TITUS
Svan Chrestomathy
Part No. 194
Previous part

Text: 189 
Page of edition: 168 
Line of edition: 1 
Line of edition: 35 
189. სალდა̈თ


Line of edition: 36       არდა ეშხუ ხელწიფხ. ღე̄რბათ ი მა̄რა ჩი̄ ხეჴჷ̄რალ ეჩის, ერე ქა ახთენე̄ნდეს
Line of edition: 37    დი̄ნაგეზალ. გაცხა̈ჲდ, ეჩი̄შ ხეხვს ქა ა̈ხთენა̈̄ნ დი̄ნაგეზალ, მარე მელთერდ ხა̈̄ქვე,
Line of edition: 38    ერე "ხედვა̈̄ჲ მინს ქა ა̈ხთენა̈̄ნხ, ეჯი გეზალ ჲეშდიარვ ზავ დეცე ნარჰა ქა ნოსა̈̄ვ ლახწვე̄ნახ.
Line of edition: 39    გაცხა̈ჲდ, ხელწიფხდ ი მიჩა ხახვემ ვორუნჩუ ოხსყეხ ლარდა. ხედვა̈̄ჲთე̄'სგა
Line of edition: 40    დეცე ნარჰი დე̄სა იწვე̄ნო̄ლდა. ალი დი̄ნას ამე̄სგა არა ზა̈ჲ ჟი ახა̄დ ი ეჩქას ლა̈ხჴჷ̄რა̈̄ნ
Line of edition: 41    მიჩა დის ი მუს, ერე ჟი ანფუშდეხ დეცე ნარჰათე. გაცხა̈ჲდ, ჟი ანჴიდხ ჟიქა̄ნთე.
Line of edition: 42    ეჩქას შიშდ ხედვა̈̄ჲმჷყ დი̄ნა არდა, ეჯი ადგილს ბუ̈ნტ (\\ ბინტვ) ათსგურდა.
Line of edition: 43    ეჩანღო შიშდ ქა ა̈დპა̄ნტა̈̄ნ ბინტვ. ეჯი დი̄ნაი დემეგ არდა. ეჩქას ხელწიფხდ
Page of edition: 169  Line of edition: 1    მთელ სახჷლწიფხ ლათხე̄ლთე ადზჷზე, მარე დე̄მეგ მოშ ა̈ნთხეხ. აჩა̈დ ჲორი-სემი
Line of edition: 2    ზა̈ჲ. და̈̄რდ მა გვეშ მოშ ა̈ნთხეხ დი̄ნა̈̄ ბედჟი.

Line of edition: 3       ეჩანღო ალ სა̈ხჷლწიფხი ეშხუ სალდა̈თდ ა̈ნფა̈შვდ, ერე "ჯი ესერ ჟი ითხე̄ლი
Line of edition: 4    ეჩის, მარე ქა̄ვ ოთჴერნეხ კაპიტან ი მიჩა თანაშემწე მინე გუ̄მიშ". გაცხა̈ჲდ, ხელწიფხ
Line of edition: 5    თანახმას ანჴა̈დ ი სალდა̈თს ოთბაცე მიჩა ლიხჷლწიფხ. აჩა̈დ დი̄ნაგეზალ
Line of edition: 6    ხედვა̈̄ჲს ჯი ჟი ემმა ა̈ნთხე̄ლნე. აჩა̈დხ სერ სალდა̈თ, კაპიტან ი მიჩა თანაშემწე მინე
Line of edition: 7    გუ̄მიშ. ხეთხე̄ლიხ ჩია̈̄გ: ძუღვაისგა, ბა̈რისგა, მარე დე̄მეგ მოშ ა̈ნთხეხ. ამ ლათხე̄ლს
Line of edition: 8    ეჯჲა̈რ ა̈ხკვა̈დხ ჲეშდჲორი ზა̈ჲ. მე̄სმა̄მ ზავთე აჩა̈დხ ამი̄ ლათხე̄ლს, ეჩქას
Line of edition: 9    ხოშა ძუღვანე̄სგა ისგა ა̈ნთხეხ ეშხუ ხოხვრა კადა̈რ, ხედვა̈̄ჲმჷყ ლჷ̄გა̈ნ სტოლ. ანჴა̈დხ
Line of edition: 10    ალჲა̈რ ი ნა̈ბოზს ამთე̄'სგა ჴედნიხ, ლადაღშვ ძუღვაისგა ხეთხე̄ლიხ. აშხუ̈ნ
Line of edition: 11    ლეზვბე̄მი ლამა̄რად თანაშემწე ადგენეხ, მინ ლათხე̄ლთე̄დ აჩა̈დხ. შომვა̈̄ჲ ჟი ანმა̄რე
Line of edition: 12    თანაშემწედ ლეზვებ, ეჩქას ანჴა̈დ ამთექა წჷრნი მა̄რე ი ჩუ ლალე̄მ ამი̄ ნამა̈რვ
Line of edition: 13    ლეზვებ. ამჟი ანჴა̈დხ ეჯჲა̈რი, მარე ეჯ ლე̄თ ალი ამბავ ლ'ა, მჷტმად ასა̈დხ. მე̄რმა
Line of edition: 14    ლადა̈ღ კაპიტან აცვირხ ხა̈რჯი მჷმა̈̄რად. ეჩისი ამჟი ხაყერ წჷრნი მა̄რე̄მ, იმვა̈̄ჲჟი
Line of edition: 15    თანაშემწეს. მე̄სმა ლადა̈ღ სალდა̈თ ადჷ̄გა̈ნ. ჟ'ანმა̄რე ლეზვებ, ეჩქას ანჴა̈დ
Line of edition: 16    წჷრნი მა̄რე ი ხა̈̄ქვე, ერე "ჯი ესერ მა̄მა ლი ეჩია̈რშა̄ლ ი ლათრაისგა̄ვ ა̈ხმჷქრა̈ნ".
Line of edition: 17    სალდა̈თს ათჷნბაჟჷნ: "იმ როქ ითრუნიხ", მარე ანჴა̈დ წჷრნი მა̄რე ი თჷრქადშვ
Line of edition: 18    ესფხჷკნე სტოლჟი ი ჩი̄მი ფორმა ლეთრე ეჩეჟი ა̈ნფადგა̈̄ნ. ითრეხ ათხე ი სალდა̈თს
Line of edition: 19    ბადა̈გს ხაჭრა̈ჟი, წჷრნი მა̄რე ღვინა̈ლს ითრე. ალის სალდა̈თ გუდ აჴა̈დ, ეჩქას
Line of edition: 20    ბადა̈გს ჩუ ბიდა ი ჲეს-ჲესინ ხჷნსგა წჷრნი მა̄რა ლახღორვე. მო̄ლე ხა̈ნჷნღო
Line of edition: 21    წჷრნი მა̄რე ქა ა̈თსიპდა. ათსგურდა ეჩქა სალდა̈თ ჟი ი დაშნა̈ჲშვ ეშ ადკუბდე. ეჩქას
Line of edition: 22    ჯიბა̈რჩუი̄ ლა̈ხთხა̄ლ: "ჰემმა გვეშ ესერ ხერდი". გაცხა̈ჲდ, ჯიბისგა ჟი ა̈ხბა̈გვ
Line of edition: 23    სემი კჷლა̈რ. ეშხუ ლა̈სვ თითბრიშ, მე̄რვე ვარჩხლიშ, მე̄სმე ოქვრა̈შ. ათხე ლა̈ჲსკო̄რე,
Line of edition: 24    ერე "იმღ' ე̄სერ ა̈თრა̄გო̄ლს ამზუმ ხა̈ნს მიჩა აფხნეგა̈რს". ამღა ეჩჲარე ლასჷნჯა̈ვთე
Line of edition: 25    ჟი აჩა̈დ აშხვ სუ̄კვილდთეჟი̄ნ ი ლოხსგიდა ჩუბავ ი ამი̄ სუ̈კვილდს მა̄დხვა̈̄ჲ ჴურუ̄ლ
Line of edition: 26    ხა̄რ. ლახზჷმე თითბრი კჷლ, ალა ჩვა̈დკარა̈̄ნ. სგა̈̄ნჩუ ოთა̈ხ თითბირშვ
Line of edition: 27    ლილჷშკა̈̄დ. ათხე ლა̈ჲსკო̄რე, ერე შეიძლება ესერ მე̄რვეჲორი სიკვი̄ ამჟი ი̄რიხ.
Line of edition: 28    გაცხა̈ჲდ, აჩა̈დ მე̄რვა სუ̈კვილდთეჟი̄ნ. ამჩუჲ ამჟი ჴურუ̄ლ ხა̄რ. ლახზჷმე ამელექვა
Line of edition: 29    ოქვრა̈ კჷლ, მარე მა̄მა ა̈დკარა̈̄ნ. ალი ოთა̈ხ ვარჩხილვშ ლჷშკა̈̄დ ლა̈სვ. ჩი̄თე
Line of edition: 30    აჩა̄დ, მე̄სმა სიკვთეჟი̄ნი. ამეჩუი̄ ხა̄რ აჯად ჴურუ. ლახზჷმე ოქვრა̈ კჷლ, ჩვა̈დკარა̈̄ნ
Line of edition: 31    ოქვრა̈ ოთა̈ხ. გაცხა̈ჲდ, ამე̄'სგა მა̄დ ა̈რია ეჯი დი̄ნ ე̄, ხედვა̈ჲი ლათხე̄ლს მინს
Line of edition: 32    ხა̄რხ ჲეშდსემი ზა̈ჲ. ალჲა̈რ უშხვა̄რ ლა̈ხცხორპა̈ნხ. ეჩქას დი̄ნად ხა̈̄ქვე, ერე "შიშდუ
Line of edition: 33    აჩა̈დ ამხა̈ნქა, ედო წჷრნი მა̄რი̄ლ ესერ ჩუ ადგა̈რი". ეჩქას სალდა̈თდ ჩუ ადშო̈დბი̄ნე
Line of edition: 34    დი̄ნა მიჩა ნაჩომშ. დი̄ნად მჷსკა̈დ ლახსუჩქვრე. ლა̈ჲბინეხ ეჩქას ლიტმუ̄რე
Line of edition: 35    ოქვრა̈შ ი თითბრიშ ი ვარჩხილიშ. ალჲარე ლატმუ̄რაჟი̄ნ სალდა̈თს უმარჯვ
Line of edition: 36    ახა̄დ მჷსკა̈დ. ქაჲ ადზჷგრეხ ალი ლიშდა̈ბ ი კაპიტან ი მიჩა თანაშემწეჲ ანჴა̈დხ. გემჟი̄ნ
Line of edition: 37    ჟი ესდეხ მა̈გ ბა̈რგ ი ესსგურდახ ი ქა ახა̄გა̈ნხ მინე ა̈გითე ლჷხჲა̈დ, მა̄რე ალი
Line of edition: 38    კადა̈რს სემი კილომეტრ ქილჷქა̈̄ბ ხა̄დახ, ეჩქას გარ ლა̈ხშყა̈დ სალდა̈თს ეჯი, ერე
Line of edition: 39    დი̄ნა̈̄ ნაშჩუქარ მჷსკა̈დ ჩუ ოთსა̈დ ლაჴვრაჟი. გუნ ოხდურვანე დი̄ნად, მარე ეში̄
Line of edition: 40    ატა̈ხ ვეშგდ. კაპიტანდ ჩუ ოთბაცე, ერე ჟი ესერ ხოღე̄ლძე. სალდა̈თდ ჟ'ა̈ნკიდ
Line of edition: 41    მჷსკა̈დ ი ლა̈ჲსგიდდა ვეშგდ, დემეგ ესწვე̄ნე. ეჩქას ხოლა გვი ლოხო̄სდდა, მარე
Line of edition: 42    ეში̄ ათა̄გა̈ნ ნავშ, ესღჷრდა, მარე მიჩა აფხნეგა̈რს დეშ ა̈ჰი̄დ. იმ აჰო̄ლე̄ლ ეჯჲა̈რს?!
Line of edition: 43    ჩუ ოთღორვეხ ი მინე თხვიმს ესერ ანსყე̄ნეხ დი̄ნა̈̄შ მჷთხე̄ლიდ, სალდა̈თ ჩუ აცვირხ
Page of edition: 170  Line of edition: 1    იმვა̄ლე̄სგი ძუღვაისგა. ესღრი სალდა̈თი̄, მარე ძუღვა ჟი ა̈ნჟომა̄ნ. ალი იმთე
Line of edition: 2    დო ლახპურტი̄ნე, მა̄მა გვეშ ა̈ნმეჴრა̈̄ნ. შომვა̄ლე ლჷჰლამე ქა ლახდე ძუღვად კადა̈რთე.
Line of edition: 3    მო̄ლე ხა̈ნჷნღო ბაჟდ ანჴა̈დ ი ათა̄გა̈ნ აშხვ ლაცჷ̄გევს. ესღრი, მარე დე̄მთე
Line of edition: 4    თხვიმ ხა̄რ ლა̄ზჲა̄შ. აშხუნღო ადასდ სამ სართულია̈ნ ხოშა ლარდას. სგა აჩა̈დ
Line of edition: 5    ამთე̄'სგა. ალი ესნა̈რ ქაჯრე ხელწიფხი ლარდა ლი. ალი ხელწიფხს ხაყა ტყვედ
Line of edition: 6    ეშხუ მა̄რე, ხედვა̈̄ჲს ხეჟხა̈̄ნ ალექსანდრე. ალექსანდრეს მასა̈რდ ათჩო̄ნ სალდა̈თი
Line of edition: 7    ლიჴედ. სალდა̈თ ქაჯრე ხელწიფხი კალონა̈რს დეშ ოხვსყე, ეჯღ' ე̄, ქაჯა̈რ ხელწიფხ
Line of edition: 8    ხვა̈ინ უშგულ ხოწბინა სალდა̈თს ჭერხა̈ნჩუ. ა̈რი ამჩუ ეზა̈რ ხა̈ნს. ეჩქას ქა̈ჯა̈
Line of edition: 9    ხელწიფხდ ხა̈̄ქვე ალექსანდრეს, ერე "ალის ესერ ხალკუჰუნე სამ ჩა̈̄ჟს: ჲა̈რ
Line of edition: 10    ი̄რიხ ხოჩა თვალა̈შ, ეშხუ კვაჩხა̈ჲ. ეჩანღო ხალკჰუნე სამ დაშნა̈ჲს: ჲარვ ხოჩა თვალა̈შს,
Line of edition: 11    აშხვ ლჷგჷნჯა. ეჩანღო აჯად ესერ ხალკუჰუნე სამ ლაურჩხილა̈რს: ჲარვ
Line of edition: 12    ხოჩა̄მ თუალა̈შს, მე̄სმა̄მ ლჷჰბოდა̄მ. ჰე მოშ ესერ ა̈თხო̄ლი ნალკვიჰს, ჯი ესერ სგა
Line of edition: 13    ხოჩშენი კაპიტანს ი მიჩა თანაშემწეს". ალჲა̈რ ალექსანდრედ სალდა̈თს ქა ხა̈̄ქვე
Line of edition: 14    მა̈გ ი ლოხთჷმი̄ნე, ერე "მა̈გ ხოლა გარ ესერუ ა̈ნთიშ". გაცხა̈ჲდ, ხელწიფხდ
Line of edition: 15    მა̈̄ჲ ქა ოხჴიდ, ეჩჲა̈რისგა მა̈გ ხოლა გარ ა̈ნთიშ. ახსგურდა კვაჩხა̈ჲ ჩა̈̄ჟს, ლახტყვეფ
Line of edition: 16    ი მე̄რა̄ლე ჟიქა̄ნქა ადჲე. მიჩა სა̈ხჷლწიფხი ქალა̈ქი პილს ჩუ ადჷ̄გა̈ნ. ამჩუ
Line of edition: 17    ლა̈ჲჭვედჲე̄ლე ერე: "მეჴდე ესერ ი̄რიხ მა̄ კაპიტან ი მიჩა თანაშემწე?" ესნა̈რ ეჯჲა̈რ
Line of edition: 18    მეჴდე მა̄მ ლიხ ი ცნობა სგა ლჷზიზ ხა̄დდახ. მიჩა ჩა̈̄ჟ ეჩჩუ მჷჯე̄ლვა̄ლი არდა,
Line of edition: 19    ეჩის ლახბა̈რჲე. ეჩი̄ ნა̄ზნა̈ნჲე̄რ ვარჩხილ ლახვე̄მ მასა̈რდ. სამ ლადა̈ღუნღო ანჴა̈დხ
Line of edition: 20    ეჯჲა̈რი̄. კაპიტანს მიჩა ტო̈ლ და̈̄რ ხაბჟა, დი̄ნა მიჩა ნათხა̄ლვდ ანსყე, ლიხჷლწიფხი
Line of edition: 21    მიჩ ოთმა̈ზრეხ.

Line of edition: 22       ანჴა̈დ ხელწიფხ ი ქეიფ ჩვემინ მიჩა გეზლა̈ ლითხე̄ლიღა. ალი ქეიფთე სალდა̈თსი
Line of edition: 23    ხა̈წსიდახ, მარე ვოდ დო ხელწიფხ ანჴა̈დ, ეჩქად მა̄დ აჩა̈დ, ეჩქას ქ'ა̄ჩა̈დ
Line of edition: 24    სერ. ამჩუ̄ნ კაპიტან ნამარგუნა̄ლა̈. ბედჟი ი̄მბვა̈̄ლ. სალდა̈თ მუბუ̈რთე ესსგურეხ,
Line of edition: 25    მარე მჷსკადჟი დი̄ნა̈̄ გვა̈რ ი ჟახე ხეჲრა̈̄ნ. ალის ხეწა̈დ დი̄ნა ი შიშდ გუდ აჴა̈დ, ლიგვნი
Line of edition: 26    ოხვცქა̈ფ (\\ ა̈დბინე).

Line of edition: 27       ქა ადზჷგრე კაპიტანდი̄ ლი̄მბვა̈̄ლ, ეჩქას სალდა̈თდი̄ იშგვემ ლი̄მბვა̄ლე ნა̈ბ.
Line of edition: 28    გაცხა̈ჲდ, ლა̈ჲბინე ლი̄მბვა̈̄ლ, თი̄ნა მეწვმდ ესყედა̄ნე ი ი̄მბვა̈̄ლ, მარე კაპიტანს ტჷტი
Line of edition: 29    ჰა̈ბ ხედო̄ლი. ქაჲ ადზჷგრე ლი̄მბვა̈ლ ი კაპიტან სპილუ̈ა̈̄ლს ლოხკვა̈რხ ლიღროვა̈̄ლღა.
Line of edition: 30    სალდა̈თს ლიხჷლწიფხ ლოხმა̈ზრეხ. დი̄ნა მიჩა ხეხვდ აჩა̈დ. ეჩჷნღო
Line of edition: 31    შიშდ ლიმლატვ ოხგაცხდეხ თვეთნა ხელწიფხდ. მარე სალდა̈თდ მიჩა ლჷჟჷნგა
Line of edition: 32    დაშნა̈ჲშვ ჩუ აჭკიჟ. მა̈გ ამჟი ხეშია̄ლხ. მარე ჩი̄ ხა̈წრა დაშნა̈ჲშვ. მო̄ლე ხა̈ნ აჩა̈დჷდ,
Line of edition: 33    ეჩქას აშხვ მეჩი ზურა̄ლდ, მეჯლა̈ჲდ, ხოჩა სურა̈თ ოხჴიდ სალდა̈თი ხეხვს.
Line of edition: 34    ალი სურა̈თ ლა̈სვ მე̄რვა ხელწიფხიშ. მჷჯლა̈ჲელდ სალდა̈თი ხეხვ ჩუ ა̈დქჷრთამე.
Line of edition: 35    სალდა̈თ ხეხვდ ჭა̈შმი დაშნა̈ჲ ჟი ა̈ნკიდ. შომვა̈̄ჲ ერე სალდა̈თ ჩუ ივჟა. ეჩანღო
Line of edition: 36    აჩა̈დხ ეჯი ხელწიფხთე̄, ხედვა̈̄ჲი სურა̈თ მჷჯლა̈ჲიდ ოხჴიდ. ეჩქას ეჯი ხელწიფხ ქა
Line of edition: 37    ა̈ხშია̄ლ სალდა̈თს. მარე ჟი ახწინდა. ეჯი ნაცა̈̄დ დაშნა̈ჲშა სალდა̈თ ეშ ადნა̈კცე.
Line of edition: 38    ეჩანღო სალდა̈თი ჩა̈̄ჟ ჩუ ადგან შიშდ. ეჯი მჷჯე̄ლვა̈̄ლიდ ე́, ხედვა̈̄ჲს სალდა̈თდ ვარჩხილ
Line of edition: 39    ლახვე̄მ, ჩა̈̄ჟ ჩუ აშდუ̈ღვ. ალი ა̈დგილჟი ვისგვ ანჴა̈დ. ალი ვისგვს ლახ ქა
Line of edition: 40    ხეწა̈დ სალდა̈თი მჷდგა̈რი, შიშდ ჩ'ათქაჩა̈ვნე. ეჩი̄ ლაქჩენჟი მჷჯე̄ლვა̈̄ლის ლემასგვჲა̄ქდ
Line of edition: 41    ნათა̈რ ესღვა̈̄ნ. ეჩქას ეშხუ ნა̈თ კალთა̈ჲხა̈ნქა ოხშყა̈დ ჭო̄კქა ლა̄ზჟი̄ნ. ეჯი
Line of edition: 42    ნა̈თ ოქვრა̈ კალმახდ ესსიპდა. ეჩანღო ხეწა̈დხ სალდა̈თი მოღლატა̄ლა, ქ'ა̈̄დფა̈შვდხ
Line of edition: 43    ამი̄ ლირმი. გაცხა̈ჲდ, სალდა̈თი მჷდგა̈რი მეფე სგ'ა̄ჩა̈დ ლჷცთე̄'სგა. კალმახდ
Page of edition: 171  Line of edition: 1    ქა ანსკინე კადა̈რთე, შიშდ სალდა̈თდ ესსიპდა. ჟ'ა̈ნკიდ მიჩა დაშნა̈ჲ, ეჩჩუ̄ნ მა̈გ
Line of edition: 2    ჟ'ანკიდ. ეჩანღო ადგე ჩიჟი ვო̄შთხვ საჯნია̈ნ ცხვადვ, ალი ცხვადვ ლუფუ̈̄ნა ლჷჯოშ
Line of edition: 3    ანგვა̈შლე. ეჩქას მიჩა ნახა̈ხვს, ხედვა̈̄ჲ ერე მიჩნე̄მ ა̈ნთხე, ეჩის ხა̈ქვე, ერე
Line of edition: 4    "ემმა ესერ სა̈ხ ლახღვა̈̄ნდეს, ეჩქას ჯი ესერ ამთე̄'სგა სგა ისკნე, ეჩქას მე̄რვახა̈ნჟი̄ნ
Line of edition: 5    ჯიჯვა̈რ გარ ესერ ა̈ნჴდენიხ". გაცხა̈ჲდ, სალდა̈თდ ჩუ ა̈დსკინე ცხვადთე̄'სგა.
Line of edition: 6    მე̄რვახა̈ნჟი ხოჩე̄ლდჷდ ანტა̈ხ. ეჩქას ადსკინე დი̄ნად. მე̄რვა ხა̈ნჟი ჯიჯვა̈რ გარ ანჴა̈დხ.
Line of edition: 7    ეჩანღო სალდა̈თი ხეხვდ მჷჯე̄ლვა̈̄ლი ანჴიდ. ეჩანღო ცოჩა ლირდე ა̈დჴიდხ ი
Line of edition: 8    ჯა̈მზჷრახ ღერთემ!


Line of edition: 9 
ლატლი



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.