TITUS
Svan Chrestomathy
Part No. 196
Previous part

Text: 191 
Page of edition: 172 
Line of edition: 1 
Line of edition: 5 
191. ხჷ̄ნსგა ქათლი̄დ


Line of edition: 6       ამ' ა̈რი, ლჷმზჷრე̄ვ ლიშდ ი ქათლა̄თა̈ ნა̈ბჴულ. აშხვ ლადა̈ღ აჩა̈დ ლემჷრხელათე
Line of edition: 7    ი ა̈ფხრიჭვი ლემჷრხელისგა. ანჴა̈დ ეშხუ მა̄რე ი ლა̈ხშჷმ: "ო̄ ქათლი̄დ!" "მაჲ
Line of edition: 8    ჯაკუჩ?" "იმ ხაშდბა ლემჷრხელაისგა?" "მა̄მ მისგდიჲა, ხვა̈ფხრიჭვი". "იმ ხეთხე̄ლი?"
Line of edition: 9    "იმ ი კვეცნა ითქა̈რს". "მაჲ ჯა̄რხ?" "მა̈ჲ ი ქა ხვალა̈̄ში, ჟი ხვითი, ჩუ ხვაკლა̈ვი,
Line of edition: 10    ჩუ ხვაბა̄ბე ი ეჩქანღო ლინთვისგა ლენკვლი შუნ მეღვე̄ნი მიშგოვდ ი მიშგვა
Line of edition: 11    წინწლარეშდ". "მერხლა̈რ ჯეჴფო̄ლნიხ ი ჭჷშხა̈რ მა̄მ ჯისტუ̄ნიხა?" "მა̄მა, ჩექმარა̈რ
Line of edition: 12    მა̈̄ზხ". "ჩექმარა̈რ ჲა̈რდ ა̈ჯშხებჲე̄ლე?" "ჲა̈რდ იხარა̈ზდ". "ეჯ ხარა̈ზ მა̈̄და̈ნ?"
Line of edition: 13    "მა̈ჲ ი ჩვადგან". "ჲაღო მერხლა̈რისგა ითქა̈რს დე̄სა მოშ ხითხე̄ლი, ლაჰუნწულა̈̄ში
Line of edition: 14    ფე̄დიას ლა̈ხბინ ლიფხრიჭვი ი ეჩეჩუ̄ნ ჟ'ა̈ჯხო̄ლახ ითქა̈რ, ადო ლემჷრხელაისგა
Line of edition: 15    ივალადა̈ღ დე̄სა იმგვაშ მოშ ხითხე̄ლი". ალა ქა ხა̈̄ქვ ი აჩა̈დ. ამი̄ ამბა̈ვ
Line of edition: 16    ჩვა̈დჯჷრვე ხჷ̄ნსგა ქათლი̄დდ, ქ'ა̄ჩა̈დ ლაჰუნწულა̈̄ში ფე̄დიათე. ლა̈ჲბინე ლიფხრიჭვი
Line of edition: 17    ი ეშდ ითქ ა̈ხგვა̈ბ კვეცნა̈შ. ალ კვეცნა̈ ითქა̈რ ქ'ა̄ლა̈შ ქათლი̄და̈ ხჷ̄ნსგე̄მ
Line of edition: 18    ი ეჯგვა̈რ ნამშა̈ჲ ჟ'ოხჴა̈დ, ერე სამ ზავჲა̈ ლასა̈დდ ეშ ხოხუ̄პა̈̄ნ. მა̈გ ალ და̈ბს ხოსგიდდა
Line of edition: 19    მე̄ზ-მეჩედ, ეჯგვარ ხოჩა ლესგდი ჩუ ლა̈სვ ალ ქათლი̄და̈ ხჷნსგე̄მი და̈ბ.
Line of edition: 20    ლითჲე̄ლე დვრევ ლი, ამჟი̄ნ აშხვ ნა̈ბოზს ქათლი̄და̈ ხჷ̄ნსგა ქ'ა̈̄ხჭა̈მ სოფელისგა
Line of edition: 21    ნადა̈რს მჷთიდ ი ჩუ ითხე ალ ქათლი̄და̈ ხჷ̄ნსგე̄მ ერვეშდ ზურა̄ლ მჷთიდ ი ეშდ მა̄რე
Line of edition: 22    მუნვრიდ. ალჲა̈რ მე̄რმა ლადღი ჰამა̈შდ ა̈ნმახა̄ლე მა̈̄ნკვი მიჩა ქორთე. ბა̄ზი
Line of edition: 23    ლა̈ჲსად უ̄ღვა ჴანა̈რ აზიჰ, ეშდ კეც ჰარა̈ყ ჟ'ანმა̄რე, ეშხუ კიბდვენ ფექ დია̈რ ანნაყე
Line of edition: 24    ი ალა მა̈გ ბა̄ზი ხოჩა̄მდ ქ'ა̄ნმა̄რე. ლეღვ ჟ'ანჯა̈ბ, წვა̈დვა̈რ ჰამა̈შდ შამფვრა̈რს
Line of edition: 25    ათცუვე, შედ-მაკედ ქ'ა̄დშდაბვნე ი ეჩქას ჩვა̈დუ̄ჟ. ეჩზუმ ქ'ა̈̄ხფას ამ ლე̄თს, ერე
Line of edition: 26    ალა მა̈გ ნამშაუნღო სემი უ̄ჟ ქა̄დ ა̈ნუ̄ჟნე. მე̄რმა ლადა̈ღ ნადა̈რ დო̄სგ ანჴა̈დხ. ხჷ̄ნსგა
Line of edition: 27    ქათლი̄დდ ალჲა̈რს ტაბა̈გ ოხგე. ლეღვი წვა̈დ მასა̈რდ ესვდე ი დია̈რ. ჰარა̈ყ
Line of edition: 28    ჰა̄ლ მოშ ხეკვა̈დხ, ამზუმ ლახა̈̄შ ი ხოჩა ლენცლობ ათყერ. ანჷ̄გა̈ნხ ი აჩა̈დხ ლათეჲთე.
Line of edition: 29    ლახა̄განხ სგა და̈ბს ი გიმს, ლჷყფჷნ' ე̄სხვი̄დხ. ესნა̈რ ბა̄ზი კე̄სა̈რშა ხამა̈რ ლა̈ხ.
Line of edition: 30    ქა̄ლხ ალ და̈ბს ი ბოლეკდ ანკიდხ. ხჷ̄ნსგა ქათლიდდ ნადა̈რს მაჴვა̄მ ხა̈̄ქვ, სგა̄დ აწსე
Line of edition: 31    ქორთე ი გუნ ხოჩა ლადა̈ღ ოხყე. ალ ნადა̈რ აჩა̈დხ. ეჩქას ანჷგა̈ნ ჟი ი აჩა̈დ
Line of edition: 32    კე̄სა̈რშე̄რთე ნა̈ვრიე̄რ ლაკა̈დთე. აჩა̈დ ყო̄რთე̄სგა ი ლოხვბინე ლიწრა̈̄ლ: "კე̄სა̈რშა,
Line of edition: 33    ხოლა ჴა̈დშუ, ორა̄შაუ, ხოლე̄მი მუჩვმა̈̄ლ, ქა ჲა̈რ ა̈ხსგიდდად!" ოთთო̄ნე
Line of edition: 34    ქა კე̄სა̈რდ მიჩა ფა̈მლია̈რს: "ჲა̈რ ესერ ლი მინე მეწრა̈ლ. ჟი̄ვ ახმეჴრა̈̄ვნეხ". ა̈დსგიდდახ
Line of edition: 35    (\\ ა̈დსგიდახ) ქა ი ქა ხეწა̈დხ ამის. ეჩქას ხა̈̄ქვს კე̄სა̈რს: "ალ' ე̄სერ ქათლა̈̄და̈
Line of edition: 36    ხჷ̄ნსგა ლი". "ჲაღვ' ე̄სერ სგა̄ვ ადგენეხ ლაჩა̄ჟი̄რთე. ეჩე̄სგ' ე̄სერ ჩა̄ჟა̈რ ჩვადლჷტნიხ".
Line of edition: 37    ხაფხეჭხ სგა ქათლი̄და̈ ხჷ̄ნსგა̄მ ი სგ'ა̄კვა̈რხ ლაჩა̄ჟი̄რთე. ლა̈ჲბინე ამე̄'სგა
Line of edition: 38    ლიპჷრტყა̈ნჲე̄ლ, ა̈დსისგა̈̄ნხ ჩუ ჩა̄ჟა̈რ, ა̈თჩჷდხ უშხვა̄რ, მა̈გ ყა̈ლდ ლახგენეხ უშხვა̄რ
Line of edition: 39    ი ჟ'ანხვა̈ტხ. ეჩქანღო ჴანა̈რთე̄'სგ' ა̄დკვა̈რხ. ალჲა̈რსი ამჟი̄ნ ხაყერ. ღო ლახმი̄რთე̄'სგა
Line of edition: 40    ი ალჲა̈რი ჟ'ოხხვიტ. ეჩქანღვ' ა̄ნჴა̈დ კე̄სა̈რ' ი ხა̈̄ქვ მიჩა ფა̈მლია̈რს:
Page of edition: 173  Line of edition: 1    "ჟი̄ვ ესერ ოხვტყაბეხ ალ ხჷ̄ნსგა ქათლი̄დ ი ჩუ̄ვ ხა̄მნეხ". ანჴა̈დხ ფა̈მლია̈რ,
Line of edition: 2    ჟ'ანტყაბეხ ალ ქათლა̈ ხჷნსგა, მარე ჟი დე̄მჟი მოშ ატყბეხ ი ამჟი̄ნ ჩუ ხა̄მნეხ კე̄სა̈რს.
Line of edition: 3    ჴადვისგა ჟ'ა̈ნსე̄ლვა̈̄ნ ხჷ̄ნსგა ქათლი̄დ ი ლა̈ჲბინე ლიტუ̄ლი: "კე̄სა̈რშა უჯბა̈̄შ ი
Line of edition: 4    უტყბა̈̄ მუზვბა". კე̄სა̈რდ ხა̈̄ქვ მიჩა ფა̈მლია̈რს: "ჯ' ე̄სერ ჩუ იქქვი, მინდ დაშნია̈რ
Line of edition: 5    ლჷმა̄რადუ ლა̄ჲეხ. შომვა̈̄ჲ ესერ ამნე̄მ თხვიმ ქ'ა̄ნქვიჭას, ეჩქას ესერ ქა̄ვ ათქვიცხ".
Line of edition: 6    ალჲა̈რდ ამჟი̄ნ ჩვემინხ. ქათლა̈ ხჷნსგე̄მ ქ'ა̄ნსკინე, დაშნია̈რ ქ'ა̄თქა̈დხ, ახხვი̄დ
Line of edition: 7    კე̄სა̈რს ი ლასგვრა ქ'ა̄ხტა̄ბეხ ი ლჷმზჷრე̄ვ ლიშდ.


Line of edition: 8 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.