TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 33

Page of edition: 27 Line of edition: 1    ოშვა^̄̈ჲდ ქორა̈რ ხო̄გა̈ნხ, ეჯჲა̈რს აყვლუ̄რახ, ხოდრა̄მ ქორა̈რს ნა̈დვა̈რს ხადა^̄̈სგდახ.
Line of edition: 2    ნამხუბე̄მი შელდჟი̄ნ დეშ ხეხო̄ლდახ ქორა̈რ, მარე ეჯჲარე მქაფდ გიმს და^̄̈სგდახ
Line of edition: 3    მასა̈რდ. ამჟი̄ნ მუმხუბი̄ შელდჟი̄ნ ჩვა̈მგუვახ ჩი̄ ი ღვეშგემპილს ჯლა̈ჲს აკვა̄ნახ
Line of edition: 4    ი მა^̄̈ჲ ჲა̈ს ხეხოლდ' ე̄ჯას ჟი ხესკბენდა. ეჩქანღო ითშდახ მორვა̈რს. ალჲა̈რს
Line of edition: 5    ღვაჟა̈რ თვითო̄ლაჟი̄ნ მა̈გ ქა ხომბა̈ვდახ მინე-მინე ნა̈ჭირვს ი ნა̈ქიმვს ქორთე̄სგა
Line of edition: 6    მე̄რმა̄ლე ნამსგიდვინ. მორვა̈რ ჩუ ისგვრო̄ლდახ, სგვებნა̄ვ ქორა̈ ხოშა̄მ ხოქვცახ
Line of edition: 7    ნამხოშჲე̄რს დაბშვ ი ჲედ ლა̄როშ ნამხუბა ჟიქა̄ნქა. ეჩქანღო ხოშე̄ლ ნა̈ჭირვ ჲერვა^̄̈ჲ
Line of edition: 8    ხებჟა^̄̈ნხ ქორისგ" ე̄ჯას ხოქვცახ, მა^̄̈ სახს ლახღვა̄ნხ ეჯას, ლლღედად. ეჩქანღო
Line of edition: 9    და̈ბ-ლა̄რას ი ცხეკა̈რს აყვლუ̄რახ ჩი̄ მუგუდ ი ეჩქანღო ჯლა̈ჲს აკვა̄ნახ. მა̄ჲ
Line of edition: 10    ჲა̈ს ხეხოლდ, ე̄ჯას ხესკბენდახ მა̈გ. ამის ჩი̄ ქ'ა̄სრულახ, ეჩქას ნა̈ბოზს მა̈გ ჟი იყვბა̄ლხ,
Line of edition: 11    მო̄რვა̈რი ეჩეჩუ̄ნ ხეყა̄დხ, ჰარა̈ყს ჲთრახ ი ხემზრდახ უშხვა̄რ, ერე ლი̄
Line of edition: 12    თა^̄̈ლ ხოჩა̄მდ ათმარჯუნდე̄დხ, ლეჰდრად ნო̄ს ოხჴეხ ჩი̄ ხოჩა̄მ გარ ხოვა̄დდახ უშხვა̄რ
Line of edition: 13    ი ამჟი̄ნ ჩუ იყვლუ̄რა̄ლხ ლაყხა̄ლუშ ი ლაგვნუშ. ჲესვა^̄̈ჲ ქორ მო̄მ ხეხო̄ლდა,
Line of edition: 14    ეჯა მე̄რმა მეზგე̄მი ქორთე ღრდა ი ეჩ' ა̄შვა ლემასგვ. ჰა̈რი ქორს უშხვა̄რ და^̄̈რ
Line of edition: 15    ხა̈მდუნა ი დე̄ჲ ნა̈დჲა̄ნვი̄რს ჲა̈რ ხეშგომდა უშხვა̄რ, ეჯღ'ე̄რე ქორს ლიკვა̄მე ხოჩა
Line of edition: 16    ხა̄რ ი ქორა̈ ფუსდს ხა̈ხჲა̈დნი ა̄დუ მე̄რმე̄მი ლიჴედ მიჩა ქორთე. უ̄თა ქორ ესვა^̄̈ჲ
Line of edition: 17    ხეხო̄ლდ', ე̄ჯას გიმ ხოხვრა ხეხო̄ლდა, მარე ეში̄ ხაჩო̄ნდა ამი̄ ლიხვჲე, ეჯღ' ე̄რე
Line of edition: 18    მახან ლილგიმა^̄̈ლს ეში̄ ალა ხოცხა^̄̈ნ. ქორისგა ბა̈რგსი̄ ნამხუბე̄მი შელდჟი̄ნ იყვლუ̄რახ
Line of edition: 19    ი უ̄თა ქორა ფუსდ მიჩა მა̈ხვია ბა̈რგ-ნაბა̈რგს ჩი̄ მიჩა მიჩ' ა̄დგილჟი̄ნ
Line of edition: 20    ადა̄წყა. ესვა^̄̈ჲ ქორ მო̄მ ხეხო̄ლდ' ე̄ჯა შიშდ იბნა ქორა̈ ლაგამ ბა̈ჩა̈შ, ქვიშე̄მიშ, კირიშ,
Line of edition: 21    ჭე̄რიშ ი დი̄რი ლიმა̄რეს, ჟი იგნა ჴელვანა̈რს ი ნა̈ჴლვანი̄რს სგვებნა̄ვ ხაჰვედდა:
Line of edition: 22    ჲერხის გმშვ ი ჲერხის კუმაშშვ. ჴელვანა̈რ ბა̈რგი ლამა̄რასი ხომა̈რჯვდახ მეზგა.
Line of edition: 23    ჩუ ნა̄თა̄ლუნღო მესვფელა ლახე ხეხო̄ლდახ ალ ნა̄თა̄ლვ მეზგე̄მი მა̄რა^̄̈ლს მანგვამშა̄ლ
Line of edition: 24    ხაყლახ: "მასა̈რდ მასდიკ ისგვეჲ ლი̄თა^̄̈ლ, მარე მა̄დ ჯასმაჲა: ხაბნა უნჭყ
Line of edition: 25    ი ლახვბა უ̄თ'ე̄სერ და^̄̈ს ხოწვა. ცოდ ხა̈სვდ მე̄თა̄ლდ, მარე ხოჩა̄მდუ აჯმარჯვახ ი
Line of edition: 26    ლეჲდრე ნო̄სავ ჯა̄რხ. თვითო̄ლაჟი̄ნ ეჯგვა̈რუ აჯფასახ, უ̄თად ერ ხა̈სვდ". ამკა̈ლიბ
Line of edition: 27    ამბვა̈რს ეჯჲა̈რი ხაყლახ, ჲერვა^̄̈ჲ მსმინა^̄̈ლი ლა̈სვხ ი ჩი ხოლა̄მ გარ ხოსმინა^̄̈ლდახ,
Line of edition: 28    ერე იმვალეჟი̄ნ ჩუ მომ ოთ̄თე̄ნხ. ალ მეზგე̄მი მა̄რა^̄̈ლ ი ზურალა^̄̈რ ხა̈ტხახ: "ჰე̄
Line of edition: 29    ხიჲად, ივასუ ხა̈რი, ცოდდუ ახხვიჲე̄ნა ეჯას, ჲერვა^̄̈ჲ ლი̄თა̄ლე თხვიმ ლ̄მა^̄̈რლეს
Line of edition: 30    ი ჲეშვა^̄̈ჲ ბედ ალა ნა̈ჲ ნა^̄̈ც". ამკა̈ლიბ ლფშირ მეზგე̄მი ლი̄თა^̄̈ლ სოფლიშდი მა̄მ
Line of edition: 31    ლა̈სვ ლეცხე̄ნე, ეჯღ' ე̄რე ჩუ ლპრი̄ნწკა ეშდიჲარვ-ეშდოხვიშდ მეზგე̄მი ლიმშედა^̄̈ლ
Line of edition: 32    გალდამჟი̄ნ ი ლა̈ლგიმა̄ლჟი̄ნ სურუ გარჯს ხოჴდა ეჩურდი̄ ჩუ ლსა̄ბრალა სოფელს.
Line of edition: 33    ეჩნქა ფხულე̄მი ლადა^̄̈სგ გიმი გუ̄ღა ფიშრა̄მინ ტე̄ვა ი ლიყა^̄̈რჲე̄ლ ხოჩ̄დენდახ
Line of edition: 34    მახა ნა̄თა̄ლვ მეზგა̈ლს, ხოშა ლაღა̈ლ ჰა^̄̈ღვრალე ბედჟი̄ნ ტე̄ვახ, ამღა სოფლი
Line of edition: 35    ხოჩ-ხოჩა̄მ მა̄რა სგა ლენჩდა^̄̈ლ ხა̄დ ი გვეშ ჟი ლესყე̄ნე, ეჩხა̈ნ-ამხა̈ნ ჩუ ლესყე̄ნე
Line of edition: 36    მეზგა^̄̈ლ, ერე დაგრობ ნომ' ა̄ხჩ̄დენხ. ამის ლადღარე თვა̈ფ' ა̄ხჭიმდა ი ალა
Line of edition: 37    მასა^̄̈რდ კვა̈დ ლა̈სვ მოჭირ გლეხიშდ.

Line of edition: 38       ლისგვრე̄შღა მუშვა̈ნ მა̄რე დე̄მის ივჟა^̄̈შნა^̄̈ლ, ხაშდბა დე̄მგვაშ ი ეჩქას დე̄მის
Line of edition: 39    ჲა̈ს ხა̈მდუნე თხუმ გვაშ ლასყე̄ნაჟი̄ნ, მარე ლიჩვმი̄ში ლიკვა̄ნე მუშვა̈ნ მა̄რა სურუ
Line of edition: 40    ხამჭირ.

Line of edition: 41       ხოჩე̄ლ მა̈ნკიშ ჲერვა^̄̈ჲ ლა̈სვხ, ეჯჲა̈რ ხომა̈რჯვდახ ეჯ მეხვიბს, ესვა^̄̈ჲ ქორ მო̄მ
Line of edition: 42    ხო̄გა̈ნ, ქორა̈ ბა̈რგ ლა̈ჴდაჟი̄ნ, ლა̈ლგიმა̄ლჟი̄ნ ი იშგან გოშა̈რჟი̄ნ. ჲერვა^̄̈ჲ ლი̄თა̄ლა^̄̈ლდ
Line of edition: 43    უშხვა̄რ ხოჩა̄მდ ხოსყე̄ნა, ეჯჲა̈რ ნა̄თა̄ლუნღო̄ჲ ხოჩა̄მდ ხოსყე̄ნახ უშხვა̄რ.

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.