TITUS
Svan Prose Texts I (Upper Bal)
Part No. 71
Previous part

Text: 78 
Page of edition: 104 
Line of edition: 19 
78. ხელწერილ


Line of edition: 20       არდახ ეშხუ ხეხუ̂-ჭა̈შ. ალჲა̈რს ხორდახ ჭყინტგეზალ. ალას ხეჟხა̈̄ნ
Line of edition: 21    ხელწერილ. აშხუ̂ინ ადყურდა ბალკონჟი. ლირჰა̈̄ლთე ანჴა̈დ
Line of edition: 22    კუ̂ინჩჷლდ, სგა ლახა̄გა̈ნ ი ხა̈̄ქუ̂: "უ̂ოდ ესერ მიჯნემ უ̂ირჩილ-მა̈რჩილ
Line of edition: 23    კე̄სრი გეზალ ნანუ̄ლ ჩუ დო ა̈დგჷჭას (\\ ა̈დგჷჭეს), ეჩქად ნო
Line of edition: 24    ლისგუ̂რენუ ხოგა̈დ, ნო ლიგნენ". ჟ'ანჷ̄გა̈ნ ალ ჭყინტ, სგა̄ჩა̈დ ლაგუ̂ნუშ
Line of edition: 25    მიჩა მუე̄შთე ი ხა̈̄ქუ̂ ლაგუ̂ნუშ: "ამელეჟა ანჴა̈დ ეშხუ კუ̂ინჩჷლდ
Line of edition: 26    ი მა̈̄ქუ̂: "უ̂ოდ ესერ უ̂ირჩილ-მა̈რჩილ კეჲსრი გეზალ ზეთენახა̈უ̂ ნანუ̄ლ
Line of edition: 27    ჩუ დო ესერ ოთყედნა, ეჩქად ესერ ნო ლიგნენუ მიშიდ, ნო ლისგუ̂რენ"
Line of edition: 28    ეჩქა მიჩა მუდ ხა̈̄ქუ̂: "ამღ' ე̄სერ იმნა̈რ იგუ̂ნი? ჟი̄უ̂ ესერ აჩა̈დ,
Line of edition: 29    ჟი̄უ̂ ესერ ა̈ნჷრმე რა̈შ ი ჩუ̄უ̂ ესერ ანჴიდ. ნა̈ჯუ̂ნა̈ლუ̂ გიცა̈რ ესერ ჟიუ̂
Line of edition: 30    ა̈ნკიდ". ჟ'ა̈ნჷრმე რა̈შ ი ნა̈ჯუ̂ნა̈ლუ̂ გიცა̈რ შჷნ ლა̈ჲყედნე ლეზიზდ.

Line of edition: 31       ესღრი აშხუ̂ მინდო̈რ ლექუ̂ა ი ამჩუ ლახხუ̂ი̄დხ უსგუ̂ა თხე̄რე:
Line of edition: 32    -- იმთ' ე̄სღრი ხოჩა მა̄რე? ჰამა იმთე მო̄დე ზეთენახა̈უ̂ ნანუ̄ლს ხუ̂ეთხე̄ლი".
Line of edition: 33    ეჩქა თხე̄რა̈̄ლდ ხა̈̄ქუ̂ინხ "გიცა̈რ ესერ ქა̄უ̂ ლახუ̂ე̄მ ი ეჩხაუ̂
Line of edition: 34    ესერ მინ ა̈თჴერნიხ". აჩა̈დხ. ჩუ̂ასა̈დხ აშხუ̂ მეზგამჷყ, იუ̂ოხშმა̄ლხ. ამჩიქს
Line of edition: 35    ლაჲდღამე მჷრა̈̄მნე̄მ: -- მა̈ჲ ესერ ლჷმა̄რ ალ ლიდღმე? -- ლა̈ხჭუ̂ედდა
Line of edition: 36    მიჩა ხაზა̈ენს.

Page of edition: 105 
Line of edition: 1       -- ალა კალხმა̈რ ესერ იცროუ̂ა̈̄ლხ ძუღუ̂აისგა, ეჯჲა̈რ ესერ ი̄რახ.
Line of edition: 2       -- ეჯჲა̈რ ესერ დე̄სა, მურყუ̂ამისგა ესერ მჷრა̈̄მ ოხუ̂დღამა.
Line of edition: 3       -- ჲაღო, ალა ეჯ' ე̄სერ ლჷმა̈̄რ ე, ხედუ̂ა̈̄ჲს სი ხიშგუ̂ემ.

Line of edition: 4       ჟ'ანჷ̄გა̈ნ ჭყინტ ი ესღრი ძუღუ̂აქა, მარე ძუღუ̂ა სურუ სკო̄დი ლა̈სუ̂,
Line of edition: 5    ქა დეშ ა̈ბდა̈უ̂ი ლი̄ზის. ხა̈̄ქუ̂ინ მიჩა რა̈შს: -- ჲაღო, მა̈ჲ ესერ ხეშდენიხ,
Line of edition: 6    ამექ' ე̄სერ იმჟი ადრიხ?
Line of edition: 7       -- ამექ' ე̄სერ ქა̄დინე, მარე ეჩხა̈ნ ესერ ეში̄ ჩუ ა̈დდა̈̄უ̂შიხ!

Line of edition: 8       ლა̈ჲჩიჩხიე̄ლე რა̈შდ ი დე̄რა ათდე. ქა̄ჩა̈დხ ეჩხა̈ნთე, ხედუ̂ა̈̄ჲთე
Line of edition: 9    (\\ იმუ̂ა̈̄ჲთე) მიჩ ლი̄ზი ხეკუ̂ა̈დ. ათხ' ა̄მჩუ ჰა̈ზუ̂ ხა̄რ ლჷმსერე. თუ̂ით
Line of edition: 10    მესერჟი მა̄რე̄მი თხუ̂იმ ხაციყ. "ჲაღო, -- ხა̈̄ქუ̂ინ რა̈შდ: -- ჰა̈ზუ̂თეჲსგა
Line of edition: 11    ესერ სგა̄დსკინი, მარე სგა̈̄ნჩუ ესერ ჩუ ადდა̈̄უ̂შნეხ. მიჯნემ ესერ
Line of edition: 12    ეჩჟიუ̂ ხაჴიდ მადრა̈ჴ, ერე ეშხუ ლეჩფილ ჩაფჷლ ამკუ̂არნა ი სემი
Line of edition: 13    უ̂ოქუ̂რა̈ ქიმ ა̈მშყეს, ეჩქა სგა ხუ̂ისკნე, ადო -- დეშ". ხაჴიდ ამნემ მადრა̈ჴ
Line of edition: 14    ი სგა̄თსკინა̈̄უ̂ნე ჰა̈ზუ̂თეჲსგა. ამჩუ მურყუ̂ამხა̈ნჩუ ლახგჷრგლე ზეთენახა̈უ̂
Line of edition: 15    ნანუ̄ლდ: -- ერუ̂ა̈̄ჲ ესერ ჭაბუ̈გუ̂ ლი, ჩუ̂ ესერ ა̈ნჴდენი, ქ' ე̄სერ
Line of edition: 16    ა̈ხბჷრგი, ჩუ̂ ესერ ლახე ა̈ნდინე, ეჩქ' ე̄სერ კინჩხს ჟ'ახქუ̂იცე.

Line of edition: 17       ჩუ̂ანჴა̈დ ეჯ ნანუ̄ლ ი ქა̈̄ხბჷრგა̈̄ნ, დეშ ა̈ნდე. ეჩქა ხა̈̄ქუ̂ინ ეჯნემ:
Line of edition: 18    "დეშ ესერ ოხუ̂და, მიჩა ხეხუ̂ ესერ ლი". ლა̈ჲჴერნეხ ეშდჲორუ უ̂ოსტა̈ტ
Line of edition: 19    ქუ̂ერწლა̈რდ, ესღრიხ. ქა̄ჩა̈დხ ძუღუ̂აქა. აშხუ̂ მინდო̈რისგა ჟი
Line of edition: 20    ხორიკ ეშხუ და̈̄უ̂ დეცთე. ალ და̈̄უ̂ს ხაჲშხა უჩა. ეჩქ' ა̄მნე̄მ, ხელწერილდ,
Line of edition: 21    ლა̈̄ქუ̂ინ: "ჯა ლჷჭა̈თუ ესერ ლი, ალ' ე̄სერ ჩუ მო̄დე ახქუცას!"
Line of edition: 22    ხაჴიდ დაშნა̈ჲ ნა̄ჭას ი ჩახქუ̂იც ალ და̈̄უ̂. ალაჲ ესჴერი ქუ̂ერწილთე.
Line of edition: 23    ამჩუ ახფუნჷნდა (\\ ახფჷნდა) ნიცდ ეჯ ნანუ̄ლს. ჩუ̂ადზჷზეხ
Line of edition: 24    ალ და̈̄უ̂ ლიცთე. ამნემ ხამრე ნასტღუნა̄ლ ოხჴიდ. "ალ' ე̄სერ მა̄დ
Line of edition: 25    ლი ლიც. ჩუ̄უ̂ ესერ ატა̈ხ ი ხოჩა ლიცუ ესერ ოხჴიდ!" ჩუ̄დ ატა̈ხ ალ
Line of edition: 26    და̈̄უ̂ ი ჟი̄დ ოხჴიდ ხამრე ნასტღუნა̄ლ ი "ალ' ე̄სერ მა̄მა ლი ლიც!"

Line of edition: 27       ჩუ̂აჩა̈დ ჯა ხელწერილ ლიცთე. უ̂ოდ ეჯა ჟი ტეხენდა, ეჩქად და̈̄უ̂დ
Line of edition: 28    ჰაგუ̂ ხაჴიდ გიმჩუ, ჯაჲ ჩუ̂აჩა̈დ ი ხელწერილი ხეხუ̂ი ჩუ̂ადჲე. ანჴა̈დ
Line of edition: 29    ჟი ი მიჩა ქუ̂ერწლა̈რ იგუ̂ა̈ნდახ: -- მა̈ჲ ესერ ხა̈ყრა მიჩა ხეხუ̂ს? -- და̈̄უ̂ს
Line of edition: 30    ესერ ოთხუ̂ჲა ჩუბებუა̄სდთე.

Line of edition: 31       ამნემი ლიგუ̂ნი ა̈დბინე. "მინდ ესერ ჲეშდჲარუ̂ ზაუ̂ ესერ ჟიუ̂ ა̈ნღე̄ლუ̂ეხ,
Line of edition: 32    ეჩქად ესერ ნო̄მთეუ̂ აჩა̈დხ! ეჯა ქა ლახა̄გა̈ნ შუკუ̂ს ი აშხუ̂
Line of edition: 33    მჷშხტის: -- მა̈დილუ ესერ ხე̄რა, ეშხუ დი̄რი ნა̈კუ̂იშ ესერ ხერდი!
Line of edition: 34       -- ჩუ̂ ესერ ხორი, მარე მიჩა ლა̈შგდა̈̄შ ესერ მა̄მა ლი.
Line of edition: 35       -- მა̈გ ესერ ჩუ ხაკუ, იმუ̂ა̈̄ჲ ა̈მჴიდე!

Line of edition: 36       ქო̄ხჴიდ ეშხუ უ̂ისპა, ჩუ̂ესგურდა ი იზბი ალ დია̈რს. ამჩიქს
Line of edition: 37    ლა̈ჲსგიდა ჟიბოუ̂, ქა ხეწა̈დ აშხუ̂ წჷრნი ზუგუ̂ს. ამეჩუნ არდა ჲორი
Line of edition: 38    გიცა̈რ: ეშხუ წჷრნი, მე̄რუ̂ე თუ̂ეთნე. ლა̈ხჭუ̂ედდა: -- ალჲა̈რ ესერ მა̈ჲ ლიხ?

Page of edition: 106 
Line of edition: 1       -- ალჲა̈რ ესერ ესუ̂ა̈̄ჲს ჟიბებუა̄სდთე ლი̄ზი ხაკუ, ა̈ნყიდნე
Line of edition: 2    თუ̂ეთნა ლიფს, ჩუ̂ ესერ ადლიფო̈̄რი, სგ' ე̄სერ ლა̈ხგუდრენი მუჭუ̂ა̈რს,
Line of edition: 3    ჟ' ე̄სერ აკუ̂ა̄ნე ჟიბებუა̈სდთე. წჷრნი გიცა̈რ ესერი ეჩჟინ ლი, მარე
Line of edition: 4    ეჯ' ე̄სერ ჩუბებუა̄სდთე აკუ̂ა̄ნე. კირმჷყ ესერ ხაკუ ლიგუ̂დირნე, ეჩქა
Line of edition: 5    ჩუ̂ ესერ აკუ̂ა̄ნე ჩუბებუა̄სდთე.
Line of edition: 6       -- ჲაღო, მიჩ ესერ ჩუბებუა̄სდთე ხაკუ ლი̄ზი.

Line of edition: 7       ქა̄ჩა̈დ ი ჟ'ა̈ნყიდ ლიფ, ჩუ̂ა̈დლიფო̄რა̈̄ნ. ჟ'აჩა̈დ წჷრნი ზუგუ̂თეჟი.
Line of edition: 8    სგა ლოხგუდირდა წჷრნი გიცა̈რს კირა̈ლს ი ჩუ̂ადკუ̂ა̈რ ჩუბებუა̄სდთე.
Line of edition: 9    ჟ'აშყა̈დ აშხუ̂ ლჷყა̄რთეჟი, ლახტუ̂ი̄ლ: "ერუ̂ა̈̄ჲ ესერ ღენ ლი ჯა ზურა̄ლ,
Line of edition: 10    ეჯა გეზალ ესერუ ლა̈სუ̂ ი ჯა დი" (სგა̄თტუ̂ი̄ლ ქორთე). ამ ლე̄თ
Line of edition: 11    [ზურა̄ლდ] ა̈ნბინე ლირბიე̄ლ ი ლიც მა̄მ ხუღუ̂ა̈̄ნ. ანჴა̈დ ი სგა̈̄თსა̈̄რ
Line of edition: 12    ჯა̈რთეჲსგა. -- იმ ხიჩო, საბრა დედე, ლიც ესერ მა̄მა ხუღუ̂ა მო?
Line of edition: 13       -- ფისეუ̂ ესერ ხაბა ხელწერილი ლითუ̂ა̈̄ლს, ლჷშუ̂ა̈მდ ესერ ლჷმა̈რდხ,
Line of edition: 14    ეშდიუ̂ო̄შთხუ̂ ზა̈ჲ ესერ უჩა ჟი ხა̈რკე̄ნა დეცს. ათხ' ე̄რუ̂ა̈̄ჲ
Line of edition: 15    ესერ ღენ ლი ხელწერილ, ეჩას ესერ ჩუ ოხქუ̂ი̄ცა ეჯ მა̄რე, მიჩა̈შდ
Line of edition: 16    ესერ ქა ოთღა ხეხუ̂. უ̂ო̄შთხუ̂ გეზლი̄რ ესერ ხარდე̄ნა. უ̂ოშუ̂ა̈̄ჲდინ
Line of edition: 17    ლიც მეკუ̂ა̈დ, ეჩშელდინ მა̄დხ ეჯ გეზლი̄რ ლეჰუ̂დი (\\ ლეხუ̂დი).

Line of edition: 18       ი ეჩქას ალ ჭყინტ ლა̈ხჭუ̂ედდა: -- მა̈ჲ ესერ ხა̄რ ღო ეჩას ეჯამა̈გ ლიც?

Line of edition: 19       ეჩქას ეჯნემ ქო̄ხო̄მბუ̂ე.
Line of edition: 20       -- ეჩქა, ჲაღო, მა̈დილუ ესერ ხე̄რა, მიჯნემ ესერ ნო̄მეუ̂ ლა̈ჲკუ̂იშ
Line of edition: 21    მიჩა თხუ̂იმ, ჯ' ე̄სერ ეჩი̄შ ჭა̈შ ლი ი ქაუ̂ ესერ იმჟი ხეწა̈დ ეჯ დი̄ნას
Line of edition: 22    ი მჷსკა̈დ ჟიუ̂ ესერ ოთჴიდ!
Line of edition: 23       -- ეჩი̄ ლიი ესერ მა̄მა ხა̈მჲედა: მურყუ̂მა̈ თხუ̂იმისგა ეშდჲორუ
Line of edition: 24    ყა̈̄რუ̂ილ (\\ ყა̈̄უ̂რილ) ხო̄გ, ეჯჲა̈რ ჩი̄ დე̄მა ფიშუ̂დეხ, ეჩხაუ̂თეჟი და̈̄ს
Line of edition: 25    ფიშუ̂დეხ.
Line of edition: 26       -- ა, მა̈დილუ ესერ ხე̄რი, ეში-ეში̄ ჟი ლე̄ზი ჯა̄რ, მჷსკა̈დს აჯბა̈რი,
Line of edition: 27    სგა ლახნა̈ჩიდ დია̈რს სგა̈̄ნ!

Line of edition: 28       ქა̄ნნაყე დია̈რ, სგა ლახნა̈ჩდე ნე̄სგაისგა მჷსკა̈დ, ეჩქას ეჯნემ ჟ'ადჲე.
Line of edition: 29    ესღუ̂ა̈̄ნ ყო̄რა̈ლისგა ი დარჯა̈ლ დე̄მა ფიშუ̂დახ. ჟიქა̄ნჩუ უჩად
Line of edition: 30    ლახტუ̂ი̄ლ: "ჟიუ̂ ესერ ანფიშუ̂დხ, ჲედ ეში̄ იმ ადსიკთი, ჲედ იმ ადდა̈̄უ̂შნე!"
Line of edition: 31    ჟ'ანფიშუ̂დხ ი ხაგჷრგა̈ლდა ეჯ ზურა̄ლს, ეჯა ჰერს ქა დე̄მა
Line of edition: 32    ხა̈ტხა. ჩუ̂აკუ̂იშ დია̈რ ი ქა ლახწუ̂ე̄ნე ეჯ მჷსკა̈დ. ეჯას მე̄უ̂არ ათხი̄დჷნ:
Line of edition: 33    -- იმ' ე̄სერ ა̈რი ამი̄ პატრონ? -- ამი̄ პატრონ ესერ მიჩაცახა̈ნ.
Line of edition: 34    -- ჲაღო, ჩუ̄უ̂ ესერ ატა̈ხ, ქაუ̂ ესერ ახჭუ̂ედიე̄ლე, იმუ̂ა̈̄ჲჟი ესერ ხაკფჷნდე̄დს!

Line of edition: 35       ჩუ̂აჩა̈დ ალ ზურა̄ლ ი ხა̈̄ქუ̂ინ: -- ჟ' ე̄სერ ოთხჷნახ. მჷსკა̈დ ესერ ქა
Line of edition: 36    ლოხოდა, მე̄უ̂არ ესერ ათხი̄დე̄ნა. -- ჲაღო, ათხე ჟი̄დუ̂ ესერ ატა̈ხ, ქაუ̂
Line of edition: 37    ესერ ახჭუდიე̄ლე ეჯ და̈̄უ̂ს: მა̈ჲ ესერ ი̄რა ეჩი̄ ქუ̂ინ?

Page of edition: 107 
Line of edition: 1       ჟ'აჩა̈დ ალ ზურა̄ლ ი ხა̈̄ქუ̂ინ: "ჲაღო, ათხე ქაუ̂ ესერ ახჭუდიე̄ლე:
Line of edition: 2    მა̈ჲ ესერუ ლესუ̂ ამი̄ ქუ̂ინ? ალ დი̄ნად ხოჩა̄მ გუჟი ლახგჷრგლე:
Line of edition: 3    -- ეჯა ჩი̄ ქა ლა̈ხკუ̂ა̈შ, მა̈ჲ ლა̈სუ̂ მიჩა ქუ̂ინ, მიჩა მჷნწირ ესერ მა̈ჲ ლი?
Line of edition: 4       -- ხოსგდი ესერ მა არა̈̄შდ მჷჭმას, არა̈̄შდ მჷფცხას, ალჲა̈რ ესერ
Line of edition: 5    ხოჭმეხ, ხოფცხიხ ლა̈ჩუ̂ს. ლა̈ჩუ̂ ლადეღისგა სამ გებენს იზბი სამ ნინი
Line of edition: 6    ლითხპინეჟი. ეჩეისგა ა̈რი მიშგუ ქუ̂ინ. ეჯას ლახე ჩუ ჲა̈რ ადდაგრი,
Line of edition: 7    ეჩქა მი ჩუ ხუ̂იდგა̈რი. ლა̈ჩუ̂ა̈ ჴა̈დისგა ა̈რი დაჴჷლ, დაჴლა̈ ჴა̈დისგა
Line of edition: 8    -- ჲერსკნ, ჲერსკნი ჴა̈დისგა -- რა̈ჭუ̂, რა̈ჭუ̂ა̈ ჴა̈დისგა -- სა̈ტრო̄ლ, სა̈ტრო̄ლისგა --
Line of edition: 9    სა̈ტრო̄ლ, ეჩეისგა ა̈რიხ სემი შდაუ̂ლა̈რ. ეჯჲა̈რს ლახე ჩუ
Line of edition: 10    ჲა̈რ ადდაგრი, ეჩქას მი ჩუ ხუ̂იდგა̈რი.

Line of edition: 11       ალა ქა̄ხღორუ̂ეხ. ჩუ̂აჩა̈დ ეჯ ზურა̄ლ ი ქო̄ხო̄მბუ̂ე. ამნემ ა̈ნშკა̈̄დ
Line of edition: 12    ცჴემა̈დ ი აჩა̈დ ეჯ მჷჭმათე, ლა̈ხჭუ̂ედდა: -- იმნა̈რ ესერ ხებჭკუ̂ენიხ
Line of edition: 13    ლა̈ჭმას?
Line of edition: 14       -- მა̈ჲ ესერ ხოჩა, ამჟი ესერ ხა̄რხ ლეჩუ̂მე.
Line of edition: 15       -- ჲაღო, ჯ' ე̄სერ ჩუ̂ა̈თპეჟნი მესმა გებენისგა. შომუ̂ა̈̄ჲ ესე̄რ ეჯნემ
Line of edition: 16    ჲორი გებენ ჟ'ა̈ნფეთუ̂ის, მესმა̄მჟი ქაუ̂ ესერ ლახუ̂ტუ̂ი̄ლხ.

Line of edition: 17       ჩუ̂ა̈თპა̈ჟ მესმა გებენისგა. ნა̈ბზა̈̄შთე იფო̈თდა გებნა̈რს, ეჩქად
Line of edition: 18    ჟ'ა̈ნბუ̄წე ცჴემა̈დ ი ჩუ ადგა̈რ ეჯ ლა̈ჩუ̂. ქო̄ხკიდ დაჴჷლ, ეჯაჲ ჩუ̂ადგა̈რ.
Line of edition: 19    ეჯას ქო̄ხკიდ ჲერსკნ, ეჯაჲ ჩუ̂ადგა̈რ. ეჩის ქო̄ხკიდ რა̈ჭუ̂, რა̈ჭუ̂ი
Line of edition: 20    ჩუ̂ადგა̈რ. ეჩისი ქო̄ხკიდ სა̈ტრო̄ლ ი ჩუ̂ადკარე სა̈ტრო̄ლ, ჟ'ა̈ნკიდ
Line of edition: 21    ეშხუ შდაუ̂ალ ი შიშდ ჩუ̂ადგა̈რ.

Line of edition: 22       ათხე და̈̄უ̂ ლეგდ ა̈დჷრდა ი მიჩა ხეხუ̂ს ხა̈̄ქუ̂: "ჟი ესერ ე დო̄ს ოჰუნრა
Line of edition: 23    ეჯ მინე გა̈რგლა, ლეგდ ესერ მირ ა̈რი! ჟ'ანჴა̈დ ხელწერილ
Line of edition: 24    მიჩა ყო̄რთეჟი. ამჩუ ყა̈რუ̂ლა̈რ დე̄მა ფიშუ̂დეხ ჟი. ყა̈რუ̂ლა̈რს თხუმა̈რ
Line of edition: 25    უშხუ̂ა̈რ ლოხშყჷბნე ი ჯა ჟ'აჩა̈დ მიჩა ხეხუ̂თე. მიჩა ხეხუ̂ს მე̄უ̂არ ათხი̄დჷნ
Line of edition: 26    ი უშხუ̂ა̄რ ლა̈ხშდო̄რა̈̄ნხ ლაყჰა̄ლს. მე̄რუ̂ე შდაუ̂ალ ათხე̄დ ადგა̈რ,
Line of edition: 27    და̈̄უ̂ მე̄უ̂არ ლეგდ ა̈დჷრდა. ხა̈̄ქუ̂ინ და̈̄უ̂დ: -- მა̈̄ჲ ესერ ხეკუ̂ეს, ჩი̄
Line of edition: 28    ესერ ჩუ ხა̈ჩო, ჩუ ნჷმაუ̂ ადგა̈რ! -- ჲაღო, მიჩა ლჷლზიგდ ჟიუ̂ ესერ
Line of edition: 29    ადჲე, იმუ̂ა̈̄ჲ მიჩ ჰაგუ̂ ხოყრა, ეჩაუ̂.

Line of edition: 30       ჟ'ა̈ნშხა̈ტ ამნემ ჩა̈თრ ი ჟ'ადჲე. იმუ̂ა̈̄ჲ მიჯნემ ჰაგუ̂ ხაჴიდ, ეჩეჩუნ
Line of edition: 31    ჩუ̂ესგე ლჷლზიგდ ი ეჯა ჩუ̂ანტიხდა ა̈გითე ი ხეშგომდა შდაუ̂ლი̄დს. -- ჲაღო,
Line of edition: 32    შდაუ̂ალს ამჟი მა̄მა ესერ ხაჰუ̂დი, ქ' ე̄სერ ახფიშუ̂დე,
Line of edition: 33    ლახ ესერ ჟი ხერგებო̄ლნო̄ლ, ეჩქა მურგუ̂ა̈ლ[უ̄] ესერ ლახტეხა მიჩა
Line of edition: 34    შდაუ̂ალ, ადო -- ნჷმა.

Line of edition: 35       ქა̄თფიშუ̂დ ი სგა ლა̈ხჟღა̈პ ი და̈̄უ̂ი ჩუ̂ადგან. მინდ ხოჩა ლირდე
Line of edition: 36    ა̈დჴიდხ. ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.