TITUS
Svan Prose Texts I (Upper Bal)
Part No. 69
Previous part

Text: 76 
Page of edition: 102 
Line of edition: 13 
76. მეთერ ი სემი ლახუ̂ბა


Line of edition: 14       ლჷმზჷრე̄უ̂ ხი ი სემი ლახუ̂ბა. აჩა̈დხ ალჲა̈რ მინდო̈რთე. უ̂ოქუ̂რა̈
Line of edition: 15    ბუ̈ლთ ხუღუ̂ა̈̄ნხ ი იბუ̄ლთა̄ლდახ მინდო̈რისგა. ქა ხა̈სრა ხოხუ̂რა მუხუ̂ბე,
Line of edition: 16    ეჯა ხაუ̂შგა̈დჷნდახ ხოშა̄მ ლახუ̂ბას. ეჩქა ანჴა̈დ ხოხუ̂რა მუხუ̂ბე ი
Line of edition: 17    ბუ̈ლთ ჩუ̂ადქარუ̂ე. ეჩქა ლიქუ̂თერ ლახბჷრლეხ. ეჯნემ მორდაბშუ̂ ათპა̈ჟუ̂ნე
Line of edition: 18    ჩუ ბუ̈ლთ. მიჩა ლახუ̂ბად ხა̈̄ქუ̂ხ: "მეთერთეუ̂ (\\ მელთერთეუ̂)
Line of edition: 19    ესერ აჩა̈დხ: ჲა̈სუ ესერ ხუღუ̂ე̄ნხ ნა̈ქუ̂თა̈რ ბუ̈ლთ?" აჩა̈დხ გაცხა̈ჲდ
Line of edition: 20    მეთერთე, სგა ლა̈ხმუშგუ̂არხ ხელწიფს. მეთერი̄ ალა ლი, ალ ხელწიფ.
Line of edition: 21    ხელწიფდ მე̄უ̂არ ა̈დხი̄დე ალჲარე ლიმშგუ̂არა̈̄ლ. მიჩა მეჯო̈გს ხა̈̄ქუ̂:
Line of edition: 22    "მაჩე̄ნე დალისუ̂ მა̈̄ჲ ხორდე̄დს, ეჯაუ̂ როქ ოხჴიდ ბა̄ზი". მჷმრა̈ნს
Line of edition: 23    ხა̈̄ქუ̂: "მაჩე̄ნე ტკეც, მაჩე̄ნე ღუ̂ინა̈ლ, მა̈̄ჲ ჯი̄გდე̄დს, ეჯ' ა̄ხა̈ჲ ბა̄ზი".
Line of edition: 24    მეჯო̈გდ ანჴიდ მაჩე̄ნე დალისუ̂, მომრა̈ნდ ანჴიდ მაჩე̄ნე ღუ̂ინა̈ლ. ჟ'ანმა̄რეხ
Line of edition: 25    ხოჩა უ̂ოხშა̈მ. ეჩქა მაშე̄ნა მუხუ̂ბად ლა̈̄ქუ̂: "მა̈ჲ ეზერ გა̈მა̈შ ლი
Line of edition: 26    ბა̄ზი̄ ლეღუ̂, მარე ჟეღი ლისუ̂ი გა̈მ ხა̄რ". ეჩჷნღო ნე̄სგა̄ მუხუ̂ბედ
Line of edition: 27    ლა̈̄ქუ̂: "ხოჩა გა̈მა̈შ ღუ̂ინა̈ლ ლი მარე მა̄რე̄მი ზისხი გა̈მ ხა̄რ". ეჩქა
Line of edition: 28    ხოხუ̂რა მუხუ̂ბად ლა̈̄ქუ̂: "ხოჩაჲ ხელწიფ [ლი], მარე მიჩა მამა̈̄ გეზალ
Line of edition: 29    მა̄მა ლი". ეჩქას ხელწიფ ჩუ̂ა̈დხუჭა̈̄ნ, ჟ'ანჷ̄გა̈ნ ი ლა̈ხჭუ̂ედდა მეჯო̈გს:
Line of edition: 30       -- მა̈ჲ როქ ოთძიჰა ბა̄ზი?
Line of edition: 31       -- მა̈ჲ-ი აშხუ̂ ღოლჲა̄ქდ სემი ჟინაღ ანთენე, სემი დეშ ა̈ნჷრდე,
Line of edition: 32    მე̄სმე ჯუას ლო̄ხუ̂ა̈ჭმ, ეჩას მაჩე̄ნე ა̈ხფას ი ეჯა ოძიჰ ბა̄ზი.

Line of edition: 33       ათხე მჷმრა̈ნს ლა̈ხჭუ̂ედდა: -- ღუ̂ინა̈ლს ზისხი გა̈მ იმნა̈რ როქ ხა̄რ?

Line of edition: 34       მომრა̈ნდ ხა̈̄ქუ̂: -- ტკეცა̈რ ლა̈კი̄მბჟი ხანჯა̈რ ა̈მშყა̈დ უ̂ერჩხხა̈ნქა,
Line of edition: 35    ეჯა ჭჷშხჟი მია̈ხ, ეჩქა ზისხ ა̈მწურდა ი ეჯა ტკეცთე აბჷ̄დ ი ეჯღა
Line of edition: 36    ხერო̄ლ ზისხი გა̈მ.

Page of edition: 103 
Line of edition: 1       ეჩქა ხელწიფ მიჩა დითე აჩა̈დ: -- დედე, იშა გეზალ ხუ̂ი: მიშგუ̂ა

Line of edition: 2       მუე̄ გეზალ ხუ̂ი, ჰა მე̄რმე̄მიშ?
Line of edition: 3       -- მა̈ჲ როქ ა̈თიკუ̂ჰ ისგუ̂ა მუე̄შ?
Line of edition: 4       -- დე̄სა[მა] როქ. ქა მე̄ქა, ადო ჩუ ჯადგა̈რი!
Line of edition: 5       -- ჲაღო, ისგუ̂ა მუდ ხოჩა მიჩა უ̂ა̈ზირ ლა̈სუ̂ ი ეჩი̄ გეზალ ხი.

Line of edition: 6       ათხე ქა̄ჩა̈დ მუშგუ̂რა̈ლთე ი ლა̈ხჭუ̂ედდა: -- შუკუ̂ჟი როქ ჯა̈ხუ̂იე̄ნახ ჲა̈რ?
Line of edition: 7       -- ქა როქ და̈̄ს ხუ̂ეწა̈დდ, ნა̄ზუ̂ ლა̈სუ̂ ლჷლა̈̄ბ ჩა̈̄ჟიშ, ღანაუ̂ ზურა̄ლა̈შ.
Line of edition: 8    ეჯ ჩა̈̄ჟს ხა̈ცუ̂მე̄ნა აშხუ̂ხა̈ნჩუ ზეთ, მე̄რმახანჩუ თუ̂ი.
Line of edition: 9       -- იმნოშ ლახთირდ, ჰე ჩუ მო̄მა ჯიწუ̂ახ?
Line of edition: 10       -- იმნოშ ი იმუ̂ა̈̄ჲხა̈ნ თუ̂ი ხა̈̄ცუდა, ეჩხა̈ნ ბუზუ̄ლა̈რ ესჭიმდახ
Line of edition: 11    შუკუ̂ს ი მე̄რმახა̈ნ -- მჷრშკა̈ლ.
Line of edition: 12       -- ღანაუ̂ ზურა̄ლ იმნოშ ათცხირედ?
Line of edition: 13       -- იმნოშ-ი ჭალა̈ჲთეჩუ ა̈მჩედ ი ლიც ლოხუ̂შა, ეჩქა ჴა̈დი ნაზიმ
Line of edition: 14    ქუ̂იშაჟი ჟ'ესუ̂გენა.

Line of edition: 15       ეჩქა ხელწიფ ლა̈ხჭუ̂ედდა ალჲა̈რს: -- მა̈ჲ როქ ჯაწჷხხ სგა̈ჲ?
Line of edition: 16       -- ნა̈ჲ ბუ̈ლთ ა̈ნქარუ̂ა̈̄ნ ი მა̈გ უშხუ̂ა̄რ ხუ̂აბრა̈ლიდ ი ჲა̈ს ნეღუ̂ე̄ნი?
Line of edition: 17       -- სგა̈ჲ მიშგუ̂ან ხოჩა მეთერ ხიშდ ი ბუ̈ლთ ხოხუ̂რა̄მ მუხუ̂ბა
Line of edition: 18    ხუღუ̂ა.

Line of edition: 19       მადლობა (\\ მაჴუ̂ა̄მ) ხა̈̄ქუ̂ხ ალჲა̈რდ ი აჩა̈დხ ა̈გითე ი ა̈გის ბუ̈ლთ
Line of edition: 20    ქა ლა̈ჲკუ̂იშ ხოხუ̂რა̄მ მუხუ̂ბად. ეჩქა ლახუ̂ბად სანდრო̈უ̂ ხა̈̄ქუ̂ხ, მარე
Line of edition: 21    ხოხუ̂რა̄მდ პასუ̈ხ ლახტიხ: "ლაბუ̄ლთა̄ლს ქა̄ჯა̈სრ ი ჯაუ̂შგა̈დჷნხ ეჯა
Line of edition: 22    ი ეჯღა ჩუ̂ემნ ალა. დე̄სამა ა̈გუ̂და̄უ̂შა̈̄ნ ეჯღა, ამბუ̂ა̈რ ა̈ლმეჴრედ მე̄რმე,
Line of edition: 23    ეჩჷნქა".

Line of edition: 24       ხინ ამეჩუ ა̈მჴი̄და, ჭირ ეჩხაუ̂ ა̈გუ̂ია. ლჷმზჷრე̄უ̂ ხიშდ ამეჩუ მერდე
Line of edition: 25    მა̈გ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.