TITUS
Svan Chrestomathy
Part No. 141
Previous part

Text: 136 
Page of edition: 107 
Line of edition: 9 
136. ლა̈კრი ლიგემ


Line of edition: 10       მეზგე ლახე იგმა̈̄ლ, ეჩქას ჩიქე ბა̈ჩს, კირს, ქვიშა, ჭერს, დირს ი იშგენ ბა̈რგს
Line of edition: 11    ამა̄რე. ამი̄ ნამა̄რუნღო მა̈̄ნკვი ხაკუჩ ერე ლა̈კირ ადგას. ლა̈კრი ლაგა̈მჟი̄ნ მეზგე
Line of edition: 12    ჴელვანა̈რჷნქა ნადა̈რსი იწვა̈ნი. ჰამს სგვებნა̄ვ ჰარა̈ყს ხა̈მზჷრიხ სოლომნს, ერე
Line of edition: 13    "ლა̈კრი ლაგა̈მჟი̄ნ ლემჷრცხად დო̄რ ა̈დსერის ი ხოჩა სტა̄რვინ ესხა̄რვნას ლა̈კირს".
Line of edition: 14    ჩუ იხე̄ვსა̈̄ლხ, ჰარა̈ყს ჩუ ჲჷთრეხ ი ეჩანღო ჩიდ მა̈̄ნკვი ხოშა̄მ ჯო̄დი ფათქს აბჷრჯეხ,
Line of edition: 15    ამის ხაჟხა გვემ. ალა ლი კირი ლაგა̈მ ი ეჩქანღო ჩუ ლჷშიხ კირი შედ. ფათქა̈
Line of edition: 16    ნაბჷრჯჷნღო სგა̈̄ნჩუ გჷრკიდ აშხვ ალა̈ბზუმ ნაკლათხა ბა̈ჩა̈ ჴვილას ხაგემხ ი ეჩქანღო
Line of edition: 17    იბნეხ კირი ლიგემს. სგვებინისგა აშხვ ყო̄რჲა̄ქს ხა̈ჩოხ ი ხოშა̄მ ბა̈ჩა̈ ლაგა̈გია̈რს
Line of edition: 18    აკჩეხ, ეჩი̄ ჟიქა̄ნქა სგელ კას ხალფა̈რიხ. ლა̈კრი ლაგა̈მჟი̄ნ ჲერხი სგა̈̄ნჩუ̄ნ
Line of edition: 19    ლჷგხ ი ინკვეხ ლა̈კირს, ჲერხი ქა̄მენისგა ხემშედა̈̄ლხ. ჟი ინი̄კვი, ეჩქას სგა̈̄ნჩუ ეშხუ
Line of edition: 20    მა̄რე გარ სედნი. გუნ ჟი ნეკვნი ი ჟი იხუ̄პი ლა̈კირ, ეჩქას სგა̈̄ნჩუ̄ნ მერდა
Line of edition: 21    თხვიმ გარ ხოწვა, ეჩქანღო შიჲა̈რ გარ ი ღვეშგმეპილს ნე̄სგანჩუ̄ნ თალს ხატყციხ.
Line of edition: 22    კჷლთხი ჰერს და̈̄რ მოშ იკედ ლა̈კრი ლა̈ნკვაჟი̄ნ ი სგა̈̄ნჩუ̄ნ მერდა მასა̈რდ
Line of edition: 23    ლემყა̈ლვ ხა̄რ, ეჯღ' ე̄რე ლა̈კირ ლახ სგა̄თრეღვნი, ეჩქას სგა̈̄ნჩუ მერდე ჩუ ილტჷნი.
Line of edition: 24    ამღა ლა̈კრი მჷგა̈მდ გუნ ლჷხა̈ლ ი ჩუ ხეხლი ხოჩა̄მდ ლიგემ, ეჯა გარ ხაშდბა.
Line of edition: 25    თალა̈ ნა̈ყირუნღო სერ მა̈ზუმვა̈̄ჲ ხეღვე̄ნი მეზგა კირ, ეჩზუმს ჩი̄ ჟიქა̄ნ ჟი ხა̈შდეხ.
Line of edition: 26    კირ ჩუ შდეხნ', ე̄ჩქას ჟიქა̄ნ ჯვა̈რს ხოსყე̄ნეხ ი სერ ჟი იშვმინეხ. ეჩქანღო
Line of edition: 27    ეშხუ ქორა̈შ სგ'ა̄დ ღჷრი ლა̈კირთე̄'სგა. აშხვ ბოთლიკ ჰარა̈ყს ჟ'ი̄დ ხა̈მზჷრი სოლომნს
Line of edition: 28    ი ეჩქანღო სგა̈̄ნჩუ̄ნ ლემასგვ ა̄შვე. ლემასგვ ქ'ა̄ღუზე ი ეჩქას ჟი ჴედნი ი
Line of edition: 29    ალ ნათხუმ ჰარა̈ყს მა̈გ ჩუ ითრეხ. ჲერვა̈̄ჲ ლა̈კრი მჷგა̄ლა̄ ი̄რიხ, ეჯჲა̈რს ნა̈ჭმუნდ
Line of edition: 30    ლემზჷრა̈ლ ხუღვეხ.

Line of edition: 31       ამ ლადა̈ღ მელკირა̈̄ლ მეზგა ლელკირი მჷხე̄რხად მესვფელა̈̄ ხოხვრა̈̄ლ მა̈გ
Line of edition: 32    ხაწახ. ჲერხი ლელკირს აქვცუ̄რეხ ხერხარშვ, ჲერხი აშხრჷ̄რეხ ი ჲერხი შიდეხ ლაკირთე̄'სგა
Line of edition: 33    ჩუ ლუქვცუ̄რა კუდრა̈რს. ლა̈კირ ქა იღუ̄ზი ი ჰა̄ლ მოშ ხემჟვეღი, ეჩჟი̄ნ
Line of edition: 34    შიდეხ ლელკირს. ლახე სგა̈̄ნჩუ̄ნ უშხვა̄რ ხებვეგიხ ლელკირა̈რ, ეჩქას ჯო̄დი
Line of edition: 35    კეტარშვ ჩვაყლუ̄რეხ ი წესდ არდვნეხ. სა̈დლობა̈ დვრევჟი̄ნ ლა̈კრი მჷგა̄ლა სგა
Line of edition: 36    ღჷრიხ ქორთე ი ჩუ იხჷრჯა̈̄ლხ. ამლა̈დღიშდ ი ამ ლე̄თიშდ მელკირა̈̄ლ მეზგა ლა̈ჲსა̈̄ლ
Line of edition: 37    ხო̄გ. ნა̈სდილობენ ჟი იშვმინეხ ი სერ ლა̈კრი მჷგა̄ლას ლა̈დი მა̄მგვეშ ხოწივხ.
Line of edition: 38    ხოხვრა̈̄ლ იმქჷრა̈̄ლხ ლელკირი ლაჭკვრას, ლაშხრჷ̄რას ი ლა̈კირთე̄სგა
Line of edition: 39    ლიშდეს.

Line of edition: 40       ჩუ იბვრ', ე̄ჩქას კალვისგა ლჷმშხილს ჷგემხ ი ეჩხა̄ვ ხეთვეფხ. ჲერვა̈̄ჲ ლჷმშხილს
Line of edition: 41    ქა ხატყცი, ეჯა ეზერდ ხაბჟახ.
Page of edition: 108  Line of edition: 1    ლჷმშხილ ხაჟხა ე̄ჯას ე: ყა̈̄რს ნე̄სგაისგა ქა ხატა̄ბეხ ეჩეჟი̄ნ, თვეთნაჟი̄ნ, შიხშვ
Line of edition: 2    მურგვალ აბზი ნაზიმ ნიშა̈ნს ხა̈გნეხ. ვახშმობა̈ დვრევ ჴედნ', ე̄ჩქას ალ მეზგა იშ
Line of edition: 3    გენ ლჷწსა̈̄ლი ხორიხ ი სგაღჷრიხ ქორთე ლახჷრჯა̄ლდ. ბა̄ზი ხეკვეს ერე გუნ ლითრე
Line of edition: 4    ლესვ. მერდა̄ლას ი ლჷწსას მასა̈რდ ხო̄ზხ სგვებინჩუ̄ნ ლეღვ ი იშგენ ხოჩა
Line of edition: 5    ხა̈რჯ. ლითრ' ე̄ჯკა̈ლიბდ ლ' ე̄რე ისგლე̄თს ქა ხოქა̈̄ბი, მა̄დეჲ ჩუ ირჰი, ეჩქას გარ
Line of edition: 6    იგნა̈̄ლხ ჟი.

Line of edition: 7       ქა̈̄მ ლა̈კირცახა̈ნ მერდა̄ლას ჰარყი ნა̈ჭმუნ მასა̈რდ ხუღვეხ, ეჯჲა̈რსი ხა̄რხ ლიხი̄რულ
Line of edition: 8    ი ხოჩა ლარდა. მე̄რმა ლადა̈ღ მესვფელა ჩუ ფხეჟნიხ ი ქორა̈შ გარ ხაშდბა
Line of edition: 9    ლა̈კრი ლიშხის, მარე ობა̈შინ აჯაღ ჴედნიხ მუმურჯვა ი ეჯჲა̈რ აჯაღჷდ ხომურჯვიხ
Line of edition: 10    ლელკირი ლახე̄რხას.

Line of edition: 11       ლე̄თი̄ ნათუნ მა̄რა̈̄ლ გვიანდქა ჟი იგნა̈̄ლხ ი ჩუ̄დ ისგვრიხ სა̈დილდ. ლა̈დი
Line of edition: 12    აჯაღჷდ ხა̄რხ ხოჩა ბედ ი ხინ ი ნა̈ბოზს, ესვა̈̄ჲ ხა̈ჲმედა, ხომურჯვი ლა̈კრი ლა̈შიხს.
Line of edition: 13    ლა̈კრი კა̈ცხჟი̄ნ ერ ჯვა̈რი̄ლს ხაჴლეხ, ეჯა ლახე ჩუ იშხი, ეჩქას ლა̈კირი ლჷშიხ
Line of edition: 14    ლი.


Line of edition: 15 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.