TITUS
Svan Prose Texts I (Upper Bal)
Part No. 35
Previous part

Text: 35 
Page of edition: 30 
Line of edition: 25 
35. მჷქშა̈გ ი უ̂იჯრე მჷჯა̈ბ


Line of edition: 26       აშხუ̂ მჷქშა̈გს სემი გეზალ ხარდე̄ნა. აშხუ̂ჟი̄ნ მაჰუ̂რე̄ნე გეზალ ბოფშა̈რცახა̈ნ
Line of edition: 27    ტუ̂იბრაისგა ლჷმშდირა̈̄ლ. ახდე̄ნახ ჲორი ლჷჩა̈̄ჟ. ალჲა̈რს
Line of edition: 28    ღართა̈რ ხაქუ̂მე̄ნახ. ლა̈ჲკუ̂ა̈რხ ალ ბეფშუ̂ ნე̄სგათე̄სგა, ჟი იყირხ
Line of edition: 29    ჩა̄ჟუ̂თეჟი̄ნ ი ადჲეხ. ქა და̈̄რ ხეწა̈დ ალჲა̈რს, იმთე დო ადჲეხ. ანჴა̈დხ
Line of edition: 30    ალ ჲორი მა̄რე ი ალ ბეფშუ̂ მურუ̂ისს ათყიდხ. ალ მურუ̂ისდ სგა̄დჲე
Line of edition: 31    ალ ბეფშუ̂ სადგუ̂ემთე̄სგა. ამის აჯაღ ჲორი სიმქა̈რ ხორი ჩუ ლჷჭბიდე,
Line of edition: 32    ეშხუ -- აშხუ̂ ლარდაისგა ი მე̄რმე -- მე̄რმაისგა. ალ ჭყინტ მე̄სმა ლარდაისგა
Line of edition: 33    ადჭებდე. ალჲა̈რს ჩი̄ უ̂ისგუ̂ს გარ ხა̄მნე. სამ ზაუ̂ისგა ალჲა̈რ მა̈გ
Page of edition: 31  Line of edition: 1    ჩუ̂ადლუგუ̂რე უსგუ̂შ ეჩჟი̄ნ, ერე ალ ბეფშუ̂ მახა ღუ̂ა̈ჟდ ხოშა ლჷტა̈ნ
Line of edition: 2    ლი.

Line of edition: 3       აშხუ̂ ლადა̈ღ ანჴა̈დ მურუ̂ის, ქა̄ნფუშდუ̄რე მა̈გ დი̄ნა̈̄ლ ი ალ ჭყინტ,
Line of edition: 4    ჟი ლაჲსგურე ურემჟი̄ნ ი ადჲე ცხეკთე. აშხუ̂ ლემგა̈მისგა ჩუ̂ა̈ნი̄ყე
Line of edition: 5    მა̈გ ჟი ლუკუ̄ლთხა̈ნ, ეშხუ სი̄მაქ კაჩ ანგენე მა̈̄ნკუ̂ი, ანფიშუ̂დ კოლეფხა̈ნქა
Line of edition: 6    ეშხუ უ̂იჯ, ხოჲა̈ხ ალ უ̂იჯ დი̄ნას, დი̄ნა ქა̄ფიტ მუჭუ̂ედქა, ეჩქანღო
Line of edition: 7    მეგამს ლა̈ხცხო̄რპა̈̄ნ. ანჴა̈დ მურუ̂ის უ̂იჯ ჩუ̂ადგა̈რ, ჩუ̂აჭკუ̂ერ ი ცხუ̂ადთე̄სგ'
Line of edition: 8    ე̄სდე. ეჩქანღო დი̄ნას ხაყერ ამჟი̄ნ. მე̄რმე დი̄ნა̄ჲ კაჩ ანგენე,
Line of edition: 9    მე̄რმა კოლუ̂ფხა̈ნქა მე̄რმე უ̂იჯ ანფიშუ̂დ. ალჲა̈რსი ამჟი ხაყერ. ალ
Line of edition: 10    მეგმა̈რ ჟ'ანქა̈ჩ, ლემესგ ანა̄შუ̂ე ი სგო̄თჩიდ ცხუ̂ად ჩუქუ̂ა̄ნთე. ლოხუ̂ბინე
Line of edition: 11    ლინკუ̂შდე ალ უჯა̈რს ი დი̄ნა̈̄ლს. ხუ̂ა̈ჲ ხა̈ნს ა̈ნკუ̂შდა. ეჩქანღო
Line of edition: 12    ლა̈ჲკიდ კო̄ბჷლდ, ამნუშ, ალ ნანკოშდ ჟ'ესწიქუ̂ ტოტჟი̄ნ, ტუ̂ეტ ჩუ̂აფიტ.
Line of edition: 13    ეჩქანღო აჯაღ ანგუ̂ეშ მო̄ლიდ, ჩუ̂ადცხა̄ნე, მასტუ̄ნა ქა̄თჟა̈გ,
Line of edition: 14    მარე ტუ̂ეტ მეფტად ესსა̈დ.

Line of edition: 15       სერ ჟი მჷრე̄ს ა̈ხფა̈შ ალ მა̄რა ი ჩუ̂ა̈თუ̄ჟდა. ალ ბეფშუ̂ ხოსგდი.
Line of edition: 16    ჟი ლუკუ̄ლთხა̈ნ ლი, მარე ეჩზუმ ჩუ̂ემინ, ერე ცხუ̂ადუ̂თექა ქა̄დჰე,
Line of edition: 17    ტოტა̈რ ჟი ლუკუ̄ლთხა̈ნ ხა̄რ, მარე კო̄ბჷლდ ჴაფშუ̂ ჟ'ა̈ნკიდ, ესუ̂ჩი̄შდ
Line of edition: 18    ალ ნანკოშდ, ჟ'ესბიდ მურუ̂ისს ნებგუ̂აჟი̄ნ, ნებგუ̂ა ქო̄თფა̈ტ ი ჩუ̂ადგან.
Line of edition: 19    სერ ანჴა̈დ ალ ბეფუ̂, ლა̈ჲბინე ლიკურთხა̈ნიე̄ლ ი ეჯამა̈გ ჩუ̂ემინ,
Line of edition: 20    ერე ტოტა̈რ ჟ'ა̈ნფუშდუ̄რე. ალ ცხუ̂ადს სგო̄ხუ̂ბე ჩა̄ჟა̈რ ი ადჲე.
Line of edition: 21    ეჯამა̈გ ქა̄თფასე ალ ჟაგრა̈რს, ერე კეთილშუ̂ ჟ'ა̈ნტჷტნა̈̄ნ. ლა̈ჲბინე
Line of edition: 22    მიჩა სოფლი ლითხე̄ლი. ჟ'ა̈ნთხე. ეჩქანღო მიჩა ქორ ა̈ნთხე, მარე
Line of edition: 23    ქორშა̈რ ჩუ დეშ თა̈რდახ, ეჩზუმ ოთცხა უსგუ̂შ ნანაშყუ̂ხა̈ნქა. სერ
Line of edition: 24    ჩუ̂ათირხ უ̂ეშგიმპილს ი გუნ ლა̈ხიადა̄ლ ოთჩუ̂ემნახ.

Line of edition: 25       ალ ამბა̈უ̂ ტკიცდ ლჷმა̈̄რ.

Line of edition: 26          (ლენჯერი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.