TITUS
Svan Chrestomathy
Part No. 120
Previous part

Text: 115 
Page of edition: 96 
Line of edition: 1 
115.მოხელა̈̄ ლითში სოფელისგა


Line of edition: 2       ჯვინალდ სოფლა̈რისგა მოხელა მო̄შ შვიმჟი̄ნ ითშო̄ლდახ ი არდახ ეჩქად-ეჩქად
Line of edition: 3    ე, ოდე სოფელ მახა დო იცა̈̄დდა, ლახე ჯვინელ მოხელა დოშ ხემურჯო̄ლდახ
Line of edition: 4    ლა̈ჲდ ხოჩა.

Line of edition: 5       ლისგვრე̄ ლადა̈ღ სოფელ თვით მეზგახა̈ნქა ჩუ იყვბა̄ლ. ლაყვბად ჲედ სანყვირს
Line of edition: 6    აშვმახ, მა̄დეი ჩვაზჷნგლა̈გდახ. ლაყვბალა̈ ზანგლა̈გ ქა ხოთრი̄ნდახ ი ეჩი̄
Line of edition: 7    ჰერს მა̈გ გუდ ჴედენდა. ჩუ ლუყვბანღო მა̈̄ნკვი მოხელა̈̄ მჷთშის ითიშდა სოფელ.
Line of edition: 8    ალჲა̈რ ქახიქა ღჷრდახ ეჩჟი̄ნ, ერე ჟი დო̄ს ოჰუნრე̄ნს მინე ლი̄მბვა̈̄ლ. ალ მჷთშა
Line of edition: 9    ქა ითიშდახ მოხელას ჩიქე მამასახლიშს, ღო სუდია̈̄ლს ი ეჩქანღო პოპოშნიკა̈რს,
Line of edition: 10    ამჷნქა ითიშდახ აჯაღ ხერსტავა̈რს. ამის ლაგას ხა̈გნახ, ეჩქას ქა ჴედენდახ სოფელთექა
Line of edition: 11    ი ქ'ა̄უ̄შხახ, ჲერვა̈̄ჲ ა̈ნთიშა̈̄ნხ. ჲერხი ლჷთიშს გუნ ხამჭირდახ ამხავთე̄'სგა
Line of edition: 12    ლი̄ზი, მარე სოფელ ჰაჯს დე̄მის ხაკა̈დდა ი ჩუ ლეჩვმე ხა̄დხ.
Line of edition: 13    ობა̈შინ მოხელათე̄'სგა ი ხერსტა̈ვდ ეჯკა̈ლიბა̈რსი ითიშდახ ე, ჲერვა̈̄ჲ სოფელისგა
Line of edition: 14    მაშე̄ნე კერპ ლა̈სვ ი ნა̄ქვა̈ უჩვმინა, "ღვ'ე̄სერ ჟ'ა̄ნკვიჰე, მაგვა̈რუ გა̈მა̈შ
Line of edition: 15    ხა̈̄ც მიჩ ლახე კერპდ ჲა̈რ ხეგნო̄ლნი სოფელისგა".

Line of edition: 16       ლჷთიშ მა̄რა̈̄ლს სოფელ ლაჴვა̈მთე ა̈ჲა̈̄სგდა. ეჩხა̈ნქა ხა̈ტს ქ'ა̈̄სგვჯინა. მჷგჷრცა̈მი
Line of edition: 17    სგვებინხა̈ნ ხეგნოლდა ლჷთიშს ი ქა ხოგჷრცა̈მდა. ჩვამბა̈ნდა ამჟი̄ნ, ერე იმვა̈̄ჲჟი
Line of edition: 18    მინე ლირდე̄-სერდე ხა̄რხ, ამჟი̄ნ სოფლი სერდე მო̄დ ხა̈̄ცს, იმჟი̄ნ თხუმთე
Line of edition: 19    ი ქორთე ხოჩა ხაკუხ, ამჟი̄ნ სოფლი ხოჩა̄მ მო̄დ ხესკო̄რა̄ლდე̄დხ. გვაშვ ლასყე̄ნაჟი̄ნ
Line of edition: 20    წა̈მ ი მეჰერ, ამახვ ი მჷკეთ მუგუდ მო̄დ ესყედა̄ნახ, სოფელს ხოლა მახალ ჰე̄სა
Line of edition: 21    ლახჴჷმრახ, ღე̄რბათვდ ხოხვრა ხოშგურდე̄დხ ი ხაყვლი̄ნდე̄დხ ი მარად ხოშა,
Line of edition: 22    ალა ჰე̄სა ჩვემინეხ, ჩიგარ მეწვინ სამჷრთა̈ლს დო̄მ იჟღვა̄ნე̄დხ მა̄რათექა ი სოფელთექა,
Line of edition: 23    კუმა̈შდ ი ჩაფჷლდ ჰე̄სა ჩ'ოთღორვახ.

Line of edition: 24       ლახე ამჟი̄ნ ქ'ა̄დჲახ ალ გარცა̈მ, ეჩქას ჩვა̈მზირდახ ი ლახე მო̄დე, ეჩქას ხოლა̄მ
Line of edition: 25    გვა̈რიშჟი̄ნ ჩვაჭთუნახ. ქა ნაგჷრცამუნღო მოხელა გარცა̈მს ხა̈ტხახ, ერე მინს
Line of edition: 26    ჩუ მა̈̄ჲ ხეხლიხ ი ლა̈თჲა̄ლს ი ღვენი ბედს მა̈̄ჲ ხე̄რიხ, თხვიმ ჩვე̄ს' ა̄დზა̄რახ სოფლი
Line of edition: 27    ბედჟი̄ნ, ტკიცჟი̄ნ მო̄დ არდე̄დხ, სოფლი ხოჩა̄მ გარ დო̄მ ხეშდა̈ბხ.
Line of edition: 28    ალ გარცმი ნა̈ტიხუნღო მოხელაჲ ჩვანბა̈ნდახ სოფელს, ერე "მინე ლი̄ქვს ჩუ
Line of edition: 29    დო̄მ იჩომდე̄დხ". სერ ეჩუნღო ჩუ ფხეჟენდახ.


Line of edition: 30 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.