TITUS
Svan Chrestomathy
Part No. 195
Previous part

Text: 190 
Page of edition: 171 
Line of edition: 1 
Line of edition: 10 
190. სემი ლახვბა


Line of edition: 11       ლჷმზჷრე̄ვ ხიდ ი აშხვ ხელწიფს ხორდა სემი ლახვბა (\\ გეზლი̄რ). ალი ხელწიფ
Line of edition: 12    ერ იქუ̄ნავა̄ლ, ეჩქა ხა̈̄ქვე მიჩა გეზლი̄რს: "სემი ლე̄თ საფლა̈ვჟი ლემესგუ
Line of edition: 13    ხო̄შვახ". ალი მა̄რე ჩუ აშდიღვხ ი ათხე ხა̈̄ქვე ხოხვრა მუხვბედ ხოშა ლახვბას:
Line of edition: 14    "ლემესგ ლა̄შათე̄ვ აჩა̈დხ", მარე ხოშა ლახვბა მა̄დ აჩა̈დხ. ათხე ანჴა̈დ ხოხვრა მუხვბე
Line of edition: 15    ი ჯი ღალ აჩა̈დ. ჩუ ადა̄შე ლემესგ ი ჩუ ლივჟუნეს ხეპი̄რა̄ლ, ეჩქა ანღრი მო̄ლე
Line of edition: 16    ეჯგვა̈რ, ერე მა̈გ მეშხე ლი დეც ი გიმ, ხოხვრა̄მ მუხვბეს ეჩჟი ლახყალუ̈̄ნდა,
Line of edition: 17    ერე ჩუ ვეთ ა̈დჰალმა̈̄ნ. ქა ანჴა̈დ ალი ლჷჩა̈̄ჟ ი ჩუ ესცვირ მეშხე ჩა̈̄ჟ ი მიჩა მოწყობილება.
Line of edition: 18    ანჴა̈დ ალი, ხოხვრა მუხვბე ი ა̈გითე ანჴიდ ალი ჩა̈̄ჟ ი ჩუა̈დშხვინ გვემისგა.
Line of edition: 19    ანჴა̈დ მე̄რმე ლე̄თ ი მიჩა ლახვბა მა̄დჷდ აჩა̈დხ ი მიჩჷდ ხა̄დ ლე̄ზი. ჩუ ადა̄შვე
Line of edition: 20    ლემესგ ი ლივჟუნეს ხეპი̄რა̄ლ, ეჩქა ანღრი მო̄ლე ეჯგვა̈რ, ერე დეც ი გიმ მა̈გწირნი
Line of edition: 21    ლი. ლაჰყალუ̈̄ნდა ა̄დუ, მარე თხვიმ ა̈ნბჷგე ი ალი ლჷჩა̈̄ჟი ჩუ ესცვირ, წჷრნი
Line of edition: 22    ჩა̈̄ჟ ი მიჩა მოწყობილება. ათხე ანჴა̈დ ალი ი ჩა̈̄ჟ ი მიჩა მოწყობილება ჩუ̄დ აშხვინ
Line of edition: 23    გვემისგა. ანჴა̈დჷდ მე̄სმე ლე̄თ ი მა̄დჷდ აჩა̈დხ ხოშა ლახვბა. მიჩჷდ ხა̄დ ლე̄ზი.
Line of edition: 24    ათხე ბა̄ზი ანღრი მო̄ლე ეჯგვა̈რ, ერე მა̈გ თვეთნე ლი დეც ი გიმ. ალი სგა̄'დ
Line of edition: 25    ანჴა̈დ ი ჩუ̄'დ ესცვირ თვეთნე ჩა̈̄ჟ ი მიჩა მოწყობილება. ამ დრო̈ვჟი ლი ჩა̄ჟრე
Line of edition: 26    ლიმქარა̄ლვნე. ჲერვა̈̄ჲ დეცხა̈ნჩუ̄ნ ნაჭა ხა̈რკე̄ნა, ეჯის ოთა̈̄ხი̄'სგა ლჷმა̈რდხ
Line of edition: 27    სემი მიჟუწდუნა ი ეჯი ოთა̈ხი ბალკონსა̈ნჩუ ხა̈რკე̄ნა ოქვრა̈ თასა̈რ," ეჯი თასა̈რს
Line of edition: 28    ჲერვა̈̄ჲ ჟი ლახპა̈რვნი̄სხ, ეჯის ჯილდოდ ხაჰვდინახ ეშხვი მიჟუწდუნას ი ეშხვი
Line of edition: 29    თა̈სს. ამხა̄ვ აჩა̈დხ ესნარ ხოშა ლახვბა ი ხოხვრა მუხვბე მა̄დ ოთჴერნახ. ხოშა ლახვბა
Line of edition: 30    მეჩდე ლოხვთჷ̄რა, ეჩქა ჟი ოხფი̄შვდა მეშხე ჩა̈̄ჟ გვემისგა ი მიჩა მოწყობილება
Line of edition: 31    სგა ლოხქვა ი ა̈მჩედ. ალი თასა̈რს და̈̄რ მოშ ხა̈პრუნა̈̄ვნახ ჩაჟარს, ამჟი ლა̈ხჴა̈დჷნ
Line of edition: 32    ამის ი ლახპა̈რვნე აშხვ ი ბალკონთეჟი ჟი ადსკინე. ამის ქა ლახვე̄მხ ეშხვი
Line of edition: 33    მიჟუწდუნა ი ოქვრა̈ თა̈ს. ამჟი ა̈გითე ანჴა̈დ. ქა ა̈დშყუჟუ̄რე ლერქვალ
Line of edition: 34    ი ჩუ ა̈დშხვინ. ჩა̈̄ჟ ი მიჟუწდუნა გვემისგა ათპა̈ჟვნე. ანჴა̈დხ მიჩა ლახვბა ა̈გითე ი
Line of edition: 35    ლა̈ხჭვედდა ალ' ა̄, ხოხვრა მუხვბე, ხედვა̈̄ჲ ტჷტს ხასგურდა. ხოშა ლახვბად კჷკ
Line of edition: 36    მა̄დ ლახტიხხ. მე̄რმა ლადა̈ღ ხოშა ლახვბა აჩა̈დხ ი ალი მა̄დ ა̈დჴერნეხ. ალჲა̈რ აჩა̈დხ,
Line of edition: 37    ეჩქა ჟი ლახსგურდა წჷრნი ჩა̈ჟს ი ალე აჩა̈დ. მე̄რმე გამარჯვება ამნე̄მდ ა̈ნკიდ.
Line of edition: 38    იმვა̈̄ჲჟი სგვებინ, ა̈გისჷდ ესხვი̄დ. მე̄სმა ლადა̈ღ აჯადჷდ აჩა̈დ ი მე̄სმე ლადა̈ღ აჯად
Line of edition: 39    გამარჯვება ა̈ნკიდ. ათხე ა̈გის ხოპკუნა სემი მიჟუწდუნა, სემი თა̈ს ი სემი ჩა̈̄ჟ ი
Line of edition: 40    ჩა̄ჟრე მოწყობილობა. ალი მა̄მგვეშ ხოხახ ხოშა ლახვბას. სემი მა̈გ ა̈გის ა̈რიხ,
Line of edition: 41    ეჩჟი ქა ხა̈̄ქვე მა̈გ, მა̈̄ჲ მიჩ ხოშხვნა ი მა̈̄ჲ იმვა̈̄ჲჟი მიჩ ესცვირხ ეჯი ჩა̄ჟა̈რ ი იმვა̈̄ჲჟი
Line of edition: 42    ლა̈სვხ ეჯი მა̄რა̈̄ლ.
Page of edition: 172  Line of edition: 1       ქა ანჴიდ გვემხა̈ნქა ალჲა̈რ მა̈გ, მა̈̄ჲ მიჩ ხოპჟუნა̈̄ნ ი ხოშა მუხვბეს ხოშა ვიდილ
Line of edition: 2    ლახვე̄მ, მანე̄სგჷრა - მანე̄სგჷრე, მაჰვრე̄ნე მიჩ ხა̄დდა. თვით ჩა̈̄ჟ ი მიჩა მოწყობილება
Line of edition: 3    მა̈გ ჩუ ოთრიგვა̄ლე. ეჯჲა̈რდ ეჩქანღო ხოჩა ლირდე ა̈დჴიდხ.


Line of edition: 4 
ლატლი



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.