TITUS
Svan Prose Texts I (Upper Bal)
Part No. 68
Previous part

Text: 75 
Page of edition: 99 
Line of edition: 29 
75. სულასახელ


Line of edition: 30       არდა ეშხუ ხელწიფ, ხორდა ეშხუ ხეხუ̂, ეშხუ ჭყინტგეზალ. ალა
Line of edition: 31    ლეგდ ა̈დჷრდა, ხელწიფ. ხა̈̄ქუ̂ მიჩა ხეხუ̂ს: "მიშგუ ხეხუ̂, მ'ათხე ჩუ
Line of edition: 32    ხუ̂იდგა̈რი ი გუშგუ̂ეჲ გეზალ კოტო̄ლ ლი, ქა̄თქა̄ბუ̈ნ მე̄რმა ხელწიფთე,
Line of edition: 33    ადო მი ლახ ჩუ̂ა̈თუ̂დაგრი, ეჩქა გუ̂ი ხექუ̂ცენი". ქა̄თქა̄ბუ̂ნეხ გეზალ
Line of edition: 34    მე̄რმა ხელწიფთე, ეჩქა ალა ჩუ̂ადგან. ა̈გის ლაშდღუ̂ა̄ლ ათყერხ. ჲერუ
Line of edition: 35    ზა̈ჲ ქა̄ჩა̈დ, ეჩქა ბეფშუ̂ ა̈გით' ა̄ნჴიდხ. ბეფშუ̂ ა̈ხთხა̄ლ მიჩა მუს:
Line of edition: 36       -- მამა როქ იმ' ა̈̄რი? -- ეჯა როქ ჩუ̂ალდაგა̈რ.

Page of edition: 100 
Line of edition: 1       ჟ'ა̈ნწახუ̂ა̈̄ნ ბეფშუ̂, ლიჯგრი ხაყერ. ჟ'აჩა̈დ მინე ჟიქა̄ნ ზუგუ̂თე,
Line of edition: 2    ჲერუ ნაბა̈დ ლა̄ჲე, ჩუ̂ადყურდა. ანჴა̈დ კუ̂ინჩ, ხა̈̄ქუ̂ ეჯნე̄მ, კუ̂ინჩდ:
Line of edition: 3    "ჭაბუ̈გუ̂, სულასახელ ხაჲშხა დი̄ნას. ეჯა უ̂ოდე ხეხუ̂დ დო ანჴჷდა,
Line of edition: 4    ეჩქად ლიშუ̂ემ ნო̄საუ̂ ჯა̄რ!"

Line of edition: 5       ჟ'ანჷ̄გა̈ნ, ისგი̄დრა̈̄ლ ჩი̄თე, და̈̄ს ხეწა̈დ. აჯაღ ჩუ̂ადყურდა. აჯაღ
Line of edition: 6    კუ̂ინჩდ ამჟი̄ნ ხა̈̄ქუ̂. ჟ'ანჷ̄გა̈ნჷდ, ქა̄დტჷბნე, სტა̄რინ ა̈დირ, ჩუ̂აჩა̈დ
Line of edition: 7    ქორთე, მიჩა დის ხა̈̄ქუ̂: "მიშგუ დი, ლა̈დი ზუგუ̂ჟი მა̈̄ქუ̂ხ, ერე სულასახელ
Line of edition: 8    ესერ ხაჲშხა. ეჯა ხეხუ̂დ უ̂ოდე როქ დო ონჴუდე, ეჩქად ლიშუ̂ემ
Line of edition: 9    როქ ნო̄მაუ̂ მა̄რ!"

Line of edition: 10       ადზჷზეხ ჲეშდ ლჷჩა̈̄ჟ, ჲეშდ ქუ̂ეით ლათხა̈̄ლთე ეჩი̄შ. ჟ'ა̈თლაკხ
Line of edition: 11    ეჩი̄ ქორს. ეჩას ხოშა ჲეზო ხუღუ̂ა, გირკიდ ხოშა ციბ ხაცხიპ, სპილენჯიშ
Line of edition: 12    ყო̄რა̈ლ ხოწიბხ. სგა ლახა̄გა̈ნხ ყო̄რს. ყო̄რა̈ლდ გა̈რგლა
Line of edition: 13    ოთბინეხ: "სგა როქ ნჷმა ანჴედ, ადო ლჷჲა̈რ ქა და̈̄რ მეტეხ!" ეში̄
Line of edition: 14    სგა̄ჩა̈დხ ქორთე. სულასახელ უ̂ოქუ̂რა̈ ჰაკუ̂ა̈ნისგა აყუ̂რე, აქა̈̄ნი ოხუ̂კიდ
Line of edition: 15    ალჲა̈რს: "სგა̈ჲ როქ ლა̈ნჴა̈დდ შუ̂იდებდ. ჩუ როქ მიხალ, ერე მიშგუ̂ათე
Line of edition: 16    მეჴედ ხიშდ სგა̈ჲ, მარე ჰე მოშ სამ ამბა̈უ̂ს ქა მა̈̄ქუ̂ი̄სგუ̂ნედ,
Line of edition: 17    ეჩქა ისგუ̂ეჲ თელღჷრა ხუ̂ი̄რა, ჰე დოშ, ეჩქა მჷხა̈რ ჩი̄ ჩუ ჯადგა̈რი!"
Line of edition: 18    ალჲა̈რდ ეშხუ ამბა̈უ̂ი დეშ ახა̈̄ქუ̂ი̄სგუ̂ნეხ. მე̄რმა ლადეღ მა̈გ ჩუ̂ადგა̈რ
Line of edition: 19    ალჲა̈რ, ა̈გითე და̈̄რ ლა̈ხტა̈ხ ხელწიფი გეზალს.

Line of edition: 20       აჯაღ ჲერუ̂ეშდ ლჷჩა̈̄ჟ, ჲერუ̂ეშდ ქუ̂ეით ადზჷზე. აჩა̈დხ ეჯჲა̈რ,
Line of edition: 21    ყო̄რს ლახა̄გა̈ნხ. ყო̄რა̈ლდ აჯაღ ხა̈̄ქუ̂ხ: "სგა როქ ნჷმა ანჴედ, ადო
Line of edition: 22    ქა ლჷჲა̈რ და̈̄რ მეტეხ!" სგა̄ჩა̈დხ ეში̄. სულასახელდ აქა̈̄ნი ოხუ̂კიდ:
Line of edition: 23    "ჩუ როქ მიხა, მიშგუ̂ათე მეჴდე ხიშდ. სამ ამბა̈უ̂ს ჰე მოშ როქ ამა̈̄ქუ̂ი̄სგუ̂ნიდ,
Line of edition: 24    ისგუ̂ეჲ თელღჷრა ხუ̂ი̄რა, ჰე დოშ, მჷხა̈რ ჩი̄ ჩუ ჯადგა̈რი!"
Line of edition: 25    ეშხუ ამბა̈უ̂ი დეშ ახა̈̄ქუ̂ი̄სგუ̂ნეხ. მე̄რმა ლადეღ მა̈გ ჩუ̂ადგა̈რ.

Line of edition: 26       ხელწიფი გეზალ ხოღლი ა̈გის, და̈̄რ ლა̈ხტა̈ხ. ა̈ნმა̄რა̈̄ნ თხუმშუ̂ ჯა,
Line of edition: 27    სემეშდ ლჷჩა̈̄ჟ ლა̈ჲჴერნე, სემეშდ ქუ̂ეით, უ̂ოქუ̂რა̈ კოლეფ ჯიბთ'
Line of edition: 28    ე̄სდე, აჩა̈დ, სგა ლახა̄გა̈ნ ყო̄რა̈ლს. ყო̄რა̈ლ ქორთე დემ იხნიხ: "ცოდ
Line of edition: 29    როქ ხი ლედგა̈რიდ ი ნო̄მ' ა̄ნჴე!" ეჯა მა̄მა ლა̈ჲშგედ ი ქორთ'
Line of edition: 30    ა̄ჩა̈დ. სულასახელდ ხოჩა ლადეღ ოხმა̈ზრე. "ხიად, ხოჩა ჭაბუ̈გუ̂, მიშგუ̂ათე
Line of edition: 31    როქ მეჴედ ხი, აშ როქ მიხალ, მარე სამ ამბა̈უ̂ს ჰე დოშ ამა̈̄ქუ̂ინი,
Line of edition: 32    ეჩქა ისგუ ხეხუ̂ მა̄მა ხუ̂ი̄რი ი სგა̈ჲ ჩი̄ ჩუ ჯადგა̈რი!" ათხე
Line of edition: 33    ხოლა გუ̂ი ლოხო̄სდ ჭაბუ̈კუ̂ს, ადჭკუ̄რე: "ამჷნ ხოშა უ̂ეშგიმპილი
Line of edition: 34    ლადეღ შომა როქ მე̄რა!" ჟ'ა̈ნკიდ ჯიბხა̈ნჟი უ̂ოქუ̂რა̈ კოლეფ ი ჩუ̂ადკარე.
Line of edition: 35    ქა̄ნსკინე ამხა̈ნქა მურგუ̂ა̈ლ სტოლდ. ეჩქანღო ქა̄დ ანსკინე სანთელდ,
Line of edition: 36    სტოლჟი ჩუ̂ესჷ̄გა̈ნ. ეჩქანღო ქა̄დ ანსკინე წჷრნი უ̂ისგუ̂დ,
Line of edition: 37    სტოლთეჟი̄ნ აჩა̈დ. ათხე ლა̈̄ქუ̂ სტოლდ: -- იმ როქ აჭკუ̂ა̈რიხ: ჭაბუ̈გუ̂ს
Line of edition: 38    როქ ხეხუ̂ ხაკუჩ, სულასახელს -- ლიწუ̂ი̄ლა̈̄ლ. ახა̄მბუ̂ედ როქ მა!

Page of edition: 101 
Line of edition: 1       -- ჲაღო́ როქ, მი ლა̈̄ქუ̂ნი: ეშხუ გზა̄უ̂რა̈ლ ესღჷრდახ ჯუ̂ე̄დია
Line of edition: 2    შუკუ̂ს ი ლეწფა̈რისგა ჩუ̂ა̈თბურა̈̄ნხ: ეშხუ ბაპ ლა̈სუ̂, მე̄რმე უ̂ოსტა̈ტ,
Line of edition: 3    მესმე თერზ. ბაპ ი თერზ ჩუ̂ა̈დუ̄ჟდახ, უ̂ოსტა̈ტდ მა̄რე̄მი ნახა̈ზ ანტა̄ბე.
Line of edition: 4    ჩუ̂ადყურდა. ეჩქა თერზ ანჷ̄გა̈ნ ი ათსაკუ̂რა̈ლჷნ: მა̄რე ხოხალდა.
Line of edition: 5    ლახა̄დ ლერქუ̂ა̈ლს ი ჟ'ოხშხებ მა̈გ ი სგა ლახქუ̂ე. ეჩქა თერზ ჩუ̂ადყურდა
Line of edition: 6    ი ბაპ ჟ'ანჷ̄გა̈ნ. ბაპს ჰა̈დურდ ხოშა ხასკუ̂რელ: მა̄რე ხოხა, ხაგჷრგა̈ლი,
Line of edition: 7    ჰერ მა̄მა ლახტიხ. ეჩქა ადჭკუ̄რე: "ალას როქ ალჲა̈რ ანსყე̄ნახ,
Line of edition: 8    მიშგუ აფხნეგა̈რ, მი გა̈რგლას ხუ̂ათუ̂რი ალას". ჟ'ანჷ̄გა̈ნხ
Line of edition: 9    მა̈გ ალჲა̈რ ი ბა̄ზი მინე ნამშაუ̂ -- მე̄უ̂შთხუ̂ე აფხნეგ სგა ხონჴრიხ.

Line of edition: 10       ათხე ხა̈̄ქუ̂ხ: -- ხიად, სულასახელ, ნა̈ჲ მა̄მა ნიხა ი სი ლე̄ქა: ჲა̈ს
Line of edition: 11    ხეხუ̂ა მუხუ̂ბად, ჲედე ნა̈̄თიდ მე̄შთხუ̂ე მა̄რე?
Line of edition: 12       -- ჲაღო, ეშხუ ამბა̈უ̂ ქა ლი̄ქუ̂ მა̈̄ც: ეჯა უ̂ოსტა̈ტს ხეხუ̂ა.

Line of edition: 13       ათხე უ̂ისგუ̂ ა̄მბუ̂ი: -- სემი მუშგუ̂რა̈ლ მირდა: ეშხუ ა̈ქიმ, მე̄რმე
Line of edition: 14    მეცა̈რ (მეთერ), მესმე აფსა̄სდა̈ გეზალ. ჟ'ანჷ̄გა̈ნ ძინა̈რს მეცა̈რ, ეჯნემ
Line of edition: 15    ლა̈̄ქუ̂: "აშხუ̂ სოფელს ესერ ალდაგა̈რ საუკეთესო ხოჩა მა̄რე. ეჯ
Line of edition: 16    ბედჟი ქუ̂ეყანა ესერ თხუმ ადგა̈რი ეჩი̄ მატკლა̈ბშუ̂". ეჩქა ა̈ქიმდ ლა̈̄ქუ̂:
Line of edition: 17    "ეჯას მიშგუ̂ა ჟაგა̈რს ლახე ჲა̈რ ათცუ̂ემნე, შიშდ ჟი̄სე̄ლუ̂ი". ეჩქა
Line of edition: 18    აფსა̄სდა̈ გეზალდ ხა̈̄ქუ̂: "ეჯას შიშდ ეჩაუ̂ ოთხუ̂ი. ჲეშდჲარუ̂ ზაუ̂ჲა̈
Line of edition: 19    ლე̄ზი ხო̄ზი, სამ საათისგა ეჩაუ̂ ოთხუ̂ი" ქა ლახუ̂ე̄მხ ჟაგა̈რ ი ადჲე
Line of edition: 20    აფსა̄სდა̈ გეზალდ. ქორისგა კუბ ჟ'ა̈ნკიდხ, ლაჴუ̂ა̈მთე ქა ლია̄ლუ̂ ეჩეჩუ
Line of edition: 21    ესხუ̂ი̄დ აფსა̄სდა̈ გეზალ. ჰა̈დურდ ქუ̂ეყანა ალას ახჭიმ ლა̈კი̄ლუშ
Line of edition: 22    ი ჩუ̂ათქუ̂იცუ̂ნე ჩი̄ ლიგუ̂ნი: "ალას მი ჟი ხუ̂ასე̄ლუ̂ე!" ჩუ̂ესგეხ კუბ,
Line of edition: 23    ამნემ ჟ'ახტყიც ჟიბე ბეჰ ი ათცუ̂ემ ჟაგა̈რ ი ჟი ლა̄პა̈რ შიშდ კუბისგა,
Line of edition: 24    თე̄რა̈ლს იბრი̄ნგუ̂ე: "მა̈ჲ როქ ხუ̂ა̈ჲ მიუ̂ჟა? " ათხე, ხიად, სულასახელ,
Line of edition: 25    ალა იშა ნასა̈̄ლუ̂ ი̄რა, ჲა̈ს ხეკუთნი? ნა̈ჲ დეშ ხუ̂ეხუ̂ად.
Line of edition: 26       -- მე̄რმე ანბა̈უ̂ ათხე მი̄ქუ̂ე̄ნს: აფსა̄სდა̈ გეზალს ხეკუთნი: ეჯნემ
Line of edition: 27    როქ ადჲე ჟაგა̈რ ეჩაუ̂ ი ეჩას ხეკუთნი.

Line of edition: 28       ათხე ა̄მბუ̂ი გამოცანას (\\ მა̈ჲმოშს) სამთელ (\\ ლეტუ̂რე): -- ეშხუ ხეხუ̂-ჭა̈შ
Line of edition: 29    ესღჷრდახ ხეხუ̂მი ლამუ̂ართე. ხეხუ̂ ღანაუ̂ ლა̈სუ̂, შუკუ̂ჟი ლიღუ̂ჟა̈̄ლ ა̈ნბინე.
Line of edition: 30    ა̈გი ჯუ̂ე̄დიას ლა̈სუ̂ ი ლემესგ მა̄მა ხუღუ̂ა̈̄ნხ. მიჩა ჭა̈შ უ̂ეშგდ
Line of edition: 31    ატა̈ხ მიჩა ქორთე. ალას შუკუ̂ისგა ა̈ბრეგა̈ლ ესხუ̂ი̄დხ. ა̈ბრეგა̈ლი
Line of edition: 32    ჩუ̂ადგა̈რ, ჯაჲ ჩუ̂ადგა̈რხ. მიჩა ხეხუ̂ ჩუ̂ა̈დღუ̂აჟ, ჭყინტ ანთენე ი კალთა̈ჲს
Line of edition: 33    ლა̈ჲჭუ̂ე̄ნ ი უ̂ეშგდ ანტა̈ხ, იმუ̂ა̈̄ჲთე მიჩა ჭა̈შ აჩა̈დ. ჟ'ა̈თლაკ შუკუ̂ისგა
Line of edition: 34    სამ ლჷდგა̈რს. მიჩა ჭა̈შმი ტა̈ნ ჩუ̂ათირ ი თხუ̂იმ დეშ. ჟ'ა̈ნკიდ
Line of edition: 35    ეშხუ თხუ̂იმ, სგა ლახლა̈წ მიჩა ჭა̈შმი ტა̈ნს: "ღე̄რბეთ, ჰემა ჯიჟინდე̄დ,
Line of edition: 36    ღო ალ თხუ̂იმ ალ ტა̈ნს სგა ლა̄ხალჯ ი ჟ'ახსე̄ლა̈უ̂!" ი ჟ'ა̈ნსე̄ლუ̂ა̈̄ნ
Line of edition: 37    ალ მა̄რე. ტა̈ნ ზურა̄ლს ხეჴლარა̈̄ლ ი თხუ̂იმ გა̈ნთე ხუღუ̂ა.

Page of edition: 102  Line of edition: 1    ხიად, სულასახელ, ნა̈ჲ დეშ ხუ̂ათერდ: ხეხუ̂ ტა̈ნს ხეხუ̂ა, ჰა თხუ̂იმს?
Line of edition: 2       -- ხიად, მიშგუ ჭა̈შ ჭაბუ̈გუ̂, ისგუ̂ეჲ ხუ̂ი ხეხუ̂. იმუ̂ა̈̄ჲ გუ̂ი აყუ̂რე,
Line of edition: 3    ეჩას ხეკუთნი: ტა̈ნს ხეხუ̂ა ხეხუ̂.

Line of edition: 4       ჟ'ანჷ̄გა̈ნ ჰაკუ̂ა̈ნხა̈ნჟი,სგა ლახსგურდა მიჩა ჭა̈შს. ჭაბუ̈გუ̂ მუხუ̂ჭიდ ა̈რი.
Line of edition: 5       -- ათხად მიშგუ თხუ̂იმ ჯეკუ̂ა̈დ, ათხე იმნა̈რ ხუჭე?
Line of edition: 6       -- იმნა̈რ-ი უკანასკნელ მა̄რა̈̄ლს დე̄სამა ხეხჷრჯა̈უ̂იხ მი უსგუ̂ა̈̄შდ
Line of edition: 7    მა̄რე ა̈მქარუ̂ა̈̄ნ ისგუ̂ა ლათხე̄ლისგა!
Line of edition: 8       -- ეჯღა ნო̄მის ხუჭე, ეჯჲა̈რს ჟ'ალსე̄ლუ̂იდ!

Line of edition: 9       ჟ'ანჷ̄გა̈ნ სულასახელ ი მა̈გ ჟ'ანსე̄ლუ̂ე. ქუ̂ერწილ აჩუ̂მინხ ეჯკა̈ლიბ,
Line of edition: 10    ერე მუწუ̄ლა̈ ლჷჯეჲ ხუ̂ა̈ჲ ხუღუ̂ა̈̄ნხ. ეჩქანღო აჩა̈დხ მინე ქორთე, ეჩჷნ
Line of edition: 11    ხოჩა ქუ̂ერწილ ამე ჩუ̂ემინ.

Line of edition: 12       ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.