TITUS
Svan Prose Texts I (Upper Bal)
Part No. 72
Previous part

Text: 79 
Page of edition: 108 
Line of edition: 1 
79. კამინჩერიხა̈ჲ


Line of edition: 2       არდა ეშხუ ხელწიფ, ხორდა სემი ჭყინტგეზლი̄რ ი სემი დი̄ნა̈̄ლ.
Line of edition: 3    ხელწიფ ლეგდ აჴა̈დ ი ადშგურა̄ნე მიჩა ჭყჷნტა̈რ: "ჲერუ̂ა̈̄ჲდ ხაშგუ̂მინეხ
Line of edition: 4    მინე ლადჩურა, ჩი̄ ქაუ̂ ათყა̈ნუ̂ეხ," ი ჩუ̂ადგან ხელწიფ.

Line of edition: 5       ქა̄ჩა̈დ ეშხუ ნაგზი. ათხე ანჴა̈დ აშხუ̂ ლადეღ ეჯკა̈ლიბ ჰაერ ი
Line of edition: 6    ხოლა ბუ̈ქუ̂, ერე ქუ̂ეყანა ქუთა̈ნ ი ანღრი თუ̂ეთნე ნადა̈̄ურ. სგა ლახა̄გა̈ნ
Line of edition: 7    ალჲა̈რს ყო̄რს ი ყო̄რქა მაყალშუ̂ დეშ ისგდინიხ. უ̂ეშგიმპილს
Line of edition: 8    ხოხუ̂რა მუხუ̂ბე ქა̈̄ნსგიდა ყო̄რქა ი ხოშა თუ̂ეთნე ნადა̈̄ურ ყო̄რჟი ლჷგ.
Line of edition: 9    "ეშხუ მიჩა დაჩუ̂ირ ქა̄უ̂ როქ ლახუ̂ემ ხეხუ̂დ!" ი სგა̄ჩა̈დ ქორთე, სგა
Line of edition: 10    ხაფხეჭ მაშე̄ნა დაჩუ̂ირს ი ქო̄თჴიდ ყო̄რქა, ქა ლახუ̂ემ და̈̄უ̂ს ი ადჲე
Line of edition: 11    ხოშა დაჩუ̂ირ თუ̂ეთნა და̈̄უ̂დ. მე̄რმა ლადეღ ანჴა̈დ აჯაღ წჷრნი და̈̄უ̂
Line of edition: 12    ი სგუ̂ებინ ხოჟუ̂ეღ ეჯკა̈ლიბ ბუ̈ქუ̂, ერე ქუ̂ეყანას იწა̄ნე ი სგა ლახა̄გა̈ნ
Line of edition: 13    ყო̄რს ალჲა̈რს. ალჲა̈რ მაყალშუ̂ ყო̄რქა დეშ ისგდინიხ. ჟი̄დ ანჷ̄გა̈ნ
Line of edition: 14    ხოხუ̂რა მუხუ̂ბე ი ქა̈̄დსგიდა. "ეშხუ მინე დაჩუ̂ირ ქაუ̂ როქ ლახუ̂ემხ
Line of edition: 15    ხეხუ̂დ!" ალა ხა̈̄ქუ̂ წჷრნი და̈̄უ̂დ. სგა̄ჩა̈დ ქორთე, სგა ხაფხეჭ
Line of edition: 16    ნე̄სგა̈̄ დაჩუ̂ირს ი ქო̄ხჴიდ წჷრნი და̈̄უ̂ს ი ქა ლახბა̈რჲე. მესმა ლადეღ
Line of edition: 17    აჯაღ ანჴა̈დ მეშხე და̈̄უ̂ ი აჯაღ ალჲა̈რს ლახა̄გა̈ნ ყო̄რს ი ხაშგუ̂მინ
Line of edition: 18    მინე ხოხუ̂რა დაჩუ̂ირ. ალჲა̈რ მაყალშუ̂ ყო̄რქა დეშ ჴედნიხ. უ̂ეშგიმპილს
Line of edition: 19    ოთშგუნდა ხოხუ̂რა მუხუ̂ბა ი ჟ'ანჷ̄გა̈ნ, ქა̄ჩა̈დ ყო̄რქა, ხეწა̈დ
Line of edition: 20    მეშხა და̈̄უ̂ს ი გუ̂იდ ლიჯჯგჷნე ოთბინე, მარე ეში̄ ხოჩა̄მდ ესხუ̂ი̄დ ი
Line of edition: 21    ლა̈ხჭუ̂ედდა: -- მა̈ჲ როქ ხაკუ? -- "მინე დაჩუ̂ირ ხეხუ̂დ ქა̄უ̂ როქ ლახუ̂ემხ!"
Line of edition: 22    სგა̄ჩა̈დ ხოხუ̂რა მუხუ̂ბე ი ქო̄ხჴიდ მიჩა ხოხუ̂რა დაჩუ̂ირ ი ქა
Line of edition: 23    ლახუ̂ემ მეშხა ნადა̈̄ურს ი ადჲე.

Line of edition: 24       ათხე ა̈რიხ ეშხუ ნაგზა ი ეჩქანღო ახა̄დხ გა̈რგლა: "ათხე ლა̈ჩი̄ჟა̄ლთეუ̂
Line of edition: 25    როქ აჩა̈დხ". ა̈ნმა̄რა̈̄ნხ ი აჩა̈დხ. აშხუ̂ მინდუ̂ო̈რთეჲსგა აჩა̈დხ
Line of edition: 26    ი ხა̈̄ქუ̂ხ უშხუ̂ა̄რ: "ცჴუ̂ემდა̈რუ ესერ აშიდხ. ეშუ̂ა̈̄ი ლჷყა̄რჟი ცხუუ̂ა̈რ
Line of edition: 27    ხოჲხენიხ, ეჯჲარე დი̄ნა̈̄ლ გუ̂ე̄რახ ლა̈ხხუ̂ა". ადკუ̂ა̈რ მაშე̄ნა მუხუ̂ბად
Line of edition: 28    ი კე̄სრი ლჷყა̄რჟი ხოჲა̈ხ. ადკუ̂ა̈რ მანე̄სგრა მუხუ̂ბად ი ეჯაი̄ კე̄სრი
Line of edition: 29    ლჷყა̄რჟი ხოჲა̈ხ. ადკუ̂ა̈რ მაჰუ̂რე̄ნა მუხუ̂ბად ი ეჯ[ნე̄მ] კე̄სრი ლჷყა̄რს
Line of edition: 30    ქო̄თქა̈̄ბ ი ჯუ̂ე̄დიას ტო̄მბისგა ხოჲა̈ხ. აჩა̈დხ ცხუუ̂ა̈რ ლათხე̄ლთე ი
Line of edition: 31    კე̄სრი ქორმჷყ ადჰეხ. ხოშა̄მ ლახუ̂ბა̈̄ ცხუუ̂ა̈რ კე̄სრი ლჷყა̄რჟი ხაჴლახ
Line of edition: 32    ი ხა̈̄ქუ̂ხ კე̄სა̈რს: "ნიშგუ̂ეჲ ცხუუ̂ა̈რ ისგუ̂ეჲ ლჷყა̄რჟი ხაჴლახ ი ისგუ
Line of edition: 33    დი̄ნა̈̄ლ ნა̈ჲ ნაკუხ ლა̈ხხუ̂ად" ი სგა̄დჲეხ ქორთე. კე̄სა̈რდი̄ ხოშა უდილ
Line of edition: 34    ხოშა მუხუ̂ბას ლახუ̂ემ, ნე̄სგა̈̄ უდილ ნე̄სგა̈̄ მუხუ̂ბა ლახუ̂ემ ხეხუ̂დ, ხოხუ̂რა
Line of edition: 35    მუხუ̂ბე ჩუ̂ასა̈დ მუხუ̂ჭიდ: ეჩი̄ ცხუ̂ი დე̄მე თერი̄ნ. ხოშა ლახუ̂ბა
Line of edition: 36    ა̈გითე აჩა̈დხ ი ალა ცხუ̂ი ლათხე̄ლთე აჩა̈დ ი კოტო̄ლ ხა̈ნჷნღო ჟ'ა̈ხბა̈გუ̂
Line of edition: 37    ცხუ̂ი: ტო̄მბისგა ხა̈ჩხინა. სგა̄ჩა̈დ ი ჟ'ა̈ნყუ̂იფ ი ჟ'ა̈ხყა̈̄დ აფხუ̂.
Page of edition: 109  Line of edition: 1    ლოხგუდირდა, ეჩე ქა̈̄მ ადკუ̂ა̄რ ი ჯა ანღრი ა̈გითე ი უ̂ეშგინისგა
Line of edition: 2    სგა ლა̈ჰი̄დ აფხუ̂ ი ჟ'ა̈ნკიდ: "ალა ესერ ლი მიჩა იღბა̈ლ ი ალას ა̈ი
Line of edition: 3    ა̈გითე!" ეშხუ საათს ანღრი ი ეჩქა გუ̂ი ა̈ხწახუ̂ა̈̄ნ ი ქა̄დ ადკუ̂ა̈რ აფხუ̂.
Line of edition: 4    ესღრი̄დ ა̈გითე ი სგა̄დ ლა̈ჰი̄დ აფხუ̂ უ̂ეშგინისგა, ჟ'ა̈ნკიდ ი ადჲე
Line of edition: 5    ა̈გითე ი ა̈გის მიჩა ლახუ̂ბად სა̈ყუ̂დირ ხა̈̄ქუ̂ხ: "მინს როქ კე̄სრი გეზლი̄რ
Line of edition: 6    ხორიხ, მიჩ როქ აფხუ̂ ხორი. ამი ნასყა̈უ̂ ლეზუ̂ებ-ლეთრე მა̈ჲ
Line of edition: 7    როქ ხეჲრახ?"

Line of edition: 8       აშხუ̂ ლადეღ ხოშა ლახუ̂ბად აცუ̂ირხ მინე ლა̈ხხუ̂ა ა̈გის ი ეჯჲა̈რდ
Line of edition: 9    ოხუ̂სყეხ ლეზუ̂ებ-ლეთრე. ანჴა̈დხ ა̈გითე ი ჩუ̂ა̈დუ̂ოხშმა̈̄ნხ ი ხოხუ̂რა
Line of edition: 10    მუხუ̂ბას ხა̈მდუნეხ მინე ლა̈ხხუ̂ა̈̄ ნასყა̈უ̂ ლეზუ̂ებს. მე̄რმა ლადეღ ხოხუ̂რა
Line of edition: 11    მუხუ̂ბად აცუ̂ირ ა̈გის მიჩა ხეხუ̂ -- აფხუ̂. ალა ლი ძუ̂ირფა̈ს ბზითუნახა̈უ̂,
Line of edition: 12    მარე ბიდ ხუღუ̂ა აფხუ̂ა̈შ ი ეჩეისგა იშხუ̂ნი თხუ̂იმს. ნა̈ბოზს აჩა̈დხ
Line of edition: 13    ა̈გითე, უ̂ახშა̈მ ეჯკა̈ლიბ ესხუ̂ი̄დხ ლჷმა̄რე, ერე ეჩჷნ ხოჩა ჟი მა̄მა
Line of edition: 14    ისყო̄ლდა ი მჷმა̄რე და̈̄რ ხაჯრაუ̂ახ ი ხოხალხ. ეზერდ ლახბაჟჷნხ ი
Line of edition: 15    მესმე აჯაღ ამი უ̂უჩერედ ლა̈სუ̂. ხოხუ̂რა მუხუ̂ბე ა̈გის ასა̈დ ამი ლა̈ყრულად:
Line of edition: 16    "ჲა̈რუ როქ ამა̄რე̄დს ამთა̄ნ ლეზუ̂ებ-ლეთრა?" ი ჩუ̂ა̈თპა̈ჟ.
Line of edition: 17    ალ დრო̈უ̂ს ლახა̄დ მიჩა ხეხუ̂ -- აფხუ̂ უ̂ახშა̈მ ლამა̄რას, ბიდ ქა̈̄დშყუ̂იფ
Line of edition: 18    ი ქორს ნათელ ახწა̈დუ̂ნე ი ხეწა̈დ მიჩა ჭა̈შ, იმუ̂ა̈̄ჲ ა̈გის ბიდ ესდე.
Line of edition: 19    ეჯა ჩუ̂ა̈დნა̈ცხე, სგა̄დსკინე, ჟ'ესფხიჭე ბიდს ი სგა̄დკუ̂ა̈რ ლემესგთე.
Line of edition: 20    ეჩქა მიჩა ხეხუ̂დ ხა̈̄ქუ̂: "მიშგუუ̂ როქ ცოდ ჯა̄რ, ალ ბიდ გუშგუ̂ეჲდ
Line of edition: 21    როქ ეზერ ლა̈სუ̂, მარე ათხეუნღო მიშგუ̂ა თხუ̂იმს სი და̈̄რ ეჯცუ̂ირე:

Line of edition: 22       მი როქ ხუ̂ა̈სუ̂ კამინჩერიხა̈ი ხეხუ̂. ლჷფე̄თე მა̄რე ლა̈სუ̂ ეჯა ი აფხუ̂ა̈
Line of edition: 23    ბიდ ხუ̂ითხ ი ეჯნოშ ა̈თუ̂იშხუ̂ნ თხუ̂იმ ი ქო̄თეჩდ ეჩას. ათხე ჩია̈̄გ ჟი
Line of edition: 24    მითხე̄ლი ეჯა ი მიშგუ̂ა თხუ̂იმს ეჯა ჩუ მა̄მა ჯა̈ცუ̂რე სი".

Line of edition: 25       ათხე ნა̈ნკუ̂მოშ მურყუ̂მა̈ შდურთე ადჲე მიჩა ხეხუ̂ ხოხუ̂რა მუხუ̂ბად
Line of edition: 26    ი ჯა მიჩა ლახუ̂ბაცახა̈ნ ლამშიას ა̈რი. ამ დრო̈უ̂ს კამინჩერიხა̈ჲ
Line of edition: 27    ლა̈თხუ̂იარხა̈ნ ანღრი, სემი ლჷჭიშხ რა̈შს ჟი ხასგურ ი ჰაერქა ახღუ̂ა.
Line of edition: 28    მურყუ̂მა̈ შდურისგა ქა ხეწა̈დ მიჩა ხეხუ̂ს, სგა̄ჩა̈დ ი ქა̄დჲე მიჩა ხეხუ̂
Line of edition: 29    მურყუ̂ამხა̈ნქა. ნა̈ბოზს ანჴა̈დ ხელწიფი გეზალ ი ხეხუ̂ დე̄სა ესხუ̂ი̄დ
Line of edition: 30    ა̈გის. მეუ̂არ ა̈ნხუჭა̈̄ნ, მარე იმ იჩოდა: ლაბრა̈ლ და̈̄რ ხეყა̈̄დ. ა̈ნკიდ
Line of edition: 31    მიჩა ცჷჴემა̈დ ი აჩა̈დ ხეხუ̂ ლათხე̄ლთე.

Line of edition: 32       ესღრი ი იმუ̂ა̄ლე მე̄რმა სა̈ხჷლწიფისგა ლჷცთეჟი ლა̈ხჴა̈დჷ̄ნ. ამეჩუ
Line of edition: 33    ბოფშა̈რ იშდრა̄ლხ ი ეშხუ ბეფშუ̂ ლახლატჷნ ალ ჭყინტს, ხელწიფი
Line of edition: 34    გეზალს: "ჯა ესერ მიჩა დაჩუ̂ირს ხაჯეშ" ი ხალა̈ტ. ეჩქა ბეფშუ̂დ ხა̈̄ქუ̂:
Line of edition: 35       -- ჯ' ე̄სერ ლი და̈̄უ̂ა̈ გეზალ ი ხელწიფი ნიბა̈̄შინ, დი ესერ ხორი
Line of edition: 36    ხელწიფი გეზალ.
Line of edition: 37       -- ჲაღო, მიჩა ქორთეუ̂ როქ ა̈დჴერნე მიჯნემ!

Page of edition: 110 
Line of edition: 1       ი ქა̈̄დჴერნე გაცხა̈ჲდ. ქა̈̄ნსგიდა ამი̄ დი ი ხეწა̈დ ალ ჭყინტს,
Line of edition: 2    ჩუ̂ათირ მიჩა ჯჷმილ, უშხუ̂ა̄რ ხოჲა̈ხხ ლაყჰა̄ლს ი მეუ̂არ ა̈დჷლხინეხ.
Line of edition: 3    მარე ნა̈ბოზს გონა̈ბ ახა̄დ მიჩა დაჩუ̂ირს ჯჷმლა̈შ ი ხა̈̄ქუ̂, ერე "მიჩა
Line of edition: 4    ჭა̈შ მე̄რმე ნუკუ̂იშ ესერ ლი ი ჩუ̂ა̈პჟუნე მიჩ, დო̄სამა როქ ოხუ̂რეკის
Line of edition: 5    ი ჩუ̂ათპა̈ჟუ̂ნე. ნა̈ბოზს ანჴა̈დ ლა̈თხუ̂ჲარხა̈ნ და̈̄უ̂. აშხუ̂ხა̈ნჩუ კუ̂იცრა
Line of edition: 6    ხა̈̄ცუ̂, მე̄რმახა̈ნჩუ ზექ, ამი ლაჯაბ. ქორთე ანჴა̈დ ი ხა̈̄ქუ̂:
Line of edition: 7       -- მა̈ჲ როქ ამსუ̂ა̄ლდა̈ ქუ̂ინ მაჴან?
Line of edition: 8       -- პილწია̈ნ სი, მიშგუ̂ან ხოშა მსუ̂ა̄ლდ ჲა̈რ ირა ღო?

Line of edition: 9       სი ათხადი̄ ამჩუ ჯიჩდა, მარე ამჟი მა̄მა ჯიჴან ქუ̂ინ.
Line of edition: 10       -- ღო ისგუ ლა̈სმუნა ლახ ა̈რ ა̈ნჴდენიხ, ეჩქა იმ ხა̈ჩო?

Line of edition: 11       ეჩქა და̈̄უ̂დ ხა̈̄ქუ̂: -- ხოშა ლახუ̂ბა ლახ ა̈ნჴდენიხ, ეჯჲა̈რს იშუ̂ს ი
Line of edition: 12    ჯიჯუ̂ს ჩი̄ ყალჯად ოთგენი; ხოხუ̂რა მუხუ̂ბე ლახ ა̈ნჴდენი, ეჯას მა̈̄ჲ მა
Line of edition: 13    ლა̈თია̄ლს მე̄რა, თხუ̂იმს ქა ლოხუ̂ცა̈̄დნე.
Line of edition: 14       -- ჲაღო, ხოხუ̂რა სა̈მუნ ა̈ჯჴა̈დ.
Line of edition: 15       -- მა̈დილ-უნყუ̂ს ჯე̄რა ი ქა ლამწუ̂ე̄ნ!

Line of edition: 16       სგა̈̄ნჴერნე მიჩა დაჩუ̂ირდ ი ქა ლახწუ̂ე̄ნე და̈̄უ̂ს. და̈̄უ̂ს მეუ̂არ
Line of edition: 17    ათხი̄დჷნ ი ლაყჰა̄ლს მა̈გ ქა̄ხცჷლჷ̄რე.
Line of edition: 18       -- მა̈ჲ როქუ̂ ესწჷხე̄ნა? მა̈̄ჲ როქ ხებცი მიჩ, თხუ̂იმს ქა ლოხუ̂ცა̈̄დნე.
Line of edition: 19       -- მი მა̈ჲ მაწჷხ ი ხეხუ̂ ა̈მღე კამინჩერიხა̈ჲდ ი ეჩი̄ ლათხე̄ლთე
Line of edition: 20    ესღუ̂რი.
Line of edition: 21       -- ეჯა ნა̈ჲ ჩი̄ ჩუ ნიცჷხ, მარე ეჩას რა̈შ ხაყა ეჯკა̈ლიბ, ერე
Line of edition: 22    ქუ̂ეყანაჟი ეჩი̄ მენწირ დე̄სამა ა̈რი ი ეჩას ჰე̄მგუ̂აშ ა̈ლმეჴრიდ, ერე
Line of edition: 23    ეჩი̄ მენწირ ჩუ მა ირდი, ეჩქა ნა̈ჲ სემი ხუ̂იშდ ლახუ̂ბა, ჩი̄ ისგუ
Line of edition: 24    ლადჩურა ნაყა, მა̈გ ისგუ მუმურჯი ხუ̂ი̄რად, მარე მი მა̄მაგუ̂ეშ მიხალ.
Line of edition: 25    მიშგუ̂ა მუხუ̂ბათე ადე, ეჯას ლა̈ხჭუ̂ედ.

Line of edition: 26       აჩა̈დ მე̄რმა და̈̄უ̂თე. ამეჩუ აჯად ამჟინჷდ ა̈დხი̄დე მიჩა დაჩუ̂ირდ.
Line of edition: 27    ნა̈ბოზს და̈̄უ̂ ანჴა̈დ ი მეუ̂არ ათჩო̄ნ:
Line of edition: 28       -- ხოშა ლახუ̂ბა ლახ ირო̄ლხ, ლჷჲა̈რს დე̄მის ფიშუ̂და̈ს. სი ლახ
Line of edition: 29    ხი, ეჩქა ისგუ̂ა ბედჟი თხუ̂იმს დე̄მის ხუ̂აზა̄რე, მა̈̄ჲ ეჯწჷხა, ეჯ ბედჟი.
Line of edition: 30    მა̈ჲ როქ ეჯწჷხჷნდა?
Line of edition: 31       -- მა̈ჲ-ი კამინჩერეხა̈ჲდ ხეხუ̂ ა̈მღე ი ეჩი̄ ლათხე̄ლთე ღური.
Line of edition: 32       -- მი როქ ჩუ მიცჷხ, მარე ეჩას რა̈შ ხაყა, ეჩი̄ მენწირ დე̄სამა
Line of edition: 33    ლი. მა̄მაგუ̂ეშ ნა̈მჲედა ი ნიშგუ̂ეჲ ხოხუ̂რა მუხუ̂ბა ჰე̄სამა ხეხლი, ეჩხაუ̂
Line of edition: 34    ადე!

Line of edition: 35       აჩა̈დ ეჩხაუ̂ ი ეჯნემ ჰა̈დურდ ხოშა ა̈დჷლხინე ი ლა̈ხჭუ̂ედდა:
Line of edition: 36       -- მა̈ჲ როქ ხაწჷხ?

Page of edition: 111 
Line of edition: 1       -- მა̈ჲ როქ ი კამინჩერიხა̈ჲდ ხეხუ̂ ა̈მღე ი ეჩი̄ ლათხე̄ლთე ღური.
Line of edition: 2       -- ჲაღო, ეჩას მი ლაჯთუ̂ე̄ნი, მარე მი მა̈̄ჲ აჯშგურა̄ნა, ეჯჟი
Line of edition: 3    ჩუ̂ემნ! მიშგუ̂ა რა̈შს ჟი ლაჯსგუ̂ირნე ი აჯი̄ნე ეჯა ისგუ̂ა ხეხუ̂თე ი ქა̄ხჭუ̂ედიე̄ლ
Line of edition: 4    კამინჩერიხა̈ჲს: "მიჩა რა̈̄შ იმხა̈ნ ნათჷმ[უ̄] ხა̈̄ცეს" ი ეჩქა ნა̈ჲი
Line of edition: 5    ჩუ̂ალთიმნედ, ადო ეჩურ ეჩი̄ მენწირ მა̄მაგუ̂ეშ ა̈რი.
Line of edition: 6       -- ალას ჩუ ხუ̂იჩო ი ოდრინე.

Line of edition: 7       ჟი ლახსგურდა და̈̄უ̂ა̈ რა̈შს ი აჩა̈დ. ალჲა̈რს მეუ̂არ ათხი̄დჷნხ
Line of edition: 8    უშხუ̂ა̄რე ლიწედ ი ლიჭუ̂დიე̄ლ ჩუ̂ათა̈̄შდჷნ ი ახყა მიჩა ხეხუ̂ ი ლახხუ̂იდხ
Line of edition: 9    კამინჩერიხა̈ჲ ლა̈თხუ̂ჲარხა̈ნ. ალ ჭყინტ ჩუ̂ადგა̈რ ი და̈̄უ̂ა̈ რა̈შ
Line of edition: 10    ჩოთჩა̈დ ი ხეხუ̂ უ̂ეშგდ ა̈დტიხ კამინჩერიხა̈ჲდ. ეჩქა და̈̄უ̂ა̈ რა̈შ სგა
Line of edition: 11    ლა̈ხტა̈ხ ი ფხულე ქა̄ხქუ̂იც ხელწიფი გეზალს ი ა̈გითე ოთჴიდ და̈̄უ̂ს.
Line of edition: 12    და̈̄უ̂ გუდ ანჴა̈დ, ერე ლჷდგა̈რ ლა̈სუ̂. ლოხფუ̈̄ლ და̈̄უ̂დ ფხულა ი მიჩა
Line of edition: 13    სგუ̂ებინ ლჷჲა̈რ ესგენე მიჩა სა̈მუნ. ეჩქა და̈̄უ̂დ ჩუ̄დ ადშგურა̄ნე:
Line of edition: 14       -- მა̈დილუ ხე̄რა, ქა̄[მა]უ̂ ნო̄საუ̂ ანჴიდ მიჩა ხეხუ̂ ი ქაუ̂ ახჭუ̂ედიე̄ლე
Line of edition: 15    კამინჩერეხა̈ჲს: "იმე ნათჷმ[უ̄] ხა̈̄ც მიჩა რა̈შ" ი ღო ეჯას ჟ'ა̈ნმეჴრიხ,
Line of edition: 16    ეჩქა მინი ჩუ̂ადთჷმიხ ეჯგუ̂ა̈ჲ რა̈შს.

Line of edition: 17       აჩა̈დჷდ ი რა̈შდ ეჩაუ̂ ადჲე. კამინჩერიხა̈ჲ ლა̈თხუ̂ჲარს ა̈რი. მიჩა
Line of edition: 18    ხეხუ̂ ა̈გის ესხუ̂ი̄დ ი ლიჭუ̂დიე̄ლ ჩუ ათა̈̄შდჷნ ი ახღუ̂ა̄დ მიჩა ხეხუ̂.
Line of edition: 19    ეჩქას სგა̄დ ლახხუ̂ი̄დ ი კამინჩერიხა̈ჲდ ჩუ̄დ ადგა̈რ. რა̈შდ ფხულე
Line of edition: 20    ქა̄თქუ̂იც ი ა̈გით' ა̄დჲე. კამინჩერიხა̈ჲდ მიჩა ხეხუ̂ ა̈გითე ა̈დტიხ. და̈̄უ̂ს
Line of edition: 21    ფხულე ა̈გით' ო̄თჴიდ რა̈შდ. და̈̄უ̂დ ლოხფუ̈̄ლ ფხულა ი ჟ'ანსე̄ლუ̂ე
Line of edition: 22    მიჩა სა̈მუნ ი ათხე მეუ̂არ ადშგურა̄ნე: "მა̈დილუ ხე̄რა, ხეხუ̂ ნო̄საუ̂
Line of edition: 23    ანჴიდ ი ჩუ̄უ̂ ა̈თპა̈ჟ ეჩეჩუ ი ჩუ ადშგურა̄ნე მიჩა ხეხუ̂, ერე "კამინჩერიხა̈ჲს
Line of edition: 24    რა̈შ იმე ნათჷმ[უ̄უ̂] ხა̈̄ც?" ათხე გუთე ა̈დდე ი აჩა̈დ ი ქა ლა̈ხწუ̂ე̄ნა̈̄ნ
Line of edition: 25    ი აშგურა̄ნე სერ: "ბა̄ზი კამინჩერიხა̈ჲს სგაუ̂ როქ ა̈თკუ̂ი̄შა̈̄ნ
Line of edition: 26    ი გულუ̂ანდ ჟიუ̂ ა̈ნმეჴრე: "იმხა̈ნ ნათჷმ[უ̄] ხა̈̄ც მიჩა რა̈შ, ჲედე სემი
Line of edition: 27    ჭიშხ გარ იმნა̈რ ხა̄რ" ი მჷხა̈რ ესერ მა̈გ ქაუ̂ ხა̈̄ქუ̂!"

Line of edition: 28       ბა̄ზი ჩუ̂ა̈თპა̈ჟ ხელწიფი გეზალ ი ნა̈ბოზს კამინჩერიხა̈ჲ ანჴა̈დ. ხოჩა
Line of edition: 29    გუჟი ესხუ̂ი̄დ მიჩა ხეხუ̂ ი უ̂ოხშმობ ხა̄რხ: -- მიშგუ ლადეღ როქ სი,
Line of edition: 30    გუშგუ̂ეჲ რა̈შ იმხა̈ნ ნათჷმ ლი?
Line of edition: 31       -- იმხა̈ნ-ი გუშგუ̂ეჲ ლეჟა̈̄ნ მინდუ̂ო̈რისგა თუ̂ეთნე ჩე̄რხა ა̈რი ი ეჩი̄
Line of edition: 32    ნათაუ̂ ლი ალა.

Line of edition: 33       ეჩქა ჟ'ანჷ̄გა̈ნ ზურა̄ლ ი ეშხუ უ̂ედრა ლჷჯე ლაე ი ლჷჯოშ აბრა̈̄ლი
Line of edition: 34    ჩე̄რხას. ეჩქა კამინჩერიხა̈ჲდ ლი̄ცუ̂ნა̈̄ლ ა̈დბინე ი ზურა̄ლ ლა̈ხჭუ̂ედდა: -- მა̈ჲ
Line of edition: 35    როქ ჯაჩა?
Line of edition: 36       -- მა̈ჲ მო̄დ მეჩუ̂ე̄ნი, ჩე̄რხას ლჷჯოშ ხაბრა̈̄ლი, ჩე̄რხა̈̄ გეზალ რა̈შ
Line of edition: 37    ხოწუ̂ა ჲა̈სჷ, ჲედე ჯასმა იმე?

Page of edition: 112 
Line of edition: 1       -- ჲაღო როქ, იმხა̈ნ ათთიმ სი, იმუ̂ა̈̄ჲ მა̈̄ქუ̂ნი, ეჩას ხუ̂იჯრა̈უ̂ი,
Line of edition: 2    ადო იშგნა̈ ლი̄ქუ̂ს -- მა̄მა.
Line of edition: 3       -- ჲაღო, ამჟი ჰე ხი, გაცხა̈ჲდ ქა ჯა̈̄ქუ̂ნი: მეშხა ძუღუ̂ას ეჩხა̈ნთე
Line of edition: 4    რა̈შ ხა̈̄ბ, ეშდიჲარუ̂ინ იზა̈̄ლ ლადეღისგა ი ეშდჲერუ თხე̄რე ეჩეჩუ
Line of edition: 5    ხოდრა̈ჯი. ჲერუ̂ა̈̄ჲ ჲეშდიჲარუ̂ გიცა̈რს ეჯჲა̈რს სგო̄თჴიდე, ეჯა ლი
Line of edition: 6    აშხუ̂ სა̄ბლი მჷქაფ ი ეჯას ჩუ ხა̈მბეხ ჰა̈დურდ სა̄ბელს. მი ეშხუ გიცა̈რ
Line of edition: 7    ძუღუ̂ათე ა̈მშყა̈დ ი ეშხუ ჭიშხ მიშგუ̂ა რა̈შს ეჯღა ახქუ̂იცხ. ჲერუ̂ა̈̄ჲ
Line of edition: 8    უ̂ო̄შთხუ̂ ლჷჭიშხს ქა̈̄ნჴდე ეჩხა̈ნქა, ეჩი̄ მენწირ დე̄სამა ა̈რი ი
Line of edition: 9    მიშგუ̂ა რა̈შსი ეჯა ხა̈წრე.

Line of edition: 10       მე̄რმა ლადეღ კამინჩერიხა̈ჲ ლა̈თხუ̂ჲართე აჩა̈დ ი ხელწიფი
Line of edition: 11    გეზალს ქო̄ხო̄მბუ̂ე მა̈გ მიჩა ხეხუ̂დ ლჷცხჷრდ. ი აჩა̈დ და̈̄უ̂ა̈ ქორთე
Line of edition: 12    ჭყინტ. და̈̄უ̂დ იმედ ხა̈̄ქუ̂: "ალას ესერ ჯა გარ ლა̈ჲმეჲდი". ანჷგა̈̄ნხ და̈̄უ̂
Line of edition: 13    ი მიჩა სა̈მუნ, უ̂ო̄შთხუ̂ეშდ გიცა̈რ ლა̈ჲყედა̄ნეხ, ჲერუ̂ა̈̄ჲ ხეხუ̂ახ, ჩი̄
Line of edition: 14    ალჲა̈რ ა̈ლხნეხ. აჩა̈დხ ძუღუ̂ა̈̄ პილთეჟი. ჲეშდ გიცა̈რ ლჷხჷრჯაუ̂ე ხა̄რხ
Line of edition: 15    ი სემეშდ ჩუ ხაცუ̂ირხ. მა̈̄ზუმუ̂ა̈̄ჲ სა̈ჭირო ხა̄დხ, ეჩშელდ გიცრა̈ლ ი
Line of edition: 16    მიჩა სა̈მუნ, მა̈გ, ბარჯჟი ლა̈ჲსგურე ი ქა̄ჩა̈დ რა̈შთექა. რა̈შ ჩუ̂ა̈დზა̈̄ნ ი
Line of edition: 17    ჲეშდჲერუ გიცა̈რ თხე̄რა̈̄ლს ლოხშიდ ი ხოჩა ფაშა̈ტ მიჯნემ ლა̈ჲრმე.
Line of edition: 18    სგა ლოხუ̂დე ლაგა̈მ, ეშხუ ლჷზა̈ჲდ ესსიპდა; ჟ'ათგე ჰჷნგირ,
Line of edition: 19    ჲერუ ლჷზა̈ჲდ ესსპიდა; ჟ'ახსგურდა, სემი ლჷზა̈ჲ ზუმდ ესსიპდა. ჩუ̂ადჲე
Line of edition: 20    ძუღუ̂ათეჩუ ი ხაშგუ̂მინ პატრონს: "ჰჷნგირ ჩუ̂ა̈მიკდ ი ძუღუ̂ა̈̄ პილჟი

Line of edition: 21       ჩუ ხუ̂იგუ̂რა̈ნი!"

Line of edition: 22       [ამნე̄მ] ჰჷნგირ ჩოხკიდ, ჩუ̂ა̈დგურნა̈̄ნ რა̈შ ი ეშხუ ჩარექ ქუ̂იშე ა̈ნფო̄ნთე
Line of edition: 23    ი ეჩქა ჰჷნგირ ათგეხ. "ათხე ჟი როქ ლამსგურდად ი იმუ̂ა̈̄ჲთე
Line of edition: 24    ჯეკუ̂ეხ, ეჩხაუ̂ ლიი მა̈̄ქუ̂დ!" ჟი ლახსგურდახ ი აშხუ̂ მინუტისგა და̈̄უ̂ა̈
Line of edition: 25    ქორმჷყ ესგენეხ. ათხე და̈̄უ̂ ა̈გის ასა̈დ ი ხელწიფი გეზალ აჩა̈დ მიჩა
Line of edition: 26    ხეხუ̂თე. აშხუ̂ რა̈კს ეჩეჩუ აჩა̈დ, ჟი ლა̈ჲსგურე მიჩა ხეხუ̂ ი ახყა. ამ
Line of edition: 27    დრო̈უ̂ს სგა ლახხუ̂ი̄დ კამინჩერიხა̈ჲ ი ჰერ ესდე: [შიშდ] ესერ ჩუუ̂ აცუ̂ირ
Line of edition: 28    მიჩა ხეხუ̂!" ეჩქა ამი რა̈შდ თჷრტჷ̄ნ ლახდე: "მიჩა უდილ, ჯ' ე̄სერ
Line of edition: 29    ნჷმაუ̂ ანჴა̈დ მიჩა ლა̈შია̄ლთე, უდილ ესერ ხა̄რ ი ქა იჰრები!" ეჯა
Line of edition: 30    ეჯნემ მა̄დ ლა̈ჲშგედ ი დე ხეჯრაუ̂ა̈̄ნ, (ჰ)აუ̂ე მიჩა მჷნწირ ესამა ლჷმა̈რდლა̈სუ̂
Line of edition: 31    ი უშხუ̂ა̄რ ხოძგა̈რხ. ამი რა̈შს, ხელწიფი გეზლა̈შ, ეშხუ
Line of edition: 32    ჩარექ ქუ̂იშე ხაცუ̂მა. კამინჩერიხა̈ი რა̈შ ლახ ხეჴფი, ქუ̂იშა გარ ხა̈ბრე.
Line of edition: 33    ხელწიფი გეზლა̈ რა̈შ ლახ ხეჴფი, ჯიჯუ̂მჷყ ხა̈გლე. უ̂ოდე ჩუ ადგა̈რდა,
Line of edition: 34    ეჩქად უ̂ო̄შთხუ̂ ლჷჭიშხ რა̈შდ იშდუ̂ა̈რ ხაჴიდ კამინჩერიხა̈ჲს: "მიჩა
Line of edition: 35    უდილს როქ ჩუ დე̄მ ადგა̈რი!" ი იმუ̂ა̈̄ჲჟი ქა̈̄თჴა̈ფ ი მასტუ̄ნა ხაყერ,
Line of edition: 36    [ეჯა] ჟი ეჯჟინ ანხოჩუ̂ე ი კამინჩერიხა̈ჲ ჩუ ადგა̈რ. მიჯნემ ქუ̂იშე
Line of edition: 37    ჩადფჷთხნე ი ხელწიფი გეზალდ უ̂ო̄შთხუ̂ ლჷჭიშხ რა̈შს მიჩა ხეხუ̂
Line of edition: 38    ლახსგურე ი სემი ლჷჭიშხ რა̈შს ჯა ლახსგურდა ი ანღრიხ ამჟი ლჷხია̈დ.
Page of edition: 113  Line of edition: 1    სგა̄ნჴა̈დხ მეშხა და̈̄უ̂ა̈ ქორთე. მეშხა და̈̄უ̂დ ქუ̂ერწილ ჩომინ, აშირ
Line of edition: 2    დაჴჷლ ხაშჩუქუ̂რე, ქა̄ფიშუ̂დ ეჯჟი̄ნ. მე̄რმა ლე̄თ წჷრნი და̈̄უ̂თე აჩა̈დხ.
Line of edition: 3    ხოჩაჲ ქუ̂ერწილ ამნემ ხაყერ, აშირ ფუ̈რ ამნემ ხაშჩუქუ̂რე. მესმა
Line of edition: 4    ლადეღ თუ̂ეთნა და̈̄უ̂თე აჩა̈დხ. ხოჩაჲ მაინძლობ ამნემ ხაყერ, აშირ
Line of edition: 5    ჴა̈ნ ხაშჩუქუ̂რე ი აჩა̈დხ ამჟი ლჷკთილ ა̈გითე. ა̈გის ქუ̂ერწილ-ლა̈ხიადა̄ლ
Line of edition: 6    [აჩუ̂მინხ], ტერ-მოყუ̂არე, -- ნა̈̄თი, მა̈გ ა̈წჰეხ ჰა̈დურდ. მიჩა ლახუ̂ბასი̄
Line of edition: 7    მეუ̂არ ხახა̈რბხ.

Line of edition: 8       ჭირ ეჩე ა̈გცუ̂ი̄რა, ხინ ამეჩუ ა̈გუ̂ჴჷმრა. ლჷმზჷრე̄უ̂ ლიშდ!



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.