TITUS
Svan Prose Texts I (Upper Bal)
Part No. 67
Previous part

Text: 74 
Page of edition: 88 
Line of edition: 2 
74. მჷშკიდ და̈რჯელა̄ნ


Line of edition: 3       ალას კოჯ ხა̈ხლა. ამეისგა ა̈რი მჷკი̄ლი, ჩა̈̄ჟს ფაშა̈ტს ხაკუ̂რუნე,
Line of edition: 4    ზურა̄ლს-ბეფშუ̂ს, დაჴჷლს ნეღა̈შტს, ღოლჲა̄ქს ჟინაღს, ი ამხა̄უ̂ ა̈ნშკა̄დე
Line of edition: 5    ჯა̈ჭუ̂ა̈რ ი ჟ'აჩა̈დ ამხა̄უ̂. ამჩუ ჩუ̂აყუ̂რა და̈ლ. კი̄ლ ა̈ნკიდ ი უ̂ეშგ-უ̂ეშგდ
Line of edition: 6    ლა̄ტა̈ხ: "ეჲ, ჯა მა̄რე, იმჷნ ხაყლუ̄ნი, მიჩ ამსუ̂ა̄ლდა̈ საუდ
Line of edition: 7    ხა̄რ!" ი სგა̄ჩა̈დ ი სგა ლოხყურდა.
Line of edition: 8       -- ეჲ მჷშკიდ და̈რჯელა̄ნ, ეჯა ნო̄სა გუ̂ეყერს, ჰა̄უ̂ე ისგუ ხეხუ̂

Line of edition: 9       ჟ'ანჴა̈დ, ესა, ადო ქა მაჭკუ̂რე ლუსდგუ̂ა̈რს უ̂ოქუ̂რა̈შ! -- ეჯა მა̈ჲ გუ̂ეყრენი,

Line of edition: 10       აგის უ̂ენდ ითჷ̄რანა̈̄ლ!

Line of edition: 11       ალა სგა ლა̈ხღანუ̂ა̈̄ნ. ალა ჟ'ანჴა̈დ, ამი̄ ხეხუ̂, ქა̄ხჭკუ̂ერ ლუსდგუ̂ა̈რ
Line of edition: 12    ი ჟ'ანჷგა̈̄ნ ჰამს.
Line of edition: 13       -- მჷშკიდ და̈რჯელა̄ნ, აშ დამ ჯაყლა̈ს, ერე ისგუ ხეხუ̂ ჟი ჴედენ.
Line of edition: 14    ლუსდგუ̂ა̈რ ქო̄ხჭკორა. ათხე მერდად მა̄მა მაყა. ჩამუბჴუ̂ ი ჭყინტ
Line of edition: 15    მი̄ზ, ისგუ გეზალ!

Line of edition: 16       ათხე ჩუ̂აბიჴუ̂ ამნემ ი ულტუ̂ა ხაბნა̈̄ გუ̂ა̈რა სგა ლახჭუ̂ე̄ნ, ჩუ̂ესდე
Line of edition: 17    სამ ლაჭარ შუკუ̂ისგა. ამელექუ̂ა ანღრიხ ფუსნაბუა̄სდიშ, ჯგჷრა̈̄გ ი მაცხუ̂ა̈̄რ.
Line of edition: 18    ჯგჷრა̈̄გ ხაყლე: "ბეფშუ̂ი ძღჷ̄ლ მესმი", მაცხუ̂ა̈̄რ ხაყლე: "მიი
Line of edition: 19    მესმი, მარე გუშგუ̂ეჲ ფუსდცახა̈ნ დეშ ლიკუ̂შედ!" ჩუ̂ანჴა̈დხ ალჲა̈რ,
Line of edition: 20    ჟ'ა̈თლაკხ ალას. ა̈ნწუ̂ე̄ნეხ ალა. "ალა მირ გუშგუ̂ეჲ ნა̈ყუ̂ილ ლი".
Line of edition: 21    ჟ'ა̈ნკიდხ ალა ი ჩუ̂ადჲეხ ამანი ნიცთეჩუ, ჟ'ანპრისდეხ, ჟახად ათჟა̈ხხ
Line of edition: 22    ა̈მირან ი ხა̈̄ქუ̂ინხ უშხუ̂ა̄რ: "ჩი̄მი მენწირუ ლი [უ̂ოდ ისგთექა
Line of edition: 23    დო ანჴეს ი] ეჩქა კოჯა̈ ბედიშუ ლი!" ალა მა̄დ ჩუ̂ემინ მიჩა მახუ̂შიდ.
Line of edition: 24    ეჩქა მიჩა მახუ̂შიდ ლა̈̄ქუ̂: "ჩი̄მი მენწირუ ლი, უ̂ოდ სემი ქრისდე̄
Line of edition: 25    თა̈̄სდო̈ბ ჩუ დო აკუშას... ეჩქა ქაჯაუ̂ე̄თი ყო̄რისგა მე̄ზიუ̂ ლი!"

Line of edition: 26       ათხე ჩუ̂აცუ̂ირხ ალა ამეჩუ ი ანჴიდხ ამანი უ̂ა̈ზრა̈ლდ ჩა̈̄ჟ ლათუ̂ნათე
Line of edition: 27    ი ათხე ჟ'ოთჩა̈დ ნეფხუ̂ნა̈̄ლჟი ალა, მა̄დ ხაყერ ლათრა ი ჟ'აჩა̈დხ
Line of edition: 28    ათხე ამანიშთე, ამანს ხა̈̄ქუ̂ინხ: -- ე, ამან, ეჯკა̈ლი მირ ა̈რი, ერე ჩა̈̄ჟს
Line of edition: 29    ნიცს, ლათრას, დე̄მა ხა̈მბე!
Line of edition: 30       -- ე, ჲაღო, მიშგუ გეზლი̄რ, ლა̈ჩუ̂ს წუ̂ა̈დუ̂ა̈რ ახხალჷ̄რედ, ჩუ̂ათხჲედ
Line of edition: 31    სგა̄ხდედ ლატყბას, ეჩქა ეჯა ქა ჴედნი!

Page of edition: 89 
Line of edition: 1       ჩუ̂ადიეხ ალჲა̈რდ, სგა̄ხდეხ ი ათხ' ა̄ლა ქა̄ნჴა̈დ. "ე, ლჷკჩე̄უ̂ ლი
Line of edition: 2    გუშგუ̂ეჲ ბედ, ალა მუხუ̂ბე გუ̂ე̄რა!" ალა ჟ'ადჲეხ ა̈გითე ი ათხე ამანს
Line of edition: 3    მეუ̂არ ათხი̄დჷნ. სერ ალჲა̈რდ ჟ'ა̈ნცხეხ ჩიემ. აჩა̈დხ აშხუ̂ ლადეღ მჷლცათე,
Line of edition: 4    უ̂ოხრია̈ლს შჷყჟი ხაფთქუ̄რახ ი თუნგა̈რს-თხუმჟი. ანღრი
Line of edition: 5    ამელექუ̂ა მუკუ̂ჩხი დედბერილ: "სგა̈ჲ ჭყჷნტა̈რ, მიშგუ̂აცახა̈ნ დე̄სამა
Line of edition: 6    ჯუღუ̂ეხ ლეთხე̄ლი, სგა̈ჲ ისგუ̂ეჲ მუე̄ თეს ა̈ხთხა̄ლდ!" ალჲა̈რდ ჩუ̂ა̈ნნიკუ̂ხ
Line of edition: 7    თხუმა̈რ ი აჩა̈დხ ა̈გითე. სგა̄ჩა̈დ ა̈მირან ი ლა̈ხჭუ̂ედდა ამანს:
Line of edition: 8    "ბაბა, მა̈ჲ ჯეყა̈რ თეს?" ამნემ დაშნა̈ჲ ა̈ნცხუ̂ა̈პ ი ქა̈̄ხღუ̂ა̈ჭ ყო̄რქა.
Line of edition: 9    მე̄რუ̂ა̄მდ სგა̄დ ლა̈ხტა̈ხ, ათხე ქა ხა̈̄ქუ̂ მიჩა ბაბად:
Line of edition: 10       -- ე, მაჩა ცოდუ ხა̈̄ცუ̂, მინეში̄, ჲერუ̂ა̈̄ჲს ალა ხო̄ქუ̂ე̄ნს! ჯაჲ დაყმჷყია̄ნ

Line of edition: 11       ხებკა̈̄ნხ უშხუ̂ა̈რ, უ̂ოდ-ი-უ̂ოდ ჯა ხა̈წრა ი სერ ჩუ̂ა̈დმეჩა̈̄ნ ი ჟ'ახწინდა
Line of edition: 12    ი ისგუ̂ეჲ თხუ̂იმ მაშგუ̂მინ ი ისგუ̂ეჲ თხუ̂იმ დეშ ლო̄ხო ი თე ლოხუ̂ჭი̄რხ.
Line of edition: 13       -- სერ, ჲაღო, ბაბა, ღურიდ.
Line of edition: 14       -- აღო ამჟი მე̄ზიდ მა̄მა ჯაყახ.
Line of edition: 15       -- ჲაღო, იმჟი?
Line of edition: 16       -- იმჟი-ი გუშგუ̂ეჲ მურყუ̂ამს დოლებში̄რა ხაჭიდ, ეჯას ემოშ
Line of edition: 17    აშხუ̂ა̈ნჟი ჟი ხაკუ̂ა̄ნედ, მე̄რუ̂ა ხა̈ნჩუ თხუმჟი ჟი ხიფთქუ̄რედ, ეჩქა ჩუ
Line of edition: 18    ჯაყახ მე̄ზიდ.

Line of edition: 19       ჟ'ა̈ნკიდ ა̈მირანდ ალა, ქა̄დკუ̂ა̈რ ეჩხა̈ნჩუ ი თხუ̂იმ ესხუ̂იე ი ჟ'ესფუჩხუ̄რე.
Line of edition: 20       -- ბაბა, ჩუ ჩუ̂ემინდ!
Line of edition: 21       -- ჲაღო, სემი თხუ̂იმ წელიშ ლა̈ხყედნედ, სემი კუპრ წელი ნასა̈̄ნ,
Line of edition: 22    ეჯას სემი ყო̄რ ხა̄რ ი ეჩას, სამ ყო̄რს, ლახ სგა̄თძგუ̂იბედ ი სუფრს
Line of edition: 23    ლახ ჟ'ოხუნჴუ̂ემნედ, ეჩქა ისგუ̂ეჲ მარჯობ ლი, ადო აშ მა̄მა ღო.

Line of edition: 24       ასღრიხ, სგა̄ჩა̈დხ ამი̄ ჰა̈ზუ̂თეჲსგა. ათხე ლახა̄გა̈ნხ ყო̄რს,
Line of edition: 25    ახფიშუ̂დხ ეშხუ თხუ̂იმ ი სგა̄თძგუ̂იბხ, მე̄რუ̂ე თხუ̂იმჷდ ახფიშუ̂დხ ი
Line of edition: 26    მე̄რუ̂ე ყო̄რ ათძგუ̂იბხ. ათხე მე̄სმე თხუ̂იმ ახფიშუ̂დხ ი ყო̄რი სგა̄თძგუ̂იბხ
Line of edition: 27    ი სუფრი ჟ'ოხუნჴუ̂ეხ ი ალა ანღრი ყო̄რქა ი ელჲა̈-მჷლა̈მ სგუ̂ებინ
Line of edition: 28    ხოჟეღუ̂. ალა ხა̈ბდე წელი ნასა̈̄ნს ი ჩოთდიგ ალა. ქა̄ნჴა̈დ დაყმჷყია̄ნ
Line of edition: 29    ი სგა ხოძგა̈რ ლაბჷრგია̄ლს ი ათხე ჩუ̂ა̈ნდე შიშდ ა̈მირანდ ი
Line of edition: 30    ხა̈ქუ̂ცე თხუმა̈რს. ათხე აშხუ̂ი̄ლთეჲსგა ოხჴიდ:
Line of edition: 31       -- ალა სგა ლა̄მაცუ̂რ ი მა̈̄ჲ ჰაჯ ჯეკუ̂დი, ეჯას ჯა̈ჩო.
Line of edition: 32       -- ჰაჯ დე̄სამა მაკუ, მიშგუ̂ა მუე̄ თე მაკუ!

Line of edition: 33       ათხე ამნემ ხა̈̄ქუ̂: -- ხუ̂ა̈ჲ თე̄რა̈ლ [ესერ] ხორი მიჩ ი მა̈ნგრე ხეჩდა
Line of edition: 34    თე, ეჯა ლი ისგუ̂ა მუე̄ თე.

Line of edition: 35       ათხე ალაჲ ქა̄თქუ̂იც ი ეჯაჲ ჟ'ა̈ნკიდ. ესღრიხ სერ ა̈გითე ი სგო̄თსგურეხ
Line of edition: 36    ი ხოჩე̄ლდჷდი ხა̄რ. სერ ჟ'ახჟანდა მეუ̂არ ა̈მირანს ი ჟ'აჩა̈დ
Line of edition: 37    დე̄ფა̈ნთეჟი ი ნეჯუ̂იდს იჩო. ათხე ანჴა̈დ ნა̈პო̈ლ: -- ეჲ, მა̈ჲ ესერ
Line of edition: 38    ტრო̈კნი, მეჲჩმა̈ჩ?

Page of edition: 90 
Line of edition: 1       -- კე̄სრი ნანუ̄ლ, ეჲ, მა̈ჲ ესერ ცუ̂ეცნი ძუღუ̂ა̈̄ში ქეთბი-ნა̈თბია̄ნ?
Line of edition: 2       -- ეჯჲა̈რ ეშხუ ხედრა ჩუ დ' ა̈̄თხუ̂ია, ეჩქად ნო ლიგნე [ნუ] ჯიგა̈დ,
Line of edition: 3    ნო ლისგუ̂რენ!

Line of edition: 4       სერ ამნე̄მ ჩუ̂ა̈ნნიკუ̂ თხუ̂იმ ი ჩუ̂აჩა̈დ მიჩა მუთე ი ქო̄ხო̄მბუ̂ე ამჟი
Line of edition: 5    ი მიჩა მუდ ადზჷზე. აჩა̈დ სერ ალა ძუღუ̂ა̈̄ში ქეთბი-ნა̈თბია̄ნთე.
Line of edition: 6    ალა ხეხუ̂დ ა̈დხუ̂იე ი ანღრიხ ალჲა̈რ ათხე ძუღუ̂ა̈̄ პილჟი. ალას რჷდინ-გურნა
Line of edition: 7    ლა̈ხშყა̈დ. ა̈მირანს ხაყლე უ̂ეშგდ ლიტეხს. ა̈მირან მა̄დ
Line of edition: 8    ატა̈ხ ი მიჩა ხეხუ̂ ატა̈ხ. ამჩუ̄ნ ქა ლახუ̂ე̄მ ქრისდე̄ თა̈̄სუ̂დებ ი ხოღლი
Line of edition: 9    ა̈მირან ი დემხა̈ნ ანტა̈ხ. სერ ჟ'ახჟანდა ა̈მირანს ი ა̈გით' ა̄ჩა̈დ ი მიჩა
Line of edition: 10    მუდ ხა̈̄ქუ̂, ერე "მა̈ჲ ესერ ხოჩუ̂მინა?" ი ამნემ ხა̈̄ქუ̂: "ალმა̈̄ზხ ესერ, რჷდინ-გურნა
Line of edition: 11    ა̈ნსა̈დ ი ეჩხაუ̂ ატა̈ხ ი ეჩქა ხოღელდა̈ს ი დე̄მხა̈ნ ანტა̈ხ ი ა̈გით'
Line of edition: 12    ოღუ̂ე".

Line of edition: 13       ათხე მიჩა მუდ ხოხუ̂რა ლახუ̂ბა ადზჷზე. აჩა̈დხ ალჲა̈რ ძუღუ̂ათე
Line of edition: 14    ი ალა ილკუ̂ე̄ლჰიე̄ლ ძუღუ̂აისგა. ალჲა̈რდ ქა დეშ ა̈ნტიხხ ი ა̈გით' ა̄ნტა̈ხ.
Line of edition: 15    ათხე მინე მუდ: -- მა̈ჲ ესერ ხოჩუ̂მინახ?
Line of edition: 16       -- ეჯ' ე̄სერ ძუღუ̂აისგა ილკუ̂ე̄ლჰიე̄ლ. -- ათხე ა̈მირანდ ხა̈̄ქუ̂ინ:
Line of edition: 17       -- ბაბა, ქა ჯე̄თა̈̄ლ.
Line of edition: 18       -- ი ღო იმ ამე̄თნე?
Line of edition: 19       -- იმ-ი ბალღე̄თ ქა ლა̈̄მით!
Line of edition: 20       -- ღო მე̄რუ̂ა ლახუ̂ბას მა̈ჲ ხე̄რახ? -- ჲაღო, ჰა̈დურდ დე̄სამა მაკუ.
Line of edition: 21    ახსგურდა რა̈შს ი აჩა̈დ. ამელეჟა ახყახ ეშდიჲორუ უ̄ღუ̂ა კა̈მბშა̈რ
Line of edition: 22    ი გმირ სგა̈̄ნჩუ ხოყუ̂რეხ, დიუ̂ო-ჲ გუა თხუმრა̈̄შ ხოსგურხ. გმირს
Line of edition: 23    ჭიშხ ქა̄მენჩუ ხორი ი ალა ეშდიჲარუ̂ საჯენს ქუ̂იცე უ̂ერს ჭიშხშუ̂.
Line of edition: 24    ჩოხქა̈ხ ა̈მირან რა̈შს ი სგო̄თტიხ ჭიშხ ი ათხე ამნემ ხა̈̄ქუ̂: "ალა ა̈მირანი
Line of edition: 25    ტუ̂ეტ ლა̈სუ̂ ი ათხე ში ლა̄მო!" ი ქა ლახუ̂ე̄მ. ათხე ამნემ ხა̈̄ქუ̂ინ:
Line of edition: 26    "ეშხუ ქრისდე̄ თა̈̄სუ̂დებ მეკუ̂შეუ̂ ჯა̄რ, სი მიშგუ დიუ̂ო-ჲ გუა ჟი მო̄დ
Line of edition: 27    ა̈ხუ̂ოჴრა̄ლა". ი ჩუ̂ა̈ნკიდ ამნემ ამჩუ ალჲა̈რ ი ნა̈ბოზდ ჩუ̂ა̈რიხ უშხუდ.

Line of edition: 28       ათხე ადჭკუ̄რე ა̈მირანდ: "მა̈ჲ ესერ ხაწჷხ ალჲარე ში? " ანჴა̈დ
Line of edition: 29    ათხე ალა, უშხუ̂ა̄რ ლოხშყჷბნა̄ლე თხუმა̈რ ი ჩუ̂აცუ̂ირ ამჟი ალჲა̈რ
Line of edition: 30    ი ჯ' ა̄ჩა̈დ ი ჩუ̂ა̈თუ̄ჟდა ჯუ̂ე̄დია ნაჯუ̂და მინდო̈რისგა. ათხე ე̄სა პირტყუ̂ეუ̂ილ
Line of edition: 31    ჩუ̂ა̈რი, მა̈გ ა̈ხჭო̄ნა̈̄ნ. ათხე ჟ'ა̈ნკიდ რა̈შდ თჷრტჷ̄ნ ი ეშ-ი-აშ
Line of edition: 32    ადფხა̄ლდა̄ლე ი ჟ'ანჲა̈ცხ ა̈მირან. ათხე ა̈მირანდ ხა̈̄ქუ̂: "მე̄რუ̂ა̄მდ ე̄სა
Line of edition: 33    ხიკედ თჷრტჷ̄ნს, ეჩქა ეჯჟი ჯატყცი მადრა̈ჴს, ერე სამ შო̈ლტ ჩაფჷლს
Line of edition: 34    ჯაკუ̂რუნე!" ჩუ̄დ ა̈დუ̄ჟ ა̈მირან ი სგა̄დ ა̈ხჭო̄ნა̈̄ნ პირტყუ̂ეუ̂ილ ი დეშ
Line of edition: 35    ადჭკჷრნე რა̈შდ ი ჟი̄დ ა̈ნკიდ თჷრტჷ̄ნ ი ჟი̄დ ანჲა̈ცხ ა̈მირან. "ეჲ,
Line of edition: 36    ჯა ლეფთქუ̂ე, ჰამა მა̈ჲცხუნე?" ახსგურდა ალას, ხაჴიდ ჲარუ̂ შდჷმ
Line of edition: 37    ნე̄სგაჩუ მადრა̈ჴ ი სემი შო̈ლტ ჩაფჷლ ათკუ̂არუ̂ნე ი რა̈შდ ა̈ნნიკუ̂
Line of edition: 38    თხუ̂იმ ი სგა ლახკიჰე ქაჯაუ̂ე̄თი ყო̄რისგა.

Page of edition: 91 
Line of edition: 1       აშხუ̂ ლადეღ მჷშკიდ და̈რჯელა̄ნ სა̈უ̂ა̈ ჭჷშხა̈რს აფტჷ̄რა. ალას მიჩა
Line of edition: 2    ჟიქა̄ნ კოჯხა̈ნქა ლახსჷმდა ეჯკა̈ლიბ ლიკი̄ლი, ერე ა̈შთქა ჩა̈̄ჟს სა̄ბელს
Line of edition: 3    ხაკუ̂რუნა, ფუ̈რს-ღუნს ი ა̈შთქე მა̈ჲ მა ლა̈სუ̂, მა̈გ ქა̄ნუ̂ერე.

Line of edition: 4       ამ ლადეღ მა̄მა აფა̈შ ი მე̄რმა ლადეღ აჯაღ აფტჷ̄რა სა̈უ̂ა̈ ჭჷშხა̈რს
Line of edition: 5    ი აჯად ამჟი̄ნ კი̄ლ ლახსჷმდა. ანჴა̈დ ალა̄, მჷშკიდ და̈რჯელა̄ნ, ი ეშხუ
Line of edition: 6    ქაფ ასალ ა̈ნშკა̈̄დ ი აჩა̈დ ალ კოჯა̈ ძირთე̄სგა̄, იმუ̂ა̈̄ჲხა̈ნ კი̄ლ ლახსჷმდა.
Line of edition: 7    იგემ ალა ასალს ი ისყე̄ნე ჭიშხი ლაგა̈მს ი ჟ'აჩა̈დ ალ კოჯთეჟი̄ნ
Line of edition: 8    ი აშხუ̂ ა̈გის ყო̄რ ხეყა̈რ. სგა̄ჩა̈დ ალა ამხა̄უ̂თე̄სგა ი ამჩუ̄ნ
Line of edition: 9    ოქუ̂რა̈ ტა̈ხტჟი̄ნ ჩუ̂აყუ̂რე და̈ლ ი ოქუ̂რა̈ ლუსდგუ̂ა̈რ ეჩხა̈ნ-ამხა̈ნჩუ̄ნ
Line of edition: 10    ხოთხა̈ფდახ. ალჲა̈რს უშხუ̂ა̄რე თხუ̂იმ ლახლატჷნდახ ი მჷშკიდ და̈რჯელა̄ნ
Line of edition: 11    ფიშრა̄მინ იზელა̄ლდა ალ კოჯთეჟი̄ნ.

Line of edition: 12       აშხუ̂ ლადეღ მჷშკიდ და̈რჯელა̄ნა̈ ხეხუ̂დ ჟ'ა̈ნსგიდნე ალა̄, იმუ̂ა̈̄ჲთე
Line of edition: 13    მიჩა ჭა̈შ აჩა̈დ ი ჯაი̄ უ̂ეშგინ ა̈თჭა̈მ. ჟ'აჩა̈დ ალა̄, მჷშკიდ და̈რჯელა̄ნა̈
Line of edition: 14    ხეხუ̂, ალ კოჯთეჟი̄ნ ი სგა ლა̈ხქა̄ლ მჷშკიდ და̈რჯელა̄ნს ი და̈ლს,
Line of edition: 15    ეშხუ ლუსდიგუ̂ ქა̄ხქუ̂იც და̈ლს ი სგე̄სდე ცხიკთე̄სგა ი ჩუ̂ანჴა̈დ. და̈ლ
Line of edition: 16    ერ ჟ'ანჲა̈ცხ, ეჩქა აშუ̂ხა̈ნჩუ̄ნ გუ̂ა̈მი ლახა̄დ თხუ̂იმ ი ხა̈̄ქუ̂ინ მჷშკიდ
Line of edition: 17    და̈რჯელა̄ნს, ერე
Line of edition: 18       -- მიჩა ხეხუ̂ ესერ მჷრე̄სგ ახჭემა მიჩ ი ეშხუ ლუსდიგუ̂ ესერ
Line of edition: 19    ქო̄ხქუ̂ი̄ცა.
Line of edition: 20       -- ეჯას ესერ მა̈ჲ ხა̈მჲედა ლიზელა̈̄ლ, ღანაუ̂ ესერ ლი ი ა̈გის
Line of edition: 21    უ̂ედნ ა̈რი. -- ხა̈̄ქუ̂ინ მჷშკიდ და̈რჯელა̄ნდ. და̈ლდ ხა̈̄ქუ̂ინ, ერე
Line of edition: 22       -- ჲაღო ესერ ათხე მიჩ ჟიქა̄ნქა მერდად მა̄მა ხაყა, ჯა ესერ
Line of edition: 23    ღანაუ̂ ლი, ჩუ̄უ̂ აბიჴუ̂, მიჩა ბეფშუ̂ს [ესერ] ეშხუ თუ̂ე ხოკლი ი ულტუ̂ა
Line of edition: 24    ღაბნა̈̄ გუ̂ა̈რას ესერ სგა̄უ̂ ლახჭუ̂ე̄ნ ი სამ ლაჭარ შუკუ̂ჟი̄ნ ჩუ̄უ̂ ესგე.

Line of edition: 25       მჷშკიდ და̈რჯელა̄ნს ამი̄ ლიჩუ̂მე მეუ̂არ ხამჭირჷნდა, მარე და̈ლდ
Line of edition: 26    მა̄მა ჰაჯ ახკიდ ი სერ ჩუ ლეჩუ̂მე ხა̄დდა. მჷშკიდ და̈რჯელა̄ნდ და̈ლ
Line of edition: 27    ჩუ̂აბიჴუ̂, ბეფშუ̂ ქა̈̄ნი̄ყე ჴადუ̂ხა̈ნქა, ულტუ̂ა ღაბნა̈̄ გუ̂ა̈რას სგა ლახჭუ̂ე̄ნ
Line of edition: 28    ი სამ ლაჭარ შუკუ̂ისგა ჩუ̂ესგე.

Line of edition: 29       ამელექუ̂ა ახა̄სდხ ჯგჷრა̈̄გ, მჷქემთა̄რინგზელ ი უჟ. ჯგჷრა̈̄გდ ლა̈̄ქუ̂ინ,
Line of edition: 30    ერე
Line of edition: 31       -- ბეფშუ̂ი კი̄ლჷლდ ესერ მირ ხასმა.
Line of edition: 32       -- მიჩი̄ ესერ ლახსჷმა. -- მჷქემთა̄რინგზელდ ლა̈̄ქუ̂ინ.
Line of edition: 33       -- ო̄, მიჩ ესერ ეში̄ უჟუ̂ნა̈ჲს ხატუ̄ლიხ, ადო ხუნკუ̂იდი̄ ესერ
Line of edition: 34    ლახსჷმა მიჩ. -- უჟდ ლა̈̄ქუ̂ინ.

Line of edition: 35       ალჲა̈რ ჟ'ა̈თლაკხ ალასა̄, ღაბნა̈̄ გუ̂ა̈რას, ა̈ნწუ̂ე̄ნეხ ი სგა̈̄ნჩუ̄ნ ჭყინტ
Line of edition: 36    ბეფშუ̂ არდა.

Page of edition: 92 
Line of edition: 1       -- ჲაღუ̂ ე̄სერ ალა ჟი̄უ̂ ანპირსდეხ ი ჰაჯუ ესერ მა ლახუ̂ე̄მხ. --
Line of edition: 2    მჷქემთა̄რინგზელდ ლა̈̄ქუ̂ინ:
Line of edition: 3       -- ჟახად ესერ ა̈მირანუ ათჟა̈ხხ ი ჩი̄მი მჷნწირუ ლა̈სუ̂, მარე ისგთექა
Line of edition: 4    ქა̄ნჴეს, ეჩქა კოჯა̈ ბედიშუ ესერ ლა̈სუ̂.
Line of edition: 5       -- ალას ესერ მა̄მა ხაყა, -- უჟდ ლა̈̄ქუ̂ინ, -- ჲაღუ̂ ე̄სერ ჟახად ა̈მირანუ
Line of edition: 6    ათჟა̈ხხ ი ისგთექა ქა̄ნჴეს, ეჩქა ესერ ლიცი ბედიშუ ლა̈სუ̂.
Line of edition: 7       -- ალასი̄ ესერ მა̄მა ხაყა. ჲაღუ̂ ე̄სერ ჟახად ა̈მირანუ ათჟა̈ხხ ი
Line of edition: 8    ჩი̄მი მჷნწირუ ლა̈სუ̂, მარე შომუ̂ა̈̄ჲ ესერ სემი ქრისდე̄ თა̈̄სდუ̂ებ ჩაკუშას,
Line of edition: 9    ეჩქა ესერ გიმუ ათძგუ̂ება! -- ლა̈̄ქუ̂ინ ჯგჷრა̈̄გდ.
Line of edition: 10       -- ამჟი̄ნუ ესერ ლა̈სუ̂, ჲაღო! -- ლა̈̄ქუ̂ინხ ჩიემ. ჟ'ანპირსდეხ ი
Line of edition: 11    ა̈მირან ათჟა̈ხხ ჟახად.

Line of edition: 12       ჯგჷრა̈̄გდ ჰაკუ̂ა̈ნ ოხტა̄ბე, მჷქემთა̄რინგზელდ ხანგა̈რ ხაშჩუქუ̂რე ი
Line of edition: 13    უჟდ უჟ ლახუ̂ე̄მ. ჟ'ა̈ნკიდხ ალა ამეჩუ̄ნ ი ამანი წყაროჟი̄ნ ჩუ̂ესგეხ.
Line of edition: 14    აშხუ̂ ნა̈ბუზს ახა̄სდ მიჩა წყაროს ლა̈თხუ̂ჲარხა̈ნ [ამან] ი ჟ'ა̈ხბა̈გუ̂ ამჩუ̄ნ
Line of edition: 15    ალა̄, ბეფშუ̂. ამნე̄მ ჟ'ა̈ნკიდ ი ჩუ̂ესჩიხნე ლა̈ნკუთხაჩუ̄ნ ი ა̈გით'
Line of edition: 16    ა̄ნჴიდ. ა̈გის მიჩა ხეხუ̂ს ჩაფლა̈რ ი ზეთჴარა̈ლ ათკჷდჷ̄რუ̂ნე ი მიჩა
Line of edition: 17    ხეხუ̂ს სგო̄თშყა̈დ კალთა̈ჲთე̄სგა ალა̄, ბეფშუ̂.
Line of edition: 18       -- ოჲ, ლჷკჩე̄უ̂ ესერ ლი მიჩა ბედ, ალა ესერ ლი მიჩა ბედ, ალა
Line of edition: 19    ესერ მიჩა უ̂ისიბიშ ი ბა̈დრი მუჰე̄ნი ხე̄რი.

Line of edition: 20       აშხუ̂ ლადეღ მჷშკიდ და̈რჯელჲა̄ნა̈ ხეხუ̂ ლაჰჷნწა̈̄ლთე აჩა̈დ ი უ̂ისიბ
Line of edition: 21    ი ბა̈დრი ჰაკუ̂ნა̈რშუ̂ ეჩხა̈ნ-ამხა̈ნ ლახგე ა̈მირანს ლეჰე̄ნიდ. ა̈მირანდ
Line of edition: 22    ლა̈ჲკიდ ჟი მიჩა ხანგა̈რ ი ლოხცუხუ̂ნა̄ლე უ̂ისიბს ი ბა̈დრის ი კი̄ლ-კი̄ლდ
Line of edition: 23    აფიშგ ერქჷდა.
Line of edition: 24       -- ხოჩა̄მდუ ესერ ლაჲჰე̄ნე, ადო, ქ' ე̄სერ ა̈ნჴდენი ი გუ̂ალა̈ ლა̈̄ხი̄რშუ̂
Line of edition: 25    ოთხიპე ჩუ [თხუმ]! -- ალჲარე დიდ ხა̈̄ქუ̂ინ.

Line of edition: 26       ლა̈ჲრა̄გე ი ხუ̂ა̈ჲ მა̄მა ი ჟი̄დ ლა̈ჲცხუ̂ეპ ხანგა̈რ ი აჯაღჷდ ლოხცუხუ̂ნა̄ლე.

Line of edition: 27       ალჲა̈რ შიშდ კი̄ლ-კი̄ლდჷდ აფიშგ. ალჲარე დიდ ლიტე̄უ̂ე̄დ
Line of edition: 28    ოხბინე გუ̂ალხა̈ნქა: -- ალას ესერ მიჩა ბოფშა̈რს, იმუ̂ა̄ლე ესერ
Line of edition: 29    ა̈მირანო̄ლ ა̈რი ეჯ' ე̄სერი̄ დეშ ლოხბა̈დუ̂ი, ადო ჯ' ე̄სერ ჰამა ხობდა̈უ̂ი
Line of edition: 30    მიჩა უ̂ისიბს ი ბა̈დრის ამჟი̄ნ ლიჩუ̂მეს?
Line of edition: 31       -- ო̄, ათხად ა̈მირანო̄ლ ხუ̂ა̈სუ̂ ღო მარე ათხე მა̄მა მჷრე̄სგ
Line of edition: 32    ხუ̂ი ადო!

Line of edition: 33       ალა ჰამუ̂ა̈̄ჲ ქა ხასჷმდა ალ ზურა̄ლს, ლა̈̄ხი̄რ ჩუ̂ადკუ̂ა̈რ ი ქა̄ნსკინე
Line of edition: 34    გუ̂ალხა̈ნქა ი ქა ა̈თცხო̄რპა̈̄ნ ა̈მირანს ლაყხა̄ლს:
Line of edition: 35       -- ლჷკჩე̄უ̂ ესერ ლი მიჩა ბედ, ჯ' ე̄სერ მიჩა უ̂ისიბიშ ი ბა̈დრი̄
Line of edition: 36    მე̄სმე მუხუ̂ბე ხე̄რი!

Line of edition: 37       ალჲა̈რ, სემი ჭყჷნტა̈რ, მა̈გ უშხუ̂იდ ა̈ნჷრდა̄ლა̈̄ნხ ი ლა̈შდრა̄ლთე
Line of edition: 38    ლახ ღჷრდახ, მინე ლაცლას ჩი̄ს ჟი ხა̈წრახ. ალჲარე მუს, ამანს
Page of edition: 93  Line of edition: 1    ეშხუ თე მა̄მ ხეყა̈̄ნდა ი აშხუ̂ ლადეღ ა̈მირან ლა̈ხჭუ̂ედდა მიჩა
Line of edition: 2    ლახუ̂ბას:
Line of edition: 3       -- მიშგუ ლახუ̂ბა, ალა მა̈ჲ ი̄რა̄, გუ̂იშგუ̂ეჲ ბაბას ეშხუ თე მა̄მა
Line of edition: 4    ხაყა? დო ლეჭუ̂დიე̄ლდ ი ღო ლაშა̈დ ჰე̄მა ხე̄რა, ლა̈ლშედნიდ იმუ̂ა̄ლას.
Line of edition: 5       -- მა̈დილ ჯე̄რა ი ნო̄სა ლა̈ხჭუ̂ედდე̄დ, დო̄სამა გუ̂ა̈ყრის, ეჯა
Line of edition: 6    ხოლა გუ̂ი̄მი მა̄რე ლი. -- უ̂ისიბდ ი ბა̈დრიდ ხა̈̄ქუ̂ინხ.
Line of edition: 7       -- დაგრ' ე̄ მეხლი, ეჩქა̄ი ქა ლოხჭუ̂ედნი, ჲაღო, ბა̄ზი ნა̈ბუზს.

Line of edition: 8       ნა̈ბუზს ამან აგით' ე̄რ ანჴა̈დ, ა̈მირან ლა̈ხჭუ̂ედდა:
Line of edition: 9       -- ბაბა, ხიად, აშხუ̂ მჷრა̈̄მ ჯეჭუ̂დიე̄ლ ი ა̈მცუ̂ი̄დ ნო̄სა.
Line of edition: 10       -- იმ ესერ, ბაბა̈̄ ლადეღ მიჩ? -- ამანდ ხა̈̄ქუ̂ინ.
Line of edition: 11       -- იმ-ი̄ აშხუ̂ხა̈ნი თე მა̄მა მირ ჯაყა ი ამი̄ ლიცხრე მაკუჩ, იმშა
Line of edition: 12    ტა̈რუ ჯა̈̄ცეს.

Line of edition: 13       ა̈ნგუ̄ნდა̈̄ნ ალა̄, ამან, ჟი ი ოდემ ჩიქად ჩუ არტყუ̂ეჲდა, ეჩქად
Line of edition: 14    ჩუ მირ ლა̄ტა̈ხ გუ̂ი.
Line of edition: 15       -- ოჰო ესერ, მიჩა მალატ ხუ̂ა̈ჲდ ხაჯო̄ნა, ადო ამი̄ ლი̄ქუ̂ი̄სგ ესერ
Line of edition: 16    და̈̄ს მოშ ხობდაუ̂ა მიჩა̈შდ.
Line of edition: 17       -- ბაბა, ხიად, ალა იმნა̈რ ჯამჯა̄რა̈უ̂, ლაშა̈დ ჰე̄მა ხე̄რა, ღო
Line of edition: 18    ნო̄თაუ̂ ლა̈ლშა̈დდ მა ი ეჯღა ჯეჭუ̂დიე̄ლ მი.
Line of edition: 19       -- ჲაღო, ბაბას ისგუ̂ეჲ მა̈ზიგ, ლახე ამჟი̄ნ გუ ჯა̄რხ ამი̄ ლიცხრედ,
Line of edition: 20    ათხე ქა̈̄ჯი̄მბუ̂ნე: მი მაგდჷნდა და̈̄უ̂ა̈ ზექ, ხეკუ̂ეს ერე ა̈მგე̄ნს ეშდჲერუ
Line of edition: 21    ჴა̈ლ ხორეუ̂ ი, ლახე დეშ ოთჷგ, თე მა̄დდა ლეჭი̄რხი უ̂ა̈ლისგა.
Line of edition: 22       -- მე̄უ̂არ ლჷმჲედ ლა̈სუ̂ა ღო ეჯა? -- ლა̈ხჭუ̂ედდა ა̈მირან.
Line of edition: 23       -- ეჯა ეჯჟი ლჷმჲედ ლა̈სუ̂, ერე გუ̂იშგუ̂ეჲ მურყუ̂ამ სგუ̂ებინ დოლებში̄რა
Line of edition: 24    ერ ა̈რი, ეჩას ჟიქა̄ნქა აკუ̂ა̄ნა ი მე̄რმახა̈ნ ჟი ირმეჲდა.

Line of edition: 25       აჩა̈დხ ალჲა̈რ ქა ი ადკუ̂ა̈რ უ̂ისიბდ ი ნე̄სგა მურყუ̂ამს ხაჴიდ.
Line of edition: 26    ადკუ̂ა̈რ ბა̈დრიდ ი შდულუ̂ა̈რმჷყისგა ხაჴიდ. ადკუ̂ა̈რ ა̈მირანდ ი ქა̄დკუ̂ა̈რ
Line of edition: 27    ჟიქა̄ნქა ი მე̄რმახა̈ნ ჟ'ანჷრმე. სგა̄ჩა̈დხ ქორთე ი ხა̈̄ქუ̂ინხ ამანს:
Line of edition: 28       -- ბაბა, ალა-ი-ალა მა̈გ ჩუ ჩუ̂ემინდ-ა́, სი მა̈̄ჲ ნე̄ქა. სერ იმ იჩოდა,
Line of edition: 29    ჲაღო, ეჯა ნე̄ქა!
Line of edition: 30       -- იმ-ი̄ გუ̂იშგუ̂ეჲ მურყუ̂ამს ბარჯს ხა̈ძგრიდა ი ლეჟა̈̄ მუხუ̂ირს
Line of edition: 31    ლექუ̂ა̄უ̂ ხა̈ჩოდა ი ლექუ̂ა̈̄შს -- ლეჟა̄უ̂.

Line of edition: 32       აჩა̈დხ ალჲა̈რ ქა ი ხაძგერ უ̂ისიბდ ბარჯ ი ჟი ლაჲქუთნე. ხაძგერ
Line of edition: 33    ბა̈დრიდ ბარჯ ი ჟი ლაჲსიპნე. ხაძგერ ა̈მირანდ ი ლექუ̂ა̈̄ მუხუ̂ირ
Line of edition: 34    ლეჟა̄უ̂ ხაყერ ი ლეჟა̈̄შ -- ლექუ̂ა̄უ̂. სგა̄ჩა̈დხ ალჲა̈რ ი ქა ხა̈̄ქუ̂ინხ
Line of edition: 35    მინე ბაბას.
Line of edition: 36       -- სერ იმ ჩი̄ს იჩოდა? -- ლა̈ხჭუ̂ედდახ მინე ბაბას.

Page of edition: 94 
Line of edition: 1       -- იმ-ი̄ მიშგუ̂ა ცჴემა̈დს ჟი იბუ̄წა ი ჴარჴჩუ̄ნ იყა̈რდა ი ცხუ̂ი̄მი
Line of edition: 2    ნა̈კუ̂შუ̂ა̈რს ჟი ტჷხა ჴარჴჟი̄ნ.

Line of edition: 3       აჩა̈დხ ალჲა̈რ ქა̈̄მთე, ლა̈ხკუ̂ა̈ჰ უ̂ისიბ ი დეშ ა̈ნბუ̄წე. ლა̈ხკუ̂ა̈ჰ ბა̈დრი
Line of edition: 4    ი ისგთეჟი̄ნ ა̈ნბუ̄წე. ლა̈ხკუ̂ა̈ჰ ა̈მირან ი ჟ'ა̈ნბუ̄წე ი იყერ ჴარჴჩუ̄ნ
Line of edition: 5    ი ცხუ̂ი̄მი ნა̈კუ̂შუ̂ა̈რ ჟ'ა̈ნტიხ ჴარჴჟი̄ნ. სგა̄ჩა̈დხ ალჲა̈რ ქორთე ი ხა̈̄ქუ̂ინხ
Line of edition: 6    მინე ბაბას:
Line of edition: 7       -- ბაბა, სი მა̈̄ჲ ქა ნე̄ქა, ეჯა მა̈გ ჩუ ჩუ̂ემინდ ი სერ იმ იჩოდა,
Line of edition: 8    ეჯა ნე̄ქა!
Line of edition: 9       -- ო̄, ბაბას ისგუ̂ეჲ მა̈ზიგ, ალას-ი-ალას ეჯა დე̄მგუ̂აშუ̂ იჩოდა,
Line of edition: 10    მარე აშ აჯკუ̂იჰა̄ლინ ი ათხე იმედ მა̄რ, ერე ეჩი̄ მეხუ̂იად ჩუ ჯაყახ.
Line of edition: 11    ათხე ეჩი̄ ლა̈ზგასი̄ ქა ლაჯთუ̂ე̄ნნე ი ეჩხა̄უ̂ იმუ̂ა̈̄ჲჟი̄ნ ხაკუჩ ლი̄ზი,
Line of edition: 12    ეჩასი̄ ქა ჯა̈̄ქუ̂ნინე: სგა̈ჲ ლა̈ჰყედნედ, ჲაღო, ათხე სემი ციცუ̂ი თხუ̂იმ,
Line of edition: 13    ეშხუ კუპრ წელი ნასა̈̄ნუ̂ ი ეშხუ ფუთ ფა̈ტუ̂. ეჯა ლადაღშუ̂ ჩიგარ
Line of edition: 14    ჴა̈ნს იტყბე სა̈დილდ ი სგა̈ჲ ციცუ̂ი თხუ̂იმს სგა̄თკუ̂ა̄ნედ, ეჩქა ეჯა
Line of edition: 15    კერეტა̈ნს ხესგუ̂რი ჟი ი ჲელჲა̈-მჷლა̈მს ქა ფუშდე ი ეჯჟი̄ნ ჯეზა̈ზხ
Line of edition: 16    ქა. წელი ნასა̈̄ნუ̂ სგა ლახბიდდ ი ეჩნოუ̂შ სგა ლახდიგედ ჲელჲა̈-მჷლა̈მს,
Line of edition: 17    ფა̈ტუ̂ ჩუ̂ესშიდდ კერეტა̈ნს ი ეჯა ეჩი̄ ლანკუ̂ილს ლახსიდ ი
Line of edition: 18    სგა̈ჲ ერუ̂ა̈̄ჲ მოშ ა̈ხწინიდ, ეჩნოუ̂შ ი̄რი.

Line of edition: 19       ალჲა̈რ ა̈ნმა̄რა̈̄ნხ ეჩხაუ̂ ლა̄ზდ ი მინე ბაბად მა̈̄ჲ ქა ლოხუ̂თუ̂ე̄ნ, ეჯა
Line of edition: 20    მა̈გ შჷნ ლა̈ჲყედნეხ.

Line of edition: 21       ესღრიხ, ესღრიხ ალჲა̈რ ი ჟი ა̈თლაკხ ალ და̈̄უ̂ა̈ ქორს. ლოხცი̄რუ̂ეხ
Line of edition: 22    სგაჲ, ალას ჴა̈ნ სგა ხოხლა ლემესგდ ლატყბას. ათფუ̈შუ̂დ
Line of edition: 23    უ̂ისიბდ ციცუ̂ი თხუ̂იმ ი ლაგა̈̄გის ხაჴიდ. ათფუ̈შუ̂დ ბა̈დრიდ ი სგა
Line of edition: 24    ლოხქიფ ლაგა̈̄გის. ათფუ̈შუ̂დ ა̈მირანდ ი გუ̂ამა̈რისგა ხაჴიდ. ჟი ლა̄პა̈რ
Line of edition: 25    ალა̄, და̈̄უ̂, ი კერეტა̈ნს ჟი ლახსგურდა ი ჲელჲა̈-მჷლა̈მ ქა ხოფიშუ̂დ,
Line of edition: 26    ეჯჟი̄ნ ყო̄რქა ანღრი. უ̂ისიბდ ი ბა̈დრიდ ალას ერ თე ლახრეკხ,
Line of edition: 27    შიშდ ჩუ̂ა̈დი̄ტუ̂დახ ი იმთე დო აჩა̈დხ, ა̈მირანდ დე̄სამა ა̈ნმეჴრე.

Line of edition: 28       ა̈მირანდ ეშხუ კუპრ წელი ნასა̈̄ნუ̂ სგა ლახბიდ ი ჲელჲა̈-მჷლა̈მ
Line of edition: 29    შიშდ სგა ლახდიგ. ფა̈ტუ̂ კერეტა̈ნს ესუ̂შიდ ი მიჯნე̄მდ და̈̄უ̂ს ხაფხეჭ
Line of edition: 30    სგა ი იბჷრგიე̄ლხ, იბჷრგიე̄ლხ ი ჩუ̂ა̈ნდე ა̈მირანდ და̈̄უ̂. ალას ეშდჲერუ
Line of edition: 31    თხუ̂იმ ხაყა ი ლახა̄დ ალ თხუმრე ლაჭკუ̂რას ა̈მირან ი ეშდეშხუ
Line of edition: 32    თხუ̂იმ ერ ქა̄ხქუ̂იც, ეჩქა ხა̈̄ქუ̂ინ ა̈მირანს და̈̄უ̂დ:
Line of edition: 33       -- ხა̈დურდ ტუ̂იბისგა მუბუ̄ნყუ̂ლეუ̂იდ ესერ ნო̄უ̂ ანგიბ ჟი ი მიჩა
Line of edition: 34    ბაბა̈̄ თე ესერ სუ̂ეტს ხაშკა̄და, ჟი̄უ̂ ესერ ა̈ნკიდ ი სგა̄უ̂ ლოხგე ი ეჩქ'
Line of edition: 35    ე̄სერ მიჩა პლატკულუ ლახჭემ ი ხოტურფილი̄ ესერ ლა̈ხტეხნი.
Line of edition: 36       -- აი სი ნაჴე̄ცურა, ეჩას-ი-ეჩას ჩი̄ს ჩუ ხუ̂იჩო ი სიი ჩუ̂აჯდაგრი.

Line of edition: 37       ა̈მირანდ ალ და̈̄უ̂ს თხუმა̈რ მა̈გ ქა̄ხჭკუ̂ერ ი ჩუ̂ადგა̈რ.

Page of edition: 95 
Line of edition: 1       და̈̄უ̂ა̈ ლჷდგარუნღონ უ̂ისიბ ი ბა̈დრი̄ ქა̄ნჴა̈დხ ა̈მირანიშთექა.
Line of edition: 2    სგა̄ჩა̈დხ ქორთე, ჟ'ა̈ნთხეხ მინე ბაბა̈̄ თე, სუ̂ეტს ხეშკა̄და̈̄ნ, ქა̄ხტყიცხ
Line of edition: 3    ალა ი ამჷნქა, იმუ̂ა̈̄ჲ მოშ ახწინდახ, ა̈ნკიდხ მა̈გ და̈̄უ̂ა̈ ქონა̈ბ ი ადჲეხ
Line of edition: 4    მინე ა̈გითე. ლახგეხ მინე ბაბას მიჩა თე ი პლატკულ ლახჭემხ ი ალას
Line of edition: 5    იმუ̂ა̈̄ჲჟი̄ნ მა̈̄ნკუ̂ი ხა̄დდა თე, ათხეჲ ეჩთა̄ნ თე ლა̈ხზუ̂ა̈ბ. ა̈მირანდ ი
Line of edition: 6    მიჩა ლახუ̂ბად ხუ̂ა̈ჲ მა̄მა ა̈დრა̄გეხ ა̈გის ი შიშდ აჩა̈დხ ლაჭბუგა̄ლთე.

Line of edition: 7       ესღრიხ აშხუ̂ ლადეღ შუკუ̂ს ი აშხუ̂ ა̈გის სემი გუ̂ელჲა̈რშაპა̈რ
Line of edition: 8    ლახხუ̂ი̄დხ? ა̈მირანდ ხა̈̄ქუ̂ინ:
Line of edition: 9       -- ქა̄უ̂ ესერ ლოხქა̈̄ბხ!
Line of edition: 10       -- მინდუ ესერ ლოხქა̈̄ბხ!

Line of edition: 11       ალჲა̈რდ ქა და̈̄რდ ლოხქა̈̄ბხ უშხუ̂ა̄რ ი გუ̂ელჲა̈რშა̈პდ ჩუ̂ადურტყუ̂ე
Line of edition: 12    ა̈მირან.

Line of edition: 13       გუ̂ელჲა̈რშაპა̈რ ა̈გითე ერ აჩა̈დხ, ეშხუ გუ̂ელჲა̈რშა̈პ, ხედუ̂ა̈̄ჲდ
Line of edition: 14    ა̈მირან ადურტყუ̂ე, ლეგდ ა̈დჷრდა ი ქა̈̄დბე̄ლა̈̄ნ ეჯჟი̄ნ, ერე ბეჭკუ̂ნი
Line of edition: 15    ჩუ. მიჩა დიდ ლიჭუ̂დი ლოხბინე ი ხეჭუ̂დია̄ლ:
Line of edition: 16       -- ხოწუ̂ახ ესერ ჲა̈რ ეშ?
Line of edition: 17       -- და̈̄რ ესერ, სემი მე̄რო̄ლა̈რ ესერ ლახხუ̂იე̄ნახ ი ქ' ე̄სერ მა̄დ
Line of edition: 18    ლოხქა̄ბახ ი ეშხუ̂ი̄ლ ესერ ჩოთურტყუ̂ა.
Line of edition: 19       -- უჲ, მიჩა ცოდჷლდ ესერ, ეჯ' ე̄სერ ა̈მირანო̄ლ ესერ იზელა̈̄ლ
Line of edition: 20    ი დოუ̂ ესერ ეჯა ესა ლა̈სუ̂!

Line of edition: 21       ამი̄ დი ხოჭუ̂დი ი ხეჴჷ̄რა̈̄ლ: -- ერუ̂ა̈̄ჲ ესერ ბედნიე̄რ სგუ̂ეჯი, ჲედ
Line of edition: 22    ესერ სგუ̂ებნაუ ანსგუ̂ეჯდა ი ჲედ უ̂ეშგმაუ̂.

Line of edition: 23       გუ̂ელჲა̈რშა̈პდ ერ ა̈მირან ჩუ̂ადურტყუ̂ე, უ̂ისიბ ი ბა̈დრი უ̂ეშგინ
Line of edition: 24    ა̈თჭა̈მხ ი ლაჴუ̂რაჟი̄ნ ხოჰუ̂ნა̈რდახ ლიჭუ̂დის. უ̂ისიბდ ლახტუ̂ი̄ლ ლაჴუ̂რაისგა:


Line of edition: 25       "ა̈მირან, კალა̈მ-ჩალა̈მსა, ჰაუ̂ ჰალა̈გსა,
Line of edition: 26       ბა̈დრს, უ̂ისიბსა მოკლე ხანგა̈რ ჩეგებსა".


Line of edition: 27       ლა̈ხშყა̈დ ეჩქა ა̈მირანს ეჯ' ე̄, მიჩ ერ ხანგა̈რ ხა̈̄ბჷდა ი ჟი ლა̈ჲცხუ̂ეპ,
Line of edition: 28    გუ̂ელჲა̈რშა̈პი ჴა̈დ ბჷლა̈ჲდ ადგენე ი ქა̄ნჴა̈დ ქა̄მენჩუ̄ნ; ქა̄ნჴა̈დ
Line of edition: 29    ქა̈̄მთე ი ამეჩუ̄ნ მიჩა ლახუ̂ბა, უ̂ისიბ ი ბა̈დრი, ჩუ̂ესხუ̂ი̄დხ ი მა̈ხიადშუ̂
Line of edition: 30    ლიგუ̂ნი ა̈დბინეხ. ანღრიხ ალჲა̈რ შუკუ̂ჟი̄ნ ი აშხუ̂ ა̈გის ლა̈ლფჷრაჟი̄ნ
Line of edition: 31    ო̄შთხუ̂ კუ̂ინჩჷლდა̈რ ხა̄გდახ. სემი ჩუ იზობდახ [კაკლა̈რს] ი
Line of edition: 32    ეშხუ ჩუქუ̂ა̄ნთე შჷდა.
Line of edition: 33       -- იმღ' ე̄სერ ჩუ დო̄მა იზბი ი იმნა̈რ ესერ შჷდე ჩუქუ̂ა̄ნთე? -- ლა̈ხჭუ̂ედდახ
Line of edition: 34    კუ̂ინჩჷლდა̈რ.

Page of edition: 96 
Line of edition: 1       -- ეჯღ' ე̄სერ, ერე მჷხა̈რ ესერ ალ მეზგე ლა̈ლფჷრას დე̄მის
Line of edition: 2    ოხუ̂დე̄სგნე ი ჰა̄უ̂და̈რ ესერ ი̄რა ი ეჩქ' ე̄სერ მიჩ შჷნ ხეღუ̂ე̄ნი ლეზუ̂ებ
Line of edition: 3    ი მინს -- მა̄მა.
Line of edition: 4       -- ატკჷდა̄უ̂ ესერ, იმჟი̄ნ ესერ მირ ა̈ჩრი̄თანე, ჰა, უ̂იჩმა̈ჩია̄ნ ნანუ̄ლ!
Line of edition: 5    -- ხა̈̄ქუ̂ინ აშხუ̂ემ.
Line of edition: 6       -- იმჟ' ესერ მირ ა̈ჩრი̄ბანე, ჰა, ქეთმათნია̄ნ ნანუ̄ლ! -- მე̄რმე̄მდ
Line of edition: 7    ხა̈̄ქუ̂ინ.
Line of edition: 8       -- იმჟი̄ნ ესერ მირ ა̈ბრი̄წანე, ჰა, ძუღუ̂ა ეჩხა̈ნ ნანუ̄ლ! -- მე̄სმე̄მდ
Line of edition: 9    ხა̈̄ქუ̂ინ.

Line of edition: 10       უ̂ისიბ გუდმეცა̈ლ ლა̈სუ̂ ი ჩუ̂ა̈დქიზა̈̄ნ. ქა ხასჷმდა, კუ̂ინჩრე გა̈რგლა
Line of edition: 11    ჟ'ა̈ნმეჴრე.
Line of edition: 12       -- მა̈ჲ ესერ ათჩო̄ნა? -- ა̈მირან ლა̈ხჭუ̂ედდა.
Line of edition: 13       -- დე̄სამა ესერ.
Line of edition: 14       -- ჯა̄უ̂ ათდაგრა, ქა მო̄დ ხა̈̄ქუ̂ას, იმნა̈რ ესერ ალქიზე̄ლი?
Line of edition: 15       -- იმნა̈რ ესერ-ი ალ ლა̈ლფჷრაჟი̄ნ ესერ ო̄შთხუ̂ კუ̂ინჩჷლდა̈რ
Line of edition: 16    ხა̄გხ-ა, სემი ესერ ინკუ̂ლიხ კაკა̈ლს ი ეშხუ ჩუ შჷდე ჩუქუ̂ა̄ნთე.
Line of edition: 17       -- იმნა̈რ ესერ შჷდე ჩუქუ̂ა̄ნთე ი იმღ' ე̄სერ დო̄მა ინკუ̂ლი? -- ალჲა̈რ
Line of edition: 18    ესერ ხაყლეხ-ა, კუ̂ინჩჷლდა̈რ. -- ეჯღ' ე̄სერ, ერე მჷხა̈რ ესერ
Line of edition: 19    ჰა̄უ̂და̈რ ი̄რი ი მეზგე ესერ ლა̈ლფჷრას დე̄მის ოხუ̂დინე ქა ი ეჩქ'
Line of edition: 20    ე̄სერ მიჩ შჷნ ხეღუ̂ე̄ნი ლენკუ̂ლი ი მინს -- მა̄მა. აშხუ̂ კუ̂ინჩს ესერ ხო̄ქუ̂ა,
Line of edition: 21    ერე "იმჟი̄ნ ესერ მირ ა̈ჩრი̄თანე, ჰა, უ̂იჩმა̈ჩია̄ნ ნანუ̄ლ!" მე̄რმას ესერ
Line of edition: 22    ხო̄ქუ̂ა, ერე "იმჟი ესერ ა̈ჩრი̄ბანე, ჰა, ქეთმათნია̄ნ ნანუ̄ლ!" მე̄სმა̄მ
Line of edition: 23    ესერ ხო̄ქუ̂ა: "იმჟი ესერ ა̈ბრი̄წანე, ჰა, ძუღუ̂' ე̄ჩხა̈ნ ნანუ̄ლ!"
Line of edition: 24       -- მინუ ლჷჭა̈თ ლიხ, ეჩჲარე ლაწა̈დთე მო̄დე აჩეხ, მა̈̄ღენუ̂ა̈̄ჲ ესერ
Line of edition: 25    ამთა̄ნა̈რ ლიხ ეჯჲა̈რ! -- ა̈მირანდ ხა̈̄ქუ̂ინ.

Line of edition: 26       უ̂ისიბს ი ბა̈დრის მა̄დ ხონდახ ლი̄ზი, მარე ა̈მირანდ მა̄მა ლა̈ჲკაკლე,
Line of edition: 27    ოდე დო ა̈დჴერნე.

Line of edition: 28       ესღრიხ, ესღრიხ ი ჟი ა̈თლაკხ ალას-ა́, უ̂იჩმა̈ჩია̄ნ ნანუ̄ლს. ალა
Line of edition: 29    მურყუ̂მა̈ შდურქა ისგიდდა ი ლა̈ხჭუ̂ედდა ალჲა̈რს: -- იმაუ̂ მე̄ზი ესერ
Line of edition: 30    ლიხ?
Line of edition: 31       -- იმაუ̂ ესერ ი ლა̈ჩი̄ჟა̄ლთე. -- ჲაღუ̂ ე̄სერ უ̂ისიბ ხე̄რი. -- უ̂ისიბს
Line of edition: 32    ესერ დე̄მ ა̈ჩი̄ჟე. -- ჲაღუ̂ ე̄სერ ბა̈დრი ხე̄რი. -- ბა̈დრისი ესერ დე̄მ
Line of edition: 33    ა̈ჩი̄ჟე. -- ჲაღუ̂ ე̄სერ ჯა ხე̄რი. -- ჯ' ე̄სერ ა̄დუ. ჟ'აჩა̈დხ ალჲა̈რ მა̈გ სემი
Line of edition: 34    მურყუ̂ამთე ი ნანუ̄ლდ ხა̈̄ქუ̂ინ ა̈მირანს: "ეჩი̄ ქრისდე̄ თა̈სდუ̂ებ ქა̄უ̂
Line of edition: 35    ლახუ̂ე̄მ, ერე მიჩა̈შხა̈ნქა ქა დო̄მთე აჩეს, ღუ̂ ე̄სერ ჩუ̂აგუ̂ა̈̄უ̂ი, ადო ღო
Line of edition: 36    დე̄მა". ა̈მირანდ ქა ლახუ̂ე̄მ თა̈̄სდუ̂ებ. ამ ლე̄თ ჩუ̂არდახ ი მე̄რმა ლადეღ
Line of edition: 37    ქო̄თჩა̈დ ი მა̄მა ადჷ̄გა̈̄ნ ი თა̈̄სდუ̂ები ჩუ̂აკუ̂იშ. ესღრიხ, ესღრიხ
Page of edition: 97  Line of edition: 1    ი ქეთმათნია̄ნ ნანუ̄ლს ა̈თლაკხ. ალა მურყუ̂მა̈ შდურქა ისგიდდა ი
Line of edition: 2    ლა̈ხჭუ̂ედდა:
Line of edition: 3       -- იმაუ̂ მე̄ზი ესერ ლიხ?
Line of edition: 4       -- იმაუ̂ ესერ ი ლა̈ჩი̄ჟა̄ლთე. -- ა̈მირანდ ხა̈̄ქუ̂ინ.
Line of edition: 5       -- ჲაღუ̂ ე̄სერ უ̂ისიბ ხე̄რი. -- უ̂ისიბს ესერ დე̄მ ა̈ჩი̄ჟე. -- ჲაღუ̂ ე̄სერ
Line of edition: 6    ბა̈დრი ხე̄რი. -- ბა̈დრისი ესერ დე̄მ ა̈ჩი̄ჟე. -- ჲაღუ̂ ე̄სერ ჯა ხე̄რი.
Line of edition: 7       -- ჯ' ე̄სერ ა̄დუ.

Line of edition: 8       ალჲა̈რ ჟ'აჩა̈დხ მურყუ̂ამთე[ჟი̄ნ] ი ნანუ̄ლდ ქრისდე̄ თა̈̄სდუ̂ებ
Line of edition: 9    ხაშგუ̂მინ, ერე "მიჩა̈შხა̈ნქა ესერ ქა ჰე̄მთე აჩეს!" ა̈მირანდ ქა ლახუ̂ე̄მ
Line of edition: 10    თა̈̄სუ̂დებ.

Line of edition: 11       მე̄რმა ლადეღ ქა ლიჴედ ხეკუ̂ა̈დ მურყუ̂ამხა̈ნქა. ანსინჯუ̂ეხ ქა ი

Line of edition: 12       ალ მურყუ̂ამს სამ ორტკეცდ ხეცხა̈პ ქა გირკიდ, ჰე̄სა მებუ̈̄ლ ჩუ̂არდა
Line of edition: 13    ქუ̂ეყანაჟი̄ნ.
Line of edition: 14       -- ხოჩდახ ესერ იმე̄ ეშ მიჩა̈შჷნქა? -- ნანუ̄ლ ლა̈ხჭუ̂ედდა.
Line of edition: 15       -- დე̄მ' ე̄სერ. -- ალჲა̈რდ ხა̈̄ქუ̂ინხ.
Line of edition: 16       -- ა̄დუ̂ ე̄სერ მჷრე̄სგ, ადო ალ' ე̄სერ-ა́, მა̈̄ჲ გირკიდ ხაცხიპხ, ალ'
Line of edition: 17    ე̄სერ მიჩა უდილ უ̂იჩმა̈ჩია̄ნ ნანუ̄ლა̈ ნაზჷზ ლიხ-ა́, მა̈̄ჲ გირკიდ ხაცხიპხ
Line of edition: 18    მურყუ̂ამს.

Line of edition: 19       ანსკინე ქა მურყუ̂ამხა̈ნქა უ̂ისიბდ ი ეშხუ ორტკეც ჟ'ანხუ̂იტ ი ჯაჲ
Line of edition: 20    ჩუ̂ა̈ნნა̈ხხ. ანსკინე ბა̈დრიდ ი ეშხუ ორტკეც ჟ'ანხუ̂იტ ი ჯაი ჩუ̂ა̈ნნა̈ხხ.
Line of edition: 21    ანსკინე ა̈მირანდ ი ეშხუ ორტკეც ამნე̄მდ ანხუ̂იტ ი ჯაი ქო̄ხუ̂სა̈დ.
Line of edition: 22    ლახა̄დ ა̈მირან ლა̈თიშს ი ქა̈̄ნთიშ უჯა̈რხა̈ნქა უ̂ისიბ ი ბა̈დრი, ესბა̈ც
Line of edition: 23    ჟიბაუ̂ ნანუ̄ლს:
Line of edition: 24       -- მა̈დილუ ესერ ხე̄რი, ლა̈ხშა̈დუ მა ი ალჲარე ნასე̄ლუ̂უნ ჟაგა̈რუ
Line of edition: 25    მა ლახუ̂ე̄მ!
Line of edition: 26       -- ო̄, ეშ ესერ სა̈ხ მა̄მა ლახღუ̂ა!... მარე ამნე̄მ ლა̈კუ̂ცა̈̄ნი̄ლ ოხკუ̂ა̈რ
Line of edition: 27    მურყუ̂ამხა̈ნჩუ̄ნ. ა̈მირანდ ქა ლახჭემ უ̂ისიბს ი ბა̈დრის ი ალჲა̈რ
Line of edition: 28    ჟ'ანსე̄ლუ̂ა̄ლე. ათხე ა̈მირანს ძუღუ̂ა ეჩხა̈ნ ნანუ̄ლა̈შთე ლი̄ზი ხაკუჩ.
Line of edition: 29    ალას უ̂ისიბ ი ბა̈დრი დე̄მ იჩოხ, მარე ა̈მირან ეში̄ დე̄მ იჟუ̂მე ლი̄ზის.
Line of edition: 30    უ̂ისიბდ ი ბა̈დრიდ ხა̈̄ქუ̂ინხ, ერე
Line of edition: 31       -- ჲაღო ესერ, ხოლა̄მდ ჰე მო̄მა ხაბჟა, ღო მინ ესერ ა̈გითე̄უ̂
Line of edition: 32    აფიშუ̂დ.
Line of edition: 33       -- ა̈გით' ე̄სერ მა̈ხიადა̈̄რ ჰ' ე̄სერ ხოცხახ ა̈მირანდ ხა̈̄ქუ̂ინ.

Line of edition: 34       უ̂ისიბ ი ბა̈დრი ქა̈̄თყახა̈̄ნხ ა̈მირანს ი ა̈გითე აჩა̈დხ. ა̈მირანდ ლა̈ჲბინე
Line of edition: 35    ლი̄ზი ი აშხუ̂ ა̈გის მინდუ̂ერისგა ჩუ ლუზუ̂ერ ლიხ ჯა̈რ ი ალ
Line of edition: 36    ჯა̈რისგა ხეჩდა ეშხუ ეჯჟი̄ნ კჷ̄ლთხი, ერე ალ ჯარისგა ჩი̄ს ჟი ხოსა̈რ
Line of edition: 37    ნაკლათხან. ლა̈ჲჭუ̂ედდა ა̈მირან ალ მა̄რე̄მიშს ი ხა̈̄ქუ̂ინხ, ერე
Page of edition: 98  Line of edition: 1    "ალ' ე̄სერ ჰა̈ნდრა̈̄ლები გეზალ ლი -- ჯინჯიქ". ქა̄ჩა̈დ ა̈მირან ალ მა̄რათექა
Line of edition: 2    ი ალ მა̄რე შიშდ ლა̈ხჭუ̂ედდა: -- იმ' ე̄სერ ხოჩდა?
Line of edition: 3       -- იმ' ე̄სერ ი ა̈მირანიშმჷყ. -- ა̈მირანდ ხა̈̄ქუ̂ინ.
Line of edition: 4       -- მა̈ჲ ესერ ხაზნა ღო ა̈მირანს?
Line of edition: 5       -- მა̈ჲ ესერ-ი მიჩა ცჴემა̈დს ესერ ჟი იბუ̄წე ი ჴარჴჩუ̄ნ იყერ ი
Line of edition: 6    ცხუ̂ი̄მი ნა̈კუ̂შუ̂ა̈რს [ესერ] ყიაჟი̄ნ ჟი ტჷხე.

Line of edition: 7       ამნე̄მ ჟი ლა̈ჲბუ̄წე ა̈მირანი ცჴემა̈დ, ჩუ იყერ ჴარჴჩუ̄ნ ი ცხუ̂ი̄მი
Line of edition: 8    ნა̈კუ̂შუ̂ა̈რ ჟი ა̈ნტიხ ყიაჟი̄ნ.
Line of edition: 9       -- სერ ესერ იმ იჩო-ი́?
Line of edition: 10       -- სერ ესერ იმ-ი́ ამეჩუ̄ნ მა̈̄ჲ მა̄რე ჩუ̂ა̈რი, ალამა̈გ მა̄რე ესერ ლახე
Line of edition: 11    აშხუ̂ თუ̂ეს იმა̄ჯუნიხ გურნა̈ლს ა̈მირანი გუ̂ამა̈რთეჟი̄ნ, ეჩას ესერ ჩი̄ს ქა
Line of edition: 12    შჷდე გა̈ნთე.
Line of edition: 13       -- ალას ესერ ჯაი ჩუ იჩო.

Line of edition: 14       ლახა̄რუნე ალ ხა̈ლხ ბაჩრე ლამა̄ჯას ი, აშხუ̂ თუ̂ეს მა̈̄ჲ მოშ ა̈ნმა̄ჯეხ,
Line of edition: 15    მა̈გ ჟ'ოთთილხ ტა̈ნჟი̄ნ. ალა ოდემ ჩიქა გა̈ნთე შჷდა, ეჩქად
Line of edition: 16    ა̈მირანდ ხა̈̄ქუ̂ინ: "ჩუ̄უ̂ ესერ ესღელდა, ეჯ' ე̄სერ მიჩა ლა̈კუ̂ჰა̄ლუ̂ნა
Line of edition: 17    ბა̈ჩს ჟი̄დ იქმე". ა̈ნკიდ ა̈მირანდ მიჩა ლა̈კუ̂ჰა̄ლუ̂ნა ბა̈ჩ ი ჟ'ესუ̂თილ
Line of edition: 18    გუ̂ამა̈რჟი̄ნ. ალ მა̄რე ალ ბა̈ჩს დეშ ოთგა̈ჭ ი ხა̈̄ქუ̂ინ, ერე
Line of edition: 19       -- ჟი̄უ̂ ესერ ოხუ̂კიდხ, ადო ქუ̂ინ ესერ ხო̄ზი.
Line of edition: 20       -- ო̄, დეშ ესერ ოთღორუ̂აჲა? ა̈მირან ესერ ჯა ლი ღო.
Line of edition: 21       -- მიჩა̈შდ ესერ ჩოთღორუ̂ა, მარე მიჩა ბაბას, ჰა̈ნდრა̈̄ლებს ესერ
Line of edition: 22    დეშ ოთღორუ̂ი სერთხი.
Line of edition: 23       -- ჯა̄უ̂ ლჷჭა̈თ ლი, მო̄დ ესერ აჩეს ეჩხა̄უ̂, მა̈̄ღენუ̂ა̈̄ჲ ესერ ამკა̈ლი
Line of edition: 24    ჰა̈ნდრა̈̄ლებ ლი.

Line of edition: 25       ესღრი, ესღრი ა̈მირან ი აშხუ̂ ა̈გის ეშდჲერუ უ̄ღუ̂ა ჴანა̈რ ხო̄ბხ
Line of edition: 26    სა̈უ̂ჩა̈უ̂დ. ამე̄სგა ჩუ̂აყუ̂რე ეშხუ მა̄რე, ჭიშხ ქა̄მენჩუ̄ნ ხორი, ი ეშ ოხთჷრი
Line of edition: 27    ი აშხუ̂ არშინს გიმს ქუცე.
Line of edition: 28       -- ჲა̈რ ესერ ლი ალა̄, ამე̄სგა მეყუ̂რე? -- ა̈მირან ლა̈ხჭუ̂ედდა.
Line of edition: 29       -- ალ' ე̄სერ ჰა̈ნდრა̈̄ლებ, ლეგდ ესერ ალჷრდე̄ლი დაგრან ესერ
Line of edition: 30    ხაყლუ̄ნი ი ჩუ̂ ესერ ლახე ა̈დდაგრი, ეჩქა ესერ სგა და̈̄რ მოშ ლჷმდა̈̄სგუ̂ინ
Line of edition: 31    სა̈უ̂ჩა̈უ̂თე̄სგა ი ხაყუ̂ლი̄ნნა ესერ ლჷდგარუნღო უშდღუ̂ად ლისედდ
Line of edition: 32    ი ათხ' ე̄სერ მიჩაუ̂შ ა̈მჩედ სა̈უ̂ჩა̈უ̂თე̄სგა ი ლჷჲარდ იშდღუ̂ი.
Line of edition: 33       -- ალ' ე̄სერ მა̈ჲ ლ'ა̄, ჭიშხ ეშ ხოთრი?
Line of edition: 34       -- ალ' ე̄სერ მიჩ ათსედა ქა̄მენჩუ̄ნ ი დეშ ესერ ოთხუ̂ჲა სგა̈̄ნჩუ̄ნ
Line of edition: 35    ი მე̄რმ' ე̄სერ და̈̄რ მოშ ხა̈წრე, ჰა̄უ̂ე სგა ჲა̈რდ მოშ ესდე სა̈უ̂ჩა̈უ̂თე̄სგა.

Line of edition: 36       ლოხუ̂რეკ ა̈მირანდ ცჴემდი გაფა ი სგო̄თკუ̂ა̈რ სა̈უ̂ჩა̈უ̂თე̄სგა.
Line of edition: 37       -- ჲა̈რ ესერ ლჷმა̈̄რ ალა̄, მიჩა ჭიშხი ამჟი̄ნ ჰალალდ მჷკედ?
Line of edition: 38    -- ლა̈ჲჭუ̂ედდა ჰა̈ნდრა̈̄ლებ.

Page of edition: 99 
Line of edition: 1       -- ალ' ე̄სერ ა̈მირან. -- ა̈მირანდ ესერ ჰე̄ჭო̄ლუ ლახწუ̂ე̄ნე.

Line of edition: 2       ა̈მირანდ ჟ'ა̈ნკიდ ჩე̄რხა ი ქა ლახწუ̂ე̄ნე. ჰა̈ნდრა̈̄ლებდ ლოხთჷლჷ̄რე
Line of edition: 3    ი ზუნა-ზუნად აფიშგ.
Line of edition: 4       -- ალ' ე̄სერ მა̄დ ლჷმა̈̄რე̄ლი ა̈მირანი ჰე̄ჭო̄ლ, ქა̄უ̂ ესერ ლახწუ̂ე̄ნე!

Line of edition: 5       ა̈მირანდ ჯიჰრა̈̄ ტყენჷდ ლახწუ̂ე̄ნე. ჰა̈ნდრა̈̄ლებდ ლოხთჷლჷ̄რე
Line of edition: 6    სგა ი ზუნა-ზუნად აფიშგ.
Line of edition: 7       -- ალ' ე̄სერი̄ დე̄სა ლჷმა̄რე̄ლი ა̈მირანი ჰე̄ჭო̄ლ. ქა̄უ̂ ესერ ლახწუ̂ე̄ნე,
Line of edition: 8    მა̄მ ესერ ხოჭირ ეჯღა.

Line of edition: 9       ა̈მირანდ ქა ლახწუ̂ე̄ნე მიჩა ჰე̄ჭა. ჰა̈ნდრა̈̄ლებ სგა ლოხგუდირდა
Line of edition: 10    ი ხა̈̄ქუ̂ინ: "ალ ქრისდე̄ თა̈̄სუ̂დებ ესერ მეკუ̂შე̄უ̂ ხა̄რ, ა̈მირან, ეშხუ ნიბა̄შნჷლ
Line of edition: 11    ესერ ათსედა, ეჯა ჟი მო̄დე ა̈ნუ̂ოჴრას!" აჩა̈დ ალა̄, ა̈მირან,
Line of edition: 12    ეჩი̄ ლათხე̄ლთე ი ჟი ა̈ნთხე ალა̄, ჰა̈ნდრა̈̄ლები ნიბა̈̄შნილ.

Line of edition: 13       აშხუ̂ ლადეღ აშხუ̂ ზუგუ̂ჟი̄ნ ჩუ სგურდახ ი ა̈მირანს ჩუ̂ა̈თუ̄ჟდა ამი̄
Line of edition: 14    ღულა̈̄რჟი̄ნ. ამელექუ̂ა სემი გუ̂ელჲა̈რშაპა̈რ ანჴა̈დხ ი ალ ჭაბიკუ̂დ
Line of edition: 15    ალჲა̈რს თხუმა̈რ უშხუ̂ა̄რ ლოხხჷპჷ̄რე, ჰაკუ̂და̈რ უშხუ̂ა̄რ ლოხცხჷპჷ̄რე
Line of edition: 16    ი ჟ'ესუ̂რეკ მეგა̈მჟი̄ნ. ჟ'ანჲა̈ცხ ა̈მირან ი ალ ჭაბიკუ̂ მუხუ̂ჭიდ ესხუ̂ი̄დ.
Line of edition: 17       -- იმნა̈რ ესერ ხუჭე? -- ლა̈ხჭუ̂ედდა ა̈მირან. -- დე̄მნა̈რ ესერ.
Line of edition: 18       -- ხადე̄ნ' ე̄სერ ჲა̈რ ამელექუ̂ა? -- და̈̄რ ესერ. სემი კიტუ̄ლა̈რ ესერ ა̈მჴედხ
Line of edition: 19    ი თხუმა̈რ ესერ უშხუ̂ა̄რდ ლოხხჷპჷ̄რა ი ჟ'ესუ̂რეკა მეგა̈მჟი̄ნ.

Line of edition: 20       ა̈ნწუ̂ე̄ნე ა̈მირანდ ი გუ̂ელჲა̈რშაპა̈რდ ერ ადცხირე, ლახლო̄ნდა.
Line of edition: 21       -- ალას ესერ ჯა ჩოთურტყუ̂ა ი ალას-ა, მიჩა ლერდი ჭაბიკუ̂ს ესერ
Line of edition: 22    ჩოთდაგრა. ათხანეშ ესერ ლახე ალას ამჟი̄ნ ჴამშა ხუღუ̂ა, ჟ'ესერ
Line of edition: 23    ა̈ნცხემნე, ეჩქ' ე̄სერ მიჩ ჩუ დე̄მ ა̈თწინია? -- ა̈მირანდ ხა̈̄ქუ̂ინ: -- ათხ'
Line of edition: 24    ე̄სერ ლიცჴემდა̈̄ლუ ახა̄დხ, ქა̄უ̂ ესერ აჩა̈დ ი ნიშა̈ნუ ადგე!

Line of edition: 25       ალ ჭაბიკუ̂ ნიშა̈ნ ლაგა̈მთე ერ ესღჷრდა, ა̈მირანდ უ̂ეშგინისგა
Line of edition: 26    ცჴემა̈დ ხაჴიდ ი ჩუ̂ადგა̈რ.

Line of edition: 27       ა̈მირანს ათხე სემი ქრისდე̄ თა̈̄სუ̂დებ ჩოთკუ̂ა̈შ ი მიჩა ლა̈გნა გიმდი
Line of edition: 28    ესუ̂ქა̈დ, ჟიბაუ̂იშ ჩუბაუ̂ ხეყა̈რ ი ჩუბაუ̂იშ -- ჟიბაუ̂ ი ჯაი̄ სგა̈̄თნახა̈̄ნ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.