TITUS
Svan Prose Texts I (Upper Bal)
Part No. 70
Previous part

Text: 77 
Page of edition: 103 
Line of edition: 26 
77. უჩი̄ჟა ლახუ̂ბა


Line of edition: 27       [ლჷმზჷრე̄უ̂ ხი ი სემი ლახუ̂ბა]. ალჲა̈რ მა̈გ უჩი̄ჟა ლიხ. მეჩი მუ
Line of edition: 28    ხორიხ. აჩა̈დ მაშე̄ნე მუხუ̂ბე ყო̄რქა, ხეწა̈დ აშხუ̂ დი̄ნას ი სგა̄ნჴა̈დ
Line of edition: 29    ქორთე, მიჩა მუს ხა̈̄ქუ̂ინ: "მამა, ქა ლოქ ამჩი̄ჟ!" ათხე მანე̄სგრე მუხუ̂ბეჲ
Line of edition: 30    აჩა̈დ ქა̈̄მთე. ალაი ხეწა̈დ დი̄ნას, ამნემი ხაშგუ̂მინ მიჩა მუს ლიჩი̄ჟა̈̄ლ.
Line of edition: 31    მაჰუ̂რე̄ნე მუხუ̂ბე -- ალაი აჩა̈დ ქა̈̄მთე, ალაი ქა ხეწა̈დ დი̄ნას,
Line of edition: 32    ამნემი ხაშგუ̂მინ ლიჩი̄ჟა̈̄ლ. მინე მუ იმედს ხაყლე ლიჩი̄ჟა̄ლეშ: "მინეშუ
Line of edition: 33    მა̈ზიგ ლახჴედა, მა̈ჲ ესერ ი̄რა მიზეზ, დო̄მ ადჩი̄ჟი". ლა̈ხჭუ̂ედდა:
Line of edition: 34    "ჲა̈რ ესერ ხაკუხ? " ხა̈̄ქუ̂ინ მაშე̄ნა მუხუ̂ბად, ღო მანე̄სგრად ი ღო მაჰუ̂რე̄ნად:
Line of edition: 35    ჩი̄ ეშხუ დი̄ნა ა̈თმარჯუნხ. ამეჟი მინე მუდ ხა̈̄ქუ̂ინ: "მამა̄შუ,
Page of edition: 104  Line of edition: 1    მა̈გ ლოქ აშხუ̂ დი̄ნას იშგუ̂ემხ, ჩი̄ ლოქ დეშ ხა̄რხ ეჯა. ეჯა ლოქ
Line of edition: 2    ხა̈ჩო აშხუ̂ გუ̂ეშს, ლაღუ̂ჭართე ადზჷზი. ჲერუ̂ა̈̄ჲ მაჩე̄ნა ნაღუ̂ჭარს
Line of edition: 3    ა̈ნჴდეხ, ეჯას ესერ ოთყედნი ეჯ დი̄ნას". ქა ლახუ̂ე̄მ თუ̂ით ჰუ̈ლ ლჷლა̈̄ბ
Line of edition: 4    ოქუ̂რშუ̂ ი უ̂ერცხლშუ̂: თუ̂ით ცა̈ლ ოქუ̂რშუ̂, თუ̂ით უ̂ერცხლშუ̂.

Line of edition: 5       აჩა̈დხ ალ სემი ლახუ̂ბა აშხუ̂ სამ შუკუ̂ ლაჭართეჲსგა, ამეჩუ ჩუ̂ა̈დყულუ̄რა̈̄ნხ.
Line of edition: 6    მაშე̄ნე მუხუ̂ბე აჩა̈დ აშხუ̂თე, მანე̄სგრე -- მე̄რმათე, მაჰუ̂რე̄ნე -- მესმათე.
Line of edition: 7    ათა̄სდ აშხუ̂ ა̈გის მაშე̄ნე მუხუ̂ბე დუქნა̈რს. ამეჩუ ა̈ნყიდ
Line of edition: 8    რა̈შ ეჯკა̈ლი, ერე დეც მე̄ფხაქა იპე̄რია̄ლ. მანე̄სგრე მუხუ̂ბე -- ალაი
Line of edition: 9    ათა̄სდ დუქნა̈რს. ამნემ ა̈ნყიდ სა̈რკ ეჯკა̈ლიბ, ერე გიმეშ ი დეცე
Line of edition: 10    ნე̄სგა ნე̄სყე̄მი ზუმ ჩუ მ' ა̈̄რი, ჩი̄ სგუ̂ებინჩუ ხოგნე მა̄რა. მაჰუ̂რე̄ნე
Line of edition: 11    მუხუ̂ბე ათა̄სდ მესმა̄მ დუქნა̈რს. ამნემ ა̈ნყიდ ჭიქ ეჯკა̈ლი, ერე ლიცს
Line of edition: 12    ლახ ამნოშ ლჷდგა̈რს ჩუ ლახთჷრე, ეჩქა ეჯ მინუტისგა შიშდ ჟ'ასე̄ლუ̂ე.
Line of edition: 13    ალჲა̈რ უ̂ეშგდ ანტა̈ხხ ამ სამ შუკუ̂ ლაჭართეჲსგა. პე̄მა̈ნ ხა̄დხ.
Line of edition: 14    მინე ნაღუ̂ჭარუ̂ა̈ლ ქო̄ხო̄მბუ̂ეხ ი ხაწუ̂ე̄ნეხ უშხუ̂ა̄რ. ა̈დსგიდახ სა̈რკქა,
Line of edition: 15    მინ ერუ̂ა̈̄ჲს იშგომდახ, ალა ლაშდუ̈ღუ̂თე ესყახ. ლახსგურდახ მა̈გ
Line of edition: 16    რა̈შს, ჩუ ლიშდღუ̂ა̄ლ ამჩუ ესბეთქხ ჩიემ, ჭიქუ̂შ ლიც ლახა̈̄შხ, შიშდ
Line of edition: 17    ჟ'ანსე̄ლუ̂ეხ. უ̂ეშგიმპილს და̈̄ს ხაკუთნე ნა̈ხუმსა̈რ: ჩი̄ ეშხუ ნაღუ̂ჭარ
Line of edition: 18    ხუღუ̂ახ. ალა, დი̄ნა, მინე მუდ დაჩუ̂ირდ ესგენე.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.