TITUS
Svan Chrestomathy
Part No. 98
Previous part

Text: 93 
Page of edition: 81 
Line of edition: 10 
93. ლისჷლდათ ჯვინალდ


Line of edition: 11       სალდათობა̈ კენჭობ მა̈̄ნკვი ლა̈̄შხ ლა̈სვ, ეჩქანღო ბეჩვით' ა̄ნტა̈ხ ი ეჩე ლა̈სვ.
Line of edition: 12    სგანქა მჷზმა̄ლა დოხვტურ ჴედენდახ. ეჯჲა̈რს ვერზი ნაჩა̈ლიკ ი იშგენ ვარგა̈რ ხონჴერდახ.
Line of edition: 13    ამეჩუ̄ნ ოთარშა ვარგა̈რ ხეხო̄ლდახ. ვარგა̈რს თვითო̄ლაჟი̄ნ ლესჷლდა̈თი
Line of edition: 14    ქორშა̈რხა̈ნქა ჩაფჷლ ქა მეკდე ხა̄დხ ი აჯაღ ოხღელდახ მეჴჷ̄რა̈̄ლს ი კუმში მუჰვდის.
Line of edition: 15    სგანქა ხოჩა თვალა̈შ ლჷფკა̈̄ლვი̄ ჴედენდახ კენჭობჲე̄რ. ეჯჲა̈რი ობა̈შ კუმა̈შს
Line of edition: 16    ი კეთილს ათმახ შვანა̈რხა̈ნქა̄ჲ, რუსა̈რხა̈ნქაი̄. შვანა̈რ ჩაფჷლს ხაჰვედდახ ი
Line of edition: 17    რუსა̈რ -- მაჰვდას.

Line of edition: 18       კენჭობ ლიმჷრჲე̄ მი̄ში ლა̈სვ ი ერვეშდ ლჷზა̈ჲ მახეღვა̈ჟ ერვა̈̄ჲ ჩუ ლა̈სვ, მა̈გ
Line of edition: 19    მე̄ზი ლა̈სვ კენჭთე. ალჲა̈რს მინ' ა̄ფხნეგა̈რ სგა ხონჴერდახ ი ობა̈შ მა̄რე ინზო̄რო̄ლდა
Line of edition: 20    დოლა̈ სვიფისგა, ბეჩვის. მა̈̄ნკვი თხვიმ გეზალ ერვა̈̄ჲ ლა̈სვ, მა̄დეი̄ ეშხვი გარ
Line of edition: 21    ხორდა მიჩა დის ი მუს, ეჯას დე̄მ ა̈ჲა̈̄სგდახ, მარე ამეჩუ̄ნ ა̈თნახ ვარგა̈რ მინე ხოლა̄მ
Line of edition: 22    მახალს ი ჴერჴა̈რს. ესვა̈̄ჲ მინ ჩუ ლჷჩფჷლე ხა̄დხ, ეჯჲა̈რს ერხის მა̈̄ნკვი ხა̈ფშდუნახ:
Line of edition: 23    მუგვდა თხვიმ გეზლი̄რ ლა̈სვხ (მწერლა̈რ სგვებნავ ჩუ ლუშგვრა̄ნე ხა̄დხ ვარგა̈რს
Line of edition: 24    ი სიაჟი̄ნ იმვა̈̄ჲჟი̄ნ ხეკვა̈დხ, ეჩჟი̄ნ ხა̈გნუნახ. კვეტო̄ლს ეჯჲა̈რსი ხოთახ), ერხის ლაზმა̈̄ლჟი̄ნ
Line of edition: 25    ი დოხვტურრე ლაწვენაჟი̄ნ ლეგდ მერდად ხა̈ნშანა̈̄ვნახ ი ა̈გითე ფიშვდახ.
Line of edition: 26    ღვეშგმე პილს საბრალა̈ მჷნწირ ი უმჴერა̈̄შ გარ სედენდა ი ალჲა̈რს სგვებნავ კენჭს
Line of edition: 27    ხოკვა̄ნახ. კენჭ ესვა̈̄ჲ ხეხო̄ლდა, ეჯას სგა იგნახ სალდათრე სიათე. ეჩქანღო მა̈გ
Line of edition: 28    ჩუ ფხეჟენდა ბეჩვის ი ა̈გი̄-ა̈გითე ღჷრდახ. ჩუ ლუხვიჲე ესვაა̈̄ჲ ხა̄დ, ეჯა მუჟღვერ
Line of edition: 29    გარ ლასვ მე̄ზი. ქორთე ჴედენდახ ბეჩვიხა̈ნ, ეჩქას სალდათდ ლუხვიე̄მი ქორისგა
Line of edition: 30    ლა̈გვი̄ლჲა̄ლ ი ლიგვნი ლა̈სვ ლჷდგა̈რჟი̄ნა̄ გოვა̈რდ, ერვა̈̄ჲ თა̈ვისუფა̈ლდ
Line of edition: 31    ჴედენდა, ეჯჲარე ქორა̈რისგა ლა̈ხჲადა̄ლს იჩომდახ მასა̈რდ. სერ ეჩქანღო ი დო ლი̄ზა̈̄ლ
Line of edition: 32    დო ლა̈სვ ეჩქად სალდა̈თდ ლუხვიე ქორს დე̄მგვაშ იჩომდა. იმვა̈̄თე დო ხეკვა̈დ,
Line of edition: 33    ეჩხა̄ვ ღჷრდა ი მიჩა თხვიმი ხინს გარ ხეშდაბ. ერხი ჰა̈დურდ აბრეგდ ღჷრდახ
Line of edition: 34    სალდა̈თდ ლი̄ზი მამჭირშვ. სგა ლი̄ზი შომვა̈̄ჲ ლა̈სვ, ეჯ ლადა̈ღ სოფელხა̈ნქა
Line of edition: 35    სალდა̈თდ მე̄ზი ჟი იმარა̄ლხ ი ჟი იყვბა̄ლხ, სოფელ მა̈გ ეჩეჩუ̄ნ იფდგო̄ლდა. ერს
Line of edition: 36    ჰარა̈ყ ახღვა̈̄ნ ლეთვნა̈̄ლიდ, ერს ვარჩხილ ახღვა̈̄ნ საჩქვა̈რდ ი მასა̈რდ ლითვნა̈̄ლი
Line of edition: 37    ლა̈სვ ჰარყიშ. ამჟი̄ნ მე̄რმა სოფლი აფხნეგარი ხედო̄ლდახ, ალჲა̈რს სტრაჟნიკა̈რი
Line of edition: 38    ხონჴერდახ სგა მჷჲე̄სგიდ. ამეჩუ̄ნ ჰარა̈ყს ხათრახ ი იბნახ ლი̄ზის, ნა̈̄თია̈რ ი სოფლა̈რ
Line of edition: 39    ვეშგიმ ესჭიმდახ ლაგვნუშ ლჷდგა̈რი გუვა̈რდ. აშხვ სალდა̈თს ეშხვი მჷგნე
Line of edition: 40    სგა ხენჴრინო̄ლდა ქუთა̈̄შდ. ეჩხე̄ შვა̈ნთე ღჷრდახ. ეჩქას სალდა̈თდ ლუხვიე ერვა̈̄ჲ
Page of edition: 82  Line of edition: 1    ჩუ ლა̈სვ, დემგვაშ აზა̄რა ლეღე̄შგა̄ლდ: ყუნზელს, ხამა̈რს, დაჴა̈რს, ქათლა̈რს
Line of edition: 2    ი ამკა̈ლიბს იმვა̈̄ჲ ხეთხნო̄ლდახ, ჩი̄ ა̈ჲა̈̄სგდახ ი ეჯ ლე̄თ იმვა̈̄ჲ ისდგომო̄ლდა, ეჩეჩუ̄ნ
Line of edition: 3    ჩვა̈ჲსენდახ, ჟი იმა̄რახ ი ჩუ იზობდახ. ეჯ მი̄შვ ლელტხა-ჩო̄ლირს მა̈ნცინ ჲედ
Line of edition: 4    ჯვე̄დჲას ხორდახ ი ჲედ ჩუ ხოპჟუნა̈̄ნხ. ამჟი̄ნ ლეჩხუმ ლექვა ი ქუთა̈̄ში გაჭრილ
Line of edition: 5    ლექვა, იმვა̈̄ჲ ხეთხნო̄ლდახ, დე̄მგვაშ აზა̄რახ. მედუქნას ლახე დუქნი ყო̄რა̈რ ჩუ
Line of edition: 6    მჷკა̈რ ხა̄დხ, ხოშგბენდახ სგა ი მა̈ზუმვა̈̄ჲ ხეკვა̈დხ ღვინა̈ლ, ეჩზუმს ჴიდახ ქა̄მენჩუ̄ნ
Line of edition: 7    ი ჩუ ითრახ. ქა და̈̄რ იმგვაშ მოშ ხაყლა მაყალშვ, ადო ეჩქას ხოლა̄მდ ჴიდახ.
Line of edition: 8    ამჟი̄ნ ლა̈ხი̄რულშვ ი ტაფა̈ ლაჩმოშვ ჩუ ღჷრდახ ქუთა̈̄შთე. სტრაჟნიკა̈რ სგა ხა̈ბრა̈ჲახ.
Line of edition: 9    ეჩეჩუ̄ნ ჩვაყვლუ̄რახ. ერს იმთე ხეხო̄ლდა ი ერს იმთე რუსე̄თთე ლი̄ზი. ობა̈შ
Line of edition: 10    მა̄რე ღალ ლი ლჷდგა̈რ ეჩე̄ ლასჷლდა̈თისგა შვა̈ნხა̈ნქა ნა̄ზვ მახეღვა̈ჟ.


Line of edition: 11 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.