TITUS
Svan Prose Texts I (Upper Bal)
Part No. 39
Previous part

Text: 39 
Page of edition: 34 
Line of edition: 1 
39. ლჷდგა̈რი ლა̈ჴდათე ლი̄ზი


Line of edition: 2       ეშდჲორი მა̄რე ესღურდად გზა̈̄უ̂რდ ლჷდგა̈რიშ ლა̈ჴდათე ლა̈̄შხთე
Line of edition: 3    თანა̈ღს მუშურს. ქო̄თა̄გა̈ნდ თანა̈ღს. მუს არდა ძღჷდ, თანა̈ღ ლა̈სუ̂ ხოლა,
Line of edition: 4    შდუუ̂ა, ბუ̈ნტ ხასგურდა. მა̈გ დეშ აჩა̈დ აშხუ̂ჟი შუკუ̂ს მაყალშუ̂ ჟა̈ჰიშ.
Line of edition: 5    ჲორი მა̄რე, დადა̈ში ი ილია ჯაფარიძა̈̄ლ, ადზჷზეხ სგუ̂ებინ, ჟა̈ჰდ ხაყლუ̈̄ნდახ:
Line of edition: 6    ა̈ხქუ̂ეცნი, ჰა მა̄მა, ეჩი̄ ლა̈მჴერდ. ჟ'აჩა̈დხ ეშხუ ჲერეუ̂შდ
Line of edition: 7    საჯენს, ეჩქა შიშდ ა̈ხქუ̂ა̈ც ჟა̈ჰ. ეშხუ უ̂ერსტ ა̈გის ქა̄ნჲე ჟა̈ჰდ ნა̈ჲ.
Line of edition: 8    ნა̈ჲ უშხუ̂ა̄რ ხოგუ̂დირდად: "ნო̄თაუ̂ როქ ჩუ მო̄დ ანკა̄ფე, ანყიმე",
Line of edition: 9    ეჯზუმ ა̈გის ქა̄ნჲე. ეჩეჩუნ გარ ანუნჴუ̂ე ჟი. ეჩქას ჟ'ანგენეხ აფხნეგა̈რდ,
Line of edition: 10    ა̈თუ̂ბინედ აჯაღ ლი̄ზი, ჟ'ოჩა̈დ ზაგა̈რთეჟი. ზაგა̈რჟი შუკუ̂ს ქა̈̄თუ̂ქადდ:
Line of edition: 11    იმთე ლე̄ზი ნა̄დ, ეჩხაუ̂ მა̄მ ოჩა̈დდ. ხოლა̄მ ა̈გითე, ლაშყა̈დთე,
Line of edition: 12    ლადშა̈უ̂თე ა̈ნჴა̈დჷ̄ნ. ეჩქას ბუ̈ნტ ქა̈̄თშყუ̂ა̈ფ, მა̄დხუ̂ა̈ილ ლა̈სგიდ ლა̈ნსყა̈̄ნ
Line of edition: 13    თე̄რა̈ლქა. ეჩი̄თა̄ნ ა̈გის ხუ̂არდად, ერე ეშხუ ბა̈̄ჴ ჰაუ̂ე ქა ლა̈ნბა̄ჴა̈ნ,
Line of edition: 14    მა̈გ ჩუ ხუ̂იდშაუ̂ო̄ლდ, ეშდჲორი მა̄რე. ჟ'ესჭუ̂ე̄ნდ ეჩქა, უ̂ეშგდ ონტა̈ხდ.
Line of edition: 15    იმთე შუკუ̂ ლა̈სუ̂, ეჩის ოთა̄გა̈ნდ, მარე ჲერხის გა̈რგლა ჩუ მეჩდე ხა̄დრ
Line of edition: 16    მჷცხიუ̂შ, ეშ ლეთრინე ნა̄დხ ჲერხი. აშხუ̂დ ბაპ ლა̈სუ̂, მე̄ნშგუ̂ე მა̄რე.
Line of edition: 17    მა̄დხუ̂ა̈ილ ოჩა̈დდ შუკუ̂ს, აჯღჷდ ქა̈̄თუ̂ქადდ შუკუ̂ს, დეშმა ა̈ხუ̂მარგდ.
Line of edition: 18    სერ მუბუ̈რ ლა̈სუ̂, თანქა ლა̈სგიდ მა̄მა ლა̈სუ̂. ჟ'ახუ̂ქურქო̄ცა̈̄ნდ ეჩქა.
Line of edition: 19    ეშხუ ღა̈რთ ნუღუ̂ა̈̄ნ. მუს ოთფხირჭუ̂ედ მურგუ̂ალდ, ეჩეისგა ჭჷშხა̈რ
Line of edition: 20    ჩიემ უშხუდ ესუ̂გედ, ჩოსგურდად, ლიღრა̈̄ლ ა̈თუ̂ბინედ უშხუ̂ა̄რეშ
Line of edition: 21    ლაბგად, ერ გუ̂ი მო̄დ ა̈თუ̂კუშედ. საჲათ ნუღუ̂ა̈̄ნდა, სპიჩქა ნუღუ̂ა̈̄ნდა,
Line of edition: 22    მინუტისგა ჲურინ ხუ̂იწუ̂ე̄ნად მჷცხი̄ ბა̈დშუ̂, მარე ეჯღაჲ საჲათ მიჩა
Line of edition: 23    დროუ̂ჟი გარ ამშია, დრა̈უ̂ ჩიქდ ეში̄ მა̄მა ა̈დრჷჰა̈̄ნ.

Line of edition: 24       ისგლა̄თუ̂ შდუა. ლერექუ̂ მა̈გ მჷჟირ ნა̄დ. ისგლე̄თუნღო ქა̈̄დმე̄ფხა̈̄ნ.
Line of edition: 25    ლერექუ̂ მა̈გ სგა ლანკუ̂ერმე. ჟ'ოხუ̄გა̈ნდ ჰამს, ეჩქა ხუ̂ეჭუ̂დიე̄ლდ უშხუ̂ა̄რ,
Line of edition: 26    ერე "ჲა̈რ ხიდგა̈რიდ, ჲა̈რ მა̄დე? " ეჩუნღონ ჟ'ალგენე̄ლიხ ეჯ ლე̄თი
Line of edition: 27    ნარდუ̂ჟი, ოხბინახ ლი̄ზი, იმუ̂ა̈̄ჲთე ლე̄ზი ხა̄რახ, ეჩხაუ̂, ლა̈დი. ლახჭუ̂ედდახ ათხე
Line of edition: 28    უშხუ̂ა̄რ აფხნეგა̈რ: ჲეშდჲარუ̂ მა̄რაისგა ეშხუ̂ი̄ლ ა̈ხჩჷ̄დდა
Line of edition: 29    ჭჷშხა̈რ ი ტოტა̈რ უშხა, სერ მა̈გ ჩუ ლუშხუ̄რე ლა̄სუ̂ხ, ჲეშდეშხუ
Line of edition: 30    მა̄რე. ჩუ̂ა̈მჩედე̄ლიხ სოფელთეჲსგა. ეშხუ თუმნიშ აშხუ̂ მა̄რა ოხყიდა
Line of edition: 31    ჰარა̈ყ. თუ̂ით მანა̈თ ნა̈ჲ ონჴუ̂იდდ ჩიემ ლა̈ხიადა̄ლდ ლჷჲა̈რ ლისედიშ.
Line of edition: 32    ეჩქა ოჩა̈დდ, იმშა ბედჟი ესღურდად, ლჷდგა̈რი ლა̈ჴდად. ეჩეჩუ ეჯ

Page of edition: 35  Line of edition: 1    ლჷდგა̈რი̄ მა̄მა ანნებეხ. ეჯა ჩუ ლუშდუ̈ღ, ლაშდღუ̂ა̄ლ ჩუ ლჷყერ ხა̄რახ.
Line of edition: 2       მად ანნებეხ მიჩა ეჩე̄ ჭირუფლა̈რდ. ნა̈ჲ ჟი ლეჭუ̂ე̄ნი ნა̄დ.
Line of edition: 3    აშ ცუ̂იდდ ლიზელა̈̄ლ ნა̈ჲ ლა̈ნქა̈მ ი ალამა̈გ ჭირ.

Line of edition: 4          (მესტია)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.