TITUS
Svan Prose Texts I (Upper Bal)
Part No. 43
Previous part

Text: 43 
Page of edition: 39 
Line of edition: 24 
43. სამ ღუ̂აშრე ლიდგა̈რი


Line of edition: 25       ა̈ხუ̂მა̄რა̈̄ნ ლა̈თხუ̂იართე ლელგურკ ჯჷმა̈ ლე̄თ (მე̄რუ̂ა ლაღეღ ლიგურკე
Line of edition: 26    ლა̈სუ̂). და̈რ ეზერ მა̄დ. ქორხა̈ნქა ნაუ̂ახშობენ ა̈თუ̂ბინ ლი̄ზი.
Line of edition: 27    მეუ̂არ მუბირ ლე̄თ ლა̈სუ̂, მარე შუკუ̂ს ეზერდ ოთხუ̂იდ ი ჟ'ოდერ
Line of edition: 28    ტუ̈̄ბე̄რთე. უ̂ებიშდ ეჩე ხოდრა̈ჯდა̈ს ლა̈ლწბუჟი. დე̄სამა ანჴა̈დხ. უ̂ები
Line of edition: 29    ლადეღ ლიზგა̈რი ა̈თუ̂ბინ, ჟ'ოდერ ჴაც მა̈რილმჷყ. ჟ'ა̈ნმე̄რა̈̄ნ. ა̈დბინე
Line of edition: 30    ლირხუნა̈̄ლ ი სკარხალ ანჴა̈დ. ლასი̄მ დე̄სა მა̄დ ი ჩუ̂ესუ̈̄გნ ზაგა̈რჟი.
Line of edition: 31    ქა̈̄ხშდა̈ხ სკარხალ, ქა̈̄ტუ̂ხ თხუ̈რე̄ლთე. ეჩე ბა̄ზი ლისედ მაკუ. ქუ̂ა̈ბთეჲსჷა
Line of edition: 32    ოდერ, მარე მჷჟირ ხუ̂ი ი მჷცხ მეუ̂არ მა̄რ. მაყლუ̄ნი ბა̄ზი,
Line of edition: 33    "დოუ̂ დოშ ა̈თუ̈ცუ̂რ ქუ̂ინ მჷცხუშ" ამ დუ̂რო̈უ̂ს მიჟ ა̈მწა̈დ ი ჩუ̂ესგუ
Line of edition: 34    ბა̈ჩჟი. მიჟ ლაწა̈დხა̈ნ ლამსჷმდა კოჯა̈რხა̈ნ თჷრხჷნ, ესნა̈რ ღუ̂აშა̈რ
Line of edition: 35    ანღრიხ ნა̈ბუ̂ზა̈ ლაჩა̈ხუ̂თე ი ბაჩა̈რს შიდეხ. ჟ'ა̈ხუ̂იკდ სათა̈ლ, ჩუ̂ესწო̈̄ნ, უ̂ოხუ̂იშდ
Line of edition: 36    ღუ̂აშა̈რ ანღრიხ მიშგუ̂ა ჩუქუ̂ა̄ნ ლაჩხუ̂ა̈რთე. მიი
Page of edition: 40  Line of edition: 1    სგა ლოხუ̂ეზზ, სგა̄ნჴა̈დხ ლაჩა̈ხუ̂თეჲსგა. ოხუ̂აფშუ̂დ ეშხუ, ნალკუ̂იჰუ̂
Line of edition: 2    ოდაგრ, მე̄რუ̂ე ლო̄ხუ̂ატხ, მე̄რუ̂ე ოდაგრ, მე̄სმე ლო̄ხუ̂ატხ, მე̄სმე
Line of edition: 3    ოდაგრ, მარე მე̄სმემ ბღეთე ა̈მსკინე. მიი სგო̄თსკი ბღეთეჲსგა, იმუ̂ა̈̄ჲ
Line of edition: 4    არდა ლჷქა̈ჩ ღუ̂აშ, ჩუ̂ა̈ძუ̈ჰ ხანჯარშუ̂ ი თხუ̂იმ ქო̄ხუ̂აქუ̂ცუ̂. ქო̄ნჴუ
Line of edition: 5    თხუ̂იმ ბღეხა̈ნქა, ჩუ̂ესჩოქუ̂ეუ̂, თხუ̂იმ ღუ̂აშა̈შ ტოტჟი ლო̄ხუ̂ა̈ჲ, დიდა̈ბ
Line of edition: 6    ხუ̂ე̄ქა ხოშა̄მ ღე̄რბათუ̂, ოხურშუ̂ენ ჯგჷრა̈̄გ -- სუ̂ეუ̂ი მუჰუ̂დი, თა̄რინგზელ-მეთხუ̂ია̈რი
Line of edition: 7    მჷლჩე, აფსა̄სდ -- გარეუ̂ლი მჷლდეღ. ღერთა̈
Line of edition: 8    დიდა̈ბ ერ ქა ოთსურილ, თხუ̂იმ ბა̈ჩჟი (\\ ბაჩუ̂ჟი) ესუ̂ა̈დ. ლოხუ̂სგი
Line of edition: 9    მურსგუ̂ენ მეჴა̈რთე ი ჲერუ ღუ̂აშა̈რ მი მისგდიხ, დეშ ხეყუ̂ლენიხ მინე
Line of edition: 10    აფხნეგა̈რს, მი ლოხგჷრგა̈ლ ლჷჲა̈რ ღუ̂აშა̈რს: "ხოჩა̄უ̂ ლე̄თ ჯა̄რხ! ისგუ̂ეჲ
Line of edition: 11    შუკუ̂ს აჩა̈დდ, მი სგა̈ჲ თუ̂ეფს დე̄მ ჯა̈ფშუ̂დე სერ". ჩოულობ
Line of edition: 12    ნუღუ̂ე მეთხუ̂იარას: სამ ღუ̂აშა̈რს ლახ ეშხუ გარ ჩუ ხუ̂ადგა̈რიდ,
Line of edition: 13    ეჩუნღო თუ̂ეფს დე̄მ ხუ̂აკუ̂ა̄ნედ, "ღე̄რბათუ̂ ესერ ხასდიკ".

Line of edition: 14       მიჟ ჩუ ა̈თჰუ̂ა̈რ. ქორ ჯუ̂ე̄დიას მა̄რ. ბა̄ზი ქორთე ლი̄ზი მაკუ. ღუ̂აშა̈რ
Line of edition: 15    ჩოცურ, მი ა̈ხუ̂ბინ ლიჴედ ქორთე. ლიბუ̂რა̄ლ კოჯა̈რ ქო̄ნშდჷხ.
Line of edition: 16    ისგლა̄თუ̂ სგო̄ღუ̂ე სოფელთე, ჟა̄ბეშთე. ამე ოთთიმ ჲერუ მჷქფი, ლექუ̂ა
Line of edition: 17    ოღუ̂ე ჩუ̂ა̈̄ბია̈̄ნითე, უ̂ო̄შთხუ̂ მჷქფი ამე ოთთიმ. ეჯჟი სგო̄ღუ̂ე ქორთე,
Line of edition: 18    ჭო̄ლა̈შთე. სემი მა̄რე იშგენ ა̈მჴერდახ ჭო̄ლა̈შხა̈ნ, ჲერუ ნა̈ჲ
Line of edition: 19    ლახუ̂ბა ხუ̂ა̈სუ̂დ ი მე̄რუ̂ა ლადეღ საფტინ ლირჰა̈̄ლთე ჟ'ა̈ხუ̂ნა̈ზუ̂რა̈̄ნდ
Line of edition: 20    ჲეშდეშხუ მახე ღუ̂ა̈ჟ ი ოჩა̈დდ ღუ̂აშრე ლა̈ჴდათე. სგო̄ჩა̈დდ ღუ̂აშა̄რთე̄ჲსგა,
Line of edition: 21    აფხნეგ მა̄რე̄მ დიდა̄ბ ხა̈̄ქუ̂ ღე̄რბათუ̂ ი ჟ'ა̈ხუ̂ბინედ ღუ̂აშრე
Line of edition: 22    ლიტფუ̄რე. უ̂ო̄შთხუ̂ მა̄რე̄მ ბღეხა̈ნქა ღუ̂აშ ქა̈̄ხუ̂თუ̈რნედ, ჩოთტუფუ̄რა̄ლედ,
Line of edition: 23    ჲეშდ მახე ღუ̂ა̈ჟი ქაფ ოხფასედ, მი თხუმა̈რ გარ ონჴუ. ცხეკთე̄ჲსგა
Line of edition: 24    ერ ოჰედ, ლემესგ ა̈ხუ̂ი̄შუ̂ედ ი ყუ̂იჟა̈̄ლ, გუ̂ია̈რ, ჯაჭა̈რ, ნჷნა̄რა̈ლ
Line of edition: 25    ი პერშუ̂და̈̄ლ ა̈ხუ̂ტყაბედ, სა̈დილ ლოხუ̂ე̄მდ. ეჩუნღო სგო̄ნჴუ̂ა̈დდ ჟა̄ბეშთე̄ჲსგა.
Line of edition: 26    ამეჩუ̄ნ ჩა̄ჟა̈რ ენხუ̂იეხ ქორშა̈ლდ ი ჩა̄ჟარშუ̂ ონჴუ̂იდდ ჭო̄ლაშუ̂.
Line of edition: 27    ეშხუ ღუ̂აშ მჷქფას ოთო̄თა̈̄ლ ი ჲერუ ღუ̂აშა̈რ ქორთე ოთხუ̂ა̈ჲ.

Line of edition: 28          (მულახი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.