TITUS
Svan Prose Texts I (Upper Bal)
Part No. 29
Previous part

Text: 29 
Page of edition: 27 
Line of edition: 1 
29. ძაღუშე̄რ ქორა̈ ლიყდი


Line of edition: 2       ძაღუშე̄რ ნახუ̂ა̈ტუნღო ეჯჲარე ქორს ნე̄სგა̄შა̈რ ესფუსნე̄ნახ. ძაღუშა
Line of edition: 3    ეჯჲარე მჷბგერი ლჷმა̈̄რლიხ. ნე̄სგა̄შა̈რს ქაუშე̄რდ ოთყიდახ.
Line of edition: 4    ალა ნიშგუ̂ეჲ ხოშა̈̄ლს ათხჷ̄რე̄ნახ. აშხუ̂ ლადა̈ღ ესნა̈რ ანჴა̈დხ, ეშხუ
Line of edition: 5    ხორეუ̂ ზექ სგა̄დჲეხ ქორთე ძაღუშე̄რ, ლა̈ნნუ̄ნა̈̄ლჟი ნა̈ჴჩულ ჩუქუ̂ა̄ნ
Line of edition: 6    ოთნა̈ხხ ი ჟ'ახბიდნეხ. ეჩქანღო ალ ქორ ლელჴუ̂ა̈̄მდ ა̈მსედე̄ლი.

Line of edition: 7       ლაღუ̂ა̈ჩინ აშხუ̂ ჩიქქა უ̂აწაძე ლა̈სუ̂, პირისდა̈უ̂ თენგიზ ოთარშა.
Line of edition: 8    ეჯა მი̄ ეზერდ მაშყიდ. აშხუ̂ ლადა̈ღ ა̈ნნა̈ზო̄რა̈̄ნხ ბაპა̈რ, ლაღუ̂ა̈ჩინ
Line of edition: 9    ი თენგიზი სგა ხონჴერდახ. მა̈̄ნკუ̂ი აშირ ი უსგუ̂ა̄მ თუ̂იმენდ ა̈თუ̂ყიდდ
Line of edition: 10    ეჯჲა̈რხა̈ნქა ქორ, მარე ეჩქანღო თამა̈ნიშე̄რემ ა̈ნბინეხ ლიტორკოუ̂ა̈̄ლ.
Line of edition: 11    ამეჟი̄ნ უსგუ̂ა̄მ აშირ ი უსგუ̂ა̄მ თუ̂იმენთეჟი̄ნ აჩა̈დ ფა̈ს. თამა̈ნიშე̄რემ
Line of edition: 12    დეშ ა̈დყიდხ ი სერ ნა̈ჲ ნა̄დ ალ ფა̈ს ლეჴდე. ეშდეშხუ ჴა̈ნ ანკუ̂ა̈დ,
Line of edition: 13    კარდლა̈რ. ჲორი ხოჩა თოფა̈რ, ნა̄ჭა̈̄ლ ი იშგენ გა̈ნზ. ქორს ჲორი
Line of edition: 14    უ̄ღუ̂ა გარ ენსა̈დ ჴანა̈რ. მულგუ̂ენიდ თენგიზ ი ბაპა̈რ ლა̈სუ̂ხ ჲორიღეთ.
Line of edition: 15    თენგიზს ა̈თისთაუ̂დ ჴა̈ნ ათხუ̂ი̄დ. ლა̈ხჭუ̂ედდა ნიშგუ̂ეჲ ღუ̂აჟა̈რს:
Line of edition: 16       -- ესსედახ ესერ მა̄გუ̂ეშ, საბლუ ძიძჲა̈რ?
Line of edition: 17       -- ა̄დუ̂ ესერ, მიჩა̄უ̂ მა̈ზიგ ლახჴედახ.

Line of edition: 18       ეჩქას მიჩა ნა̈̄თი ჴა̈ნ თენგიზდ ქა ლანუ̂ე̄მ, "ლახ ესერ ამგუ̂ა̈რ
Line of edition: 19    მეზგე ხუ̂იშდ". ეჩქანღო ანშგურა̄ნე: "ეშხუ ჴა̈ნი ბარჯ ესერ ლექუ̂ა̄უ̂
Line of edition: 20    ჲა̈რდ ოთხუ̂ჲედ მიჩეშთე, ლუხუ̂რა̈ ნაჩომ ესერ ხუ̂იშდ ი ღუ̂' ე̄სერ
Line of edition: 21    ა̈გითე ხოჩა̈მდ ანფიშუ̂დე". ამეჟი̄ნ მაჴუ̂ა̄მ ხა̈̄ქუ̂ხ ნიშგუ̂ეჲ ღუ̂აჟა̈რდ.
Line of edition: 22    ქორა̈ ფა̈ს ბაპა̈რს ი ლაღუ̂ა̈ჩინ უ̂აწაძეს ხა̄დხ. ნიშგუ̂ეჲ ლაჴუ̂ა̈მს მა̄მგუ̂ეშ
Line of edition: 23    ლა̈ხჴჷმრა̈̄ნ.

Line of edition: 24       ალა ლა̈სუ̂ მუჟღუ̂ერ. ეჩას აღბიე̄რ ა̈ხჭა̈მ, ეჩქას ეშხუ ლჷბა̈რჯ
Line of edition: 25    ჴა̈ნი ლესგ, ჲორი დორა̈ჲ ჰარა̈ყ აშხუ̂ სა̈უ̂-ჩა̈უ̂თ' ე̄სუ̂დედ, მე̄რმე
Line of edition: 26    ლესგ ი ამზუმ ჰარა̈ყ -- მე̄რმათე, მი ი ფუთუ ნიშგუ̂ეჲ ი ბექმჷრზა
Line of edition: 27    მიშგუ̂ა ლა̈დჲარეშ, ჲეცერთ' ოჩა̈დდ, ბექა̈ჲ ღალ, მჷრზა -- ნიშგუ̂ეჲ
Line of edition: 28    ნიბა̈̄შინ ი აჯაღ მე̄რმა̈̄ლ -- ბეჩუ̂ი̄ ბექჷრბი̄შთე. ნა̈ჲ ჩიქე ჰებუდთე̄სგა
Line of edition: 29    ა̈თუ̂სიპედ, ეჩხა̈ნქა მა̈მუა̈რდ ხოჩა ჴა̈ნ ლანდია̄ნეხ ი ეჯ ლე̄თ
Line of edition: 30    ნა̈ბოზს სგო̄ჩა̈დდ ოთარშე̄რთე. თენგიზ დე̄ს' ე̄ნხუ̂ი̄დ ქორს, მარე
Line of edition: 31    მიჩა ლჷფკე̄ლდ გუნ ა̈ნჷლხინე. ამ დუ̂რეუ̂ჟი̄ნ მჷლხამირუ̂ სუსუდ ჲორი
Line of edition: 32    ლჷბა̈რჯ ჴა̈ნი ლესგ, ჲორი დორა̈ჲ გა̈ნჭუ̂ა̈ ნატხანუ̂ ი ეშხუ დორა̈ჲ
Line of edition: 33    რა̈ნგ ანჴიდ. ეჩჷნქა აჯაღჷდ ოხჴა̈დხ მჷკმარა. ბა̄ზი თენგიზი̄ ანჴა̈დ.
Line of edition: 34    მინე ქორისგა ლასკჷ̄დ მა̄მ ლა̈სუ̂ მა̄როშ, ეჩზუმ არდა მჷჲცერ, ხოშა̄-ჲ
Line of edition: 35    ხოხუ̂რა. მა̈გ ქა̈̄დდა̄წყა̈̄ნ. ისგ ტაბგობჟი̄ნ ანჷ̄გა̈ნ ჟი თენგიზ ი
Line of edition: 36    მაჴუ̂ა̄მ ხა̈̄ქუ̂ ჩი̄ მიჩა მჷკმა̈რის. ეჩქანღო რა̈̄ქუ̂: "მინს ესერ ალა ხო̄ზხ
Page of edition: 28  Line of edition: 37    წესდ, ერე ჴა̈ნი ბარჯს გარ ოხჴიდე ჲა̈რ-ა ლესგს, მურგუ̂ა̈ლ ჴა̈ნს,
Line of edition: 38    ეჯღა̄ჲ ესერ ეშხუ საჩქუ̂ა̈რ გარ ხა̈მთქუ̂ახ".

Line of edition: 39       ბა̄ზი რიჰდ ქეიფ ლა̈სუ̂. მე̄რმა ლადა̈ღ ა̈ნჰერ ნა̈ჲ ი ეშხუ ხოჩა
Line of edition: 40    თუ̂ეთნე ჴა̈ნ ნაწუ̂ე̄ნე, მუჭუ̂ა̈რ ჩუბა̄უ̂ ყუნტა̈ჲ ხა̄დ, მარე მასა̈რდ ლუგუ̂ა̈რ
Line of edition: 41    ი ლჷტა̈ნ ლა̈სუ̂. ეჯ ჴა̈ნ ჴალდე̄ ნაღლატუ̂ხა̈ნქა ხა̈ხუ̂იე̄ნა. ნა̈ჲ
Line of edition: 42    მაჴუ̂ა̄მ ხუ̂ა̈̄ქუ̂დ მასა̈რდ ი ონჴუ̂ა̈დდ ა̈გითე. ბეჩუ̂ი̄ ბექჷრბის მა̄მგუ̂ეშ
Line of edition: 43    ლოჰოდა ი ცა̈რიელ ოხუ̂ფი̄შუ̂და მიჩა მჷკმარა. ეჯა უსურმა̈ნ ლა̈სუ̂.

Line of edition: 44          (ლენჯერი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.