištāi. aṣ̌əm.::


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.