TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 34

Page of edition: 28 Line of edition: 1    ჲერვა^̄̈ჲ ლი̄თა̄ლა^̄̈ლდ ხოდრა̄მდ ხეჩ̄დხ უშხვა̄რ, ეჯჲა̈რ ნა̄თა̄ლუნღო ჰა̈დურდ ხოდრა̄მდ
Line of edition: 2    ხეჩ̄დხ უშხვა̄რ ი ფიშრა̄მინ გვი̄მიზიგ ხა̄დხ. ჩუ ნა̄თა̄ლუნღო ლახე ლეჭვდიე̄ლ
Line of edition: 3    გვეშ-მაგვეშ ლა̈სვ, ეჩქას ჯვინელ ქორა̈ მახვშითე̄დ ღრდახ ლა̈ჭვდიჲა̄ლთე,
Line of edition: 4    ოდ' ე̄ჯა ლჲა̈რ ლა̈სვ, ეჯა მა̄მ ხა̈მდუნა თხუმ ი ლაგას ხა̈გნა ჩი̄გვაშისგა, მა^̄̈ჲ ჩუ
Line of edition: 5    ხოხალდა.

Line of edition: 6       მა^̄̈ნკვი̄ ზავჲა̈რისგა ნა̄თა̄ლუნღო სამხუბ ჩუ დე̄მგვაშ ხოთვფახ უშვხა̄რ დე̄ჲ
Line of edition: 7    ჭირჟი̄ნ ი დე̄ჲ ხინჟი̄ნ, ეჯა მა̄დეი, ჲერვა̈ჲ უშხვა̄რ ხოჩა̄მდ ხოსყე̄ნახ, ეჯჲა̈რ ხოჩა̄მ
Line of edition: 8    ნა̄პუს ჩუ დე̄მ ისრახ უშხვა̄რურდ, ეჩჟი̄ნ ხა̈ლსა̈რნხ მა̈გ უშხვა̄რ. მა̈ჲ საკვრელ ლ',
Line of edition: 9    ე̄რე ჩუ ნა̄თა̄ლუნღო უშხვა̈რ ხე̄წე̄ნალდახ ლაყა^̄̈რჲა̄ლჟი̄ნ ირო̄ლ ა ლაცვა̄ლჟი̄ნ.
Line of edition: 10    სოფელისგა ლახე ლაშდღვა̄ლ ლა̈სვ, ეჩქას ღვაჟა̈რ მა̈გ აშხუდ ღრდახ ი მა̈გ აშხუდ
Line of edition: 11    ისგვრო̄ლდახ, ეჯღ' ე̄რე ლახე ლიცვა^̄̈ლ ი ლიყა^̄̈რჲე̄ლ ანჩდენ, ეჩქას მა̈გ გა̈ნხა̈ნ
Line of edition: 12    ხა̈გნე̄ნ უშხვა̄რ ი ლეთხე̄ლი დო̄რ ლმა̄რლესვხ. ქა̄მენისგა მსგდი აჯაღდ ხენტჲა̄ლ
Line of edition: 13    მა̈გ ალჲა̈რს ი ხოხალდ, ე̄რე უშხვა̄რნე̄სგა ჩი ლე̄თი-ლადა̈ღ ხოჩა გვი ხედო̄ლხ,
Line of edition: 14    მარე ეჩი̄შ მა̄მ ხოხალდახ, ერე სგვებნე ლადღა̈რს გარ ლა̈სვხ ნასყა̄ლვ დაბრე
Line of edition: 15    ჰა^̄̈ღვრა̄ლე ბედჟი̄ნ ლიცვა^̄̈ლხა̈ნქა.

Line of edition: 16       ამჟი̄ნ იზგა ხვა^̄̈ჲ ხა̈ნს ჯვინელ უ̄თა მეზგე ი ღვეშგმე პილს სერ ნა̈ფშიროშ ი
Line of edition: 17    უშხვა̄რა̈ ნავყია̄ნუშ ჩუ ი̄თა̄ლ. უ̄თად ჩიჲა̈ ლახრბა̄ლ ლა̈სვ, მარე ჩუ ნა̄თა̄ლუნღო
Line of edition: 18    ღალ ფიშირ მეზგე ხეფსო̄ლდა ი ჩი̄ ხოლა̄მდ ი საბრალდ ხა̄დხ. ალა̄ჲ ლე̄ქვი̄სგ
Line of edition: 19    ლ' ე̄რე ლახე მერხა̈ლდ მეზგე̄მი მა̄რე მერხა̈ლდ მეზგაისგ' ა̄რდა ი ჰარაყს ხათრახ,
Line of edition: 20    ეჩქას ამზრა^̄̈ლდა: "მინე ქორს ესერ ეჭკა̈ლიბ კვა̈მუ ესო̄ზიხ ლეზგრჟი̄ნ, იმვა^̄̈ჲჟი
Line of edition: 21    ალ ი ალ ლფშირ მეზგ' ე̄სო̄ზი".

Line of edition: 22       შვა^̄̈ნისგა ჯვინალდ ფიშირ უ̄თა მეზგა^̄̈ლ ლა̈სხვ: ლენჯა^̄̈რ: ნატროშა (უდე̄სია̄ნა̈რ),
Line of edition: 23    გუვა^̄̈ლშა (გულდა̄ნა̈რ). ლატლის: ნუაშე̄რა (ფა̈რჯია̄ნა̈რ), გირგვლია̄ნა̈რ.
Line of edition: 24    მესტიას: გეგა̄ნშა (გვა̈რლია̄ნა̈რ), მლახს: კახია̄ნშა (კახია̄ნა̈რ), ციოყ̄ლა̈რ (ქურდია̄ნა̈რ).
Line of edition: 25    წვირმის: ფუთაშა (თამლია̄ნა̈რ). ელის: გუაშა (სამსია̄ნა̈რ). ფა̈რს: ძეგია̈რ
Line of edition: 26    (ჩხვიმია̄ნა̈რ). ჩუბეჴევს: ბურნაყა̈რ (ქალდა̄ნა̈რ). ამჟი̄ნ სოფელისგა ეშხუ-ჲო̄რი
Line of edition: 27    მეზგე ჩიჲა^̄̈გ ხეჩდ ლფშირ ი ჯვინელ. ხოშა̄მ ლფშირ მეზგახა̈ნქა^̄̈ ნა̄თა̄ლვხა̈ნქა
Line of edition: 28    ჲერვა^̄̈ჲ ჩუ სიდხ ხოშა̄ლ, ეჯჲა̈რს მა̈გ ხეჭვდჲე̄ლხ ლილზიგა̄ლე გვაშვ, ეჯღ"
Line of edition: 29    ე̄რე ხოჩა̄მ მეზგაისგ' ე̄სერ ლიხ ნარდა̈ვ ი ჩუ ხეხლიხ, იმვა^̄̈ჲჟი̄ნ ი მა^̄̈ჲ ჩიქქა ხეკვდენი
Line of edition: 30    ლიმშავ, ლილზიგა^̄̈ლ ი იშგან გოშრე ლისყე̄ნე. ალჲა̈რი̄ მა̈ჲ ლა̈თჲა̄ლს ხა̄რხ ლაგას
Line of edition: 31    ხა̈გნეხ მინე მეჭვდჲე̄ლას ი ლახე ჲა̈რ ხოჰვნა̈რიხ, ეჩქას ქა ხო̄მბვიხ, იმვა̈ჲ,
Line of edition: 32    ჟი ლირდე ხა̄დხ ჩუ ლი̄თა̄ლა̄ლვ მინე ხოშა^̄̈ლს ი ყლეხ: "ჰე̄, ხიჲად, ეჩქა^̄̈ დვრევს
Line of edition: 33    ივალადა̈ღ და̈რმოშ ლა̈ხტეხნი ნიშგვეჲ გვა̈რიშისგა, ნა̈ჲ ერ ლიზგე ი ლირდე ნა̄დ".

Line of edition: 34          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.