TITUS
Svan Prose Texts I (Upper Bal)
Part No. 37
Previous part

Text: 37 
Page of edition: 32 
Line of edition: 9 
37. ჩეი̄ კუბ


Line of edition: 10       უ̂ო̄შთხუ̂ ზა̈ჲ ი̄რა, როზან ადგან, გაბიშა (ჩა̈რთულა̄ნ). ეჩი̄ საფლა̈უ̂
Line of edition: 11    ლა̈ბუ̈̄ნჯთე ანზჷზეხ უ̂ო̄შთხუ̂ მა̄რე: მჷრზა თაბუშა (მჷშკდა̄ნ),
Line of edition: 12    უ̂ა̈სილ ლუსუ̂ანშა (\\ ნუსუ̂ანშა, ფა̈̄ლია̄ნ), ბედა̈ჲ ადა̈ჲშა (ნიგურია̄ნ),
Line of edition: 13    ეშხუ მა̄რე ჩუ̂ამა̈̄შდჷნ, ჲა̈რ დო ლა̈სუ̂. აკლდამისგა დეშ
Line of edition: 14    ხოსკჷ̄დენდახ ი ქა̄მენჩუ ა̈ნბინეხ ლიბუ̈̄ნჯი. ა̈ბუ̈̄ნჯუ̂დახ, ეჩქა წაკა̈ტ
Line of edition: 15    ოხრეკხ პილთე: ამეჩუ აშხუ̂ მა̄რე̄მი ლაშდუ̈ღუ̂ ლი, ჟი მჷსყე კირშუ̂.
Line of edition: 16    ალას ოხბინეხ წაკატშუ̂ ჩუ ლიკუ̂შე, ეჩქას ჴურუ ხეყა̈რ ი ლა̈სგიდ
Line of edition: 17    ა̈ხსყა̈̄ნხ სგა̈̄ნჩუ. ლა̈ჲსგიდახ ი კუბ ლჷგ ჩეი̄შ. ათხ' ა̄ლას ლახ ხეწა̈დხ,
Line of edition: 18    ლაღუ̂ა̈ჩინიშთე აჩა̈დხ. ეჯა ქა̄ნჴა̈დ ი კუბ ქა̄ხკიდუ̂ნე ქა̄მენჩუ. ჩუქუ̂ა̄ნ
Line of edition: 19    ჯიჰრა̈̄ ფიცა̈რ ხა̄დ. ქა̄ხტყიცხ თხურმა̈̄შხა̈ნი ლაფრი, ა̈ნწუ̂ე̄ნეხ სგა̈̄ნჩუ
Line of edition: 20    ი ლჷ̄გა̈ნდა ეჩე̄სგა სტა̄მა̄ნი̄ლ, ჰარყი ნაგა̈ნ, ი ხაუ̂დი ნამჴიჩუ̂არ
Line of edition: 21    ი ფაყუ̂ა̈ სი̄რმა̈̄ლ ი ქუთუ̄ლა̈ ყუ̂იმბრილდა̈რ, სერ დე̄სამა. ალა ა̈დკუ̂იჰხ გაბიშე̄რემ
Line of edition: 22    ი ჩუ̂ანჴა̈დხ ჟიქა̄ნჩუნ. ეჯჲა̈რს ხეკუ̂ა̈დხ ლიე̄სგი,
Line of edition: 23    მარე ეჩქად ა̈დკუ̂იჰხ სეტელშე̄რემ ი მა̄დ ათნებეხ გაბიშე̄რ: "ალა
Line of edition: 24    ესერ ლი მინე ხოშა̄მ ფუთი̄ კუბ". გაბიშა ყჷლახ, ერე "ალა ესერ
Line of edition: 25    ლი მინე ხოშა̄მ გჲერგი̄ კუბ, ლამა̈̄რია̈̄ მჷშნა̄უ̂ი̄შ". ოხჩჷ̄დხ ამე̄სგა
Line of edition: 26    ლიცუ̂ა̈̄ლ ი ანჴა̈დ სოფელ ი ჩუ̂ა̈დზორა̈̄ნ: დე გაბიშე̄რ ათნებეხ, დეჲ
Line of edition: 27    სეტელშე̄რ ი სგე̄სგეხ ჯგჷრა̈̄გთე. ანჴა̈დხ მოლჯგჷრა̄გა ი საროსტას
Line of edition: 28    კჷლა̈რს ქა̈̄ხბი̄შდხ. დე̄მ ხაჰა̈დდა, მარე ძალა ხაყერხ, ქო̄თღეხ ი
Line of edition: 29    ჩუ̂ადკარეხ ჯგჷრა̈̄გი ყო̄რა̈ლ კუბ ჟ'ანკიდხ ისგლე̄თი ონაქა ი ჟ'ადჲეხ
Line of edition: 30    სეტელშე̄რ გიო̈̄შთე (სეტელშა გიო ბაპ ლა̈სუ̂).

Line of edition: 31       ალ კუბი ლიე̄სგი ა̈დკუ̂იჰ სოფელდ ი ხასდიკჷნდა ჩუ ლიცხრა̈̄ლდი, ანჴა̈დხ
Line of edition: 32    ი საროსტა ჩუ̂ადსტარფეხ ჲარ ათა̈სშუ̂, -- კჷლა̈რ სოფლი უჭუ̂დია̄ლუ̈ნდ ლახუ̂ე̄მ მოლჯგჷრა̄გას
Line of edition: 33    (საროსტაი მოლჯგჷრა̈̄გ ლი).
Line of edition: 34    საროსტა̈̄ მჷქაფ გიუ̂ოდ ლახუ̂ე̄მ სტრაფ. ანჴა̈დ ათხე სოფელ ი ჩუ̂ა̈დზორა̈̄ნ,
Line of edition: 35    ხაკუხ ლიცხრე: იშა ლიზ ალა: სეტელშა ლი, ჰა̄ გაბიშა.
Line of edition: 36    არდა სოფელ კანცელჲაჟი. ლახა̄სდდა ეჩილექუ̂ა ბაპ, იშმა̈გი ციუ̂ოყჷლარეშ,
Page of edition: 33  Line of edition: 1    ქურდია̄ნ. სგა̄თტუ̈̄ლხ კანცალჲათე, ლექუ̂' ა̄ჩა̈დ სოფელ
Line of edition: 2    სეტელშე̄რთე ი ლეჟ' ა̄ნჴიდხ კუბი სგუ̂ებნე ლაფრი, ხედუ̂ა̈̄ჲ ლა̈სუ̂
Line of edition: 3    ლჷირ. ბაპდ ქა̈̄დჭოდა̄ნე. ამეჟი̄ნ ხა̄გა̈ნ, ერე "ალა ლი ხოშა̄მ სეტელშა
Line of edition: 4    ფუთი̄ კუბ". ათხა სოფელდი ჩუ̂ა̈დჯჷრუ̂ე, ერე ალა სეტელშა
Line of edition: 5    კუბ ლი.
Line of edition: 6    ათხა სეტელშე̄რ თხუ̂იმ ხაბრალჷნხ ი ლჷთიშ მა̄რე აფუ̈შდხ მო̄რეუ̂დ. ჩოთქუ̂იცხ
Line of edition: 7    გაბიშე̄რხა̈ნქა სეტელშე̄რ უ̂ოხუ̂იშდ ათა̈ს, მარე ეჩქად გიუ̂ო ჩუ̂ადგან. ეჯ კუბთე
Line of edition: 8    გიუ̂ო ოთგენედ ი ეჯნოშ ჩოშდუ̈ღუ̂დ, ლაფრი ჩუ̂ა̄რი ლა̈შყუ̂დუნა̈̄რდ. სეტელშე̄რდ

Line of edition: 9       ალა საბუთდ ჩუ̂ა̈დგიჭხ, ერე ჩეი̄ კუბ მინეშ ლი.
Line of edition: 10    (მესტია)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.