TITUS
Svan Chrestomathy
Part No. 142
Previous part

Text: 137 
Page of edition: 108 
Line of edition: 16 
137. ლილგიმა̈̄ლ ჯვინალდ შვა̈ნისგა


Line of edition: 17       მეზგე ლახ ლილგიმა̄ლს ხემურჯა̄ლ, ეჩქას ძღჷდ ლემა̄რა̈̄ლ ხა̄დ ი ხვა̈ჲ ბა̈რგ-ნაბა̈რგ
Line of edition: 18    ი მასალა ხა̄დ ლემა̄რე, ეჩჷნქა ნამშა̈ი ხა̄დ ლეთმე ი ლემა̄რე მელგიმა̄ლეშ,
Line of edition: 19    ნადრეშ ი მიჩა ხა̈რჯდ, ადო ეჩურ ღალ მა̄მ ხოყა̈̄დ.

Line of edition: 20       ნა̄თა̄ლვ მა̄რა ლახე სადგვემ მო̄გვეშ ხეხო̄ლდა, ეჩქას მა̈̄ნკვი ქორ ხა̄დ ლეგემ,
Line of edition: 21    ადო ეჩურ იშგან სადგვემი ლიგემს მა̄მ ხოყა̈̄დდა. ჩიდ მა̈̄ნკვი მეზგე ბა̈ჩს ამა̄
Line of edition: 22    რა. ბა̈ჩს ეჯჟი̄ნ ამა̄რა მეზგე, იმვა̈ჲხა̈ნ ხოჩა ლამარჯვ ხა̄დ ლითმე ი ლიჴდე. ჲერხი
Line of edition: 23    რიყისგა ანზო̄რახ ბა̈ჩს, ჲერხი ეშ იბჷრჯახ ი ჲერხი, ლახ ეჯკა̈ლიბ აგის ი სოფელს
Line of edition: 24    ლა̈სვ, ეჩქას ეშ იკვშა. ქამა̄რა ბა̈ჩს ერ ჟ'ამა̄რა მეზგე, ეჩქას კირს იკვშა. კირი ლა̈კ
Line of edition: 25    ვშა კოჯა̈რისგა ლი. ჲერხი სოფელს ეჯკა̈ლიბ კოჯა̈რ ლიხ კირიშ, ერე ივალადა̈ღ
Line of edition: 26    და̈̄რ მოშ ხა̈შთხე. ჲერხი სოფლა̈რისგა სბენდიკს იბჷრჯეხ.

Line of edition: 27       იმვა̈̄ჲ სოფელისგა დო̄ჲ კირ წვა ი დო̄ჲ სბენდიკ, ეჩქას მე̄რმა სოფელთე ღჷრიხ
Line of edition: 28    კირი ლა̈კვშათე ი მა̄დეი სბენდიკ ლაბჷრჯათე. ჲერხი მეზგე მე̄რმა მესვფელხა̈ნქა
Line of edition: 29    ჟი იყდი ქა მეკვშა კირს.

Line of edition: 30       ქა მეკვშე ჲორი ლა̈კრიშ კირ ხაჯეშ ეშხუ ფირვმიშ. ქა მეკვშა კირს მეზგე გალ
Line of edition: 31    დამშვ ჴიდე ქორთე. გალდამ ამის ხაჟხა: სოფელისგა მეზგე თვით სა̈ვ-ჩავ ქა მეკვშა
Line of edition: 32    კირს მა̈გ ხოჴდე მელგიმა̈̄ლ მეზგა. ალა ჩიჲაშდ ლეჩვმე ლი, მარე კირი ლიჴდე
Line of edition: 33    ბა̈ჩა̈ ნა̈ჴიდუნღო გარ ლი. ბა̈ჩს, ჟი ლჷმა̄რანღო, ჩიგარ ჴიდე მეზგე ი ხათერ, ერე
Line of edition: 34    სერ ქა ხა̄რ, ეჩქას ჰაჯს ხაკედ ამი̄ ლიჴდეს. ეჩქანღო ქვიშე̄მი ლამა̄რათე ღჷრი,
Line of edition: 35    ქვიშა ჭალი პილჟი̄ნ ამა̄რე. იშვა̈̄ჲ მასა̈რდ ხონხა ჭალი პილს ქვიშე. ეჩეჩუ̄ნ ჴანრე
Line of edition: 36    ლიგნე გარ ხაკუჩ, იმვა̈̄ჲ მო̄დე, ეჩე მო̄შ-მო̄შ ნუკვიშდ ამა̄რეხ ქვიშა. ჲერ ფათქს
Line of edition: 37    აბჷრჯე, ეჩხა̄ვთე̄'სგა მა̄დხვა̈ჲ ლჷლჰენდს ხოფშვდე ი ქვიშე ფათქისგა სედნი, ფათქ
Line of edition: 38    ჟი იგვშილი ქვიშოვშ, ეჩქას ამის ჟი იკედ ლა̈̄ხირშვ ი პილჟი̄ნ დე̄სგი. ეჩქანღო
Line of edition: 39    სგა̄დ ხოფშვდე ლჷლჰენდს ი სერ ამჟი̄ნ, ოდე ქამა̄რა ქვიშე ჟი დო ინზვე̄რი. ჲერხი
Line of edition: 40    იქი აქ ქოჩო̄ლა̈რს ანზო̄რე ქვიშე̄მიშ ი ეჯჲა̈რს აშხვ ა̈დგილთე̄'სგა ჟ'აყვბე.
Line of edition: 41    ამჟი̄ნ ქამა̄რა ქვიშე ჟი ინზვე̄რი, ეჩქას ქვიშაჲ გალდამშვ ჴიდე მეზგე. ჲერხი სოფელს
Line of edition: 42    გალდამ ლა̈ჴდაჟი̄ნ მა̄მგვეშ ხაზნა ხარჯ ი ამკალიბ. ჲერხის გალდამჟი̄ნ ლა̈ჲსა
Page of edition: 109  Line of edition: 1    ხა̈მთქვა ი რიჰდ მოგჷლდამას ი მელგიმა̈̄ლ მეზგა ხოჩა ხინ ი ხიად ი ლიზვებ-
Line of edition: 2    ლითრე ხა̄რხ.

Line of edition: 3       ალჲარე ლიჴდა̄ლუ ა, კირიშ ი ქვიშე̄მიშ, მეზგა ლემა̄რე ნარ ლელკირ ი ეჯა̄ჲ
Line of edition: 4    აგითე ლეჴდე, ლელკირდ ეშხვ-ა̄შირ მეგემ ჟი ხაკუჩ მეზგა. ეჩჷნქა ჟი ლემა̄რე
Line of edition: 5    ხა̄რ: დი̄რ, ა̄ღ, ჭე̄რ, ი ყა̈̄რ.

Line of edition: 6       ალჲა̈რს, ა, ქა მა̈̄ჲ გვი̄ქვა, მეზგე ჟ'ამა̄რე, ეჩქას მეზგე ჴელვანა̈რს იგნე. ჴელვა̈ნ
Line of edition: 7    ხაჟხა, ქორა̈ ლიგემ ი ლილგიმა̈̄ლ ჲესვა̈̄ჲ ხოჩა̄მდ ხოხალ, ეჯას. მეზგე ლახე
Line of edition: 8    ლჷფშირ ლა̈სვ, ეჩქას მიჩოვშ ამა̄რა, მა̈̄ჲ ლილგიმა̄ლე̄შდ სა̈ჭირო ლა̈სვ, მა̄დეჲ მასალა
Line of edition: 9    ლამა̄რათეჲ ჟი იგნა ჴელვა̈ნს, მარე ნა̈ლგიმა̄ლვირ ღალ ხოშა ხეკვა̈დ.
Line of edition: 10    სამწჷხვ ბა̈რგ ი მასალა ჟი იმა̄რო̄ლდა, ეჩქას მა̈̄ნკვი ლა̈კირს ჷგა̈მდა მეზგე.
Line of edition: 11    ლა̈კირ ლაგა̄მთე ჲესვა̈̄ჲ ქა ხა̈̄ქვნინა მეზგე, ეჯა მა̈გ ქა ხომა̈რჯვდა.
Line of edition: 12    ეჯა მა̄დეჲ ჲერხი ხოხვრა̈̄ლ ქა უ̄ქვადი ქა ჴედენდახ ლელკირ ლაჭკვრათე ი კირი
Line of edition: 13    ლა̈ბშათე.

Line of edition: 14       ჩიქე ლა̈კრი ფათქს აბჷრჯახ, მა̈ზუმვა̈̄ჲ ქა მა̄რად ხებჟა̈̄ნხ, ეჩზუმს, ეჩქანღო
Line of edition: 15    ძირხა̈ნჟი̄ნ გჷრკიდ ფათქს ბა̈ჩა̈ ფიკვი ჴვილას ხა̈ცხპახ, ეჩეჟი̄ნ კირი ლიგემს იბნახ,
Line of edition: 16    ჲორი სგა̈̄ნჩუნ არდახ მჷგა̈მდ ი ჲო̄რი ქა̄მენჩუ̄ნ, იშგენ კირს ხა̈ბშახ. ლა̈კრი
Line of edition: 17    ლიგემ ისგთეჟი̄ნ ჟი ჴედენდა, ეჩქას გა̈რგლას და̈̄რ მოშ იჩომდა, ეჯღა ერე კჷლთხი
Line of edition: 18    ჰერს ესერ ლა̈კრი ლაგა̈მჟი̄ნ, ლა̈კრი ლირეღვ ხოხალ. ამჟი̄ნ ქვინ უკი̄დად ი
Line of edition: 19    ლაჴუნჩულა̄ლუშ ჷგა̈მდახ ლა̈კირს. ღვეშგმავ ეშხვი გარ სედენდა სგა̈̄ნჩუ̄ნ ლა̈კირისგა.
Line of edition: 20    ლა̈კირ აშ გარ ისკრო̄ლ ი ინხუწო̄ლდა ჟიბა̄ვ. სგა̈̄ნჩუ მერდე თხვიმს ჩუბა̄ვ
Line of edition: 21    ა̈ჲა̈̄სგდა ი ტოტარშვ გარ იგჭა ჩუ ნაცხატვ კირს. ღვეშმე პილს ქა̄მენ მჷგემ
Line of edition: 22    ცუყვბას, სკჷრა̈ კირს, ხა̈ჩხინა ჟიქა̄ნჩუ̄ნ ი სგა̈̄ნჩუ მერდე ქა ჴედენდა ქა̄მენთე,
Line of edition: 23    მარე მაყალშვ ღალ ჰა̈ბ ქა მეჩდე ხა̄დ. ათხე სერ ლა̈კირ სგა ლეძგვა̈ბდ ლემყა̈ლვ
Line of edition: 24    მა̄მ ლა̈სვ ი მა̈̄ჲ კირ ქა̄მენჩუ̄ნ ჩუ ირდო̄ლ, ეჩას ჩი ჟიქა̄ნ ხა̈შდახ. კირი ჩუ ნაშდა̈ხუნღო
Line of edition: 25    ლა̈კრი კუნჭილჟი̄ნ ზექი ჯვა̈რს ხაჴლახ. ლა̈კირს სკჷრე ხეფსო̄ლდა.
Line of edition: 26    ამი̄ ქა ნასრულუნღო (\\ ნაზგჷრუნღო), ქორა̈ მახვში აშხვ ბოთლიკს, ი ჲედ-ხოხვრა̄მ
Line of edition: 27    სტამა̄ნი̄ლს ჰარა̈ყს შჷნ ა̈ჲა̈̄სგდა ი სგა ღჷრდა ლა̈კირთე̄'სგა. ეჩე̄'სგა ჟი
Line of edition: 28    ხა̈მზირდა ამის ი სამ ლემზირს სოლომნს ი ხეჴჷ̄რა̄ლ ხოჩა̄მ სევს ი ჰაჯს ი ზჷგრი
Line of edition: 29    ლიცხპეს ლილგიმა̄ლეშ. ეჩქანღო ბოთლიკს ქა̄მავ ხა̈ბშა. ქა̄მენჩუ მერდა̄ლა მუტვა̈რ
Line of edition: 30    მუგვა̈ლს ი ნეცინდ ლჷცლჷ̄რა ფჷრი ზექა̈რს ხა̈ბშახ, ალა სგა̈̄ნჩუ ლემასგვ ა̄შვა ი
Line of edition: 31    ეჩქანღო ქა ჴედენდა ქა̄მავ. მე̄რმა̈̄ლ ქა ლუღუ̄ზა ლემასგვთე ნეცინდ ლჷცლჷ̄რა
Line of edition: 32    ზექა̈რს შიდახ. ალჲა̈რს გუნ ჟი ხებდინო̄ლდახ, ეჩქას ხონგრა̄მ ზექა̈რს შიდახ ამხა̄ვთე̄'სგა
Line of edition: 33    ი ამჟი̄ნ ქა̄ღუზახ ბჷგიდ ლა̈კირს, ხოშა̈̄ლ ი ლა̈კრი მჷგა̄ლა, ალ ჟი ნა̈მზურ
Line of edition: 34    ნათხუმს ჩუ ჲჷთრახ ი ხემზირდახ სოლომნს ხოჩა̄მ სევს ი ჰაჯსი ზჷგრი ლიცხპეს.
Line of edition: 35    ამჟი̄ნ ხა̈რჯი ჟი იმა̄რო̄ლდა ი ქორშა̈რ, ჴელვანა̈რ ი ნადა̈რ სგა ღჷრდახ ქორთე
Line of edition: 36    ლახჷრჯა̄ლდ. აშ ქა უწსად მეჴდა̄ლა ლა̈კირს ხო̄შვახ ლემასგვ ი ჲერხი ლელკირს
Line of edition: 37    ახე̄რხახ.

Line of edition: 38       ქორისგა მერდა̄ლას ტაბა̈გთექა ლეღეს, ქუთვა̈რს ი იშგან ხოჩა̄მ ხა̈რჯს ხოჴდახ.
Line of edition: 39    ნა̈დჲარობენ ლა̈კრი მჷგა̄ლა ეშ ი აშ ღჷრდახ ი ჟი იშვმინახ ნა̈ბოზდ. ლა̈კირს
Line of edition: 40    სოფლი ხოხვრა̈̄ლ ხო̄ზნა̈ნდახ. ალჲა̈რს ჰარა̈ყს ხოჴდა მეზგე ი ჲერვა̈̄ჲს ხეკვა̈დ ჷთრა.
Line of edition: 41    ჩუ იბვრო̄ლდა, ეჩქას მახეღვაჟა̈რ ყა̈̄რჟი̄ნ ლჷმშხილს ხა̈გნახ ი აშხვ მუხვირისგა
Line of edition: 42    ჩუ ჷგა̈მდახ, გა̈ნხა̈ნჩუ̄ნ მუგვა̈ლს და̈̄სგდახ ჟი მუტვა̈რს, ერე ლჷმშხილ ხოჩა
Page of edition: 110  Line of edition: 1    ლეწვე̄ნე ლჷმა̈̄რლესვ ი ჲერვა̈̄ჲს თვეფ ხუღვა̈̄ნდა ი ხეკვა̈̄დ ლითოფ, ხა̈ფშვდა
Line of edition: 2    ლჷმშხილს. ქა̈̄მ მერდა̄ლას მეზგე ჰარა̈ყს ხოჴდა ი ხათრა. ჰარყი ნათუნუნღო მეზგა
Line of edition: 3    ლახე ლახი̄რულ ხა̄დ, მახეღვაჟა̈რ ლიხი̄რულს იბნახ, ჲერხი ლელკირს ახერხახ
Line of edition: 4    ი ხოჩიდდახ ლა̈კირთე̄'სგა. ლა̈კრი ჩუბე ლაგა̈̄გიჟი̄ნ ვარჩხილს და̈̄სგდახ ლაკვჰუ̄რა̄ლდ
Line of edition: 5    ი ეჯას ჲერვა̈̄ჲ ჴაფშვ ჟი იკა̈დდა, ეჩი̄შ ლა̈სვ.

Line of edition: 6       ქორს ლა̈ჲსა ჟი იჯბო̄ლდა, ეჩქას ჴელვანა̈რს, ლა̈კრი მჷგა̄ლას იშგან ლჷწსა
Line of edition: 7    მა̄რა ჩვასგვრახ ი ეჯ ლე̄თ ხა̄დხ ხინ, ხიჲად ხოჩა ბედ.

Line of edition: 8       ლირჰა̈̄ლთე მესვფელა ჩუ ფხეჟენდახ, ლა̈კრი მჷგა̄ლა̄ჲ ა̈გითე ღჷრდახ ი სერ
Line of edition: 9    ლა̈კრი ლიშხი მეზგა ი ჴელვანა̈რს გარ ხოწვუნდახ.

Line of edition: 10       ლა̈კირს ხო̄შვახ ჲარვ ლე̄თ-ლადა̈ღს ი სერ მა̄მ ხეკვა̈დ, კირ ჩუ იშხო̄ლდა. ლა̈კრი
Line of edition: 11    ნა̈შიხუნღო ჟი იზიმდახ ქორა̈ ლაგა̈მს ი ხუნი ლიბჷრჯეს იბნახ ო̄შთხვ ფოყჟი̄ნ.
Line of edition: 12    ხუნი ნაბჷრჯუნღო ზურალა̈̄რ ჟი იდბა̈შდახ ამეჩუნ ი ხემზჷრდახ ჩუბე ბუა̄სდა̈
Line of edition: 13    ღე̄რბათ ი სოლომნს, ერე "ხოჩა დოშდლა̈შ ოხსყე̄ნხ ალ ა̈დგილ ი ხოჩა ზჷგირ ოხვცხიპვნე̄ნხ".
Line of edition: 14    ხუნ ლადა̈̄სგჟი̄ნ ი ჟი იდბა̈შდახ ზურალა̈̄რ, ხუნი ლიდა̄ლა̈̄ლდ ჰარა̈ყს
Line of edition: 15    ხა̈მზჷრდა მეზგე სოლომნს, ერე "ხუნი ლიდე̄სგი ბედნიე̄რ ი მეგჭე ლჷმა̈̄რლესვ".
Line of edition: 16    სერ იბნახ ხუნი ლიდე̄სგის. ხუნი ნადა̈̄სგუნღო, ოდე გიმს ჟი დო ხოქა̈̄ბდა
Line of edition: 17    ნა̈ლგიმა̄ლვ, ეჩქად ფიკვიდ გარ იჩომდახ ლიგემს. ამი̄ ლიგა̄ლა̈̄ლდ კირი ჩუ იც
Line of edition: 18    ხა̄ნო̄ლდა. სგვებნავ ჟ'ასყე̄ნახ ლათქა̄რა̈რს ი ლა̈გჷრწყილა̈ვ ღვებს. ჩუ ლჷგა ჴვილას,
Line of edition: 19    ხუნს, ღვებნხა̈ნქა გირწყა̈ლს ხოფშვდახ. გირწყა̈ლ ხაჟხა ღვებისგა, დჷთხელდ
Line of edition: 20    ჟი ლჷჩდი̄ნა კირს ი ქვიშა. ალ გირწყა̈ლს ჩიავ სგა ხა̈ფშვდახ ეჩი̄ზუმს ე,
Line of edition: 21    მა̈ზუმვა̈̄ჲ სა̈ჭირო ლა̈სვ. ეჩქანღო ჭვა̈და̈ ლიგემს იბნახ. ეშხუ ჴელვა̈ნ სგა̈̄ნ ლა̈სვ
Line of edition: 22    მჷგემ ი მე̄რმე ქა̄მენ. ქა̄მენ, ჲერვა̈̄ჲ ხოჩე̄ლ მჷგემ ლა̈სვ, ეჯა ჲჷგა̈მდა ჭვა̈დს.
Line of edition: 23    ალჲა̈რს ჲერხი ბა̈ჩს ხოჴდახ ი ჲერხი -- ხა̈ლიკს კიცო̄რა̄ლშვ. აშხვ ლა̈გჷრწყ
Line of edition: 24    ლა̈ვს ჟი ჴიდახ ფიკვი ჭვა̈დდ, ეჩქას ჟი ითიქდახ. ლა̈გჷრწყილა̈ვ ოხვიშდ-უსგვა
Line of edition: 25    კამინვ ლა̈სვ.

Line of edition: 26       ლათქა̄რა̈რისგა სგვებნა̄ვ ჩვა̈გნახ თჷქს, ეჩქანღო ჩვა̈ჰი̄ჭვდახ ბერგარშვ ი
Line of edition: 27    ლა̈ხი̄რარშვ. თჷქს ღვები̄ლა̈რთე̄'სგა სგა და̈̄სგდახ, მჷთქას ქაფჩა̈̄ლ ხუღვა̈̄ნხ ი ეჯჲარშვ
Line of edition: 28    ჟი ითიქდახ, ეჩქანღო გირწყალს ხოფშვდახ ჴვილას. ხუნი ნადა̈̄სგუნღო
Line of edition: 29    აშხვ ფოყხა̈ნ, ხედვა̈̄ჲს მეზგე ილკვჰე, ეჩეჩუ̄ნ ყო̄რა̈ ჩუბე ლაგა̈̄გის დე̄სგი ი ამჟი̄
Line of edition: 30    ამეჟი̄ნ მა̈ჩვი̄ბი ყო̄რს ხოცვბე. აშხვ ლა̈გჷრწყილა̈ვს ქ'ა̄სრულეხ ი ამისი̄ ამჟი̄ნ
Line of edition: 31    ასრულეხ. ჲარვ ლა̈გჷრწყილა̈ვჷნღო ქორს ჲარვ ნახვწი ლაჴვრას ხოცვბეხ ი ალჲარე
Line of edition: 32    სა̈ხსი ქა ხა̈ცვრეხ ლაგა̈მჟი̄ნ. ჩუქვა̄ნ ალ ლაჴვრა̈̄ლსი ლაგა̈̄გია̈რს ხონხენიხ ი
Line of edition: 33    ჟიქა̄ნი̄. მე̄სმა̄მ ლა̈გჷრწყილა̈ვს ჩუ ჲჷგემხ, ეჩქა ყო̄რს ჟიბე ლაგა̈̄გის ხაგფენიხ ი
Line of edition: 34    სერ მა̈ჩვი̄ბ ჩუ ლჷგე ლი.

Line of edition: 35       ყორს ი ლაჴვრა̈̄ლს ნე̄სგაქა ლალცჷყნა̈̄ლს ხა̈ცვრეხ ლაცყანრე ლადა̈̄სგდ. მა̈ჩვი̄ბს
Line of edition: 36    ჩუ ჲჷგემხ, ეჩქანღო ჩუ ლიდჷ̄რი ხაკუჩ. დი̄რა̈რ სგვებნა̄ვ ჟი ლჷმა̄რე ხა̄რხ,
Line of edition: 37    ქა იზმიზ ქორა̈ ნაზიმს ქა ი მასა̈̄რს ქა ხაქვცუ̄რეხ დჷ̄რა̈რს. ლა̈დი̄რჟი̄ნ ნადა̈რ ი
Line of edition: 38    მუმურჯვა ხა̄რ ლეწვა̈ნი მეზგა, ადო ეშხვი ი ჲორი მა̄რე გარ დე̄მგვაშვ მოშ ხა̈ჩომხ
Line of edition: 39    დჷ̄რა̈რს, ეჩზუმვა̈რ ლიხ ალჲა̈რ.

Line of edition: 40       ლადი̄რჟი̄ნ ჩიქე საშვემ დი̄რს ხოდიხ. ალა ხაჟხა აშხვ დი̄რს. ნესგაქიი მა̄მ ხა̈̄ზ
Line of edition: 41    ლა̈იდ ი ჰა̈დურდ პილსი̄. ალა ლეჟა-ლექვაჟი̄ნ ხოზ ი ჟიბა̈ჲჩუ ლჷდა დჷ̄რა̈რს მჷნგ
Line of edition: 42    ჭვად ხემა̈რგ, ერე ლჷჭერ მო̄დ აჰჷლბჷნე̄დს დარბა̈ზჟი̄ნ ჭემი ლადა̈̄სგჟი̄ნ ი ლაზელა̄ლჟი̄ნ,
Page of edition: 111  Line of edition: 1    ეჩქანღო ჟიბა̈ჲჩუ ხოდე̄სგიხ უსგვამ ი ჲედ არა̄მ დი̄რს. მა̈ზუმვა̈̄ჲ ხაკუჩ
Line of edition: 2    მეზგა.

Line of edition: 3       ლიდჷ̄რი ქა იზგჷრი ეჩქას, ქა ხეყჩენიხ ლაშდაბს ი მუმურჯვას ჰარა̈ყს ხათრეხ
Line of edition: 4    ი მინი ჲჷთრეხ.

Line of edition: 5       მე̄რმა ლადა̈ღ მა̈ჩვი̄ბს ჩვაჭრა̈ვიხ ი ღო ჩვავრიხ. ლაჭრავჟი̄ნ ქა ხოცვბეხ ჲარვ
Line of edition: 6    ლე̄ბის. აშხვ მუხვირისგა, ხოშა̄მ ჟი ლა̄ზდ ი მე̄რმა ხოხვრა̄მ ნე̄ნი̄ ლა̈შდად.
Line of edition: 7    ათხე სერ მა̈ჟი̄ბს ჲჷგემხ. ნაჭრაუნმჷყ აჯაღჷდ ხა̈ჩომხ მაჩვი̄ბი ყო̄რხა̈ნ, მა̈დეი
Line of edition: 8    მე̄რმა ფოყხა̈ნ ყო̄რს ნენი̄ ლა̈ჲა̈̄სგდ. ამის დარბზი ყო̄რ ხაჟხა. ჩუქვა̄ნ ლაგა̈̄გის ხონხენის
Line of edition: 9    ბა̈ჩა̈შს. მა̈ჟი̄ბს ხოხვრა̄მ კჷლთხის იჩოხ, ჲარვ ლა̈გჷრწყილა̈ვს ი მა̄დეჲ ჲარვ
Line of edition: 10    ი ხჷნსგა̄მ ჩუ ჷგემხ, ეჩქანღო დარბზი ყო̄რს ჟიბე ლაგა̈̄გის ხაგემხ.
Line of edition: 11    ათხენღო ჲარვ ფოყხა̈ნ კუნჭლა̈რს ხაგა̈მდახ ლა̈შგიშდ, ეჯღა, ე̄რე ლუშნუ
Line of edition: 12    ქორ ჲარვ ფოყხა̈ნ გარ ლი ჩუ ლჷლშგე, ათხე სერ მა̈ჟი̄ბი ჩუ ლჷგე ლი. (ჩუვეთ
Line of edition: 13    ამა̈̄შდჷნ: მაჩვი̄ბს აშხვ მუხვირხა̈ნ ლაგა̈მჟი̄ნ ლაჴვრაშა̄ლ კურუს ხა̈ცვრეხ ჰა̈წნი
Line of edition: 14    ლა̈შდად. ამის ხაჟხა ლანგვლი). ათხე მა̈ჟი̄ბსი̄ ხაკუჩ ლიდჷ̄რი. ჟი̄დ ინზო̄რა̈̄ლხ
Line of edition: 15    სოფლი მახეღვაჟა̈რ ი ხომურჯვიხ მეზგა ლა̈დი̄რთე. მაჟი̄ბს აშხვ დი̄რს კუნჭილქა
Line of edition: 16    ხადე̄სგიხ, თვით ჲარვ, ჲარვ ფოყჟი̄ნ -- ეჩხა̈ნ-ამხა̈ნ -- ი თვითს ჲარვ ფოყხა̈ნ ძირა̈რმჷყქა.
Line of edition: 17    ეჩქანღო ქა ხეყჩენიხ ი ჰარა̈ყს ჲჷთრეხ მასა̈რდ.

Line of edition: 18       სერ ქორ ჩუ ლჷდი̄რ ლი. მე̄რმა ლადა̈ღ ცხუტა̈რს ი აღა̈რს ხადე̄სგიხ ი ლახე
Line of edition: 19    მეზგა ნაჭრაუნ შუნ ხუღვე, ეჩქას ჩვაჭრა̈ვი, მა̄დეჲ აღა̈რქა ჭერა̈რს გარ ხად ა̈დგ
Line of edition: 20    ი ჩვა̄შგი. ამის ლჷსა̈თხდ ლი̄შგი გარ ხაჟხა, ლახე უჭრავა ლი.
Line of edition: 21    ჭვა̈დვარე ლაგა̈მჟი̄ნ მა̈ჩვი̄ბი ჭვა̈დვა̈რს სგა̈̄ნ ი ქა̄მენ სანჲა̈რს ხა̈ჩომდახ. სანჲა̈რ
Line of edition: 22    მო̄შ-მო̄შ უბრალო ბა̈რგი შედა̈რდ ხეკვა̈დხ. ჲერხი მეზგე ჴა̈ნი მუჭვა̈რს ხონხენდა
Line of edition: 23    ყო̄რა̈ ფე̄დიას, უღვა̄ლეშ ი იშგნე̄მი ლა̈რკინად. ლახე მეთხვჲა̈რ ჲა̈რ არდა
Line of edition: 24    მეზგაისგა, ეჩქა ეჩი̄ ნადგარვ ღვაშრე მუჭვა̈რსი ხონხენდახ ჭვა̈დს სგვებინხა̈ნ.
Line of edition: 25    მა̈ჩვი̄ბი ლა̈დი̄რჟი̄ნ ლამჷჟხა̈ნ მეკვშდა დირჷლდა̈რს ხონხენდახ ლა̈ლფრა̈̄ ფიც
Line of edition: 26    რარე ნადა̈̄სგუნდ.

Line of edition: 27       მა̈ჟი̄ბს დარბა̈ზხა̈ნქა ყო̄რს ხა̈ჩომდახ ხოხვრა̄მ ლალფრათექა. ამის ჲერხი ლა̈ლფრა̈̄
Line of edition: 28    ყო̄რს ხაყლეხ, ჲერხი -- დე̄ფნი ყო̄რს. ჩუ ლჷშგჷნღო სერ ქორა̈ ლიგემ ქა
Line of edition: 29    ლუსრულე ლა̈სვ ი ჴელვანა̈რ ა̈გითე ღჷრდახ.

Line of edition: 30       ნა̈ჴჷლვანვი̄რ მეზგა სგვებნავ ხა̄დ ქა ლუჰვედ. სგა ლახ მა ხესდენ, ეჯას ქორა̈
Line of edition: 31    ლიგემი ქა ლიზგჷრა̄ლვ ჩი̄ ქა ხაჰვედდა, ლიზგჷრა̄ლე ლა̈ხჲადა̄ლს მოშვა̈̄ჲ
Line of edition: 32    იჩომდა მეზგე, ეჩქა ჴელვანა̈რ მიჩა მაკაფჟი̄ნ ჩუ ლესჩქვა̈რი ხა̄დ.
Line of edition: 33    ქორა̈ ლიგემ ხეკვეს ერე პა̈რპო̄ლდა̈შდ ალსურლე̄ლესვ, იჯდა ერე ეჩქანღო
Line of edition: 34    ლიჭმა̈̄ლ იბნო̄ლდა ი დეჲ მეზგა ხოჟბჷნდა ლა̈ლგიმა̄ლდ ი დეჲ -- ჴელვა̈ნს. მუჟღო̈რ
Line of edition: 35    შვა̈ნისგა მასა̈რდ ჭირ ლი: ლიჭმა̈̄ლ, ლითჲე̄ლ ი ალჲა̈რს მეზგე ქ'ა̈̄სრულა მუჟღვერ,
Line of edition: 36    ჭემს ი ნამშა̈ჲს სგა იმჭვმა ქორთე, ეჩქას ლიზგჷრა̈̄ლს იჩომდა. ამ ლე̄თიშდ
Line of edition: 37    ჩვაჰრა̈ყდა, ლაჲსას ამა̄რა ი ლჷწსა̈̄ლს აწიჰდა. მა̈ჲ ლემბა̈ჟ, ლ'ერე ჴელვანა̈რ ბა̄ზი
Line of edition: 38    თხუმხა̈ნ ისგვრო̄ლხ. ლა̈სვ ეჯ ლე̄თ მასა̈რდ ლითრე ი ლიხი̄რვილ. ისგ ტაბგობჟი̄ნ
Line of edition: 39    ჴელვანა̈რს ფიჩქს ხოგა̈მდახ სგვებინჩუ̄ნ, ამეჟი̄ნ ლემზჷრა̈რ ზჷსდა̈ნდახ ი ლეტვრე
Line of edition: 40    ხელწა̈̄ნ ჟი მუტვა̈რ. ჴელვანა̈რ ჟი იგნა̄ლხ. ეშხუ ხედვა̄ლე ალჲა̈რ ფიჩქს ჟი
Line of edition: 41    იკადდა ი სგვებინ ესღჷრდა, მე̄რმალ ღვეშგიმ ესჭიმდახ. ალჲა̈რ ყველფს ლერსგვანთე
Line of edition: 42    ხეჭმენდახ. სგვებინ მე̄ზი ყჷლა: "მა̈ლდჲა̈ნ სოლომნ! ალ ქორ ბედნიე̄რ
Line of edition: 43    ჩვემნ, მაჩე̄ნე შვიდბჲა̈ნ, ბა̈რქჲა̈ნ ი ყვე̄დი ქორა̈ ლიგემ ჩვა̈̄ს ხამურჯე̄ნს, ეჯა მე̄რმა̄მდ
Page of edition: 112  Line of edition: 1    ნა̈ჲ ა̈ნმა̈რჯვ. ოშვა̈̄ჲდ ბა̈ჩ ნა̈ჲ უშხვა̄რჟი̄ნ ოთგედ, ოშვა̈̄ჲდ ნარმეცხ კირ, ოშვა̈̄ჲდ
Line of edition: 2    კუნკვილ ქვიშე ხაჴმარა ალ ქორს, ეჩშელდ ხოჩე̄რობა ლა̄ხო მა̈ლდჲა̈ნ სოლომნ,
Line of edition: 3    ალ ქორს, ნიშგვეჲ ნალიგმა̄ლვ ისგვა ნა̈ლგიმალდ ახა̈სყ, მა̈ლდიჲა̈ნ სოლომნ!
Line of edition: 4    ნა̈ჲ ლახე შგურა̈̄რ ნომა̄ნფუშდეს, ეჩქას ჰა̈დურდ ხოჩა გარ ახა̈სყ ალ ქორისგა,
Line of edition: 5    ნა̈ფშირი ი ნა̈დდარი ლა̄ხო, ქვილჷმგენე ი მა̄რე, მა̈გ ათფიშირ ალ ლა̈ზგაისგა! "
Line of edition: 6    ი ამჟი̄ნ ლა̈მზჷროშ ქა ხეცხპენდახ ქორს ლერსგვანთე, ეჩქას ფიჩქს ჩუ ჷგა̈მდახ
Line of edition: 7    ი ჩუ ისგვრო̄ლდახ.

Line of edition: 8       ათხე ქორა̈ მახვში ჟი იგნა̄ლდა ი ხაყლა ჴელვანა̈რს, ერე "ალ ქორ ესერ მიჩა
Line of edition: 9    გარ მა̄მ ლი, მინეში̄ ამჟი̄ნ ლი, ბა̄ზ, ესერ იგებას სა̈ხ დოშ ანხვიას, მარე ამუნღვ'
Line of edition: 10    ე̄სერი ჩიგარ მინეშ ი̄რი ალ ლა̈ზგა" ი ეჩქანღო ქა ხაყლა, მა̈̄ჲ ხაკფჷნდა მეზგა, ეჯ
Line of edition: 11    საჩქვა̈რს.

Line of edition: 12       ათხენღო სერ ბა̄ზი მასა̈რდ ლითრე ი ხინი ხიად ხა̄დხ. ამჟი̄ნ, მე̄რმა ლადა̈ღ
Line of edition: 13    ჴელვანა̈რს ლუსჩუქვა̈რს ქა ფიშვდახ ხოჩა̄მ გუჟი̄ნ.

Line of edition: 14       ჴელვანრე ხოლა̄მ გუჟი̄ნ ლიფშვდეს მა̄მ ხეყა̈̄დ, ეჯღ' ე̄რე მეზგა ალჲარე ჭათად
Line of edition: 15    ხაყვლი̄ნდა.

Line of edition: 16       ქორ ი ჭვა̈დვა̈რ ქა იზგჷრო̄ლდახ, მარე ათხე სგა̈̄ნჩუ̄ნ ხეკვა̈დ ქორს ხვა̈ჲ სა̈ხმა̈ხ:
Line of edition: 17    ლეგემ ლა̈სვ მეგმე̄მი ისგჷნტაფ, მარა̈ნ ი ამკა̈ლიბა̈რ. ალჲარე ლიგემ ჩი̄ მა̄მ
Line of edition: 18    ხოხალდა ი მეზგე ამი მოხელს იგნა გვალა̈ სახრე მჷტა̄ბად ი მჷგემდ.
Line of edition: 19    სგვებნა̄ვ, ქორა ყორ იმვა̈ჲხა̈ნ ლი, ეჩხა̈ნ ლჷტა̄ბა მეგა̈მს და̈̄სგდა ჟიბა̈ჲჩუჟი̄ნ,
Line of edition: 20    ერე ქვინლჷმგენე̄მი ნაჯვდი, ნაზიმ ლჷმა̈რლესვ. ეჩქანღო ჲარვ ფოყხა̈ნ გვალა̈რს
Line of edition: 21    ჷგა̈მდა: აშხვ -- ლაჴანს ი მე̄რმა -- ლაფურს.

Line of edition: 22       გვალვა̈რს ლათჲა̈რ ხა̄დხ ეჩშელდ, ე, ოშვა̈̄ჲ ჟი ლჷტა̄ბა ფიცა̈რს ხოსყე̄ნა.
Line of edition: 23    სგვებინხა̈ნ ლა̈დჲარა̈რს ხა̈ჩომდა, ლათჲა̈რს ჟიქა̄ნ თვითს ი ჲედ თვით ჲარვ ფიცა̈რს
Line of edition: 24    ხატყა̈ცდა ი ეჩქანღო ჩვაჭრა̈ვდა.

Line of edition: 25       ლაფურ გვალჟიქა̄ნ აჯაღ ჷგა̈ნდა ხოხვრა̄მ გვალჷლდა̈ მაჯო̄ნს ი ამისი̄ ხოხვრა̄მ
Line of edition: 26    ლათილა̈რს ხა̈ჩომდა. ამე̄'სგა ლინთვისგა ჟინღა̈რ არდახ ი ლა̈ჟნაღი̄რ ხეჟხა̈ნ.
Line of edition: 27    ალ გვალა̈ სახა̈რ ი იშგენ მა̈̄ჲ ესამა ჩუ იგო̄ლდა ქორისგა, ჩუ ლჷჭრელე
Line of edition: 28    ლა̈სვხ. მე̄სმა ფოყხა̈ნ ტირხს ჷგა̈მდა ი ჟიქა̄ნ ჩვაჭრა̈ვდა. ამის ჟიქა̄ნქა ჭვა̈დს სგა
Line of edition: 29    ხაგა̈მდა ზექი ლაჯრი̄რს, ლაფკანა̈̄რს ი იშგან ნეცვნი̄რი შედს. ჟიქა̄ნ ნიკო̄რთას
Line of edition: 30    ხა̈ჩომდა. ტირხისგა ლინთვ ღველჲაქა̈რ არდახ.

Line of edition: 31       მე̄შთხვა̄მ ფოყხა̈ნ აჯაღჷდ გვალა̈ მაჯო̄ნს ჷგა̈მდა ი ლათჲა̈რ ხა̄დ ხოხვრა̈̄ლ.
Line of edition: 32    ამე̄'სგა ნეცინ მანგა̈რ არდახ. ალას ლაღუნვა̈̄რ ხეჟხა̈̄ნ. ლაღუნვა̈̄რიშ ი ტირხი
Line of edition: 33    უშხვა̄რ ნე̄სგა მარა̈ნს ჷგა̈მდა. ამის დამბალ ყო̄რ ხა̄დ ი ჟიქა̄ნ ჩუ ლჷჭრა̈ვე ლა̈სვ
Line of edition: 34    გუნ შენკბირვდ, ეჯღ' ე̄რე ლინთვისგა კეცა̈რისგა ი სტამა̄ნა̈რისგა ჰარაყს მჷცხი
Line of edition: 35    დო̄ს' ე̄სშყედე̄ნხ.

Line of edition: 36       ათხე ჲარვ დი̄რს ხოდა̈̄სგდა ჭვა̈დხა̈ნქა. თხუმა̈რ ჭვა̈დისგა ხეყხა̈̄ნხ ი კაცხა̈რ
Line of edition: 37    გვალჟი̄ნ არდახ. ალჲა̈რს ჟიქა̄ნქა კა̄რა̈რს ხაგფენდა, მა̈ზუმვა̈̄ჲ ხეღვა̈̄ნო̄ლ მეზგა,
Line of edition: 38    ნე̄სგაქა მეგჭა ზექი ლჷტა̄ბა მეგრა ფაუს ხადა̈̄სგდა ი ამეჟი̄ნ ყველფი ნა̄ჭას ხორკინა.
Line of edition: 39    ჩუქვა̄ნ ჩიქე ო̄შთხვ კუთხვჟი̄ნ ლა̈ლსება̈̄ლს ხალჯენდახ ი მა̄დხვა̈ჲს ჟ'აბჷრჯახ.
Line of edition: 40    ამის ხეჟხა̄ნ ყველფ. ამისგა̈ნხა̈ნჩუ̄ნ კერა̈ჲს ჲჷგა̈მდახ ი კერა̈ჲს ჟიქა̄ნ მუსგვენ კას
Line of edition: 41    ხალფა̈რდახ. სამ ფოყხა̈ნ ჩუქვა̄ნ ბაჩა̈რს და̈̄სგდახ ი ალჲა̈რს ლა̈მყინა̈̄ კა̄რა̈რს
Line of edition: 42    ხა̈ჭდახ.

Line of edition: 43       ამჟი̄ნ სერ ქორ სგა̈̄ნჩუ̄ნ ი ქა̄მენ ქა ლჷზგჷრე ლა̈სვ ი მეზგა სგა ლი̄ზი გარ ხეკვა̈დ.
Page of edition: 113  Line of edition: 1    მეზგე დოშდულს ა̈თიშდა ი ეჯ ლე̄თ სგა ღჷრდა ქორთე. ამ ლე̄თ ლიმზირს
Line of edition: 2    იჩომდა, ა̈წიჰდა მეხვბარა̈რს ი ხოჩა̄მ ლე̄თს იჩომდა.

Line of edition: 3       ამჟი̄ნ ლა̈სვ ლილგიმა̈̄ლ შვა̈ნისგა, მარე ქორა̈ ჰამა̈რჟი̄ნ გარ დეშ იგნო̄ლდა
Line of edition: 4    მეზგე, ეჯღ'ე̄რე ლინთვ ი ზავ ჩიგარ მა̈ჩვი̄ბისგა ლირდე ლეგ გა̈მა̈შ ლა̈სვ ი მეზგე
Line of edition: 5    ქორა̈ ლიგემი ხა̈რჯს ი ჴელვანრე ქირა̈ჲს ქა იჟგენდ', ე̄ჩქას გუბა̈ნდს ჷგა̈მდა ლანზა̈ჲდ.
Line of edition: 6    გუბა̈ნდი ამსა̈ხდ იგო̄ლდა, იმვა̈̄ჲჟი ქორ, მარე ხოხვრა ლა̈სვ ი ქორს ხეგო̄ლდა
Line of edition: 7    სგა. ქორს ეშხუ ლა̈კირ გარ დეშ ხა̄დ ი მაჰრე̄ნა̄მისგა ჲორი ლა̈კირ ეჯღა̈̄ჲ ჟი
Line of edition: 8    ხეკვა̈დ, გუბა̈ნდს ეშხუ ლა̈კირ ჟი̄ჲ მა̄მ ხეკვა̈დ, ადო ქა ცხა̈ჲ ქა ხა̄დ.
Line of edition: 9    გუბა̈ნდს ჩუქვა̄ნ ზავლადა̈ღ ლამჷნგარდ იჴმა̈რდახ ი ლინთვ ცა̈რიე̄ლ ლა̈სვ,
Line of edition: 10    ჰარი ი ჰაგა̈̄მდ იჴმა̈რდახ, ჟიქა̄ნ ზავლადა̈ღ კერა̈ჲ ლჷ̄გა̈ნ, მა̈ჩვი̄ბხა̈ნჟი̄ნ ჟი იტხახ
Line of edition: 11    კერა̈ჲს, ნა̄ჭას ი ლამტვარა̈̄ლს. ყველფ ი ეჩეჟი̄ნ არდა ზავლადა̈ღ.
Line of edition: 12    გუბა̈ნდისგა კვა̈მ მა̄მ იგნო̄ლდა ზავლადა̈ღ ლა̈ლმესგჟი̄ნ ი ხოწყჷლჲანა ლარდა
Line of edition: 13    ლა̈სვ. გუბა̈ნდხა̈ნქა დარბაზთე̄'სგა ყო̄რ ხა̄დ. გუბჷნდი მჷგემსი ჟი იგნა მეზგე.
Line of edition: 14    ლილკირა̈̄ლ, ლიმზჷრი ი ლიზგა̈̄ლ ეჩჟი̄ნ ხემთქვა̈̄ნხ ე, იმვა̈̄ჲჟი̄ნ ქორა̈ ლჷგანღო ი
Line of edition: 15    ლიმზირი ხემქთვა̈̄ნხ. გუბა̈ნდს მა̈ჩვი̄ბშა̄ლ ლაჯრი̄რ, ტირხა̈რ ი ამკა̈ლიბ მა̄მ ხა̄დ,
Line of edition: 16    მარე ლაგა̈მჟი̄ნ ჭვა̈დს ხოშა̄მ სანჲა̈რს ხა̈ჩომდახ ჯა̈რ-ზუჰე̄რა̈̄შდ, ფაკნარეშ
Line of edition: 17    ი იშგენ ბა̈რგ-ნაბა̈რგი შედდ. ლჷყა̄რს ჲერხი გარ აჭრა̈ვდახ ყა̈̄რ ჩუქვა̄ნ
Line of edition: 18    ი ხოშა ლაღა̈ლ ლჷსა̈თხ ლა̈სვ. ამის ქა̄მენისგა ჩუქვა̄ნჟი̄ნ ბა̈ჩა̈ კიჩხს ხოსყე̄ნახ
Line of edition: 19    მაშრის.

Line of edition: 20       გუბანდი ლიგემსი ხვა̈ჲ ჭირ ი მა̈ჴდა ხეკვა̈დ. ამის ქა იჟგენდა მეზგე, ეჩქას
Line of edition: 21    ლახე მაღვა̈̄ნ ხუღვა̈̄ნ, გჷრკიდ ყო̄რთე̄'სგა ძღუდა̈რს იცხპა. ძღუდა̈რს ხვა̈ჲ ბა̈ჩ,
Line of edition: 22    კირ ი ქვიშე ხეკვა̈დ. ამის ჩი̄ ჟ'ამა̄რა მეზგე, ეჩქას ჴელვანა̈რსჷდ იგნა, მა̈ზუმვა̈̄ჲ
Line of edition: 23    ხეკვად ი ჲედ გიმ ხუღვა̈̄ნ კალვია̄ქდ. ეჯას სგა იკვა̄ნა, გირკიდ ხუნს აბჷრჯა ი ხუნს
Line of edition: 24    ხოდა̈̄სგდა. ქორა̈ აშხვ ჭვა̈დს დე̄მის ხა̈ცხპა მეზგე ძღვიდს ი სგა გარ ხაჭრენდა ჲარვ
Line of edition: 25    ფოყხა̈ნ, მა̈ზუმვა̈̄ჲ ჴამშა ი მაბა̈ც ხუღვა̈̄ნ მეზგა, ეჩი̄ზუმ კჷლთხის იჩომდა ძღუდა̈რს,
Line of edition: 26    ჲერხი დამბალს ხა̈ცხპა ი ჲერხი ჲარვ ღეთ საჯენს იჩომდა ნაკლათხან.
Line of edition: 27    ძღუდრე ლა̈გმა̄ლჟი̄ნ ქორა̈ ლიგემზუმ ხა̈რჯ ი მა̈ჴდა ხეკვა̈დ მეზგა აშხვ დი̄რიშ
Line of edition: 28    ი ჭერი ლიჴდენქა, ლილკირა̈̄ლ, ქორა̈ ლილკირა̈̄ლშა̄ლ ხა̄დ ლეჩვმე. ძღვიდს
Line of edition: 29    ეშხუ ყო̄რ გარ ხა̄დ ი ეჩას ქა ხოდა̈̄სგდა მეზგე.

Line of edition: 30       ალ ლუძღვდათე̄' სგა ნა̈პო̄ლჷნქა დე̄მშა ლაჴა̈დ ლა̈სვ. ალ ძღუდრე ლიგემსი
Line of edition: 31    ლახე ქა მოშ ასრულა მეზგე, ეჩქას სურუ ხოჩა̄მ ლა̈ხჲადა̄ლს იჩომდა მეზგე. ჴა̈ნს
Line of edition: 32    ი ტახა̈რს ა̈ჲსენდა, ქ'ა̈̄წჰიდა მიჩა მესვფელას, ნა̈̄თი-მჷნა̈̄თის ი გუნ ხოჩა̄მ ლიმზირს
Line of edition: 33    ი ხინს ასყე̄ნა.

Line of edition: 34       მა̈გ აფა̈შვდდა ალ მეზგა, ერე ამგვა̈რდ ოთჷლგიმა̄ლა. ამნოვშ ასრულა მეზგე
Line of edition: 35    ლილგიმა̈̄ლს, ლახე მურყვმა̈ ლიგემს დო̄მის ხემურჯა̄ლ, მარე ამის ძვირდ გარ
Line of edition: 36    მოშ ჲა̈რ ჷგა̈მდა.


Line of edition: 37 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.