TITUS
Svan Chrestomathy
Part No. 67
Previous part

Text: 62 
Page of edition: 59 
Line of edition: 2 
62. თამარ დეთფა̈ლ


Line of edition: 3       ჯვინელ ხელწფა̈რისგა მაშე̄ნე მაჴვმა̈̄რ ხა̄რ შვა̈ნ თამარ დეთფა̈ლს ( დედფა̈ლს).
Line of edition: 4    თამარ დეთფა̈ლ შვა̈ნისგა საყდრა̈რს ლჷმგა̈მვინ, შუკვა̈რს ლჷმსყა̈ვინ, შვანა̈რ
Line of edition: 5    ჩიდ მაშე̄ნე ხალტე̄ნა ი ჩიდ მაშე̄ნე იმედ ხა̄რა შვანრეშ ლაშჲა̄ლჟი̄ნ. ზურალა̈̄რს
Line of edition: 6    თამარ დეთფა̈ლი ჩიქქა გარ ახსყე̄ნახ ყო̄რქა ლაჴა̈დ ი ლუზორთექა ქა ლიჴედ.
Line of edition: 7    საბრალ ჲერვა̈̄ჲ ლჷმა̈რდე̄ლი, ეჩას ჩი̄ ხა̈მშედა̄ლა ი ჩი̄ ხოჩა̄მდ ხა̄რა ეჩქა̈,
Line of edition: 8    დვრევჟი̄ნ. ზავლადა̈ღ თამარ დეთფა̈ლ შვა̈ნს ლჷმა̈რდე̄ლი ლანქვე̄რდ ი ლინთვისგა
Line of edition: 9    -- კახე̄თ. თამარ გუნ ხოჩა მეფე ლჷმა̈̄რ. ლაბარგ ლაბჷრგჷნა̄ლა̈ ღუმირ ჩუქვა̄ნ
Line of edition: 10    ხა̈რა, ეჩეჩუ̄ნ ოთგა საყდა̈რ ჯგჷრა̈̄გ ლენჩა̈̄შიშ. ეჩე̄სგ'ა̄თხად სტამა̄ნრე ნა̈კვშუვა̈რი
Line of edition: 11    ჩვარდახ. ზავლადა̈ღ ხოშა ლაღა̈ლს ლენჩა̈̄ში ლა̄რაისგა ლჷმა̈̄რ ჩუ ლუსდგომე
Line of edition: 12    ი ეჩეჩუნ ოხსკო̄რახ შვანა̈რს რავქნა ჭჷშხა̈შ. აშხვჟი̄ნ თამარ დეთფა̈ლ ალმა̈̄ზ
Line of edition: 13    შვა̈ნთე. ლენჩა̈̄ში ლა̄რაისგა ჩვალსადგვმე̄ლი ი მე̄რმა ლადა̈ღ ლეჟა ლი̄ზი ხა̈კვდა
Line of edition: 14    უშგულთე. ალგენე̄ლიხ ჟი ჰამს ი ეჩჟი̄ნ ლჷღე̄ზე ქა ლჷმა̈̄რხ ყო̄რშა̈ ი მუღვა̄დერი
Line of edition: 15    ტვიბ, ერე დე̄ჲ სგვებდ ლა̄ზ ხა̄რახ ი დე̄ჲ ღვეშგდ. ამჟი̄ნ ეჩეჩუ̄ნ ეზა̈რ ხა̈ნს
Line of edition: 16    ჩვა̈მსედხ ი ალ არდგილ გუნ ლახლატა თამარ დეთფა̈ლს, ეჩქანღო̄ნ ოხბინა სერ
Line of edition: 17    ზავლადა̈ღ ლენჩია̈̄შ ლირდე. ტუბა̈რს ჩვოთკვი̄დახ, ეჩქას ეჯ ლა̄რაისგა ობა̈შ ბა̈
Line of edition: 18    რგ ოთშხუნახ ვორუნჩუ̄ნ ი ეჩეჩუ̄ნ ჩვა̈მსედელ ა̄ლ ბა̈რგ. თამარ დეთფა̈ლ ლჷმდაგ
Line of edition: 19    რო̄ლინ, ეჩქას სემ'ა̄ლა̈ბ ნარმა ლოხვჲა ი ეჩჟი̄ნ ალდაგა̈რ. იმედო ხაშდღვა, იფა̈̄რიშ
Line of edition: 20    ი უშგვლა̈ ნე̄სგა, და̈̄ს ხოხალ. ანღლიხ, ერე ლაბჷრგჷნა̄ლა̈ ღუმირ ჩუქვა̄ნ
Line of edition: 21    ესერ ალშდუღვე̄ლი.


Line of edition: 22 
იფა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.