TITUS
Svan Prose Texts I (Upper Bal)
Part No. 73
Previous part

Text: 80 
Page of edition: 113 
Line of edition: 9 
80. ჩალისიმე


Line of edition: 10       ლჷმა̈̄რ, -- მი ამჟი მასმა, ბა̈ქ ლი, ჰა ტკიც, დეშ მიხალ, -- ლჷმა̈̄რ
Line of edition: 11    ეშხუ კე̄სა̈რ, მეხუ̂ტე მა̄რე. გეზალ მა̄მ ხარდე̄ნა. ეჯა ლჷმა̈̄რ იშგუ̂იდ
Line of edition: 12    კე̄სრი მახუ̂ში. ჩუ̂ალმეჩე̄ლი. ოთჭკუ̄რა, ერე "მიჩა ლირდე, ჸეჰ, დემნა̈რ
Line of edition: 13    ხაჯო̄ნა". ხაყა ალას ფა̈ჲტონ, მიჩა საკუთა̈რ. ხა̈̄ქუ̂ინ ალას: "მიჩ
Line of edition: 14    ესერ ფა̈ჲტონ ხაყა" ჟ'ახსგურდა ი ხა̈̄ქუ̂ინ: "ათხე ლჷჩედდ!" ჟი ხასგურ
Line of edition: 15    ი ესღრიხ. ათხე ჩოთშდა̈ხხ შუკუ̂, ეჩქას ლა̈ხჭუ̂ედდა მახუ̂ში:
Line of edition: 16    "იმთ' ე̄სღრი, ამჷნქა შუკუ̂ მა̄მა ლი სერ!" ათხე კე̄სა̈რდ ხა̈̄ქუ̂: "ეჩხაუ̂
Line of edition: 17    ლი̄ზი მაკუ მი [ე], იმთუ̂ა̈̄ჲთე შუკუ̂ მო̄მა ი̄რა". ეში̄ ესღრიხ. ათხე ჩა̄ჟა̈რ
Line of edition: 18    დეშ აჩა̈დხ ცხეკქა. ხა̈̄ქუ̂ინ მიჩა მეფა̈ჲტონეს: "ჲაღო, ათხე სი
Line of edition: 19    ჟ'ესჭონ, ჩა̄ჟა̈რ უ̂ეშგდ ა̈თიტხ ი მა̈გ სი ჯა̈̄ც: ფა̈ჲტონ ი ჩა̄ჟა̈რ[ი̄]. კე̄სა̈რ
Line of edition: 20    ჩუ̂ასა̈დ ცხეკისგა. ა̈დბინე ლი̄ზი, ესღრი ჭჷშხშუ̂ სერ ხოლა̄მ
Line of edition: 21    ცხეკქა. ამეჩუ სგა ლახხუ̂ი̄დ მეჩი მა̄რე. -- ხოჩაუ̂ ლადეღ ჯა̄რ! -- ამნე̄მ
Line of edition: 22    ხა̈̄ქუ̂ მეჩი მა̄რა, მეხუ̂იად:
Line of edition: 23       -- სი მა̄რე იმთ' ე̄სღრი ამექა? ამხაუ̂ შუკუ̂ მა̄მა ლი!
Line of edition: 24       -- მიი ეჯა მაკუ [ე́], იმთუ̂ა̈̄ჲთე შუკუ̂ მა̄მა ლი.
Line of edition: 25       -- იმღა ხიჩო ამჟი სი?
Line of edition: 26       -- სი ხოჩა მა̄რე̄მი ნამჴიჩ ჯეთჷ̄რი.
Line of edition: 27       -- ჩუ მიხა, ისგუ გუ̂ეშ იმჟი ლი. მი ჯა̈̄ქუ̂ნინე, ეჯჟი ჩუ̂ემნ. ჟ'ესჭონ
Line of edition: 28    სი ქორთე, უ̂ეშგდ ა̈ტხ. სი გეზალ მა̄მა ჯირი, ეჯღა ხაქრა̈უ̂ი
Line of edition: 29    თხუ̂იმს. მი ლაჯუ̂ედნე სი უ̂ისგუ̂ს (ალ წჷრნი უ̂ისგუ̂ ქა ლახბიშე).
Line of edition: 30    ჲაღო, სი ქორთე ა̈ტხ, ალ უ̂ისგუ̂ ჩუ̂აბუჴუ̂ ისგდ, ხჷნსგა ისგუ̂ა ხეხუ̂ს
Line of edition: 31    ხა̄მინ ი ხჷნსგა, სი წჷრნი ჭა̈გ ჯირი, ეჩას ხა̄მინ. ისგუ ხეხუ̂ ჩუ̂ა̈დღანუ̂ი,
Line of edition: 32    ისგუ ჭა̈გ ჩუ̂ა̈დჷნშდექი. ეჩქა მიჩა დრო̈უ̂ჟი ზურა̄ლ ა̈დღუ̂ა̈ჟი,
Line of edition: 33    მიჩა დრო̈უ̂ჟი ჭა̈გ ა̈დზო̄ლი. ეჯა ჭინტს ანთენ' ე, ზურა̄ლ, ჭა̈გ ყუ̂ა̈რილს
Line of edition: 34    ანთენი. ეჩქა აღერ სი სგუ̂ებნაუ̂, უ̂ორმო ათბჷრიჯ. ხამუ̂ა̈̄ჲ
Line of edition: 35    ჭყინტ ქა̈̄ნთენე̄ნს, ეჩქა შიშდ ჩუ̂ათაკუ̂რ ეჯ უ̂ორმოთე, ყუ̂ა̈რილ შომუ̂ა̈̄ჲ
Line of edition: 36    ა̈ნთენე̄ნს, ეჯაჲ ეჩელექუ̂ა ათაკუ̂რ უ̂ორმოთე, ეჩქა ბჷგიდ, ხოჩა̄მდ
Page of edition: 114  Line of edition: 1    ათლაფა̈რ, ნარჰათე დო̄სა ხა̈̄ცხ ლა̈სგიდ. ეჩქა ჭყინტს მა̈̄ჲ ლეზუ̂ებ ხეკუ̂ეს,
Line of edition: 2    ეჩას ჩა̈̄ჟს [ხოდა̈̄სგდას, ი მა̈̄ჲ -- ჩა̈̄ჟს, ეჩას ჭყინტს]. ჟ'ათგენ ეჯჲა̈რს მჷ̄ზნანა,
Line of edition: 3    ხოჴდე̄დხ ჩი ჰამს ი ნა̈ბოზს. აშხუ̂ თუ̂ეს დეცე ნარჰა დო̄სა ხეწეხ.
Line of edition: 4    ეჩქა აშხუ̂ თუ̂ეუნღო მა̈̄ჲ ღენ ი̄რახ, ეჯას ჟ'ეხმეჴრი.

Line of edition: 5       ათხე ლა̈ხჭუ̂ედდა მჷ̄ზნანას ალა, ეშხუ-ჲორუ ნაგზი ქა მეჩდე̄ლი, ეჩქა:
Line of edition: 6       -- ჯიხახ ჰა დე̄სამა, იმჟი ირდიხ ეჯჲა̈რ?
Line of edition: 7       -- ჭაბუ̈გს მესგუ̂რად ხაყა, ყუ̂ა̈რილს ლალსგურად, ეჯზუმ ნაცხა̈მ
Line of edition: 8    ლიხ.

Line of edition: 9       ალა ათხი̄დე̄ნა კე̄სა̈რს: -- ჲაღო, დე̄მჟი ხაჴჷრჴედ, ა̄უ̂ე მი ქა მაწუ̂ე̄ნედ.
Line of edition: 10       -- მა̈ჲ ი̄რა მიზეზ, ეჯჲა̈რს სი ქა ჯაწუ̂ე̄ნიდ.

Line of edition: 11       ათხე ქო̄თჴერდა კე̄სა̈რ ი ხაკუჩხ ხაწუ̂ე̄ნახ, ლახწუ̂ე̄ნეხ ი გულუ̂ანდ
Line of edition: 12    ლისგდი ხაკუ. ალა ლჷლფარე ლი. "ჟი ლოხბჷდდ ალას, ლაფრის, ი
Line of edition: 13    ქა მაწუ̂ე̄ნედ!" ამჟი დეცე ნარჰა ხეწა̈დხ. ჭაბუ̈გ ი ყუ̂ა̈რილ დეცე
Line of edition: 14    ნარჰა ჰამუ̂ა̈̄ჲ ხეწა̈დხ, იმუ̂ა̈̄ჲჟი ნა̈პო̄ლა̈რ, ჩიქე ჭაბუ̈გდ ანსკინე,
Line of edition: 15    ეჩჷნღო ყუ̂ა̈რილდ, იმთე დო აჩა̈დხ, თე დეშ ლახრეკხ, სგა ლა̈ხბა̄ქა̈̄ნხ
Line of edition: 16    შია̈რისგა.

Line of edition: 17       ათხე ეჯა მა̈ჲ ლი, ეჩქად ლუწხუ̂აუ̂ე ერ ლა̈სუ̂, კე̄სა̈რ იდგა̈რი, მარე
Line of edition: 18    მა̈ჲ ჩუ̂ემინას: "ეში̄ ცუ̂იდდ ლჷმა̈̄რ მიშგუ ლირდე. ეზერ ა̈გითე ესღურდა̈ს,
Line of edition: 19    ჩუ ხუ̂ადა̄უ̂შა̈ს მიშგუ̂ა თხუ̂იმს, ლა̈დი ალას დე̄მის ა̈ხუ̂სგიდნი̄ს,
Line of edition: 20    მა̈გუ̂ა̈რდ მერო̄ლ სური̄!" ათხე ანჷგა̈̄ნჷდ, ლახტუ̂ი̄ლ მიჩა მეფა̈ჲტონეს:
Line of edition: 21    "ჲაღო, იმთუ̂ა̈̄ჲთე ელღჷრდად, ეჩხაუ̂ ღური!" ქო̄ხჴიდ ამნე̄მ ფა̈ჲტონ,
Line of edition: 22    ჟ'ახსგურდახ ი ა̈დბინე ლი̄ზი, ესღრიხ აჯაღ: იმუ̂ა̈̄ჲ[დ] ეჩქად აჩა̈დ, ეჩაუ̂
Line of edition: 23    მეჩდე ლიხ. ამჩუ ჩოხქა̈ხ სერ, ალა უ̂ეშგდ ანტა̈ხ. ესღრი ცხეკქა კე̄სა̈რ,
Line of edition: 24    სგა ლახხუ̂ი̄დ [ეჯ ე́], ეჩქად ერ ლახხუ̂ი̄დ, მეჩი მა̄რე:
Line of edition: 25       -- ე, სი მა̄რე, ხოჩაუ̂ ლადეღ ჯა̄რ! -- ათხე მე̄რმე ფორმიშდ ლახხუ̂ი̄დ
Line of edition: 26    მეჩი მა̄რე: -- იმთე ღჷრი, ამექა შუკუ̂ მა̄მა ლი!
Line of edition: 27       -- ეჯა მაკუ მიი, იმთუ̂ა̈̄ჲთე შუკუ̂ დო̄სა ლი.
Line of edition: 28       -- ჩუ მიხა, ათხე იმუ̂ა̈̄ჲჟი ლუწხუ̂აუ̂ე ხი სი ი მა̈ჲ ჯაჭკჷ̄რა? სი
Line of edition: 29    ჯაკლი ჭაბუ̈გ ი მიჩა აფხნეგ რა̈შ. სი ქორთე ა̈ტხ ათხე, ეჯჲა̈რ ქორს
Line of edition: 30    ჯეხუ̂ახ სი.
Line of edition: 31       -- ბა̈ქ ლი, ხოჩა მა̄რე სი! ეშხუ ლამხუ̂ი̄დ ისგუ̂ა გუა̈რდ მეჩი
Line of edition: 32    მა̄რე, მარე ეჩი ლი̄ქუ̂ი̄სგდ ზარა̈ლ მაყერ, ადო მოგა̈ბ მა̄მა. ლა̈დი
Line of edition: 33    მა̄მა ხუ̂ირდო̄ლ სური̄, ეჯა ხოჩა̈̄დ მიშგუ̂ოუ̂დ. ათხე დეშ ჯიჯრა̈უ̂ი.
Line of edition: 34       -- ამჟი მა̄მა ლა̈სუ̂. ნომა ღედ ჯა̄რ, ხოჩა გუჟი ადე ქორთე. ეჯჲა̈რ
Line of edition: 35    სი ქორს ჯეხუ̂ახ.

Line of edition: 36       ათხე ჩოთჯჷრუ̂ე-ჲ ჟ'ესჭუ̂ე̄ნ ამნე̄მ, კე̄სა̈რდ. სგა̄ჩა̈დ ქორთე, ლახსინჯუ̂ე
Line of edition: 37    ალჲა̈რს. ალჲარე ლისგდის მა̈ჲ ხოჩა.

Page of edition: 115 
Line of edition: 1       -- ჲაღო, -- ხა̈̄ქუ̂ინ ამნემ, გეზალდ, მიჩა მუს (ალა ლი რა̈შს ი ჭაბუ̈გს
Line of edition: 2    ეშხუ თუ̂ე ხა̄რხ სერ): ათხე ჟ'ამპირისდ: მი ჟახე მაკუ!

Line of edition: 3       ანჴა̈დ მიჩა მუ, ჩუ̂ა̈დზუ̂ერ ბაპა̈რ, ჟ'ანპრისდე ალ ჭაბუ̈გ, ჟ'ათჟა̈ხ
Line of edition: 4    ჩალისიმე. "ათხე, მიშგუ მუ, მი ქორს დეშ ხუ̂იგნი, ხუ̂იზელა̈̄ლ,
Line of edition: 5    მაკუჩ, ერე ქუ̂ეყნიერობას ჩუ ხუ̂ი̄ზნე̄დ". ლახსგურდა მიჩა რა̈შს. ალა
Line of edition: 6    ეჯთა̄ნ რა̈შ ლი, ერე ჰა̈დურდ ჰაერშუ̂ [გარ] იზელა̈̄ლ: ჲეშდჲარუ̂ ზაუ̂ჲა̈
Line of edition: 7    ლეზელა̈̄ლს აშხუ̂ საათს ქა ღჷრიხ. ათხე [სერ] ქორთე ჟ'ესჭუ̂ე̄ნ, ანღრი.
Line of edition: 8    ნა̈ბოზ ლი. ქორთე ლიჴედ ხაკუ. ათხე იმუ̂ა̄ლე ჯუ̂ე̄დია ნაჯუ̂დას
Line of edition: 9    ნარჰი̄ლს ხეწა̈დ. "ამჟი ქორთე დე̄მ ტუ̂ეხნი. უ̂ოდ ეჩხა̄უ̂ დო ოდრინე,
Line of edition: 10    ეჩქად ქორთე დე̄მ ტუ̂ეხნი". აყირ ეჩხა̄უ̂ ი აჩა̈დ. სგა̈̄ხფედი̄ლა̈̄ნ, ლახსინჯუ̂ე,
Line of edition: 11    კარაულ ლჷგ. ათხე რა̈შს ჩოხქა̈ხ, სგა̈̄ხჴუ̂ა̈სგ ალას. "ჲაღო,
Line of edition: 12    მა̈ჲ ლი ამჩუ?" სგა ლოხცი̄რუ̂ე. ამეჩუ ეჯკა̈ლი ზურა̄ლ ა̈რი, [ერე]
Line of edition: 13    მიჩა თე̄რა̈ლს ამი̄თა̄ნ და̈̄რ ხოწუ̂ა. ათხე სგა̄ჩა̈დ ამხა̄უ̂თეჲსგა. ლახსინჯუ̂ეხ
Line of edition: 14    უშხუ̂ა̄რ, ეჩხა̄უ̂ ეჯა ა̈დკა̄ფ, ამხა̄უ̂ ალა, უშხუ̂ა̄რე მალატშუ̂,
Line of edition: 15    ბაჟ ქო̄თჩა̈დხ ეჩუნღო̄ნ ოხჴა̈დხ ბაჟ, უშხუ̂ა̄რ ლა̈ხცხო̄რპა̈̄ნხ. დი̄ნად
Line of edition: 16    ხა̈̄ქუ̂: -- ჭაბუ̈გ, სი ჭა̈შ, მი -- ხეხუ̂!

Line of edition: 17       ამნე̄მ, ჭაბუ̈გდ, უ̂არ ხა̈̄ქუ̂. -- მი მეხე̄ხუ̂ა̈̄ლ ჩიქე მა̄მა ხუ̂ი: აშხუ̂
Line of edition: 18    თუ̂ეჲა̈ ბეფშუ̂ ხუ̂ი!

Line of edition: 19       ალას ალა დე̄მ იჩო, ჟ'ახუნდუნა̈̄უ̂ნე. -- ჲაღო, ჩუ ლესუ̂, მარე მი
Line of edition: 20    ა̈გითე (ქორთე) ა̈ტხუ̂ენი, მიშგუ̂ა მუს ლა̈ხუ̂ჭუ̂ედნი. ნა̈ბ ჰე მეღუ̂ე̄ნი,
Line of edition: 21    ეჩქა ქა̈̄ნტხუ̂ენი.
Line of edition: 22    ეჩქა ალ დი̄ნად ხა̈̄ქუ̂:
Line of edition: 23       -- ეზერ, ჲაღო. ჲაღო, მი არა̄მ ლა̈დღი ლირდე̄ უ̂ადა გარ მუღუ̂ა
Line of edition: 24    ამეჩუ. მი იშა გეზალ ხუ̂ი? მი ხუ̂ი როკაპი გეზალ, ქაჯე̄თი ხელწიფიშ.
Line of edition: 25    არა̄მ ლადეღჷნღო მიშგუ დი ჴედნი. ეჩანღო სი მიშგუ̂ა თხუ̂იმს დე̄სა
Line of edition: 26    ხეწდენი.
Line of edition: 27       -- არა̄მ ლადეღს დე̄მის ხუ̂ი̄რგე. მი შიშდ ა̈ნტხუ̂ენი არა̄მ ლადეღ
Line of edition: 28    ჩიქდ.

Line of edition: 29       ეჩჟი ოთბაცე. ჩუ̂ა̈დყულუ̄რა̈̄ნხ ამჟი. დი̄ნად მჷსკა̈დ ქა ლახუ̂ე̄მ
Line of edition: 30    ალას. ათხე ალა ქორთე ანტა̈ხ, შუკუ̂ჟ' აჭკუ̂ა̈რი: "იმჟი მირ ოთექდ?"
Line of edition: 31    ალას ყჷლა ჭაბუ̈გ: "მი უსგუ̂ა̄მ ზაუ̂ ჩიქდ ლიჩი̄ჟა̄ლე ნა̈ბ მა̄მ მუღუ̂ე,
Line of edition: 32    მი არა ლჷნგა̈ზ მა̄რე გარ ხუ̂ი. ალას მიშგუ̂ა მუს იმჟი ხუ̂ა̈̄ქუ̂ნი,
Line of edition: 33    მიშგუ̂ა ლიჩი̄ჟა̈̄ლს!" დეშ ა̈ბდა̈უ̂ი. ეჩაუ̂ ოხჴა̈დ გუ̂ი, [ერე] სგა̄ნჴა̈დ
Line of edition: 34    ქორთე. ჩოხქა̈ხ მიჩა რა̈შს. მჷლდეღ ხორი მიჩა მუს. ამის ლერქუ̂ა̈ლ
Line of edition: 35    ხაშგუ̂მინ. ხოლა ლერქუ̂ა̈ლ ხუღუ̂ა მჷლდეღს, ალჲა̈რ ა̈დქუ̂ა̄ლე. სგა̄ჩა̈დ
Line of edition: 36    კუხნათე, ჩუ̂ესგურდა ტჷტისგა. ალა უ̂ა̈ზრა̈ლდ ა̈დკუ̂იჰხ, ხა̈̄ქუ̂ინხ კე̄სა̈რს:
Line of edition: 37    "კე̄სა̈რ, სი ფუსდ, ჩალისიმე ანჴა̈დ, ისგუ̂ა მჷლდეღს ლერქუ̂ა̈ლ
Line of edition: 38    ათა̄ღე, მიჯნე̄მ სგა̈̄დქუ̂ა̄ლე, სგა̄ჩა̈დ კუხნათე, ჩუ̂ესგურდა ტჷტისგა".
Line of edition: 39    ალა კე̄სა̈რს ხასჷმდა, ჩუ̂ა̈დსაკუ̂რელა̈̄ნ. სგა̄შჷ̄დხ კუხნათე: "მა̈ჲ ამბა̈უ̂
Page of edition: 116  Line of edition: 1    ლი, სი მა̄რე, მა̈ჲ ჯეყა̈რ?" ალა და̈̄უ̂ა̈ ნა̈ხუმსა̈რ დე̄მის ი̄მბუ̂ა̈̄ლ. ათხე
Line of edition: 2    ჟ'ა̈ნწახუ̂ა̈̄ნ კე̄სა̈რ, მა̈ჲ საკუ̂რელ. დე̄მის ი̄მბუ̂ა̈̄ლ, ჩუ ა̈რი [ამჟი], ჩუ̂ა̈დდეუ̂ა̈̄ნ.
Line of edition: 3    ათხე მა̈ჲ ჩუ̂ემინას, კე̄სა̈რ აჭკუ̂ა̈რი. ჲაღო, ეში̄ ცუ̂იდდ ლჷმა̈̄რ
Line of edition: 4    მიშგუ ლირდე!" ათხე ადჭკუ̄რე: "ჩუ ხუ̂იზუ̂რენი კე̄სრა̈ლს, მიშგუ̂ა
Line of edition: 5    ქონა̈ბს, მიშგუ̂ა კეთილს ჩი̄ ჩუ ხუ̂ა̄მნე ეჯჲა̈რს ი მინე საკე̄სროს"
Line of edition: 6    ქა̄თბა̈ჟნა̄ლე სერ ალ კე̄სრა̈ლს -- უსგუ̂ა̄მ მა̄რა. ანჴა̈დხ ალჲა̈რ. "ჲაღო,
Line of edition: 7    მიშგუ გუ̂ეშ ამჟი ლი, მი მახუ̂შიდ მა̄მა მაყა სერ. გეზალ მირდა, ამჟი
Line of edition: 8    ხეყა̈რ. სერ მიშგუ ლემკახე მა̄მაგუ̂ეშ ლი". ათხე ალჲა̈რს სა̈დილ
Line of edition: 9    ოხუ̂მა̄რე: "ხეკუ̂ეს ჩუ̂ესგურდე̄დდ სა̈დილდ!"ათხე ალჲა̈რს ხეჩდახ ეშხუ
Line of edition: 10    კინტო̈̄ კე̄სა̄რ. -- ჲაღო, სა̈დილდ იმე ლისგუ̂რიდ? -- ამნე̄მ რა̈̄ქუ̂: -- სა̈დილდ
Line of edition: 11    ლისგუ̂რიდ ნა̈ჲ კუხნაისგა, იმუ̂ა̈̄ჲ ა̈გის ჩალისიმე ა̈რი.

Line of edition: 12       ჩუ̂ასგურდახ ამჩუ. ათხე ახა̄დხ ლითრე. მჷმზჷრა̈̄ლიდ კინტო̈̄ კე̄სა̈რ
Line of edition: 13    ადგენეხ. ალა ა̈მზჷრა̈̄ლი. უ̂ეშგიმპილს ანმა̈ზრე: "ჲაღო, ათხე ლჷმზჷრე̄უ̂
Line of edition: 14    ლი სული სულთან იყოს, უყუ̂არდეს და აქ არ იყოს". ალა ქა
Line of edition: 15    ხასჷმდა ჩალისიმეს, ჟი ლა̄პა̈რ შიშდ, ქახიდ აჩა̈დ ი ჩუ̂ა̈დფჷთხნა̄ლა̈̄ნ.
Line of edition: 16    ჲაღო, ათხე უშკუ̂ ა̈ნშჷმა̈̄ნ: -- ქა ლამე̄მდ ჭიქ, ალას მიი ჩუ ხუ̂ა̈მზჷრი!

Line of edition: 17       კე̄სრა̈ლს ალა ჩუ̂ათხი̄დჷნხ: -- შიშდ ქა ლახბიშედ ჭიქ!

Line of edition: 18       ჟ'ანმა̈ზრა̄ლე ჩალისიმედ: -- ეს ღმერთმა ადღინგძელოს უ̂ისი სული
Line of edition: 19    სულთან იყოს, უყუ̂არდეს და აქ არ იყოს!
Line of edition: 20       -- გრუზინიო! -- გრუზინ მი დე̄სა მი̄ქუ̂ა! -- იმღა ჯა̄რ ალა ს' ა̄,
Line of edition: 21    გრუზინ? ალა კინტო̈̄ კე̄სა̈რდ ხა̈̄ქუ̂. ათხე ქა̄ხა̈̄ქუ̂ინეხ ჩალისიმეს:
Line of edition: 22    "ჲაღო, გრუზინ ალას ხაჟხა. მიშგუ გუ̂ეშ ამჟი ლი... " ქო̄ხო̄მბუ̂ე მა̈გ.
Line of edition: 23    ათხე ალჲა̈რს ათხი̄დჷნხ. "ამჟი კოჭო̄ლ მიზეზ ჰე ჯუღუ̂ა̈̄ნ, ხუნკუ̂ი
Line of edition: 24    იმღა მო̄დ მე̄ქა?" ათხე ქო̄ხჴიდხ მიჩა ლალსგურა რა̈შ, მიჩა ლერექუ̂
Line of edition: 25    ი იარა̈ღ. ჟი ლახსგურდა. ალჲა̈რდ ხა̈̄ქუ̂ინხ: "ნა̈ჲ ჟი ჯიღე̄ლუ̂ედ, სგა̄ხა̈ჲ
Line of edition: 26    ამხა̄უ̂თეჲსგა ისგუ ხეხუ̂!" აჩა̈დ ჩალისიმე, ადჰე ალ მინდუ̂ერმჷყ.
Line of edition: 27    არა ლადეღ ლა̈დი ა̈დსრულა̈̄ნ. ლახსინჯუ̂ე: მიჩა დის ესყა. ქა ლახთუ̂იფ
Line of edition: 28    ეშდჲარუ̂ თანა̈ღს ეჩხა̈ნჩუ. ბა̈ქ ოხჴა̈დ ჩალისიმეს, სგა დეშ ხეჰ'
Line of edition: 29    ა̄ლას. მა̈ჲ ჩუ̂ემინას? ათხე ლჷდგა̈რი სა̈ხჟი ჟ'ესჭუ̂ე̄ნ უ̂ეშგდ, ანტა̈ხ
Line of edition: 30    ქორთე, სგა̄ნჴა̈დ მიჩა მახუ̂შია̈რთე, კე̄სრა̈ლთე. ალა რა̈შს ჩუ მა̄მ ოხქა̈ხ,
Line of edition: 31    ეჩჟი ხაგჷრგა̈ლი ალჲა̈რს: "ჲაღო, ამჟი ლი მიჩა გუ̂ეშ, ამჟი: დეშ
Line of edition: 32    ა̈ჰუ̂იდ! უდგა̈რუ̈ნდ ეჩი უთხე̄ლად მი მა̄მა ხუ̂იგნი, ჟი ეჩის ხუ̂ედგა̈რი
Line of edition: 33    ქ' ე̄სა ოხსუ̂ედნი, ეჩას ჩუ̂ა̈თკუ̂იჰედ. ხოჩაუ̂ ლადეღ ჯა̄რხ, მი ღური სერ
Line of edition: 34    ი ალა ლი!..." ქა̈̄ხშუ̂იდბა̈̄ნ ამჟი ალჲა̈რს. აყირ ამნე̄მ მიჩა შუკუ̂ს, იმთე
Line of edition: 35    დო ესღრ ი, მა̄მა ხოხალ. ამთა̄ნ რა̈შჟი ჟი ხასგურ, აშხუ̂ ზაუ̂ჲა̈ ლე̄ზნა
Line of edition: 36    აშხუ̂ ლადეღ ღჷრი.

Page of edition: 117 
Line of edition: 1       ესღრი, ესღრი, ქუ̂ეყანა მა̈გ ჩოთშდა̈ხ. ამსუ̂ა̄ლდ დე̄მე ა̈რი სერ.
Line of edition: 2    ათხე მინდუ̂ერს ათა̄გა̈ნ, მინდო̈რი ჩოთშდა̈ხ. ათხე ლა̈ხჴა̈დჷნ ტეუ̂რი
Line of edition: 3    პილთექა. ამეჩუ ხოშა ჯიჰრა ხა̄გ. ალ ტეუ̂რ ჩინ მაშე̄ნე ლი. ჩალისიმე
Line of edition: 4    ესღრ' ამექა. ათხე ჯიჰრად ლახგა̈რგლი̄ნე (\\ ლახგა̈რგლე): "ო,
Line of edition: 5    სი მა̄რე მა̈ჲ ჭაბუ̈გ ხი. მი კუ̂ა̈დლი̄დ გარ ხუ̂ა̈სუ̂, ეჩქა ანჴა̈დ ამექა
Line of edition: 6    ისგუთა̄ნ მა̄რე, უ̂ეშგდ დე̄ს' ა̄ნტა̈ხ. ამექა ქ' ე̄რუ̂ა̈̄ჲ მეჩედ, ნა̈პო̄ლი
Line of edition: 7    დეშ მეტეხ ქა. ჲაღო, ჩუ̂ემჰუნა̈რ, ჩალისიმე, მი ჯა̈̄ქუ̂ნინე, ჰე დო̄მ
Line of edition: 8    ხიგნი ეში̄-ეში̄ უ̄ზად: უ̂ეშგდ ა̈ტხ კოჭო̄ლ, ამაფშუ̂დ ეჩქა ისგუ ცჷჴუ̂ემა̈დ.
Line of edition: 9    ჰემოშ მი ძირისგა მა̈ჴდე, კა̈ცხდ ჩუ̂ამბიჴუ̂ე, ეჩქა ქა̄დერ ამექა;
Line of edition: 10    ჰე დოშ ამბუჴუ̂ა, ეჩქა უ̂ეშგდ ა̈ტხ!" ანჴა̈დ ჩალისიმე ი უ̂ო̄შთხუ̂-უ̂ოხუ̂იშდ
Line of edition: 11    უ̂ერსს უ̂ეშგდ ატა̈ხ, ახფიშუ̂დ ცჷჴუ̂ემა̈დ, ხაჴიდ ალას ძირისგა,
Line of edition: 12    ისგდ ჩუ̂აბიჴუ̂, ნა̈ცლუუ̂ა̈რ ეჩხა̄უ̂-ამხა̄უ̂ ა̈დკა̄ფხ. აყირ ამნე̄მ მიჩა შუკუ̂ს,
Line of edition: 13    ესღრი ტეუ̂რქა ცხეკს. ჩოთშდა̈ხ ათხე ცხეკ. ცხეკი ეჩხე̄ პილს ცა̈ცხუ̂
Line of edition: 14    ხა̄გ ეჯზუმ, ერე ალ ჯიჰრაზუმ [ჩუ ლი].
Line of edition: 15       -- ო, ჭაბუ̈გ, სი მა̄რე, ჯიჰრას დე̄სა ახასდ მო?
Line of edition: 16       -- ადუ, -- ამნე̄მ ხა̈̄ქუ̂, -- ადუ!
Line of edition: 17       -- ჲაღო, მა̈ჲ ჯა̈̄ქუ̂ ეჯნე̄მ?

Line of edition: 18       ამნე̄მ ქა ხა̈̄ქუ̂ ამჟი-ი-ამჟი. -- ჲაღო, კოჭო̄ლ უ̂ეშგდ ა̈ტხ, მი [ჰ]ე მოშ
Line of edition: 19    ამბიჴუ̂ე, ეჩქა ჩუ ჯაყა ამექა მე̄ზიდ.

Line of edition: 20       ათხე ალა ატა̈ხ უ̂ოხუ̂იშდ-უსგუ̂ა უ̂ერსს უ̂ეშგდ, ახფიშუ̂დ ალას
Line of edition: 21    ცჷჴუ̂ემა̈დ, ალაჲ ჩუ̂აბიჴუ̂, იმუ̂ა̈̄ჲჟი ჯიჰრა.

Line of edition: 22       ათხე ესღრი, ესღრი შუკუ̂ს, მარე იმთე დო ესღრი, მა̈ჲ ხოხალ.
Line of edition: 23    ათხე აჭკუ̂ა̈რი: "მა̈ჲ ნიშა̈ნ ალა ლა̈სუ̂, იმუ̂ა̈̄ჲ მაგჷრგა̈ლდახ ჯიჰრა-ჲ
Line of edition: 24    ცა̈ცხუ̂?" მა̈ჲ დო ხელკი, მა̄მა ხოხალ, მარე ეში̄ ესღრი ი ესღრი. ნე̄სგა̈̄
Line of edition: 25    მინდუ̂ო̈რთექა მეჩდე ლი, სერ ჩუ ხოხალ რა̈შს: ალას მჷგჷრგა̈ლი და̈̄რ
Line of edition: 26    ხეთხი. ამჟი ხეყრენ ალასი̄. ათხე ნა̈ბ მა̄მა ხუღუ̂ა რა̈შს, გა̈რგლა
Line of edition: 27    ა̈დბინას, მარე მა̈ჲ ჩუ̂ემინას, ალა ჩუ ხეღუპა̈უ̂ი: აშხუ̂ უ̂ისგუ̂ი გეზლი̄რ
Line of edition: 28    ლიხ. თხუ̂იმი ხატკლებ, მუხუ̂ბეჲ ჩუ ხედა̈̄უ̂ში. ჩუ̂ესჷგა̈̄ნ ალ რა̈შ: "ჩალისიმე,
Line of edition: 29    ჩუ̂ამექხ ჩუქუ̂ა̄ნთე!" ჩუ̂ა̈დსაკუ̂რელა̈̄ნ ჩალისიმე. რა̈შდ ა̈დბინე
Line of edition: 30    ლიგჷრგა̈ლი. ლახსაკუ̂რა̈ლჷნ, ჩუ̂ანსკინე შიშდ ი ქა ლა̈ხყაჰა̈̄ნ კინჩხქა.
Line of edition: 31       -- სი ლახ გა̈რგლა ჩუ ჯიხალდა, იმღა მო̄დე მაგჷრგა̈ლდა̈ს?
Line of edition: 32       -- გა̈რგლა̈̄ ნა̈ბ მა̄მ მუღუ̂ე, მარე ხოლა̄მ ა̈გის ეგუ̂წჷხჷნ: სერ ათხე
Line of edition: 33    შუკუ̂ დე̄მთე გუ̂ა̄რ. აშხუ̂ ა̈გიქა გარ გუ̂ა̄რ ლა̄ზ. ეჩეჩუ ეჯკა̈ლიბ ჭიშგა̈რ
Line of edition: 34    ლი, [ერე] ყო̄რისგა ელი̄ზინიდ, [ეჩქა] ჲედ ყო̄რა̈ლ გუ̂ადა̄უ̂შეხ
Line of edition: 35    ჭიშგრიშ, მო̄დეი̄ ყო̄რა̈ლისგა ლახ სგა̄ლღრინედ, ყო̄რ სგა̈̄ნჩუ ეშხუ
Line of edition: 36    გუ̂ელჲა̈რშა̈პ აშხუ̂ა̈ნ ლჷგ, მე̄რმე გუ̂ელჲა̈რშა̈პ მე̄რუ̂ახან ლჷგ. ეჯჲა̈რ
Line of edition: 37    ეში̄ ეშხუ სი ჯურტყუ̂ი ი მე̄რუ̂ე მი მურტყუ̂ი!

Page of edition: 118 
Line of edition: 1       -- სერ მა̈ჲ ლუჩუ̂მინად?
Line of edition: 2       -- ჲაღო, მა̈ჲ ლუჩუ̂მინად-ი́ ათხე ჰე მოშ ჯა̈მჲედა, მი ჯა̈ქუ̂ნინე.
Line of edition: 3       -- ჲაღო, ქა მე̄ქა, ე მოშ მეჲმედი.
Line of edition: 4       -- ჲაღო, იმჟი ჩუ̂ემნ სი, ჯიხა მო? უ̂ეშგდ ალტეხდ სამ უ̂ერსჟი
Line of edition: 5    ი ეჩქა ქა̄მ[უ̂]ო̄შთხუ̂ინ მი. ეჯ ჭიშგრი ძირთეჲსგა სგა ალჰად, ეჩქა
Line of edition: 6    ეჯჟი ბჷგიდ მაჴ(დ) მადრა̈ჴ, ერე ჲერუ წუ̂ა̈დ ლეღუ̂ ამტყუფა. ეჯ
Line of edition: 7    ლეღუ̂ გიმთეჩუ ნომ' ა̈̄ჯშყეს, ეჯჟი ხეკუ̂ეს ერე ჭიშგრა̈ლს ჩუ̂ახჭემი
Line of edition: 8    ეჯ ლეღუ̂. ეჩქა ეჯჲა̈რ უშხუ̂ა̈რ ხექდიხ, ეჩქა ნა̈ჲ სგა̈̄ნჩუ ალსკინიდ.
Line of edition: 9    ეჩქა გუ̂ელჲა̈რშაპა̈რს ჴარჴ მჷკა̈რ ხე̄რახ, გუ̂იშგუ̂ეჲ ლირტყუ̂ი ხეკუ̂დიხ,
Line of edition: 10    ეჩქა ეჯ ლეღუ̂ ჲერხი აშხუ̂ ოთოკუ̂[რ], ჲერხი -- მე̄რმა, ეჩქა
Line of edition: 11    ეჯჲა̈რ დე̄მის გუ̂ა̈ჩოხ. ეჩქა ნა̈ჲ გუ̂იხა სერ [ი] გუ̂იშგუ̂ეჲ ლიმა̄რსუ̂,
Line of edition: 12    ეჩეჩუ მეშია̈̄ლ ეგუ̂ხო̄ლი.

Line of edition: 13       ჩუ̂ადშგურა̄ნე ამჟი რა̈შდ. ალა გაცხა̈ჲდ ამჟი ჩუ ჩუ̂ემინხ. სგა̄ჩა̈დხ
Line of edition: 14    ამხა̄უ̂თეჲსგა. ამეჩუ ლახსინჯუ̂ეხ: ეჯკა̈ლიბ რა̈შს ჟი ხასგურ, ერე
Line of edition: 15    ათყალუ̈̄ნდა ჩალისიმეს. სგა ხოძგა̈რ ეჯა ი იშია̈̄ლხ ჴაფშუ̂, იშია̈̄ლხ
Line of edition: 16    ი ჟ'ახწინდახ ჩალისიმე-ჲ მიჩა რა̈შ. ეჩქა ეჯნე̄მ ხა̈̄ქუ̂ინ, ერე "სი
Line of edition: 17    ჭა̈შ, მი ხეხუ̂!" ჩალისიმედ ხა̈̄ქუ̂: "იმ გა̈რგლი? სი ჴეც ხი! იმსგრა
Line of edition: 18    ლიხა̈ხუ̂, ჲედ ლიჭაშ[უ̂]?" ათხე [ესნა̈რ] ალას ბიდ ხა̈ჩშა ჴეციშ, ალა
Line of edition: 19    ქა̈̄დშყუ̂იფ. ლახსინჯუ̂ე, ამჷნ ხოჩა ჰა̈დურდ და̈̄რ ხოწუ̂ა. უშხუ̂ა̄რ ლა̈ხფო̄რცხა̈̄ნხ.
Line of edition: 20    სგა̄ჩა̈დხ ქორთე, ჩუ̂ასკიბხ ლიხეხუ̂-ჭაშუ̂. ალას ხაჟხა გრუზოუ̂ილ.
Line of edition: 21    ათხე ხეჭუ̂დიე̄ლ: -- სი მა̄რე, ამხა̄უ̂ ამსუ̂ა̈ლდჷლდ და̈̄ს ხოწუ̂ა. სი
Line of edition: 22    მა̈ჲ ხი ამკა̈ლი, ერე ამაუ̂ დო აღე? იმხა̈ნიშ ხი, მა̈ჲ ამბა̈უ̂ შჷდე ჩუქ
Line of edition: 23    მე̄ზი ხი?
Line of edition: 24       -- ჰჷ, მიშგუ გუ̂ეშ ლახ ჩუ ჯეხლი, მეუ̂არ ჯესკუ̂რელი.

Line of edition: 25       ათხე ქო̄ხო̄მბუ̂ე სერ, მიჩა გუ̂ეშ იმუ̂ა̈̄ჲჟი ლი, ალა მა̈გ. ათხე ამნე̄მ
Line of edition: 26    ადჭკუ̄რე: "მა̈გ მასმა ი ალა დე̄სა!" ბა̄ზი ჩუ̂ა̈რიხ უშხუდ, მჷხა̈რ
Line of edition: 27    ანჷგა̈̄ნ, ალა ჩუ̂აცუ̂ირ (მიჩა ხეხუ̂დ ჩუ ხაყა ლჷნშა̈ნ): "მი უ̂ოდე ეჯ
Line of edition: 28    ზურა̈ლა̈შს დო̄მის ხუ̂იმჴერი, ეჩურ მიშგუ ჟი ლიჭუ̂ე̄ნი [ბაც] მა̄მა ლი!"
Line of edition: 29    ათხე ესღრი, ესღრი. ერ მეჩდე ლი ქორხა̈ნქა, ამზუმ აჯაღ ამხა̈ნქა
Line of edition: 30    აჩა̈დ ი აჯაღ იმუ̂ა̈̄ჲჟი ამეჩუ ლა̈ხლაკ, ათხეი ლა̈ხლაკ; იმუ̂ა̈̄ჲჟი ხუნკუ̂ი,
Line of edition: 31    ამკა̈ლიბ მეშია̈̄ლ ესხუ̂ი̄დ. ოხჩჷ̄დხ ლიშია̈̄ლ. იშია̈̄ლხ ლა̈დი...
Line of edition: 32    ჟ'ახწინდა ჩალისიმე. ათხე ამნე̄მ ხა̈̄ქუ̂: "ჲაღო, ჟი ლა̈მღე̄ლა̈უ̂!" ალა
Line of edition: 33    სგა̄ჩა̈დ, მე̄რუ̂ე რა̈შ ა̈ნცა̄დუნე, ქა̄დ ანჴა̈დ, იშია̈̄ლხჷდ. ჟი̄დ ახწინდა.
Line of edition: 34    ათხე ჩალისიმე. -- სი ჭა̈შ, მი ხეხუ̂!
Line of edition: 35       -- ჸა̈ხ, -- ალა ხასკუ̂რელ: -- სი ჴეც ხი, ჲა̈რ ხეხუ̂-ჭა̈შ, ჲა̈რ გუ̂ეშ?

Line of edition: 36       ჟი ლა̈ჲშყუ̂იფ ბიდ, ლახსინჯუ̂ე, ჰა̈დურდ ამჷნ ხოჩა და̈̄რ ხოწუ̂ა
Line of edition: 37    ეზერ. სგა̄ჩა̈დხ ქორთე, ჩუ̂ასგურდახ, ლა̈ხჭუ̂ედდა: -- სიმა̄რე, მა̈ჲ ანბა̈უ̂
Line of edition: 38    ლი, იმხა̈ნ აღე, ღერთა̈ ნა̈ყუ̂ილ ხი, ჰა ამსუ̂ა̄ლდა̈შ?

Page of edition: 119 
Line of edition: 1       -- მი ხუ̂ი მა̄რე̄მი გეზალ, მარე ამჟი-ი-ამჟი ლი მიშგუ გუ̂ეშ ი ამაუ̂
Line of edition: 2    ლამჴა̈დჷ̄ნ.
Line of edition: 3       -- ჸოხ, -- ამნე̄მ ხა̈̄ქუ̂ (ალას ფაფრიკა ხაჟხა): -- ჸოხ, სი მა̄რე, კოჭ-კოჭო̄ლ
Line of edition: 4    მა̈გ მიხა, ღერთა̈ლ იმე ა̈რიხ, მა̈ჲ დო ლი, მა̈გ ჩუ მიხა, ჩი̄ს
Line of edition: 5    ქა ხოსგდი, მარე ამი̄შ მა̄მგუ̂ეშ მიხალ. მი მი̄რიხ ლაჯმილა, ჲერუ ლიხ.
Line of edition: 6    ეჯჲა̈რს ჰე̄სა ხეხლიხ ალ გუ̂ეშ, ადო სერ ეჩქა ბა̈ქ ლჷმა̈̄რ, დე̄მე
Line of edition: 7    ლჷმა̈რდ ი ლირტყოლა̈̄ლ ლჷმა̈̄რ. ნიშგუ̂ეჲ მუ ლა̈სუ̂ უსგუ̂ა̄მ ხელწიფი
Line of edition: 8    მახუ̂ში. მუ ჩუ̂ამდაგან. ეჩქა ხელწფა̈რდ მიშგუ̂ა ლაჯმილას მა̄მ ლახუ̂ე̄მხ
Line of edition: 9    ლიმხოშ, ნიშგუ̂ეჲ მუს მა̈̄ჲ ხუღუ̂ა̈̄ნ, ეჯ ლიმხოშ. ალა̄ ალჲა̈რდ
Line of edition: 10    ა̈დუ̂ა̈შგდეხ, მიშგუ̂ა ლაჯმილად. ათხე აჩა̈დხ ეჯჲარე ლა̈შია̄ლთე. ეჩე
Line of edition: 11    ა̈რიხ. ათხე სი ადერ, ეჯჲა̈რს ჟი ხელკი ი ჟ'ოხწად. შომუ̂ა̈̄ჲ ჟ'ა̈ხწინიდ,
Line of edition: 12    ეჩქა სგა̈̄ნტხენიდ ი, სი მა̈̄ჲ ჯაკუ, ეჯ გუ̂ეშს ჟ'ეხმეჴრი.

Line of edition: 13       ათხე აჩა̈დ ალა̄, ჩალისიმე, ი ლახსინჯუ̂ე, იშია̈̄ლხ: ჲერუ მა̄რე
Line of edition: 14    აშხუ̂ა̈ნ ლჷგხ, ათა̈ს მა̄რე -- მე̄რმახა̈ნ. ლოხუ̂სგიდა ალა̄, ჩალისიმე, ი
Line of edition: 15    აშხუ̂ხა̈ნ ანკუ̂ა̄ნეხ თუ̂ეფს, აშირ მა̄რე იდგა̈რი, აშირ თუ̂ეფს ეჩხა̈ნ
Line of edition: 16    აკუ̂ა̄ნეხ, ამხა̈ნ და̈̄რ იდგა̈რი. ათხე ადჭკუ̄რე ჩალისიმედ: ლიწე̄ნა̈̄ლ
Line of edition: 17    ალჲა̈რს მა̄მ ხა̈კუ̂დახ, ლიწე̄ნა̈̄ლ ხა̈კუ̂და ჯა̈რს, ჯა̈რს ხაწხე̄ნა ლიწე̄ნა̈̄ლ.
Line of edition: 18    ათხე ჩუ̂ესჷგა̈̄ნ ნე̄სგაჩუ, ლახსინჯუ̂ე: ჯა̈რს თუ̂ეფ ჩი̄ს ქა ხოხლა,
Line of edition: 19    ლახსინჯუ̂ე ჲარუ̂ მა̄რა: ალჲა̈რს ჩუ ხოჩქოუ̂ახ, ხეჴჷ̄რა̈̄ლხ ლიწე̄ნა̈̄ლს.
Line of edition: 20    ათხე ალჲა̈რთე, ჲარუ̂ მა̄რათე, აჩა̈დ. ამ დრო̈უ̂ჟი ჩუ̂აქუ̂ა̈ც ლიშია̈̄ლ.
Line of edition: 21    ალჲა̈რს კარა̈უ̂ ხო̄გხ, ქა̄ნჴა̈დხ ამხა̄უ̂ ი ეჯზუმ მა̈ფშა̈̄რ ლიხ, ერე სა̈დილი
Line of edition: 22    ლიზუ̂ებ მა̄მ ხა̈ჲმედახ. ჩუ̂ა̈თუ̄ჟდახ. ამ დრო̈უ̂ს ოხჴა̈დხ ამბა̈უ̂:
Line of edition: 23    "ჲაღო, ათხე ლიშია̈̄ლ!" ანჴა̈დ ჩალისიმე ი ალჲა̈რ ჟი მა̄მა ანჲა̈ცხუ̂ნე
Line of edition: 24    ი ქა̄ჩა̈დ ჯა, ლა̈ხჩჷდ ჯა̈რს, ხუ̂იტე, მარე მა̈ჲ ხუ̂იტე, ეჯზუმ ზისხ
Line of edition: 25    ადჷ̄გა̈ნ, ერე მიჩა რა̈შ ცორეუ̂ს იჩო ალ ზისხისგა ი ეჯჟი იშია̈̄ლხ.
Line of edition: 26    ჟ'ანხუ̂იტ მა̈გ. ათხე უ̂ეშგინპილს ქა̄დჰე [ეჩხა̄უ̂თექ' ე̄,] ხოჩა სადგუ̂ემ
Line of edition: 27    [ერ] ლჷგ. ამეისგა უსგუ̂ა ხელწიფ მა̈გ ამჩუ ა̈რიხ.
Line of edition: 28       -- ხოჩა̄უ̂ ლადეღ ჯა̄რხ ხელწფა̈რს! -- ჟი ლა̄შჷ̄დხ ალჲა̈რ: -- მა̈ჲ ამბა̈უ̂
Line of edition: 29    ლი? ამბა̈უ̂ს გუ̂ეშ ხაქდა. მა̄მა ჯიშგურხა? სგა̈ჲ ი ისგუ̂ეჲ ჯარა̈ლ ჲარუ̂
Line of edition: 30    მა̄რილს დეშ ახწინდად! შიშდ, ეჯჲარე მუს მა̈̄ჲ უფლობ ხუღუ̂ა̈̄ნ, ეჯა
Line of edition: 31    ჩუ̂ა̈მირდ, ქა ლამე̄მდ; იმუ̂ა̈̄ჲჟი მახუ̂ში ეჯა ლა̈სუ̂, ეჯჲარე მუ, ეჯჟი
Line of edition: 32    ხეკუ̂ეს ლესუ̂ხ ისგუ̂ეჲ მახუ̂ში ეჯჲა̈რ.

Line of edition: 33       ათხე ჲერხი ჭჷშხა̈რჟი ხეყჰა̈̄ლხ, ჲერხი ხოჲრიხ, ერე უფლობ,
Line of edition: 34    იმუ̂ა̈̄ჲჟი მინე მუს ხუღუ̂ა̈̄ნ, ეჯჟი ხეკუ̂ეს ეჯჲა̈რს ხუღუ̂ე̄დხ (\\ ხუე̄ნხ).
Line of edition: 35    ი ათხე ჩალისიმედ ჟ'ესჭუ̂ე̄ნ, სგა̄ნტა̈ხ ალჲარე კარა̈უ̂თეჲსგა. ალჲა̈რ
Line of edition: 36    ჩუ̄დ აუ̂ჟეხ ი ათხე ჟ'ანჲა̈ცხუ̂ნე, ალჲა̈რ ჟი ლა̄შჷ̄დხ: "მა̈ჲ გუ̂ია̈ნ
Line of edition: 37    გუ̂ე̄რა ლა̈შია̄ლთე?" ჲაღო, ჟ'ა̈ნკიდ ლა̈ირ ი ქა ლახუ̂ე̄მ. ალჲა̈რს ეჩჟი
Line of edition: 38    ათხი̄დჷნხ, [ერე] ჩუ დეშ იხუ̂იე̄სგიხ ჭჷშხა̈რჟი ლეყჰა̄ლდ. ათხე ა̈ნბინეხ
Page of edition: 120  Line of edition: 1    ლი̄ზი, ანღრიხ ქორთე. ალ ლახუ̂ბა ი̄მბუ̂ა̈̄ლხ: "მა̈ჲ ეზერ ი̄რა,
Line of edition: 2    ლახ მირ ნა̈ჲ დაჩუ̂ირ გუ̂ი̄რი, ეჩას ლახ ლა̈ჲშგედნე ალა ხეხუ̂დ!"
Line of edition: 3    ალას ი̄მბუ̂ა̈̄ლხ. ათხე ალას ხაჩა გუისგა ი ესღრიხ ამჟი. აჩა̈დხ ფე̄დიათე
Line of edition: 4    ქორა̈შ. ამჩიქქა ალჲა̈რს ქა ხეწა̈დ მინე დაჩუ̂ირ: "ანღრიხ
Line of edition: 5    მიშგუ ლაჯმილა, ჩალისიმეჲ სგა ხონჴრიხ!" ი ალა ქა ლა̈ხზაზ ალჲა̈რს.
Line of edition: 6    ხეწა̈დხ ალჲა̈რ მინე ჭიშგა̈რს, ამეჩუ ნა̈შია̄ლ ლი. ჟი ლახთირხ: "გუ̂იშგუ̂ეჲ
Line of edition: 7    დაჩუ̂ირ ჩუ ერე̄ს ოთფაჭუ̂ა ი ანღრი გუ̂იშგუ̂ეჲთე ი ჟ'ალქუცად
Line of edition: 8    თხუ̂იმ, ჰამუ̂ა̈̄ჲ ქა̄ნჴეს გუ̂იშგუ̂ეჲთე! ალას ი̄მბუ̂ა̈̄ლხ ალ ლახუ̂ბა. ალა
Line of edition: 9    ჩალისიმეს ქა ხესმი ი ხაჩა გუისგა. გაცხა̈ჲდ ქა ლა̈ხზაზ მინე დაჩუ̂ირ.
Line of edition: 10    უ̂ოდემ [ჩიქქა] თხუ̂იმს ჟი ხა̈ქუ̂ცეხ, ეჩქად ჩალისიმედ ჰერ ესდე: "ალა
Line of edition: 11    მიშგუ ხეხუ̂ ლი, იმნა̈რ მიდგა̈რიდ?" ალა ალჲა̈რს ათხი̄დჷნხ. მინსი
Line of edition: 12    ალა ხეკუ̂ა̈დხ. სგა̄ჩა̈დხ ქორთე. ბა̄ზი ხოჩა ლე̄თ ხა̄რხ. ათხე ახა̄დხ
Line of edition: 13    ლი̄მბუ̂ა̈̄ლ: "ჲაღო, იმთე ესღუ̂რი, მიშგუ̂ა გუ̂ეშს ალა ჯა̈̄ქუ̂ნიხ!" ათხე
Line of edition: 14    ქო̄ხო̄მბუ̂ე ფაფრიკად მიჩა ლაჯმილას: ამჟი ლი გუ̂ეშ ი ამჟი ამი̄ გუ̂ეშ.
Line of edition: 15    ალა ჩუ̂ათჩო̄ნხ ალ ყმარწუ̂ილა̈რს: "ეჩე ნა̈ჲ მა̈ჲ ნა̈ჲმედა ეჩხა̄უ̂ ლი̄ზი!
Line of edition: 16    ეჯა ჩუ ჰ' ა̈̄ს ხოცჷხ, ალას ხოცჷხ, ისგუ̂ა ხეხუ̂ს". ბა̄ზი ამჟი. მე̄რმა ლადეღ
Line of edition: 17    ალა მიჩა რა̈შს ხასგურ, ფაფრიკა მიჩა რა̈შს ლახსგურდა ი
Line of edition: 18    აჩა̈დხ. ესღრიხ, ლა̈ხჴა̈დჷ̄ნხ ქაჯე̄თი ქუ̂ეყანათეჲსგა. ლახსინჯუ̂ეხ: ეშხუ
Line of edition: 19    ძღჷდ ქორ თეს დე̄მის იხნი. ეჯ ქორ დე დეცს ხათილ ი დე გიმს
Line of edition: 20    ხათილ, ამჟი ლჷგ. ფაფრიკად ხა̈̄ქუ̂ ჩალისიმეს:
Line of edition: 21       -- ისგუ გრუზინ ეჩეისგა ა̈რი! ათხე იმჟი ხოჩა, ჲა̈რ ღჷრი ეჩხა̄უ̂თეჟი?
Line of edition: 22       -- ლი̄ზი მა̄მა მაგა̈რჯ, მარე ნა̈მდუ̂ილდ ჯიხა მო ჩუ, [ერე] ეჯა
Line of edition: 23    ეჩეისგა ირდი? -- ალა ხაყლე:
Line of edition: 24       -- ეჩეისგა ა̈რი, მარე ამი̄ დი ჲეშდჲარუ̂ თანა̈ღს ლი ქა მეჩდე.
Line of edition: 25    სი ხამუ̂ა̈̄ჲ ეჩხა̄უ̂თეჲსგა სგა̄დრინე, ეჯას ქა ხეწდენი, ეჩქა ამი̄ დი
Line of edition: 26    შიშდ ჯაბჟენი, შიშდ გუ̂აღუ̂იჭ. სგა ლახ ა̈გუ̂ჰო̄ლი, ძუღუ̂აისგა ლახ
Line of edition: 27    ა̈გუ̂ჰო̄ლა, ჟი გუ̂ა̈წრე ჩი̄ს, კადა̈რისგა ლახ ა̈გუ̂ჰო̄ლა, ეჩქა დეშმის
Line of edition: 28    გუ̂ა̈ჩო.

Line of edition: 29       ათხე ხაჴიდ მადრა̈ჴ ჩალისიმედ, სგა̄ჩა̈დ ალ მურყუ̂ამთეჲსგა. ამეჩუ
Line of edition: 30    ჩუ̂ესხუ̂ი̄დ მიჩა ხეხუ̂. გრუზინ ჩუ̂ა̈დჷმბაჟა̈̄ნ:
Line of edition: 31       -- იმხა̈ნ აღე, იმნე̄მ აჯჴიდ ამაუ̂? მა̈დილ ჯე̄რა იმუ̂ა̈̄ჲხა̈ნ აღე,
Line of edition: 32    [ეჩხა̄უ̂] შიშდ მოშ ა̈ტხ უ̂ეშგდ, ადო ათხე მიშგუ̂ა დის ჩუ მეკუ̂ჰე ხა̄რ
Line of edition: 33    ალა, შიშდ ჯეჰა ჟი ი ჩუ ჯადგა̈რი, მიშგუ̂ა თხუმ დე̄მის ჯა̈მბე!
Line of edition: 34       -- ეჩი̄ სერდე სი ნომა ჯა̄რ. ათხე მინჴერ, ლჷჩედდ! ეჯა მი მიხა.
Line of edition: 35    ეჯა ლახ ქა̈̄გუ̂ღუ̂ეჭნი, ნომა ჯაყლუ̄ნი!

Line of edition: 36       ათხე ქო̄ხჴერდა. ქა̄ნჴა̈დხ ფაფრიკა̈̄შთექა. ამნე̄მ ჟი ლა̈ჲსგურე მიჩაცახა̈ნ
Line of edition: 37    რა̈შჟი, ქა̄ნყირ. "სერ ათხე, საბლუ, -- ფაფრიკად ხა̈̄ქუ̂, -- ძუღუ̂აქა
Page of edition: 121  Line of edition: 1    ჲენასდ ლჷღჷრდე̄დდ, ხმელე̄თისგა წყჷნა̈̄რდ ელი̄ზინიდ, ეჩქა მა̄მა
Line of edition: 2    გუ̂აყლუ̄ნი". ათხე ლახსინჯუ̂ეხ, ახღუ̂იჭ როკა̈პ უ̂ეშგინ. ლახსინჯუ̂ეხ
Line of edition: 3    ალჲა̈რდ (ნე̄სგა ძუღუ̂აისგა ა̈რიხ): უ̂ოდემ ჩიქად სგა ხეჰა,
Line of edition: 4    ქა ლოხჩა̈შხ კადა̈რთექა. ათხე უ̂ეშგდ ესჭუ̂ე̄ნ ალ როკა̈პდ. ეჩეჩუ
Line of edition: 5    სემ' აშირ მა̄რე ლა̈ჲჴერნე, ქა̄დ ა̈ხღუ̂ა̈ჭ ი ლახსინჯუ̂ეხ ალჲა̈რდ:
Line of edition: 6    აჯაღ ახღუ̂იჭ ი ალჲა̈რ აჯაღ მე̄რუ̂ა ძუღუ̂აქა ესღრიხ. ფაფრიკად ხა̈̄ქუ̂ინ:
Line of edition: 7    "ჰარიქა, ქე̄ლკიდე̄დდ, ადო დეშ ლი მარჯობ!" უ̂ოდემ ჩიქად
Line of edition: 8    სგა̄დ ხეჰა, ეჩქად ალჲა̈რ ქო̄თჩა̈შხ კადა̈რთე. ათხი უ̂ეშგდ ესტა̈ხ ფაფრიკა როკა̈პს:
Line of edition: 9    "ამი̄ მორდა̈ბ, ისგუ̂ა გეზლა̈შ, [ჰე]მოდ მა̈̄ცეს ეჩქა მაგუ̂ა̈რ
Line of edition: 10    ლადეღ ჯა̈რ ღო!" ამნე̄მ ჟი̄დ ესჭუ̂ე̄ნ, როკა̈პდ. ათხე უსგუ̂ა აშირ
Line of edition: 11    მა̄რე ლა̈ჲჴერნე ი აჯაღ ქა̄დ ა̈ხღუ̂ა̈ჭ. ლახსინჯუ̂ეხ ალჲა̈რდ. ალჲა̈რ
Line of edition: 12    ხმელე̄თისგა ა̈რიხ, ეჯა ძუღუ̂აქა ახღუ̂იჭ მიჩა ჯარშუ̂. ათხე ფაფრიკა
Line of edition: 13    ჟ'ა̈ნჷმჯა̄რუ̂ა̈̄ნ ი უ̂ეშგდ ესტა̈ხ, როკა̈პ ი მიჩა მა̄რე აშხუ̂ რა̈კს მა̈გ
Line of edition: 14    ჟ'ანხუ̂იტ. ალჲა̈რდ ლიჴედ ა̈ნბინეხჷდ, სგა̄ნჴა̈დხ ფაფრიკა̈̄ ქორთე.
Line of edition: 15    ბა̄ზი ხოჩა ლე̄თ ხა̄რხ. ეზერ ხა̈ნს ამჩუ ა̈ნშუ̂ემხ. ეჩანღო ა̈ნმა̄რა̈̄ნხ,
Line of edition: 16    ანღრიხ. ფაფრიკაჲ ახყა ჩალისიმეს ი გრუზინი̄, ჲერუ ხეხუ̂ ახყა ქორთე.

Line of edition: 17       გრუზოუ̂ილ ერ ხა̄დ აჯაღ ლჷყდა̄ნე ხეხუ̂დ, ამხა̄უ̂თეჲსგა ანჰეხ.
Line of edition: 18    ალას მასა̈რდ ათხი̄დჷნ შუ̂იდებდ ლიჴედ ი ამი̄თა̄ნ ლა̈ხხუ̂ა შჷნ ხაყა.
Line of edition: 19    ათხე მესმა̄მდ ჯა ლოხჴერდა. ა̈ნბინეხ სერ ლიჴედ. ანღრიხ ჩალისიმე̄
Line of edition: 20    ქორთე. ამჟი სემი უ̂ერს ხო̄ზიხ ქორთე ლიჰა̄ლუ̂, ათხე ხა̈̄ქუ̂ინ ფაფრიკად:
Line of edition: 21    "ჩალისიმე, ჩუ̂ელჷ̄გენდ, ჯაყლე მჷრა̈̄მ! ათხე იმჟი ლი გუ̂ეშ,
Line of edition: 22    ჩალისიმე, სი მაგუ̂ა̈რ ლა̈ხხუ̂ა დო ჯაყა, ამი̄შ ჩუ მა̄მ ჯიხა!" ათხე
Line of edition: 23    ფაფრიკა ლა̈ხჭუ̂ედდა: -- მა̈ჲ ჯა̈ჲმედახ სგა̈ჲ?
Line of edition: 24       -- ნა̈ჲ -- აშხუ̂ემ ხა̈̄ქუ̂ინ -- მი მა̈̄ჲ მა [ლი] გიმჟი ი ლჷცისგა, დეცჟი
Line of edition: 25    მეპე̄რ, მეზელა̈̄ლ, ქა მჷრშკთექა, ჩი̄მი ამბა̈უ̂ ჩუ მიხა.

Line of edition: 26       ათხე მე̄რუ̂ა ლა̈ხჭუ̂ედდა: -- სი მა̈ჲ ჯა̈ჲმედა?
Line of edition: 27       -- მი მა̈ჲმედა, იმუ̂ა̈̄ჲ ჩოთჭკუ̄რი, ალა ამჟი იჩუ̂მინი ი მა̈გ ქა
Line of edition: 28    ისრული.
Line of edition: 29       -- ჲაღო, ალა მაჩე̄ნე ლი! -- ფაფრიკად ხა̈̄ქუ̂:
Line of edition: 30       -- ჲაღო, ნა̈ჲ გუ̂აკუ ამჩუ ეჩთა̄ნ ქორ, ერე ეჩი̄ ყო̄რ-ლაჴუ̂რას ქუ̂ეყნი
Line of edition: 31    ქა̈ჯ ი ჰეშმა̈ჲ ჟი დეშ იშჷლდა̈ნდე̄დს!
Line of edition: 32       -- ეზერ! -- ამნე̄მ ჩუ̂ესჭკუ̄რე. ლახსინჯუ̂ეხ, სგა̈̄ნ მინ ა̈რიხ, ქა̄მენ
Line of edition: 33    ამკა̈ლი ქორ ლჷგ. ეზერდ ლახბაჟჷნხ. ალ ქორს ქა ხეწა̈დ მა̈გ. ანბა̈უ̂
Line of edition: 34    ოხჴა̈დ ჩალისიმე̄ მუს: "ამჟი ლი გუ̂ეშ, ჩალისიმეჲ ანღრი, ამთა̄ნ ლა̈ხხუ̂ა
Line of edition: 35    ხაყა; ამჟი ქორ ადგეხ ამკა̈ლი ა̈გის". ეჩქა ალას, კე̄სა̈რს, მიჩა
Line of edition: 36    მუს, ათხი̄დჷნ. ჟ'ა̈ნმა̄რა̈̄ნ, ჩუ̂ა̈დწაბუ̄რა̈̄ნ ი ქა̄ჩა̈დ ლაწა̈დთე. ხეწა̈დ
Line of edition: 37    ლა̈ხხუ̂ას ჩალისიმე̄შ. მეუ̂არ მჷრე̄ს ლახლატჷნ ალ მეჩი მა̄რა. ქა̄ნტა̈ხ
Page of edition: 122  Line of edition: 1    მიჩა ქორთე. ბა̄ზი ამჟი ა̈რიხ, უ̂ოხშმობა̈ დრო̈უ̂ქა ამნე̄მ მიჩა უ̂ა̈ზრა̈ლ
Line of edition: 2    ჟ'ა̈დჰერ მიჩა ლარდათე.
Line of edition: 3       -- ჲაღო, უ̂ა̈ზრა̈ლ, მი ჯა̈̄ქუ̂ნინე: მჷხა̈რ ჰამს ჩალისიმეს ქა̈̄ჰჰო̈რნე
Line of edition: 4    მიშგუ̂ათე, ეჩქა სგა̈ჲ ჲეშდჲორუ სგო̄ხგუდირდად, ჩუ̂ა̈ხდედ. ეჩქა ეჯას
Line of edition: 5    კაბა̈ ჯიბისგა ქიპჷლდ ხუღუ̂ე, ბერჟა̈ ქიპჷლდ, ეჯა ჟ'ოხუ̂კიდდ, ჟ'ახკულთხნედ;
Line of edition: 6    ეჩანღო მი მა̈̄ჲ ჯა̈̄ქუ̂ა, ეჯა ხაყერდ.

Line of edition: 7       გუნ ეზერ! -- ჩუ̂ასკიბხ. ბა̄ზი მა̄მა. მე̄რუ̂ა ლადეღ მა̄რ' ო̄თზჷზე:
Line of edition: 8       -- ბაბა ღუ̂არა, ჩალისიმე, ქა̄ღე მიშგუ̂ათე! ხუ̂ა̈ჲ ხა̈ნ ლი, მი სი
Line of edition: 9    დე̄სა მიწუ̂ა. მარდნუნე ისგუ̂აცახა̈ნ!

Line of edition: 10       ამ დრო̈უ̂ჟი ჩალისიმე ქა̄ნჴა̈დ. ამნე̄მ ამჩუ ჲეშდჲერუ მა̄რე სგა̄ხშიდ
Line of edition: 11    ჩალისიმეს, ჩუ̂ა̈ნდეხ. ალას ხაჩა: "იმნა̈რ ხიჩოდ?" ეჩქა მიჩა მუდ
Line of edition: 12    ხა̈̄ქუ̂: "მა̈̄ზუმ ნაცხა̈მ ჯა̈̄ცეს გაუ̂ა?" ათხე ალჲა̈რდ ქო̄თქუ̂ითხ ჯიბხა̈ნჟი,
Line of edition: 13    ქიპ ხორდა, ეჯა ი ეჯნოშ ჟ'ანკულთხნეხ. ლახსინჯუ̂ე ჩალისიმედ:
Line of edition: 14    "მიშგუ მუ! მა̈ჲ ანბა̈უ̂ ლი ალა? ამნოშ იმნა̈რ ამკულთხნედ?" ათხე
Line of edition: 15    ხა̈̄ქუ̂ინ ამნე̄მ მიჩა უ̂ა̈ზრა̈ლს: "ჟ'ათხჲედ ხოშა̄მ ზაგა̈რთეჟი ი ქა̄თკუ̂ა̈რდ
Line of edition: 16    მიჟ ლაჰა̈რხა̈ნჩუ (ლამშგედთე)!" ალჲა̈რდ მა̈ჲ ჩუ̂ემინახ? ჟ'ადჲეხ
Line of edition: 17    გაცხა̈ჲდ, ჩუ̂ესდეხ ზაგა̈რჟი, თე̄რა̈ლ ქო̄ხკჷდჷ̄რეხ, მურსგუ̂ენ თე მჷრთენ
Line of edition: 18    ჯიბთე ეხუ̂დეხ, მჷრთენ თე მურსგუ̂ენ ჯიბთე ესუ̂დეხ, ქა̄დკუ̂ა̈რხ
Line of edition: 19    ამჟი, სერ მინ ქორთე ანტა̈ხხ. ალა აშყა̈დ კოჯქა ი იმუ̂ა̄ლე
Line of edition: 20    ჩუ̂აშყა̈დ ჰა̈დურდ ძირთეჩუ ი ამეჩუ ეჯზუმ ა̈მშყედ ალა, ერე მიჩა
Line of edition: 21    ლაკულთხა̈ნ ჟ'ესფჷშგჷრა̈̄ნ. ათხე ჩუ̂აშყად, ჩუ̂ა̈რი, მარე თე̄რა̈ლ მა̄მა
Line of edition: 22    ხა̄რ. მა̈ჲ ჩუ̂ემინას, იმთე აჩეს? ათხე ლახსჷმდა ლიცი ჰერ. ქა̄ჩა̈დ ამხა̄უ̂თექა
Line of edition: 23    ლაბგუნა̄ლუშ, სგა̄დქუ̂იჭე ტუ̂ეტ ლჷცთე ი ჩუ̂ა̈დბარა̈̄ნ ამეჩუ.
Line of edition: 24    ეჩანღო ჯიბთე ა̈დქუ̂იჭე ტუ̂ეტ, ჟი მირ ა̈ხბა̈გუ̂ მე̄ნშგუ̂ე, ჟ'ა̈ნკიდ ალა,
Line of edition: 25    ლა̈ჲჭემ თე̄რა̈ლქა, სგა ლოხო̄გა̈ნ თე, ლა̈სგიდ ხა̄რ. მასა̈რდ ათხი̄დჷნ.
Line of edition: 26    ათხე მე̄რუ̂ე ტუ̂ეტ ა̈დქუ̂იჭე ჯიბთე, ჟი̄დ ა̈ხბა̈გუ̂ ამი̄თა̄ნ, ჟ'ა̈ნკიდ,
Line of edition: 27    ლახსინჯუ̂ე, სგა̄დ ლა̈ჲგენე თე. ჲერქჷდა ხაყა თე̄რა̈ლ, მარე მიზეზ
Line of edition: 28    ხუღუ̂ე: მჷრთენ თე მურსგუ̂ენხა̈ნ ხო̄გ, მურსგუ̂ენ თე მჷრთენხა̈ნ ხო̄გ.

Line of edition: 29       ათხე ა̈ნბინე ლიჩედ ი ესღრი. იმთე დო ესღრი, მა̈ჲ ხოხა. ლა̈ხჴა̈დჷ̄ნ
Line of edition: 30    აშხუ̂ ქუ̂ეყანათე. სგა̄ჩა̈დ სოფელთეჲსგა. იზელა̈̄ლ ამჩუ. სადგუ̂ემ
Line of edition: 31    ხაწჷხ. ჩუ და̈̄რ ა̈გნე. ლახსინჯუ̂ე აშხუ̂ მეზგა, სგა̄ჩა̈დ ამხაუ̂თეჲსგა:
Line of edition: 32    "ხოჩა̄უ̂ ლე̄თ ჯა̄რხ!" ამეჩუ სგა ხასგურხ მეჩი მა̄რე ი ზურა̄ლ. ალჲა̈რ
Line of edition: 33    ხეხუ̂-ჭა̈შ ლიხ. სგა̄ჩა̈დ ამხაუ̂თეჲსგა ჩალისიმე.
Line of edition: 34       -- ჲაღო, -- ხეჭუ̂დიე̄ლხ: -- მა̈ჲ ანბა̈უ̂ ლი ი იმხა̈ნ ანღრი?
Line of edition: 35       -- მი დე ქორ მუღუ̂ე, დე დი მი̄რი, დე მუ ი ხუ̂იზელა̈̄ლ ამჟი
Line of edition: 36    შუკუ̂ა̈რჟი.

Line of edition: 37       ალჲა̈რს ათჩო̄ნხ: -- ჲაღო, ნა̈ჲ გეზალ მა̄მა ნი̄რი... ათხე სგა ლა̈ჲგენეხ
Line of edition: 38    გეზალდ. ჩუ̂ა̈რი სერ ამეჩუ. აშხუ̂ ლადეღ ადბა̈ჟნა̄ლეხ, ერე

Page of edition: 123  Line of edition: 1    "ლა̈დი ლახორთე ლი ლი̄ზი. მა̈გ ხეკუ̂ეს აჩეს თუ̂ით". ანჷ̄გა̈̄ნ ალა მეჩი
Line of edition: 2       მა̄რე, აჩა̈დ ლახორთე. ამეჩუ ლჷმჷრდე̄ლი ალ სოფლი მახუ̂ში. ამნე̄მ

Line of edition: 3       ხა̈̄ქუ̂ინ სოფელს, გუ̂ეშ იმჟი ლი (ალა ლჷმა̈̄რ კინტუ̂ე̄ჲ ქუ̂ეყანა): -- იმჟი
Line of edition: 4    ლი გუ̂ეშ, ჯიხახ მო? გუ̂იშგუ̂ეჲ კე̄სა̈რს აჯაღ კე̄სა̈რ მახუ̂ში ხარდე̄ნა.
Line of edition: 5    ეჯას ხარდე̄ნა გეზალ. ეჩას სემი ხეხუ̂ ოხჴი̄და. ეჯჲა̈რ მიჩა მუს ლახლატახ,
Line of edition: 6    ეჩი̄ ლა̈ხხუ̂ა, ი ა̈მჴედ ი გეზალ ჩოთდაგრა ი ათხე ეჩი̄ ლა̈ხხუ̂ა
Line of edition: 7    მიჩ ხაკუჩ. ეჯას ეჯჲა̈რ დე̄მ იჩოხ ი ლი ათხე ეჯ ქუ̂ეყანას ლიშია̈̄ლ
Line of edition: 8    აშ(ხ)უ̂ხა̈ნ -- ზურალა̈̄რ, მე̄რუ̂ახა̈ნ -- ალა მა̈გ. უ̂ოხუ̂იშდ სახელწიფ
Line of edition: 9    ჟი მეხუ̂ტე როქ ხა̄რხ. ათხე ანჰე გუ̂იშგუ̂ეჲთე ი ნა̈ჲ გუ̂ა̄რ ლე̄ზი ეჯჲარე
Line of edition: 10    ლა̈შია̄ლთე.

Line of edition: 11       მეჩი მა̄რე ბა̄ზი ქორთე ანჴა̈დ. ლა̈ხჭუ̂ედდა ჩალისიმე: -- ბაბა, იმშა
Line of edition: 12    ლახორ ლა̈სუ̂ ლა̈დი?
Line of edition: 13       -- ალ შდჷქდ ა̈ნჴუ̂დ ი ალა დე̄სა მიხალდა, ჰაუ̂ე აჯაღ მახუ̂შის
Line of edition: 14    მახუ̂ში ხარდა̈̄ნ ი ეჩე ეჩას ხარდე̄ნა გეზალ ჩალისიმე. ეჯას სემი ხეხუ̂
Line of edition: 15    ოხჴი̄და ი ეჩქა მიჩა მუს ლახლატა მიჩა ლა̈ხხუ̂ა. ჩალისიმე ჩოთდაგრა.
Line of edition: 16    ათხე ეჯჲა̈რ ხეხუ̂დ ხაკუ ეჯის როქ. ეჯჲა̈რ დე̄მ იჩოხ ი სერ ლიშია̈̄ლ
Line of edition: 17    ხა̄რხ. ათხე ნა̈ჲ როქ გუ̂ა̄რ ლე̄ზი ეჯჲარე ლა̈შია̄ლთე.

Line of edition: 18       ალა ჩალისიმეს ხასჷმდა, გუისგა გუნ ხაჩა: "ლჷკჩე, იმუ̂ა̄ლე ქორთე
Line of edition: 19    ლატა̈ხ მა̄რ!" მე̄რუ̂ა ლადეღ მა̈გ ა̈ნმა̄რა̈̄ნ, ჩალისიმეჲ აჩა̈დ. ათხე ადჰეხ
Line of edition: 20    ამაუ̂. ლოხსგიდა, ჩალისიმედ ჩუ̂ათირ მიჩა ლა̈ხხუ̂ა. ათხე ხაშგუ̂მინ
Line of edition: 21    მიჩა მუს:
Line of edition: 22       -- მახუ̂ში, ალჲარე ლიშია̈̄ლ ჰე ჯაკუ, სი ჯი̄რი ისგუ̂ა გეზალ ჩალისიმე̄
Line of edition: 23    რა̈შ, ეჯა ქა ლამდია̈̄ნ ი ალჲა̈რს მი ხუ̂ეშია̈̄ლ.

Line of edition: 24       ალა ამნე̄მ ა̈დსა̈სტკე: -- იმ ი̄მბუ̂ა̄ლნი ალ მა̄რე? ჩალისიმე̄ რა̈შს
Line of edition: 25    იმჟი ა̈ხსგური?!
Line of edition: 26       -- ეჩი̄ სერდე სი ნომ ჯა̄რ, მი ნა̈ბ ლა̄მო ეჩეჟი ლისგუ̂რე̄შ!

Line of edition: 27       ჲაღო, ქა ლოხთო̄ნე, იმუ̂ა̈̄ჲ ა̈გის ხობა̈̄ნხ. სგა̄ჩა̈დ ალა. ხეწა̈დხ
Line of edition: 28    უშხუ̂ა̄რ, უშხუ̂ა̈რ ლა̈ხფო̄რცხა̈̄ნხ რა̈შ ი ჩალისიმე. ქა̄ნჴიდ ქა̄მენთე,
Line of edition: 29    ჟი ლახსგურდა, ქა̄ჩა̈დ ათხე ლა̈შია̄ლთე. ხეწა̈დხ ალჲა̈რ ი იშია̈̄ლხ.
Line of edition: 30    დეჲ მოშ ათწინდახ ეჯჲა̈რ, დეჲ ალა: დეხდა ათწინდახ. ალა მეუ̂არ
Line of edition: 31    ხა̈ხია̈დხ: მჷხა̈რ ნო̄თაუ̂ ჟ'ახწინდა. ჩალისიმე იმედს ხაყლე: "ალჲა̈რს
Line of edition: 32    მი ჟი ხუ̂ა̈წრე". ალა მიჩა მუს მეუ̂არ ხა̈ხია̈დ. ბა̄ზი ზუროლა̈̄რ მეუ̂არ
Line of edition: 33    ლუწხუ̂აუ̂ად ა̈რიხ: -- ათხე მა̈ჲ ლი, ლა̈დი ძღჷდ მასკუ̂რელ, -- ფაფრიკა
Line of edition: 34    ხაყლე: -- ხა̈დურდ ხაჯეშ, იმუ̂ა̈̄ჲხა̈ნ ანჴა̈დ ჩალისიმე გუ̂იშგუ̂ეჲ? რა̈ში
Line of edition: 35    ეჩი̄შ ხაყა. ჩინა̈რ ჩალისიმეს ხაჯეშ, მარე მჷრთენ თე მურსგუ̂ენხა̈ნ
Line of edition: 36    ხო̄გ, მურსგუ̂ენ თე მჷრთენხა̈ნ, ეჩჷნქა! ჰა̈დურდ ხაჯეშ გუ̂იშგუ̂ეჲ ჩალისიმეს!..

Page of edition: 124 
Line of edition: 1       ალა, გრუზოუ̂ილ, გუდმეცა̈რ ლი: -- ნომა ღედ ჯა̄რხ, ეჯა გუშგუ̂ეჲ
Line of edition: 2    ჩალისიმე ლი!

Line of edition: 3       მე̄რმა ლადეღ ხა̈ხია̈დხ ალჲა̈რს ლიშია̈̄ლ. ეჩხა̈ნ ჩალისიმე ანჴა̈დ,
Line of edition: 4    ამხა̈ნ ალჲა̈რ. უ̂ოდ-ი-უ̂ოდ იშდრა̈̄ლხ, ეჩქა სგა̄ჩა̈დ მინე ქორთე. ჩალისიმე̄
Line of edition: 5    მუს ხოხალდა: ჟი მჷრე̄ს ჟ'ახწინდა. ამბა̈უ̂ ოთზჷზე:
Line of edition: 6       -- ჲაღო, ეჯჲა̈რ ქა̈̄ხჴერინ მიშგუ̂ათე!

Line of edition: 7       ეჯნე̄მ ლახტიხ: -- ჲაღო, სგა̈ჲ ჩუ̂ესგურდად. ისგუ აფხნეგა̈რ მა̈გ
Line of edition: 8    სგა ლა̈ხსგუ̂ირ, ეჩქა ქა̈̄ნჴუ̂დენიდ ნა̈ჲ.

Line of edition: 9       ჩუ ლუსგუ̂რე ესმჷგნე, ეჩქა ქა̄ნჴა̈დ ი სგა ლა̈ჲჴერნე ზუროლა̈̄რ.
Line of edition: 10    ჩალისიმე̄ მუ ჟი ლა̄პა̈რ ი ხაკუჩ ლიყჰა̈̄ლ, ეჩქა ეჯჲა̈რდ ხა̈̄ქუ̂ხ:
Line of edition: 11       -- ჩიქ' ე̄სერ ჩუ̄უ̂ ესგურდახ. მა̄დხუ̂ა̈ჲ ლი̄მბუ̂ა̈̄ლ ახე̄რახ. ეჩქა მინ
Line of edition: 12    ესერ მიჩა ლა̈ხხუ̂ა ი̄რახ. -- ეზერ.

Line of edition: 13       ათხე ახა̄დხ ლი̄მბუ̂ა̈̄ლ. ათხუ̂ი̄დ ლი̄მბუ̂ა̈̄ლ ფაფრიკას: -- ჲაღო,
Line of edition: 14    მიჩ ესერ ხასმა ეშხუ [ამბა̈უ̂]: აშხუ̂ მეჩი მა̄რა გეზალ მა̄მ
Line of edition: 15    ხარდე̄ნა ი ეჯას გეზალ ჩუ ხათხე̄ნა. გეზალს ამთა̄ნ ახფასა. ა̈მჴედე̄ლი,
Line of edition: 16    სემი ხეხუ̂ ხოთხა. ქუ̂ეყანაჟი ეჯჲა̈რდ ხოჩა დე̄სა ლჷმა̈რდ. ეჩანღო
Line of edition: 17    ეჯჲა̈რ ქორთ' ო̄ხჴი̄და. ეჩქა მიჩა მუს ეჩთა̄ნ ლა̈ხხუ̂ა̈̄ მჷჴდე გეზალ
Line of edition: 18    ჩოთდაგრა, ეჯჲა̈რ მიჩ ხა̈კუ̂და ხეხუ̂დ. ი, ხიად, სგა̈ჲ ხოჩა ღუ̂აჟა̈რ,
Line of edition: 19    ამკა̈ლი მა̄რა მა̈ჲ სა̈ხ ლახღუ̂ა? ქა̄ჩა̈დდ ათხე სგა̈ჲ, ალა ჩუ̂ათმო̄რუ̂ედ,
Line of edition: 20    სგა̄ნჴიდდ, იმჟი ათმო̄რუ̂იდ!

Line of edition: 21       ალჲა̈რ ჟი ლა̄შჷ̄დხ შიშდ, ქა̄ნჴიდხ ამბა̈უ̂: ეჩი̄ კალენ ამჟი ესერ
Line of edition: 22    ხაკა̈ფხ: ჲერუ̂ა̈̄ჲ ალას იჩო, ეჯა, კე̄სა̈რს ამჩუ ჩეი̄ ყო̄რ ხოწიბ, ეჯა
Line of edition: 23    ხეკუ̂ეს ჩუ̂ადქჷნთრინას ლემასგუ̂ისგა, ეჩხა̄უ̂თეჟი ჟ'ა̈დკუ̂არე̄ნს ეჯ მა̄რე
Line of edition: 24    ი ეჩეჟი ლეტყბე ლესუ̂.

Line of edition: 25       ათხე ხა̈̄ქუ̂ინ ფაფრიკად, ერე "ალა ჩუ̂ემინ ამნე̄მ. ჩალისიმე ამი̄ გეზალ
Line of edition: 26    ლი, ნა̈ჲ ამი̄ ლა̈თლა̈ღრა ხუ̂იშდ. ეჯ მა̄რე ლ' ალა!"

Line of edition: 27       შიშდ, გაცხა̈ჲდ, ჩუ̂ადქჷნთრინეხ ყო̄რ, ჟ'ადკუ̂ა̈რხ ალა ეჩხა̄უ̂თეჟი,
Line of edition: 28    ჟ'ანტყაბეხ ი ალა ჩუ̂ესსა̈დ ჩალისიმეს -- ამი̄ საცხოუ̂რებელ, ქონა̈ბ ი
Line of edition: 29    მა̈გ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.