TITUS
Svan Chrestomathy
Part No. 211
Previous part

Text: 206a 
Page of edition: 188 
Line of edition: 25 
206. ჰამაშა̈რ



Line of edition: 26 
ა


Line of edition: 27       ჰამაშა̈რ, ათხე გელა იზგე, ეჩეჟი ლჷმზიგლიხ სემი მეზგე. ალჲა̈რ ეჭკა̈ლიბ ბა̈ი
Line of edition: 28    მეზგოლ ლჷმა̈რხ, ერე ლა̈იდ სურუ ი ნაბა̈ჲოშვ აშვჟი სუფრ' ოთგურნახ, ათხე
Line of edition: 29    სუფრეშს ხვაყლედ, ეჩეჩუ. ეშვი კალვცა̈ლ ტაბა̈გ ოთგახ ი ასვ თეუს ჟი გეში
Line of edition: 30    ხეკვეს ლჷმა̈რლასვ ხოჩერებოშვ. ქა მა̈ ხებროლნივ მაროშვ, ჟაღვშვ ი
Line of edition: 31    ქვინლჷმგენოშვ, ეჯიცა̈ლ ისგა ხეკვეს ხა̈ქმოლნენს.

Line of edition: 32       ჰამაშა̈რს, დიდა̈რ ხა̈ლხს, მა̈გ ხა̈კბალახ. ეჯზუ მა̈ღენახ, ერე შელს
Line of edition: 33    როქვ ნა̈ჩვლა̈რჩუ ბიდახ ი ჭალა̈რს როქვ ხეტყუბივ. ათხე ამზუ დიდა̈რ ხა̈ლხ
Line of edition: 34    ალჲა̈რ ი ხა̈ნხუნახ ლახმჷლა̈რს, ხაჯღავახ: "მინ ესერ ღა̈რიბ, მინ ესერ ეჯჟი ი მინ ამჟი".
Line of edition: 35    ჩუ როქვ ჴედნივხ კაჩრე თხუმთე. ტა̈ბა̈გს ეჩეჩუ როქვ ლჷმგემნელიხ, იქეიფჷდხ
Line of edition: 36    როქვ ი ხაჯღავახ ჩვიბშა̈რს ეჩხენჩუ. შომა მა̈ბზა̈რჟი დირა̈რს როქვ აკრა̈ნკივხ
Line of edition: 37    ეჩხენჩუ. ხვა̈ი ხა̈ნს ხონჟა̈რნახ, ხა̈ისგუნახ ჩვიბშა̈რ. ლიმზურა̈რჟი ჟი ხა̈წჰოლნახ
Line of edition: 38    ეჩეგ-ამეგ. ღვე როქვ ბოდიშს რექინეხ ი ათსგვივიხ, მარე ეჯჲა̈რს ეში ეშვი გარ
Line of edition: 39    გვი ხა̈დენახ. ქვინლჷმგენოშვ გეში ლჷმა̈რხ ი მაცა̈დინი გუნ ლჷმა̈რხ. ჰამაშა̈რს
Line of edition: 40    კა̈იშ ლეჟა ესყენახ ქვინლჷმგენოლ, ეჩქას კინჩხა̈რ კალვლისგა როქვიდ იშგა̈ლივ
Line of edition: 41    ფურა̈რს. აშხუნღვე ნა̈მდიდროშვ (მა̈ვშ ლიზ საბრალ ამსოლდს ქონება ჩვატტურე)
Line of edition: 42    ფათრეკიშ ლა̈თხელით' ომჩედხ ჰამაშრე ეშდჲორი მა̈ხეღვა̈ჟ. ალჲა̈რ ფა̈ლედ
Page of edition: 189  Line of edition: 1    ბევას ლახმუშგვრენახ. ბევას ხოქვა: "იმთ' ესერ ესხრიხ?" ი ფათრეკიშ
Line of edition: 2    ლა̈თხელით' ესრ". ბევას ღალ ლახყალვნივ. შიშდ გიცა̈რ ოთზიჰა, პა̈ტივ ხოყრა ი ხოქვ'
Line of edition: 3    ერე "ფათრეკს ესერ აშ ი აშ ალ მეზგ' ესერ ხეთხელი". ათხე ამჲა̈რს მაჴვამ ხოქვახ
Line of edition: 4    ი ა̈ლი მეზგათე ომჩედლიხ. ეჯ მეზგე ლაჴნის ხაშდბა ეჲ ლა̈დეღ. ოხფიშვდახ
Line of edition: 5    ამთელისგა ი ეშვი მა̈რე ემეჩ' ოსდახ ლჷდგა̈რ. ხოფხჭახ თოფა̈რდ ალა̈ჲრს ი ეშდჲორი
Line of edition: 6    მარახენ ეშვი გარ ოხფიშვდახ ამბიშ მჷჴად. ამკა̈ლიბ კიბ ემეჩუ ესოგახ. უშხვა̈რ
Line of edition: 7    ნენსგა მინ (\ ჰამაშა̈რ) მა̈გ ხოჩამდ ლჷმა̈რდხ ეში, ოდო კაფშვირ ნა̈ ი მინსი ნა̈რენა
Line of edition: 8    აშგარ. მინე ჰასვშა̈რ (\ ასშვა̈რ) ნა̈ ნა̈რდენა, ნიშგე მინს ხა̈რდენახ.

Line of edition: 9       ლიჴვდუშის მჷდე, ლიმზურ, ნა̈მთექა სოფელს ი უშხვა̈რთე ჴვედნიდ.
Line of edition: 10    ლიჴვდუში ლადეღ ოხულთხუმახ ჲერხის, ერე ლიჴვდუშია̈შ თახლა̈დეღ ეშვი
Line of edition: 11    სოფლობოვ ჩემინხ. კრებათე ხოშ-ხოშოლუ გაროვ ანჴადხ. თახალა̈დეღ აშვ ქორლისგა
Line of edition: 12    კრება ხოჩვმინახ, ერე "მიენ გვაშვ ესერ მოდმა̈გეშ ხადიშ, ჟ'ოვ ანხვიტხ ალ სემი
Line of edition: 13    მეზგე ოდო. მეი ჰასვიშღოვ ანფაშს, ნეი ნუბა̈შინღა ი ჩ'ოვ ადღალტეხ ჰამაშა̈რ".
Line of edition: 14    ხა̈ტ ოხკიდახ ემეჩუ, ერე ა̈მის ქა ჲერვა ოთუშხასგვ, ჟი ხეკვეს ოხხვიტენს სოფელს.
Line of edition: 15    ლაგას ოთგენახ, ერე "უფლიშერ ესერ ჟი ხა̈წჰიხ ი ეჲ ლა̈დღიშდ ესერ გუთოვ
Line of edition: 16    ა̈დდეხ მა̈ ლა̈თიალს ხადეხ." უფლიშ ლა̈დეღ ეჯჲა̈რს გაცხა̈დი ჟი ხოწჰახ, ერე "ჲესვ'
Line of edition: 17    ესერ ხემედჷნეს, ლა̈დი ჟ'ოვ ანჴა̈დხ". ჟი ხა̈წჰენახ. ბეფშ ი აურალ ი ამკა̈ლიბ მოდმ'
Line of edition: 18    ოთჴერნახ ი ხოჩა მა̈ღეღვა̈ჟ გარ ომჩედ, ჟიბ ეჯჲა̈რი ქ'ომჴედხ, მარე
Line of edition: 19    ეშვიეშვი მურყვამჟი მჷლჩად აშგარ ლჷმარდ, ლჷზერ ლჷმა̈რხ სვიფილლისგა. ემეჩუ
Line of edition: 20    ლჷმა̈რ ხა̈ლხ ჩუ ლჷთხნე ი ათხე ემეჩუ ახარახ ლიმზურ ი ღვე ლითოფ. "მა̈ნკვიოვ
Line of edition: 21    ლიშა̈ნს მინდ (\ ჰამაშა̈რდ) ახთოფეხ ი ეჩქანღვე -- ნა". ქა ახჴედახ სერ ი "ეჯისოვი
Line of edition: 22    ქ'ა̈ხშჷმხ, ე, მურყამჟჲ ა̈რი, ეჯის, ლემლყა̈ლ ესერ მა̈ ხარხ ემეჟი. მა̈გ ესერ ემეჩუ
Line of edition: 23    მოდ' ა̈რიხა?" ათხე ეჩხავ ჩვიფშა̈რდ ეშვი, მინე ხოჩ' აფხნეგს ისგ' ოთთონეხ ი
Line of edition: 24    "ქ'ესერ მოდმ' ოთხჴერდეს, თეფოვ ხაჴიდ ი ჩ'ოვ ადგა̈რ. მიჩა თეფიშ ლიკვან' ესერ
Line of edition: 25    ქა ხესმიხ, ემეჩუშა̈რს ესერ მინ ხოწახ". ქა მოდმ' ახჴერნა მახვში ი თეფ ხოყირა.
Line of edition: 26    ჰერ ქაი ხასჷმდხ ი ალჲა̈რს ლუშნუ თეფ ჩი ჟი მჷსყე ი ჰამაშა̈რს -- ქა ლუკვა̈რ.
Line of edition: 27    ესსიპახ ი მა̈გ უშხვარჟი ესვდახ სვიფილდქა. ეჯგვა̈რ ლჷნჯარვე ლჷმა̈რხ ჩვიფშხენჟი,
Line of edition: 28    ერე სგ'ახშჷდახ ი ჟჲოხბიდნახ. ლა̈ბდინაჟი ნიშგე ჰასვიშს ხოქვა მურყვმიშ
Line of edition: 29    თხუმხენქა, ერე "აშ ი აშ ალ ხოჩ' ადგია̈რ (\ დაბა̈რ) ესეროვ ნა̈ს ათნებეხ მიჩა
Line of edition: 30    ლამუარდ" ი ჩ'ოლშიხელიზხ.

Line of edition: 31       ლეგ დრევ მოდე ლჷმა̈რ ჰა! ლა̈ჩილვა თავრობ მოდე, სამჷრთა̈ლიშ ლაჩომ
Line of edition: 32    დემეგ-იმეგ ი სერ ღალ სარ ხარა ხა̈ლხს.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.