TITUS
Svan Chrestomathy
Part No. 140
Previous part

Text: 135 
Page of edition: 106 
Line of edition: 26 
135. ლილკირა̈̄ლ


Line of edition: 27       მეზგე ლიგმა̈̄ლს ხამურჯ', ე̄ჩქას სგვებნა̄ვ კირს, ქვიშა, ბა̈ჩს, მეგემს ი ლელკირს
Line of edition: 28    იმა̄რე. ჩიდ მა̈ნკვი ლა̈კირს ჲჷგემ. ლა̈კრი ლაგა̈მჟი̄ნ მუმურჯვას იწე̄ნე მელკი
Line of edition: 29    რა̈̄ლ მეზგე. ჩიქი კირი ლაგა̈მ ფათქს აბჷრჯეხ მა̈ზუმვა̄ჲ ხაკა̈ფხ, ეჩი̄ზუმს. ეჩქანღო
Line of edition: 30    ფათქისგა ისგხეჟი̄ნ გჷრკიდ ბაჩვშ ჲჷგემხ ი ეჩქანღო სერ კირი ლიგემს იბნეხ.
Line of edition: 31    ჲო̄რი სგა̈̄ნჩუ̄ნ ა̈რი სგა̈̄ნ მჷგა̈მდ ი იშგენ ქა̄მენ ხაშდბახ ლიგემს ი კირი კულრე
Line of edition: 32    ლინგჭვეს. ხოშა̄მ კულა̈რს ეშ ხოწბინეხ სგა̈̄ნჩუ̄ნ ი ეჯჲა̈რს ქა̄მენ მოშდა̈ბ ჩვა̈ნგჭე
Line of edition: 33    კირშვჷდ. ეჩქანღო ქა̄მენქა ხა̈შდეხ ხონცინა̄მ კირს. ამჟი̄ნ ჟი ჴედნი ჟი̄ბა̄რ, ეჩქას
Line of edition: 34    ეშხუ მა̄რე გარ სედნი სგა̈̄ნჩუ̄ნ ლა̈კირისგა ი ეჯ, ა̈̄მსგვენა̈̄ლი სგა̈̄ნ ლა̈კრი ლიგემს.
Line of edition: 35    ამჟი̄ნ ღვეშგმე პილს სგა̈̄ნჩუ̄ნ მერდა თხვიმ გარ ხოწვა ი ალა ეჩის ჩუ იყვფე ლა̈
Line of edition: 36    კირხა̈ნჩუ̄ნ, ეჩქას ცუყვბას ხა̈ტყციხ ჟიქა̄ნჩუ̄ნ ი ლა̈კირ სგა̈̄ნჩუ̄ნ ჩუ ლჷგე ლი.
Line of edition: 37    სგა̈̄ნჩუ̄ნ მერდე ქა ჴედნ', ე̄ჩქას სერ და̈̄ს ხაყვლუ̄ნი ლა̈კრი ლირეღვდ. ჟიქა̄ნ ჰა̄ლ
Line of edition: 38    მოშ ხუღვეხ, ეჩის ჩი̄ ჟი ხადე̄სგიხ. ლა̈კირხა̈ნქა ოდე სგა̈̄ნჩუ̄ნ მერდე ქა დო ჴედნი,
Line of edition: 39    ეჩქად ეშ გარ იფუნჩულა̈̄ლ მა̈გ. ეღჯ, ე̄რე კჷლთხი ჰერ ესერ ხოლა ხა̄რ ლა̈კირს
Line of edition: 40    ჩუ ლაგამჟი̄ნ ი ლირეღვდ ესერ ლი ლემყა̈ლვ. ლა̈კრი ლიგემს საკუთარდ ქ'ა̄სრულეხ,
Page of edition: 107  Line of edition: 1    ეჩქას სგა̈̄ნჩუ̄ნ მა̈̄ნკვი̄ მერდე სგა̄დ ღჷრი ლა̈კირთე̄'სგა, აშხვ ბოთლიკ ჰა
Line of edition: 2    რა̈ყს ჟი ხა̈მზჷრი სოლომნს ი ეჩქანღო ლემასგვ ა̄შვე ი ქა ჴედნი. მჷშჲა̈რ ქა იბრა̈̄ლხ,
Line of edition: 3    ლაკირისგა ლემასგვ ქ'ა̄ღუ̄ზეხ ი ეჩქანღო ჩუ იდჲარა̈̄ლხ ი ჰარა̈ყს ჲჷთრეხ. ნა̈ბოზს
Line of edition: 4    მეზგე ლა̈ჲსას ა̈ჲსენი. მუმურჯვას ქ'ა̄წსი ი მასა̈რდ ხინს ასყე̄ნე. სოფლი ხოხვრა̈̄ლ
Line of edition: 5    ქა̄მენჩუ̄ნ ლელკირს ახე̄რხეხ, ხოკვილცხა̈̄ლიხ ლა̈კირს რიჰდ. ეჯჲა̈რსი ჰარა̈ყ ხუღვეხ
Line of edition: 6    ლეთრად. ქორს ჰა̈დურდ გუნ ქეიფ ი მაშდმა̄რობ ხა̄რხ. ლა̈კირს ჲარვ ლე̄თ-ლადა̈ღ
Line of edition: 7    ხოშვეხ.


Line of edition: 8 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.