TITUS
Svan Prose Texts I (Upper Bal)
Part No. 40
Previous part

Text: 40 
Page of edition: 35 
Line of edition: 5 
40. ტუ̈ბე̄რი თანა̈ღს ლინგზა̄რა̈უ̂ ლუ̈ნთუ̈სგა


Line of edition: 6       ლეჰნა ქრისდე̄ში თა̈ისგა ოთხუ̂ჲედ ნა̈ჲ ფოშტა ცაგე̄რთე. ხუ̂ა̈სუ̂დ
Line of edition: 7    სემი მა̄რე. სგაშა̈̄ლიდ მუშურს ოჩა̈დდ ი ჩო̄ლირდ სგო̄ჩა̈დდ, ეჩქას
Line of edition: 8    ლა̈ჲბინე შდუუ̂ა. ცაგე̄რდ აშ ოჩა̈დდ, ერე შდუუ̂ა. უ̂ო̄შთხუ̂ ლადეღ
Line of edition: 9    ცაგე̄რისგა ანა̄დ ი ეში̄ მა̄მა აქუ̂იც ლიშდუ̂ე. ეჩჩუ̄ნ ა̈თუ̂ნა̈ზო̄რა̈̄ნდ იშგუ̂იდ
Line of edition: 10    მა̄რე, მა̈გ შუ̂ანა̈რ: სა̈სო ყანსაუ̂შა (ჯაფარიძე, მჷმსტიუ̂), ბესარიონ
Line of edition: 11    მაჯუ̂დიერლეშ (შარუ̂აშიძე, მუჭო̄ლა̈შ), ზაქარ ბა̈დრიშა (ჯა̈ჭუ̂ლია̄ნ, მუჭო̄ლა̈შ),
Line of edition: 12    პეტრე უშხუ̂ა̄ნ (მუდა̈ლ), მიხეილ გამყრელიძე
Line of edition: 13    (მჷკა̈̄ლ), მე̄რმე მჷკა̈̄ლ იუ̂ანე (მიჩა გუ̂ა̈რ დეშ მიხა) ი მი. ცაგე̄რხა̈ნქა ა̈ხუ̂ბინედ
Line of edition: 14    ლიჴედ. აშ ონჴუ̂ა̈დდ ჩო̄ლირდ, ჲერე ამჟი̄ნ შდუუ̂ე̄დ. ჩო̄ლირისგა
Line of edition: 15    ჲორი ლადა̈ღ ა̈თუ̂რა̄გედ: ონღუ̂ელღად, ერე მუშურს ა̈მჴედელხუ̂ესუ̂დ,
Line of edition: 16    მარე მუშურ ჩუ̂აკა̈უ̂ ი ჩო̄ლირხა̈ნქა ლეჟ' ო̄ნჴუ̂ა̈დდ ლა̈̄შხთე.
Line of edition: 17    აშხუ̂ ნაგზა ამჩუ ხუ̂არდად ი მა̄მა ხოქუ̂ი̄ცა̄დ შდუუ̂ა.

Line of edition: 18       ქო̄ხუ̂აგა̈̄ნდ ტუ̈̄ბე̄რს. ხა̈ლხ დ' ეჩხა̈ნისგა ჲა̈რ მოშ კუ̂იშა თანღა̈რს ი
Line of edition: 19    დე̄ჲ ამხა̄ნისგა, ჩუ ლჷჭბიდდ არდა მა̈გ ი ნა̈ჲ ქო̄ხპირედ, მარე
Line of edition: 20    ცა̈̄ნთე̄სგა თჷმ ანჴა̈დ, ეჯჟი ლაჭა̈ბ ნა̄დდა. ჲორი ლადა̈ღ ამჩუ̄ნ ანა̄დდა ი
Line of edition: 21    შდუუ̂ა̄დ. ლეზიზ სგა ლა̈ნშდა̈ხ ი რე̄ქუ̂დ, ერე "ჲარუ̂ მა̄რა
Line of edition: 22    ლექუ̂ა ლეტეხ ხა̄რ ლა̈̄შხთე, ლეზიზ ლა̈ჴდათე". ი ჲორი მა̄რე ჟ'ა̈ხუ̂მა̄რა̈̄ნდ
Line of edition: 23    ლექუ̂ა ლატა̈ხთე. მჷხრიშდ ეში-ეში̄ ტა̈ხენდად ლექუ̂ა, მარე
Line of edition: 24    ისგლე̄თუნღო ქა̈̄დმეფხა̈̄ნ (\\ ქა̈̄დგუ̂ალა̈̄ნ) ი ეჩქას რო̈̄ქუ̂დ, ერე "ათხე
Line of edition: 25    ლექუ̂ა ლიტეხ მა̄მაი, ქა როქუ̂ ალა̄გენდ თანა̈ღს". ჲერხი ყულად: "ლეზზურ
Line of edition: 26    დეშ ალღჷრნედ". ჲერ: "ქა̄ლპირად, ადო ლიშდუ̂ეს ლახ
Line of edition: 27    ა̈დბინნე, ჩუ̄დ ლჷსდენიდ ამხა̈ნჩუ. აშხუ̂ ლა̈დღი ლეზნა ჟი ლითმინედ
Line of edition: 28    მჷტმად" ჲორი ლა̈̄შხხა̈ნ ნუღუ̂ა̈̄ნ თხილმარა̈ლ ი ჲორი ამჩუ ა̈ხუ̂სყედ.
Line of edition: 29    სერ მა̈ჲ დო ლა̈სუ̂ ი ოხუ̂პირედ ქა. ლა̈ხუ̂და̄ლედ უ̂ო̄შთხუ̂ მა̄რემ თხილმარა̈ლ, სემი
Line of edition: 30    მა̄რე თხილმარა̈ლურ ლა̈სუ̂ხ. ა̈ხუ̂ბინედ ლიჴედ ცა̈̄ნხა̄ნქა,
Line of edition: 31    მარე ცა̈̄ნა̈ ნაკა̈რ ლეჟა ეჯჟი ხა̈̄ზ მუს, ჲერე ჩუ ლახ ნიძგუ̂ბენი,
Line of edition: 32    ეჩქას მიჩოშ დეშ ტეხნი მა̄რე ი ჟი ლეტხე ნა̄რ. თხილმარალშუ̂
Line of edition: 33    ქუთუ̄ლთეჩუნ გარ ნიშყდენდა (\\ ნიძგუ̂ბენდა), ჩუ ხოძგუ̂ბენდახ ეჯჲა̈რს,
Line of edition: 34    ი თხილმა̈რ ჲესუ̂ა̈̄ს მა̄მა ხა̄სდა̈ნხ. ხუ̂იცა̄დუნა̈̄ლდ ლაჭა̈ბს, მა̈ჲ ეშხუ
Line of edition: 35    ღურდად სგუ̂ებინ ი მა̈ჲ მე̄რუ̂ე, მა̈ჲ მე̄სმე, მა̈ჲ მე̄შთხუ̂ე. ნიშგუ̂ეჲ
Line of edition: 36    ნა̄ზუ̂ს უ̂ეშგიმ ეზერ ლეჴედ ხა̄დხ, მარე ჩუ ლახ ხოძგუ̂ბენდახ ნიშგუ̂ეჲ
Page of edition: 36  Line of edition: 1    ნაჴა̈დს, ეჩქას უშხუ̂ა̄რ ლემურჯი ხადდახ, ადო ჟი დეშ ტეხენდახ,
Line of edition: 2    ეჯღა ჲერე მუს ხა̄სდა̈ნდა სურუ: ცა̈̄ნისგა ა̈ხუ̂ზჷმედ ი ჲორ' ალა̈ბ ი
Line of edition: 3    ხჷნსგა ხა̄სდა̈ნ. ხუ̂იჰა̄ლდად ატკუ̂ერ ზაგა̈რთეჟი, ა̈ხძგუ̂ა̈ბ ჟა̈ჰ ი ნა̈ჲ
Line of edition: 4    ჟი ლა̈ხუ̂სა̈დდ სუ̈კუ̂ჟი ი მუს მა̈გ ჩუ̂აჩა̈დ. ა̈ხუ̂მა̄ზრედ ღე̄რბეთ: "ღერბეთ
Line of edition: 5    როქუ̂, სი ლანეშდ, ნომა ანდაუ̂შა!" ი ა̈ხუ̂ბინედ ლიჴედ. ჟ'ოჰედ
Line of edition: 6    ატკუ̂ერ ზაგა̈რთეჟი. ამეჩუ ხოჩა გუ̂ი ლა̈ნი̄სდდა. ონღუ̂რიდ ნაკა̈რ
Line of edition: 7    ლექუ̂ა, ლატკუ̂ერი ნაკა̈რ ლექუ̂' ო̄ნშდიხდ ი ჩუ̂ა̈ნბურა̈̄ნ. ონღურდად
Line of edition: 8    ამჟი მუბირჟი, მარე შუკუ̂ ნა̄დდა ხოლა ლეხუ̂იე. აშხუ̂ ა̈გის ა̈ხუ̂ჟომა̈̄ნდ
Line of edition: 9    ჟი, შუკუ̂ს ა̈თუ̂ქადდ ქა. მა̈ჲ იმექა ესუ̂ღურდად ი მა̈ჲ იმექა, დეშ
Line of edition: 10    ხუ̂ითხა̈̄ლდად შუკუ̂ს. სემი მა̄რე ჩოთგენედ უ̂ეშგიმ, ეჯღა ჲერე "მაგ
Line of edition: 11    როქუ̂ დემ ა̈ლდა̈̄უ̂შიდ,". ესუ̂ა̈̄ჲს თხილმა̈რ ნა̄სდა̈ნდახ, ნა̈ჲ ქო̄ხუ̂აგა̈ნდ
Line of edition: 12    ფელტუ̂ქა, მა̈ჲ ეშხუ̂ ესღუ̂რიდ სგუ̂ებინ ი მე̄რუ̂ა̈ლ ჩუ ხუგდ. მა̄დხუ̂ა̈ჲს
Line of edition: 13    ქა ღჷრი, ეჩქას ნა̈ჲ სგა ღურიდ ეჩხა̄უ̂თე̄სგა, ეჩქას მე̄რუ̂ე ხუ̂ეცა̈̄დიდ.
Line of edition: 14    მე̄რუ̂ე მა̄დხუ̂ა̈ჲს ქა ღურიდ, ეჩქას მე̄სმე ხეცა̈̄დი. ამჟი ხუ̂იხრესიე̄ლდ
Line of edition: 15    ფა̈ლტქა ი ნა̄რ გარჯ. ჩუ ხუგდ ათხე ღა̈რ ნე̄სგაისგა: დე
Line of edition: 16    სგუ̂ებდ მოშ ღურიდ, დე უ̂ეშგდ ტა̈ხნიდ. ა̈თუ̈̄მბუ̂ა̄ლუ̂დ: "მა̈ჲ როქუ̂
Line of edition: 17    ღე̄რბათდ გუ̂ეღუ̂ენი, ქა̄ლპირად, ა̈ლდა̈̄უ̂შიდ ეჯღაი, მოდეი ეჯღაი;
Line of edition: 18    ბა̄ზი როქუ̂ ამჩუ ლახ ა̈ლსდენიდ, ეში̄ როქ ჩუ ლიდუ̂ა̈შიდ" ი ა̈ხუ̂სტა̄რუ̂ნა̄ლედ
Line of edition: 19    ჟი ი ქო̄ხპირედ. ონღურდა̈ს სგუ̂ებინ, ეჯჲა̈რ ღე̄რბათ
Line of edition: 20    ხემზჷრდახ: "ღე̄რბეთ როქუ̂, ნომა ათდა̄უ̂შა ალა!" მა̄დხუ̂ა̈ჲ ქო̄ღუ̂ერ, ეჩქას
Line of edition: 21    ლამტუ̈̄ლხ, ჟ'ა̈ხუ̂ღე̄ლა̈უ̂. ეჩქა ლა̈მცა̄დდა მე̄რუ̂ე ი ეჯა ესღრი.
Line of edition: 22    აჩა̈დ მა̄დხუ̂ა̈ჲს ი ჩუ̄დ ოთგენედ. ამხა̄უ̂თე̄სგა სგო̄ჩა̈დდ, ეჩქა მესმ'
Line of edition: 23    ო̄ფიშუ̂დდ. ამნე̄მ ქა̄დჰე სუ̈კუ̂თექა, ლანგჷრგლე: "დიდა̈ბ ღერბათ! მა̄მა
Line of edition: 24    გუ̂იჭირ, ქა მეჴდე ლიშდ ლა̈შუ̂დებთექა". ქა̈̄თუ̂ყუ̂აბა̈̄ნდ ეჩხა̄უ̂თექა
Line of edition: 25    უ̂ო̄შთხუ̂ მა̄რე. ი ეჩქას ნიშგუ̂ეჲ აფხნეგა̈რთე უ̂ეშგდ ლეტეხ ნა̄დდა ი
Line of edition: 26    ლოხტუ̈ლდ, ჲერე "ქა როქუ̂ ა̈ნჭა̈მდ". ქა̄ნჴა̈დხ ეჯჲა̈რი̄. ეჯჟი̄ნ ა̈დგილ
Line of edition: 27    ლი ალა, ერე ლა̈̄თშუ̂ მა̄დეი ლადა̈ღშუ̂ი გარჯ ლი ეჩექა ლიჴედ,
Line of edition: 28    ეჯღა ჲერე მუსუ̂ჟი შუკუ̂ მა̄მა თერა, ხუ̂ა̈ჲ მა̄რე ლჷდუ̂აშე ლი ეჩექა.
Line of edition: 29    ონღუ̂რიდ ამელექუ̂ა ი მეუ̂არ გარჯ ნა̄რ, ნაფიშ: ჲარ მა̄რა ხა̈მს
Line of edition: 30    ხაჴიდ ი ჲორი გარ ოსა̈დდ მჷჭბიდ. მა̈ჲ დო ლა̈სუ̂, სგო̄ჰედ უშგულთე̄სგა
Line of edition: 31    ლირჰა̄ლე ონას. უშგუ̄ლისგა ჩუ̂ა̈თყულურა̈ნდ მეზგა̈ლთე: მი ი
Line of edition: 32    სა̈სო ყანსაუ̂შა აშხუდ ხუ̂ა̈სუ̂დ. ამჩუ̄ნ ჟ'ა̈ნი̄ზნანეხ გუნ ი ჩუ̂ა̈თუ̂ოხშმა̈̄ნდ.
Line of edition: 33    ჭჷშხა̈რ ქა̄ნბარა̄ლეხ ი ჩუ̂ანყუ̂ინეხ. ა̈ნღუ̂ლიდ, ერე "ჟი როქუ̂
Line of edition: 34    ა̈ხუ̂შომედ". ლა̈ნბინეხ ჭჷშხა̈რდ ლი̄თუ̂ე, ლიყუ̂ნა̈̄ლ მა̈დეი ლა̈კი̄ლს
Line of edition: 35    ნიკა̈დ მა̈გ ჟი ი დეჲ ეჯ მეზგე ჲა̈რ ოთუ̄ჟნედ ჩუ, ეჯჟი თჷმი ჩუ ნა̄დდა.
Line of edition: 36    უ̂ოშუ̂ელდ თა̈კუ̂ სგა ნეთა̈ლ, თხილა̈მიშ, მა̈გ ქა ლჷშიხ ნა̄დ. ჭჷშხა̈რ,
Line of edition: 37    ცხა̄რა̈̄ლ დე̄სა ლა̈ნსა̈დხ სგა, მა̈გ ქა̈ნჩა̈დხ.

Page of edition: 37 
Line of edition: 1       აშხუ̂ ლადა̈ღ უშგულისგა ოსა̈დდ. ეჯჟი მა̈დილ ჩუ ლა̈სუ̂ ჩია̈შდ
Line of edition: 2    თანღი ლიკუ̂შე, ერე შიშდ აჩა̈დხ მე̄რუ̂ა ლადა̈ღ თანა̈ღს ი ლჷჭბიდდ
Line of edition: 3    ჲერუ̂ა̈ჲ არდა მა̈გ ქა̄თაგა̈ნ თანა̈ღს. მე̄სმა ლადა̈ღ ქო̄ხუ̂აგა̈ნდ უშგულხა̈ნქა კალთე.
Line of edition: 4    ხოშაჲ ლეჭბი კალთე̄სგა ნადდა. ოჰედ ა̈გითე, გუნ
Line of edition: 5    ათჩონდახ ჲერე ამჟი ხოლა̄მ თანა̈ღს ქო̄ხსა̈დდ. ა̈გის ჲარ ნაგზა ჩუ
Line of edition: 6    ხუ̂აყუ̂რად, ეჯჟი ა̈თუ̂შიხუ̄რა̈̄ნდ.

Line of edition: 7          (მესტია)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.