TITUS
Svan Prose Texts I (Upper Bal)
Part No. 66
Previous part

Text: 73 
Page of edition: 85 
Line of edition: 2 
73. სულასახა̈რ


Line of edition: 3       ლჷმზჷრე̄უ̂ ხი ი ა̈რი ეშხუ ხელწიფ ი სემი გეზალ ხაყა. ოხჴა̈დ
Line of edition: 4    ალას, ალ ხელწიფს, დრ"ჲ, ერე იქუ̄ნაუ̂ა̈̄ლ. ა̈დჰერ მიჩა ხოხუ̂რა
Line of edition: 5    გეზალ, ხე̄ქუ̂, ერე "მიჩ ესერ ხუღუ̂ე ეშხუ კოლეფ. უ̂ოდე ხოლა
Line of edition: 6    გაჭირება დო ა̈ჯჴეს, ეჩქად ალა ჩუ ნო̄სა ათკარა, ი ეჩქა ჩუ̂ათკა̈რი
Line of edition: 7    ი ეჩქა ჟ'ა̈ხმეჴრი, მა̈̄ჲ ი̄რა, მა̈̄ჲ ხეჲმედი". ათხე ხელწიფ ჩუ̂აშდუ̂იღუ̂ხ,
Line of edition: 8    იმუ̂ა̈̄ჲჟი ხელწიფს ხეკუთნო̄ლ ი ხოჩა̄მ გეზლი̄რე პატრონს.

Line of edition: 9       აჩა̈დ ხა̈ნ ი ანკუ̂ა̈ჰ, ერე "იმუ̂ა̄ლე ესერ ა̈რი სულასახა̈რ. ეჩას
Line of edition: 10    ესერ ერუ̂ა̈̄ჲ სამ მეწუ̂მ ამბა̈უ̂ს ქა ახა̈̄ქუ̂ინი, ეჩას ესერ ხონჴრი ხეხუ̂დო̈.

Line of edition: 11       ა̈ნმა̄რა̈̄ნ ხოშა მუხუ̂ბე ი ეშდჲერუ ლჷჩა̈̄ჟ ლა̈ჲჴერნე ი ეშდჲერუ
Line of edition: 12    ლჷქუ̂ეით ი აჩა̈დ, სულასახა̈რი ყო̄რთეჟი აჩა̈დ. ი ალას [ქორს] ხა̄რ
Line of edition: 13    ეშდჲერუ ყო̄რ ი ეშდჲერუ ყა̈რუ̈ლ ხა̄გ. აჩა̈დ ი დემხა̈ნ ანტა̈ხ. ათხე
Line of edition: 14    ა̈ნმა̄რა̈̄ნ ნე̄სგა̈̄ მუხუ̂ბე, ეშდჲერუ ლჷჩა̈̄ჟ ი ეშდჲერუ ლჷქუ̂ეით ამნემ ლა̈ჲჴერნე.

Line of edition: 15       აჩად ალაი, ამი̄ ყო̄რთეჟი ა̈თჴა̈დჷნ, ლა̈ხჭუ̂ედდა სგა ლიფშუ̂დეს.
Line of edition: 16       -- ო, სგა ხუ̂ა̈ჲ მეჩედ, მარე ქა და̈̄რ მეტხე̄ლი!

Line of edition: 17       აჩა̈დ ალა ი დემხა̈ნ ანტა̈ხ. ათხე აჩა̈დ ხა̈ნ ი ა̈ნმა̄რა̈̄ნ ხოხუ̂რა
Line of edition: 18    მუხუ̂ბე, სემი ლჷჩა̈̄ჟ ი სემი ლჷქუ̂ეით ამნემ ლა̈ჲჴერნე. აჩა̈დ ამი̄ ყო̄რთეჟი,
Line of edition: 19    ლა̈ხჭუ̂ედდა ყა̈რუ̈ლს: -- ალ ყო̄რს ლი̄ზი მაკუ მი!
Line of edition: 20       -- ო, ხოჩა ამსუ̂ა̄ლდ, ალ ყო̄რს სგა ხუ̂ა̈ჲ მეჩდე̄ლი, მარე ქა და̈̄რ
Line of edition: 21    მეტხე̄ლი!
Line of edition: 22       -- ო, ეშ მი [ი] მა̄მა მა̈̄ზნუნი, მარე ნაუ̄ზი მა̄მა მა̄რ. ა̈ნტუ̂ხენი,
Line of edition: 23    ჰა დომ ა̈ნტუ̂ხენი, მიშგუ̂აუ̂ ეშხუ ლი!

Line of edition: 24       სგა̄ჩა̈დ. ალას ეშდჲერუ ყო̄რ ხა̄რ, ეშდჲერუ ყა̈რუ̈ლ ხა̄გ. სგა̈̄პილს
Line of edition: 25    უ̂ოთა̈ხისგა ჩუ̂აყუ̂რე სულასახა̈რ უ̂ოქუ̂რა̈ ტა̈ხდისგა. ჲეშდჲერუ
Line of edition: 26    ნანუ̄ლ სგა ხასგურ ეჩხა̈ნ-ამხა̈ნ ი აჰო̈̄ნიხ. ამეჩუ სტოლ ლჷგ. სგა ლახსგურდა
Line of edition: 27    ამის ხელწიფი გეზალ, ჟ'ა̈ნკიდ ალა, კოლეფ, ჯიბხა̈ნჟი,
Line of edition: 28    მიჩა მუე ნა̈ცუ̂ირ: "ამჷნ ხოშა გაჭირება შომა ა̈მჴედნი? "ჩუ̂ადკარე
Line of edition: 29    ალ კოლეფ ი ამეჩუ სტოლ ესჷ̄გა̈ნ ეჯჟი, ერე ხელწიფს მა̈̄ჲ ხეკუთნი,
Line of edition: 30    ალა მა̈გ სტოლჟი ჩუ ა̈რი. თხუმისგა სანთელ ა̈ნტუ̂არა̈̄ნ, ჰოკერ
Line of edition: 31    უ̂ისგუ̂ ლახა̄გა̈̄ნ სტოლჟი ი ამნემ ლიმღუ̂ა̈ე ა̈დბინე ი ქა̈̄ნშენე. ათხე
Line of edition: 32    რა̈̄ქუ̂ სანთელდ, ერე "ლი̄მბუ̂ა̈̄ლუ ესერ ა̈დბინე! -- უ̂ისგუ̂ს ხა̈̄ქუ̂. უ̂ისგუ̂დ
Line of edition: 33    რა̈̄ქუ̂, ერე "ხელწიფი გეზალდუ ესერ ა̈დბინე ლი̄მბუ̂ა̈̄ლ!" ხელწიფი
Line of edition: 34    გეზალდ რა̈̄ქუ̂, ერე "მა̈ჲ ესერ მიჩა ლი̄მბუ̂ა̈̄ლ ირა ი სამთელდუ ესერ
Line of edition: 35    ა̈დბინე ლი̄მბუ̂ა̈̄ლ!"
Line of edition: 36       -- ხიად, ხოჩა სულასახა̈რ ი ხელწიფი გეზალ! ეშხუ შუკუ̂ს ესერ
Line of edition: 37    ელმა̈̄ზლიხ ბერ, დურგა̈ლ ი ხარა̈ზ, ჯუ̂ე̄დია შუკუ̂ს ესერ ელმა̈̄ზხ ი
Page of edition: 86  Line of edition: 1    შუკუ̂ჟი ჩუ̂ათბურე̄ნახ. ნა̈დირდ ესერ ხაყლუ̈̄ნნახ ი მა̈გ აშხუ̂ჟი ლიუ̂ჟეს
Line of edition: 2    დეშ ათმუნდე̄ნახ ი ლიყრულ ესერ ოხსყახ, ერე ეშხუ-ეშხუ მეჲცხად
Line of edition: 3    ლჷმჷრდე̄ლა̈სუ̂ხ. ჩინ მა̈̄ნკუ̂ი ლიყრულ ესერ ათხუ̂იე̄ნა დურგა̈ლს
Line of edition: 4    ი ეჩის ესერ ოხტა̄ბა ხელწიფი ნახა̈ზ. ალა ჟი ლახჭიდ მეგა̈მს ი ათხე
Line of edition: 5    ჟ'ანჲა̈ცხუ̂ნე ხარა̈ზ ი ჯაჲ ჩუ̂ადყურდა. ათხე ლახსინჯუ̂ე ხარა̈ზდ ი
Line of edition: 6    ტიტუ̂ელ ხელწიფს ხეწა̈დ ამეჩუ, ათსაკუ̂რელჷნ: "იმხა̈ნ ესერ ა̈ნჴდენ
Line of edition: 7    ტიტუ̂ელ ხელწიფ ამეჩუ?!" ათხე ჟ'ა̈ნწუ̂ე̄ნე ი გუდ აჴა̈დ, ერე ალა
Line of edition: 8    დურგა̈ლდ ანტა̄ბე მიჩა ლაუ̂ჟაისგა. "ჲაღო, მა̈ჲ ღენ ამის ესერ ამზუმ
Line of edition: 9    მიჩა ლაუ̂ჟაისგა ჟ'ოხუ̂სყა", ლახა̄დ ალა, ხარა̈ზ, ი ხელწიფ ჟ'ანრექუ̂ე,
Line of edition: 10    იმუ̂ა̈̄ჲჟი ხელწიფ ლი, ეჩჟი̄ნ, ი ალა დე̄სამა ათკუ̂ა̈დუ̂ნე ქა ი
Line of edition: 11    ჩუ̂ესგენე ამეჩუ ხელწიფშა̄ლ. ათხე ალა ჩუ̂ადყურდა ი ჟ'ანჲა̈ცხუ̂ნე
Line of edition: 12    ბერ. ჟ'ანჲა̈ცხ ბერ ი ლახსინჯუ̂ე: ამეჩუ ჩუ ლჷგ ხელწიფ ი თხუ̂იმ
Line of edition: 13    ესნიკუ̂. ალა იმ ლახტიხ-ა́, ხელწიფი სურა̈თ? ათხე გუდ აჴა̈დ, ერე
Line of edition: 14    ალა მიჩა აფხნეგა̈რდ ანსყეხ. "მა̈ჲ ღენ ესერ ალჲა̈რს ამზუმ ჩუ ხა̈ჲმედახ,
Line of edition: 15    ერე მიჩა ლაუ̂ჟაისგა ალამა̈გ ჟ'ოხუ̂სყახ" ა̈დრეკ (დეიკიდა)
Line of edition: 16    უ̂ოლა̈რ ი ა̈თჴჷ̄რა̈̄ნ ღე̄რბათუ̂, ერე "ჰემა ჯა ლერდუ̂ნე ჩუ ხა̈̄ც ი ღერთა̈
Line of edition: 17    ლიჴჷ̄რა̈̄ლ სა̈ჭირო ლესუ̂, ღო ალას ქუ̂ინუ ოხგენე!" სგა ხა̄გ ალა
Line of edition: 18    ლოცს, ჩუჲ ა̈დრჷჰა̈̄ნ ი ქუ̂ინი ოხო̄გა̈̄ნ ალას ი მაჩე̄ნე ხელწიფ ესა
Line of edition: 19    ა̈რი, ამთა̄ნ ხელწიფ ლი. -- ხიად, ხოჩა სულასახა̈რ ი ხელწიფი გეზალ,
Line of edition: 20    ათხე ეჯჲა̈რს ხა̄რხ საჩიუ̂რობ: ბერს მიჩა̈შდ ხაკუ ხელწიფ, დურგა̈ლს
Line of edition: 21    მიჩა̈შდ ხაკა̈ფ ი ხარა̈ზს მიჩა̈შდ ხაკა̈ფ. ათხე ათცხირედ სგა̈ჲ,
Line of edition: 22    ერე ჲა̈ს ხეკუთნი ეჯა, ხელწიფ?

Line of edition: 23       ქა̈̄ნსიპა̈̄ნ (\\ ანსიპდა) სტოლთე: -- ოხუ̂ა̈̄ქუ̂ინე̄ნხ ესერ ეშხუ̂ი მეწუ̂მ
Line of edition: 24    ამბა̈უ̂ მიჩა̈შდ! მართა̈ლ გუ̂ეშ ლი, ერე დურგა̈ლს ხოჩა ლიმა̄რ ხოჩუ̂მინა,
Line of edition: 25    ერე ამჷნ ხოჩა ნაუ̂სტა̈ტი მამ ხაკუ, ხარა̈ზი ეზა̈რ ლჷმა̈̄რ, ერე
Line of edition: 26    ამჷნ ხოჩა ხელობ ამსუ̂ა̄ლდა̈შ მა̄მა ისყი, მარე ჲედე დურგა̈ლი ნატა̄ბ
Line of edition: 27    მა̈ჲ ირო̄ლ, ჲედე ხარა̈ზი ნარა̈ქუ̂ მა̈ჲ ირო̄ლ, ჰა̄უ̂ე ბერს ქუ̂ინ მო̈დ
Line of edition: 28    ოხგენა̈̄ნ ი ღე̄რბათუ̂ მო̄დ ათჴჷ̄რა̈̄ნ?! ხელწიფი სურა̈თ ხუ̂ა̈ჲ ა̈რი,
Line of edition: 29    ეში̄ ჰაუ̂ ბერ მო̄დე, ეში̄ სურა̈თ ირო̄ლ. ეჯა-ი-ეჯა ხეკუთნი ბერს!
Line of edition: 30       -- ხოჩა სულასახა̈რ ი ხელწიფი გეზალ! ეშხუ ხეხუ̂-ჭა̈შ ესღჷრდახ
Line of edition: 31    შუკუ̂ს ი ჯუ̂ე̄დია შუკუ̂ჟი ლეზიზ ოთშდა̈ხხ ი ჭა̈შ ლეზუ̂ებ-ლათხე̄ლთე
Line of edition: 32    აჩა̈დ ი ხეხუ̂ ჩუ̂აცუ̂ირ ბოგა̈ კურდა̈ნჟი. ამელექუ̂ა ანჴა̈დ დი̄კუ̂ენ ი
Line of edition: 33    ზურა̄ლს გა̈ნთე ლინჴრი ლახკაფნე. ალა ამნე̄მ მა̄დ ჩუ̂ემინ ი ანჴა̈დ
Line of edition: 34    დი̄კუ̂ენ ი თხუ̂იმ ჟ'ახქუ̂იც. ათხე ანჴა̈დ ალა, მიჩა ჭა̈შ, ი ხეხუ̂ ლჷდგა̈რ
Line of edition: 35    ესხუ̂ი̄დ. ჟ'ესფხიჭე ალას-ა, თხუ̂იმს, ა̈თჴჷ̄რა̈̄ნ ღე̄რბათუ̂ ი სგა ლახტიხ
Line of edition: 36    თხუ̂იმ ი ალა სგა ლა̈ხჭარა̈̄ნ ი ჟ'ა̈ნსე̄ლუ̂ა̈̄ნ, მარე ნიჩუ̂ შიყთე
Line of edition: 37    ხეყა̈რ ი კინჩხ ჴა̈დთე. -- ხიად, ხოჩა სულასახა̈რ ი ხელწიფი გეზალ,
Line of edition: 38    ათხე ხა̄რხ საჩიუ̂რობ: ნიჩუ̂ს მიჩა̈შდ ხაკა̈ფ ჭა̈შ ი ჴა̈დს მიჩა̈შდ. ხიად
Line of edition: 39    სულასახა̈რ ი ხელწიფი გეზალ, ათხე ლი ლემწუ̂მე.

Page of edition: 87 
Line of edition: 1       -- ა̈ჯი̄ქუ̂ინე̄ნხ მე̄რმე მეწუ̂მ ამბა̈უ̂! მართა̈ლ გუ̂ეშ ლი, ერე ნიჩუ̂
Line of edition: 2    ეზერ ლი (ნიჩურ მა̄მა ხაყა ამსუ̂ა̄ლდს), მარე უ̂ეშგიმპილდ ჭა̈შ ეში̄
Line of edition: 3    ჴა̈დს ხეკუთნი! -- ი ჟ'ანსგურდა ლასგუ̂რათეჟი.
Line of edition: 4       -- ათხე, ხოჩა სულასახა̈რ ი ხელწიფი გეზალ, -- რა̈̄ქუ̂ უ̂ისგუ̂დ, -- ეშხუ
Line of edition: 5    კე̄სა̈რს ხეყა̈̄დ გეზალ ი ლაქუ̄ნაუ̂ა̄ლს ლა̈ხწოდა̈̄ნ. ადზჷზეხ შიკრიკ
Line of edition: 6    მეთერე. მეთერდ ხა̈̄ქუ̂, ერე "ალ-ი-ალ დოხტური ჟაგა̈რს ესერ
Line of edition: 7    ლახე ჟ'ესჰი̄ნეხ, ეჩქა ესერ მა̄მა იდგა̈რი!" აჩა̈დ ალა დოხტურთე ი
Line of edition: 8    დოხტურდ ჟაგა̈რ ლახუ̂ე̄მ. ა̈დბინე ლი̄ზი ი ესღრი.... კე̄სრი გეზალ
Line of edition: 9    ჩუ̂ალდაგა̈რლი ი ლაშდუ̈ღუ̂თე ქა ლჷჲე (\\ ქა ლჷე) ხა̄რხ ი ბაპს ლა̈̄ხი̄რთეჟი
Line of edition: 10    უ̂ერ ჟი მეკდე ხა̄რ, საფლა̈უ̂თეჲსგა სგა ლჷგე ხა̄რხ კუბ ი ამ
Line of edition: 11    დრ"უ̂ს ანჴა̈დ ალა, შიკრიკ, ჟ'ესშიდ ჟაგა̈რ საფლა̈უ̂თეჲსგა ი კე̄სრი
Line of edition: 12    გეზალ ჟ'ა̈ნსე̄ლუ̂ა̈̄ნ. -- ხიად, სულასახა̈რ ი ხელწიფი გეზალ, ათხე ხა̄რხ
Line of edition: 13    საჩიუ̂რობ: დოხტურს მიჩა ნასა̈̄ლუ̂ ხაბჟა ი მეთერს მიჩა ნასა̈̄ლუ̂ ი
Line of edition: 14    შიკრიკს მიჩა ნასა̈̄ლუ̂ ხაბჟა. ხიად, სულასახა̈რ ი ხელწიფი გეზალ,
Line of edition: 15    ათხე ჲა̈ს ხეკუთნი კე̄სრი გეზლა̈ ლისე̄ლუ̂ე?
Line of edition: 16       -- ა̈ჯი̄ქუ̂ინე̄ნხ მესმა̄მდ მიშგუ̂აუ̂ მეწუ̂მ ამბა̈უ̂, ი ეჯა მეთერი ნათა̈რუ̂
Line of edition: 17    ეზერ ლი, დოხტური ჟაგა̈რი ეზერ ლი, ერე ამჷნ ხოჩა მა̄მ
Line of edition: 18    ხაკუ სერ, მარე ჰა̄უ̂ე მეზელა̈̄ლ მა̄რე მო̄დე, ეჯურ ჲედე მეთერი ნათა̈რუ̂
Line of edition: 19    მა̈ჲ ირო̄ლ, ჲედე დოხტური ჟაგა̈რ იმ იჩოდა? ჰა̄უ̂ე მეზელა̈̄ლ
Line of edition: 20    მა̄რა ჟაგა̈რ ჟი მომ ესჰა̈̄ნ, ეჩქა ლუშდუ̂იღუნღო ჟაგა̈რ იმ ლა̈ხშედენ,
Line of edition: 21    ჲედე მეთერი ნათა̈რუ̂ მა̈ჲ ირო̄ლ? ეჯა ხეკუთნი მიშგუ̂ა კალონშუ̂ მეზელა̈̄ლ
Line of edition: 22    მა̄რა, ჲერუ̂ა̈̄ჲ[დ] ჟ'ანსე̄ლუ̂ე.

Line of edition: 23       ათხე სგა ლახსგურდა სტოლს: -- ჲაღო, მი ამჟი მა̄დ ლუ̄ქუ̂, ერე
Line of edition: 24    ჲერუ̂ა̈̄ჲ სამ მეწუ̂მ ამბა̈უ̂ს ქა ამა̈̄ქუ̂ინი̄ს, ხეხუ̂დ ეჩი̄[შ] ხუ̂ი.

Line of edition: 25       ათხე ხა̈̄ქუ̂ ხელწიფი გეზალდ, ერე: -- მი ლიჩი̄ჟა̈̄ლ მა̄დეჲ, თხუ̂იმი
Line of edition: 26    მა̈სისგ: მი მა̄რ ლახუ̂ბა ლეთხე̄ლი. ჲეშდჲერუ ლჷჩა̈̄ჟ ი ჲეშდჲერუ
Line of edition: 27    ლჷქუ̂ეით ხოშა̄მ მუხუ̂ბა ხონჴერდა ი ეჯჟი ხოხუ̂რა̄მ მუხუ̂ბა ი ეჯჲა̈რ
Line of edition: 28    მა̈გ ამეჩუ ა̈მქარუ̂ა̈̄ნ[ხ].

Line of edition: 29       ათხე ანმა̄რე ცორუ̂ა̈ლ ამნე̄მ ი ადზჷზე. ამის მე̄რმე ყო̄რ ძუღუ̂ათე
Line of edition: 30    ხა̄რა: ამხაუ̂ ლჷმშიდუ̂ნე̄ლი ხა̈ლხს. ლა̈ჲბინეხ ლიმა̄ჯე ი ლახუ̂ე̄მ
Line of edition: 31    ამნემ პლატუკ, ხა̈ჭმინეხ ალას ლჷდგა̈რს ი ჩი̄ ლჷჲა̈რდ ტიხეხ. უ̂ეშგიმპილს
Line of edition: 32    ალჲა̈რი ა̈ხჩჷ̄დხ, ჲერუ̂ა̈̄ჲს ალა ხეთხა̈̄ლდა. ქუ̂ეყანა̈̄ მა̄რე მა̈გ
Line of edition: 33    ამეჩუ ანჴა̈დ. ათხე ოხდეხ ალას ტუ̂ეტ ი მიჩა ქონებას ი ა̈გითე ანჴა̈დხ.
Line of edition: 34    იმუ̂ა̈̄ჲჟი ხეკუთნი ხელწიფი გეზალს ი მიჩა ცხოუ̂რებას, ამთა̄ნ
Line of edition: 35    დრ"ჲ ხა̄რხ.

Line of edition: 36       უ̂ოდ ეჩაუ̂ დო̄სა გუ̂ი̄ზნე̄ნს, ეჩქად ნო̄სამაუ̂ აჯმარცხახ ი ლჷმზჷრე̄უ̂
Line of edition: 37    ხიშდ.



Page of edition: 88 
Line of edition: 1 
იფარული
Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.