TITUS
Avestan Corpus
Part No. 118
Previous part

Chapter: 2 
Paragraph: 1 
Verse: a    ahmiia. zaoϑre. barəsmanaēca.
Verse: b       ratauuō. mainiiauua. āiiese. yešti:
Verse: c       ratauuō. gaēϑiia. āiiese. yešti:
Verse: d       ratauuō. upāpa. āiiese. yešti:
Verse: e       ratauuō. upasma. āiiese. yešti:
Verse: f       ratauuō. fraptərəjāta. āiiese. yešti:
Verse: g       ratauuō. rauuascarāta. āiiese. yešti:
Verse: h       ratauuō. caŋraŋhāca.1 āiiese. yešti.

Paragraph: 2 
Verse: a    ahmiia. zaoϑre. barəsmanaēca.
Verse: b       yāiriia. aṣ̌auuana. aṣ̌ahe. ratauuō. āiiese. yešti:
Verse: c       maiδiiōizarəmaēm.1 paiiaŋhəm. aṣ̌auuanəm. aṣ̌ahe. ratūm. āiiese. yešti:
Verse: d    ahmiia. zaoϑre. barəsmanaēca.
Verse: e       maiδiiōiṣ̌əməm.2 vāstrō.dātainīm.3 aṣ̌auuanəm. aṣ̌ahe. ratūm. āiiese. yešti:
Verse: f    ahmiia. zaoϑre. barəsmanaēca.
Verse: g       paitišhahīm. hahīm. aṣ̌auuanəm. aṣ̌ahe. ratūm. āiiese. yešti:
Verse: h    ahmiia. zaoϑre. barəsmanaēca.
Verse: i       aiiāϑriməm.4 fraouruuaēštriməm.5 varṣ̌niharštəm.6 aṣ̌auuanəm. aṣ̌ahe. ratūm. āiiese. yešti:
Verse: j    ahmiia. zaoϑre. barəsmanaēca.
Verse: k       maiδiiāirīm. sarəδəm.7 aṣ̌auuanəm. aṣ̌ahe. ratūm. āiiese. yešti:
Verse: l    ahmiia. zaoϑre. barəsmanaēca.
Verse: m       hamaspaϑmaēdaēm.8 arətō.karəϑnəm.9 aṣ̌auuanəm. aṣ̌ahe. ratūm. āiiese. yešti.

Paragraph: 3 
Verse: a    ahmiia. zaoϑre. barəsmanaēca.
Verse: b       gaēϑanąm. ā̊ŋhairīm.1 aṣ̌auuanəm. aṣ̌ahe. ratūm. āiiese. yešti.
Verse: c          yat̰. ā̊ŋhairiiō. zīzanən:
Verse: d    ahmiia. zaoϑre. barəsmanaēca.
Verse: e       vīspe. tē. ratauuō. āiiese. yešti.
Verse: f          yōi.2 aoxta. ahurō. mazdā̊. zaraϑuštrāi.
Verse: g             yasniiāca.3 vahmiiāca.4
Verse: h                aṣ̌āt̰. haca. yat̰. vahištāt̰.

Paragraph: 4 
Verse: a    ahmiia. zaoϑre. barəsmanaēca.
Verse: b       ϑβąm. ratūm. āiiese. yešti.
Verse: c          yim. ahurəm. mazdąm.
Verse: d             mainiiaom. mainiiauuanąm.
Verse: e             dāmanąm. mainiiaoiiā̊.1 stōiš. ahūmca. ratūmca:
Verse: f    ahmiia. zaoϑre. barəsmanaēca.
Verse: g       ϑβąm. ratūm. āiiese. yešti.
Verse: h          yim. zaraϑuštrəm. spitāməm.
Verse: i             gaēϑīm. gaēϑiianąm.
Verse: j             dāmanąm. gaēϑiiaiiā̊.2 stōiš. ahūmca. ratūmca.

Paragraph: 5 
Verse: a    ahmiia. zaoϑre. barəsmanaēca.
Verse: b       raϑβąm. framarətārəm.1 āiiese. yešti.
Verse: c          yim. narəm. aṣ̌auuanəm. daδrānəm.2
Verse: d             humatəmca. manō.
Verse: e             hūxtəmca. vacō.
Verse: f             huuarštəmca. š́iiaoϑnəm:
Verse: g          spəṇtąm.3 ārmaitīm. darətəm.4
Verse: h             yōi.5 mąϑrəm. saoš́iiaṇtō.6


{= Y. 43,6c}
Verse: Q1a    7yeŋ́he. š́iiaoϑnāiš.   gaēϑā̊. aṣ̌a. frādəṇte.8


Paragraph: 6 
Verse: a    ahmiia. zaoϑre. barəsmanaēca.
Verse: b       sarəδa. aṣ̌auuana. aṣ̌ahe. ratauuō. āiiese. yešti:
Verse: c       1ahunəm. vairīm. frasraoϑrəm. aṣ̌auuanəm. aṣ̌ahe. ratūm. āiiese. yešti:
Verse: d    ahmiia. zaoϑre. barəsmanaēca.
Verse: e       aṣ̌əm. vahištəm. staoϑβəm. aṣ̌auuanəm. aṣ̌ahe. ratūm. āiiese. yešti:
Verse: f    ahmiia. zaoϑre. barəsmanaēca.
Verse: g       yeŋ́hē.hātąm. hufrāiiaštąm. aṣ̌aonīm. aṣ̌ahe. ratūm. āiiese. yešti.

Paragraph: 7 
Verse: a    ahmiia. zaoϑre. barəsmanaēca.
Verse: b       ahunauuaitīm. gāϑąm. aṣ̌aonīm.1 aṣ̌ahe. ratūm. āiiese. yešti:
Verse: c       γənā̊.2 hubaγā̊. hufəδrīš.3 huraoδaŋhō.4 āiiese. yešti:
Verse: d    ahmiia. zaoϑre. barəsmanaēca.
Verse: e       ahuməṇtəm.5 ratuməṇtəm.5 aṣ̌auuanəm. aṣ̌ahe. ratūm. āiiese. yešti:
Verse: f          hō. zī.6 asti. ahūmca.7 ratūmca.7
Verse: g             yō. ahurō. mazdā̊:
Verse: h    ahmiia. zaoϑre. barəsmanaēca.
Verse: i       yasnəm. sūrəm. haptaŋhāitīm. aṣ̌auuanəm. aṣ̌ahe. ratūm. āiiese. yešti:
Verse: j       arəduuīm.8 sūrąm. anāhitąm. aṣ̌aonīm. aṣ̌ahe. ratūm. āiiese. yešti.

Paragraph: 8 
Verse: a    ahmiia. zaoϑre. barəsmanaēca.
Verse: b       uštauuaitīm. gāϑąm. aṣ̌aonīm. aṣ̌ahe. ratūm. āiiese. yešti:
Verse: c       garaiiō. aṣ̌axvāϑrā̊. pouru.xvāϑrā̊. mazdaδāta. aṣ̌auuana. aṣ̌ahe. ratauuō. āiiese. yešti:
Verse: d    ahmiia. zaoϑre. barəsmanaēca.
Verse: e       spəṇtā.mainiiūm. gāϑąm. aṣ̌aonīm. aṣ̌ahe. ratūm. āiiese. yešti:
Verse: f       vərəϑraγnəm. ahuraδātəm. āiiese. yešti:
Verse: g       vanaiṇtīmca. uparatātəm. āiiese. yešti.

Paragraph: 9 
Verse: a    ahmiia. zaoϑre. barəsmanaēca.
Verse: b       vohuxṣ̌aϑrąm. gāϑąm. aṣ̌aonīm. aṣ̌ahe. ratūm. āiiese. yešti:
Verse: c       miϑrəm. vouru.gaoiiaoitīm. āiiese. yešti:
Verse: d       rāma.xvāstrəm. āiiese. yešti:
Verse: e    ahmiia. zaoϑre. barəsmanaēca.
Verse: f       vahištōištīm. gāϑąm. aṣ̌aonīm. aṣ̌ahe. ratūm. āiiese. yešti:
Verse: g       dahmąm. vaŋuhīm. āfritīm. āiiese. yešti:
Verse: h       dahməmca. narəm. aṣ̌auuanəm. āiiese. yešti:
Verse: i       uγrəm. taxməm. dāmōiš. upamanəm. yazatəm. āiiese. yešti.

Paragraph: 10 
Verse: a    ahmiia. zaoϑre. barəsmanaēca.
Verse: b       airiiamanəm. iṣ̌īm.1 aṣ̌auuanəm. aṣ̌ahe. ratūm. āiiese. yešti:
Verse: c    ahmiia. zaoϑre. barəsmanaēca.
Verse: d       fṣ̌ūṣ̌ō.mąϑrəm. aṣ̌auuanəm. aṣ̌ahe. ratūm. āiiese. yešti:
Verse: e    ahmiia. zaoϑre. barəsmanaēca.
Verse: f       ratūm. bərəzəm. haδaoxtəm.2 aṣ̌auuanəm. aṣ̌ahe. ratūm. āiiese. yešti.

Paragraph: 11 
Verse: a    ahmiia. zaoϑre. barəsmanaēca.
Verse: b       āhūirīm. fraṣ̌nəm. aṣ̌auuanəm. aṣ̌ahe. ratūm. āiiese. yešti:
Verse: c       āhūirīm. t̰kaēṣ̌əm. aṣ̌auuanəm. aṣ̌ahe. ratūm. āiiese. yešti:
Verse: d    ahmiia. zaoϑre. barəsmanaēca.
Verse: e       hadiš.1 vāstrauuatō. āiiese. yešti:
Verse: f       vāstrəm. bərətəm.2 gauue. huδā̊ŋhe.3 āiiese. yešti:
Verse: g       gaodāiiūm.4 narəm. aṣ̌auuanəm. āiiese. yešti.


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.