TITUS
Svan Prose Texts I (Upper Bal)
Part No. 42
Previous part

Text: 42 
Page of edition: 37 
Line of edition: 31 
42. ლა̈ქმათე ლი̄ზი


Line of edition: 32       ეშხუ ესღურდად უ̂ოხუ̂იშდ მა̄რე (მი ასონ, იუ̂ანე, კოწია ი ამფროს)
Line of edition: 33    ლანგზა̄რუ̂თე, თეთრი ლათხე̄ლთე. სგო̄ჩა̈დდ აფხა̈ზთეჲსგა ი
Line of edition: 34    ეჩე დარა̈ლ ჩუ̂ა̈ნჰა̄უ̂დარხ. აშხუ̂ თუ̂ენ სგუ̂ებინ გუ̂იჩა̈შხ შუ̂ანა̈რ, ზექი მჷქჩა,
Line of edition: 35    ი ეჯჲა̈რდ სგა მა̄დ ა̈ნტყუბეხ ი ხუ̂იზელა̄ლდ თითქმის [= ჰემოშშა̄ლ]
Page of edition: 38  Line of edition: 1    აშხუ̂ თუ̂ეს ი ლემშია დეშ ხუ̂ითხა̈̄ლდად. ოთჭკუ̄რედ ი ოყირდ ჩუბაუ̂
Line of edition: 2    გუდაუ̂ათათე ი ეჩე ლჷჲფხაზუ და̈̄ს ნიხალდა, ლურუსუ̄ლა̈რს ხუ̂ა̈მჴა̈რუ̂ნად
Line of edition: 3    უ̂ედდ. ჟი ლახ ხოჩა̄მდ ხუ̂ერგიუ̂ა̄ლდად, ქა ლუსრულანღო ქა
Line of edition: 4    ნა̈ქუ̂ცახ თეთრს (ქირა̈ჲს), ნინ მა̄მა ნიხალდა ი სა̈ჩიუ̂ა̈რთე დეშ ღურდად,
Line of edition: 5    მარე ეში̄ ხოჩა̄მდ ოთთჷმედ. ლა̈რგიუ̂ა̄ლს ნა̈ჲ ხუ̂ა̈წრად, მარე
Line of edition: 6    ქა ლაჰა̈დჟი -- მინ. ეჩხა̈ნჩუ ჩოჩა̈დდ გაგრა̈̄შთე ი სგო̄ჩადდ აშხუ̂
Line of edition: 7    სომეხთეჲსგა, ჟ'ესუ̂რიგუ̂ა̈̄ნდ ეჯას კარჩოკას მინდუ̂რიშ (ლჷჲკა̈ლ ლა̈სუ̂)
Line of edition: 8    ჲარუ̂ შაურდ კუ̂ადრატს. ანჴა̄დხ ჯაუ̂ახელა̈რ ი ნიშგეეჲ ლატულკოუ̂ა̄ლს
Line of edition: 9    შაურდ ა̈ნკიდხ კუ̂ადრატ ი ეჩქა ნა̈ჲ მად ოთჷ̄გა̈ნდ ი ეჩქა
Line of edition: 10    მე̄რმა დიდა̈რი ბაღთე ოჩა̈დდ. ეჩეჩუ ჟი ლჷრგიუ̂ე ხუ̂ა̈სუ̂დ ლექუ̂ე̄რი
Line of edition: 11    თხრილს, საჯენ უ̂ოხუ̂იშდ მა̈ნა̈თდ. ალ დრა̈უ̂ჟი ჯაუ̂ახელა̈რჷდ ანჴა̈დხ
Line of edition: 12    ი ალჲა̈რდ ჲარუ̂ მანა̈თდ ა̈ნკიდხ. ეჩქა ნა̈ჲ ქა̄დ ოჩა̄დდ ი სომეხთე
Line of edition: 13    ოტა̈ხდ ი ხუ̂ა̈̄ქუ̂დ სომეხს:
Line of edition: 14       -- იმღა აფუ ქა ჯაუ̂ახელა̈რ, ეჯჲა̈რ შაურდ ამშიახ? ეჯნემ ნა̈̄ქუ̂:
Line of edition: 15       -- იმღა ი ხა̈მი ლეღუ̂ს დემ იზობდახ ი ეჯღა.
Line of edition: 16       -- ჲაღო, ათხე ნა̈ჲ ეჯ ქირა̈ჲჟი დემ ხუ̂ასყე̄ნედ! -- ი ჟი̄დ ოხქიმნედ
Line of edition: 17    ეშხუ შაურ ი სემი შაურ ნუღუ̂ა̈̄ნ კუ̂ადრატისგა, ხოჩა ბინა, ხოჩა
Line of edition: 18    ხა̈რჯ. ა̈ხუ̂ბინედ ლიმშიე ი ჲერუ̂ეშდ ი უ̂ო̄შთხუ̂ ლადეღ ჟ'ოხუ̂სყედ
Line of edition: 19    ეშხუ დესეტინა ი უ̂ოხუ̂იშდ აშირ კუ̂ადრატ. ეჩქა ეშხუ ბაღჩა ხუღუ̂ა̈̄ნ
Line of edition: 20    ი ეჩი ლაბრა̈უ̂ს ანგენე. ეჯას ეშხუ მომრა̈უ̂ ხეყა̈̄დ, ეჩას ლა̈ხუ̂ჭუ̂ედდად:
Line of edition: 21       -- ამეისგა როქუ̂ იმ ნაჰუ̂დიდ ქირა̈ჲს? -- ეჯნემ ნა̈̄ქუ̂:
Line of edition: 22       -- მა̈̄ჲ როქუ̂ ნაღუ̂ე̄ნა ეჯას როქუ̂ ლაჯ[ჰ]უ̂ედიდ.

Line of edition: 23       ნა̈ჲ ანჩო̄ნდა, ეზერ ქირა̈ჲ ლანბაჟჷნ: ეჯა ლა̈სუ̂ იშგუ̂იდ აშირ
Line of edition: 24    კუ̂ადრატ. ანჴა̈დ ხაზა̈ინ ა̈გითე. ნა̈ჲი ოთსურლედ, ხუ̂ა̈̄ქუ̂დ ქირა̈ჲ. "ქა
Line of edition: 25    როქუ̂ ა̈ნმუშგუ̂ა̈̄ნ", ი მა̈̄ნკუ̂ი̄ კარჩოკა̈̄ თეთრ ქა ლანო̈̄მ, ეჩქანღო --
Line of edition: 26    ნაბრაუ̂ისგა, -- ლა̈ხუ̂ჭუ̂ედდად: იმჟი როქუ̂ ნაჰუ̂დი იშგუ̂იდ აშირ
Line of edition: 27    კუ̂ადრატისგა?
Line of edition: 28       -- მიჩა მომრა̈უ̂ს მა̈ჲ ესერ ოთბაცა? -- ნა̈ჲ ხუ̂ა̈̄ქუ̂დ:
Line of edition: 29       -- მა̈̄ჲ კარჩოკაისგა ნუღუ̂ა̈̄ნ, ეჯ ა̈̄ნბაცე.

Line of edition: 30       ეჩქა ეჯა ხასდიკჷნ ი მა̄დ ლანუ̂ე̄მ: ლადღჷლობა̈ ქირა̈ჲს ნაჭრა̈ჟდა
Line of edition: 31    თუ̂ით ჲარუ̂ მანა̈თს. ეჯა ნა̈ჲ მა̄დ ნეკუ̂ა̈დ ი ჲეშდ ლადეღ ხუ̂არდად
Line of edition: 32    მიჩა ხა̈რჯჟი ლჷჩრაუ̂ე. მა̈̄ნკუ̂ი მა̄მა ნიხალდა თაუ̂რობა̈̄ ამბა̈უ̂ ი შომუ̂ა̈̄ჲ
Line of edition: 33    ჟ'ა̈ხჴმეჴრედ, ეჩქა ბჷგიდ ლიშგუ̂ემ ოხუ̂ბინედ. თეთრ ქა ლუჰუ̂ედ
Line of edition: 34    მა̄მა ხა̄დ მა̈გ ი კუტანცია ნაშჷუ̂მინ, მა̄დ ლოხუ̂ე̄მდ. ეჩქა მომრა̈უ̂დ
Line of edition: 35    თუ̂ეფს ესფხიჭე ი ნიშგუ̂ეჲთე ა̈ნზორ. ეჩქა მი ი იუ̂ანედ სგა ხუ̂აფხეჭდ,
Line of edition: 36    თუ̂ეფ ქო̄თღედ, ხუ̂ა̈ჲ ხუ̂აჴიდდ აჯაღ. ეჩქა მიწა̄დს ა̈დშჷმ.
Page of edition: 39  Line of edition: 1    სომეხდ ი მიჩა ხეხუ̂დ ლიკი̄ლი ა̈დბინეხ. ეჩეჩუ მეგრელა̈რ იზგახ
Line of edition: 2    ფე̄დიას, ქა̄ნჴა̈დხ ეჯჲა̈რ ი ჟ'ენჭუ̂ა̄დხ.
Line of edition: 3       -- იმ როქუ̂ ხუ̂იჩოდ, შუ̂ანა̈რ?
Line of edition: 4       -- იმ-ჷჯ ი ამ ლუ̈ნთუ̂ ჲერუ თუ̂ე ამეჩუ ეკა̈ლისგა ნიმშია ი თეთრსჷჯ
Line of edition: 5    დემ ნაჰუ̂დიხ ი ათხე გაგრა̈̄შთე ღური ი ქა ხოშჩიუ̂ლე.

Line of edition: 6       ეჯა ალჲა̈რს ხასდიკხ.
Line of edition: 7       -- ჲაღო იმნა̈რ ესერ იკი̄ლიე̄ლხ?
Line of edition: 8       -- თოფშუ̂-ჷჯ ნეზურია̄ლ ი თუ̂ეფ-ჷჯ ქო̄თღედ ი ეჯღა იკი̄ლია̄ლხ.

Line of edition: 9       ეჩქა ჩუ̂ანრიგუ̂ეხ მეგრელა̈რდ. ქა̈̄ხუ̂კიდდ სრუ̈ლ თეთრ ი ოჩა̈დდ
Line of edition: 10    ამჟი მუგუ̂რიდ. ჟიშა̈̄ლიდ ჩუ̂ა̈ნჰა̄უ̂დარ ი ლიც ანღრი, ბელი რეჩქა.
Line of edition: 11    ამექა ქა უ̂ედდ ჴუ̂ედნიდ: ჲერს ჟ'ანჴუ̂ა̈მდა, ჲერ ქა ხუ̂იცუ̂რეუ̂დად ი
Line of edition: 12    სგო̄ნჴუ̂ა̈დდ მჷჟირ გუდაუ̂ათა̈̄ ქალა̈ქთეჲსგა. ხუ̂იზელა̈̄ლდ ბა̄ზი̄ ლე̄თ ი
Line of edition: 13    სადგუ̂ემს დეშ ხუ̂ითხე̄ლიდ. ანჴა̈დ ეშხუ ბერზენ, სგა̄ნჲე კაფენიათეჲსგა
Line of edition: 14    ი ლჷქუ̂ე̄ლა უ̂ოთა̈ხისგა ჩუ̂ანგენა̄ლე. უ̂ოხუ̂იშდ აშირ ბონა̈ თეთრ ანკიდ
Line of edition: 15    სადგუ̂ემი ქირა̈ჲ. მე̄რმა ლადეღ ჟ'ოხუ̄გა̈ნდ ქა ლჷფრე მუცხუშ ი ონჴუ̂ა̈დდ
Line of edition: 16    ეჯჟი სოხუმთე ჭჷშხშუ̂. სოხუმს ცხეკისგა̈̄ მუშჲა̈რ ანჴა̈დხ ბაზა̈რთეჲსგა. თუ̂ით
Line of edition: 17    ჩხარა თუმა̈ნ ნა̈ჲ ნუღუ̂ა̈̄ნ თათრი თეთრ, მა̈გ რილა
Line of edition: 18    გარ, ი თუ̂ით უსგუ̂ა თუმა̈ნ ცხეკისგა̈̄ მუშჲა̈რს ხუღუ̂ა̈̄ნხ, ნიშგუ̂ეჲდ
Line of edition: 19    უსგუ̂ა ნაგზოშ სგუ̂ებინ ნა̄ზუ̂ა̈რს.

Line of edition: 20       ამჟი გზა̄უ̂რობ ნა̄დ. სომხი მუმრა̈უ̂ი ლეგდ ოჴუ̂იდდ, თუ̂ეფი ქო̄თღედ,
Line of edition: 21    ოეთრი ქო̄ხკიდდ მა̄გ.

Line of edition: 22       ალა ნაზნა შუ̂ანა̈რს.

Line of edition: 23          (იფარი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.