TITUS
Svan Prose Texts I (Upper Bal)
Part No. 74
Previous part

Text: 81 
Page of edition: 124 
Line of edition: 30 
81. ხმელიკურა


Line of edition: 31       ხელწიფს სემი გეზალ ხორდა. მაშე̄ნე ი მანე̄სგრე, მა̈̄ჲ ლადეღ
Line of edition: 32    ჴედენდა, ჩი ლადეღ ბაზა̈რთე ღჷრდახ, მაჰუ̂რე̄ნე დე̄მთე მეჩდე̄ლა̈სუ̂.
Line of edition: 33    ანჴა̈დ ეშხუ ლადეღ. ანგა̈̄წყობლე ფა̈ჲტონ, აჩა̈დხ ბაზა̈რთე. იზელა̈̄ლხ,
Line of edition: 34    სგა̄ჩა̈დხ დუქა̈ნთეჲსგა ლოხსგიდახ ეჩხა̄უ̂-ამხა̄უ̂, ზურა̄ლა̈ ნახა̈ტს
Line of edition: 35    ხეწა̈დხ. [მაშე̄ნე] ქა̈̄დკა̄ფ უ̂ეშგინჩუ ამი̄ მალატშუ̂. მედუქა̈ნს ჰელ
Line of edition: 36    ესბჷ̄დ: "ხელწიფი გეზალ მიჩა დუქა̈ნისგა როქ ალდაგა̈რლი!" ამჟი
Line of edition: 37    ქა̈̄ნცოცხლა̈̄ნ. ჟ'ადკუ̂ა̈რხ ფა̈ჲტონთეჟი, ა̈გით' ა̄ნჴიდხ. ა̈გის ხეჭუ̂დიე̄ლ
Page of edition: 125  Line of edition: 1    მიჩა მუ: -- მა̈ჲ როქ ათყერა? -- მა̈ჲ ესერ-ი́ ზურა̄ლა̈ ნახა̈ტს ხუ̂ეწდ, ეჯა
Line of edition: 2    ხეხუ̂ მო̄მა მე̄რა, ეჩქა მიშგუ̂ა თხუმ ჩუ ხუ̂ადგა̈რი. -- ეზა̈რ, ეჯას მი
Line of edition: 3    ჩუ̂ა̈ჯხუ̂ი̄ნე.

Line of edition: 4       ჟ'ანმა̄რე მაშე̄ნე მუხუ̂ბე, აშირ მჷჩა̈̄ჟი, აშირ მუქუ̂ე̄თი ადზჷზე, სამ
Line of edition: 5    ზაუ̂ჲა̈ უ̂ადა ლახუ̂ე̄მ: -- ეჩქა ემა ა̈ნჴდენი, ეზა̈რ, ი ე მო̄დე, ისგუ თხუ̂იმ
Line of edition: 6    ლჷდაუ̂შე ი̄რა.

Line of edition: 7       აჩა̈დ სემი ზა̈ჲ, დემხა̈ნ ანჴა̈დ. ანმა̄რე მანე̄სგრე მუხუ̂ბე. აშირ მჷჩა̈̄ჟი,
Line of edition: 8    აშირ მუქუ̂ე̄თი, სემი ზა̈ჲა̈ უ̂ადა ლახუ̂ე̄მ. დე̄სა ანჴა̈დ. ა̈ნმა̄რა̈̄ნ მაჰუ̂რე̄ნე

Line of edition: 9       ლეჩჟჷ̄რი, აშირ მჷჩა̈̄ჟი, აშირ მუქუ̂ე̄თი ესღრიხ მინდო̈რთეჲსგა. ამჩუ ჩუ̂ა̈რიხ
Line of edition: 10    სემი და̈̄უ̂ა̈რ, ეშხუ მა̄რე ჩუ ხონხახ, ბერჟა̈ კეტა̈რს ხატყციხ. ალას
Line of edition: 11    ხეწა̈დ ხელწიფი გეზალ ჭყინტ. სგა̈̄თჴჷ̄რა̈̄ნ: "ხაპა̈ტიუ̂ეხ[უ̄] როქ. მა̈დილუ
Line of edition: 12    ხე̄რახ, ალ მა̄რე! აშირ მჷჩა̈̄ჟი, აშირ მუქუ̂ე̄თი მინს[უ̄] ხოსიპხ
Line of edition: 13    ლერსგუ̂ანთე". და̈̄უ̂ა̈რ დე̄მ ხა̈ტხეხ: "ათხე როქ ოთკუ̂არახ შჷნთეჲსგა.
Line of edition: 14    ალას როქ ქუ̂ინს დე̄მის ხა̈ცუ̂რეხ".

Line of edition: 15       ნა̈ბ ი უნბილ მა̈გ ოთნა̈ჩდე. ქა ლახტიხხ და̈̄უ̂ა̈რდ ალ მა̄რე. ჟ'ანჷგა̈̄ნ, ქა

Line of edition: 16       ლა̈ხყაჰა̈̄ნხ. ჟახე ახჭუდიე̄ლეხ: ხელწიფი გეზალს ჭყინტჷლდ ხაჟხა,
Line of edition: 17    და̈̄უ̂რე ლედგა̈რის ხმელიკურა ხაჟხა. ხმელიკურა ლა̈ხჭუ̂ედდა ჭყინტჷლდს:
Line of edition: 18       -- იმთ' ე̄სღრი? -- იმთ' ე̄სღუ̂რი-ი ლა̈ჩი̄ჟა̄ლთე. -- მა̈ჲ ლა̈ჩი̄ჟა̄ლთე! -- სურასა̈ხი
Line of edition: 19    ლა̈ყდა̈̄ნთე.

Line of edition: 20       ხმელიკურად ხა̈̄ქუ̂ინ: -- ეჩხა̄უ̂ ქა ხუ̂ა̈ჲ მეჩდე̄ლი, მარე ქა და̈̄რ მეტხე̄ლი.
Line of edition: 21    ათხე ნა̈ჲ ალღრიდ, ჰე მოშ ჩუ̂ა̈ლხუ̂ინედ, ეზა̈რ ი̄რი.

Line of edition: 22       სგა ლა̈ხნაბნა̈̄ნხ ლახუ̂ბად, აჩა̈დხ. სგა̄ჩა̈დხ მეშხა ქუ̂ეყანათე. სოფლი
Line of edition: 23    თხუმ უ̂ოთახა̈რ ლჷგხ. ჟ'აჩა̈დხ ამხა̄უ̂. ქა̈̄ნსგიდა ეშხუ სი̄მაქ, ეზა̈რ
Line of edition: 24    სი̄მაქ. ამნემ ხა̈̄ქუ̂ინ: "შიშტუ ესჭუ̂ე̄ნხ, ფისრა̈ჲ მიშგუ ჭა̈შ ჴეც ალ
Line of edition: 25    სოფლი მახუ̂ში ეჯა ლი. ჰა̄ლ ა̈ნჴდენი, ჩუ ჯადგა̈რიხ სგა̈ჲ!" ხმელიკურად
Line of edition: 26    ხა̈̄ქუ̂ინ: "ეჩი̄ ღედ სი ნომა ჯა̄რ, მი ეჯა ჩუ დეშ მა̈წრე!"
Line of edition: 27    სგა̄ჩა̈დხ, სა̈დილ ლალე̄მხ. ნა̈ბოზს ანჴა̈დ ჴეც. ჭიშგრი ყო̄რ სგა̈̄ნ ხმელიკურა
Line of edition: 28    ჩუ̂ა̈თპა̈ჟ. ჴეც რა̈შს ჟი ხასგურ. აშხუ̂ა̈ნჩუ ღუ̂აშ ხორიკ, მე̄რუ̂ახა̈ნჩუ
Line of edition: 29    უკჷრცხა ღუმი̄რ. სგა̄ნჴა̈დ ჭიშგრი ყო̄რთეჟი. ამჩუ რა̈შ
Line of edition: 30    ჩუ̂ადჷგა̈̄ნ. მადრა̈ჴ ხაჴიდ: "იმნა̈რ ჯაყლუ̄ნი? ხმელიკურა მა̄მ ა̈რი ამეჩუ!
Line of edition: 31    "ქა̄ნსკინე ხმელიკურად, სგა ხაფხეჭ ნადა̈̄ურას, იბჷრგიე̄ლხ. ეშხუ
Line of edition: 32    ქუთუ̄ლთეჩუ ხა̈თუ̂ფეხ, მე̄რუ̂ე ლა̄რტყათეჩუ. ჩუ̂ა̈ნდე ნადა̈̄ურა, თხუ̂იმ
Line of edition: 33    ათქუ̂იც. ბა̄ზი ამეჩუ ა̈რიხ. ხეჭუ̂დიე̄ლხ: "მა̈ჲ როქ ლი ამი̄ ბედჟი?"
Line of edition: 34    ზურა̄ლ ხა̈ტხე: -- ქა როქ ხუ̂ა̈ჲ მეჩდე̄ლი, მარე ქა და̈̄რ მეტხე̄ლი.

Line of edition: 35       მე̄რუ̂ა ლადეღ ანჷგა̈̄ნხ, აჩა̈დხ, სგა̄ჩა̈დხ წჷრნი ქუ̂ეყანათეჲსგა. სოფლი
Line of edition: 36    თხუმ უ̂ოთახა̈რ ლჷ̄გდახ. სგა̄ჩა̈დხ ამხაუ̂თეჲსგა. ქა̈̄ნსგიდა ხოჩა
Line of edition: 37    სი̄მაქ: -- შიშდ ესჭუ̂ე̄ნდ, ადო მიშგუ ფისრა̈ჲ ჭა̈შ შიშტ ჩუ ჯადგა̈რიხ!
Line of edition: 38    -- ეჩი̄ გუნა̈ბ სი ნომა ჯა̄რ, მი ეჯას ჩუ ხუ̂ეხუ̂ა! -- სგა̄ჩა̈დ, სა̈დილ
Page of edition: 126  Line of edition: 1    ანმა̄რე. ნა̈ბოზს ანჴა̈დ წჷრნი და̈̄უ̂, რა̈შს ჟი ხასგურ. აშხუ̂ა̈ნჩუ ღუ̂აშ
Line of edition: 2    ხოწიბ, მე̄რუ̂ახა̈ნჩუ უკჷრცხა ღუმი̄რ. ჭიშგრი ყო̄რთეჟი ანჴა̈დ, მადრა̈ჴ
Line of edition: 3    ხაჴიდ: "ნომ ჯაყლუ̄ნი, ხმელიკურა მა̄მ ა̈რი ამეჩუ!" ქა̈ნსკინე
Line of edition: 4    ხმელიკურად, იბჷრგიე̄ლხ, ლა̄რტყათეჩუ ხმელიკურა ხა̈თუ̂ფე, ლა̈ნკუთხათეჩუ -- და̈̄უ̂.
Line of edition: 5    ჩუ̂ა̈ნდე ნადა̈̄ურა, ქა̄თქუ̂იც თხუ̂იმ. ბა̄ზი ამეჩუ ადჷგა̈̄ნხ.
Line of edition: 6    ლა̈ხჭუ̂ედდახ ალ ზურა̄ლს. ალ ზურა̄ლდ ხა̈̄ქუ̂ინ: -- მი იშგენ დე̄სმა
Line of edition: 7    მასმა: ქა ხუ̂ა̈ჲ მეჩდე̄ლი, ქა და̈̄რ მეტხე̄ლი. მიშგუ̂ა უდილს მა̈გ ხოხა,
Line of edition: 8    თუ̂ეთნა ქუ̂ეყანას თუ̂ეთნა და̈̄უ̂ა̈ ხეხუ̂ ლი. ეჯა გუდმეცა̈ლ ლი: მა̄რე
Line of edition: 9    ჩუ ლახ ა̈დდაგრი, ჟ'ასე̄ლუ̂ე. მა̈გ ხოხა ჰა̄დურდ, ჩი̄ს იჩო. ღე̄რბათზუმ
Line of edition: 10    გარ მა̄დე ხობიც, მარე ეჩი̄ ჭა̈შ ჴეცრე მახუ̂ში ლი ი ეჯას და̈̄რ
Line of edition: 11    მოშ ხა̈წრე.

Line of edition: 12       მე̄რუ̂ა ლადეღ აჩა̈დხ, სგა̄ჩა̈დხ თუ̂ეთნა ქუ̂ეყანათე. ამჩუ სოფლი
Line of edition: 13    თხუმ თუ̂ეთნე ქორა̈ლ ხო̄გხ. სგა̄ჩა̈დხ ამხაუ̂თეჲსგა. ქა̈̄ნსგიდა სი̄მაქ.
Line of edition: 14    ლოხუ̂სგიდახ სურასა̈ხი კარტიჩკას. სურასა̈ხიშთა̄ნ დეშ ლი, მარე
Line of edition: 15    ხუ̂ა̈ჲ მა̄მა ხაკლი. ხა̈̄ქუ̂ინ ალჲა̈რს: -- შიშტუ აჩა̈დხ, ადო მიჩა ფისრა̈ჲ
Line of edition: 16    ჭა̈შ შიშდ ჩუ ჯადა̄უ̂შეხ. -- ეჩი̄ გუნა̈ბ სი ნომა ჯა̄რ, მი ეჯა
Line of edition: 17    დეშ მა̈წრე!

Line of edition: 18       სა̈დილ ანმა̄რე. ნა̈ბოზს და̈̄უ̂ ანღრი. თუ̂ეთნა რა̈შს ჟი ხასგურ.
Line of edition: 19    აშხუ̂ა̈ნჩუ ღუ̂აშ ხორიკ, მე̄რუ̂ახა̈ნჩუ უკჷრცხა ღუმი̄რ. სგა̄ნჴა̈დ ჭიშგრი
Line of edition: 20    ყო̄რთეჟი, რა̈შ ჩუ̂ადჷგა̈̄ნ. მადრა̈ჴ ხაჴიდ: "იმსგა̈ჲ ხმელიკურა ა̈რი!"
Line of edition: 21    ქა̄ნსკინე ხმელიკურად, იბჷრგიე̄ლხ. ჩუ̂ა̈ნდე ნადა̈̄ურა, თხუ̂იმ ახქუ̂იც,
Line of edition: 22    ჩუ̂ადგა̈რ. ბა̄ზი ხოჩა ლე̄თ ხა̄რ ამი̄ ხეხუ̂ს. ხმელიკურად ხეხუ̂დ ა̈დყედნე.
Line of edition: 23    ალა ხეჭუ̂დიე̄ლ: "იმთ' ე̄სერ ღჷრიხ?" ალას ჩუ ხოხალდა
Line of edition: 24    სგუ̂ებნაუ̂ი, მარე ეში̄ ხეჭუ̂დიე̄ლ. ქო̄ხო̄მბუ̂ეხ, მარე ძღჷდ ძნელ ხაბჟა:
Line of edition: 25    -- ეჯას ყა̈რუ̂ლა̈რ ხო̄გ. ეჩი̄ მუხუ̂იე̄სგი დეშჲა̈რ ლი, მარე მა̈̄ჲ ესამა
Line of edition: 26    იჴჷრჴო̄ლნი, ჟ'ალჴერჴიდ. ჩიქე ხო̄გ კოჯა̈ ყა̈რუ̂ილ, კოჯა̈რ იყჷრიე̄ლხ;
Line of edition: 27    ღო ეჯას ქა̄დრინე, ეჩქა ბუზუ̄ლა̈ ყა̈რუ̂ილ, ეჩქა ჟეღი ყა̈რუ̂ილ. ალჲა̈რს
Line of edition: 28    ქა̄დრინე, ეჩქა ჭიშგრი ყო̄რჟი რა̈შ ხო̄ბ. ეჯა ლახ თჷრტჷ̄ნს
Line of edition: 29    იკედ, ეჩქა სურასა̈ხ ქა ჴედნი ჭიშგა̈რ ქა̄მენჩუ. სა̈რკ ხუღუ̂ა. ისგი̄დრა̈̄ლ,
Line of edition: 30    ქუ̂ეყანაჟი მა̈̄ჲ ჩუ ირდი პირტყუ̂-მერტყუ̂ეუ̂ილ, ჩი̄ს გუ̂ის ხაჰუ̂დი,
Line of edition: 31    მიჩა მაუ̂ინს ჩუ̂ადა̄უ̂შე. ეჩქა სგა ღჷრი, ეშხუ თუ̂ეს ჟი მა̄მა ჲეცხნი.
Line of edition: 32    ეჩქა ჲეცხნი ი ღო ჩუ̄დ იუ̂ჟუნი. ამჟი ლი ეჩი̄ გუ̂ეშ.

Line of edition: 33       ჟ'ანმა̄რე ხმელიკურა მიჩა ხეხუ̂დ: კოჯრე მეყჷრიე̄ლა̈შდ ბერჟა̈
Line of edition: 34    სოტა̈რ ლახუ̂ე̄მ, ბუზუ̄ლ[რ]ეშდ ეშხუ ჟა̈ჴ [თუ̂ი] ლახუ̂ე̄მ. ბუზუ̄ლა̈რს ა̈თდო̄ლახ,
Line of edition: 35    "ეჩქა ბუზუ̄ლა̈რს თუ̂ი ოთგუ̂ეშდ!" ჟეღრეშდ ეშხუ ცა̈ლ დია̈რ
Line of edition: 36    ლახუ̂ე̄მ. "ეჩქა ეჯჲა̈რ ქა ჯუფშუ̂დეხ, ეჩქა ლა̈ხბინედ უ̂ერი ლიბჷრჯე.
Line of edition: 37    ხაბჷრჯად, უ̂ოდე ჭიშგრი ყო̄რთეჟი ჟი დო ათჰად. ეჩქა ჲარუ̂ ფხულე̄მი
Line of edition: 38    ლაწუ̂ე̄ნა უ̂ერ ჟ'ანფიტდ. რა̈შს ქა ხაწუ̂ე̄ნად, ეჩქა ეჯა თჷრტჷ̄ნს
Page of edition: 127  Line of edition: 1    იკდუნი. სუმინ ქა ჴედნი, დო̄ს' ე̄სწუ̂ე̄ნი, ეჩქა მე̄შთხუ̂ა̄მინ ჩუ̂ანბა̈ნი
Line of edition: 2    რა̈შს, ერე [ჯ' ე̄სერ ლახ ჩუ̂ადგრიხ, მიჯნე̄მ ესერ ქუ̂ინ ნო̄სა̄უ̂ ა̈ნკიდ].
Line of edition: 3    ეჩქა სგაუ̂ აჩა̈დხ, ეჯა ჴაბჴაბა̈̄ლ ჩუ̂აყუ̂რე. ეჩქა ჭყინტჷლდ ჟ'ათსგუ̂ირ ი
Line of edition: 4    სოტა̈რს ლაჯუ̂ედნე ბერჟა̈შ, ნა̄ჭას ლაჯუ̂ედნე. სოტა̈რ სგა ლო̄ხოგ
Line of edition: 5    ნაბრა̈̄ჴი̄სგა, ნა̄ჭოშ ჟ'ახხჷლთა̈უ̂. ეჩქა თუ̂ე ქა̄დრინე, ჟი ჲეცხნი. ეჩქას
Line of edition: 6    სგა ხოთლჷ̄რე ნაბრა̈̄ჴის. სოტა̈რ ლახ მო̄მა ხეგნი, ეჩქა ჭყინტჷლდს
Line of edition: 7    ჩუ̂ადა̄უ̂შე. ეჩქა ხა̈̄ქუ̂ნინე სურასა̈ხ: "სი ჭა̈შ, მი ხეხუ̂!" ი ეჯა სგა̈ჲ ნო̄სა
Line of edition: 8    ოთჯჷრუ̂ად: ეჯას ღე̄რბეთ მა̄მა ხანწა̈მ, ხა̈ტ-ი ჯუ̂ა̈რ ხანწა̈მ. ყიას ხოწიბ
Line of edition: 9    უ̂ოქუ̂რა̈ ჯუ̂არ. ეჩნოშ უ̂ოდ ჩუ დო ა̈დნაბნე̄ნს, ეჩქად ნო̄სა
Line of edition: 10    ოთჯჷრუ̂ად. ეჩქა ჟ'ახფუშდუ̄რედ. ჭყინტჷლდ ჩუ̂აცურ, სი უ̂ეშგდ ა̈ნტხ
Line of edition: 11    მიშგუ̂ათეჲსგა".

Line of edition: 12       აჩა̈დხ, ათა̄სდხ კოჯრე მეყჷრიე̄ლს. კოჯა̈რს სოტა̈რ ლოხუ̂გეხ,
Line of edition: 13    ჩუ̂ადმა̈ზრეხ, ქა̄ფიშუ̂დხ. ბუზუ̄ლა̈ ყა̈რუ̂ილს თუ̂ი ოთგუ̂ეშხ. ბუზუ̄ლა̈რდ
Line of edition: 14    ჩუ̂ადმა̈ზრეხ, ქა̄ფიშუ̂დხ. ჟეღა̈რს დია̈რ ოთდეხ, ჟეღა̈რდ ჩუ̂ადმა̈ზრეხ,
Line of edition: 15    ქა̄ფიშუ̂დხ. აბჷრჯეხ უ̂ერს, ესღრიხ, სგა̄ჩა̈დხ ჭიშგრი ყო̄რთეჲსგა,
Line of edition: 16    ჟ'ანწუ̂ე̄ნეხ ჲერუ ფხულე. თჷრტჷნ ა̈ნკიდ სურასა̈ხი ყა̈რუ̂ილ რა̈შდ.
Line of edition: 17    ქა̈̄ნსგიდა სურასა̈ხ, ისგი̄დრა̈̄ლ სა̈რკშუ̂, და̈̄რ ესწუ̂ე̄ნე. სუმინ ქა̄ნჴა̈დ,

Line of edition: 18       მე̄შთხუ̂ა̄მინ ჩუ̂ადნაბნე რა̈შ. ჟ'ანჴა̈დხ უ̂ერხანჟი, სგა̄ჩა̈დხ სურასა̈ხი
Line of edition: 19    ლაყუ̂რათეჲსგა. ჴაბ აყუ̂რე. ჭყინტჷლდ ჟ'ათყუ̂ინე, სოტა̈რ სგა ლოხუ̂გე
Line of edition: 20    ბერჟა̈შ, ნა̄ჭოშ ჟ'ანხჷლთუ̂ე. თუ̂ე ქა̄ჩა̈დ, ეჩქა ანჲა̈ცხ, ხა̈̄ქუ̂ინ:
Line of edition: 21    "სი ჭა̈შ, მი ხეხუ̂!" იმბანა̈̄ლ, მარე ალჲა̈რდ მად ოთჯჷრუ̂ეხ. "უ̂ოდე
Line of edition: 22    უ̂ოქუ̂რა̈ ჯუ̂ა̈რშუ̂ ჩუ დო ა̈თნაბნი, ეჩქად ისგუ მინდუ̂ს მა̄მა ხუ̂ა̈რიდ".

Line of edition: 23       "ათხე [ჰე] უ̂არს ყჷლე', ჟ'ა̈ნცხუ̂ეპ ხმელიკურად დაშნა̈ჲ, ჟ'ესდე კინჩხქა,
Line of edition: 24    ეჩქა ჟ'ა̈ნკუ̂იშ, ჩუ̂ა̈დნაბნა̈̄ნ. ჟ'ა̈ნფუშდუ̄რეხ, ჩუ̂ა̈რიხ სემი ლადეღ.
Line of edition: 25    ეჩქა ხმელიკურად ლა̈̄ქუ̂ინ: "მი უ̂ეშგდ ტუ̂ეხნი, ლა̈ნშა̈ნ ლალო̄მედ
Line of edition: 26    უშხუ̂ა̄რ: ლახ ჩუ მა ა̈გუ̂ყერნი, ეჩქა ჟ'ა̈ლმეჴრად უშხუ̂ა̄რეშ. ლახ ლიბრა̄ლდე̄დდ,
Line of edition: 27    ხედუ̂ა̈̄ჲ ლჷდგა̈რ ლი̄რად, ეჯას ლიც ზისხდ ეგუ̂სიპი
Line of edition: 28    ლაბრა̄ლჟი" ლა̈ხყაჰა̈̄ნხ უშხუ̂ა̄რ. ხმელიკურა უ̂ეშგდ ანტა̈ხ მიჩა ხეხუ̂თე,
Line of edition: 29    ჭყინტჷლდ ჩუ̂ასა̈დ. სურასა̈ხი ლა̈ლგმა̈̄რ იშგუ̂იდ თუ̂ალია̈ნ ლი. ჩია̈̄გ
Line of edition: 30    ლაშდრა̄ლ ლი უ̂ოქუ̂რა̈ ლა̈ჰნა, უ̂ერცხლიშ, მა̈̄ჲ დო ი̄რა, მა̈გ ეჩეისგა
Line of edition: 31    ლი. მარე ეშხუ კჷლ ჩოთშხუ̂ინ ი სერ იშგენ ქა ლახუ̂ე̄მ. სურასა̈ხ
Line of edition: 32    ჩუ̂ა̈დუ̄ჟდა. ჭყინტჷლდ იშდრა̈̄ლ, მარე ამი̄შთა̄ნ დე̄სამა ხოწუ̂ა მიჩა
Line of edition: 33    სა̈ხჷლწიფისგა. მარე კჷლ ოთშხუ̂ინ აშხუ̂ ოთა̈ხიშ. "ეჯა ჰა̈დურდ
Line of edition: 34    ეზა̈რ ი̄რი", ქა̄ჩა̈დ, კჷლ ლათხურმა̈̄შ ხორდა, ჟ'ოხუ̂კიდ ი ჩუ̂ადკარე
Line of edition: 35    ალ უ̂ოთა̈ხ. ამჩუ ხა̈̄ბ ნადა̈̄ურა. ჩუ დეშ ადგა̈რ [სურასა̈ხდ]
Line of edition: 36    ალ ნადა̈̄ურა ი ჩუ̂ათბე ნა̄ჭოშ. ჭყინტჷლდს ათყალუ̈̄ნდა. ქა̈̄დკა̄ფდა
Line of edition: 37    უ̂ეშგინჩუ. ნადა̈̄ურად ხა̈̄ქუ̂ინ: "ბაბა̈̄ ლადეღ სი!" ხოჩა გუ̂ი ლოხდე, ჟ'ანჷგა̈̄ნ
Line of edition: 38    ჭყინტჷლდ: "ბაბა̈̄ ლადეღ ისგუ̂ა თე̄რა̈ლს, მუხუ̈რისგა დაშნა̈ჲ
Page of edition: 128  Line of edition: 1    ხაჭიდ, ეჯას ქ' ე̄მოშ მიკა̈̄ფი, ეჩქა ისგუ̂ათა̄ნ და̈̄რ მერდი". ქო̄თკა̈̄ფ
Line of edition: 2    დაშნა̈ჲ ნადა̈̄ურას, ხაჴიდ ნა̄ჭას, ჟ'ახქუ̂იც, ეჩუნღო ესსიპე, ჭყინტჷლდს
Line of edition: 3    თხუ̂იმ აშხუ̂თე ოთკუ̂ა̈რ, გობრა̈ნჯ მე̄რუ̂ათე, სურასა̈ხ ესსგურე
Line of edition: 4    ბარჯჟი, ჯუ̂ე̄დია მინდო̈რისგა მურყუ̂ამ ხო̄გ, სგა̄დჲე ამხა̄უ̂თეჲსგა.
Line of edition: 5    ამის ჩეი̄ ყო̄რა̈ლ ჟი ხოწიბ.

Line of edition: 6       ა̈დბარა̈̄ნ ხმელიკურა, ლიც ზისხდ ესგუ̂ეშლა̈̄ნ: "ატ, საბრალ მი,
Line of edition: 7    მა̈ჲ გუ̂ეშ მეყა̈რ, მუხუ̂ბე ამდაგრა!" ეჩქა მიჩა ხეხუ̂დ ხა̈̄ქუ̂ინ: "ალა მი
Line of edition: 8    ლე̄თი ჩუ მიხალდა. სურასა̈ხდ იშგენ მა̈გ ჩუ̂ადდა̄უ̂შე, ეჯ ნადა̈̄ურას
Line of edition: 9    იშგენ დეშმა ოხუ̂ჴერჴე ი ჩუ̂ათბე. ეჯ უ̂ოთა̈ხი კჷლ ჩუ̂ათპა̈ჟუ̂ნე, მარე
Line of edition: 10    ეჯა ხოჩა ხოხალდა, ქო̄თქუ̂ით ეჯ კჷლ, ჩუ̂ადკარე უ̂ოთა̈ხ. ეჩეისგა
Line of edition: 11    ხა̈̄ბჷდა ნადა̈̄ურა ნა̄ჭოშ. დაშნა̈ჲ ხოჭჷ̄დდა, ქო̄თკა̈̄ფ ეჯა, ხაჴიდ ნა̄ჭას,
Line of edition: 12    ეჩუნღო მიჩ ხაჴიდ: გობრა̈ნჯ აშხუ̂თე ოთკუ̂ა̈რ, თხუ̂იმ მე̄რუ̂ათე. სურასა̈ხ
Line of edition: 13    ლა̈ჲსგურე ბარჯჟი, ეშ ლახკიჰე მურყუ̂ამთეჲსგა. მა̈გ მა̈მჲედა,
Line of edition: 14    ჭყინტჷლდსი ჟი ხუ̂ასე̄ლუ̂ე, მარე სურასა̈ხი ლიტხე დე̄მჟი მა̈მჲედა.
Line of edition: 15    ჭყინტჷლდ ლახ ჟ'ახსე̄ლუ̂ა, პლატუკს ლაჯუ̂ედნე, მიშგუ̂ა ნაბრა̄ლს.
Line of edition: 16    სურასა̈ხ დე̄მჟი იტი̄ხი, ეჩი̄ ჭა̈შმი მენწირ ქუ̂ეყანაჟი მა̄მა ა̈რი".

Line of edition: 17       აჩა̈დ ხმელიკურა, სგა̄ჩა̈დ უ̂ოთა̈ხთეჲსგა, ჭყინტჷლდ ლჷდგა̈რ ესხუ̂ი̄დდა,
Line of edition: 18    ჟ'ანსე̄ლუ̂ე. თე̄რა̈ლს იბრი̄ნგუ̂ე: "უ̂ოჲ, დედე, მა̈ ხუ̂ა̈ჲ მიუ̂ჟა?"

Line of edition: 19       ხმელიკურად ხა̈̄ქუ̂ინ: "ჯიუ̂ჟა მა̄დეჲ ლჷდგა̈რ ხარდა̈ს. სურასა̈ხ ეშ
Line of edition: 20    ლოხუ̂კიჰა ნადა̈̄ურას, სერ ეჩი̄ მჷტხე ნა̈ჲ მა̄მა ლიშდ". ა̈დბინე ლიგუ̂ნი,
Line of edition: 21    თხუმ ადგა̈რი. ხმელიკურად იმედ ხა̈̄ქუ̂ინ. აჩა̈დხ. სა̈დლობა̈ ონას
Line of edition: 22    სგა̄ნჴა̈დხ ალ მურყუ̂ამთეჲსგა. მურყუ̂მა̈ შდულქა სურასა̈ხ ქა̈̄ნსგიდა,
Line of edition: 23    ქჷმრა̈ლ ანშიდ მურყუ̂ამხა̈ნქა: "დეშ როქ ა̈ნჴჷმრე მიშგუ თხუ̂იმ ი მიშგუ
Line of edition: 24    ლირდე! ათხე ჟ'ესჭუ̂ე̄ნდ, ადო მიშგუ მუხუ̂იე̄სგი მა̄მა ხიშდ. ფისრა̈ჲ
Line of edition: 25    ალ ჴეც, ამი̄ მენწირ ქუ̂ეყანაჟი მა̄მა ა̈რი". ხმელიკურად ხა̈̄ქუ̂ინ სურასა̈ხს:
Line of edition: 26    "ბა̄ზი როქ ლახ ანჴეს, ეჩქა ხოჩა გუჟი ესხუ̂იდ. ე̄სამა ლესუ̂
Line of edition: 27    ეჩი̄ მენწირ, ქა იმჟი ახღორეუ̂, ე დო̄სამა, ეჩქა ოტხენიდ ნიშგუ̂ეჲ
Line of edition: 28    შუკუ̂ს".

Line of edition: 29       ალჲა̈რ ჩუ̂ა̈თპა̈ჟხ ღე̄ლეისგა. ნა̈ბოზ ანჴა̈დ, ალ ჴეც ანჴა̈დ. ნა̈თხუ̂იარე
Line of edition: 30    ხუღუ̂ა. ყო̄რა̈ლისგა ანღრი, ქა ლა̈ხზაზ სურასა̈ხ. ლა̈ხყაჰა̈̄ნ
Line of edition: 31    ჩიქე აშხუ̂ა̈ნ, ღო მე̄რუ̂ახა̈ნ. -- იმნა̈რ მა̈ჩო ამჟი: ათხად ჩიგარ მეგუ̂ნი
Line of edition: 32    მა̈ხუ̂იე̄ნა? -- და̈̄უ̂დ ხა̈̄ქუ̂ინ სურასა̈ხს. სურასა̈ხდ ხა̈̄ქუ̂ინ: -- ისგუ მჷსგდი
Line of edition: 33    ხუ̂ი, ჲაღო, ჲა̈რ მელტი ისგუ̂ანქა.

Line of edition: 34       უ̂ოხშა̈მ ანმა̄რეხ, ჩუ̂ა̈დუ̂ახშმა̈̄ნხ, ლაყუ̂რა ა̈ნსყეხ. ათხად დე̄სა ლჷყუ̂ნე̄ლი
Line of edition: 35    ამიცახა̈ნ, ბა̄ზი სგა ლოხყურდა ხოჩა გუჟი. ადბინე სურასა̈ხდ
Line of edition: 36    ლიშურიე̄ლ. და̈̄უ̂ ლა̈ხჭუ̂ედდა: "იმნა̈რ ხიჩო ლიშურიე̄ლს?" სურასა̈ხდ
Line of edition: 37    ხა̈̄ქუ̂ინ: "ჯ' ე̄სერ ძინა̈რს ღჷრი ცხეკთე, ყო̄რა̈ლს ქა ხოკლი. ჩუ ლახ
Line of edition: 38    მა ა̈ჯყერნი, ეჩქა მი მურყუ̂ამისგა ა̈სუ̂დენი. მა̈ჲ ჩუ̂ემინა, მა̈ჲ ა̈ხუ̂გონუ̂ა,
Page of edition: 129  Line of edition: 1    ადო ისგუ ლირდე ჩუ ლახ მეხლი, ეჩქა ხოჩა გუჟი ხუ̂ირდი".
Line of edition: 2    და̈̄უ̂დ ხა̈̄ქუ̂ინ, ეშ ა̈დჷნბაჟე: "მიშგუ მენწირ ქუ̂ეყანაჟი და̈̄რ ა̈რი". ნა̈ბ
Line of edition: 3    ი უნბილ მა̈გ ოთნა̈ჩდე.

Line of edition: 4       სურასა̈ხდ ქა̄ ხა̈̄ქუ̂ი̄სგუ̂ნე, მა̈̄ჲ ლი მიჩა მჷდგა̈რი: -- ძუღუ̂აისგა თუ̂ეთნე
Line of edition: 5    ჴა̈ნ ა̈რი, უ̂ოქუ̂რა̈ მუჭუ̂ა̈რ ჟი ხა̄გ. აშხუ̂ მიჭუ̂ისგა კოლფი̄დ ა̈რი. ეჩეისგა
Line of edition: 6    შდაუ̂ლა̈რ ა̈რიხ სემი. ეჯჲა̈რს უ̂ოდ ჩუ დო̄რ ადდაგრი, ეჩქად
Line of edition: 7    მიშგუ მენწირ და̈̄რ ა̈რი. ჰამს ჴედნი ძუღუ̂ახა̈ნქა, იგულოუ̂ა̈̄ლ ძუღუ̂ა̈̄
Line of edition: 8    პილჟი, ღო სგა̄დ ღჷრი ძუღუ̂ათეისგა.

Line of edition: 9       მე̄რუ̂ა ძინა̈რს ანჷგა̈̄ნ და̈̄უ̂, აჩა̈დ ლა̈თხუ̂იართე. ჟ'ანჴა̈დ ხმელიკურა
Line of edition: 10    ი მიჩა აფხნეგ ჭყინტჷლდ, ლა̈ხჭუ̂ედდახ სურასა̈ხს. -- მა̈ჲ ჯა̄ქუ̂ინ
Line of edition: 11    ლე̄თი და̈̄უ̂დ?
Line of edition: 12       -- იმ მა̈̄ქუ̂ნინა? დეშ ხიჩოდ ეჩი̄ ნა̈̄ქუ̂ი̄სგუ̂ს! ძუღუ̂აისგა თუ̂ეთნე
Line of edition: 13    ჴა̈ნ როქ ხორი. ეჯას უ̂ოქუ̂რა̈ მუჭუ̂ა̈რ ხა̄გ. უ̂ოქუ̂რა̈ მუჭუ̂ა̈რისგა კოლფი̄დ
Line of edition: 14    ხორი. კოლფი̄დისგა სემი შდაუ̂ალ ა̈რი. ეჯას უ̂ოდ ჩუ დო ალდაგრიდ,
Line of edition: 15    ეჩქად ეჩი̄ მენწირ მა̄მა ა̈რი.

Line of edition: 16       აჩა̈დ მჷშკიდთე, სემი ფუთია̈ნ ცჴემა̈დ ა̈ნსყე, ჲორუ თუ̂ით ფუთია̈ნ
Line of edition: 17    ცხუ̂ია̈რ ა̈ნსყე. აჩა̈დხ ძუღუ̂ა̈̄ პილთე. ქა̄ნჴა̈დ თუ̂ეთნე ჴა̈ნ. ალჲა̈რ
Line of edition: 18    ჩუ ხაპიჟხ. ახფიშუ̂დ ეშხუ ცხუ̂ი, ჟ'ახყუ̂იჩ ეშხუ მიჭუ̂. მე̄რუ̂ე ლახტიხ,
Line of edition: 19    ეჩქა მე̄რუ̂ე მიჭუ̂ ათცუ̂ირნე კადა̈რისგა. მუჭუ̂ა̈რულ ჴა̈ნდ ძუღუ̂ათე
Line of edition: 20    ადსკინე. ქა̈̄ნკიდხ კოლფი̄დ, სგა̄ჩა̈დხ მურყუ̂ამთეისგა, ყო̄რა̈ლ ჩუ̂ადყუჩუ̄რეხ.
Line of edition: 21    ნა̈ბოზ ანჴა̈დ, და̈̄უ̂ი ანჴა̈დ. სგა̄ჩა̈დ ქორთე. სურასა̈ხს ხა̈̄ქუ̂ინ:
Line of edition: 22    "ქრისდია̈ნ ამსუ̂ა̄ლდა̈ ქუ̂ინ მირ მაჴან". სურასა̈ხდ ხა̈̄ქუ̂ინ:
Line of edition: 23    "ათხად ესერ ქრისდია̈ნ ლჷმა̈̄რლი, ათხე ესერ[ი̄] ქრისდია̈ნ ლი". ჩუ̂ა̈დჯჷრუ̂ე
Line of edition: 24    და̈̄უ̂დ. უ̂ახშა̈მ ანმა̄რე, სგა ლახსგურდახ უშხუ̂ა̄რ, ლიდიარა̈̄ლ
Line of edition: 25    ა̈ნბინეხ. ქა̈̄ნკიდხ ეშხუ შდაუ̂ალ, ჩუ̂ადგა̈რხ. და̈̄უ̂დ ლა̈̄ქუ̂ინ: "ჩუ ესერ
Line of edition: 26    ესჯჷჯგნა!" მე̄რუ̂ე ა̈ნკიდხ, ჩუ̂ადგა̈რხ. და̈̄უ̂დ ლა̈̄ქუ̂ინ: "აშხუ̂ხა̈ნჟი ჟი
Line of edition: 27    ა̈მფჷრა̈̄ნ მა̈გ!" მესმე შდაუ̂ალ ჩუ̄დ ადგა̈რხ, ქუ̂ინ ოხჩა̈დ და̈̄უ̂ს. ქა̄ნჴა̈დხ
Line of edition: 28    ამხა̈ნქა, მეუ̂არ ხა̈ხია̈დხ, სგა̄ნჴა̈დხ სურასა̈ხი ქორთეისგა. სურასა̈ხი
Line of edition: 29    კეთილს ტუ̂ეტ ოხუ̂დეხ, აჩა̈დხ მინე ქორთე. სგა̄ნჴა̈დხ ხმელიკურა̈̄
Line of edition: 30    ხეხუ̂თეისგა. ხმელიკურა̈̄ ხეხუ̂ს გუნ ათხი̄დჷნდა. უ̂ად ხუღუ̂ა.
Line of edition: 31    ჲორუ ლახუ̂ბა ხაკლი ჭყინტჷლდს. ლა̈ჲუ̂ა̈დ ეჯჲარე ლისე̄ლუ̂ე, მინე
Line of edition: 32    ჯა̈რი-მა̄რე̄მიშ. ჭჷშხუ̂შ ესგენე სგუ̂ებინჩუ მა̈გ. ოხუ̂დეხ ტუ̂ეტ ხმელიკურა̈̄
Line of edition: 33    ხეხუ̂მი კეთილს ი აჩა̈დხ. სგა̄ნჴა̈დხ წჷრნი ქუ̂ეყანათე. წჷრნი
Line of edition: 34    და̈̄უ̂ა̈ ნახა̈ხუ̂ მანე̄სგრა მუხუ̂ბა ოთყედნეხ. ანჴა̈დხ მეშხა ქუ̂ეყანათე.
Line of edition: 35    მეშხა და̈̄უ̂ა̈ ნახა̈ხუ̂ მაშე̄ნა მუხუ̂ბა ოთყედნეხ. მა̈გ ლჷხეხუ̂ ლიხ უ̂ო̄შთხუ̂
Line of edition: 36    ლახუ̂ბა. სგა̄ნჴა̈დხ მინე სახელწიფთეისგა. დედე̄-მამა ჩუ̂ათმეჩე̄ნახ,
Line of edition: 37    მამა̈̄შდ ლიხჷლწიფ ქო̄თღახ. ჯა მურყუ̂ამთე ა̈მჩედე̄ლი, უ̂ა̈რე
Page of edition: 130  Line of edition: 1    ქო̄ხდა მურყუ̂მა̈ შდულქა. ჩუქუ̂ა̄ნ ხამა̈რ ხეზელა̈̄ლხ. მინე დედე ლაყუ̂რაისგა
Line of edition: 2    ტყუბულს ქა მა̄მა ხოწუ̂ა. სგა̄ჩა̈დხ ქორთე, ჟ'ოხუ̂ე̄ზნანეხ
Line of edition: 3    მინე დედეს-ი მამას. ხოჩა ლირდე ხუღუ̂ახ ჩი̄უ̂შ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.